Unaj k-utsul kiʼimakkúuntik k-óol
Unaj k-utsul kiʼimakkúuntik k-óol
«Wa ka janaleʼex, wa ka wukʼuleʼex, wa ka beetikeʼex uláakʼ wa baʼaxeʼ, beeteʼex tuláakal utiaʼal u nojbeʼenil Jajal Dios.» (1 CORINTOILOʼOB 10:31.)
1, 2. ¿Baʼaxten u kiʼimakkúuntik u yóol máakeʼ upʼéel baʼal jach maʼalob u taal tiʼ Dios, baʼaleʼ baʼax ku kʼaʼajsiktoʼon le Bibliaoʼ?
MAʼ kʼaas u taaktal u kiʼimakkúuntik u yóol máakiʼ, tumen Jéeoba, le Dios k-meyajtikoʼ yaan kiʼimak óolal tiʼ yéetel u kʼáat xan ka yanaktoʼon kiʼimak óolal, le oʼolal u tsʼaamajtoʼon yaʼab baʼaloʼob utiaʼal k-kiʼimakkúuntik k-óol (1 Timoteo 1:11; 6:17). Le rey Salomonoʼ tu yaʼalaj: «In wojeleʼ baʼax maʼalob ku beet wíinikeʼ, ka u kiʼimakkúunt u yóol yéetel ka u tsʼáa uts tiʼ u kuxtal [tu kʼiinil] kuxaʼan, tumen wa k-janal, yéetel ukʼul, [bey xan wa] [k-]ilik u yutsil tuláakal meyajeʼ, leloʼ chéen tumen [Dios] tsʼáa tiʼ toʼon» (Eclesiastés 3:12, 13).
2 ¡Jach ku taasiktoʼon kiʼimak óolal k-ilik u yutsil le meyaj tsʼoʼok beetkoʼ, maases wa táan k-ilik u yutsil junmúuchʼ yéetel k-láakʼoʼob wa k-amigoʼob! U kiʼimakkúuntik u yóol máakeʼ upʼéel baʼal jach maʼalob ku taal tiʼ Dios. Baʼaleʼ, leloʼ maʼ u kʼáat u yaʼal wa jeʼel u páajtal k-kiʼimakkúuntik k-óol jeʼel bixakeʼ. Le Bibliaoʼ ku yaʼalikeʼ kʼeban tu táan Dios u káaltal máak, u sen píitmáan u janal bey xan u núup kʼebantal, yéetel ku yaʼalik xaneʼ le máaxoʼob beetik le baʼaloʼobaʼ «maʼ bíin u tiaʼaltoʼob u [reino] Jajal Dios[iʼ]» (1 Corintoiloʼob 6:9, 10; Proverbios 23:20, 21; 1 Pedro 4:1-4).
3. ¿Baʼax ken u yáantoʼon utiaʼal maʼ u náayal k-óol k-páaʼt u kʼuchul u kʼiinil le xuʼulsajiloʼ?
3 Teʼ kʼiinoʼob jach talamtakaʼ, jach yaʼab baʼaloʼob kʼaastak ku yilaʼal teʼ yóokʼol kaabaʼ, le oʼolal maʼ chéen chʼaʼabil k-kanáantikbaiʼ (Juan 17:15, 16). Jeʼex u yaʼalik le Bibliaoʼ, le máakoʼob teʼ kʼiinoʼobaʼ ku yaabilkoʼob «u kʼaakʼas tsʼíibolaloʼob» maʼatech u yaabiltkoʼob Dios, yéetel maʼ u kʼáat u tsʼaʼob cuenta wa náatsʼ yanik le nojoch «mukʼyaj[oʼ]» (2 Timoteo 3:4, 5; Mateo 24:21, 37-39). Jesuseʼ tu yaʼalaj tiʼ u disipuloʼob: «Kanáantabaʼex, maʼ a chaʼik u chichtal a puksiʼikʼaleʼex tu yoʼolal kʼaakʼas kuxtal, káaltal yéetel u [...] baʼaluba le kuxtalaʼ, utiaʼal maʼ u taasik jakʼ óolal tiʼ teʼex le kʼiinoʼ» (Lucas 21:34, 35). Toʼoneʼ jach k-ilik kanáantikba jeʼex tu yaʼalil Jesusoʼ. Kex u máakiloʼob le kʼasaʼan yóokʼol kaab naayal u yóoloʼob tiʼ uláakʼ baʼaloʼobeʼ, toʼoneʼ táan k-páaʼtik u kʼuchul u kʼiinil le xuʼulsajil ken u taas Jéeobaoʼ (Sofonías 3:8; Lucas 21:36).
