Xeeneʼex ka a beeteʼex j-kaambaloʼob, yéetel tsʼaʼex u yokjaʼob
Xeeneʼex ka a beeteʼex j-kaambaloʼob, yéetel tsʼaʼex u yokjaʼob
«Xeeneʼex túun tiʼ u kajnáaliloʼob tuláakal kaajoʼobeʼ ka a beeteʼexoʼob j-kaambaloʼob; yéetel tsʼaʼex u yokjaʼob [...,] yéetel kaʼanseʼexoʼob u tsʼoʼokbesoʼob tuláakal baʼax in waʼalmaj tiʼ teʼex.» (MATEO 28:19, 20.)
1. ¿Baʼax tu yaʼalaj ken u beet u úuchben kaajil Israel le tiaʼan kaʼach tu jáal u witsil Sinaíoʼ?
ÓOLIʼ tres mil jaʼaboʼob bejlaʼeʼ u úuchben kaajil Israeleʼ tu yaʼalaj tiʼ Dios yaan u beetik tuláakal baʼax ku yaʼalik. Le tiaʼanoʼob tu jáal u witsil Sinaíoʼ, le israelitaʼoboʼ tu yaʼaloʼob: «Bíin k-beet tuláakal le baʼax tsʼoʼok u yaʼalik Yuumtsiloʼ». Teʼ kʼiin jeʼeloʼ u kaajil Israeleʼ tu kʼububa tiʼ Dios, ka suunaj u «j-yéeybil kaajal» Dios (Éxodo 19:5, 8; 24:3). U kaajil Israeleʼ jach u kʼáat kaʼach ka kanáantaʼak tumen Jéeoba yéetel ka kuxlak utiaʼal mantatsʼ tiʼ upʼéel luʼum «tuʼux ku yáalkab leche yéetel kaab» (Levítico 20:24).
2. ¿Máaxoʼob táan u muchʼik Jéeoba teʼ kʼiinoʼobaʼ?
2 Baʼaleʼ jeʼex tu yaʼalaj Asaf, le salmistaoʼ, le israelitaʼoboʼ «maʼ tu tsʼoʼokbesajoʼob le núup tʼaan [wa pacto] tu beetajoʼob yéetel [Jajal Diosoʼ]. Mix tu yóoltajoʼob u yuʼuboʼob u kaʼambesajoʼobiʼ» (Salmo 78:10). Tumen le israelitaʼob maʼ tu tsʼoʼokbesoʼob le baʼax u yaʼalmoʼoboʼ, ka máan kʼiineʼ xuʼul u yilaʼaloʼob tumen Jéeoba bey u kaajaleʼ (Eclesiastés 5:4; Mateo 23:37, 38). Le oʼolal Dioseʼ yanchaj u yéeyik ichil «le máakoʼob maʼ judíoʼob[oʼ] [...] jumpʼéel kaaj u tiaʼalinte» (Beetaʼanoʼob [Hechos] 15:14). Teʼ tu tsʼook kʼiinoʼobaʼ, Jéeobaeʼ táan u muchʼik «yaʼabkach máakoʼob taaljanoʼob tiʼ tuláakal múuchʼkabil kaajoʼob, chʼiʼibaloʼob, jejeláas tʼaanoʼob yéetel jejeláas kaajoʼob». Le yaʼabach máakoʼobaʼ ku yaʼalikoʼob: «Le [salvacionoʼ] utiaʼal k-Jajal Dios, máax kulukbal teʼ j-jalaʼach kʼáancheʼoʼ yéetel utiaʼal le j-tamanoʼ» (Apocalipsis 7:9, 10).
3. ¿Baʼax unaj u beetik máak utiaʼal ka kʼaʼamak tumen Dios?
