Kʼaʼabéet k-nuʼuktikba yoʼolal oksaj óolal, maʼ yoʼolal baʼaxoʼob k-paktikiʼ
Kʼaʼabéet k-nuʼuktikba yoʼolal oksaj óolal, maʼ yoʼolal baʼaxoʼob k-paktikiʼ
«Tioʼolal oksaj óolal k-máan, maʼ tioʼolal k-paakat[iʼ].» (2 CORINTIOS 5:7, LTN.)
1. ¿Baʼax eʼesik apóstol Pabloeʼ ku máan wa ku nuʼuktikuba kaʼach yoʼolal oksaj óolal, maʼ tu yoʼolal baʼaxoʼob ku paktikiʼ?
TU JAʼABIL 55 teʼ yáax siglooʼ, utúul máak jach ku chʼaʼapachtik kaʼach le cristianoʼoboʼ tsʼokaʼaniliʼ u máan veinte jaʼaboʼob joʼopʼok u meyajtik Dios. U kʼaabaʼ le máakaʼ Saulo, yéetel ka máan kʼiineʼ apóstol Pablo kʼuchik kʼaj óolbil. Baʼaleʼ, le bukaʼaj tiempo tsʼoʼok u máanoʼ maʼ u beet u pʼíittal u oksaj óolal tiʼ Diosiʼ. Kex maʼ u yil baʼaxoʼob táan u beetaʼal teʼ kaʼan tumen Dios utiaʼal u béeykuntik le baʼaxoʼob u yaʼalmoʼ, jach muʼukʼaʼan u oksaj óolal tiʼ. Le oʼolaleʼ, tu yaʼalaj tiʼ le máaxoʼob yéeyaʼanoʼob utiaʼal u binoʼob kaʼanoʼ: «Tioʼolal oksaj óolal k-máan, maʼ tioʼolal k-paakat[iʼ]» (2 Corintios 5:7, LTN).
2, 3. 1) ¿Bix k-eʼesik k-nuʼuktikba yoʼolal k-oksaj óolal? 2) ¿Baʼax u kʼáat u yaʼal u nuʼuktikuba máak yoʼolal baʼax ku paktik?
2 «K-máan» wa k-nuʼuktikba yoʼolal oksaj óolaleʼ u kʼáat u yaʼaleʼ k-oksaj óoltik Dioseʼ jeʼel u páajtal u nuʼuktik k-kuxtaleʼ; u kʼáat u yaʼaleʼ k-jach oksaj óoltik Dioseʼ u yojel baʼax jeʼel u beetik u bintoʼon utsileʼ (Salmo 119:66). Le ken k-chʼaʼatukult k-beetik wa baʼax yéetel ken k-il bix ken k-beetileʼ, k-tuukul xan tiʼ «le baʼaloʼob maʼ tu yilaʼaloʼob[oʼ]» (Hebreos 11:1, LTN). Ichil leloʼobaʼ táakaʼan «le túumben kaʼanoʼoboʼ yéetel le túumben luʼum[oʼ]» (2 Pedro 3:13). Baʼaleʼ, u nuʼuktikuba máak chéen yoʼolal baʼaxoʼob ku paktikeʼ u kʼáat yaʼaleʼ u chaʼik máak ka nuʼuktaʼak u kuxtal chéen tumen baʼaxoʼob ku yilik wa ku yuʼubik. Lelaʼ jach maʼ maʼalob ka k-beet beyoʼ, tumen jeʼel u beetik u xuʼulul k-kuxtal jeʼex u kʼáat Dioseʼ (Salmo 81:12; Eclesiastés 11:9).
3 Kex wa táakaʼanoʼon ichil le u chan múuchʼ tamanoʼob kun binoʼob kaʼan wa táakaʼanoʼon ichil le «uláakʼ j-tamanoʼob» kun pʼáatloʼob way Luʼumeʼ, kʼaʼabéet k-ilik k-nuʼuktikba yoʼolal k-oksaj óolal, maʼ tu yoʼolal baʼaxoʼob k-paktikiʼ (Lucas 12:32; Juan 10:16). Koʼoneʼex ilik bix jeʼel u yáantkoʼon le tsolnuʼuk tu tsʼáaj Pablooʼ, wa k-tsʼáaik ichil k-kuxtaleʼ maʼ ken k-kiʼimakkúunt k-óol ich tsʼeʼetsʼek kʼiinoʼob yéetel le kʼebanoʼ, maʼ ken bin tu paach chéen ayikʼaliloʼob yéetel maʼ kun tuʼubultoʼon wa taʼaytak u xuʼulsaʼal tiʼ le kʼasaʼan yóokʼol kaabaʼ. Yaan xan k-ilik baʼax talmil jeʼel u taasik tiʼ máak u nuʼuktikuba chéen yéetel baʼaxoʼob ku paktikeʼ (Hebreob 11:25).
