Táan u muchʼkíintaʼal le baʼaloʼob yanoʼob teʼ kaʼanoʼ bey xan le baʼaloʼob yanoʼob teʼ Luʼumaʼ
Táan u muchʼkíintaʼal le baʼaloʼob yanoʼob teʼ kaʼanoʼ bey xan le baʼaloʼob yanoʼob teʼ Luʼumaʼ
«Jajal Dioseʼ yaan u nupik yáanal u páajtalil Cristoeʼ tuláakal baʼal, le yanoʼob kaʼanoʼ bey xan le yanoʼob luʼumoʼ» (EFESOILOʼOB 1:9, 10.)
1. ¿Baʼax u tukulmaj u beetik Dios?
UTUUKUL Jéeoba, le u Diosil jeetsʼel óolaloʼ, u kaʼa taasik jeetsʼelil jeʼex teʼ kaʼanoʼ bey xan teʼ Luʼumaʼ (Hebreob 13:20). Apóstol Pabloeʼ tu tsʼíibtaj: «Jajal Dioseʼ yaan u nupik yáanal u páajtalil Cristoeʼ tuláakal baʼal, le yanoʼob kaʼanoʼ bey xan le yanoʼob luʼumoʼ» (Efesoiloʼob 1:9, 10). ¿Baʼax jach u kʼáat u yaʼal le tʼaan ku suʼutul «yaan u nupik»? J. B. Lightfoot, utúul máak jach u yojel baʼax u kʼáat u yaʼal u tʼaaniloʼob le Bibliaoʼ, ku yaʼalikeʼ le tʼaanaʼ u kʼáat u yaʼal u yantal jeetsʼelil teʼ kaʼanoʼ bey xan teʼ Luʼumaʼ, maʼ kun antal mix máak ken u beet u yantal talamiloʼobiʼ, tuláakal ken tsʼáaubaʼob yáanal u páajtalil Cristo. Yaan u pʼáatal minaʼan le kʼebanoʼ, le kíimiloʼ yéetel le muʼyajiloʼ.
Le baʼaloʼob «yanoʼob kaʼanoʼ»
2. ¿Máaxoʼob le baʼaloʼob «yanoʼob kaʼan» kun muchʼkíintbiloʼob tiʼ Cristooʼ?
2 Le apóstol Pedrooʼ bey tu yaʼalil le maʼalob baʼaloʼob ku páaʼtik le máaxoʼob meyajtik Diosoʼ: «Táan k-páaʼtik le túumben kaʼanoʼoboʼ yéetel le túumben luʼum u tsʼaatʼantmaj Jajal Diosoʼ, tuʼux tuláakal baʼal toj» (2 Pedro 3:13). «Le túumben kaʼanoʼob» ku yaʼalik le tekstoaʼ upʼéel túumben gobierno: letiʼe Reino yaan tu kʼab le Mesíasoʼ. Le baʼaloʼob «yanoʼob kaʼan» kun muchʼkíintbiloʼob tiʼ Cristo jeʼex tu yaʼalil apóstol Pablooʼ, letiʼe jumpʼíit wíinikoʼob yéeyaʼanoʼob utiaʼal ka xiʼikoʼob reinar yéetel Cristo teʼ kaʼanoʼ (1 Pedro 1:3, 4). «Le ciento cuarenticuatro mil» máakoʼob yéeyaʼanoʼobaʼ «tokaʼanoʼob tiʼ ichil u kajnáaliloʼob luʼum» utiaʼal u gobernaroʼob yéetel Cristo teʼ kaʼanoʼ (Apocalipsis 5:9, 10; 14:3, 4; 2 Corintoiloʼob 1:21; Efesoiloʼob 1:11; 3:6).
3. ¿Baʼaxten jeʼel u páajtal u yaʼalaʼal, le yéeyaʼanoʼoboʼ, ku kutaloʼob yéetel Cristo teʼ kaʼanil kúuchiloʼob kex tiaʼanoʼob way Luʼumeʼ?
