¿Táan wa a weʼesik u kiʼichkelmil Dios?
¿Táan wa a weʼesik u kiʼichkelmil Dios?
«Beyoʼon jumpʼéel néen ku yeʼesik u kiʼichkelemil Yuumtsileʼ.» (2 CORINTOILOʼOB 3:18.)
1. ¿Baʼax tu yilaj Moisés, yéetel baʼax úuch ka tsʼoʼoki?
ÚUCHILEʼ tsʼaʼab tiʼ utúul máak u yil upʼéel jakʼ óolbeʼen baʼal mix utéen ilaʼak. U kʼaabaʼ le máakaʼ, Moisés. Le tiaʼan kaʼach tu juunal tu kaʼanlil u witsil Sinaieʼ, tsʼaʼab u yil upʼéel baʼal u kʼáatmaj. Le baʼax tsʼaʼab u yiloʼ mix utéen ilaʼak tumen mix máak: tsʼaʼab tiʼ u yil u kiʼichkelmil Jéeoba. Baʼaleʼ, Moiseseʼ maʼ tu jach ilaj Jéeobaiʼ, tumen letiʼeʼ jach nojoch u nojbeʼenil yéetel mix máak jeʼel u páajtal u yilik ka pʼáatak kuxaʼanileʼ. Le oʼolaleʼ, Dioseʼ tu tsʼáaj u «kʼab» yóokʼol Moisés utiaʼal u pixik tak ka tsʼoʼok u máan; maʼ xaaneʼ meyajnaj utúul ángel tiʼ utiaʼal u pixik Moisés. Le ka tsʼoʼok u máaneʼ, tu chaʼaj u yilaʼal tumen Moisés le nojoch sáasilil tu pʼataj yoʼolal u nojbeʼeniloʼ, ku tsʼoʼokoleʼ meyajnaj utúul ángel tiʼ utiaʼal u tʼanik Moisés. Le Bibliaoʼ ku yaʼalik baʼax úuch ka tsʼoʼoki: «Ku tsʼoʼokoleʼ Moiseseʼ j-eʼem tu witsil Sinaí [...,] baʼaleʼ le ka j-éem teʼ j-witsoʼ maʼ tu yojéeltaj wa lenkʼalak [wa táan u léembal] u táan yich ikil tʼaanajik yéetel Yuumtsiliʼ» (Éxodo 33:18–34:7, 29).
2. ¿Baʼax tu tsʼíibtaj Pablo tiʼ bix yeʼesaʼal u kiʼichkelmil Dios tumen le cristianoʼoboʼ?
2 Máans ta tuukuleʼ tiʼ yanech yéetel Moisés teʼ witsoʼ. ¿Maʼ wa jatsʼuts jeʼel a wilik le sáasilil tu pʼataj u nojbeʼenil le Dios yaan tuláakal páajtalil tiʼ yéetel ka a wuʼuy kaʼach bix u tʼaaniʼ? ¿Maʼ wa jatsʼuts jeʼel a wilik ka éemkech kaʼach tu witsil Sinaí yéetel Moisés, le máax tiʼ kʼubaʼab le Ley tumen Diosoʼ? Baʼaleʼ, ¿a wojel wa le cristianoʼob bejlaʼaʼ maas nojoch bix u yeʼeskoʼob u kiʼichkelmil Dios tiʼ le bix tu yeʼesil Moisesoʼ? Lelaʼ jach bey úuchik yeʼesik apóstol Pablo tiʼ upʼéel carta tu tsʼíibtaj le ka tu yaʼaleʼ le máaxoʼob yéeyaʼanoʼob utiaʼal u binoʼob kaʼanoʼ beyoʼob «jumpʼéel néen ku yeʼesik u kiʼichkelemil Yuumtsileʼ» (2 Corintoiloʼob 3:7, 8, 18). Le cristianoʼob xan kun pʼáatloʼob kuxtal way Luʼumeʼ jeʼel u páajtal u yaʼalaʼaleʼ ku chíikbeskoʼob xan u kiʼichkelmil Dios.