Maʼ k-kiʼimakkúuntik k-óol kex chéen u chan súutuk yéetel le kʼebanoʼ
4. ¿Baʼax tu yéeyaj u beetik Moisés, yéetel baʼaxten?
4 Tuukulnakoʼon tiʼ le kuxtal jeʼel u yantal kaʼach tiʼ Moisés, u paal Amramoʼ. Tumen tiʼ líikʼ tu yotoch u reyil Egiptoeʼ, jeʼel kaʼach u páajtal u yantal yaʼab páajtalil yéetel ayikʼalil tiʼeʼ. Maʼ xaaneʼ jeʼel kaʼach u tuukul beyaʼ: «Tsʼoʼok u maʼalob kaʼansaʼalten tuláakal le baʼaxoʼob u yojel le egipcioʼoboʼ, ku beetaʼal baʼax kin waʼalik yéetel ku kʼaʼamal baʼax kin beetik. Wa ka pʼáatken ichil u familia le reyoʼ jeʼel u meyajten le páajtalil yanten utiaʼal in wáantik in wéet ebreoiloʼob pechʼ óoltaʼanoʼoboʼ» (Beetaʼanoʼob [Hechos] 7:22). Baʼaleʼ, letiʼeʼ «tu yóoltaj mukʼyaj yéetel u kaajal [Dios]». ¿Baʼaxten? ¿Baʼax péeks u pʼat paachil tuláakal u ayikʼaliloʼob Egipto? Le Bibliaoʼ ku núukik: «Tu yoʼolal le oksaj óolaloʼ Moiseseʼ j-lukʼ tiʼ u luʼumil Egipto, maʼ tu chʼaʼaj sajakil tiʼ u kʼuuxilil le [reyoʼ], baʼaleʼ j-pʼáat jeetsʼel tiʼ u tuukul bey táan u yilik le Jajal Dios maʼ táan u yilaʼaloʼ» (Hebreob 11:24-27). Moiseseʼ ku oksaj óoltik Jéeobaeʼ ku yeʼesik u yutsil tiʼ le máaxoʼob ku beetkoʼob baʼaxoʼob maʼalobtakoʼ, lelaʼ le áant utiaʼal maʼ u chaʼik u lúubul tiʼ kʼeban utiaʼal u kaxtik chéen u yutsil bey xan utiaʼal u kiʼimakkúuntik u yóol chéen tsʼeʼetsʼek kʼiinoʼobiʼ.
5. ¿Baʼax ku péekskoʼon k-beet le baʼax tu beetaj Moisesoʼ?
5 Toʼon xaneʼ yaan kʼiin ku kʼaʼabéettal k-chʼaʼatuklik beetik baʼaloʼob talamtak: «¿Yaan wa baʼaxoʼob suukaʼan in beetik maʼalob ka in pʼatoʼob tumen bey maʼ jach maʼalobtak tu táan Dioseʼ? ¿Unaj wa in kʼamik upʼéel meyaj maʼalob u náajalil, baʼaleʼ maʼ ken u chaʼa in maas kʼubkimba in meyajt Dios?». Le baʼax tu beetaj Moisesoʼ ku yáantkoʼon utiaʼal maʼ k-chʼaʼatuklik k-bin tu paach chéen u baʼalubaʼob le yóokʼol kaab jeʼex u beetik u maasil máakoʼoboʼ, baʼaxeʼ k-oksaj óoltik baʼax u yaʼalmaj u beetik Jéeoba, «le Jajal Dios maʼ táan u yilaʼaloʼ». Jeʼex tu beetil Moiseseʼ, u biskuba máak yéetel Jéeobaeʼ letiʼe baʼax maas maʼalob jeʼel u páajtal u yantal tiʼ máakoʼ, maʼ letiʼe baʼaloʼob ku tsʼáaik le yóokʼol kaabaʼ.
