«Pʼil ichneneʼex [mantatsʼ]», tumen tsʼoʼok u kʼuchul u kʼiinil le pʼis óoloʼ
«Pʼil ichneneʼex [mantatsʼ]», tumen tsʼoʼok u kʼuchul u kʼiinil le pʼis óoloʼ
«Pʼil ichneneʼex [mantatsʼ], tumen maʼ a wojeleʼex baʼax hora ken taalak Yuumtsil[iʼ]ʼ.» (MATEO 24:42.)
1, 2. ¿Baʼax yéetel tu ketaj Jesús u taalbal utiaʼal u xuʼuls le kʼasaʼan yóokʼol kaaboʼ?
¿BAʼAX jeʼel a beetik wa ka wojéelt yaan utúul máak táan u máan ookol naatsʼ teʼ tuʼux kajaʼanechoʼ? Máasaʼ yaan a wilik maʼ u náayal a wóol utiaʼal a kanáantik a familia bey xan baʼaxoʼob yantech. Baʼaxten unaj u beetik máak lelaʼ, tumen utúul j-ookoleʼ maʼatech u yaʼalik baʼax kʼiin ken taalak. Baʼaxeʼ ku kʼuchul tiʼ upʼéel kʼiin maʼ táan u páaʼtaʼaliʼ.
2 Jesuseʼ maʼ chéen utéen tu chʼaʼachiʼitaj baʼax ku beetik utúul máak utiaʼal ka ookolnakiʼ (Lucas 10:30; Juan 10:10). Ka tu yaʼalaj baʼaxoʼob kun ilbil tu tsʼook kʼiinoʼob kun eʼeskoʼob tsʼoʼok u náatsʼal u kʼiinil u taal u xuʼuls tiʼ le kʼasaʼan yóokʼol kaabaʼ, Jesuseʼ tu yaʼalaj: «Pʼil ichneneʼex [mantatsʼ], tumen maʼ a wojeleʼex baʼax hora ken taalak Yuumtsil[i]ʼ. Baʼaleʼ ojéelteʼex le baʼalaʼ, wa u yuumil naj u yojel baʼax hora ken taalak le j-ookoloʼ, jeʼel u pʼáatal x-maʼ weenlileʼ yéetel maʼ bíin u chaʼa u jeʼebel u yotoch utiaʼal ka oklaʼak[iʼ]» (Mateo 24:42, 43). Jeʼex túun k-ilkoʼ Jesuseʼ tu ketaj u taalbal utiaʼal u xuʼuls le kʼasaʼan yóokʼol kaab yéetel bix u taal utúul ookol: ku kʼuchul teʼ súutuk maʼ táan u páaʼtaʼaloʼ.
3, 4. 1) ¿Bix jeʼel u yeʼesik máak táan u pʼil ich jeʼex tu yaʼalil Jesuseʼ? 2) ¿Baʼax kʼáatchiʼiloʼob ken k-xakʼalte?
3 Le kettʼaan tu beetoʼ jach maʼalob, tumen mix máak kun ojéeltik baʼax kʼiin ken taalak. Le ka tu yaʼalaj le kettʼaanaʼ tsʼokaʼaniliʼ u yaʼalikeʼ: «Baʼax kʼiin wa baʼax hora ken úuchuk, mix máak u yojel, mix u angeliloʼob kaʼan, mix u Paal Máak. Chéen Jajal Dios le Taata u yojeloʼ» (Mateo 24:36). Le oʼolaleʼ tu yaʼalaj tiʼ u j-tsaypachoʼob: «Maʼ u náayal a wóoleʼex» (Mateo 24:44, LTN). Le máaxoʼob kun pʼil ichoʼob jeʼex tu yaʼalil Jesuseʼ yaan u yilkoʼob maʼ u náayal u yóoloʼob yéetel maʼ ken u xul u beetkoʼob baʼax unaj jeʼel baʼaxak kʼiin ka taalak u xuʼuls tiʼ le kʼasaʼan yóokʼol kaaboʼ.