3 Le máaxoʼob yéeyaʼanoʼob utiaʼal u binoʼob teʼ kaʼanoʼ, ken u kʼamoʼob u kiliʼich pixan Dioseʼ, bey ka síijkoʼob tukaʼanteneʼ, bey ka máataʼakoʼob tumen Dios bey u paalaloʼobeʼ (Juan 1:12, 13; 3:5-7). Ken túun kʼamkoʼob tumen Jéeoba bey «u paalaloʼobeʼ», ku kʼuchul u beetubaʼob u sukuʼunoʼob Jesús (Romailoʼob 8:15; Efesoiloʼob 1:5). Le Bibliaoʼ ku yaʼalikeʼ le máaxoʼob kun binoʼob kaʼanoʼ tu kʼiinil kuxaʼanoʼob way Luʼumeʼ ku yaʼalaʼaleʼ bey tsʼoʼok u kaʼapúut kuxkíintaʼaloʼob jun múuchʼ yéetel Cristo yéetel tsʼoʼok u kutaloʼob tu yéetel teʼ kaʼanil kúuchiloʼoboʼ (Efesoiloʼob 1:3; 2:6). Tiʼ letiʼobeʼ yantiʼob le nojoch páajtalilaʼ, tumen tsʼoʼok u «j-sellartaʼa[loʼob] yéetel le Kiliʼich Pixan», ku yeʼesik yaan u kʼamkoʼob «le ayikʼalil» bin tsʼaʼabaktiʼob tumen Dios teʼ kaʼanoʼ (Efesoiloʼob 1:13, 14; Colosailoʼob 1:5). Letiʼob túuneʼ, letiʼe baʼaloʼob «yanoʼob kaʼanoʼ», letiʼob le máaxoʼob unaj u láaj muʼuchʼloʼob jeʼex u tukulmil Jéeobaoʼ.
Ku káajal u muchʼkíintaʼal le baʼaloʼob «yanoʼob kaʼanoʼ»
4. ¿Baʼax kʼiin yéetel bix úuchik u káajal u muchʼaʼal le baʼaloʼob «yanoʼob kaʼanoʼ»?
4 Jeʼex u tukulmil Jéeobaeʼ, ka «[kʼuch] u kʼiinileʼ» káaj u muchʼik le baʼaloʼob «yanoʼob kaʼanoʼ» (Efesoiloʼob 1:10). Lelaʼ káaj u beetik teʼ tu kʼiimbesajil Pentecostés tiʼ u jaʼabil 33 teʼ yáax siglooʼ le ka tu tsʼáaj u Kiliʼich muukʼ tiʼ u apostoloʼob yéetel tiʼ u muchʼ disipuloʼob, xiiboʼob yéetel koʼoleloʼob (Beetaʼanoʼob [Hechos]1:13-15; 2:1-4). Le baʼax úuchaʼ tu yeʼesaj tsʼoʼok u káajal le túumben pacto beetaʼab tu yéeteloʼoboʼ, yéetel tu yeʼesaj tsʼoʼok u yéeyaʼaloʼob utiaʼal ka u beetubaʼob u kaajal Dios, letiʼob túun jeelint u kaajil Israel (Galaciailoʼob 6:16; Hebreob 9:15; 12:23, 24).