6, 7. 1) ¿Bix úuchik u yeʼesik Esaú ku nuʼuktikuba yoʼolal baʼaxoʼob ku paktik? 2) ¿Baʼax k-kanik tiʼ le baʼax tu beetaj Esauoʼ?
6 Beoraaʼ koʼoneʼex ketik baʼax tu beetaj Moisés yéetel baʼax tu beetaj Esaú, u paal Isaac, utúul u palitsil Dios úuchil. Baʼax ku kaxtik Esaú kaʼacheʼ u séeb kʼamik baʼax ku tsʼíiboltik (Génesis 25:30-34). Tumen jach mix baʼal tu taasil le baʼaloʼob ku taaloʼob tiʼ Diosoʼ «tioʼolal jumpʼéel janaleʼ tu konaj u yáax paalil» (Hebreos 12:16, LTN). Le ka tu konaj u yáax paaliloʼ maʼ tu tuklaj wa táan u náachkuntikuba tiʼ Jéeobaiʼ mix tu tuklaj baʼax talmiloʼob ken u beet u yantal kaʼach tiʼ u paalaloʼobiʼ. Maʼ tuukulnaj jeʼex u tuukul Dioseʼ. Maʼ tu oksaj óoltaj baʼax u yaʼalmaj Dios u beetkiʼ, tu taasaj jach mix baʼalil. Esaueʼ tu nuʼuktuba yoʼolal le baʼaxoʼob ku paktikoʼ, maʼ yoʼolal oksaj óolaliʼ.
7 Le baʼax tu beetaj Esauoʼ ku kaʼansiktoʼon baʼax maʼ unaj k-beetkiʼ (1 Corintoiloʼob 10:11). Le yóokʼol kaab yaan yáanal u kʼab Satanasoʼ ku beetik k-tuklik kʼaʼabéet u séeb kʼamik máak baʼax ku tsʼíiboltik, baʼaleʼ, toʼoneʼ ken k-chʼaʼatukult k-beetik upʼéel baʼal, kex chichan wa nojcheʼ, maʼ unaj k-tuukul jeʼex u tuukuloʼ. Unaj k-tuklik: «Baʼaxoʼob kin chʼaʼatuklikeʼ, ¿ku yeʼesik wa yanten le tuukul anchaj tiʼ Esauoʼ? Utiaʼal ka séeb yanakten le baʼax kin tsʼíiboltikoʼ, ¿unaj wa in tsʼáaik paachil in meyajtik Dios? Le baʼax kin chʼaʼatuklik in beetkoʼ, ¿maʼatan wa u beetik in náachtal tiʼ Jéeoba yéetel tiʼ le kuxtal minaʼan u xuuloʼ? Yéetel baʼaxoʼob kin beetkeʼ, ¿baʼax kin líiʼsik u yóol u beet u maasil?». Wa le baʼaxoʼob k-chʼaʼatuklik k-beetik ku yeʼesik k-tsʼáaik táanil k-meyajtik Dioseʼ, letiʼeʼ yaan u yeʼesiktoʼon u yutsil (Proverbios 10:22).
Maʼ unaj k-bin tu paach chéen ayikʼaliloʼobiʼ
8. ¿Baʼax aʼalaʼab tiʼ le cristianoʼob yanoʼob Laodicea ka u beetoʼoboʼ, yéetel baʼaxten jach maʼalob xan ka k-beet le baʼax aʼalaʼabtiʼoboʼ?
8 Tu jóokʼbal le yáax siglooʼ, le tsʼoʼok u kaʼa suut Jesucristo teʼ kaʼanoʼ, tu tsʼáaj tiʼ apóstol Juan u yil baʼax unaj u tsʼíibtik tiʼ le múuchʼulil yaan tu kaajil Laodiceaoʼ, Asia Menor; ichil le baʼaxoʼob tu tsʼíibtoʼ aʼalaʼabtiʼob tumen Jesús ka u xul u binoʼob tu paach ayikʼaliloʼob. Kex le cristianoʼob yanoʼob Laodicea jach ayikʼaloʼoboʼ, tu táan Dioseʼ jach óotsiloʼob. Letiʼobeʼ maʼ tu nuʼuktubaʼob yoʼolal oksaj óolaliʼ, baʼaxeʼ tu chaʼajoʼob u lúuʼsaʼal u yóoloʼob u meyajtoʼob Dios tumen le ayikʼaliloʼoboʼ (Apocalipsis 3:14-18). Teʼ kʼiinoʼobaʼ, u tsʼíiboltik máak ayikʼalileʼ jeʼel xan u beetik u yúuchul tiʼ beyoʼ. Ku beetik u minaʼantal k-oksaj óolal tiʼ Dios yéetel maʼ tu chaʼik «k-áalkab[tik] yéetel chúukaʼan óolal le bej» ku bisaj tiʼ le kuxtaloʼ (Hebreob 12:1). Wa maʼ t-kanáantikbaeʼ «le chéen kunel kiʼimak óolaloʼ» jeʼel u beetik u bin k-pʼatik k-meyajtik Dios tak ken xuʼuluk k-beetkeʼ (Lucas 8:14).