Bix u yeʼesik le cristianoʼob u kiʼichkelmil Diosoʼ
3. Toʼoneʼ, ¿bix tsʼoʼok k-kʼaj óoltik Jéeoba?
3 ¿Bix jeʼel u páajtal k-chíikbesik u kiʼichkelmil Dioseʼ? Kex maʼ k-il Dios yéetel maʼ k-uʼuy u tʼaan jeʼel bix uʼuyaʼabik tumen Moiseseʼ, jejeláas bix tsʼoʼok áantaʼal utiaʼal ka k-kʼaj óolte. Ka taal Jesús, le Mesíasoʼ, tsʼoʼok mil quinientos jaʼaboʼob kíimik Moisés, le oʼolaleʼ letiʼeʼ maʼ tu yojéeltaj bix béeychajik le baʼaxoʼob u yaʼalmaj le Ley yoʼolal Jesús, le máax kíim utiaʼal u jáalkʼabkoʼon tiʼ le muʼyajil ku taasik le kʼeban yéetel le kíimiloʼ (Romailoʼob 5:20, 21; Galaciailoʼob 3:19). Tsʼoʼoleʼ, Moiseseʼ maʼ kʼuch u naʼat tuláakal le baʼax u tukulmaj u beetik Diosoʼ, jeʼex le u tsʼáaik upʼéel Reino kun antal tu kʼab le Mesíasoʼ yéetel u sutik paraísoi le Luʼumaʼ. Baʼaleʼ, toʼoneʼ k-ilik u kiʼichkelmil Dios, maʼ yéetel k-ichoʼobiʼ, baʼaxeʼ yéetel u yichil le oksaj óolal yantoʼon yoʼolal le baʼaxoʼob tsʼoʼok k-xokik teʼ Bibliaoʼ. Tsʼoʼok xan k-uʼuyik u tʼaan Jéeoba, baʼaleʼ maʼ yéetel u tʼaan utúul angeliʼ yéetel le kaʼansajoʼob yaan ichil le Bibliaoʼ, maases yéetel le baʼax ku yaʼalik le Evangelioʼoboʼ, leloʼobaʼ jach jatsʼuts bix u yeʼeskoʼob baʼax tu kaʼansaj yéetel tu beetaj Jesús.
4. 1) ¿Bix u yeʼeskoʼob u kiʼichkelmil Dios le máaxoʼob yéeyanoʼob utiaʼal u binoʼob kaʼanoʼ? 2) ¿Bix jeʼel u páajtal u yeʼeskoʼob u kiʼichkelmil Dios le máaxoʼob kun pʼáatloʼob way Luʼumeʼ?
4 Kex bejlaʼa maʼatech u léembal u táan k-ich utiaʼal k-eʼesik u kiʼichkelmil Dios jeʼex Moisés kaʼacheʼ, k-eʼesik bey ku léembal ken k-tsikbalt tiʼ uláakʼ máakoʼob u jatsʼuts modos Jéeoba yéetel le baʼax u tukulmaj u beetikoʼ. Profeta Isaíaseʼ tu tsʼíibtaj yoʼolal máaxoʼob ken u meyajtoʼob Jéeoba teʼ kʼiinoʼobaʼ: «Letiʼob bíin kʼaʼaytik in nojbeʼenil tiʼ múuchʼ kaajoʼob» (Isaías 66:19). Tsʼoʼokol xaneʼ tu libroi 2 Corintoiloʼob 4:1, 2 ku yaʼalik xan: «Tumen Jajal Dios [...] tu kʼubéentajtoʼon le meyajaʼ. Tsʼoʼok k-tsʼáaik juntséelil le baʼax ku beetaʼal ich taʼakbiloʼ tumen subtsiloʼob; maʼ táan k-máan yéetel tuusoʼob mix táan k-jelbesik u maʼalob péektsil Jajal Dios. Baʼaleʼ k-aʼalik chéen u jaajil, beyoʼ k-kʼubéentikba tiʼ u tuukul tuláakal máak tu táan Jajal Dios». Teʼelaʼ Pabloeʼ táan kaʼach u tʼaan tiʼ le máaxoʼob yéeyanoʼob utiaʼal u binoʼob kaʼanoʼ, letiʼobeʼ okaʼanoʼob ichil le túumben núuptʼaanoʼ (2 Corintios 3:6). Le meyaj ku beetkoʼoboʼ tsʼoʼok u tsʼáaik u páajtalil tiʼ yaʼab máakoʼob u yantal kuxtal minaʼan u xuul way Luʼumeʼ. Tsʼoʼoleʼ, le kun binoʼob kaʼan bey xan le kun pʼáatloʼob way Luʼumeʼ, maʼ chéen ku yeʼeskoʼob u kiʼichkelmil Jéeoba yéetel le baʼax ku kaʼanskoʼoboʼ, ku yeʼeskoʼob xan yoʼolal le bix u kuxtaloʼoboʼ. K-eʼesik u kiʼichkelmil Dioseʼ upʼéel baʼal unaj k-beetik yéetel upʼéel meyaj jach jatsʼuts tsʼaʼantoʼon.