4. 1) ¿Baʼaxten jach talam u kiʼimakkúuntik u yóol máak yéetel baʼaloʼob maʼalobtak? 2) ¿Baʼax ku yaʼalik Efesoiloʼob 5:15, 16 ka k-beete?
4 Maʼ chéen chʼaʼabil k-kanáantikba tiʼ le baʼaloʼob kʼaastak ku beetaʼal teʼ yóokʼol kaabaʼ, tumen le Kʼaasilbaʼaloʼ tuláakal tuʼux ku beetik u yilaʼal le baʼaloʼob maʼ maʼalobtakaʼ yéetel ku beetik ka tsʼíiboltaʼakoʼob. Jach talam u kiʼimakkúuntik u yóol máak yéetel baʼaloʼob maʼalobtak, tumen óoliʼ tuláakal baʼax yaan teʼ yóokʼol kaabaʼ tsʼaʼan utiaʼal u béeykuntik máak u «yóokʼol kaabil tsʼíibolaloʼob» (1 Pedro 2:11). Le baʼaloʼob maʼ maʼalobtakaʼ tuláakal tuʼux ku yilaʼal, jeʼel tak u yokol tu yotoch máakeʼ, maʼ xaaneʼ tiʼ revistaʼob, tiʼ televisión, tiʼ Internet yéetel tiʼ videoʼob. Le oʼolal le Bibliaoʼ ku yaʼaliktoʼon: «Maʼ a kuxtaleʼex bey máaxoʼob minaʼan u naʼatoʼobeʼ baʼaleʼ bey máaxoʼob yaan u naʼatoʼobeʼ. Maʼ a chéen máansaj kʼiineʼex tumen kʼasaʼan le kʼiinoʼoboʼ» (Efesoiloʼob 5:15, 16). Wa k-beetik le baʼax ku yaʼalik le tekstoaʼ, maʼ ken k-náays k-óol yéetel baʼaloʼob jeʼel u náachkuntkoʼon tiʼ Dios yéetel jeʼel tak u biskoʼon tiʼ xuʼulsajileʼ (Santiago 1:14, 15).
5. ¿Baʼax jach taasiktoʼon kiʼimak óolal?
5 Tumen sáamsamal k-beetik yaʼab baʼaloʼobeʼ, yaan kʼiin ku kʼaʼabéettal k-náaysik k-óol. Tak Eclesiastés 3:4 ku yaʼalikeʼ «yaan jun súutuk utiaʼal cheʼej» yéetel «yaan jun súutuk utiaʼal kiʼimak óolal», jeʼex k-ilkoʼ le Bibliaoʼ ku yaʼalik maʼ kʼaas u kiʼimakkúuntik u yóol máakiʼ. Baʼaleʼ, le bix kiʼimakkúuntik k-óoloʼ maʼ unaj u náachkuntkoʼon tiʼ Jéeobaiʼ mix unaj u luʼsiktoʼon le tiempo k-jóoʼsik utiaʼal k-meyajtikoʼ. Le sukuʼunoʼob úuch joʼopʼok u meyajkoʼob Diosoʼ u yojloʼobeʼ u jóoʼsik máak u tiempoi utiaʼal u yáantik u maasileʼ jach ku taasik kiʼimak óolal. Le oʼolal ku tsʼáaikoʼob táanil u beetkoʼob baʼax u kʼáat Dios yéetel jach ku kiʼimaktal u yóoloʼob ikil u beetkoʼob le meyaj tu pʼataj Jesusoʼ (Mateo 11:29, 30; Beetaʼanoʼob [Hechos] 20:35).