5. Jéeobaeʼ, ¿baʼaxten tu luʼsaj le Reino tiʼ u yúuchben kaajil Israeloʼ?
5 Jéeobaeʼ tu beetaj upʼéel pacto yéetel u úuchben kaajil Israel utiaʼal ka u kaajalte yéetel utiaʼal u jóoʼsik ichiloʼob le máaxoʼob ken u beet u sacerdoteiloʼob yéetel u reyiloʼob teʼ kaʼanoʼ, baʼaleʼ leloʼ maʼ béeychajiʼ, tumen letiʼobeʼ maʼ tu tsʼoʼokbesoʼob u tʼaanil le pactooʼ (Éxodo 19:5, 6). Jesuseʼ tu yaʼalaj tiʼ u nuuktakil ichil le judíoʼoboʼ: «U kaʼaj lukʼesbil tiʼ teʼex u [reino] Jajal Dios utiaʼal ka tsʼaʼabak tiʼ le máakoʼob jeʼel u kʼubikoʼob le u yich ku tiaʼalintik le [reinooʼ]» (Mateo 21:43). Le máakoʼob tu yaʼalaj Cristo kun yéeybiloʼoboʼ, letiʼ le máaxoʼob yéetel beetaʼab le túumben pactooʼ. Tiʼ letiʼobeʼ le apóstol Pedrooʼ tu yaʼalaj: «Teʼexeʼ jumpʼéel kaaj yéeyaʼaneʼex, junmúuchʼ kʼiinoʼob táan u meyajtikoʼob le [reinooʼ], jumpʼéel kaaj kiliʼich, jumpʼéel kaaj utiaʼal Jajal Dios. Lelaʼ bey aniloʼ utiaʼal ka tseʼekteʼex u jakʼbeʼen meyajoʼob Jajal Dios, máax tʼaneʼex utiaʼal ka jóokʼokeʼex tiʼ le éekʼjochʼeʼeniloʼ utiaʼal ka okokeʼex tiʼ le kiʼichkelem sáasil[oʼ]. Teʼex kaʼacheʼ mix kaajaleʼexiʼ, baʼaleʼ [bejlaʼeʼ] u kaajaleʼex Jajal Dios» (1 Pedro 2:9, 10). U úuchben kaajil Israel túuneʼ xuʼul u kaajaltaʼal tumen Jéeoba (Hebreob 8:7-13). Jeʼex tu yaʼalil Jesusoʼ, tiʼ u úuchben kaajil Israeleʼ luʼsaʼabtiʼob u páajtalil u beetik u reyiloʼob, ka tsʼaʼab tiʼ le 144,000 máakoʼob yanoʼob ichil u túumben kaajal Diosoʼ (Apocalipsis 7:4-8).
Ku beetaʼal upʼéel pacto utiaʼal upʼéel Reino tu yéeteloʼob
6, 7. ¿Baʼax pactoi tu beetaj Jesús yéetel le 144,000 máakoʼob yéeyaʼanoʼoboʼ, yéetel baʼax ku éejemkoʼob?
6 Le áakʼab ka tu yaʼalaj kʼaʼabéet u kʼaʼajsaʼal u kíimiloʼ Jesuseʼ tu yaʼalaj tiʼ u apostoloʼob: «Teʼex máax yanchajaʼaneʼex tin wéetel mantatsʼ tiʼ in túuntaj óolaloʼob. Le beetikeʼ teen kin tsʼáaikteʼex jumpʼéel [reino] jeʼel bix tsʼaʼanil tiʼ teen tumen in Taataeʼ, utiaʼal ka yanakeʼex yéetel ka ukʼulnakeʼex tin wéetel tin [reino], bey xan utiaʼal ka kulakeʼex tiʼ jalaʼach kʼáancheʼob utiaʼal ka pʼis óolteʼex u doce chʼiʼibaliloʼob Israel» (Lucas 22:28-30). Teʼelaʼ Jesuseʼ tʼaanaj tiʼ le pacto tu beetaj yéetel 144,000 máakoʼob yéeyaʼanoʼob yéetel le kiliʼich muukʼoʼ, le máakoʼobaʼ yaan u chúukpajal u yóoloʼob tak ken kíimikoʼob (Apocalipsis 2:10; 3:21).
7 Le 144,000 máakoʼobaʼ ku éejemkoʼob u bisaʼaloʼob teʼ kaʼan reinar yéetel Cristo, tuʼux kun kutaloʼob tiʼ jalaʼach kʼáancheʼob utiaʼal u juzgarkoʼob wíinikoʼob, kex u yojloʼob mix bikʼin kun kaʼa kuxtaloʼob way Luʼumeʼ (Apocalipsis 20:4, 6). Beoraaʼ, koʼoneʼex ilik uláakʼ tekstoʼob yaan u yiloʼob chéen yéetel le máaxoʼob kun binoʼob teʼ kaʼanoʼ; le tekstoʼob xanaʼ ku yeʼeskoʼob baʼaxten le máaxoʼob kun pʼáatloʼob kuxtal way Luʼumeʼ maʼatech u táakpajloʼob tiʼ u jaantkoʼob le waaj yéetel tiʼ u yuʼkoʼob le vinooʼ (Juan 10:16).