5. ¿Baʼax ku yeʼesik le u bin u maas yaʼabtal máaxoʼob meyajtik Diosoʼ?
5 Teʼ kʼiinoʼobaʼ, jeʼex tu yaʼalil Jesuseʼ, u maʼalob péektsilil u Reino Dioseʼ táan u kʼaʼaytaʼal tiʼ tuláakal yóokʼol kaab (Mateo 24:14). Máakoʼob tiʼ tuláakal luʼumiloʼob, chʼiʼibaloʼob, jejeláas tʼaanoʼob yéetel jejeláas kaajoʼobeʼ tsʼoʼok u kʼamkoʼob le maʼalob péektsiloʼ yéetel tsʼoʼok u kʼexik bix u kuxtaloʼob utiaʼal u beetkoʼob baʼax ku yaʼalik Dios (Romailoʼob 12:2; Apocalipsis 7:9). Jeʼex tu beetil le yáax cristianoʼoboʼ, letiʼob xaneʼ maʼ tu páajtal u jáawal u tsikbaltkoʼob le baʼax tsʼoʼok u yilkoʼob yéetel tsʼoʼok u yuʼubkoʼoboʼ (Beetaʼanoʼob [Hechos] 4:20). Bejlaʼeʼ, táan u yúuchul upʼéel baʼal mix utéen ilaʼak, maas tiʼ seis millonesi máakoʼob táan u yeʼeskoʼob u kiʼichkelmil Dios. ¿Tiaʼanech wa ichiloʼobeʼ? Le u bin u maas yaʼabtal máaxoʼob meyajtik Dioseʼ, ku yeʼesikeʼ letiʼeʼ táan u kanáantkoʼon yéetel táan u tsʼáaik u yutsil t-óokʼol. Tsʼoʼoleʼ, ken k-il táan k-jóokʼol táanil kex pʼektaʼanoʼon tumen máaxoʼob maas yaan u páajtalil tiʼ toʼoneʼ, k-ilkeʼ Jéeobaeʼ táan u yáantkoʼon yéetel u kiliʼich muukʼ. Koʼoneʼex ilik baʼaxten k-aʼalik lelaʼ.
Maʼ kun páajtal u xuʼulskoʼob le kʼaʼaytaj ku beetik u kaajal Diosoʼ
6. ¿Baʼaxten kʼaʼabéet oksaj óolal tiʼ máak bey xan maʼ u chʼaʼik saajkil utiaʼal u tsʼáaikuba tu tséel Jéeoba?
6 Koʼox aʼalikeʼ, techeʼ ka tʼaʼanal tu táan utúul juez utiaʼal a waʼalik jaaj le baʼax oʼolal ku takaʼal u pool utúul kʼasaʼan máak yaʼab máax u kíimsmaj. Baʼaleʼ, techeʼ a wojleʼ le máak ku taʼakal u poolaʼ jach yaʼab máaxoʼob yaan yáanal u páajtalil yéetel yaan u beetik tuláakal le ku páajtal utiaʼal maʼ u yojéeltaʼal baʼax u beetmoʼ. ¿Máasaʼ utiaʼal ka tʼaanak máak tu contra utúul máax beyaʼ, kʼaʼabéet maʼ u chʼaʼik saajkil yéetel kʼaʼabéet u kʼub óoltik yaan u kanáantaʼal tumen le autoridadoʼoboʼ? U jaajileʼ, jeʼel u páajtal k-aʼalikeʼ, bey xan yaniloʼonoʼ. Ken tʼaanakoʼon tiʼ Jéeoba yéetel tiʼ baʼax u tukulmaj u beetikeʼ, u jaajileʼ táan k-tʼaan tu contra u Kʼaasilbaʼal yéetel táan k-tsʼáaik ojéeltbileʼ, letiʼeʼ chéen taak u kíimsik wíinikoʼob yéetel u kʼáat u kʼaskúunt u tuukuloʼob (Juan 8:44; Apocalipsis 12:9). U jaajileʼ, kʼaʼabéet oksaj óolal tiʼ máak bey xan maʼ u chʼaʼik saajkil utiaʼal u tsʼáaikuba tu tséel Jéeoba yéetel tu contra u Kʼaasilbaʼal.