3 Utiaʼal ka yanakoʼon ichil le yaʼabach máakoʼob kʼamaʼanoʼob tumen Jéeobaoʼ, kʼaʼabéet k-kʼubikba tiʼ letiʼ yéetel k-okjaʼ utiaʼal k-eʼesik tu táan u maasil utiaʼaloʼon Jéeoba. Lelaʼ k-beetik utiaʼal k-tsʼoʼokbesik le baʼax tu yaʼalaj Jesús tiʼ u disipuloʼobaʼ: «Xeeneʼex túun tiʼ u kajnáaliloʼob tuláakal kaajoʼobeʼ ka a beeteʼexoʼob j-kaambaloʼob; yéetel tsʼaʼex u yokjaʼob tu kaabaʼ le Taataoʼ, le Paaloʼ yéetel le Kiliʼich Pixanoʼ, yéetel kaʼanseʼexoʼob u tsʼoʼokbesoʼob tuláakal baʼax in waʼalmaj tiʼ teʼex» (Mateo 28:19, 20). Le israelitaʼoboʼ tu yuʼuboʼob u xokaʼal «u tsʼíibil juʼunil le núup tʼaanoʼ» (Éxodo 24:3, 7, 8). Yoʼolal lelaʼ tu naʼatoʼob tubeel baʼax u kʼáat Dios ka u beetoʼob. Bejlaʼa xaneʼ táanil tiʼ u yokjaʼ wa máaxeʼ unaj u jach ojéeltik baʼax ku yaʼalik le Biblia yoʼolal baʼax u kʼáat Dios ka u beet máakoʼ.
4. ¿Baʼax unaj u beetik le máaxoʼob kun okjaʼoboʼ? (Tʼaanen xan tiʼ baʼax ku yaʼalik le cuadro yaan teʼ kaʼanloʼ.)
4 Jesuseʼ u kʼáat kaʼach ka yanak upʼéel muʼukʼaʼan oksaj óolal tiʼ u disipuloʼob táanil tiʼ u yokjaʼob. Letiʼeʼ maʼ chéen tu yaʼalaj tiʼ u j-tsaypachoʼob ka u beetoʼob disipuloʼobiʼ, baʼaxeʼ tu yaʼalajtiʼob ka u kaʼansoʼob u tsʼoʼokbesoʼob tuláakal baʼax u yaʼalmaj (Mateo 7:24, 25; Efesoiloʼob 3:17-19). Le oʼolaleʼ, le máaxoʼob jeʼel u páajtal u yokjaʼoboʼ kʼaʼabéet tsʼoʼok u máan mesoʼob wa tak upʼéel wa kaʼapʼéel jaʼab káajak u xokikoʼob le Bibliaoʼ, tumen beyoʼ tsʼoʼok u jach tuklikoʼob tubeel baʼax ken u beetoʼob. Tsʼoʼoleʼ tu yorai u kaʼajoʼob okjaʼeʼ ku núukikoʼob kaʼapʼéel kʼáatchiʼob ku beetaʼaltiʼob. Bey tumen Jesús tu yeʼesaj u kʼaʼananil u tsʼoʼokbesik máak baʼax u yaʼalmeʼ, maʼalob ka k-naʼat tubeel baʼax u kʼáat u yaʼal le kaʼapʼéel kʼáatchiʼob ku beetaʼaloʼoboʼ (Mateo 5:37).
U pʼatik máak le baʼaloʼob maʼ maʼalobtakoʼ yéetel u kʼubik u kuxtal tiʼ Jéeoba
5. ¿Baʼax ku yeʼesik le yáax kʼáatchiʼ ku beetaʼal tiʼ le kun okjaʼoboʼ?
5 Le yáax kʼáatchiʼ ku beetaʼal tiʼ le máaxoʼob kun okjaʼoboʼ letiʼe wa tsʼoʼok u pʼatkoʼob le baʼaloʼob maʼ maʼalobtak ku beetkoʼob kaʼachoʼ yéetel wa tsʼoʼok u kʼubik u kuxtaloʼob tiʼ Jéeoba utiaʼal u beetkoʼob baʼax u kʼáat. Le kʼáatchiʼaʼ ku yeʼesikeʼ táanil tiʼ u yokjaʼ máakeʼ unaj u pʼatik le baʼaloʼob maʼ maʼalobtakoʼ yéetel u kʼubik u kuxtal tiʼ Jéeoba.