4 Baʼaleʼ, yoʼolal lelaʼ ku beetaʼal jujumpʼéel kʼáatchiʼob jach kʼaʼanan ka k-il bix u núukaʼal: ¿Chéen wa tiʼ máaxoʼob maʼatech u meyajkoʼob Dios tu yaʼalaj Jesús wa tak tiʼ le máaxoʼob ku meyajtikoʼ? ¿Baʼaxten jach unaj u pʼil ich máak mantatsʼ, yéetel bix jeʼel u beetikeʼ?
¿Tiʼ máaxoʼob aʼalaʼab ka pʼil ichnakoʼob?
5. ¿Baʼax eʼesik tiʼ le cristianoʼob aʼalaʼab ka pʼil ichnakoʼob mantatsʼoʼ?
5 Utiaʼal le máaxoʼob maʼatech u oksaj óoltikoʼob wa jach jaaj yaan u taal upʼéel xuʼulsajileʼ, u taalbal Yuumtsileʼ yaan u kʼuchul jach jeʼex u taal utúul j-ookoleʼ (2 Pedro 3:3-7). Baʼaleʼ ¿kux túun le máaxoʼob meyajtik Diosoʼ? Apóstol Pabloeʼ tu tsʼíibtaj tiʼ letiʼob: «Teʼexeʼ tsʼoʼok a wojéeltikeʼex jach maʼalobeʼ u kʼiinil Yuumtsileʼ yaan u kʼuchul tiʼ le kʼiin maʼ táan a páaʼtikeʼexoʼ, jeʼel bix u taal juntúul j-ookol yéetel áakʼabeʼ» (1 Tesalonicailoʼob 5:2). Toʼoneʼ k-jach oksaj óoltik «u kʼiinil Yuumtsileʼ yaan u kʼuchul». Baʼaleʼ ¿leloʼ u kʼáat wa túun u yaʼal maʼ unaj k-pʼil ichiʼ? Jesuseʼ tu yaʼalaj tiʼ u j-tsaypachoʼob: «Teʼexeʼ, maʼ u náayal a wóoleʼex, tumen u Paal máak[eʼ] bin taalak tiʼ le hora maʼ ta tuklikeʼex[oʼ]» (Mateo 24:44, LTN). Le ka tu yaʼalajtiʼob ka u tsʼaʼob táanil le Reinooʼ, tu yaʼalaj xan tiʼob: «Bey xan teʼex, nuʼukbesabaʼex, tumen bik taalak u Paal Máak tiʼ le kʼiin maʼ táan a páaʼtikeʼexeʼ» (Lucas 12:31, 40). ¿Máasaʼ jach chíikaʼan yanil tiʼ u j-tsaypachoʼob tu yaʼalaj Jesús ka pʼil ichnakoʼob mantatsʼ?
6. ¿Baʼaxten unaj k-pʼil ich mantatsʼ?
6 ¿Baʼaxten unaj k-pʼil ich mantatsʼ yéetel baʼaxten unaj k-ilik maʼ u náayal k-óol? Jesuseʼ tu yaʼalaj: «Tiʼ le kʼiinoʼ kaʼatúul máakoʼob bíin yanakoʼob kʼáax; juntúul kun bisbiliʼ yéetel juntúul kun pʼatbiliʼ. Tiʼ kaʼatúul koʼoleloʼob táan u juuchʼoʼobeʼ, juntúul kun bisbiliʼ yéetel juntúul kun pʼatbiliʼ» (Mateo 24:40, 41). Le máaxoʼob u nuʼukbesmubaʼobeʼ yaan u bisaʼaloʼob, lelaʼ u kʼáat u yaʼaleʼ yaan u salvartaʼaloʼob ken xuʼulsaʼak tiʼ le kʼasaʼan yóokʼol kaabaʼ. U maasil máakoʼoboʼ yaan u pʼataʼaloʼob, lelaʼ u kʼáat u yaʼaleʼ yaan xuʼulsaʼaltiʼob tumen tu tsʼáajoʼob táanil chéen u baʼalubaʼob le yokʼol kaaboʼ. Ichil le máaxoʼob kun xuʼulsbiltiʼoboʼ, maʼ xaaneʼ tiaʼan tak máaxoʼob tu kʼaj óoltoʼob u jaajiliʼ, baʼaleʼ maʼ pʼil ichnajoʼob mantatsʼiʼ.
