Dioseʼ táan u béeykuntik baʼax u yaʼalmaj
Dioseʼ táan u béeykuntik baʼax u yaʼalmaj
«[Dioseʼ] ku beetik tuláakal baʼax jeʼel bix ku tukultik maʼalobeʼ.» (EFESOILOʼOB 1:11.)
1. ¿U j-jaajkunajoʼob Jéeobaeʼ baʼax ken u kʼiimbesoʼob 12 tiʼ abril tiʼ 2006?
TU ÁAKʼABIL miércoles 12 tiʼ abril tiʼ 2006, tiʼ tuláakal yóokʼol kaabeʼ yaan u muchʼikuba kex dieciséis millones máakoʼob utiaʼal u kʼiimbesoʼob u Janal Yuumtsil. Tuláakal le tuʼuxoʼob kun beetbil le kʼiimbesajaʼ, yaan u tsʼaʼabal upʼéel mesa tuʼux kun tsʼaabil waaj minaʼan mix upʼíit levadura ichil, le waajaʼ u kʼáat u yaʼal u wíinklil Cristo. Teʼ mesa xanaʼ yaan u tsʼaʼabal box chak vinoiʼ, le vinoaʼ u kʼáat u yaʼal le u kʼiʼikʼel Cristo tu wekajoʼ. Yaan xan u máansaʼal upʼéel tsoltʼaan tuʼux kun aʼalbil baʼax u kʼáat u yaʼal u Kʼiimbesajil kíimik Jesús; tu taalbal u tsʼoʼokbal le tsoltʼaanaʼ, ichil le muchʼukbaloʼoboʼ, yáaxeʼ yaan u máansaʼal le waajoʼ tsʼoʼoleʼ yaan u máansaʼal le vinooʼ. Tiʼ maʼ yaʼab múuchʼuliloʼob tiʼ u j-jaajkunajoʼob Jéeobaeʼ chéen utúul wa kaʼatúul máax kun jaantik le waaj yéetel kun ukʼik le vinooʼ, maas yaʼab le máaxoʼob maʼ ken u beetoʼoboʼ. ¿Baʼaxten chéen le máaxoʼob kun binoʼob kaʼan ku jaantikoʼob le waaj yéetel ku yuʼkoʼob le vinooʼ yéetel baʼaxten le máaxoʼob kun pʼáatloʼob kuxtal way luʼumeʼ maʼatech u beetkoʼob?
2, 3. 1) Jéeobaeʼ, ¿bix úuchik u bin u beetik tuláakal baʼal? 2) Dioseʼ, ¿baʼax oʼolal tu beetaj wíinikoʼob bey xan le Luʼumaʼ?
2 Jéeobaeʼ yaan upʼéel baʼax u yaʼalmaj u beetik, yéetel utiaʼal u béeykuntkeʼ «ku beetik tuláakal baʼax jeʼel bix ku tukultik maʼalobeʼ» (Efesoiloʼob 1:11). Yáaxeʼ tu beetaj Jesucristo, u juntúuliliʼ Hijo (Juan 1:1, 14; Apocalipsis 3:14). Tsʼoʼoleʼ, yéetel u yáantaj le u Hijoaʼ, tu beetaj le u maasil angeloʼoboʼ, le kaʼanoʼoboʼ, le luʼumaʼ yéetel le wíinikoʼoboʼ (Job 38:4, 7; Salmo 103:19-21; Juan 1:2, 3; Colosailoʼob 1:15, 16).
3 Yaʼab religionoʼobeʼ ku kaʼanskoʼobeʼ le Luʼumaʼ beetaʼab tumen Dios chéen utiaʼal u jáan kajtal wíinikoʼob, tsʼoʼoleʼ ku bisikoʼob kajtal kaʼan. Baʼaleʼ leloʼ maʼ jaajiʼ. Dioseʼ tu beetaj le Luʼum «utiaʼal ka yanak u kajnáaliloʼob» (Isaías 45:18). Tu beetaj utiaʼal u kajtal wíinikoʼobiʼ (Salmo 115:16). Tuláakal le Luʼumaʼ unaj kaʼach u sutaʼal paraísoi, unaj u kanáantaʼal yéetel u meyajtaʼal tumen utsul wíinikoʼob. Tiʼ Adán yéetel Evaeʼ mix utéen aʼalaʼabtiʼob wa yaan u kʼuchul u kʼiinil u bisaʼaloʼob kajtal kaʼan (Génesis 1:26-28; 2:7, 8, 15).