9. ¿Bix u kanáantkoʼon u kiʼimaktal k-óol yéetel le baʼax yantoʼonoʼ?
9 Upʼéel baʼax jach kʼaʼanan utiaʼal maʼ u lúubul k-óol meyajt Dioseʼ letiʼe ka kiʼimakchajak k-óol yéetel le baʼaxoʼob yantoʼonoʼ, maʼ k-náajaltik u baʼalubaʼob le yóokʼol kaabaʼ mix ka ayikʼalchajkoʼoniʼ (1 Corintoiloʼob 7:31; 1 Timoteo 6:6-8). U nuʼuktikuba máak yoʼolal oksaj óolal, maʼ yoʼolal baʼax ku paktikeʼ ku beetik u maas kiʼimaktal u yóol yoʼolal le jeetsʼelil yaan ichil u kaajal Dios ku keʼetel yéetel upʼéel paraísooʼ. Ken k-kʼam le kaʼansaj ku keʼetel yéetel maʼalob janaloʼ, ¿máasaʼ jach ku taaktal k-kʼaay «yéetel u kiʼimak óolalil [k-puksiʼikʼal]»? (Isaías 65:13, 14.) Tsʼoʼoleʼ jatsʼuts xan k-ilik bisikba yéetel máaxoʼob ku yeʼeskoʼob u yich u kiliʼich muukʼ Dios ichil u kuxtaloʼob (Galaciailoʼob 5:22, 23). ¡Bukaʼaj maʼalobil ka líiʼsaʼak k-óol tumen le baʼaloʼob ku tsʼáaik Diosoʼ!
10. ¿Baʼax kʼáatchiʼiloʼob maʼalob ka k-beete?
10 Maʼalob ka k-beet kʼáatchiʼob jeʼex leloʼobaʼ: «¿Bix in wilik le ayikʼaliloʼoboʼ? ¿Ku meyajten wa baʼaxoʼob yanten chéen utiaʼal in náaysik in wóol, wa ku meyajten utiaʼal in tsʼáaik táanil in meyajtik Dios? ¿Baʼax maas utstintʼaan: in xokik le Biblia yéetel in wantal yéetel le sukuʼunoʼob teʼ muchʼtáambaloʼoboʼ, wa in jóokʼol in náays in wóol utiaʼal sábados yéetel domingos? ¿Óoliʼ maʼatech wa in jóokʼol kʼaʼaytaj tiʼ sábados yéetel domingos mix tech in táakpajal tiʼ uláakʼ meyajoʼob ichil u kaajal Dios tumen jach kin jóokʼol in náays in wóol?». U nuʼuktikuba máak yoʼolal oksaj óolaleʼ, u kʼáat u yaʼaleʼ u jach tsʼáaik u yóol máak u kʼaʼayt le Reinooʼ yéetel u jach oksaj óoltik baʼaxoʼob u yaʼalmaj Jéeoba u beetik (1 Corintoiloʼob 15:58).
Maʼ u tuʼubultoʼon wa taʼaytak u xuʼulsaʼal tiʼ le kʼasaʼan yóokʼol kaabaʼ
11. K-nuʼuktik kuxtal yoʼolal k-oksaj óolaleʼ, ¿bix u yáantkoʼon utiaʼal maʼ k-tuklik wa jach yaʼab u bin utiaʼal u xuʼulsaʼal tiʼ le kʼasaʼan yóokʼol kaabaʼ?