7. Tumen maʼ k-ojel baʼax kʼiin ken kʼuchuk le xuʼulsajiloʼ, ¿baʼax jeʼel u páajtal k-eʼesikeʼ?
7 Tumen maʼ k-ojel jach baʼax kʼiin ken xuʼulsaʼak tiʼ le kʼasaʼan yokʼol kaabaʼ, ku tsʼáaik tuʼux k-eʼesik wa k-yaabilaj péekskoʼon k-meyajt Dios. ¿Baʼaxten? Tumen maʼ xaaneʼ, jeʼel k-ilik bey jach yaʼab u bin u kʼuchul le xuʼulsajiloʼ. Yaaj, baʼaleʼ yaan sukuʼunoʼob tsʼoʼok u tuukuloʼob beyoʼ tsʼoʼok u xulik u tsʼáaik u yóoloʼob u meyajtoʼob Dios. Baʼaleʼ, ka t-kʼubakba meyajt Dioseʼ t-aʼalaj yaan k-meyajtik jeʼel baʼalak bíin úuchkeʼ. Máaxoʼob meyajtik Jéeobaeʼ u yojloʼobeʼ wa jach tu kʼiinil le xuʼulsajil ken u tsʼáaubaʼob tu tséel u gobernacioneʼ letiʼeʼ maʼ ken u kʼamoʼob. Jéeobaeʼ u yojel jach baʼax yaan tu puksiʼikʼal cada utúul máak (1 Samuel 16:7).
8. ¿Bix u yáantkoʼon k-yaabilaj tiʼ Jéeoba ka pʼil ichnakoʼon mantatsʼ?
8 Tumen jach tu jaajil k-yaabiltmaj Jéeobaeʼ jach ku kiʼimaktal k-óol k-beetik baʼax u kʼáat (Salmo 40:8; Mateo 26:39). Toʼoneʼ k-kʼáat meyajt Jéeoba mantatsʼ, le oʼolaleʼ maʼatech u lúubul k-óol kex maʼ k-jáan kʼamik le jatsʼuts baʼaloʼob k-páaʼtikoʼ. Baʼaxeʼ k-pʼil ich mantatsʼ tumen k-jach tsʼíiboltik k-ilik baʼax ken u beet Jéeoba utiaʼal u béeykuntik tuláakal baʼax u yaʼalmaj u beetik. Tumen k-jach kʼáat kiʼimakkúunt u yóol Jéeobaeʼ k-ilik tsʼáaik ichil k-kuxtal baʼaxoʼob ku yaʼalik u Tʼaan yéetel k-tsʼáaik táanil ichil k-kuxtal le Reinooʼ (Mateo 6:33; 1 Juan 5:3). Koneʼex ilik bix jeʼel k-eʼesik wa táan k-pʼil ich mantatsʼ ken k-chʼaʼatukult k-beetik wa baʼaxeʼ bey xan yéetel bix kuxlikoʼoneʼ.
¿Baʼax táan k-beetik yéetel k-kuxtal?
9. ¿Baʼaxten jach unaj u naʼataʼal tumen le máakoʼob baʼax oʼolal táan u bin u yaʼabtal le baʼaloʼob kʼaastak teʼ yóokʼol kaabaʼ?
9 Yaʼabach máakoʼobeʼ táan u yilkoʼob jach táan u bin u yaʼabtal le baʼaloʼob kʼaastak yéetel talamtakoʼ, yéetel maʼ xaaneʼ maʼ kiʼimak u yóoloʼob yoʼolal bix kuxlikoʼobiʼ. Baʼaleʼ ¿ku naʼatkoʼob wa baʼaxten ku yúuchul le baʼaloʼobaʼ? ¿Ku naʼatkoʼob wa taʼaytak u xuʼulsaʼal tiʼ u baʼalubaʼob le yóokʼol kaabaʼ? (Mateo 24:3.) ¿Ku naʼatkoʼob wa le baʼaxoʼob kʼaastak ku sen úuchloʼob bejlaʼaʼ ku yeʼeskoʼob kuxaʼanoʼon tu tsʼook kʼiinoʼob? (2 Timoteo 3:1-5.) Jach unaj u naʼatkoʼob baʼaxten táan u yúuchul le baʼaloʼobaʼ yéetel unaj u yilkoʼob baʼax ku beetkoʼob yéetel u kuxtaloʼob.
