Upʼéel maʼalob péektsil utiaʼal «tuláakal kaajoʼob»
Upʼéel maʼalob péektsil utiaʼal «tuláakal kaajoʼob»
«Yaan a kʼamikeʼex páajtalil utiaʼal ka jóokʼokeʼex a [kʼaʼayteʼex] in kʼaabaʼ [...], tak [teʼ] kúuchiloʼob yaan tu xuul yóokʼol kaaboʼ.» (BEETAʼANOʼOB [HECHOS] 1:8.)
1. ¿Baʼax jaʼabil yéetel tuʼux yáax uʼuyaʼab tumen u j-tsaypachoʼob Jesús le baʼax tu yaʼalaj teʼ Mateo 24:14?
LE BAʼAX tu yaʼalaj Jesús teʼ Mateo 24:14 jach kʼaj óolaʼan yéetel yaʼab tiʼ toʼoneʼ jeʼel tak u yaʼalik kex maʼ táan u xokikeʼ. Tsʼoʼoleʼ le baʼax tu yaʼaloʼ maʼ tu jáan tuklaʼal wa jeʼel u béeytaleʼ. Chéen máans ta tuukul baʼax tu tuklaj u j-tsaypachoʼob Jesús le ka tu yáax uʼuyoʼob le baʼax tu yaʼaloʼ. Tu jaʼabil 33 teʼ yáax siglooʼ, u j-tsaypachoʼob Jesuseʼ tsʼoʼok kex óoxpʼéel jaʼaboʼob joʼopʼok u máanoʼob tu yéetel, letiʼob túuneʼ binoʼob yéetel Jesús tu kaajil Jerusalén. Letiʼobeʼ tsʼokaʼan u yilkoʼob le milagroʼob tu beetoʼ yéetel tsʼokaʼan u yuʼubkoʼob baʼaxoʼob ku kaʼansik. Kex jach kiʼimak u yóoloʼob yoʼolal baʼaxoʼob kaʼansaʼabtiʼob tumen Jesuseʼ, u yojloʼob maʼ tuláakal máak kun kʼamkiʼ. Jesuseʼ jach pʼektaʼan yéetel le máaxoʼob pʼekmiloʼ jach yaan u páajtaliloʼob.
2. ¿Baʼax talmiloʼob ken u aktáantoʼob kaʼach u j-tsaypachoʼob Jesús?
2 Teʼ wits kʼaj óolaʼan u witsil le Olivoʼoboʼ, kantúul tiʼ u j-tsaypachoʼob Jesuseʼ tu jach chʼenxikintoʼob u yaʼalik baʼax talmiloʼob ken u aktáantoʼob. Jesuseʼ tsʼokaʼaniliʼ u yaʼaliktiʼob yaan u kíimsaʼaleʼ (Mateo 16:21). Baʼaleʼ beoraaʼ tu yaʼaleʼ letiʼobeʼ yaan xan u chʼaʼapachtaʼaloʼob: «Bíin kʼuʼubukeʼex túun utiaʼal ka loobiltaʼakeʼex yéetel bíin kíimsaʼakeʼex, yéetel tuláakal yóokʼol kaab kun pʼektikeʼex tin woʼolal». Baʼaleʼ maʼ chéen le kun úuchul tiʼobiʼ. Yaʼab tiʼ letiʼobeʼ yaan u tuʼusloʼob tumen máaxoʼob ku yaʼalikubaʼob profetaʼob, yaan u beetaʼal u lúubul u yóoloʼob u meyajtoʼob Dios, yaan u pʼektikubaʼob yéetel yaʼabeʼ yaan u xuʼulul u yaabiltkoʼob Dios yéetel u beetkoʼob baʼax ku yaʼalik (Mateo 24:9-12).
3. ¿Baʼaxten ku beetik u jaʼakʼal k-óol le baʼax tu yaʼalaj Jesús teʼ Mateo 24:14?