Yaan máax u tsʼaamuba tu contra baʼax u yaʼalmaj Dios
4. Tu káajbal wíinik way Luʼumeʼ, ¿baʼax tu tsʼáaj naʼatbil Satanás yoʼolal bix u gobernar Jéeoba?
4 Utúul angeleʼ tu tsʼáajuba tu contra Dios, ka kʼuch u beetuba Satanás. Le kʼasaʼan angelaʼ tumen beetaʼan yéetel u páajtalil u yéeyik baʼax u kʼáat u beeteʼ taakchaj u kʼaskúuntik baʼax u tukulmaj u beetik Dios. Káaj u beetik u kʼastal u tuukul jujuntúul u angeloʼob Dios yéetel tu náachkuntaj Adán yéetel Eva tiʼ Dios (Génesis 3:1-6). Maʼ tu tsʼáaj naʼatbil wa minaʼan u páajtalil Jéeobaiʼ, baʼaxeʼ tu tsʼáaj naʼatbil maʼ maʼalob bix u gobernariʼ. Satanás túuneʼ jach tu káajbal wíinik way Luʼum ka tu tsʼáaj naʼatbil maʼ Jéeoba unaj u gobernariʼ.
5. ¿Baʼax uláakʼ tu tsʼáaj naʼatbil Satanás, yéetel máaxoʼob táakaʼanoʼob tiʼ le baʼax tu yaʼaloʼ?
5 Tu kʼiiniloʼob Jobeʼ, Satanaseʼ yaan uláakʼ baʼax tu tsʼáaj naʼatbil yaan yil yéetel wa Jéeoba unaj u gobernar yóokʼol tuláakal baʼal. Tu tsʼáaj naʼatbileʼ le angeloʼob yéetel le wíinikoʼoboʼ maʼ táan u meyajtikoʼob Dios tumen u yaabiltmoʼobiʼ, baʼaxeʼ ku beetikoʼob chéen yoʼolal baʼaxoʼob ku kʼamikoʼob tiʼ letiʼ yéetel wa ka jáawak u kʼamkoʼob le baʼaloʼobaʼ jeʼel u náachtaloʼob tiʼ Dioseʼ (Job 1:7-11; 2:4, 5). Le baʼax tu yaʼalaj Satanasaʼ tu yaʼalaj yoʼolal utúul wíinik meyajtik Dios kaʼachi, baʼaleʼ ku táakpajal xan le angeloʼoboʼ bey xan u yáax Hijo Jéeoba.
6. Jéeobaeʼ, ¿bix tu yeʼesil u kʼáat u béeykunt baʼax u yaʼalmaj?
6 Tumen Jéeoba u kʼáat u béeykunt le baʼax u yaʼalmoʼ kʼuch u beetuba Profeta yéetel Salvadori. * Letiʼeʼ tu yaʼalaj tiʼ Satanás: «Teech yéetel le koʼoleloʼ yaan in beetik a pʼektikabaʼex, bey kun j-úuchul xan tiʼ a chʼiʼibal yéetel u chʼiʼibal letiʼ. U chʼiʼibal letiʼeʼ yaan u kiimbesikech ta pool, teech xaneʼ yaan a chiʼik u tuunkuy» (Génesis 3:15). Yéetel u Chʼiʼibal «le koʼolel[oʼ]» («le koʼolel[aʼ]» u kʼáat u yaʼal tuláakal u angeloʼob Dios), Jéeobaeʼ yaan u yeʼesik maʼ jaaj le baʼax tu tsʼáaj naʼatbil Satanás yoʼolal bix u gobernaroʼ yéetel yaan xan u tsʼáaik tiʼ wíinikoʼob u páajtalil u salvarkubaʼob yéetel u kuxtaloʼob minaʼan u xuul (Romailoʼob 5:21; Galaciailoʼob 4:26, 31).