10. ¿Baʼax unaj k-beetik utiaʼal k-ilik wa táan k-pʼil ich mantatsʼ?
10 Baʼaleʼ ¿kux túun toʼon? Sáamsamaleʼ k-chʼaʼatuklik k-beetkeʼex baʼaloʼob yaan u yil yéetel k-meyaj, k-toj óolal, k-familia, bey xan tiʼ baʼaloʼob yaan yil yéetel k-meyajtik Dios. Tsʼoʼok k-kanik baʼax ku yaʼalik le Bibliaoʼ yéetel k-ilik k-kuxtal jeʼex u yaʼalikoʼ. Kex beyoʼ maʼalob ka k-beet le kʼáatchiʼobaʼ: «¿Kin chaʼik wa u kʼexaʼal in tuukul tumen u chiʼichnakiloʼob le kuxtalaʼ? ¿Kin chaʼik wa in nuʼuktaʼal tumen u kaʼansajiloʼob wa u tuukuliloʼob le yóokʼol kaabaʼ?» (Lucas 21:34-36; Colosailoʼob 2:8). Kʼaʼabéet k-eʼesik jach tu jaajil k-óol k-oksaj óoltik Jéeoba yéetel maʼatech k-alab óoltik le naʼat yaan tiʼ toʼonoʼ (Proverbios 3:5). Beyoʼ maʼ kun xuʼulul k-kaxtik le kuxtal minaʼan u xuul kun yantal tu túumben yóokʼol kaab Diosoʼ (1 Timoteo 6:12, 19).
11-13. ¿Baʼax ku kaʼansiktoʼon le baʼax úuch 1) tu kʼiiniloʼob Noeoʼ? 2) tu kʼiiniloʼob Lotoʼ?
11 Le Bibliaoʼ ku tʼaan tiʼ baʼaloʼob uchaʼantak jeʼel u yáantkoʼon ka pʼil ichnakoʼon mantatsʼeʼ. Tuukulnakoʼon tiʼ baʼax úuch tu kʼiiniloʼob Noé. Yaʼab u bin u kʼuchul u kʼiinil le Búulkabaloʼ, Dioseʼ tu yaʼalaj tiʼ Noé ka u tsʼáa u yojéelt le máakoʼoboʼ. Baʼaleʼ chéen Noé yéetel u familia oksaj óolt baʼax tu yaʼalaj Dios (2 Pedro 2:5). Jesuseʼ ku yaʼalik: «Jeʼel bix úuchik tu kʼiiniloʼob Noeeʼ, bey xan bíin úuchuk le ken taalak u Paal Máak. Tiʼ le kʼiinoʼoboʼ, maʼiliʼ taalak le búulkabaloʼ, le máakoʼoboʼ táan u janaloʼob, táan u yukʼuloʼob, yéetel táan u tsʼoʼokol u beeloʼob tak le kʼiin ka j-ook Noé ichil le nojoch cheemoʼ; maʼ tu naʼatajoʼob mix baʼaliʼ tak le kʼiin ka j-taal le búulkabaloʼ ka j-láaj bisaʼaboʼob. Bey xan bíin úuchuk le ken taalak u Paal Máak» (Mateo 24:37-39). ¿Baʼax ku kaʼansiktoʼon lelaʼ? Ku kaʼansiktoʼoneʼ kʼaʼabéet k-ilik wa maʼ xuʼuluk k-tsʼáaik táanil u Reino Dios tumen chʼiikloʼon k-kaxt chéen u baʼalubaʼob le yóokʼol kaaboʼ, ichil leloʼobaʼ táakaʼan tak le baʼaloʼob suukaʼan u beetik máak sáamsamaloʼ (Romailoʼob 14:17).
