Unaj k-kuxtal jeʼex kuxlajik Cristoeʼ

«Le máax ku yaʼalik nuupul yanil yéetel Jajal Dioseʼ unaj u kuxtal jeʼel bix kuxlajik Jesucristoeʼ.» (1 JUAN 2:6.)

1, 2. ¿Baʼax u kʼáat u yaʼal u tsʼáaik u paakat máak tiʼ Jesús?

APÓSTOL Pabloeʼ tu tsʼíibtaj: «Ka k-áalkabt yéetel chúukaʼan óolal le bej yaan táanil toʼonoʼ. [Koʼoneʼex] tsʼáaik k-paakat tiʼ Jesús, tiʼ máax ku taal k-oksaj óolal yéetel máax ku yutsil chukaʼankúuntik» (Hebreob 12:1, 2). Utiaʼal ka chúukpajak k-óol meyajt Dioseʼ kʼaʼabéet k-tsʼáaik k-paakat tiʼ Jesucristo.

² Teʼ Kiliʼich Tsʼíiboʼob ich Griegooʼ, le tʼaan ku suʼutul «tsʼáaik k-paakat tiʼ», u kʼáat u yaʼaleʼ «maʼ u luʼsik u paakat tiʼ upʼéel baʼal», «u sutik u yich utiaʼal u paktik yaanal baʼal», «u chʼíikil u pakt upʼéel baʼal». Upʼéel libroeʼ ku yaʼalik: «Le ken u jáan sut u yich le griego ku ketlan áalkab utiaʼal u paktik le máaxoʼob ilik u yáalkaboʼ ku xuʼulul u paktik le pistaoʼ yéetel le tuʼux ku kʼuchloʼ, teʼ súutukoʼ ku pʼáatal maʼ jach chich u biniʼ. Lelaʼ jach bey u yúuchul tiʼ utúul cristianooʼ». Le náaysaj óoloʼoboʼ jeʼel u beetik k-xulik tsʼáaik k-óol meyajt Dioseʼ, le oʼolaleʼ, kʼaʼabéet k-jach «tsʼáaik k-paakat tiʼ Jesús». ¿Baʼax túun unaj k-ilik tiʼ Jesús, «tiʼ máax ku taal k-oksaj óolal[oʼ]»? Le tʼaan ich griego ku suʼutul «tiʼ máax ku taal» u kʼáat xan u yaʼal «máax ku tsʼáaik nuʼuktaj» yéetel «máax jeʼekʼabtik upʼéel bej, utiaʼal u bisik u maasil tu paach». U tsʼáaik u paakat máak tiʼ Jesuseʼ u kʼáat xan u yaʼal u beetik máak jeʼex tu beetiloʼ.

3, 4. 1) ¿Baʼax unaj k-beetik utiaʼal ka kuxlakoʼon jeʼex kuxlajik Jesucristoeʼ? 2) ¿Baʼax kʼáatchiʼiloʼob ken k-xakʼalteʼex?

³ Le Bibliaoʼ ku yaʼalik: «Le máax ku yaʼalik nuupul yanil yéetel Jajal Dioseʼ unaj u kuxtal jeʼel bix kuxlajik Jesucristoeʼ» (1 Juan 2:6). Utiaʼal k-eʼesik nuupul yaniloʼon yéetel Dioseʼ, kʼaʼabéet k-beetik baʼax tu yaʼalaj Jesús, jeʼex letiʼ tu beetaj baʼax tu yaʼalaj u Taataeʼ (Juan 15:10).

⁴ Le oʼolaleʼ, utiaʼal ka kuxlakoʼon jeʼel bix kuxlajik Cristoeʼ unaj k-ilik letiʼ nuʼuktikoʼon yéetel unaj k-beetik jeʼex tu beetiloʼ. Yoʼolal lelaʼ, ichil le xookaʼ yaan k-xakʼaltik le kʼáatchiʼobaʼ: ¿Bix u nuʼuktikoʼon Jesús bejlaʼeʼ? ¿Baʼax unaj k-beetik wa táan k-kuxtal jeʼex kuxlajik Cristoeʼ? ¿Baʼax utsiloʼob jeʼel k-kʼamik wa k-beetik jeʼex letiʼeʼ?