7. ¿Máaxoʼob yaan yáanal u páajtalil Satanás, yéetel baʼax táan u yilik u beetik?
7 U jaajileʼ, Jéeobaeʼ utúul Dios yaan tuláakal páajtalil tiʼ, le oʼolaleʼ maas yaan u páajtalil tiʼ u Satanás. Letiʼeʼ maʼ chéen ku páajtal u kanáantik le máaxoʼob ku chúukpajal u yóol u meyajtoʼoboʼ, letiʼeʼ ku tsʼíiboltik xan u beetik (2 Crónicas 16:9). Baʼaleʼ, yáanal u páajtalil Satanaseʼ tiʼ yaan le kʼasaʼan angeloʼob yéetel le máakoʼob maʼatech u meyajkoʼob Diosoʼ (Mateo 12:24, 26; Juan 14:30). Tumen tsʼoʼok u pulaʼal way Luʼum yéetel tumen jach «pʼujaʼan[eʼ]», u jach tsʼaamuba tu contra máaxoʼob meyajtik Dios yéetel ku meyaj tiʼ le yóokʼol kaab utiaʼal u yilik u xuʼulsik u kʼaʼaytaʼal le maʼalob péektsiloʼ (Apocalipsis 12:7-9, 12, 17). ¿Bix u beetik? Yaʼab bixiʼ, baʼaleʼ koʼoneʼex ilik óoxpʼéeliʼ.
8, 9. ¿Baʼax ku beetik Satanás u maas yaabiltik le máakoʼoboʼ, yéetel baʼaxten kʼaʼabéet k-yéeyik yéetel máaxoʼob k-bisikba?
8 Upʼéel baʼax ku meyaj tiʼ Satanás utiaʼal u yilik k-xuʼulsik meyajtik Dioseʼ letiʼ le u chiʼichnakiloʼob le kuxtalaʼ. Óoliʼ tuláakal máak kuxaʼan teʼ tu tsʼook kʼiinoʼobaʼ u yaabilmaj le taakʼinoʼ, u yaabiltmoʼob chéen náaysaj óoloʼob yéetel u yaabiltmuba chéen letiʼob, baʼaleʼ maʼ u yaabiltmoʼob Diosiʼ (2 Timoteo 3:1-4). Jach chiʼichnakoʼob yoʼolal le talamiloʼob ku yilaʼal teʼ kʼiinoʼobaʼ, le oʼolal maʼatech u chʼenxikintkoʼob le maʼalob péektsilil k-bisiktiʼoboʼ. Yéetel maʼ u kʼáat u kʼamoʼob u jaajil ku kaʼansik le Bibliaoʼ (Mateo 24:37-39). Toʼon xaneʼ wa maʼ k-kanáantikbaeʼ jeʼel u káajal k-tuukul jeʼex letiʼobeʼ yéetel jeʼel k-xulik k-tsʼáaik óol meyajt Dioseʼ. Wa k-chaʼik tiʼ k-puksiʼikʼal ka joʼopʼok u yaabiltik u baʼalubaʼob le yóokʼol kaabaʼ, yaan u bin u jáawal k-yaabiltik Dios (Mateo 24:12).
9 Le oʼolaleʼ, toʼoneʼ k-yéeyik yéetel máaxoʼob k-bisikba. Le rey Salomonoʼ tu tsʼíibtaj: «Bisaba yéetel le j-ojéelaloʼoboʼ ka yanak tiʼ teech ojéelaj; bisaba yéetel j-maʼ naʼatoʼoboʼ beyoʼ bíin kʼasakech» (Proverbios 13:20). K-ilik túuneʼ, unaj k-bisikba chéen yéetel le máaxoʼob ku yeʼeskoʼob u kiʼichkelmil Diosoʼ. Lelaʼ jach jatsʼuts. Ken anakoʼon yéetel k-sukuʼunoʼob teʼ múuchʼulil wa tuláakʼ súutukiloʼobeʼ, jach ku líiʼsik k-óol ilik bix u yeʼeskoʼob yaabilaj, oksaj óolal, kiʼimak óolal yéetel naʼatil. K-bisikba yéetel máaxoʼob beyaʼ ku muʼukʼankúuntkoʼon utiaʼal maʼ u jáawal k-kʼaʼaytaj.