12 Tuukulnakoʼon xan tiʼ baʼax úuch tu kʼiiniloʼob Lot. U noj kaajil Sodoma tuʼux kajaʼan yéetel u familiaeʼ, upʼéel kaaj jach ayikʼal, baʼaleʼ jach yaʼab u beetaʼal baʼax kʼaasiʼ. Le angeloʼob túuxtaʼaboʼob tumen Jéeoba utiaʼal u xuʼulsoʼob le kaajoʼ tu yaʼaloʼob tiʼ Lot yéetel tiʼ u familia ka séeb jóoʼkoʼob yéetel maʼ u paakatoʼob paachil. Úuchik u sen aʼalaʼaltiʼob tumen le angeloʼoboʼ, ka jóokʼoʼob teʼ kaajoʼ, baʼaleʼ u yatan Loteʼ maas u yaabiltmaj u ayikʼaliloʼob. Maʼ tu yuʼubaj tʼaaniʼ, tu sutaj u yich paachil, le oʼolal kíimi (Génesis 19:15-26). Jesuseʼ tu yaʼalaj: «Kʼaʼajak teʼex u yatan Lot». ¿Táan wa k-beetik le baʼax tu yaʼalaj Jesusaʼ? (Lucas 17:32.)
13 Le máaxoʼob beet baʼax tu yaʼalaj Dioseʼ tu salvartubaʼob. Leloʼ bey úuchik tiʼ Noé yéetel u familia bey xan tiʼ Lot yéetel u hijas (2 Pedro 2:9). Toʼoneʼ k-ilik tsʼáaik ichil k-kuxtal baʼax ku kaʼansiktoʼon le baʼaloʼob uchaʼantakaʼ yéetel ku líiʼsik k-óol kʼaʼajsikoʼob, tumen ku yeʼesiktoʼoneʼ yaan u salvartaʼal máaxoʼob beetik baʼax toj. Jach ku kiʼimaktal k-óol, tumen k-jach ojel Dioseʼ yaan u béeykuntik baʼax u yaʼalmaj, yaan u beetik u yantal «le túumben kaʼanoʼoboʼ yéetel le túumben luʼum» tuʼux kun beetbil baʼax tojoʼ (2 Pedro 3:13).
¡«Tsʼoʼok u kʼuchul u kʼiinil u pʼis óol»!
14, 15. 1) ¿Baʼax ku yúuchul tu kʼiinil le pʼis óoloʼ? 2) ¿Baʼax u kʼáat yaʼal u chʼaʼik máak maʼalob saajkil tiʼ Dios yéetel u nojbeʼenkúuntik u kʼaabaʼ?
14 Le táan k-ilik maʼ u náayal k-óoloʼ, ¿baʼax unaj k-páaʼtik u yúuchul? U libroi Apocalipsiseʼ ku yaʼalik jujumpʼéel tiʼ baʼaxoʼob kun úuchul utiaʼal u béeykuntik Dios baʼaxoʼob u yaʼalmaj. Wa k-beetik baʼax ku yaʼalik u libroi Apocalipsiseʼ, k-eʼesik táan k-pʼil ich. Le profecíaoʼ ku yeʼesik baʼaxoʼob kun úuchul tu «kʼiinil Yuumtsil», lelaʼ káaj tu jaʼabil 1914 le ka beetaʼab Reyil Cristo teʼ kaʼanoʼ (Apocalipsis 1:10). U libroi Apocalipsiseʼ ku yaʼalikeʼ utúul angeleʼ tsʼaʼan tiʼ le «maʼalob péektsil minaʼan u xuuloʼ» yéetel táan u kʼaʼam aʼalik: «Chʼaʼex sajakil tiʼ Jajal Dios yéetel nojbeʼenkúunteʼex u kʼaabaʼ, tumen tsʼoʼok u kʼuchul u kʼiinil u pʼis óol» (Apocalipsis 14:6, 7). «U kʼiinil» le pʼis óoloʼ letiʼ le kʼiin tuʼux ku yilaʼal máaxoʼob kun salvartbiloʼoboʼ yéetel máaxoʼob kun xuʼulsbil tiʼob jeʼex u yaʼalik le profecíaoʼ, le «kʼiin» jeʼeloʼ maʼ kun xáantal. Bejlaʼeʼ kuxaʼanoʼon teʼ kʼiin jeʼeloʼ.