Kʼaʼabéet k-ilik yéetel baʼax ken k-kiʼimakkúunt k-óol
6, 7. ¿Baʼax jeʼel u yáantkoʼon utiaʼal k-ojéeltik wa maʼalob le baʼax ken k-beet utiaʼal k-kiʼimakkúuntik k-óoloʼ?
6 ¿Bix jeʼel k-ojéeltik wa maʼalob le baʼax ken k-beet utiaʼal k-kiʼimakkúuntik k-óoloʼ? U jaajileʼ, le taatatsiloʼoboʼ ku tsʼáaikoʼob nuʼuktaj tiʼ u paalaloʼob, le nuxiboʼob xanoʼ ku tsʼáaikoʼob áantaj ken kʼaʼabéetchajak tiʼ máak. Baʼaleʼ, maʼ unaj k-páaʼtik ka aʼalaʼaktoʼon wa maʼ maʼalob le libro k-xokikoʼ, le película k-chaʼantkoʼ, le paax k-uʼuykoʼ, le báaxal wa le óokʼot k-beetkoʼ, tumen Pabloeʼ tu yaʼaleʼ le máaxoʼob tsʼoʼok u yiijtal u tuukuloʼoboʼ tsʼoʼok u kanik «u chʼaʼa nuʼuk[toʼob] baʼax le utsoʼ bey xan baʼax le kʼaasoʼ» (Hebreob 5:14; 1 Corintoiloʼob 14:20). Le Bibliaoʼ ku yaʼaliktoʼon baʼax unaj k-beetik, yéetel wa maʼ k-tuʼubsik baʼax tsʼoʼok k-kanik ichileʼ yaan k-beetik baʼax maʼalob tu táan Dios (1 Timoteo 1:19).
7 Jesuseʼ tu yaʼaleʼ «junkúul cheʼeʼ ku kʼaj óoltaʼal tu yoʼolal u yich» (Mateo 12:33). Le oʼolaleʼ wa le baʼax yéetel k-náaysik k-óol ku túulchʼintkoʼon beet loob, ku túulchʼintkoʼon k-táakpajal tiʼ núup kʼeban wa tiʼ espiritismoeʼ, u kʼáat u yaʼaleʼ maʼ maʼalobiʼ. Maʼ unaj xan k-náaysik k-óol yéetel baʼaloʼob jeʼel u beetik u yúuchultoʼon loobeʼ, wa jeʼel u beetik k-kíimileʼ, wa jeʼel u yóotsilkúuntkoʼoneʼ, wa jeʼel u lúuʼsik óoleʼ yéetel wa jeʼel u beetik u tʼóochpajal u maasileʼ. Le apóstol Pablooʼ tu yaʼaleʼ upʼéel kʼeban k-beetik u tʼóochpajal utúul sukuʼun. Letiʼeʼ tu tsʼíibtaj: «Ikil a loobiltikeʼex u tuukul le sukuʼunoʼob lubaʼan u muukʼ u yoksaj óolaloʼobeʼ, táan a kʼebanchajleʼex tu contra Cristo. Le oʼolaleʼ, wa teen kin beetik u lúubul tiʼ kʼeban in sukuʼun tu yoʼolal baʼax kin jaantikeʼ, [maas] maʼalob maʼ in jaantik bakʼ mix bikʼin, utiaʼal maʼ in beetik u lúubul tiʼ kʼeban» (1 Corintoiloʼob 8:12, 13).
8. ¿Máakalmáak le báaxloʼob tiʼ video yéetel tiʼ computadora maʼ maʼalobtakoʼ?