U taʼakbil tuukuloʼob Dios
7. Le baʼax tu tsʼíibtaj le apóstol Pablooʼ, ¿baʼax ku yeʼesik yoʼolal baʼax u tukulmaj u beetik Jéeoba?
7 Teʼ carta tu tsʼíibtaj le apóstol Pablo tiʼ u cristianoiloʼob Efesooʼ tu yeʼesaj bix u bin u béeykuntik Jéeoba le baʼax u tukulmaj u beetkoʼ. Letiʼeʼ tu tsʼíibtaj: «[Dioseʼ] tsʼoʼok u beetik k-kʼaj óoltik u taʼakbil tsʼíibolal[ wa u taʼakbil tuukuloʼob], u kʼáat u yaʼaleʼ, le baʼax u tukultmaj u tsʼoʼokbesik letiʼoʼ. Tiʼ le baʼax tukultaʼan kun úuchulaʼ, yéetel yaan u yúuchul le ken kʼuchuk u kʼiinileʼ, Jajal Dioseʼ yaan u nupik yáanal u páajtalil Cristoeʼ tuláakal baʼal, le yanoʼob kaʼanoʼ bey xan le yanoʼob luʼumoʼ» (Efesoiloʼob 1:9, 10). U tuukul Jéeobaeʼ ka meyajtaʼak tumen tuláakal máakoʼob bey xan tumen tuláakal angeloʼob yoʼolal u yaabilajoʼob tiʼ letiʼ (Apocalipsis 4:11). Ken béeyak lelaʼ yaan u kiliʼichkúunsaʼal u kʼaabaʼ Dios, yaan u chíikpajleʼ Satanaseʼ chéen táan u tuus, yéetel yaan u beetaʼal baʼax u kʼáat Dios «way luʼumeʼ jeʼel bix u beetaʼal teʼ j-kaʼanoʼ» (Mateo 6:10).
8. Ich griegoeʼ, ¿baʼax tu tsʼáaj naʼatbil Pablo yéetel le baʼax tu yaʼaloʼ?
8 Jéeobaeʼ yaan u tsʼoʼokbesik baʼax u yaʼalmaj u beetik jeʼex «tukultaʼan kun úuchul» tumen letiʼeʼ. Ich griegoeʼ, le baʼax tu yaʼalaj Pabloaʼ, ku tsʼáaik naʼatbil «u yilaʼal u meeyjil ichil upʼéel naj». Pablo túuneʼ ku yeʼesikeʼ Jéeobaeʼ u tukulmaj bix ken u tsʼoʼokbesil baʼax u tukulmaj u beetik. Jéeobaeʼ tu taʼakaj bix u tukulmaj u tsʼoʼokbesik le baʼax u yaʼalmoʼ, baʼaleʼ jujumpʼíitil úuchik u bin u chíikbesik bix ken u béeykuntil (Efesoiloʼob 1:10; 3:9).
9. ¿Bix binik u yeʼesik Jéeoba le baʼax u tukulmaj u beetikoʼ?
9 Jéeobaeʼ tu beetaj yaʼab pactoʼob utiaʼal u yeʼesik bix kun bin u béeychajal baʼax tu yaʼalaj teʼ tu jardinil Edén yoʼolal u Chʼiʼibal le koʼoleloʼ. Le pacto tu beetaj yéetel Abrahamoʼ tu yeʼeseʼ le u Chʼiʼibal le koʼolelaʼ tiʼ kun taal tiʼ u paalaloʼob Abrahameʼ yéetel tu yeʼesaj xaneʼ le Chʼiʼibalaʼ yaan u taasik utsil yóokʼol tuláakal «u múuchʼ kaajiloʼob yóokʼol kaab». Le pacto xanaʼ tu tsʼáaj naʼatbil yaan máaxoʼob kun múul meyajoʼob yéetel u Chʼiʼibal le koʼoleloʼ (Génesis 22:17, 18). U pactoi le Ley tu beetaj Jéeoba yéetel u kaajil Israeloʼ tu yeʼesaj yaan máaxoʼob kun binoʼob kaʼan u beet u sacerdoteiloʼob yéetel u reyiloʼob (Éxodo 19:5, 6). Le pacto tu beetaj yéetel Davidoʼ tu yeʼeseʼ u Chʼiʼibal le koʼoleloʼ yaan u beetik u Reyil tiʼ upʼéel Reino kun xáantal utiaʼal mantatsʼ (2 Samuel 7:12, 13; Salmo 89:3, 4). Le u pactoi le Leyoʼ tu nuʼuktaj le israelitaʼob tak ka kʼuch le Mesíasoʼ; ka kʼuch túun le Mesíasoʼ, Jéeobaeʼ tu tsʼáaj ojéelbil uláakʼ baʼaloʼob yaan u yil yéetel le baʼax u tukulmaj u beetikoʼ (Galaciailoʼob 3:19, 24). Le wíinikoʼob kun múul meyajoʼob yéetel u Chiʼibal le koʼoleloʼ, yaan u beetik u reyil yéetel u sacerdoteiloʼob, yaan u yokloʼob ichil «jumpʼéel túumben núup tʼaan» wa pacto yéetel yaan xan u kʼuchul u beetubaʼob u túumben kaajal Dios (Jeremías 31:31-34; Hebreob 8:7-9). *
10, 11. 1) Jéeobaeʼ, ¿bix úuchik u yeʼesik máax u Chʼiʼibal le koʼoleloʼ? 2) ¿Baʼax oʼolal taal way Luʼum u yáax Hijo Dioseʼ?