15 Bejlaʼa, táanil tiʼ u tsʼoʼokol u kʼiinil le pʼis óoloʼ, ku yaʼalaʼaltoʼon: «Chʼaʼex sajakil tiʼ Jajal Dios yéetel nojbeʼenkúunteʼex u kʼaabaʼ». ¿Baʼax u kʼáat u yaʼal le tʼaanoʼobaʼ? Wa k-eʼesik maʼalob saajkil tiʼ Dioseʼ le kun áantkoʼon utiaʼal ka k-náachkuntba tiʼ baʼax kʼaas (Proverbios 8:13). Wa k-nojbeʼenkuntik Dioseʼ yaan k-beetik tuláakal baʼax ku yaʼalik. Yaan k-ilik jóoʼsik u súutukil utiaʼal k-xokik le Bibliaoʼ. Yaan k-ilik bin teʼ muchʼtáambaloʼob jeʼex u yaʼalikoʼ (Hebreob 10:24, 25). Yaan k-kʼaʼaytkeʼex yéetel kiʼimak óolal tsʼoʼok u káajal u reinar Jesucristo teʼ kaʼanoʼ. Yaan k-kʼub óoltik Jéeoba mantatsʼ yéetel u jaajil k-óol (Salmo 62:8). Ken k-naʼat chéen Jéeoba u Reyil tuláakal baʼaleʼ, yaan k-tsʼáaikba yáanal u páajtalil utiaʼal k-nojbeʼenkúuntik, tumen letiʼ k-Rey. Wa k-beetik tuláakal le baʼaloʼob tsʼoʼok k-aʼalikaʼ k-eʼesikeʼ k-chʼaʼik maʼalob saajkil tiʼ Dios yéetel k-nojbeʼenkúuntik u kʼaabaʼ.
16. ¿Baʼaxten k-aʼalik le nojoch Babiloniaoʼ tsʼoʼok u lúubul, jeʼex u yaʼalik Apocalipsis 14:8?
16 U libroi Apocalipsis capítulo 14 ku yaʼalik xan uláakʼ baʼaxoʼob ku yúuchul tuʼ «kʼiinil» le pʼis óoloʼ. Táanileʼ ku chʼaʼachiʼitik le nojoch Babilonia wa tuláakal le maʼ jaajil religionoʼoboʼ, ku yaʼalik: «Le u kaʼatúul angeloʼ tu yaʼalaj: Tsʼoʼok u lúubul, tsʼoʼok u lúubul le nojoch Babiloniaoʼ» (Apocalipsis 14:8). Tu táan Dioseʼ le nojoch Babiloniaoʼ tsʼoʼok u lúubul. Le nojoch Babiloniaoʼ jach úuch joʼopʼok u kaʼansik baʼaloʼob maʼatech u kʼamik Dios, baʼaleʼ tu jaʼabil 1919 Jéeobaeʼ tu jóoʼsaj ichil le nojoch Babiloniaoʼ tuláakal le máaxoʼob meyajtikoʼ (Apocalipsis 17:1, 15). Teʼ kʼiin jeʼel tak bejlaʼoʼ, le máaxoʼob jóoʼsaʼaboʼob ichil le nojoch Babiloniaoʼ tu maas tsʼáaj u yóoloʼob u meyajtoʼob Dios, yéetel u maas kʼaʼaytoʼob u maʼalob péektsilil le Reino tiʼ tuláakal yóokʼol kaaboʼ (Mateo 24:14).
17. ¿Baʼax u kʼáat yaʼal u jóokʼol máak ichil le nojoch Babiloniaoʼ?