8 Bejlaʼeʼ le báaxloʼob tiʼ video yéetel tiʼ computadoraoʼ jach yaʼab u báaxtaʼal. Yaneʼeʼ maʼ kʼaastakoʼobiʼ, baʼaleʼ maas yaʼab le ku taaskoʼob baʼaloʼob ku yaʼalik le Biblia maʼ maʼalobtakoʼ. Wa upʼéel báaxal yaan yil yéetel baʼateʼel wa yéetel kíimsajbáail bey xan wa yaan yil yéetel u beetaʼal baʼaloʼob subtsiltak wa kʼaastakeʼ, leloʼ u kʼáat u yaʼaleʼ maʼ upʼéel maʼalob báaxal utiaʼal k-náaysik k-óoliʼ. Jéeobaeʼ «ku pʼektik yéetel tuláakal u yóol le máaxoʼob [u] yaabiltmajoʼob le meyaj looboʼ» (Salmo 11:5; Proverbios 3:31; Colosailoʼob 3:5, 6). Wa upʼéel báaxal ku beetik a tsʼíiboltik taakʼin, ku beetik a sen pʼuʼujul, ku jach beetik a kaʼanal wa jach ku luʼsiktech tiempoeʼ, unaj a tsʼáaik cuenta maʼ tu beetiktech mix upʼéel uts yéetel unaj a pʼatik (Mateo 18:8, 9).
Jejeláas bix jeʼel k-utsul kiʼimakkúuntik k-óoleʼ
9, 10. ¿Baʼax jeʼel u páajtal k-beetik utiaʼal k-utsul kiʼimakkúuntik k-óol?
9 Maʼ xaaneʼ yaan sukuʼunoʼob u kʼáat u yojéeltoʼob baʼax maʼalob utiaʼal u kiʼimakkúuntik u yóoloʼob, tumen óoliʼ tuláakal baʼax yaan teʼ yóokʼol kaab utiaʼal u kiʼimakkúuntik u yóol máakoʼ ku bin tu contra le baʼax ku yaʼalik le Bibliaoʼ. Kex beyoʼ yaan jejeláas bix jeʼel k-utsul kiʼimakkúuntik k-óoleʼ, baʼaleʼ kʼaʼabéet k-tsʼáaik óol kaxt bix jeʼel k-beetkeʼ. Le taatatsiloʼoboʼ kʼaʼabéet u jach tuklikoʼob bix jeʼel u kiʼimakkúuntik u yóol u familiaʼobeʼ. Yaʼab sukuʼunoʼobeʼ ku utsul kiʼimakkúuntik u yóoloʼob yéetel u láakʼtsiloʼob wa yéetel le sukuʼunoʼob teʼ múuchʼuliloʼ. Jach ku taasik xan kiʼimak óolal wa tu yorai upʼéel janal ka joʼopʼok u tsikbaltaʼal upʼéel baʼax yaan yil yéetel le Bibliaoʼ wa le baʼaxoʼob úuchoʼob teʼ kʼiinoʼ. Jeʼel xan u páajtal u muchʼkuba le sukuʼunoʼob utiaʼal u jaanloʼob, utiaʼal u báaxloʼob wa utiaʼal u binoʼob xíimbal táanxelil. U náaysik u yóol máak beyaʼ jach maʼalob.
10 Utúul nuxib yéetel u yatan, yaan óoxtúul u paalaloʼobeʼ, ku yaʼalikoʼob: «Chichan k-paalal ka káaj k-aʼaliktiʼob ka u yáantoʼonoʼob utiaʼal k-yéeyik tuʼux ken k-bin xíimbal kaʼachi. Yaan kʼiineʼ k-chaʼik tiʼ cada utúul u bisik utúul u amigo, leloʼ ku beetik u maas kiʼimaktal k-óol teʼ xíimbaloʼ. K-kʼiimbesik xan kaʼach baʼaloʼob jach kʼaʼanantak utiaʼaloʼob. Cada wa baʼax kʼiineʼ k-invitartik t-otoch k-láakʼtsiloʼob yéetel le sukuʼunoʼob teʼ múuchʼuliloʼ, yaan kʼiin xaneʼ k-jóokʼol janal táankab ku tsʼoʼoleʼ k-báaxal tu yéeteloʼob kaʼachi. K-jóokʼol xan kaʼach xíimbal tiʼ coche wa k-bin xíimbal tu jáal le nukuch witsoʼoboʼ; tuláakal lelaʼ meyajnaj utiaʼal k-maas kʼaj óoltik le jatsʼuts baʼaloʼob u beetmaj Jéeobaoʼ».