Bix u nuʼuktik Jesús le máaxoʼob tsaypachtikoʼ

5. Ka tsʼoʼok u yaʼalik Jesús tiʼ u j-tsaypachoʼob ka u beetoʼob upʼéel meyajeʼ, ¿baʼax uláakʼ tu yaʼalajtiʼob?

⁵ Táanil tiʼ u bin teʼ kaʼanoʼ, Jesuseʼ tu chíikbesuba tiʼ u j-tsaypachoʼob yéetel tu yaʼalajtiʼob ka u beetoʼob le meyaj jach kʼaʼananaʼ: «Xeeneʼex túun tiʼ u kajnáaliloʼob tuláakal kaajoʼobeʼ ka a beeteʼexoʼob j-kaambaloʼob». Jesuseʼ tu yaʼalaj xan tiʼobeʼ yaan u yantal tu yéeteloʼob utiaʼal u beetkoʼob le meyajaʼ: «Ojéelteʼexeʼ teneʼ tiʼ yanen ta wéeteleʼex tuláakal kʼiinoʼob tak tu xuul yóokʼol kaab» (Mateo 28:19, 20). ¿Bix  túun yanil Jesús yéetel u j-tsaypachoʼob teʼ tu tsʼook kʼiinoʼobaʼ?

6, 7. ¿Bix u meyaj tiʼ Cristo le kiliʼich muukʼ utiaʼal u tsʼáaiktoʼon nuʼuktajoʼ?

⁶ Upʼéel tiʼ le baʼaxoʼob ku meyaj tiʼ Cristo utiaʼal u nuʼuktikoʼon jeʼex utstutʼaan Dioseʼ, letiʼ le kiliʼich muukʼoʼ (Mateo 28:18). Jesuseʼ tu yaʼalaj: «Le Kiliʼich Pixan [wa Kiliʼich muukʼ ken] u túuxt le Taata tin kʼaabaʼoʼ, utiaʼal ka u yáanteʼex yéetel u tsʼáaik a wóoleʼexeʼ, letiʼ [ken] u kaʼans teʼex tuláakal baʼal, yéetel yaan u kʼaʼajsik teʼex tuláakal le baʼaloʼob tsʼoʼok in waʼalik teʼexoʼ» (Juan 14:26). Le kiliʼich muukʼ túuxtaʼan tu kʼaabaʼ Jesusoʼ, ku nuʼuktikoʼon, ku líiʼsik k-óol yéetel ku yáantkoʼon utiaʼal ka k-naʼat «tak u jach taʼakbil baʼaloʼob Jajal Dios» (1 Corintoiloʼob 2:10). Tsʼoʼoleʼ, le jatsʼuts modos jeʼex «yaakunaj, kiʼimak óolal, jeetsʼel óolal, chúukaʼan óolal, maʼalob bisajbáail, utsil puksiʼikʼal, oksaj óolal, kabal óolal yéetel muʼukʼaʼan óolal[eʼ]», tiʼ le kiliʼich muukʼ u taaloʼ (Galaciailoʼob 5:22, 23). Yéetel u yáantaj le kiliʼich muukʼoʼ jeʼel u páajtal u yantaltoʼon le modosoʼobaʼ.

⁷ Jeʼex u bin k-xokik le Biblia yéetel jeʼex u bin k-tsʼáaik ichil k-kuxtal le baʼaxoʼob k-kanikoʼ, u kiliʼich muukʼ Jéeobaeʼ ku yáantikoʼon utiaʼal ka yanaktoʼon ojéelalil, naʼatil, maʼalob tuukul, ka k-ojéelt baʼax noʼojaʼan yéetel ku yáantkoʼon utiaʼal maʼ k-tsikbaltik baʼaloʼob maʼ unaj u yojéeltaʼaliʼ (Proverbios 2:1-11). Le kiliʼich muukʼ xanoʼ ku yáantikoʼon utiaʼal maʼ k-beetik baʼax kʼaas yéetel utiaʼal u chúukpajal k-óol tu táan chʼaʼapachtajil (1 Corintoiloʼob 10:13; 2 Corintoiloʼob 4:7; Filiposiloʼob 4:13). Tiʼ toʼon xaneʼ ku yaʼalaʼal maʼ k-éekʼkuntik k-wíinklil bey xan k-kuxtal, «yéetel unaj chúukaʼan k-kʼubikba tiʼ Jajal Dios ichil u sajakilil» (2 Corintoiloʼob 7:1). Wa maʼ u yáantikoʼon le kiliʼich muukʼoʼ, ¿jeʼel wa u páajtal k-kuxtal ich kiliʼichil jeʼex u yaʼalik Dioseʼ?