11 K-nuʼuktikba yoʼolal oksaj óolaleʼ ku yáantkoʼon utiaʼal maʼ k-tuklik jach yaʼab u bin utiaʼal u xuʼulsaʼal tiʼ le kʼasaʼan yóokʼol kaabaʼ wa mix bikʼin kun xuʼulsbil. Yaʼab máakoʼobeʼ maʼ tu creerkoʼob wa yaan u yúuchul le baʼax ku yaʼalik le Bibliaoʼ, baʼaleʼ toʼoneʼ k-ilkeʼ tuláakal le baʼaxoʼob ku yúuchul teʼ kʼiinoʼobaʼ jach bey aʼalaʼanil teʼ Biblia kun úuchloʼ (2 Pedro 3:3, 4). Le bix kuxlik le máakoʼob yéetel baʼax ku beetkoʼob teʼ kʼiinoʼobaʼ, ¿maʼ wa táan u yeʼeskoʼob kuxaʼanoʼon tu tsʼook kʼiinoʼobiʼ? (2 Timoteo 3:1-5). Le oksaj óolal yantoʼonoʼ ku yáantkoʼon k-naʼateʼ le talmiloʼob ku yilaʼaloʼob bejlaʼaʼ maʼ chéen baʼaloʼob suukaʼan u yúuchloʼobiʼ, baʼaxeʼ ku yeʼeskoʼob «u taalbal [Cristo] yéetel ken xuʼuluk yóokʼol kaab» (Mateo 24:1-14).
12. Teʼ yáax siglooʼ, ¿bix úuchik u béeytal le baʼax tu yaʼalaj Jesús teʼ Lucas 21:20, 21?
12 Koʼoneʼex ilik upʼéel baʼax úuch teʼ yáax siglo ku yúuchul xan teʼ kʼiinoʼob bejlaʼaʼ. Jesuseʼ tu yaʼalaj tiʼ u j-tsaypachoʼob le tʼaanoʼobaʼ: «Ken a wileʼex bakʼpachtaʼan u kaajil Jerusalén tumen soldadoʼobeʼ, ojéelteʼex tsʼoʼok u náatsʼal u kʼiinil u xuʼulsaʼal. Le máaxoʼob yanoʼob Judeaoʼ púutsʼukoʼob teʼ j-puʼukoʼoboʼ, le yanoʼob ichil u kaajil Jerusalenoʼ jóokʼokoʼobiʼ» (Lucas 21:20, 21). Utiaʼal u béeychajal le baʼax tu yaʼalaj Jesusaʼ le romanoʼob nuʼuktaʼanoʼob tumen Cestio Galooʼ tu bakʼoʼob u paach u kaajil Jerusalén tu jaʼabil 66. Baʼaleʼ, chéen ka jáan lukʼoʼobiʼ, leloʼ tu beetaj u yilaʼal tumen le cristianoʼoboʼ unaj u púutsʼloʼob teʼ puʼukoʼoboʼ. Tu jaʼabil 70, le romanoʼoboʼ suunajoʼob tu kaʼatéen ka tu xuʼulsoʼob tiʼ u kaajil Jerusalén yéetel tu nikoʼob u temploi. Josefoeʼ tu yaʼaleʼ maas tiʼ upʼéel millón judíoʼob kíimsaʼaboʼobiʼ yéetel 97,000 utúulul palitsiltaʼaboʼobiʼ. Bey úuchik u béeytal le xuʼulsajil u yaʼalmaj Dios kun taal yóokʼol le judíoʼoboʼ. Baʼaleʼ, le máaxoʼob tu nuʼuktubaʼob yoʼolal oksaj óolal yéetel tu beetoʼob le baʼax aʼalaʼab tumen Jesusoʼ tu salvartubaʼob.
13, 14. 1) ¿Baʼaxoʼob jach natsʼaʼan tu kʼiin u yilaʼal? 2) ¿Baʼaxten maʼ unaj u náayal k-óol utiaʼal k-ilik bix u bin u béeytal le baʼaxoʼob tsʼíibtaʼanoʼob teʼ Bibliaoʼ?