11, 12. 1) ¿Máaxoʼob jeʼel u páajtal k-invitartik ken k-beet wa baʼax utiaʼal k-kiʼimakkúuntik k-óoleʼ? 2) ¿Baʼax súutukiloʼob maʼatech u jáan tuʼubsaʼaloʼob?
11 ¿Jeʼel wa u páajtal k-invitartik uláakʼ sukuʼunoʼob ken k-beet wa baʼax utiaʼal k-kiʼimakkúuntik k-óoleʼ? Maʼ xaaneʼ yaan sukuʼunoʼob kʼaʼabéet u líiʼsaʼal u yóoloʼob, jeʼex le kiikoʼob kimen u yíichamoʼoboʼ, wa le sukuʼunoʼob yéetel le kiikoʼob maʼ tsʼokaʼan u beeloʼoboʼ wa familiaʼob tuʼux chéen utúul tiʼ le taatatsiloʼob yanoʼ (Lucas 14:12-14). Jeʼel xan u páajtal k-invitartik le máaxoʼob tsʼoʼok u káajal u binoʼob teʼ muchʼtáambaloʼoboʼ, chéen baʼaleʼ kʼaʼabéet k-kanáantik maʼ k-beetik u tʼóochpajal mix máak (2 Timoteo 2:20, 21). Wa yaan xan sukuʼunoʼob kʼojaʼanoʼob maʼ tu páajtal u jóoʼloʼobeʼ, jeʼel u páajtal k-bisik le janal tu yotochoʼob utiaʼal ka múul jaankoʼon tu yéeteloʼoboʼ (Hebreob 13:1, 2).
12 Le súutukiloʼob tuʼux ku muchʼkuba máak utiaʼal upʼéel janal yéetel tuʼux ku tsikbaltik le sukuʼunoʼob bix tu kʼaj óoltiloʼob Jéeoba yéetel baʼax áantkoʼob utiaʼal u chúukpajal u yóoloʼobeʼ, súutukiloʼob maʼatech u jáan tuʼubsaʼaloʼob. Teʼ súutukoʼobaʼ jeʼel xan u páajtal u tsikbaltaʼal baʼaloʼob yaan yiloʼob yéetel le Bibliaoʼ, yéetel jeʼel u páajtal u táakpajal tak le mejen paalaloʼ. U tsikbaltaʼal baʼaloʼob beyaʼ upʼéel bix k-múul líiʼsik k-óol yéetel maʼ tu beetik u sublaktal mix máak.
13. ¿Baʼax ku kaʼansiktoʼon le bix úuchik u yeʼesik u yutsil Jesús yéetel Pablo tiʼ u maasiloʼ?
13 Jesuseʼ jach tu yeʼesaj u yutsil tiʼ u maasil, yéetel bin xan ka invitartaʼab wa tuʼux. Le tuʼuxoʼob invitartaʼaboʼ tu yilaj u kaʼansik wa baʼax yaan yil yéetel Dios (Lucas 5:27-39; 10:42; 19:1-10; 24:28-32). U yáax disipuloʼob xaneʼ bey tu beetiloʼoboʼ (Beetaʼanoʼob 2:46, 47). Le apóstol Pablooʼ tu tsʼíibtaj: «In kʼáat in wileʼex utiaʼal ka in tsʼáa teʼex wa baʼax áantajil [...], utiaʼal ka mas muʼukʼanchajak a wóoleʼex, in kʼáat in waʼaleʼ, utiaʼal ka paklan líikʼik k-óol yéetel le oksaj óolal yaan tiʼ teʼexoʼ bey xan yaan tiʼ tenoʼ» (Romailoʼob 1:11, 12). Le muchʼtáambaloʼob xanoʼ súutukoʼob tuʼux jach jeʼel u páajtal k-múul líiʼsik k-óoleʼ (Romailoʼob 12:13; 15:1, 2).