8, 9. ¿Bix u meyaj tiʼ Jesús «le palitsil chúukpajaʼan u yóol yéetel yaan u naʼat» utiaʼal u nuʼuktikoʼonoʼ?

⁸ Koʼoneʼex ilik uláakʼ upʼéel baʼax ku meyaj tiʼ Cristo utiaʼal u nuʼuktik le múuchʼuliloʼ. Ka tʼaanaj tiʼ u taalbal yéetel tiʼ u xuʼulul yóokʼol kaabeʼ, tu yaʼalaj: «¿Máax le palitsil chúukpajaʼan u yóol yéetel yaan u naʼat, ku pʼaʼatal tumen u tsʼuulil utiaʼal u táan óolt [wa u tsʼáa baʼax kʼaʼabéet tiʼ] le máaxoʼob otochnáaloʼob utiaʼal ka u tsʼáa janal tiʼob tu yorailoʼ? Kiʼ yóol le palitsiloʼ wa le ken suunak u tsʼuuliloʼ ku yilik táan u beetik beyoʼ. Tu jaajil kin waʼalik tiʼ teʼexeʼ le tsʼuuloʼ bíin u tsʼáa u kanáant tuláakal baʼax yaan tiʼ» (Mateo 24:3, 45-47).

⁹ Le «tsʼuuloʼ» Jesucristo. Le «palitsiloʼ» letiʼe tuláakal le máaxoʼob yéeyaʼanoʼob utiaʼal bin kaʼan yanoʼob way Luʼumaʼ, tiʼ letiʼob tsʼaʼan tumen Jesús tuláakal baʼax yaan tiʼ yéetel tiʼ letiʼob aʼalaʼan ka u tsʼaʼob, jach tu yoraileʼ, le kaʼansaj ku keʼetel yéetel janaloʼ. Le sukuʼunoʼob ku nuʼuktajoʼoboʼ ku tʼaanoʼob tu yoʼolal le palitsil aʼalaʼab tumen Jesusoʼ, le sukuʼunoʼob ku nuʼuktajoʼobaʼ, u chan múuchʼ nuxiboʼob noʼojaʼanoʼob táakaʼanoʼob xan ichil «le palitsil chúukpajaʼan u yóol yéetel yaan u naʼat[oʼ]». Letiʼob nuʼuktik le kʼaʼaytaj ku beetaʼal tuláakal tuʼuxoʼ yéetel ku tsʼáaikoʼob le kaʼansaj jach tu yorailoʼ. K-ilik túuneʼ, tiʼ Jesuseʼ ku meyaj «le palitsil chúukpajaʼan u yóol yéetel yaan u naʼat» bey xan le sukuʼunoʼob ku nuʼuktajoʼoboʼ utiaʼal u nuʼuktik le múuchʼuliloʼ.

10. ¿Bix unaj k-ilik le nuxiboʼoboʼ, yéetel baʼaxten?

¹⁰ Uláakʼ baʼax ku meyaj tiʼ Jesús utiaʼal u nuʼuktikoʼoneʼ letiʼ le «siibaloʼob tiʼ máakoʼob[oʼ]», lelaʼ u kʼáat u yaʼaleʼ, letiʼ le nuxiboʼob u tsʼaamaj utiaʼal u nuʼuktik «le máaxoʼob utiaʼaloʼoboʼ» (Efesoiloʼob 4:8, 11, 12). Yoʼolal lelaʼ, Hebreob 13:7 ku yaʼalik: «Kʼaʼajseʼex le máaxoʼob tu nuʼuktaj teʼex le bejoʼ yéetel tu tseʼektaj teʼex u tʼaan Jajal Diosoʼ; tukulteʼex bix biniktiʼob tiʼ u kuxtaloʼobeʼ ka a keteʼex u yoksaj óolaloʼob». Le nuxiboʼoboʼ letiʼob nuʼuktik le múuchʼuliloʼoboʼ, yéetel tumen ku kuxtaloʼob jeʼel bix kuxlajik Jesucristoeʼ, maʼalob ka beetaʼak jeʼex letiʼoboʼ (1 Corintoiloʼob 11:1). Wa k-chaʼik k-nuʼuktaʼal tumen le nuxiboʼob yéetel wa k-uʼuyik u tʼaanoʼobeʼ k-eʼesik k-tsʼáaik nib óolal tiʼ Jéeoba yoʼolal le «siibaloʼob tiʼ máakoʼob» u tsʼaamajtoʼonoʼ (Hebreob 13:17).