17 Baʼaleʼ Dioseʼ maʼ tsʼoʼokok u pʼis óoltik le nojoch Babiloniaoʼ. Maʼ kun xáantal ken u jach xuʼuls tiʼ (Apocalipsis 18:21). Le oʼolal bakáan ku yaʼalaʼal tumen le Biblia tiʼ tuláakal máakoʼoboʼ: «Jóokʼeneʼex tiʼ le kaajoʼ, utiaʼal maʼ a táakpajaleʼex tiʼ u kʼebanoʼob» (Apocalipsis 18:4, 5). ¿Baʼax u kʼáat yaʼal u jóokʼol máak ichil le nojoch Babiloniaoʼ? Maʼ chéen u kʼáat u yaʼal u xulik máak u beetik le baʼaloʼob ku beetaʼal ichiloʼ. Le tuukul yéetel le kaʼansajoʼob yaan ichiloʼ, tiʼ yaʼab baʼaloʼob ku chíikpajal, ku yilaʼal ichil yaʼabkach kʼiimbesajiloʼob yéetel baʼaloʼob suukaʼantak u beetaʼal, ku yilaʼal maʼ kʼaas u chital utúul xiib yéetel utúul koʼolel maʼ tsʼokaʼan u beeloʼobiʼ, yéetel ku yilaʼal ichil baʼaloʼob yaan yil yéetel j-meenil utiaʼal u náaysik u yóol máak. Utiaʼal k-eʼesik maʼ naayal k-óoleʼ, jach unaj k-kanáantik baʼaxoʼob k-tuklik yéetel baʼaxoʼob k-beetik utiaʼal k-eʼesik mix baʼal yaan k-il yéetel le nojoch Babiloniaoʼ.
18. Yoʼolal baʼax ku yaʼalik u libroi Apocalipsis 14:9, 10, ¿tiʼ baʼax unaj u kanáantikuba le cristianoʼob ku yilik maʼ u náayal u yóoloʼoboʼ?
18 Tu libroi Apocalipsis 14:9, 10 k-ilik uláakʼ baʼax ku yúuchul tu kʼiinil le pʼis óoloʼ. Uláakʼ utúul angeleʼ ku yaʼalik: «Wa máax ku kʼuʼultik [wa adorartik] le nojoch baʼalcheʼoʼ yéetel ku kʼuʼultik u yoocheleʼ yéetel ku chaʼik u tsʼaʼabal u chíikul tu táan joʼolal wa tu kʼabeʼ, yaan u yukʼik u yukʼlil u pʼuʼujul Jajal Dios». ¿Baʼaxten? «Le nojoch baʼalcheʼ» yéetel «u yoochel[oʼ]» u kʼáat u yaʼal u gobernación wíinikoʼob, letiʼobeʼ maʼatech u tsʼáaikubaʼob yáanal u páajtalil u gobernación Jéeoba. Le máaxoʼob meyajtik Diosoʼ ku yilkoʼob maʼ u tsʼaʼabal u chíikulal le nojoch baʼalcheʼ tiʼoboʼ, le oʼolal ku kanáantik bix u tuukuloʼob yéetel ku kanáantik baʼax ku beetkoʼob. Wa ku chaʼik u tsʼaʼabal u chíikulal le nojoch baʼalcheʼ tiʼoboʼ, leloʼ u kʼáat u yaʼaleʼ táan u tsʼáaikubaʼob tu tséel u gobernación chéen wíinikoʼob, maʼ tu tséel u gobernación Jéeobaiʼ. U yojloʼobeʼ u Reino Jéeobaeʼ tsʼoʼok u káajal u reinar teʼ kaʼanoʼ, yaan u xuʼulsik tiʼ tuláakal u gobernación chéen wíinikoʼob yéetel yaan u pʼáatal utiaʼal mantatsʼ (Daniel 2:44).
Maʼ u tuʼubultoʼon kuxaʼanoʼon tu tsʼook kʼiinoʼob
19, 20. 1) ¿Baʼax maas u kʼáat u beet Satanás teʼ tu tsʼook kʼiinoʼob kuxlikoʼonaʼ? 2) ¿Baʼax unaj k-chʼaʼatuklik beetik?