8. Le máaxoʼob yéeyaʼanoʼoboʼ, ¿baʼax ku yeʼeskoʼob ken u jaantoʼob le waajoʼ? (Ilaʼak le cuadro yaan teʼ t.j. 23.)
8 Le máaxoʼob yéeyaʼanoʼoboʼ ku aktáantkoʼob talamiloʼob jeʼex le tu aktáantaj Jesusoʼ, u yojloʼob yaan u kíimloʼob jeʼex Jesuseʼ. Pablo, utúul tiʼ le máaxoʼob kun binoʼob kaʼanoʼ, tu yaʼaleʼ tu pʼataj tuláakal baʼal utiaʼal u «kʼaj óoltik Cristo, bey xan u páajtalil u kaʼapúut kuxtal, yéetel [utiaʼal u] táakpajal tiʼ u mukʼyajoʼob». Jeʼex túun k-ilkoʼ Pabloeʼ tu chʼaʼatuklaj «u kíimil» jeʼex Cristoeʼ (Filiposiloʼob 3:8, 10). Yaʼab tiʼ le cristianoʼob kun binoʼob kaʼanoʼ tsʼoʼok u aktáantkoʼob muʼyajiloʼob jeʼex le tu máansaj Cristooʼ (2 Corintoiloʼob 4:10).
9. ¿Baʼax u kʼáat u yaʼal le waaj ku meyaj utiaʼal le Kʼaʼajsajiloʼ?
9 Le ka tu yaʼalaj unaj u kʼaʼajsaʼal u kíimileʼ, Jesuseʼ tu yaʼalaj: «Lelaʼ in wíinklil» (Marcos 14:22). Le u wíinklil Jesusoʼ jach maʼalob úuchik u ketik yéetel le waaj x-maʼ levadurailoʼ. ¿Baʼaxten? Tumen teʼ Bibliaoʼ ku keʼetel le levadura yéetel le kʼebanoʼ (Mateo 16:4, 11, 12; 1 Corintoiloʼob 5:6-8). U wíinklil tu kʼubaj Jesús t-oʼolaloʼ maʼ tu kuchaj kʼebaniʼ (Hebreob 7:26; 1 Juan 2:2). Le u kuxtal xan tu kʼuboʼ ku taasik utsil tiʼ le máaxoʼob kun binoʼob kaʼanoʼ yéetel tiʼ le máaxoʼob kun pʼáatloʼob kuxtal way Luʼum utiaʼal minaʼan u xuul tiʼ upʼéel paraísooʼ (Juan 6:51).
10. ¿Baʼaxten tu yaʼalaj Pablo ku yukʼaʼal u kʼiʼikʼel Cristo tumen le máaxoʼob ku yukʼikoʼob le vinooʼ?
10 Ka tʼaanaj Pablo tiʼ le vino ku yukʼik le máaxoʼob kun binoʼob kaʼanoʼ tu yaʼalaj: «Le ken k-ukʼ le ukʼul kiʼikiʼtʼantaʼan ikil k-tsʼáaik gracias tiʼ Jajal Dios tu yoʼolaleʼ, táan k-ukʼik u kʼiʼikʼel Cristo» (1 Corintoiloʼob 10:16). ¿Baʼaxten tu yaʼalaj Pablo bey táan u yukʼaʼal u kʼiʼikʼel Cristo tumen le máaxoʼob ku yukʼikoʼob le vinooʼ? Le máaxoʼob ku yukʼikoʼob le vinooʼ maʼ tak u kuxtaloʼob ku meyaj utiaʼal k-salvartaʼaliʼ tumen tak letiʼob unaj u salvartaʼaloʼob. Yoʼolal u yoksaj óolaloʼob tiʼ u kʼiʼikʼel Cristo tu wekajoʼ ku saʼasaʼal u siʼipiloʼob yéetel ku tsʼaʼabal u páajtalil tiʼob u binoʼob teʼ kaʼanoʼ (Romailoʼob 5:8, 9; Tito 3:4-7). Yoʼolal u kʼiʼikʼel Cristooʼ, le 144,000 máakoʼob kun binoʼob kaʼanoʼ ku yéeyaʼaloʼob yéetel ku saʼasaʼal u siʼipiloʼob utiaʼal ka kiliʼichkuntaʼakoʼob (Hebreob 10:29; Daniel 7:18, 27; Efesoiloʼob 2:19). Jach beyoʼ, yoʼolal u kʼiʼikʼel Cristo tu wekajoʼ tu manaj utiaʼal Jajal Dios máakoʼob u taaloʼob tiʼ tuláakal chʼiʼibaloʼob, kaajoʼob yéetel tʼaanoʼob, utiaʼal ka u beet u reyiloʼob yéetel u sacerdoteiloʼob teʼ kaʼanoʼ yéetel utiaʼal ka reinarnakoʼob yóokʼol le Luʼumaʼ (Apocalipsis 5:9, 10).