11. ¿Baʼaxoʼob ku meyaj tiʼ Jesús utiaʼal u nuʼuktik máaxoʼob tsaypachtik, yéetel baʼax unaj k-beetik utiaʼal ka kuxlakoʼon jeʼex kuxlajikoʼ?

¹¹ Jeʼex túun k-ilkoʼ, Jesucristoeʼ ku nuʼuktik u j-tsaypachoʼob yéetel le kiliʼich muukʼoʼ, yéetel  «le palitsil chúukpajaʼan u yóol yéetel yaan u naʼat[oʼ]» bey xan yéetel le nuxiboʼob tiʼ le múuchʼuliloʼoboʼ. Utiaʼal ka kuxlakoʼon jeʼex úuchik u kuxtal Jesuseʼ unaj k-naʼatik bix u nuʼuktikoʼon yéetel k-tsʼáaikba yáanal u páajtalil. Unaj xan k-naʼatik baʼaxoʼob tu beetaj. Apóstol Pedroeʼ tu tsʼíibtaj: «Jajal Dioseʼ tu tʼanajeʼex utiaʼal lelaʼ, tumen Cristoeʼ mukʼyajnaj ta woʼolaleʼex, ka tu tsʼáaj teʼex jumpʼéel kaʼansaj, utiaʼal ka kuxlakeʼex jeʼel bix kuxlajik letiʼoʼ» (1 Pedro 2:21). ¿Baʼax unaj k-beetik wa táan k-kuxtal jeʼex kuxlajik Jesusoʼ?

Unaj k-eʼesik utsil puksiʼikʼal ken meyajnaktoʼon le páajtalil tsʼaʼantoʼonoʼ

12. ¿Baʼax unaj u beetaʼal tumen le nuxiboʼob jeʼex tu beetil Jesusoʼ?

¹² Kex yaʼab páajtalil tsʼaʼab tiʼ Jesús tumen u Taataeʼ, letiʼeʼ tu yeʼesaj utsil puksiʼikʼal ka meyajnaj tiʼ. Tuláakal máaxoʼob meyajtik Dios, maases le nuxiboʼoboʼ, unaj u kʼaj óoltaʼaloʼob tumen tuláakaleʼ bey «máaxoʼob uts u puksiʼikʼaloʼobeʼ» (Filiposiloʼob 4:5; 1 Timoteo 3:2, 3). Tiʼ le nuxiboʼoboʼ tsʼaʼan páajtalil tiʼob utiaʼal u kanáantikoʼob le múuchʼuliloʼ, le oʼolaleʼ jach unaj u yeʼeskoʼob utsil puksiʼikʼal ken meyajnaktiʼob, jeʼex tu beetil Jesuseʼ.

13, 14. ¿Bix jeʼel u beetaʼal tumen le nuxiboʼob jeʼex tu beetil Cristo ken u líiʼsoʼob u yóol u maasil u meyajtoʼob Diosoʼ?