13 Teʼ kʼiinoʼobaʼ jach taʼaytak u yúuchul upʼéel baʼal xan beyoʼ. Le luʼumiloʼob yaʼab u soldadoʼob yanoʼob ichil le Naciones Unidasoʼ yaan u taaskoʼob upʼéel xuʼulsajil jeʼex u yaʼalmil Dioseʼ. Baʼax ku kaxtik kaʼach u soldadoiloʼob Roma teʼ yáax siglooʼ, ka yanak jeetsʼelil tiʼ tuláakal le máaxoʼob ku gobernartaʼal kaʼach tumen Romaoʼ; le baʼax ku kaxtik xan le Naciones Unidas bejlaʼaʼ ka xan yanak jeetsʼelil utiaʼal mantatsʼ. Kex u soldadoiloʼob Roma u kʼáatoʼob kaʼach ka yanak jeetsʼelileʼ tu xuʼulsoʼob tiʼ u kaajil Jerusalén. Teʼ kʼiinoʼob xanaʼ, le baʼaxoʼob tsʼíibtaʼan teʼ Bibliaoʼ ku yeʼesikeʼ le luʼumiloʼob yaʼab u soldadoʼob yanoʼob ichil le Naciones Unidasoʼ yaan u yilkoʼob le religión bey táan u luʼsik le jeetsʼeliloʼ yéetel yaan u xuʼulskoʼob tiʼ le religionoʼob ku yaʼalikoʼob táan u tsaypachkoʼob Cristo ku keʼetloʼob yéetel le úuchben Jerusalenoʼ bey xan u chuukan maʼ jaajil religionoʼoboʼ (Apocalipsis 17:12-17). K-ilik túuneʼ jach taʼaytak u xuʼulsaʼal tiʼ tuláakal le religionoʼob maʼatech u kaʼanskoʼob u jaajiloʼ.
14 Ken xuʼulsaʼak tiʼ le religionoʼob maʼatech u kaʼanskoʼob u jaajiloʼ le kun eʼesik u káajbal le nojoch yajiloʼ. Tu tsʼoʼokbal le nojoch yajilaʼ yaan u xuʼulsaʼal tiʼ tuláakal u gobiernoiloʼob le yóokʼol kaabaʼ (Mateo 24:29, 30; Apocalipsis 16:14, 16). Wa k-nuʼuktikba yoʼolal oksaj óolaleʼ, maʼ kun náayal k-óol utiaʼal k-ilik bix u bin u béeytal le baʼaxoʼob tsʼíibtaʼanoʼob teʼ Bibliaoʼ. Maʼ ken k-chaʼa u yoksaʼal t-tuukul wa chéen máakoʼob kun meyaj tiʼ Dios utiaʼal u taasik jeetsʼelil, jeʼex le Naciones Unidasoʼ. Le oʼolaleʼ, ¿maʼ wa unaj k-eʼesik yéetel bix kuxlikoʼon jach k-oksaj óoltik «tsʼoʼok u náatsʼal u noj kʼiinil Yuumtsil[iʼ]»? (Sofonías 1:14.)
Le talmiloʼob jeʼel u taasik u nuʼuktikuba máak chéen yéetel baʼaxoʼob ku paktikeʼ
15. ¿Baʼax oʼolal u kaajil Israeleʼ tu beetaj baʼax maʼ maʼalob kex jach tu yeʼesaj u yutsil Dios tiʼiʼ?
15 Le baʼax úuch tiʼ u úuchben kaajil Israeloʼ ku yeʼesik baʼax jeʼel u yúuchultoʼon wa k-chaʼik u minaʼantal k-oksaj óolal tumen k-nuʼuktikba chéen yoʼolal baʼaxoʼob k-paktikeʼ. Kex le israelitaʼob tu yiloʼob bix úuchik u mixbaʼalkúuntaʼal u diosiloʼob Egipto yéetel le diez noj yajiloʼob yéetel kex tu yiloʼob bix úuchik u salvartaʼaloʼob teʼ Chak kʼáaʼnáaboʼ, tu x-maʼ uʼuyajtʼantoʼob Dios le ka tu beetoʼob utúul chan wakax de oro utiaʼal u adorartoʼob. Chiʼichnakchajoʼob yéetel náak u yóol u páaʼtoʼob Moisés, tumen «táan kaʼach u xáantal u yéemel» teʼ puʼukoʼ (Éxodo 32:1-4). Tumen maʼ chúukpaj u yóol u páaʼtkoʼob Moiseseʼ, le beet u adorarkoʼob utúul dios ku páajtal u yilkoʼob. Úuchik u nuʼuktikubaʼob chéen yéetel baʼax ku paktikoʼobeʼ tu beetoʼob u kʼuuxil Jéeoba, tu yoʼolal leloʼ kíimsaʼab «míin tres mil máakoʼob» (Éxodo 32:25-29). ¡Bukaʼaj yajil ka chʼaʼatuklaʼak u beetaʼal tumen utúul cristiano upʼéel baʼal ku yeʼesik maʼatech u oksaj óoltik Dios mix tech u oksaj óoltik wa jeʼel u béeykuntik baʼaxoʼob u yaʼalmaj u beetikeʼ!