6, 7. 1) Táanil tiʼ u yokjaʼ máakeʼ, ¿baʼaxten kʼaʼabéet tsʼoʼok u pʼatik tuláakal baʼax maʼ maʼalobiʼ? 2) ¿Baʼax kʼeexiloʼob unaj k-beetik ken k-éejemt maʼ maʼalob bix kuxlikoʼon kaʼachiʼ?
6 Táanil tiʼ u yokjaʼ máakeʼ, ¿baʼaxten kʼaʼabéet tsʼoʼok u pʼatik tuláakal baʼax maʼ maʼalobiʼ? Le apóstol Pablooʼ tu yaʼalaj: «Tuláakaloʼon bey kuxlikoʼon kaʼach tiʼ le kʼiinoʼob tsʼoʼok u máanoʼoboʼ, táan k-bin kaʼach tu paach k-tsʼíibolaloʼob yéetel táan k-tsʼoʼokbesik baʼax u kʼáat k-bakʼel» (Efesoiloʼob 2:3). Táanil tiʼ k-jach ojéeltik baʼax u kʼáat Dioseʼ, kuxaʼanoʼon kaʼach jeʼex u máakiloʼob le yóokʼol kaabaʼ yéetel tiaʼanoʼon kaʼach yáanal u nuʼuktaj Satanás, le u diosil le yóokʼol kaabaʼ (2 Corintoiloʼob 4:4). Baʼaleʼ le ka t-kanaj baʼax u kʼáat Dioseʼ, chʼaʼatukultaj k-kuxtal «jeʼel bix u kʼáat Jajal Dioseʼ maʼ utiaʼal [k-]tsʼoʼokbesik u tsʼíibolal le luʼumkabil wíinklilaʼ» (1 Pedro 4:2).
7 K-kuxtal jeʼex u yaʼalik Dioseʼ ku taasiktoʼon yaʼab utsil, tsʼoʼoleʼ ku jach natsʼkoʼon tiʼ Jéeoba. Davideʼ tu ketaj u yantal máak náatsʼ tiʼ Jéeoba yéetel u yokol máak tu templo Jéeoba wa u yantal tu «kiliʼich puʼuk»; lelaʼ upʼéel baʼal jach maʼalob (Salmo 15:1). Baʼaleʼ, Jéeobaeʼ maʼ jeʼel máaxak jeʼel u invitarkeʼ, letiʼeʼ ku invitartik «chéen le máax toj u kuxtaleʼ yéetel ku beetik xan le utsoʼ, le máax ku yaʼalik jaaj yéetel tuláakal u puksiʼikʼaleʼ» (Salmo 15:2). Yoʼolal bix kuxlikoʼon kaʼach táanil tiʼ k-kʼaj óoltik u jaajileʼ, maʼ xaaneʼ yanchaj k-beetik jujumpʼéel kʼeexoʼob utiaʼal ka kʼaʼamkoʼon tumen Dios (1 Corintoiloʼob 6:9-11; Colosailoʼob 3:5-10). Le baʼax péekskoʼon k-kʼex kuxtaleʼ letiʼe k-éejemtik jach u puliʼ maʼ maʼalob le bix k-kuxtal kaʼachoʼ yéetel u jach taaktal k-beetik baʼax utstutʼaan Jéeoba. K-éejemtik maʼ maʼalob bix k-kuxtal kaʼacheʼ ku péekskoʼon utiaʼal ka jáawak k-tuukul chéen t-oʼolal yéetel utiaʼal ka jáawak k-kuxtal jeʼex u máakiloʼob le yóokʼol kaabaʼ, utiaʼal beyoʼ ka kuxlakoʼon jeʼex u kʼáat Diosoʼ (Beetaʼanoʼob 3:19).
