Bix u líiʼsik k-óol u kabal óolal Jéeoba

DAVIDEʼ utúul máak tu muʼyajtaj yaʼab talamiloʼob. Yanchaj u muʼyajtik tuláakal baʼax beetaʼab tiʼ tumen rey Saúl, u kʼasaʼan suegro. Letiʼeʼ óoxtéen tu yóotaj u kíims David yéetel upʼéel lanza, máan yaʼab jaʼab táan u chʼaʼapachtik tak ka tu beetaj u bin kʼáax u taʼakbesuba (1 Samuel 18:11; 19:10; 26:20). Baʼaleʼ Davideʼ, kanáantaʼab tumen Dios, maʼ tu chaʼaj u beetaʼal loob tiʼ tumen Sauliʼ, mix tumen uláakʼ máaxoʼob pʼekmil. Le oʼolaleʼ, jeʼel u páajtal k-naʼatik bix u yuʼubkuba kaʼach David le ka tu kʼayaj: «Yuumtsil teech in j-kanan, teech in j-taʼakbesaj, teech jáalkʼabtiken, teech kanáantiken, teech tokiken; a wutsileʼ tsʼoʼok u beetik u bin teen [...] utsil» (2 Samuel 22:2, 36). ¿Yanchaj wa túun baʼax u yil u kabal óolal Jéeoba úuchik u kʼuchul David u beetuba nojchil tu luʼumil Israel?

Ken u yaʼal le Biblia kabal u yóol Jéeobaoʼ, maʼ u kʼáat u yaʼal wa minaʼan u páajtaliliʼ mix xan wa yaan máax aʼalik tiʼ baʼax unaj u beetkiʼ. U kʼáat u yaʼaleʼ ku chʼaʼik óotsilil tiʼ máaxoʼob ku yilkoʼob u beetkoʼob baʼax u kʼáat yéetel ku yáantkoʼob. U libroi Salmo 113:6, 7, ku yaʼalik: «[Jéeobaeʼ] ku kabalkúuntik u yóol utiaʼal u pakt kaʼan yéetel luʼum. Yuumtsileʼ ku líikʼsik óotsil luubul j-luʼum». Ken u yaʼal le teksto ku kabalkúuntik u yóoloʼ u kʼáat u yaʼaleʼ ku «chintal utiaʼal paakat» (La Nueva Biblia Latinoamérica, 1995). Tumen Jéeoba tiaʼan kaʼaneʼ, jeʼel u páajtal u yaʼaleʼ chinlaj wa tu kabalkúuntaj u yóol utiaʼal u yáantik David, utúul kʼeban máak kabal u yóol jach u kʼáat u meyajt Jéeoba. Le oʼolaleʼ Davideʼ tu yaʼalaj: «Kex tumen tiaʼan Yuumtsil teʼ kaʼanaloʼ ku paktik le j-kabal óol wíinikoʼ» (Salmo 138:6). K-ojéeltik bix úuchik u chʼaʼabal óotsilil tiʼ David yéetel bix úuchik u yáantaʼal tumen Dioseʼ, unaj u líiʼsik óol k-beet tuláakal baʼax u kʼáat Dios.

Kex Jéeoba u Noj jalaʼachil tuláakal baʼaleʼ, u kʼáat u bisuba yéetel cada utúul tiʼ toʼon. Lelaʼ ku yáantkoʼon k-oksaj óolteʼ ken k-máans jeʼel baʼalak talamileʼ letiʼeʼ yaan u yáantkoʼon yéetel maʼatan u tuʼubskoʼon. Tiʼ Israel u kaajal kaʼacheʼ ku yaʼalaʼaleʼ, Jéeobaeʼ letiʼ le máax «[kʼaʼajsikoʼob] le ken lúubuk [u yóoloʼoboʼ], tumen u yaakunajeʼ minaʼan u xuul» (Salmo 136:23).

Jeʼex Davideʼ, toʼon xaneʼ k-muʼyajtik yaʼab talamiloʼob. Maʼ xaaneʼ k-pʼaʼastaʼal tumen le máaxoʼob maʼ u kʼaj óoloʼob Diosoʼ, wa táan k-muʼyaj yoʼolal upʼéel kʼojaʼanil wa táan k-muʼyaj tumen tsʼoʼok u kíimil utúul máax k-yaabilmaj. Baʼaleʼ jeʼel baʼalak ka k-muʼyajteʼ jeʼel u páajtal k-kʼáatik tiʼ Jéeoba ich payalchiʼ yéetel tuláakal k-puksiʼikʼal ka u chʼaʼatoʼon óotsilileʼ. Letiʼ túuneʼ yaan u chintal u chʼenxikint baʼax k-aʼalik tiʼ. Le salmistaoʼ tu tsʼíibtaj: «Yuumtsileʼ u tsʼaamaj u paakat yóokʼol le utsil máakoʼoboʼ yéetel ku chʼenxikintik u yawatoʼob» (Salmo 34:15). ¿Máasaʼ lelaʼ ku péekskoʼon utiaʼal ka tuukulnakoʼon tiʼ bix u líiʼsik k-óol u kabal óolal Jéeoba?