¹³ Jesuseʼ maʼ tu yaʼalaj tiʼ u j-tsaypachoʼob ka u beetoʼob baʼaloʼob u yojel maʼ tu páajtal u beetkoʼobiʼ (Juan 16:12). Tu yaʼalaj tiʼob ka u jach tsʼáa u yóoloʼob u beetoʼob baʼax u kʼáat Dios, baʼaleʼ mix utéen tu kʼeyoʼob utiaʼal ka u beetoʼob (Lucas 13:24). Yoʼolal bix kuxlajikeʼ tu yeʼesajtiʼob bix jeʼel u beetkoʼobeʼ yéetel tu yilaj ka jóokʼok tu puksiʼikʼaloʼob u meyajtkoʼob Dios. Bejlaʼa xaneʼ, le nuxiboʼoboʼ maʼatech u sublakkúuntikoʼob le sukuʼunoʼob yoʼolal le bukaʼaj ku beetkoʼob tiʼ u meeyjul Diosoʼ, mix tech u sajakkúuntikoʼob utiaʼal ka u meyajtoʼob Dios. Baʼaxeʼ ku líiʼsik u yóoloʼob utiaʼal ka u meyajtoʼob Jéeoba tumen u yaabiltmoʼob, yéetel yoʼolal u yaabilajoʼob tiʼ Jesús bey xan tiʼ u yéet wíinikiloʼob (Mateo 22:37-39).

¹⁴ Jesuseʼ maʼ tu controlartaj u kuxtal mix máak kex yaʼab páajtalil tsʼaʼan kaʼach tiʼ, maʼ tu yaʼalaj ka beetaʼak tumen u j-tsaypachoʼob baʼaloʼob maʼ tu páajtal u beetkoʼobiʼ, yéetel mix tu tsʼáaj yaʼabkach leyoʼobiʼ. Yéetel le baʼaxoʼob ku yaʼalik u Ley Moisesoʼ tu yáantoʼob ka jóokʼok tu puksiʼikʼaloʼob u meyajtoʼob Dios (Mateo 5:27, 28). Jeʼex Jesuseʼ, le nuxiboʼob xanoʼ maʼ unaj u beetkoʼob leyoʼobiʼ mix unaj u yilkoʼob ka beetaʼak chéen baʼax u kʼáatoʼobiʼ. Tiʼ baʼaloʼob yaan yil yéetel bix unaj u líiʼskuba yéetel bix unaj u náaysik u yóol máakeʼ, ku yilkoʼob ka jóokʼok tu puksiʼikʼal máak u beetik baʼax maʼalob yéetel u yáantaj tekstoʼob jeʼex Miqueas 6:8, 1 Corintoiloʼob 10:31-33 yéetel 1 Timoteo 2:9, 10.

Unaj k-kanik il bix u yuʼubikuba u maasil yéetel k-saʼasaj siʼipil

15. ¿Baʼax tu beetaj Jesús le ka beetaʼab baʼax maʼ unaj yéetel ka siʼipilchaj le máaxoʼob tsaypachkoʼ?

¹⁵ Le bix úuchik u yáantik u j-kaambaloʼob ka tsʼoʼok u beetkoʼob upʼéel baʼax maʼ maʼalob yéetel ka siʼipilchajoʼobeʼ, Cristoeʼ tu yeʼesaj bix xan unaj k-beetik. Koʼoneʼex ilik kaʼapʼéel baʼax úuch teʼ tu tsʼook áakʼab kuxlaj Jesús way Luʼumeʼ. Ka kʼuch tu jardinil Getsemanieʼ, «tu bisaj Pedro, Jacobo [wa Santiago] yéetel Juan» ka tu yaʼalajtiʼob: «Maʼ a weneleʼex». Tsʼoʼoleʼ, ka bin maʼ jach náach tiʼobeʼ ka xolaj payalchiʼ. Le ka suunajeʼ, «tu yilaj táan u weneloʼob». ¿Baʼax túun tu beetaj Jesús? Letiʼeʼ tu yaʼalaj:  «Tu jaajileʼ le pixanoʼ chúukaʼan u yóol, baʼaleʼ le wíinkliloʼ minaʼan u muukʼ» (Marcos 14:32-38). Jesuseʼ maʼ tu tsʼíikiltoʼobiʼ, tu naʼataj bix u yuʼubikubaʼob. Teʼ áakʼab xan jeʼeloʼ, Pedroeʼ óoxtéen tu yaʼalaj maʼ u kʼaj óol Jesusiʼ (Marcos 14:66-72). ¿Baʼax túun tu beetaj Jesús ka tsʼoʼok u kaʼa kuxtal? U Evangelioi Lucaseʼ ku yaʼalik le ka tsʼoʼok u kaʼa kuxtal Jesuseʼ «[chíikpaj] tiʼ Simón» wa Pedro (Lucas 24:34). Le Biblia xanoʼ ku yaʼalik: «Chíikpaj tiʼ Pedro, ku tsʼoʼokoleʼ tiʼ le apostoloʼoboʼ» (1 Corintoiloʼob 15:5). Jesuseʼ maʼ kʼuuxilnaj tiʼ Pedroiʼ, baʼaxeʼ tu saʼasaj le baʼax tu beetoʼ yéetel tu líiʼsaj u yóol. Ka máan kʼiineʼ tu tsʼáaj meyaj maas nuuktak u beet teʼ múuchʼuliloʼ (Beetaʼanoʼob [Hechos] 2:14; 8:14-17; 10:44, 45).