3 Le ka tsʼoʼok u yaʼalik Jesús tuláakal le baʼax kun úuchul tiʼ u j-tsaypachoʼobaʼ, tu yaʼalaj xan upʼéel baʼal tu beetaj u jaʼakʼal u yóoloʼob. Jesuseʼ tu yaʼalaj: «U maʼalob péektsil le [reinooʼ] bíin [kʼaʼaytaʼak] tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob; letiʼ túun ken taalak u xuul» (Mateo 24:14). Le u jaajil taal u kʼaʼayt Jesús tiʼ u kaajil Israeloʼ yaan u bisaʼal tiʼ tuláakal yóokʼol kaab (Juan 18:37). ¡Jach ku beetik u jaʼakʼal k-óol le baʼax tu yaʼalaj Jesús ka beetaʼakoʼ! U kʼaʼaytaʼal le maʼalob péektsil «tiʼ tuláakal yóokʼol kaab[oʼ]» upʼéel jach nojoch meyaj; baʼaleʼ u kʼaʼaytaʼal kex táan u chʼaʼapachtaʼal u j-tsaypachoʼob Cristoeʼ ku beetik u yilaʼal bey upʼéel milagro u kʼaʼaytaʼal le maʼalob péektsil tiʼ tuláakal yóokʼol kaaboʼ. U beetaʼal le nojoch meyajaʼ maʼ chéen ku yeʼesik nojoch u páajtalil Jéeobaiʼ, ku yeʼesik xan u yaabilaj, u chʼaʼa óotsilaj yéetel u chúukaʼan óolal. Tsʼoʼoleʼ, tiʼ máaxoʼob meyajtik Dioseʼ ku tsʼáaiktiʼob u páajtalil u yeʼeskoʼob wa jach tu jaajil u yóoloʼob ku meyajtkoʼob Dios.
4. ¿Tiʼ máaxoʼob aʼalaʼab ka u kʼaʼaytoʼob le maʼalob péektsiloʼ, yéetel bix líiʼsaʼabik u yóoloʼob tumen Jesús?
4 Jesuseʼ tu yaʼalaj tiʼ u j-tsaypachoʼob jach nojoch le meyaj ken u beetoʼoboʼ. Táanil tiʼ u suut teʼ kaʼanoʼ, chíikpaj tiʼ u j-tsaypachoʼobeʼ ka tu yaʼalajtiʼob: «Le ken taalak le Kiliʼich Pixan ta wóokʼoleʼexeʼ, yaan a kʼamikeʼex páajtalil utiaʼal ka jóokʼokeʼex a [kʼaʼayteʼex] in kʼaabaʼ Jerusalén, tiʼ tuláakal Judea yéetel Samaria, tak le kúuchiloʼob yaan tu xuul yóokʼol kaaboʼ» (Beetaʼanoʼob 1:8). Kex séebaʼan kaʼach kun yantal uláakʼ máakoʼob áantik u j-tsaypachoʼob Jesús utiaʼal u beetkoʼob le meyajaʼ, láayliʼ upʼíitoʼobeʼ. ¡Jach kiʼimakchaj wal u yóoloʼob ka tu yojéeltoʼob yaan u yáantaʼaloʼob tumen u Kiliʼich muukʼ Dios utiaʼal u beetkoʼob le meyaj tsʼaʼabtiʼoboʼ!
5. ¿Baʼax maʼ u yojel kaʼach u yáax j-tsaypachoʼob Jesús yoʼolal le kʼaʼaytaj kun beetbiloʼ?
5 U yáax j-tsaypachoʼob Jesús kaʼacheʼ u yojloʼob kʼaʼabéet u kʼaʼaytkoʼob le maʼalob péektsiloʼ yéetel u kaʼanskoʼob uláakʼ máakoʼob tiʼ uláakʼ kaajoʼob (Mateo 28:19, 20). Baʼaleʼ maʼ u yojloʼob kaʼach baʼax kʼiin ken jáawak u kʼaʼaytajoʼobiʼ mix xan u yojloʼob baʼax kʼiin ken kʼuchuk le xuʼulsajiloʼ. Toʼon xaneʼ láayliʼ maʼ k-ojliʼ. Chéen Jéeoba u yojel (Mateo 24:36). Le ken u yil tsʼoʼok u kʼaʼaytaʼal le maʼalob péektsil le bukaʼaj u kʼáateʼ, letiʼe ken u taas u xuul tiʼ le kʼasaʼan yóokʼol kaabaʼ. Ken úuchuk lelaʼ tiʼ ken k-ojéelt tsʼoʼok u kʼaʼaytaʼal le maʼalob péektsil le bukaʼaj u kʼáat Jéeobaoʼ. U yáax j-tsaypachoʼob Jesuseʼ maʼ wal tu tukloʼob tak tuʼux kun kʼuchul u kʼaʼaytaʼal le maʼalob péektsil teʼ tu tsʼook kʼiinoʼobaʼ.