10 Jéeobaeʼ, jeʼex u tukulmileʼ, ka kʼuch u kʼiinil u chíikpajal u Chʼiʼibal le koʼolel way Luʼumeʼ tu túuxtaj le ángel Gabriel utiaʼal ka u yaʼal tiʼ María yaan u síijsik utúul chaambal ken u kʼaabaʼt Jesús. Le angeloʼ tu yaʼalaj: «Letiʼeʼ yaan u jach nojochtal, bíin tʼaʼanak xan u paal Jajal Dios le j-sen kaʼanaloʼ, yéetel xan Jajal Dios Yuumtsil kun beetik [reyil] jeʼel bix David u taataeʼ, tu yoʼolal u beetik u jalaʼachil yóokʼol Israel mantatsʼ. U jalaʼachileʼ mix bikʼin bíin xuʼuluk» (Lucas 1:32, 33). Bey túun úuchik u chíikbesaʼal máax u Chʼiʼibal le koʼoleloʼ (Galaciailoʼob 3:16; 4:4).
11 U yáax Hijo Jéeobaeʼ unaj kaʼach u taal way Luʼum utiaʼal ka u yeʼes wa yaan u chúukpajal u yóol tiʼ u Taata kex ka jach muʼyajnakeʼ. Letiʼ kaʼach ken u yeʼes wa jaaj le baʼax tu yaʼalaj Satanasoʼ. ¿Yaan wa u chúukpajal u yóol kaʼach tiʼ u Taata? U núukil le kʼáatchiʼaʼ táakaʼan ichil le baʼaxoʼob u taʼakmaj Dios kaʼachoʼ. Pabloeʼ tu yeʼesaj bix úuchik u chíikbesaʼal tumen Jesús le baʼax taʼakaʼanaʼ, tu yaʼaleʼ «u taʼakbil baʼaloʼob k-oksaj óolaleʼ jach nojoch», tumen Jesucristoeʼ «tu chíikbesuba jeʼel bix juntúul máakeʼ; j-aʼalaʼab j-toj tumen le Kiliʼich Pixanoʼ yéetel j-ilaʼab tumen le angeloʼoboʼ. J-tseʼektaʼab tiʼ le máaxoʼob maʼ judíoʼoboʼ, j-oksaj óoltaʼab [tumen] yóokʼol kaab yéetel j-kʼaʼam teʼ j-kaʼanoʼ» (1 Timoteo 3:16). Jach beyoʼ Jesuseʼ jach chúukpaj u yóol tiʼ Dios tak ka kíimi, bey túun úuchik u yeʼesik jach maʼ jaaj le baʼax tu yaʼalaj Satanás tu yoʼolal wíinikoʼ. Baʼaleʼ tiʼ le baʼaxoʼob taʼakaʼan kaʼach tumen Diosoʼ, láayliʼ yaan jujumpʼéel baʼaloʼob unaj u yojéeltaʼal kaʼacheʼ.
«U taʼakbil baʼaliloʼob» u Reino Dios
12, 13. 1) ¿Baʼax uláakʼ táakaʼan xan kaʼach ichil u taʼakbil baʼaloʼob u Reino Dios? 2) ¿Baʼax anchaj u beetik Jéeoba utiaʼal u bisik jujuntúul wíinikoʼob teʼ kaʼanoʼ?