10. ¿Bix u meyaj tiʼ Satanás le bix u pʼaʼaskoʼon le máakoʼob utiaʼal ka lúubuk k-óol k-eʼes u kiʼichkelmil Diosoʼ?
10 U pʼaʼastaʼal máakeʼ letiʼ u kaʼapʼéel baʼax ku meyaj tiʼ Satanás utiaʼal u beetik u jáawal k-eʼesik u kiʼichkelmil Diosoʼ. Le baʼax ku beetik Satanasaʼ k-ojel yaan u yúuchul, tumen tak Jesucristoeʼ cheʼejtaʼabi, mixbaʼalkúuntaʼabi, yéetel túubaʼab u yich le táan u kʼaʼaytaj kaʼachoʼ (Marcos 5:40; Lucas 16:14; 18:32). Le yáax cristianoʼob xanoʼ pʼaʼastaʼaboʼob (Beetaʼanoʼob 2:13; 17:32). Lelaʼ bey xan u beetaʼaltoʼon bejlaʼoʼ. Tak apóstol Pedroeʼ tu yaʼaleʼ yaan u yaʼalaʼal maʼ u jaajil profetaʼoniʼ. Tu yaʼalaj xaneʼ, «tiʼ le u tsʼook kʼiinoʼoboʼ bíin taalak pʼaʼas máakoʼob, táan u kuxtaloʼob jeʼel bix u kʼáat u kʼaakʼas tsʼíibolaloʼobeʼ, yéetel táan u yaʼalikoʼob: ¿Baʼax j-úuch yéetel u tsʼaatʼaanil bíin taalak Cristo? Tumen [...] tak bejelaʼeʼ tuláakal baʼal keet yanil jeʼel bix [...] yanil kaʼach le ka j-beetaʼab yóokʼol kaabeʼ» (2 Pedro 3:3, 4). Le máakoʼob bejlaʼoʼ ku pʼaʼaskoʼonoʼob tumen ku yaʼalikoʼobeʼ k-oksaj óoltik baʼaloʼob maʼ jaajtakiʼ. Yaʼab xan máax aʼalikeʼ maʼ maʼalob baʼax ku yaʼalik le Biblia utiaʼal k-nuʼuktik kuxtal bejlaʼeʼ, yéetel ku yaʼalikoʼob xaneʼ chéen kunel le kʼaʼaytaj k-beetikoʼ (1 Corintoiloʼob 1:18, 19). Toʼon táan k-meyajtik Dioseʼ maʼ xaaneʼ jeʼel k-pʼaʼastaʼal tumen k-éet xookoʼob, k-éet meyajoʼob yéetel tak tumen k-láakʼoʼobeʼ. Baʼaleʼ, leloʼ maʼ tu lúuʼsik k-óol, baʼaxeʼ k-ilik maʼ u jáawal kʼaʼaytaj utiaʼal k-eʼesik u kiʼichkelmil Dios, tumen jeʼex Jesuseʼ k-ojleʼ le baʼax ku yaʼalik u Tʼaan Diosoʼ jach jaaj (Juan 17:17).
11. ¿Bix u meyaj tiʼ Satanás le chʼaʼapachtajil utiaʼal u beetik u jáawal u kʼaʼaytaj le cristianoʼoboʼ?
11 Le chʼaʼapachtajiloʼ, letiʼe u yóoxpʼéel baʼax ku meyaj tiʼ Satanás utiaʼal u beetik u jáawal k-kʼaʼaytajoʼ. Jesuseʼ tu yaʼalaj tiʼ u j-kaambaloʼob: «Bíin kʼuʼubukeʼex túun utiaʼal ka loobiltaʼakeʼex yéetel bíin kíimsaʼakeʼex, yéetel tuláakal yóokʼol kaab kun pʼektikeʼex tin woʼolal» (Mateo 24:9). U jaajileʼ, u j-jaajkunajoʼob Jéeobaeʼ tsʼoʼok u jach chʼaʼapachtaʼaloʼob tiʼ yaʼab tuʼuxoʼob tiʼ le yóokʼol kaabaʼ. Tsʼoʼok xan k-kankeʼ Jéeobaeʼ úuch u yaʼal yaan u pʼektaʼal máaxoʼob meyajtik tumen le máaxoʼob meyajtik Satanasoʼ (Génesis 3:15). K-ojel xaneʼ wa ku chúukpajal k-óol tu táan le talamiloʼoboʼ táan k-eʼesik k-tsʼáaikba tu tséel u gobernación Jéeoba. Le baʼax k-ojelaʼ ku tsʼáaiktoʼon u muukʼil utiaʼal k-aktáantik tak le talmiloʼob maas nuuktakoʼ. Wa k-jach chʼaʼatukulmaj maʼ kun jáawal k-eʼesik u kiʼichkelmil Dioseʼ, mix upʼéel chʼaʼapachtajil ken u beet u jáawal k-kʼaʼaytaj utiaʼal mantatsʼ.