11. Le máaxoʼob kun binoʼob kaʼanoʼ, ¿baʼax ku yeʼeskoʼob ken u yukʼoʼob le vino ku máansaʼal utiaʼal le Kʼaʼajsajiloʼ?
11 Ka tu yaʼalaj Jesús unaj u kʼaʼajsaʼal u kíimileʼ tu tsʼáaj u copai le vino tiʼ u apostoloʼoboʼ ka tu yaʼalaj: «Ukʼulneneʼex tuláakaleʼex tiʼ le nuʼukulaʼ, tumen lelaʼ in kʼiʼikʼel ku jaajkúuntik le túumben [pactooʼ] yéetel ku weʼekel tu yoʼolal yaʼabkach máakoʼob utiaʼal u saʼatsajil u kʼebanoʼob» (Mateo 26:27, 28). Jeʼex meyajnajik u kʼiʼikʼel baʼalcheʼob utiaʼal u jéetsʼel u tʼaanil le pacto tu beetaj Jéeoba yéetel u kaajil Israeloʼ, u kʼiʼikʼel xan Jesuseʼ meyajnaj utiaʼal u jéetsʼel u tʼaanil le túumben pacto tu beetaj Jéeoba yéetel u disipuloʼob Cristooʼ, le máaxoʼob jeelint u kaajil Israel teʼ Pentecostés tiʼ u jaʼabil 33 (Éxodo 24:5-8; Lucas 22:20; Hebreob 9:14, 15). Le máaxoʼob kun binoʼob kaʼanoʼ ken u yukʼoʼob le vino ku keʼetel yéetel «le kʼiʼikʼ, ku jetsʼkúuntik» le pactooʼ, ku yeʼeskoʼob tsʼoʼok u yookloʼob teʼ túumben pactooʼ yéetel ku kʼamikoʼob u yutsiloʼob.
12. Le máaxoʼob kun binoʼob kaʼanoʼ, ¿bix u yokjaʼob tiʼ u kíimil Cristo?
12 Yaan uláakʼ baʼax ku kʼaʼajsaʼal tiʼ le máaxoʼob yéeyaʼanoʼob utiaʼal u binoʼob kaʼanoʼ. Jesuseʼ tu yaʼalaj tiʼ u disipuloʼob: «Tu jaajileʼ yaan a wukʼikeʼex le ukʼul bíin in wukʼoʼ, yéetel yaan a kʼamikeʼex le okjaʼ bíin in kʼamoʼ» (Marcos 10:38, 39). Ka máan kʼiinoʼobeʼ le apóstol Pablooʼ tu yaʼaleʼ le máaxoʼob yéeyaʼanoʼoboʼ «tiʼ u kíimil [Cristo] okjaʼanajaʼanoʼo[b]» (Romailoʼob 6:3, LTN). Tu kʼiinil kuxaʼanoʼobeʼ, le cristianoʼob kun binoʼon kaʼanoʼ u yojloʼob ken kíimkoʼobeʼ yaan u pʼatkoʼob tuláakal, u yojloʼob mix bikʼin kun kaʼa kuxtaloʼob way Luʼumeʼ. Le okjaʼ tiʼ u kíimil Cristo ku beetikoʼoboʼ ku tsʼoʼokol ken kíimkoʼob bey wíinikoʼobeʼ yéetel ken líiʼsaʼakoʼob bey espirituʼob teʼ kaʼanoʼ (2 Timoteo 2:10-12; Romailoʼob 6:5; 1 Corintoiloʼob 15:42-44, 50).