12 Utéen ka bin kʼaʼaytaj tu luʼumil Galileaeʼ, Jesuseʼ tu yaʼaleʼ le Reino ken u kʼamoʼ táakaʼan ichil u taʼakbil baʼaloʼob Dios. Letiʼeʼ tu yaʼalaj tiʼ u disipuloʼob: «Tiʼ teʼexeʼ Jajal Dioseʼ ku tsʼáaik a wojéelteʼex u taʼakbil baʼaloʼob u ajawil [wa u reinoi] kaʼan», wa «u taʼakbil baʼaliloʼob u ajawil [Dios]», jeʼex u yaʼalik Marcos 4:11 (Mateo 13:11). Le u yéeyaʼal 144,000 máakoʼob, ku keʼeteloʼob yéetel u chan múuchʼ taman, utiaʼal u bisaʼaloʼob kaʼan reinar yéetel Jesucristoeʼ táakaʼan xan kaʼach ichil u taʼakbil baʼaloʼob u Reino Dios (Lucas 12:32; Apocalipsis 14:1, 4).
13 Tumen wíinikoʼob beetaʼanoʼob utiaʼal u kuxtaloʼob way Luʼumeʼ, Jéeobaeʼ anchaj u beetik upʼéel «túumben» baʼal utiaʼal ka páajchajak u bisik jujuntúul wíinikoʼob teʼ kaʼanoʼ (2 Corintoiloʼob 5:17). Le apóstol Pedrooʼ, utúul tiʼ le máaxoʼob kun binoʼob teʼ kaʼanoʼ, tu tsʼíibtaj: «Koʼox kiʼikiʼtʼantik u Jajal Dios yéetel u Taata k-Yuumtsil Jesucristo, máax tu yoʼolal u nojoch chʼaʼa óotsilileʼ tsʼoʼok u beetik k-síijil tu kaʼatéen tu yoʼolal u kaʼapúut kuxtal Jesucristo tiʼ ichil le kimenoʼoboʼ. Lelaʼ ku tsʼáaiktoʼon jumpʼéel kuxtal yéetel alab óolal, yéetel bíin u beet a kʼamikeʼex le ayikʼalil u kanáantmaj a tiaʼal teʼex Jajal Dios teʼ j-kaʼanoʼ, jumpʼéel ayikʼalil maʼ tu páajtal u kʼaskúuntaʼal» (1 Pedro 1:3, 4).
14. 1) ¿Bix u táakpajal máakoʼob maʼ judíoʼob ichil u taʼakbil baʼaloʼob u Reino Dios? 2) ¿Baʼax áantkoʼon k-naʼat u «u jach taʼakbil baʼaloʼob Jajal Dios»?
14 Uláakʼ baʼax táakaʼan kaʼach ichil u taʼakbil baʼaloʼob u Reino Diosoʼ letiʼe u yéeyaʼal tak máakoʼob maʼ judíoʼob utiaʼal u binoʼob reinar yéetel Cristo teʼ kaʼanoʼ. Pabloeʼ bey tu tsolil bix ken u tsʼoʼokbesil Jéeoba le baʼax u tukulmaj u beetikoʼ: «[Le] taʼakbil baʼaloʼob[aʼ] maʼ tsʼaʼab ojéeltbil tiʼ mix máak tiʼ uláakʼ kʼiinoʼobiʼ, baʼaleʼ tiʼ le kʼiinoʼobaʼ Jajal Dioseʼ tsʼoʼok u yeʼesik tiʼ u kiliʼich apostoloʼob yéetel u profetaʼob tu yéetel u Kiliʼich Pixan. Le taʼakbil baʼaloʼ letiʼ lelaʼ: Tu yoʼolal u maʼalob péektsilil le [salvacionoʼ] le ayikʼalil kun u kʼam le máaxoʼob maʼ judíoʼoboʼ [upʼéeliliʼ] yéetel [le ken] u kʼam le judíoʼoboʼ, yéetel táakpajaʼanoʼob tiʼ jumpʼéeliliʼ [wíinklil], yéetel yaan baʼal u yiloʼob tiʼ le baʼax tu yaʼalaj Jajal Dios tu yoʼolal Cristo Jesusoʼ» (Efesoiloʼob 3:5, 6). Tiʼ le «kiliʼich apostoloʼob[oʼ]» tsʼaʼab u naʼatoʼob maʼ chéen judíoʼob kun binoʼob teʼ kaʼanoʼ. Bejlaʼa xaneʼ chéen yoʼolal u yáantaj u kiliʼich muukʼ Dios ku páajtal k-naʼatik «u jach taʼakbil baʼaloʼob Jajal Dios» (1 Corintoiloʼob 2:10; 4:1; Colosailoʼob 1:26, 27).