12. ¿Baʼaxten unaj u kiʼimaktal k-óol wa ku chúukpajal k-óol k-aktáant le baʼaxoʼob ku beetik le Kʼaasilbaʼaloʼ?
12 Techeʼ, ¿ka beetik wa tuláakal le ku páajtal utiaʼal maʼ u beetaʼal a lúubul tumen u baʼalubaʼob le yóokʼol kaabaʼ? ¿Ka wilik wa a weʼesik chúukaʼan óolal ken pʼaʼastaʼakech yéetel ken chʼaʼapachtaʼakech? Wa ka beetikeʼ, jach yaan baʼax oʼolal u kiʼimaktal a wóol. Jesuseʼ tu yaʼalaj tiʼ u j-kaambaloʼob: «Kiʼ a wóoleʼex le ken poʼochʼokeʼex tumen máakoʼob, ken beetaʼak tiʼ teʼex baʼaloʼob kʼaastak, bey xan ken líikʼesaʼak ta wóokʼoleʼex tuláakal tuusoʼob tin woʼolal. Kiʼichajak a wóoleʼex, tumen bíin a kʼameʼex jumpʼéel nojoch boʼolal teʼ j-kaʼanoʼ, tumen bey xan chʼaʼapachtaʼabikoʼob le j-bóobatoʼob j-taaloʼob táanil tiʼ teʼexoʼ» (Mateo 5:11, 12). Le chúukaʼan óolal ka weʼeskoʼ ku chíikbesikeʼ u kiliʼich muukʼ Dioseʼ táan u yáantkech utiaʼal a weʼesik u kiʼichkelmil Dios (2 Corintoiloʼob 12:9).
Le chúukaʼan óolaloʼ tiʼ Jéeoba u taal
13. ¿Baʼax beetik u chúukpajal k-óol teʼ meeyjil kaʼansajoʼ?
13 Upʼéel baʼax beetik u chúukpajal k-óol teʼ meeyjil kaʼansajoʼ letiʼe yaabilaj k-uʼuyik yoʼolal Jéeobaoʼ yéetel tumen ku kiʼimakkúunsik k-óol k-eʼesik u kiʼichkelmil. Toʼoneʼ u suukaʼanileʼ k-beetik jeʼex u beetik máaxoʼob k-yaabilmoʼob yéetel k-tsikikoʼobeʼ, Jéeoba túuneʼ letiʼ le máax maas maʼalob ka k-beet jeʼex letiʼoʼ. Yoʼolal u yaabilajeʼ tu túuxtaj u Paal way Luʼum utiaʼal u tsʼáaik kʼaj óolbil u jaajileʼ yéetel utiaʼal u salvartik le wíinikoʼob ku yuʼubkoʼob u tʼaanoʼ (Juan 3:16; 18:37). Jeʼex Dioseʼ, toʼoneʼ k-kʼáat xan tuláakal wíinik ka u kʼex bix u kuxtal utiaʼal u salvarkuba, le oʼolal k-kʼaʼaytik le maʼalob péektsil tiʼoboʼ (2 Pedro 3:9). Wa k-tuukul beyaʼ yéetel wa k-chʼaʼatuklik beetik jeʼex Dioseʼ le kun péekskoʼon utiaʼal maʼ u jáawal k-eʼesik u kiʼichkelmil Dios t-meeyjil kaʼansaj.
14. ¿Bix u tsʼáaiktoʼon muukʼ Jéeoba utiaʼal u chúukpajal k-óol beet le meeyjil kaʼansajoʼ?