Ku jaantikoʼob le waaj yéetel ku yuʼkoʼob le vinooʼ
13. Le máaxoʼob kun pʼáatloʼob kuxtal way Luʼumeʼ, ¿baʼaxten maʼatech u jaantkoʼob le waaj yéetel u yukʼikoʼob le vino utiaʼal le Kʼaʼajsajiloʼ, yéetel baʼaxten ku yantaloʼobiʼ?
13 Le baʼax tsʼoʼok ilkaʼ ku yeʼesiktoʼoneʼ le máaxoʼob kun pʼáatloʼob kuxtal way Luʼumeʼ maʼ unaj u jaantkoʼob le waaj yéetel u yuʼkoʼob le vino ku máansaʼal utiaʼal le kʼaʼajsajiloʼ. Le máaxoʼob kun pʼáatloʼob kuxtal way Luʼumeʼ u yojloʼob maʼ yéeyaʼanoʼob utiaʼal u binoʼob kaʼaniʼ, mix táakaʼanoʼob ichil le túumben pacto tu beetaj Jéeoba yéetel le máaxoʼob kun binoʼob reinar yéetel Cristooʼ. Bey tumen le copa u kʼáat u yaʼal le túumben pactooʼ, chéen le máaxoʼob táakpajaʼanoʼob ichil le pacto jeʼel u páajtal u jaantkoʼob le waaj yéetel u yuʼkoʼob le vinooʼ. Le máaxoʼob táan u páaʼtkoʼob u kuxtaloʼob utiaʼal minaʼan u xuul way Luʼumeʼ maʼatech u yokjaʼob tiʼ u kíimil Jesús mix xan kun binoʼob reinar tu yéetel teʼ kaʼanoʼ. Le oʼolal wa ka u jaantoʼob le waaj yéetel ka u yukʼoʼob le vinooʼ, jeʼel u tsʼáaikoʼob naʼatbil upʼéel baʼal maʼ jaajeʼ. Le oʼolal letiʼobeʼ ku muchʼkubaʼob u kʼaʼajsoʼob u kíimil Jesús, baʼaleʼ maʼ tu táakpajloʼob tiʼ u jaantkoʼob le waajoʼ mix tiʼ u yukʼikoʼob le vinooʼ. Jach ku tsʼáaikoʼob nib óolal tiʼ Jéeoba yoʼolal tuláakal le utsiloʼob tsʼoʼok u kʼamikoʼob tu yoʼolal Jesusoʼ, baʼaleʼ maas ku tsʼáaikoʼob nib óolal úuchik u saʼasaʼal u siʼipiloʼob yoʼolal le u kʼiʼikʼel Jesús tu wekajoʼ.
14. Le cristianoʼob yéeyaʼanoʼoboʼ, ¿bix u muʼukʼantal u oksaj óolaloʼob ken u jaantoʼob le waaj yéetel ken u yukʼoʼob le vinooʼ?
14 Le cristianoʼob yéeyaʼanoʼob utiaʼal u binoʼob reinar yéetel Cristo teʼ kaʼanoʼ taʼaytak u tsʼoʼokol u jach kʼaʼamloʼob. Le maʼ kʼuchuk u kʼiinil u kíimloʼob utiaʼal u pʼatkoʼob le Luʼumaʼ, letiʼobeʼ ku muʼukʼaʼankúuntik u oksaj óolaloʼob ken u jaantoʼob le waaj yéetel ken u yukʼoʼob le vinooʼ. Le sukuʼunoʼob yéetel le kiikoʼob kun binoʼob kaʼanoʼ ku yuʼubikoʼob jach múuchʼ yanikoʼob, tumen táakpajaʼanoʼob tiʼ u wíinklil Cristo. Ken u jaantoʼob le waaj yéetel ken u yukʼoʼob le vinooʼ ku kʼaʼajaltiʼob unaj u chúukpajal u yóoloʼob tiʼ Jéeoba tak ken kʼuchuk u kʼiinil u kíimloʼob (2 Pedro 1:10, 11).