Ku kʼaʼaytaʼal le maʼalob péektsil teʼ yáax siglooʼ
6. ¿Baʼax úuch teʼ Pentecostés tiʼ u jaʼabil 33, yéetel baʼax uláakʼ úuch ka tsʼoʼoki?
6 Le kʼaʼaytaj beetaʼab teʼ yáax siglooʼ jach séeb úuchik u yilaʼal u yutsil. Teʼ Pentecostés tiʼ u jaʼabil 33 tiʼ muchʼukbal kaʼach kex ciento veinte tiʼ u j-kaambaloʼob Jesús tu kaʼapʼéel pisoi upʼéel naj yaan tu kaajil Jerusaleneʼ. Teʼ kʼiin jeʼeloʼ, tu kʼamoʼob u kiliʼich muukʼ Dios; le apóstol Pedro túunoʼ tu tsolaj baʼax u kʼáat u yaʼal le baʼax úuchoʼ, ka tsʼoʼokeʼ óoliʼ tres mil máakoʼob tu kʼamoʼob le maʼalob péektsiloʼ ka okjaʼanajoʼob. Baʼaleʼ leloʼ chéen u káajbal. Kex tumen u nuuktakil le judíoʼob u kʼáat u xuʼulsoʼob kaʼach le kʼaʼaytajoʼ, Jéeobaeʼ sáamsamal kaʼach u beetik u maas yaʼabtal le máaxoʼob kʼamik le maʼalob péektsiloʼ. Maʼ xáanchaj ka tu chukaj «míin cinco mil» chéen u xiibiloʼobiʼ. Tsʼoʼoleʼ, joʼopʼ u maas yaʼabtal le «xiiboʼob bey xan [le] koʼoleloʼob» «tu yoksaj óoltajoʼob Yuumtsil[oʼ]» (Beetaʼanoʼob 2:1-4, 8, 14, 41, 47; 4:4; 5:14).
7. ¿Baʼaxten upʼéel baʼal jach nojoch úuchik u kʼamik Cornelio le maʼalob péektsiloʼ?
7 Tu jaʼabil 36 úuch uláakʼ upʼéel baʼal jach nojoch, Cornelio utúul máak maʼ judíoʼeʼ, tu kʼamaj le maʼalob péektsiloʼ ka okjaʼanaji. Úuchik u túuxtik Pedro tu yotoch Cornelioeʼ, Jéeobaeʼ tu yeʼeseʼ le maʼalob péektsil tu yaʼalaj Jesús ka kʼaʼaytaʼakoʼ maʼ chéen unaj u kʼaʼaytaʼal tiʼ le judíoʼob kʼiʼitpajaʼanoʼob teʼ yóokʼol kaabaʼ (Beetaʼanoʼob 10:44, 45). Le cristianoʼob nuʼuktik le kʼaʼaytaj teʼ kʼiinoʼob jeʼeloʼ, ¿baʼax tu beetoʼob le ka tu yojéeltoʼob lelaʼ? Le apostoloʼob yéetel le nuxiboʼob yanoʼob Judeaoʼ le ka tu naʼatoʼob kʼaʼabéet xan u kʼaʼaytaʼal le maʼalob péektsil tiʼ le maʼ judíoʼoboʼ, tu kiʼikiʼtʼantoʼob Dios (Beetaʼanoʼob 11:1, 18). Baʼaleʼ, láayliʼ xan joʼopʼ u yaʼabtal le judíoʼob táan kaʼach u kʼamkoʼob le maʼalob péektsiloʼ. Ka máan jaʼaboʼobeʼ, maʼ xaaneʼ tu jaʼabil 58, «táaj yaʼab» judíoʼob tsʼokaʼan kaʼach u kʼamkoʼob le maʼalob péektsiloʼ (Beetaʼanoʼob 21:20).