16. ¿Baʼax talmil tu taasaj tiʼ le israelitaʼob úuchik u nuʼuktikubaʼob chéen yéetel le baʼaxoʼob ku paktikoʼoboʼ?
16 Úuchik u nuʼuktikuba le israelitaʼob chéen yoʼolal baʼax ku paktikoʼoboʼ tu taasaj uláakʼ talmil tiʼob. Tu beetaj u sajaktaloʼob tu táan máaxoʼob pʼekmailoʼob (Números 13:28, 32; Deuteronomio 1:28). Tu beetaj u tʼaanoʼob tu contra Moisés, le máax tsʼaʼan tumen Dios utiaʼal nuʼuktikoʼoboʼ yéetel kʼuuxilnajoʼob yoʼolal bix le kuxtal tu máansoʼob teʼ x-tokoy luʼumoʼ. Tumen minaʼan oksaj óolal tiʼobeʼ tu maas tsʼíiboltoʼob u suutoʼob Egipto, upʼéel luʼumil tiaʼan kaʼach yáanal u kʼab le kʼasaʼan angeloʼoboʼ, maʼ ka kʼuchkoʼob teʼ luʼum aʼalaʼan u tsʼaʼabal tiʼoboʼ (Números 14:1-4; Salmo 106:24). ¡Bukaʼaj wal úuchik u beetkoʼob u yaatal u yóol Jéeoba, le Rey maʼ tu páajtal u yilkoʼoboʼ!
17. ¿Baʼax oʼolal maʼ kʼamaʼab tumen le israelitaʼob le nuʼuktaj ku tsʼaʼabaltiʼob tumen Jéeoba tu kʼiiniloʼob profeta Samueloʼ?
17 Tu kʼiiniloʼob profeta Samueleʼ, Israel, le kaaj jach ku yeʼesik u yutsil Dios tiʼoʼ, tu kaʼa nuʼuktuba chéen yéetel baʼaxoʼob ku paktik. Tu tsʼíiboltoʼob ka yanaktiʼob utúul rey nuʼuktikoʼob. Kex Jéeoba tsʼoʼok u yeʼesik letiʼ u Reyoʼobeʼ, maʼ tu beetaj u nuʼuktikubaʼob yoʼolal oksaj óolaliʼ (1 Samuel 8:4-9). Yéetel u j-maʼ naʼatiloʼobeʼ maʼ tu chaʼaj u nuʼuktaʼaloʼob tumen Jéeobaiʼ, yéetel kex chéen utiaʼal u beetik kʼaastubaʼobeʼ tu beetoʼob jeʼex uláakʼ kaajoʼob yaan tu baʼpaachoʼoboʼ (1 Samuel 8:19, 20).
18. ¿Baʼaxoʼob jeʼel k-kanik tiʼ le talmiloʼob ku taasik u nuʼuktikuba máak chéen yoʼolal baʼaxoʼob ku paktikoʼ?
18 Teʼ kʼiinoʼobaʼ toʼon táan k-meyajtik Dioseʼ upʼéel baʼal jach nojoch k-ilik k-bisikba tu yéetel. Toʼoneʼ k-tsʼíiboltik tsʼáaik ichil k-kuxtal tuláakal le baʼaxoʼob k-kanik teʼ Bibliaoʼ (Romailoʼob 15:4). Úuchik u nuʼuktikuba le israelitaʼob chéen yéetel baʼax ku paktikoʼobeʼ tu yeʼesoʼobeʼ tuʼubtiʼob wa Dios tsʼaamil Moisés utiaʼal nuʼuktikoʼob. Wa maʼ k-kanáantikbaeʼ jeʼel xan u tuʼubultoʼon wa Jéeoba yéetel Jesucristo, le Moisés teʼ t-kʼiinoʼobaʼ, letiʼob nuʼuktik le múuchʼuliloʼ (Apocalipsis 1:12-16). Unaj k-kanáantik maʼ k-taasik mix baʼalil u kaajal Dios yaan way Luʼumeʼ. Wa maʼ k-kanáantikbaeʼ jeʼel u joʼopʼol k-tʼaan tu contra máaxoʼob tsʼaʼanoʼob tumen Jéeoba utiaʼal nuʼuktikoʼoneʼ yéetel jeʼel k-tʼaan tu contra le kaʼansaj ku keʼetel yéetel janal ku tsʼáaiktoʼon «le palitsil chúukpajaʼan u yóol yéetel yaan u naʼat[oʼ]» (Mateo 24:45).