16. ¿Bix jeʼel k-beetik jeʼex tu beetil Jesús ken beetaʼaktoʼon baʼax maʼ maʼalob tumen k-sukuʼunoʼobeʼ?

¹⁶ Ken beetaʼaktoʼon baʼax maʼ maʼalob tumen k-sukuʼunoʼob wa ken u beetoʼob wa baʼax ku beetik u yaatal k-óol yoʼolal le kʼeban yaan tu wíinklil máakoʼ, toʼon xaneʼ unaj k-saʼasik tiʼob yéetel unaj k-tuukul tu yoʼolaloʼob, jeʼex tu beetil Jesuseʼ. Pedroeʼ tu yaʼalaj tiʼ u yéet cristianoiloʼob: «Kuxleneʼex tuláakaleʼex ichil jumpʼéeliliʼ tuukul bey xan yéetel chʼaʼa óotsilil ta baatsileʼex, yaabiltabaʼex jeʼel bix sukuʼunoʼobeʼ. Yanak teʼex muumun puksiʼikʼal bey xan kabal óolal. Maʼ a sutikeʼex kʼaas tu yoʼolal kʼaas, mix poochʼil tu yoʼolal poochʼil. Baʼax unajeʼ suteʼex kiʼikiʼtʼaan, tumen Jajal Dioseʼ tsʼoʼok u tʼanikeʼex utiaʼal a kʼamikeʼex kiʼikiʼtʼaan» (1 Pedro 3:8, 9). ¿Kux túun wa maʼ tu yeʼesaʼaltoʼon uts yéetel yaabilaj jeʼel bix jeʼel u beetaʼal tumen Jesuseʼ? Kex beyoʼ, toʼoneʼ unaj k-tuukul tu yoʼolaloʼob yéetel k-beetik baʼax maʼalob jeʼex k-tuklik jeʼel u beetaʼal tumen Jesuseʼ (1 Juan 3:16).

Unaj k-tsʼáaik táanil u baʼalubaʼob le Reinooʼ

17. ¿Baʼax eʼesik Jesuseʼ tu tsʼáaj táanil u beetik baʼax utstutʼaan Dios?

¹⁷ Le baʼax tu tsʼáaj táanil ichil u kuxtal Jesusoʼ letiʼe u kʼaʼaytik u maʼalob péektsilil u Reino Diosoʼ. Le ka tsʼoʼok u tsikbaltik le maʼalob péektsil tiʼ utúul samaritana, maʼ náach tiʼ u kaajil Sicar, tu luʼumil Samariaeʼ, tu yaʼalaj tiʼ u j-kaambaloʼob: «In janaleʼ in beetik u yóolal le máax túuxtenoʼ, yéetel in tsʼoʼoksik u meyaj» (Juan 4:34). Utiaʼal Jesuseʼ u beetik baʼax u kʼáat u Taataeʼ ku tsʼáaik kuxtal tiʼ, bey ka u jaant upʼéel maʼalob yéetel upʼéel jach kiʼikiʼ janaleʼ. ¿Máasaʼ wa k-tsʼáaik k-óol beet baʼax u kʼáat Dios jeʼex tu beetil Jesuseʼ jeʼel u yantaltoʼon upʼéel maʼalob kuxtaleʼ?

18. ¿Baʼax utsiloʼob ku yilaʼal wa ku líiʼsaʼal u yóol le paalaloʼob ka u beet u táanilkunsajiloʼoboʼ?