15, 16. Jéeobaeʼ, ¿baʼaxten tu yéeyaj wíinikoʼob utiaʼal ka xiʼikoʼob reinar yéetel Cristo teʼ kaʼanoʼ?
15 Le Bibliaoʼ ku yaʼalikeʼ le «ciento cuarenticuatro mil máakoʼob» waʼalakbaloʼob yéetel Jesucristo yóokʼol u puʼukil Sionoʼ «toʼokoʼob tiʼ ichil máakoʼobeʼ bey yáax siibal utiaʼal Jajal Dios yéetel utiaʼal le j-tamanoʼ» (Apocalipsis 14:1-4). Jéeobaeʼ tu yéeyaj u yáax Hijo utiaʼal ka u beetuba u Chʼiʼibal le koʼoleloʼ; baʼaleʼ tu yéeyaj xan wíinikoʼob utiaʼal ka múul reinarnakoʼob yéetel Cristo. ¿Baʼaxten? Le apóstol Pablo tu yaʼaleʼ le u chan múuchʼ máakoʼob kun binoʼob kaʼanoʼ yéeyaʼaboʼob tumen Dios «jeʼel bix u tukultmajileʼ» wa «jeʼel bix tu yóoltaj u beeteʼ» (Romailoʼob 8:17, 28-30; Efesoiloʼob 1:5, 11; 2 Timoteo 1:9).
16 Baʼax u tukulmaj u beetik Jéeobaeʼ u kiliʼichkúunsik u kʼaabaʼ yéetel u yeʼesik chéen letiʼ unaj u gobernar yóokʼol tuláakal baʼal. Utiaʼal u tsʼoʼokbesik baʼax u yaʼalmaj jach jeʼel bix u tukulmiloʼ, Jéeobaeʼ tu túuxtaj u yáax Paal way Luʼum utiaʼal u yeʼes wa yaan u chúukpajal u yóol kex ka jach muʼyajnakeʼ. Utiaʼal xan gobernar yéetel u Hijo teʼ kaʼanoʼ, tu chʼaʼatukultaj u yéeyik wíinikoʼob kun chúukpajal u yóoloʼob u meyajtoʼob Dios tak tu xuul (Efesoiloʼob 1:8-12; Apocalipsis 2:10, 11).
17. ¿Baʼaxten ku taasiktoʼon kiʼimak óolal k-ojéeltik Jesucristo yéetel le máaxoʼob kun gobernar tu yéeteloʼ yáax kuxlajoʼob bey wíinikoʼob way Luʼumeʼ?
17 Jéeobaeʼ tu yeʼesaj u nojoch yaabilaj tiʼ u paalal Adán úuchik u túuxtik u Hijo way Luʼumeʼ yéetel úuchik u yéeyik wíinikoʼob utiaʼal ka xiʼikoʼob reinar yéetel Cristo teʼ kaʼanoʼ. Lelaʼ, ¿baʼax utsiloʼob ken u taas tiʼ tuláakal le máaxoʼob tsʼoʼok u chúukpajal u yóoloʼob tiʼ Jéeobaoʼ? Tuláakal máak ken síijkeʼ u kuchmaj le kʼebanoʼ yéetel yaan u kíimil, le oʼolal kʼaʼabéet u naʼatsʼloʼob tiʼ Jéeoba yéetel u luʼsaʼal le kʼeban tu wíinkliloʼob utiaʼal ka pʼáatkoʼob jeʼex u kʼáat Dios tu káajbaleʼ (Romailoʼob 5:12). Utiaʼal tuláakal le máakoʼob u kʼáatoʼob kuxtal minaʼan u xuul way Luʼumeʼ jach ku taasiktiʼob kiʼimak óolal u yojéeltkoʼob Jesucristo, le máax kun reinar yóoʼloʼoboʼ, jach yaan u yeʼesiktiʼob yaabilaj jeʼex tu yeʼesil tiʼ u disipuloʼob le ka taal way Luʼumeʼ (Mateo 11:28, 29; Hebreob 2:17, 18; 4:15; 7:25, 26.) Jach ku kiʼimaktal xan u yóol u yojéeltkoʼob le máaxoʼob ken u beet u reyiloʼob yéetel u sacerdoteiloʼob yéetel Jesús teʼ kaʼanoʼ, xiiboʼob yéetel koʼoleloʼob chúukpaj u yóoloʼob tiʼ Dios kex kʼeban wíinikoʼob kaʼachi yéetel kex tu aktáantoʼob talamiloʼob jeʼex toʼon bejlaʼeʼ (Romailoʼob 7:21-25.)