8. ¿Baʼax ku beetik le máaxoʼob ku kʼamkoʼob le maʼalob péektsiloʼ?
8 Kex jach séeb úuchik u yaʼabtal máaxoʼob kʼam le maʼalob péektsil teʼ yáax siglooʼ, maʼ unaj k-tuukul chéen tiʼ u yaʼabiloʼobiʼ unaj k-tuukul tiʼ tuláakal le baʼax yanchaj u beetik le máakoʼobaʼ. Le maʼalob péektsil tu yuʼuboʼoboʼ jach yaan u muukʼ (Hebreob 4:12). Le máaxoʼob kʼam baʼax ku yaʼalik u Tʼaan Diosoʼ tu beetoʼob yaʼab kʼeexoʼob, tu pʼatoʼob baʼaloʼob kʼaastak yéetel tu kʼexaj u modosoʼob utiaʼal u natsʼikubaʼob tiʼ Dios (Efesoiloʼob 4:22, 23). Teʼ kʼiinoʼobaʼ bey xan u yúuchloʼ. Le máaxoʼob kʼamik le maʼalob péektsiloʼ jeʼel u páajtal u kʼamikoʼob kuxtal minaʼan u xuuleʼ (Juan 3:16).
Múul meyajnajoʼob yéetel Dios
9. ¿Baʼax jatsʼuts páajtalil tsʼaʼab tiʼ le yáax cristianoʼoboʼ?
9 Le yáax cristianoʼoboʼ maʼ tu yaʼaloʼob wa chéen tu juunaloʼob páajchaj u beetkoʼob le meyaj tu pʼataj Jesusoʼ, baʼaxeʼ tu yaʼaloʼobeʼ tu beetoʼob tu yoʼolal «u páajtalil le Kiliʼich [Muukʼoʼ]» (Romailoʼob 15:13, 19). Jéeoba beet u yaʼabtaloʼob. Le cristianoʼob xanoʼ u yojloʼob tiʼ letiʼob tsʼaʼan kaʼach u jatsʼuts páajtalil u múul meyajoʼob yéetel Dios (1 Corintoiloʼob 3:6-9). Le oʼolaleʼ, tu jach tsʼáaj u yóoloʼob utiaʼal u beetkoʼob le baʼax aʼalaʼab tiʼob tumen Jesusoʼ (Lucas 13:24).
10. ¿Bix úuchik u jach tsʼáaik u yóol jujuntúul tiʼ le yáax cristianoʼob u kʼaʼaytoʼob le maʼalob péektsil tuláakal tuʼuxoʼ?
10 Ka túuxtaʼab Pablo u kʼaʼayt le maʼalob péektsil tiʼ le máakoʼob maʼ judíoʼoboʼ, letiʼeʼ jach yaʼab úuchik u viajar, tu káajsaj xan yaʼab múuchʼuliloʼob tu luʼumiloʼob Asia yéetel Grecia (Romailoʼob 11:13). Bin tu kaajil Roma yéetel, maʼ xaaneʼ, tak España. Teʼ kʼiinoʼob xan jeʼeloʼ, apóstol Pedroeʼ bin tu luʼumil Babilonia utiaʼal u kʼaʼayt le maʼalob péektsil tiʼ le judíoʼob kajaʼanoʼob teʼeloʼ (Galaciailoʼob 2:7-9; 1 Pedro 5:13). Ichil le máaxoʼob tu tsʼáaj u yóoloʼob u kʼaʼaytoʼob le maʼalob péektsiloʼ tiaʼan Trifena, Trifosa yéetel Pérsida; le Bibliaoʼ ku yaʼalikeʼ Pérsidaeʼ «yaʼab meyaj» tu beetaj «tiʼ u meeyjul Yuumtsil» (Romailoʼob 16:12).
11. ¿Bix úuchik u beetik Jéeoba u bin utsil tiʼ le meyaj beetaʼab tumen le yáax cristianoʼoboʼ?