¹⁸ Wa le taatatsiloʼob ku líiʼsik u yóol u paalal u beet u táanilkunsajiloʼobeʼ, letiʼob bey xan u paaloʼobeʼ ku kʼamkoʼob yaʼab utsiloʼob. Utúul taatatsileʼ, tu chichnil u mejen paalal ka joʼopʼ u líiʼsik u yóoloʼob ka u beet u táanilkunsajiloʼob, ka tsʼoʼok u xook u paalaloʼobeʼ bey tu beetiloʼoboʼ. Ka joʼopʼ u kʼaʼajsik le taatatsil le kiʼimak óolaloʼob tsʼoʼok u yilik yoʼolal le baʼax ku beetik u paalaloʼoboʼ, tu yaʼalaj: «K-paalaleʼ maʼ u beetoʼob u lúubul k-óoliʼ. Jeʼel u páajtal k-aʼalik tu jaajil k-óoleʼ “le paalaloʼob ku síijil toʼonoʼ, u siibalil u ayikʼalil Yuumtsil”» (Salmo 127:3). Kux túun le paalal ku beetik u táanilkunsajiloʼoboʼ, ¿baʼax utsil xan ku yilkoʼob? Utúul maamatsil yaan cinco utúulul u paalaleʼ ku yaʼalik: «Úuchik u beetik u táanilkunsajil in paalaleʼ, tsʼoʼok u yáantikoʼob u maas natsʼubaʼob tiʼ Jéeoba, ka u maas tsʼáa u yóol u xokoʼob le Biblia yéetel le revistaʼoboʼ, ka u kan u tʼox u tiempoʼob tiʼ baʼax ku beetkoʼob yéetel ka u kan u tsʼaʼob táanil u meyajkoʼob Dios. Kex tuláakloʼob yaʼab kʼeexoʼob tu beetoʼob ichil u kuxtaloʼobeʼ, maʼatech u yaatal tu yóoloʼob».

19. ¿Baʼax maʼalob ka u chʼaʼatukult u beetik le táankelem paalaloʼoboʼ?

 ¹⁹ Táankelem paalaleʼex, ¿baʼax tsʼoʼok a chʼaʼatuklik a beetikeʼex? ¿Táan wa a wilkeʼex u yantalteʼex upʼéel maʼalob meyaj, wa táan a wilik a beetik a táanilkunsajileʼex tuláakal u kʼiinil a kuxtaleʼex? Pabloeʼ tu yaʼalaj: «Il a wileʼex bix a xíimbaleʼex. Maʼ a kuxtaleʼex bey máaxoʼob minaʼan u naʼatoʼobeʼ baʼaleʼ bey máaxoʼob yaan u naʼatoʼobeʼ. Maʼ a chéen máansaj kʼiineʼex tumen kʼasaʼan le kʼiinoʼoboʼ. Maʼ a béeytaleʼex bey j-maʼ naʼateʼ; il a wil a naʼatikeʼex baʼax u kʼáat Yuumtsil» (Efesoiloʼob 5:15-17).

Unaj k-eʼesik chúukaʼan óolal

20, 21. ¿Bix úuchik u yeʼesik chúukaʼan óolal Jesús, yéetel bix jeʼel k-beetik jeʼex letiʼeʼ?

²⁰ Utiaʼal k-kuxtal jeʼex kuxlajik Jesuseʼ unaj xan k-eʼesik chúukaʼan óolal jeʼex letiʼeʼ. Le Bibliaoʼ ku yaʼalik yoʼolal le modosaʼ: «Kex letiʼ [bey] Jajal Dioseʼ, maʼ tu yóoltaj u kʼaʼabéetkunt le páajtalil yaan tiʼ utiaʼal u ketikuba yéetel Jajal Diosoʼ, baʼaleʼ tu pʼataj juntséelil le baʼax utiaʼaloʼ ka tu beetjuba jeʼel bix palitsileʼ, le ka j-síij jeʼel bix máakeʼ. Le ka tu beetjuba máakileʼ, tu kabalkúuntaj u yóol yéetel tu yoʼolal u yuʼubaj tʼaaneʼ bin tiʼ kíimil». Jesuseʼ chúukpaj u yóol u tsʼáauba tu tséel u gobernación Jéeoba, tumen tu beetaj tuláakal baʼax u kʼáat u Taata. Tu beetaj baʼax u kʼáat u Taata tak ka kíimsaʼab chʼuykíintaʼan tiʼ upʼéel cheʼ. Toʼon xaneʼ, wa ku chúukpajal k-óol tsʼáaikba tu tséel u gobernación Jéeobaeʼ k-eʼesik k-tuukul «jeʼel bix tuukulnajik Cristo Jesusoʼ» (Filiposiloʼob 2:5-8).