19 Jeʼex u bin u máan le u tsʼook kʼiinoʼobaʼ, le baʼaloʼob kʼaastakoʼ táan u bin u maas yaʼabtal. Yoʼolal le kʼeban yaan t-wíinklil bey xan tumen kuxaʼanoʼon teʼ kʼasaʼan yóokʼol kaabaʼ k-kʼojaʼantal, k-chʼíijil, ku kíimil k-láakʼtsilil, ku lúubul k-óol ken k-il maʼatech u kʼaʼamal le maʼalob péektsil k-kʼaʼaytikoʼ, ku beetaʼal u yaatal k-óol yéetel k-muʼyajtik uláakʼ baʼaloʼob. Maʼ u tuʼubultoʼoneʼ, le baʼax maas u kʼáat u yil Satanasoʼ ka lúubuk k-óol, ka k-xul kʼaʼaytik le maʼalob péektsiloʼ yéetel ka k-xul tsʼáaik ichil k-kuxtal baʼaxoʼob ku yaʼalik Dios (Efesoiloʼob 6:11-13). ¡Bejlaʼeʼ maʼ u kʼiinil ka k-chaʼa u tuʼubultoʼon kuxaʼanoʼon tu tsʼook kʼiinoʼobiʼ!
20 Jesuseʼ u yojel jach talam kun ilbil tumen u j-tsaypachoʼob le baʼaxoʼob tsʼoʼok k-aʼalikaʼ, le oʼolal tu tsʼáaj le tsolnuʼukaʼ: «Pʼil ichneneʼex [mantatsʼ], tumen maʼ a wojeleʼex baʼax hora ken taalak Yuumtsiloʼ» (Mateo 24:42). Le oʼolaleʼ, pʼil ichnakoʼon mantatsʼ, maʼ u tuʼubultoʼon tu tsʼook kʼiin kuxlikoʼon. Unaj kanáantikba tiʼ baʼaxoʼob ku meyaj tiʼ Satanás utiaʼal u beetik u xuʼulul k-tsʼáaik k-óol meyajt Dios. Unaj k-chʼaʼatuklik maas kʼaʼaytik u maʼalob péektsilil u Reino Dios. Maʼ u tuʼubultoʼoneʼ Jesuseʼ tu yaʼalaj ka pʼil ichnakoʼon mantatsʼ yéetel maʼ u tuʼubultoʼon wa tu tsʼook kʼiinoʼob kuxaʼanoʼon. Wa k-beetik beyoʼ, yaan k-nojbeʼenkúuntik Jéeoba, yéetel letiʼeʼ yaan u yeʼesiktoʼon u yutsil utiaʼal mantatsʼ.
¿Baʼax jeʼel a núukikeʼ?
• ¿Baʼax eʼesik tiʼ máaxoʼob meyajtik Dios aʼalaʼan ka pʼil ichnakoʼob mantatsʼ?
• ¿Tiʼ baʼaxoʼob uchaʼantak ku tʼaan le Biblia jeʼel u yáantkoʼon ka pʼil ichnakoʼon mantatsʼoʼ?
• ¿Baʼax «u kʼiinil [le] pʼis óol[oʼ]», yéetel baʼax ku yaʼalaʼaltoʼon ka k-beet táanil tiʼ u tsʼoʼokol?
[U kʼáatchiʼiloʼob le xookoʼ]
[U tsolajil le oochel teʼ táan juʼun 22]
Le xookaʼ tiʼ chʼaʼabaʼan teʼ folleto ¡Manténgase alerta!, jóoʼsaʼab teʼ tu noj muchʼtáambaliloʼob óoxpʼéel kʼiin yanchaj tu jaʼabil 2004 yéetel 2005.
[U tsolajil le oochel teʼ táan juʼun 23]
Jesuseʼ tu ketaj u taalbal utiaʼal u xuʼuls le kʼasaʼan yóokʼol kaab yéetel bix u taal utúul j-ookoloʼ
[U tsolajil le oochel teʼ táan juʼun 24]
Tsʼoʼok u náatsʼal u kʼiinil u xuʼulsaʼal le nojoch Babiloniaoʼ
[U tsolajil le oochel teʼ táan juʼun 25]
Unaj k-chʼaʼatuklik maas kʼaʼaytik u maʼalob péektsilil u Reino Dios