Kʼaʼajsajiloʼob utiaʼal k-kanáantikba
14. Ken u muchʼuba le sukuʼunoʼob utiaʼal u kiʼimakkúuntik u yóoloʼobeʼ, ¿baʼaxten maas maʼalob maʼ u jach yaʼabtaloʼob?
14 Ken u muchʼuba le sukuʼunoʼob utiaʼal u kiʼimakkúuntik u yóoloʼoboʼ, maas maʼalob maʼ u jach yaʼabtaloʼob, tumen wa jach yaʼaboʼobeʼ, maʼ xaaneʼ jeʼel u yantal talamiloʼobeʼ. Yaan familiaʼobeʼ ku binoʼob janal wa tuʼux, wa ku binoʼob báaxal, baʼaleʼ ku beetkoʼob tiʼ súutukoʼob minaʼan muchʼtáambal yéetel maʼ tu yorai u jóoʼloʼob kʼaʼaytajiʼ. U yantal nuxiboʼob, j-áantaj nuxiboʼob wa uláakʼ sukuʼunoʼob úuch káajak u meyajkoʼob Dios teʼ súutukiloʼobaʼ, ku yáantaj utiaʼal maʼ u yantal talamiloʼob yéetel utiaʼal ka máansaʼak upʼéel jatsʼuts súutukil.
15. Ken k-muchʼba yéetel k-sukuʼunoʼob utiaʼal k-máansik u súutuk kiʼimak óolaleʼ, ¿baʼaxten kʼaʼabéet yaan máax ilik baʼax kun beetbil?
15 Ken k-muchʼba yéetel k-sukuʼunoʼob utiaʼal k-máansik u súutuk kiʼimak óolaleʼ, kʼaʼabéet yaan máax ilik baʼax kun beetbil. Kex uts tʼaan k-invitartik le sukuʼunoʼoboʼ, ¿máasaʼ jach jeʼel u beetik u lúubul k-óol wa ka úuchuk wa baʼax ka u beet u tʼóochpajal utúul tiʼ le máaxoʼob k-invitarmoʼ? Tuukulnakoʼon tiʼ le baʼax ku yaʼalik Deuteronomio 22:8. Teʼeloʼ ku yaʼalikeʼ wa utúul israelita ku beetik upʼéel pakʼil najeʼ unaj kaʼach u beetik upʼéel kaʼanal pretil tu techoi, tuʼux suuk u muchʼkubaʼob utiaʼal u kiʼimakkúuntik u yóoloʼob. ¿Baʼaxten? Utiaʼal u kanáantik «maʼ u [...] kíimil mix máak tu yotoch wa yaan máax ku lúubul tu najil». Bejlaʼa xaneʼ, ken u muchʼuba le sukuʼunoʼob utiaʼal u kiʼimakkúuntik u yóoloʼobeʼ kʼaʼabéet u chʼaʼatuklaʼal baʼax jeʼel u páajtal u beetaʼaleʼ yéetel baʼax maʼ, utiaʼal maʼ u yúuchul mix upʼéel loob yéetel maʼ u yantal mix upʼéel talamil.
16. Ken u muchʼuba le sukuʼunoʼob utiaʼal u kiʼimakkúuntik u yóoloʼobeʼ, ¿baʼax unaj u beetaʼal wa yaan u yukʼaʼal cerveza wa licor?