²¹ Jesuseʼ tu yeʼesaj xan chúukaʼan óolal tiʼ u apostoloʼob. Kex kʼebanoʼob yéetel yaan kʼiin ku beetkoʼob baʼax maʼ maʼalobeʼ, «tu yaabiltajoʼob tak tu xuul» (Juan 13:1). Le oʼolaleʼ, toʼoneʼ maʼ unaj k-tʼaan tu contra k-sukuʼunoʼob ken u beetoʼob toʼon wa baʼax maʼ maʼalob yoʼolal le kʼebanoʼ.

Unaj k-kuxtal mantatsʼ jeʼex kuxlajik Jesuseʼ

22, 23. ¿Baʼax utsiloʼob ku taasik u kuxtal máak jeʼex kuxlajik Jesuseʼ?

²² Baʼaleʼ, yoʼolal le kʼeban yaan t-wíinkliloʼ maʼ tu páajtal k-kuxtal jach jeʼex kuxlajik Jesuseʼ, baʼaxeʼ jeʼel u páajtal k-beetik tuláakal le ku páajtal utiaʼal ka kuxlakoʼon jeʼex letiʼeʼ. Utiaʼal leloʼ, unaj k-naʼatik bix u nuʼuktikoʼon Cristo yéetel k-tsʼáaikba yáanal u páajtalil, beyoʼ k-beetik jeʼex tu beetiloʼ.

²³ U beetik máak jeʼex tu beetil Jesuseʼ ku taasik yaʼab utsiloʼob. K-kuxtaleʼ ku maas yantal u biilal yéetel ku maas yantaltoʼon kiʼimak óolal, tumen k-jach tsʼáaik óol k-beet baʼax u kʼáat Dios maʼ baʼax k-kʼáat toʼoniʼ (Juan 5:30; 6:38). Yantoʼon upʼéel maʼalob tuukul, tsʼoʼoleʼ, k-eʼesik baʼax unaj u beetik xan u maasil. Jesuseʼ tu yaʼalaj tiʼ le máaxoʼob lubaʼan u yóoloʼoboʼ ka u natsʼubaʼob tu yiknal utiaʼal ka u yáantoʼob (Mateo 11:28-30). Wa k-beetik jeʼex letiʼeʼ, yaan k-líiʼsik u yóol le máaxoʼob yanoʼob t-éeteloʼ. Le oʼolaleʼ, kuxlakoʼon mantatsʼ jeʼex kuxlajik Jesuseʼ.

¿Kʼajaʼan wa tech?

• Cristoeʼ, ¿bix u nuʼuktik u j-tsaypachoʼob teʼ kʼiinoʼobaʼ?

• ¿Bix jeʼel u beetaʼal jeʼex tu beetil Cristo tumen le nuxiboʼob ken meyajnaktiʼob le páajtalil tsʼaʼantiʼoboʼ?

• ¿Bix jeʼel k-beetik jeʼex tu beetil Jesús ken beetaʼaktoʼon baʼax maʼ maʼalob tumen k-sukuʼunoʼobiʼ?

• ¿Bix jeʼel u tsʼaʼabal táanil u Reino Dios tumen le táankelem paalaloʼoboʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 15]

Le nuxiboʼob teʼ múuchʼuliloʼoboʼ ku yáantkoʼonoʼob utiaʼal ka kuxlakoʼon mantatsʼ jeʼex kuxlajik Jesuseʼ

[U tsolajil le oochel teʼ táan juʼun 16]

Táankelem paalaleʼex, ¿baʼax táan a tuklik a beetkeʼex utiaʼal ka xiʼikteʼex utsil?