11 Jéeobaeʼ tu beetaj u bin utsil tiʼ le meyaj beetaʼab tumen le yáax cristianoʼoboʼ. Maʼiliʼ u tsʼáa treinta jaʼaboʼob aʼalaʼaktiʼob tumen Jesús ka u kʼaʼaytoʼob le maʼalob péektsil tiʼ tuláakal kaajoʼoboʼ, Pabloeʼ tu yaʼaleʼ «le maʼalob péektsil[oʼ]» tsʼokaʼaniliʼ u kʼaʼaytaʼal «tiʼ tuláakal jejeláas tuʼuxoʼob yóokʼol kaab[eʼ]» (Colosailoʼob 1:23). ¿Taal wa túun le xuʼulsajiloʼ? Jeʼel u páajtal u yaʼalaʼaleʼ taali. Tumen tu jaʼabil 70 teʼ yáax siglooʼ xuʼulsaʼab tiʼ Jerusalén yéetel tiʼ u temploi tumen u soldadoiloʼob Roma. Baʼaleʼ Jéeobaeʼ tsʼoʼokaʼaniliʼ u tuklik unaj u maas kʼaʼaytaʼal le maʼalob péektsil táanil tiʼ u xuʼulsik u kʼasaʼan yóokʼol kaab Satanasoʼ.
Táan xan u kʼaʼaytaʼal le maʼalob péektsil teʼ kʼiinoʼobaʼ
12. Le máaxoʼob kʼaj óolaʼanoʼob bejlaʼa u j-jaajkunajoʼob Jéeobaeʼ, ¿baʼax tu tukloʼob ich yaʼabach jaʼaboʼob?
12 Kex le religionoʼob úuch joʼopʼok u kaʼanskoʼob kaʼach baʼaloʼob maʼ jaajtakeʼ, tu jóokʼbal le siglo 19, joʼopʼ u kaʼa adorartaʼal Jéeoba jeʼex utstutʼaaneʼ. Teʼ kʼiinoʼob jeʼeloʼ u múuchʼ máakoʼob ku xokkoʼob le Biblia kʼaj óolaʼanoʼob bejlaʼa u j-jaajkunajoʼob Jéeobaeʼ tu naʼatoʼob kʼaʼabéet u kaʼanskoʼob uláakʼ máakoʼob (Mateo 28:19, 20). Tu jaʼabil 1914, tu chukaj óoliʼ cinco mil cien utúulul máakoʼob ku kʼaʼaytkoʼob le maʼalob péektsil tiʼ 68 luʼumiloʼoboʼ. Baʼaleʼ, letiʼobeʼ maʼ tu jach naʼatoʼob baʼax u kʼáat u yaʼal Mateo 24:14. Ich yaʼab jaʼaboʼobeʼ letiʼobeʼ tu tukloʼob tsʼokaʼan u kʼaʼaytaʼal le maʼalob péektsil tiʼ tuláakal yóokʼol kaaboʼ, tumen táanil tiʼ u jóokʼol le siglo 19, le Biblia, tuʼux yaan le maʼalob péektsiloʼ, tsʼokaʼaniliʼ u suʼutul ich yaʼabach tʼaanoʼobeʼ yéetel tsʼokaʼaniliʼ u tʼoxaʼal tiʼ tuláakal yóokʼol kaabeʼ.
13, 14. Le revista The Watch Tower tiʼ 1928, ¿baʼax tu yaʼalaj kʼaʼabéet u beetaʼal tumen u kaajal Dios?
13 Jéeobaeʼ jujumpʼíitil tu yáantilak u kaajal utiaʼal ka u maas naʼat baʼax u kʼáat ka u beetoʼob (Proverbios 4:18). Le revista 1 tiʼ diciembre tiʼ 1928 The Watch Tower (bejlaʼeʼ ich mayaeʼ U Pʼíich Tulumil Kanan) tu yaʼalaj:«Kex yaʼab máak yaan u Bibliaeʼ, ¿jeʼel wa u páajtal k-aʼalik tsʼoʼok u kʼaʼaytaʼal u maʼalob péektsilil le Reino tiʼ tuláakal yóokʼol kaaboʼ? Maʼatech. Le u múuchʼ j-jaajkunajoʼob tiʼ Jéeoba yanoʼob way Luʼumaʼ, láayliʼ kʼaʼabéet u jóoʼskoʼob libroʼob yéetel folletoʼob ku tsolkoʼob [baʼax ku tuklik u beetik] Dioseʼ yéetel unaj xan u bin u xíimbaltoʼob le máakoʼob pʼataʼan le Biblia tiʼoboʼ. Wa maʼ u beetkoʼobeʼ, le máakoʼobaʼ maʼ ken u yojéeltoʼob tsʼoʼok u káajal u gobernar Cristo teʼ kaʼanoʼ».