Le baʼax ku yaʼalik Jéeobaoʼ ku béeytal
18, 19. ¿Baʼaxoʼob tsʼoʼok u yáantkoʼon k-maas naʼat le baʼax tu yaʼalaj apóstol Pablo teʼ Efesoiloʼob 1:8-11, yéetel baʼax ken k-il tuláakʼ xookoʼ?
18 Beoraaʼ k-maas naʼatik baʼaxten jach kʼaʼanan le baʼax tu yaʼalaj le apóstol Pablo tiʼ le cristianoʼob kun binoʼob kaʼan le ka tu tsʼíibtaj le baʼax ku yaʼalik Efesoiloʼob 1:8-11. Letiʼeʼ tu yaʼaleʼ Jéeobaeʼ tsʼoʼok u tsʼáaik ojéeltbil u «taʼakbil» tuukuloʼob, tu yaʼalaj xaneʼ yéeyaʼaboʼob utiaʼal u reinaroʼob yéetel Cristo jach jeʼex «u tukultmaj Jajal Dios[eʼ]». Tuláakal lelaʼ ku yeʼesikeʼ Jéeobaeʼ yaan upʼéel bix u tukulmaj u tsʼoʼokbesik le baʼax u yaʼalmoʼ. Ku yáantkoʼon xan k-naʼat baʼaxten maʼ yaʼab máakoʼob ku táakpajloʼob tiʼ u jaantkoʼob le waaj yéetel u yuʼkoʼob le vino teʼ tu kʼiimbesajil kíimik Cristooʼ.
19 Teʼ tuláakʼ xookoʼ yaan k-ilik baʼax u kʼáat u yaʼal u Kʼaʼasajil kíimik Cristo utiaʼal le máaxoʼob kun binoʼob kaʼanoʼ. Yaan xan k-ilik baʼaxten le máaxoʼob ku páaʼtkoʼob u kuxtaloʼob way Luʼumeʼ kʼaʼabéet u taaktal u yojéeltkoʼob baʼax u kʼáat u yaʼal le Kʼaʼasajiloʼ.
[Tsolajiloʼob]
^ xóot’ol 6 U kʼaabaʼ Dioseʼ u kʼáat u yaʼaleʼ: «Letiʼeʼ ku kʼuchul u beetuba le baʼax u Kʼáateʼ». Jéeobaeʼ ku kʼuchul u beetuba jach jeʼel baʼaxak kʼaʼabéet utiaʼal u béeykuntik baʼax u kʼáat (Éxodo 3:14, NM, u chan tsolajil).
^ xóot’ol 9 Teʼ revista La Atalaya 1 tiʼ febrero tiʼ 1989, t.jnob. 10-15, tiʼ ku maas tsoʼolol le pactoʼob tu beetaj Jéeoba utiaʼal u yeʼesik bix kun bin u béeychajal le baʼax u yaʼalmoʼ.
Utiaʼal kʼaʼajsaj
• Dioseʼ, ¿baʼax oʼolal tu beetaj wíinikoʼob bey xan le Luʼumaʼ?
• U yáax Hijo Jéeobaeʼ, ¿baʼaxten yanchaj u taal way Luʼum u yeʼes u chúukaʼan óolaleʼ?
• Jéeobaeʼ, ¿baʼaxten tu yéeyaj wíinikoʼob utiaʼal ka xiʼikoʼob reinar yéetel Cristo teʼ kaʼanoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 21]
Utiaʼal kʼaʼajsaj
• Dioseʼ, ¿baʼax oʼolal tu beetaj wíinikoʼob bey xan le Luʼumaʼ?
• U yáax Hijo Jéeobaeʼ, ¿baʼaxten yanchaj u taal way Luʼum u yeʼes u chúukaʼan óolaleʼ?
• Jéeobaeʼ, ¿baʼaxten tu yéeyaj wíinikoʼob utiaʼal ka xiʼikoʼob reinar yéetel Cristo teʼ kaʼanoʼ?