14 K-ilik túuneʼ, Jéeoba tsʼáaiktoʼon u muukʼil utiaʼal u chúukpajal k-óol beet le meeyjil kaʼansajoʼ. Letiʼeʼ ku yáantkoʼon yéetel ku líiʼsik k-óol yéetel u kiliʼich muukʼ, u kaajal bey xan yéetel baʼax ku yaʼalik le Bibliaoʼ. Jéeobaeʼ «ku tsʼáaik chúukaʼan óolal» tiʼ máaxoʼob u kʼáatoʼob u yeʼesoʼob u kiʼichkelmil, ku núukik u payalchiʼob yéetel ku tsʼáaiktiʼob naʼatil utiaʼal u aktáantkoʼob le talamiloʼoboʼ (Romailoʼob 15:5; Santiago 1:5). Tsʼoʼoleʼ, maʼatech u chaʼik ka taalak t-óokʼol talamiloʼob maʼ tu páajtal k-aktáantkoʼob. Wa k-kʼubik k-óol tiʼeʼ, letiʼeʼ yaan u yáantkoʼon utiaʼal k-il «bix jeʼel u páajtal a jóokʼoleʼex» tiʼ le talamiloʼ utiaʼal maʼ u jáawal k-eʼesik u kiʼichkelmil (1 Corintoiloʼob 10:13).
15. ¿Baʼax áantkoʼon utiaʼal ka chúukpajal k-óol?
15 Wa ku chúukpajal k-óol teʼ meeyjil kaʼansajoʼ leloʼ ku yeʼesik táan u yáantkoʼon u kiliʼich muukʼ Dios. Koʼox aʼalikeʼ, ku yaʼalaʼaltech ka jóoʼkech a síi waaj joonaj joonai. Yéetel ku yaʼalaʼaltecheʼ unaj a jóoʼsik tiempo tiʼ a meyaj yéetel a xupik a taakʼin utiaʼal a beetik. Baʼaleʼ maʼ kun xáantal ken a wileʼ jach chéen upʼíit máakoʼob chʼaʼik le waaj ka tʼoxkoʼ, yéetel yaneʼ ku pʼektikechoʼob ikil a beetik. ¿Yaan wa u seguer a tʼoxik le waaj sáamsamaloʼ? Maʼ xaaneʼ maʼatan. Baʼaleʼ, maʼ xaaneʼ úuch joʼopʼok a jóoʼsik u tiempoi yéetel a xupik a taakʼin utiaʼal a kʼaʼaytik le maʼalob péektsiloʼ. ¿Baʼaxten? ¿Máasaʼ tumen a yaabilmaj Jéeoba yéetel tumen tsʼoʼok u yáantkech yéetel u kiliʼich muukʼ utiaʼal ka chúukpajak a wóol? ¡Jach beyoʼ!
Upʼéel meyaj maʼ ken k-tuʼubse
16. Wa ku chúukpajal k-óol teʼ meeyjil kaʼansajoʼ, ¿baʼax utsiloʼob jeʼel u taasiktoʼon bey xan tiʼ le máaxoʼob chʼenxikintkoʼonoʼ?
16 Le meeyjil kaʼansaj yaan yil yéetel le túumben núuptʼaanoʼ, upʼéel meyaj yéetel mix baʼal jeʼel u páajtal u ketaʼaleʼ (2 Corintoiloʼob 4:7). Tsʼoʼoleʼ, le meeyjil kaʼansaj xan ku beetik le uláakʼ tamanoʼob tiʼ tuláakal yóokʼol kaaboʼ, upʼéel baʼal jach yaʼab xan u tojol. Wa ku chúukpajal a wóol a beet le meyajaʼ yaan a wilik u béeychajal le baʼax tu yaʼalaj Pabloaʼ: «Bíin a tokaba teech yéetel bíin a tok xan le máaxoʼob uʼuyikechoʼ» (1 Timoteo 4:16). Chéen tukult baʼax utsiloʼob ku taasik leloʼ. Le maʼalob péektsil k-kʼaʼaytikoʼ ku tsʼáaik tiʼ le máakoʼob u páajtalil u kuxtaloʼob minaʼan u xuul. Teech xaneʼ jeʼel u páajtal a jach biskaba yéetel le máaxoʼob ka wáantikoʼob u natsʼubaʼob tiʼ Diosoʼ. Tukult bukaʼaj kun kiʼimaktal a wóol ken yanaktech le kuxtal minaʼan u xuul teʼ Paraíso yéetel le máaxoʼob ta wáantoʼob u kʼaj óoltoʼob Diosoʼ. U jaajileʼ, letiʼobeʼ mix bikʼin ken u tuʼubsoʼob le áantaj ta tsʼáajtiʼoboʼ. Leloʼ, ¡jach túun yaan u beetik u kiʼimaktal a wóol!