Ku muchʼkíintaʼal le baʼaloʼob yanoʼob teʼ luʼumaʼ
15. ¿Máaxoʼob tsʼoʼok u muchʼikubaʼob u yáantoʼob le cristianoʼob yéeyaʼanoʼoboʼ?
15 Óoliʼ bey tu jaʼabil 1935 tak bejlaʼeʼ, táan u maas yaʼabtal le máaxoʼob ku páaʼtkoʼob kuxtal way Luʼum ku keʼeteloʼob yéetel le «uláakʼ tamanoʼob[oʼ]»; letiʼobeʼ tsʼoʼok u nupkubaʼob u yáantoʼob le máaxoʼob yéeyaʼanoʼob utiaʼal u binoʼob kaʼanoʼ (Juan 10:16; Lucas 12:32; Zacarías 8:23). Jach nojoch áantaj ku tsʼáaikoʼob tiʼ le máaxoʼob kun binoʼob kaʼan utiaʼal ka kʼaʼaytaʼak «u maʼalob péektsil le [reino]» tiʼ tuláakal yóokʼol kaaboʼ (Mateo 24:14; 25:40). Yoʼolal le baʼax ku beetkoʼobaʼ ku yilaʼaloʼob tumen Cristo bey u «j-tamanoʼob[eʼ]», yéetel yaan u tsʼáaikoʼob «tu x-noʼoj kʼab» ken taalak u juzgart wíinikoʼob (Mateo 25:33-36, 46). Yoʼolal u oksaj óolaloʼob tiʼ u kʼiʼikʼel Cristo tu wekajoʼ yaan u yantaloʼob ichil le yaʼabkach máakoʼob ken u salvartubaʼob tiʼ le «nojoch yaayaj óolaloʼ» (Apocalipsis 7:9-14).
16. ¿Máaxoʼob táakaʼanoʼob ichil le baʼaloʼob «yanoʼob [way] luʼumoʼ», yéetel bix kun kʼuchul u beetubaʼob «u paalaloʼob Jajal Dios»?
16 Ken tsʼoʼok u jach kʼaʼamal le 144,000 kun binoʼob kaʼanoʼ yaan u káajal u «iikʼiloʼob» le xuʼulsajil kun taal yóokʼol u kʼasaʼan yóokʼol kaab Satanasoʼ (Apocalipsis 7:1-4). Ichil le mil jaʼaboʼob kun reinar Jesucristo junmúuchʼ yéetel le máaxoʼob ken u beet u reyil yéetel u sacerdoteiloʼoboʼ, yaan u líiʼsaʼal yaʼabach kimenoʼob (Apocalipsis 20:12, 13). Le máaxoʼob kun líiʼsbiloʼoboʼ yaan u yantaltiʼob u páajtalil u kuxtaloʼob utiaʼal minaʼan u xuul way Luʼum yáanal u gobernación Jesucristooʼ. Ken tsʼoʼokok le mil jaʼaboʼoboʼ yaan u yantal upʼéel tsʼook pʼis óol utiaʼal le baʼaloʼob «yanoʼob [way] luʼumoʼ», le máaxoʼob túun kun chúukpajal u yóoloʼobeʼ yaan u kʼaʼamloʼob bey «u paalaloʼob Jajal Dios» way Luʼumeʼ (Efesoiloʼob 1:10; Romailoʼob 8:21; Apocalipsis 20:7, 8).
17. Jéeobaeʼ, ¿bix ken u tsʼoʼokbesil le baʼax u tukulmaj u beetikoʼ?
17 Jéeoba túuneʼ bey ken u tsʼoʼokbes baʼax u tukulmaj u beetikoʼ, bey ken u nupil «yáanal u páajtalil Cristoeʼ tuláakal baʼal, le yanoʼob kaʼanoʼ bey xan le yanoʼob [way] luʼumoʼ». Tuláakal túun le máaxoʼob yanoʼob teʼ kaʼan yéetel le yanoʼob teʼ Luʼumaʼ yaan u kuxtaloʼob ich jeetsʼelil yéetel yaan u tsʼáaikubaʼob yáanal u páajtalil Jéeoba, le Dios ku tsʼoʼokbesik le baʼax ku yaʼalikoʼ.