16 Ken u muchʼuba le sukuʼunoʼob utiaʼal u kiʼimakkúuntik u yóoloʼobeʼ, wa yaan u yukʼaʼal cerveza wa licoreʼ, kʼaʼabéet u jach kanáantaʼal bukaʼaj kun tsʼaabiliʼ. Yaʼab sukuʼunoʼobeʼ ku tsʼáaikoʼob cerveza wa licor chéen wa ku páajtal u kanáantkoʼob bukaʼaj ken u yukʼ cada utúul tiʼ le máaxoʼob u invitarmoʼ. Maʼ unaj u beetaʼal mix baʼal ka u beet u tʼóochpajal wa máaxiʼ, mix xan ka u beet u píit máan u yukʼaʼaliʼ (Efesoiloʼob 5:18, 19). Yaan sukuʼunoʼobeʼ, yoʼolal jejeláas baʼaloʼobeʼ, ku chʼaʼatuklikoʼob maʼ u yuʼkoʼob mix upʼíit cerveza wa licor. Yaʼab tuʼuxeʼ, yaan upʼéel ley ku yaʼalik jaypʼéel jaʼab unaj u yantal tiʼ máak utiaʼal ka páatak u yukʼik alcohol; máax meyajtik Dios túuneʼ kʼaʼabéet u beetik baʼax ku yaʼalik le ley kex maʼ jach utstutʼaaniʼ (Romailoʼob 13:5).
17. 1) Wa yaan u tsʼaʼabal paaxeʼ, ¿baʼax unaj u beetik le máax invitarmil le sukuʼunoʼoboʼ? 2) Wa yaan u yantal óokʼoteʼ, ¿baʼax maʼ unaj u beetaʼaliʼ?
17 Utiaʼal maʼ u beetaʼal wa baʼax ku bin tu contra le Bibliaoʼ, le máax invitarmil le sukuʼunoʼoboʼ unaj u kanáantik baʼax paaxil kun tsʼaabil, bix kun úuchul óokʼot yéetel baʼax báaxliloʼob jeʼel u páajtal u beetaʼaleʼ. Maʼ upʼéeliliʼ clase paax utstuyich u yuʼubik tuláakal máakiʼ, le oʼolal yaʼab u jejeláasil paaxoʼob yaan. Baʼaleʼ, yaʼab tiʼ le paaxoʼob ku yuʼubaʼaloʼob bejlaʼoʼ ku túulchʼintik máak utiaʼal maʼ u yuʼubik tʼaan, utiaʼal u beetik baʼax kʼaas wa utiaʼal u beetik loob tiʼ u yéet máakil, le oʼolaleʼ kʼaʼabéet u jach kanáantaʼal baʼax paaxil kun tsʼaabil. Yaan yaʼab paaxoʼob maʼalob utiaʼal óokʼostbil, baʼaleʼ yaʼab paaxoʼob xaneʼ kʼaas u yóokʼostaʼal wa ku taaskoʼob tʼaanoʼob maʼ maʼalobtakiʼ. Le máax kun tsʼaabil utiaʼal u yil le paaxoʼ kʼaʼabéet utúul sukuʼun u yojel maʼ unaj u sen kʼaʼankúunsaʼal le paaxoʼ. U kʼaakʼas kʼuʼuytikuba máak ken óokʼotnakeʼ maʼ maʼalob xaniʼ (1 Timoteo 2:8-10).