Unaj chʼaʼatuklik k-nuʼuktikba yoʼolal oksaj óolal
19, 20. ¿Baʼax tsʼoʼok k-chʼaʼatuklik k-beetik, yéetel baʼaxten?
19 Le Bibliaoʼ ku yaʼalik: «Tumen maʼ táan k-baʼateʼel tu contra máakoʼobiʼ, baʼaleʼ tu contra u muukʼ kʼaakʼas pixanoʼob yanoʼob tiʼ le kaʼanilbeʼen kúuchiloʼoboʼ, u kʼáat u yaʼaleʼ, máaxoʼob ku tusbeloʼob, jalaʼachoʼob yéetel yaan páajtalil tiʼob tu yóokʼol le éekʼjochʼeʼen yóokʼol kaabaʼ» (Efesoiloʼob 6:12). Le máax maas pʼekmailoʼonoʼ, Satanás. Tumen táan u yilik ka xuʼuluk k-oksaj óoltik Jéeobaeʼ, ku meyaj jeʼel baʼalak tiʼ utiaʼal u beetik k-luʼsik t-tuukul meyajtik Dioseʼ (1 Pedro 5:8). ¿Bix jeʼel k-kanáantik maʼ u tuskoʼon le baʼaxoʼob ku yeʼesik le yóokʼol kaab yaan tu kʼab Satanasoʼ? ¡U nuʼuktikuba máak yoʼolal oksaj óolal maʼ yoʼolal baʼaxoʼob ku paktikiʼ! Wa k-jach oksaj óoltik yaan u béeykuntik Jéeoba le baʼaxoʼob u yaʼalmaj u beetkoʼ, le kun áantkoʼon utiaʼal maʼ u lúubul k-oksaj óolal (1 Timoteo 1:19). Le oʼolaleʼ, tuláakloʼon unaj k-chʼaʼatuklik k-nuʼuktikba yoʼolal oksaj óolal, unaj k-jach kʼub óoltik Jéeobaeʼ yaan u yeʼesiktoʼon u yutsil yéetel unaj k-payalchiʼ mantatsʼ utiaʼal ka páatchajak k-salvartikba tiʼ le xuʼulsajil taʼaytak u kʼuchloʼ (Lucas 21:36).
20 Utiaʼal ka páatchajak k-nuʼuktikba yoʼolal oksaj óolal, maʼ yoʼolal baʼaxoʼob k-paktikeʼ yantoʼon utúul máax eʼesiktoʼon bix unaj k-beetik. Le Bibliaoʼ ku yaʼalik: «Cristoeʼ mukʼyajnaj ta woʼolaleʼex, ka tu tsʼáaj teʼex jumpʼéel kaʼansaj, utiaʼal ka kuxlakeʼex jeʼel bix kuxlajik letiʼoʼ» (1 Pedro 2:21). Leloʼ le ken k-il tuláakʼ xookoʼ.
¿Baʼax jeʼel a núukikeʼ?
• ¿Baʼax ta kanaj tiʼ le baʼax tu beetaj Moisés yéetel Esaú tiʼ u nuʼuktikuba máak yoʼolal oksaj óolal, maʼ yoʼolal baʼaxoʼob ku paktik máakiʼ?
• ¿Baʼax jach jeʼel u yáantkoʼon utiaʼal maʼ k-bin tu paach chéen ayikʼaliloʼobeʼ?
• K-nuʼuktikba yoʼolal oksaj óolaleʼ, ¿bix u yáantkoʼon utiaʼal maʼ k-tuklik yaʼab u bin utiaʼal le xuʼulsajiloʼ?
• ¿Baʼaxten maʼ unaj k-nuʼuktikba chéen yoʼolal baʼaxoʼob k-paktikiʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 9]
Moiseseʼ tu nuʼuktuba yoʼolal oksaj óolal
[U tsolajil le oochel teʼ táan juʼun 10]
¿Óoliʼ maʼatech wa a táakpajal ichil le meyajoʼob ku beetik u kaajal Dios tumen jach ka jóokʼol a náays a wóoloʼ?