14 Le revista 1 tiʼ diciembre tiʼ 1928, tu yaʼalaj xan: «Tu jaʼabil 1920, [...] le múuchʼ máakoʼob ku xokkoʼob le Bibliaoʼ tu naʼatoʼob tubeel le baʼax tu yaʼalaj Jesús teʼ Mateo 24:14. Kʼuch u naʼatoʼobeʼ le maʼalob péektsil kun kʼaʼaytbil tiʼ tuláakal yóokʼol kaaboʼ maʼ u maʼalob péektsilil upʼéel reino maʼ yanakiʼ, baʼaxeʼ u maʼalob péektsilil le Reino yaan tu kʼab Jesús, le Reino tsʼoʼok u káajal u gobernar yóokʼol le Luʼumaʼ».
15. Tu jaʼabiloʼob 1920 tak bejlaʼeʼ, ¿bix tsʼoʼok u maas yaʼabtal le máaxoʼob kʼaʼaytik le maʼalob péektsiloʼ?
15 Le u «múuchʼ» máakoʼob ku xokkoʼob le Biblia tu jaʼabiloʼob 1920 nojochchaji. Ka máan le jaʼaboʼoboʼ tu naʼatoʼob yaan u múuchʼ «yaʼabkach máakoʼob» kun pʼáatloʼob kuxtal way Luʼumeʼ, le oʼolal káaj u kaxtaʼaloʼob (Apocalipsis 7:9; Juan 10:16). Bejlaʼeʼ yaan 6,613,829 j-jaajkunajoʼob ku kʼaʼaytikoʼob le maʼalob péektsil tiʼ 235 luʼumiloʼoboʼ. Le baʼax tu yaʼalaj Jesús teʼ Mateo 24:14 jach táan u béeytal. Mix utéen kʼaʼaytaʼak «u maʼalob péektsil» le Reino jeʼex u beetaʼal bejlaʼoʼ. Mix utéen yanak jach yaʼabach máakoʼob meyajtik Jéeoba jeʼex bejlaʼoʼ.
16. ¿Bukaʼaj meyaj tu beetaj u j-jaajkunajoʼob Jéeoba tu mesiloʼob septiembre tiʼ 2004 tak agosto tiʼ 2005? (Ilaʼak La Atalaya 1 tiʼ febrero tiʼ 2006 t.jnob. 27-30.)
16 Le yaʼabach j-jaajkunajoʼobaʼ jach tu tsʼáaj u yóoloʼob teʼ kʼaʼaytaj tu mesiloʼob septiembre tiʼ 2004 tak agosto tiʼ 2005; tu máansoʼob maas tiʼ mil millonesi oraʼob táan u kʼaʼaytajoʼob tiʼ 235 luʼumiloʼob yéetel tu kaʼa xíimbaltoʼob yéetel tu tsʼáajoʼob xook tiʼ u millonesi máakoʼob. Tuláakal lelaʼ béeychaj tumen u j-jaajkunajoʼob Jéeobaeʼ tu jóoʼsoʼob u tiempoi yéetel tu tsʼáajoʼob baʼax yantiʼob utiaʼal u kaʼanskoʼob baʼax ku yaʼalik u Tʼaan Dios (Mateo 10:8). Jéeobaeʼ, yéetel u kiliʼich muukʼeʼ, ku yáantik máaxoʼob meyajtik utiaʼal ka u tsʼoʼokbesoʼob baʼax u kʼáat (Zacarías 4:6).
Unaj k-jach tsʼáaik k-óoleʼex teʼ kʼaʼaytajoʼ
17. ¿Baʼax ku beetik u kaajal Jéeoba utiaʼal u tsʼoʼokbesik le meyaj tu pʼataj Jesusoʼ?
