K-jóoʼsik u súutukil utiaʼal k-tuukul tiʼ Dioseʼ ku taasiktoʼon kiʼimak óolal

Y AAN máaxoʼobeʼ maʼ tu jóoʼskoʼob u súutukil utiaʼal u tuukuloʼob tiʼ baʼax ku xokikoʼob. Ku tuklikoʼobeʼ jach nak óol, tumen utiaʼal lelaʼ jach unaj u tsʼáaik u tuukuloʼobiʼ. Maʼ xan xaaneʼ, tumen maʼ tu beetkoʼobeʼ maʼ maʼalob u yuʼubkubaʼobiʼ maases ken u xokoʼob kʼaʼabéet u tuukuloʼob tiʼ le baʼax ku kanikoʼoboʼ (Filiposiloʼob 4:8). Baʼaleʼ k-tuukul tiʼ baʼaxoʼob tsʼoʼok k-kanik tiʼ Jéeoba, tiʼ bix letiʼ, tiʼ le nukuch baʼaloʼob u beetmajoʼ, tiʼ le baʼax ku kʼáatiktoʼon ka k-beetoʼ yéetel tiʼ le baʼax u tukulmaj u beetkoʼ, ku taasiktoʼon kiʼimak óolal. ¿Baʼaxten?

Jéeobaeʼ letiʼ u Yuumil tuláakal baʼal, yéetel táan u bin u tsʼoʼokbesik le baʼax u yaʼalmaj u beetikoʼ (Juan 5:17). Baʼaleʼ letiʼeʼ utstutʼaan u yojéeltik baʼax ku tuklik le máaxoʼob meyajtikoʼ. Davideʼ u yojel kaʼach lelaʼ le oʼolal tu tsʼíibtaj: «Yuumtsil, tsʼoʼok a xakʼaltik in kuxtal, a kʼaj óolen xan; techeʼ a kʼaj óol tuláakal baʼaxoʼob kin beetik; kex tak náachileʼ, a wojel baʼax kin tuklik» (Salmo 139:1, 2).

Maʼ xaaneʼ yaan máax jeʼel u lúubul u yóoleʼ, tumen jeʼel u tuklikeʼ le baʼax tu yaʼalaj Davidaʼ u kʼáat u yaʼaleʼ Dioseʼ u yojel xan tuláakal le baʼax kʼaas ku tuklik máakoʼ. Baʼaleʼ k-ojéeltik lelaʼ jach maʼalob, tumen ku yáantkoʼon utiaʼal k-kanáantik maʼ u yantaltoʼon tuukuloʼob maʼ maʼalobtakiʼ, yéetel wa ku yantaltoʼoneʼ ku yáantkoʼon utiaʼal k-kʼáatik tiʼ Dios ka u perdonartoʼon tumen k-ojel letiʼeʼ jeʼel u perdonarkoʼon tu yoʼolal u kuxtal Jesús tu kʼubaj t-oʼolaloʼ (1 Juan 1:8, 9; 2:1, 2). Baʼaleʼ, maʼ unaj k-tuʼubsik xaneʼ, Jéeobaeʼ ku yilik le baʼaloʼob maʼalobtak k-beetkoʼ yéetel ku chʼaʼik en cuentai ken tuukulnakoʼon tiʼ letiʼ yéetel tiʼ le baʼaxoʼob ku tsʼáaiktoʼonoʼ.

Baʼaleʼ, maʼ xaaneʼ jeʼel a tuklikeʼ: «¿Jéeobaeʼ jach wa tu jaajil ku chʼaʼik en cuentai le baʼax ku tuklik tuláakal le u millonesi máakoʼob meyajtikoʼ?». Jaaj, ku chʼaʼik en cuenta. Jesuseʼ le ka tʼaanaj tiʼ le mejen chʼíichʼoʼoboʼ tu yeʼeseʼ Jéeobaeʼ u jach yaabiltmoʼon, letiʼeʼ tu yaʼalaj: «Teʼexeʼ [maas] yaan a tojoleʼex tiʼ yaʼabkach mejen chʼíichʼoʼob» (Lucas 12:6, 7). Bey túunoʼ, wa Jéeoba ku yaabiltik le mejen chʼíichʼoʼob maʼ tu páajtal u tuukuloʼob tu yoʼolaloʼ, leloʼ ku yeʼesikeʼ maas u jach yaabiltmoʼon toʼon yéetel ku jach kiʼimaktal u yóol ken tuukulnakoʼon tu yoʼolal. Jeʼex Davideʼ, jeʼel u páajtal xan k-aʼalikeʼ: «Ka kʼambeʼenchajak tiʼ teech [...] in tuukuloʼob, Yuumtsil u kúuchil in taʼakbesikimba, in j-toksajil xan» (Salmo 19:14).

Uláakʼ baʼax eʼesiktoʼon ku chʼaʼik en cuenta Jéeoba le baʼax ku tuklik le máaxoʼob meyajtik yéetel chúukaʼan óolaloʼ, letiʼ le baʼax tu tsʼíibtaj le profeta Malaquíasoʼ. Ka tʼaanaj tiʼ k-kʼiinoʼobeʼ, tu yaʼalaj: «Le máaxoʼob túun tsikik [Diosoʼ] j-tʼaanajoʼob tu baatsiloʼob, Yuumtsileʼ tu yuʼubaj maʼalob baʼaxoʼob ku yaʼalikoʼob. Tu táan túun Yuumtsileʼ j-tsʼíibtaʼab tiʼ jumpʼéel juʼun tuʼux ku kʼaʼajsaʼal máaxoʼob tsikik yéetel táan óoltik [wa ku tuukuloʼob tu yoʼolal]» (Malaquías 3:16). Wa k-kʼaʼajsik ku chʼaʼabal en cuenta tumen Jéeoba ken tuukulnakoʼon tiʼ letiʼeʼ, leloʼ yaan u taasiktoʼon kiʼimak óolal. Bey túunoʼ, koʼoneʼex aʼalik jeʼex tu yaʼalil le salmista tu yoʼolal Jéeobaoʼ: «Yaan in tukultik tuláakal le baʼax tu beetajoʼ» (Salmo 77:12).