18. Ken u muchʼubaʼob teʼ Kʼaʼajsajiloʼ, ¿baʼax utsil ken u kʼam le máaxoʼob kun binoʼob kaʼanoʼ bey xan le kun pʼáatloʼob way Luʼumoʼ?
18 Tu kʼiinil 12 tiʼ abril tiʼ 2006, ken u muchʼuba le upʼíit máaxoʼob kun binoʼob kaʼan yéetel le u millonesi máakoʼob kun pʼáatloʼob kuxtal way Luʼumoʼ, jach yaan u muʼukʼantal u oksaj óolaloʼob. Yaan u kʼaʼajskoʼob u kíimil Cristo, jeʼex tu túuxtil le ka tu yaʼalaj: «Beeteʼex lelaʼ utiaʼal a kʼaʼajsikeneʼex» (Lucas 22:19). Tuláakal le máaxoʼob ken u muchʼubaʼob teʼ kʼiin jeʼeloʼ unaj u kʼaʼajskoʼob le baʼax tu beetaj Jéeoba le ka tu túuxtaj u kiʼichkelem Hijo kíimil t-oʼolaloʼ.
Utiaʼal kʼaʼajsaj
• ¿Baʼax u tukulmaj u beetik Jéeoba yéetel le baʼaloʼob «yanoʼob kaʼanoʼ» bey xan yéetel le baʼaloʼob «yanoʼob [way] luʼumoʼ»?
• ¿Baʼax le baʼaloʼob «yanoʼob kaʼanoʼ», yéetel bix u muchʼkíintaʼaloʼob tumen Jéeoba?
• ¿Baʼax le baʼaloʼob «yanoʼob [way] luʼumoʼ», yéetel baʼax ku páaʼtikoʼob?
[U kʼáatchiʼiloʼob le xookoʼ]
[Cuadro yaan teʼ táan juʼun 23]
«U wíinklil Cristo»
Tu tekstoi 1 Corintoiloʼob 10:16, 17, Pabloeʼ le ka tʼaanaj tiʼ le baʼax u kʼáat u yaʼal le waaj utiaʼal le máaxoʼob kun binoʼob kaʼanoʼ, tiʼ letiʼe meyajnaj le tʼaan «wíinklil» utiaʼal u tsʼáaik naʼatbil upʼéel baʼal jach kʼaʼanan. Letiʼeʼ tu yaʼalaj: «Le ken k-jaant le waaj k-xetʼikoʼ táan k-jaantik u wíinklil Cristo. Kex sen yaʼaboʼoneʼ tuláakaloʼon k-janal tiʼ jumpʼéeliliʼ waaj, le oʼolaleʼ jumpʼéeliliʼ wíinkliloʼon». Le cristianoʼob kun binoʼob kaʼanoʼ ken u jaantoʼob u waajil le Kʼaʼajsajiloʼ ku yeʼeskoʼob jach múuchʼ yanikoʼob yéetel u chuukaʼan máaxoʼob yéeyaʼanoʼoboʼ, letiʼobeʼ beyoʼob upʼéel wíinklil tuʼux u poolileʼ Cristo (Mateo 23:10; 1 Corintoiloʼob 12:12, 13, 18).
[Foto yaan teʼ táan juʼun 23]
¿Baʼaxten chéen le máaxoʼob kun binoʼob kaʼan ku jaantikoʼob le waaj yéetel ku yukʼikoʼob le vinooʼ?
[Foto yaan teʼ táan juʼun 25]
Jeʼex u tukulmileʼ, Jéeobaeʼ yaan u muchʼik le baʼaloʼob yanoʼob teʼ kaʼanoʼ yéetel le baʼaloʼob yanoʼob way Luʼumeʼ