17 Kex taʼaytak dos mil jaʼaboʼob u yaʼal Jesús ka kʼaʼaytaʼak le maʼalob péektsiloʼ, u kaajal Dioseʼ láayliʼ jach u tsʼaamaj u yóol u beet le meyajaʼ. K-ojleʼ wa maʼ t-xulik beetik baʼax maʼalobeʼ, yaan k-eʼesik yaabilaj, chʼaʼa óotsilil yéetel yaan u chúukpajal k-óol jeʼex Dioseʼ. Jeʼex Jéeobaeʼ, toʼon xaneʼ maʼ k-kʼáat ka xuʼulsaʼak mix máakiʼ, baʼaxeʼ k-kʼáat ka u kʼex u tuukuloʼob yéetel ka u natsʼubaʼob tiʼ Dios (2 Corintoiloʼob 5:18-20; 2 Pedro 3:9). Toʼoneʼ, yéetel u yáantaj le kiliʼich muukʼoʼ k-tsʼaamaj k-óol kʼaʼayt le maʼalob péektsil tak tu xuul yóokʼol kaaboʼ (Romailoʼob 12:11). Yoʼolal le kʼaʼaytajaʼ máakoʼob u taaloʼob tiʼ tuláakal yóokʼol kaabeʼ tsʼoʼok u kʼamkoʼob baʼax ku yaʼalik le Bibliaoʼ yéetel tsʼoʼok chaʼik u nuʼuktaʼaloʼob tumen Jéeoba. Koʼox k-ilik bix tu beetil jujuntúul tiʼ letiʼobiʼ.
18, 19. ¿Baʼax tsʼoʼok u beetik jujuntúul máakoʼob tu kʼamoʼob le maʼalob péektsiloʼ?
18 Charles, utúul máak kajaʼan tu chikʼinil Kenia, ku pakʼik kaʼach kʼúutseʼ, tu jaʼabil 1998 tu konaj maas tiʼ 8,000 kilos kʼúuts utiaʼal u beetaʼal chamal, le oʼolal tsʼaʼab upʼéel u diploma utiaʼal u yeʼesaʼal jach u yojel u meyajt le kʼúutsoʼ. Maʼ úuch tiʼ leloʼ káaj u xokik le Bibliaoʼ ka tu tsʼáaj cuentaeʼ le máax ku meyajtik kʼúutseʼ maʼ táan u beetik baʼax tu yaʼalaj Jesusiʼ, tumen maʼ táan u yeʼesik yaabilaj tiʼ u yéet wíinikiliʼ (Mateo 22:39). Tu yileʼ le kʼúuts ku meyajtikoʼ le beetik u kíimil yaʼab máakoʼob, le oʼolaleʼ tu rociartaj yéetel veneno tuláakal le kʼúuts u pakʼmaj kaʼachoʼ. Ka máan kʼiineʼ Charleseʼ tu kʼubaj u kuxtal tiʼ Jéeoba yéetel okjaʼanaji, bejlaʼeʼ letiʼeʼ utúul j-táanilkunsaj yéetel utúul j-áantaj meeyjil teʼ múuchʼuliloʼ.
19 Jeʼex túun k-ilkoʼ yéetel le kʼaʼaytaj ku beetaʼal tuláakal yóokʼol kaaboʼ, Jéeobaeʼ táan u yoksik ichil u kaajal le máakoʼob uts u puksiʼikʼaloʼob ku keʼetloʼob yéetel «u ayikʼaliloʼob» le kaajoʼoboʼ (Ageo 2:7). Pedro, utúul xiʼipal kajaʼan Portugaleʼ, 13 jaʼaboʼob yaan tiʼ ka joʼopʼ u xook utiaʼal u beetik u sacerdotei tumen taak u kaʼansik baʼax ku yaʼalik le Bibliaoʼ; baʼaleʼ ka tu yilaj óoliʼ maʼatech u kaʼansaʼal baʼax ku yaʼalik le Biblia teʼ tuʼux ku xookoʼ, tu pʼataj u xookiʼ. Seis jaʼaboʼob u pʼat u xook utiaʼal u beetik u sacerdotei kaʼachoʼ, letiʼeʼ táan kaʼach u xokik Sicología tiʼ upʼéel universidad yaan tu noj kaajil Lisboa. Teʼ Lisboaaʼ tiʼ kajaʼan yiknal u tíaeʼ, baʼaleʼ u tíaeʼ utúul j-jaajkunaj tiʼ Jéeoba, le u tía túunaʼ joʼopʼ u yaʼalik tiʼ ka u xok le Bibliaoʼ. Baʼaleʼ teʼ kʼiinoʼob jeʼeloʼ, Pedroeʼ tsʼoʼok u pʼáatal maʼ u yojel wa jach tu jaajil yaan Diosiʼ le oʼolal maʼ u jach kʼáat ka kaʼansaʼak yéetel le Bibliaoʼ. Upʼéel u kʼiinil táan u tsikbal yéetel u profesor yoʼolal u kaʼapʼéeltal u tuukul máakeʼ, le profesoroʼ tu yaʼalaj tiʼeʼ le sicologíaoʼ ku kaʼansikeʼ le máaxoʼob kaʼapʼéel yanik u tuukuloʼobeʼ tu juunal ku kʼaskúuntik u kuxtaloʼob. Le beetik túun Pedroeʼ tu chʼaʼatuklaj u xokik le Bibliaoʼ. Bejlaʼeʼ letiʼeʼ tsʼoʼok u yokjaʼ, yéetel táan u yáantik yaʼab máakoʼob u kanoʼob xan baʼax ku yaʼalik le Bibliaoʼ.