17. ¿Baʼaxten k-aʼalik maʼ kun kaʼa yantal kʼiinoʼob jeʼex le k-ilkoʼob bejlaʼaʼ?
17 Maʼ kun kaʼa yantal kʼiinoʼob jeʼex le k-ilkoʼob bejlaʼaʼ. Maʼ kun kaʼa kʼaʼaytbil le maʼalob péektsil tiʼ máaxoʼob u náachkuntmubaʼob tiʼ Jéeobaoʼ. Noeiʼ kuxlaj tiʼ kʼiinoʼob tuʼux yanchaj máakoʼob beyoʼ yéetel tu yilaj u xuʼulsaʼaltiʼob. Tukult bukaʼaj úuchik u kiʼimaktal u yóol le ka tu yojéeltaj chúukpaj u yóol u beet baʼax u kʼáat Dios le ka tu beetaj le cheem meyajnaj utiaʼal u salvarkuba letiʼ bey xan u familiaoʼ (Hebreob 11:7). Teech xaneʼ jeʼel u páajtal u yantaltech le kiʼimak óolal beyoʼ. Tukult bix ken a wuʼuyilaba teʼ Paraíso ken a kʼaʼajs tuláakal le meyaj ta beetaj teʼ tu tsʼook kʼiinoʼob utiaʼal a tsʼáaik táanil ichil a kuxtal u Reino Diosoʼ.
18. ¿Baʼax ku yaʼaliktoʼon Jéeoba jach ku líiʼsik k-óol?
18 Maʼ u jáawal k-eʼesik u kiʼichkelmil Dios, tumen leloʼ upʼéel meyaj maʼ ken k-tuʼubse. Tsʼoʼoleʼ, mix Jéeoba ken u tuʼubs le meyaj k-beetkoʼ. Teʼ Bibliaoʼ k-xokik le jatsʼuts tʼaanoʼobaʼ: «Jajal Dioseʼ toj, yéetel maʼ bíin u tuʼubs le baʼax tsʼoʼok a beetikeʼexoʼ yéetel le yaakunaj tsʼoʼok a weʼesikeʼex tiʼoʼ ikil ta wáantilakeʼex le sukuʼunoʼob tiʼ le oksaj óolaloʼ, jumpʼéel baʼax láayliʼ táan a beetikeʼex. Baʼaleʼ k-kʼáateʼ jujuntúul tiʼ teʼexeʼ ka u yeʼes tak tu xuul le líikʼ óolalaʼ utiaʼal ka utsil tsʼoʼokpajak baʼax ka páaʼtikeʼex. Maʼ k-kʼáat ka maʼakʼóolchajkeʼexiʼ, baʼaleʼ ketabaʼex yéetel le máaxoʼob tu yoʼolal le oksaj óolaloʼ yéetel tu yoʼolal le chúukaʼan óolaloʼ táan u kʼamikoʼob le ayikʼalil aʼalaʼan tiʼob tumen Jajal Diosoʼ» (Hebreob 6:10-12).
¿Jeʼel wa u páajtal a tsolkeʼ?
• ¿Bix u yeʼesaʼal tumen le cristianoʼob u kiʼichkelmil Diosoʼ?
• ¿Baʼaxoʼob ku meyaj tiʼ u Kʼaasilbaʼal utiaʼal u yilik u jáawsik u kʼaʼaytaʼal le maʼalob péektsil tumen le máaxoʼob meyajtik Diosoʼ?
• ¿Baʼax eʼesik táan u yáantkoʼon u kiliʼich muukʼ Dios?
[U kʼáatchiʼiloʼob le xookoʼ]
[U tsolajil le oochel teʼ táan juʼun 5]
U táan yich Moiseseʼ tu yeʼesaj u kiʼichkelmil Dios
[U tsolajil le oochel teʼ táan juʼun 6]
Toʼoneʼ k-eʼesik u kiʼichkelmil Dios t-meeyjil kaʼansaj