18. Le taatatsiloʼoboʼ, ¿bix jeʼel u kanáantik u paalaloʼobeʼ?
18 Le taatatsiloʼoboʼ wa ku invitartaʼal u paalaloʼob utiaʼal ka xiʼikoʼob tuʼux ken u muchʼuba le sukuʼunoʼob utiaʼal u kiʼimakkúuntik u yóoloʼoboʼ, kʼaʼabéet u kʼáatik u yuʼuboʼob baʼax kun beetbiliʼ, yéetel maʼalob ka xiʼikoʼob tu yéeteloʼob. Yaan taatatsiloʼobeʼ tsʼoʼok u chaʼik tiʼ u paalaloʼob u bin u kiʼimakkúunt u yóoloʼob tuʼux mix máak kanáantik baʼax ku beetaʼaliʼ, lelaʼ tsʼoʼok u beetik u lúubul le paalal tiʼ núup kʼebanoʼ wa u beetkoʼob uláakʼ baʼaloʼob maʼ maʼalobtakiʼ (Efesoiloʼob 6:1-4). Kex wa tsʼoʼok u chan nuuktal le xiʼipalal yéetel le chʼúupalaloʼoboʼ yéetel kex ku yeʼeskoʼob tsʼoʼok u kʼantal u tuukuloʼobeʼ láayliʼ kʼaʼabéet u yáantaʼaloʼob utiaʼal maʼ u lúubloʼob «tiʼ u kʼaakʼas tsʼíibolaloʼob le táankelemiloʼ» (2 Timoteo 2:22).
19. ¿Baʼax unaj k-kʼaʼajsik utiaʼal k-kaxtik táanil u Reino Dios?
19 K-utsul kiʼimakkúuntik k-óol wa baʼax kʼiineʼ ku maas jatsʼutskíintik k-kuxtal, yéetel Jéeobaeʼ maʼ tu luʼsiktoʼon k-beetik lelaʼ; baʼaleʼ unaj k-kʼaʼajskeʼ le baʼaloʼobaʼ maʼ tu yáantkoʼon utiaʼal ka k-muchʼkíint ayikʼaliloʼob teʼ kaʼanoʼ (Mateo 6:19-21). Jesuseʼ tu kaʼansaj tiʼ u disipuloʼob maas maʼalob ka u kaxtoʼob táanil u Reino Dios, maʼ le jaanloʼ, maʼ le ukʼuloʼ mix le nookʼoʼ, «tumen u kajnáaliloʼob le yóokʼol kaabaʼ» chéen tiaʼanoʼob tu paach le baʼaloʼobaʼ (Mateo 6:31-34).
20. ¿Baʼax jeʼel u páaʼtik máaxoʼob meyajtik Jéeobaeʼ?
20 Jeʼel baʼalak ka k-beeteʼexeʼ, kex táan k-janal wa kex táan k-ukʼuleʼ kʼaʼabéet k-beetkeʼex «tuláakal utiaʼal u nojbeʼenil Jajal Dios», yéetel kʼaʼabéet k-tsʼáaik nib óolal tiʼ Jéeoba yoʼolal tuláakal le baʼax ku tsʼáaiktoʼon utiaʼal k-kiʼimakkúuntik k-óoloʼ (1 Corintoiloʼob 10:31). Maʼ kun xáantaleʼ, ken sutaʼak paraísoi le Luʼumaʼ, Jéeobaeʼ yaan u beetik k-ilik yaʼabach baʼaloʼob maʼalobtak junmúuchʼ yéetel máaxoʼob beetik baʼax ku yaʼalik (Salmo 145:16; Isaías 25:6; 2 Corintoiloʼob 7:1).
¿Kʼajaʼan wa tech?
• ¿Baʼaxten jach talam u kiʼimakkúuntik u yóol máak yéetel baʼaloʼob maʼalobtak?
• ¿Bix u utsul kiʼimakkúuntik u yóol yaʼab sukuʼunoʼob?
• Utiaʼal ka k-utsul kiʼimakkúunt k-óoleʼ, ¿baʼax kʼaʼajsajiloʼob ku tsʼaʼabaltoʼon?
[U kʼáatchiʼiloʼob le xookoʼ]
[U tsolajil le oochel teʼ táan juʼun 4]
Ilawil a kiʼimakkúuntik a wóol yéetel baʼaxoʼob jeʼel u taasiktech utsileʼ
[U tsolajil le oochel teʼ táan juʼun 5]
¿Baʼax yéetel maʼ maʼalob ka k-kiʼimakkúunt k-óoliʼ?