20. ¿Baʼaxten ku taasiktoʼon kiʼimak óolal k-ilik táan u kʼaʼaytaʼal le maʼalob péektsil tiʼ tuláakal yóokʼol kaaboʼ?
20 Maʼ k-ojel tak tuʼux kun náakal u kʼaʼaytaʼal le maʼalob péektsiloʼ, mix xan k-ojel baʼax kʼiin ken taalak le xuʼulsajiloʼ. Chéen k-ojel naatsʼ yanik u kʼiinil. Jach kiʼimak k-óol ilik táan u kʼaʼaytaʼal le maʼalob péektsil tuláakal yóokʼol kaaboʼ, tumen lelaʼ ku yeʼesik naatsʼ yanik u kʼiinil u xuʼulsaʼal tuláakal u gobierno wíinikoʼob tumen u Reino Dios (Daniel 2:44). Tuláakal jaʼaboʼob ku máaneʼ ku kʼaʼaytaʼal le maʼalob péektsil tiʼ u millonesi máakoʼob, lelaʼ ku taasik nojbeʼenil tiʼ Jéeoba. Le oʼolaleʼ, múuchʼ yéetel tuláakal k-sukuʼunoʼobeʼ, koʼoneʼex tsʼáaik k-óol kʼaʼay le maʼalob péektsil tiʼ tuláakal u kajnáaliloʼob yóokʼol kaaboʼ. Beyoʼ yaan k-salvartikba yéetel yaan xan u salvarkuba le máaxoʼob chʼenxikintkoʼonoʼ (1 Timoteo 4:16).
¿Kʼajaʼan wa tech?
• ¿Baʼaxten ku beetik u jaʼakʼal k-óol le baʼax tu yaʼalaj Jesús teʼ Mateo 24:14?
• Le yáax cristianoʼoboʼ, ¿bix úuchik u jach tsʼáaik u yóoloʼob u kʼaʼaytoʼob le maʼalob péektsiloʼ, yéetel bix binik tiʼob?
• Le múuchʼ máakoʼob ku xokikoʼob le Bibliaoʼ, ¿bix kʼuchik u jach naʼatoʼob baʼax u kʼáat u yaʼal Mateo 24:14?
• ¿Baʼax jach maʼalob ta wilaj tiʼ le meyaj tu beetaj u j-jaajkunajoʼob Jéeoba tu mesiloʼob septiembre tiʼ 2004 tak agosto tiʼ 2005?
[U kʼáatchiʼiloʼob le xookoʼ]
[U tsolajil le oochel teʼ táan juʼun 14]
Jéeobaeʼ tu túuxtaj Pedro utiaʼal u kʼaʼayt le maʼalob péektsil tiʼ Cornelio yéetel tiʼ u láakʼtsiloʼoboʼ
[U tsolajil le oochel teʼ táan juʼun 15]
Pabloeʼ jach yaʼab úuchik u viajar utiaʼal u kʼaʼaytik le maʼalob péektsiloʼ