8. ¿Bix k-kʼubikba tiʼ Jéeoba, yéetel baʼax k-eʼesik ken okjaʼanakoʼon?
8 Ichil le yáax kʼáatchiʼ ku beetaʼal tiʼ le máaxoʼob kun okjaʼoboʼ ku kʼáataʼal xan tiʼob wa tsʼoʼok u kʼubik u kuxtaloʼob tiʼ Jéeoba utiaʼal u beetkoʼob baʼax u kʼáat. Táanil tiʼ u yokjaʼ máakeʼ yáax kʼaʼabéet u kʼubik u kuxtal tiʼ Jéeoba. Lelaʼ ku beetik máak ken u beet upʼéel payalchiʼ utiaʼal u yaʼalik tiʼ Jéeoba táan u kʼubik u kuxtal tiʼ letiʼ yoʼolal le u kʼiʼikʼel Cristo tu wekajoʼ (Romailoʼob 14:7, 8; 2 Corintoiloʼob 5:15). Bey túunoʼ k-tiaʼalintaʼal tumen Jéeoba; jeʼex Jesuseʼ, ku taasiktoʼon kiʼimak óolal k-beetik baʼax ku yaʼalik Jéeoba (Salmo 40:8; Efesoiloʼob 6:6). Chéen utéen k-aʼalik tiʼ Jéeoba táan k-kʼubikba tiʼ letiʼ, yéetel tumen mix máak uláakʼ ojéelmaileʼ, ken okjaʼanakoʼoneʼ k-eʼesik tiʼ u maasil tsʼoʼok k-kʼubikba tiʼ Jéeoba (Romailoʼob 10:10).
9, 10. 1) ¿Bix unaj k-beetik baʼax u kʼáat Jéeoba jeʼel bix tu beetil Jesuseʼ? 2) ¿Baʼaxten jeʼel u páajtal k-aʼalik tak le naziʼob tu tsʼáajoʼob cuenta tsʼoʼok k-kʼubikba tiʼ Jéeobaoʼ?
9 ¿Bix unaj k-beetik baʼax u kʼáat Jéeoba jeʼel bix tu beetil Jesuseʼ? Jesuseʼ tu yaʼalaj tiʼ u disipuloʼob: «Wa yaan máax u kʼáat u tsaypachteneʼ, maʼ u yóotikuba jumpuliʼ yéetel u chʼaʼa u cheʼil u mukʼyaj yéetel u tsaypachten mantatsʼ» (Mateo 16:24, NM). Teʼ tekstoaʼ, Jesuseʼ tu chʼaʼachiʼitaj óoxpʼéel baʼal jach kʼaʼabéet k-beetik. Yáaxeʼ tu yaʼalaj maʼ u yóotikuba máak jumpuliʼ, leloʼ u kʼáat u yaʼal u tsʼáaik máak juntséelil u luʼumkabil tsʼíibolaloʼob yéetel u chaʼik u nuʼuktaʼal tumen baʼax ku yaʼalik Dios. U kaʼapʼéel baʼax tu yaʼaleʼ letiʼe k-chʼaʼik u cheʼil k-muʼyajoʼ. Tu kʼiiniloʼob Jesuseʼ, ken uʼuyaʼak u yaʼalaʼal u cheʼil muʼyajeʼ, ku taasik tu tuukul máak yaayaj óolalil yéetel subtsilil. Toʼon túuneʼ unaj k-óotikeʼex muʼyaj yoʼolal le maʼalob péektsiloʼ (2 Timoteo 1:8). Kex ka pʼaʼastakoʼon yéetel kex ka aʼalaktoʼon baʼaleʼ, jeʼex Cristoeʼ, toʼoneʼ maʼ unaj k-beetik u cuentailiʼ, baʼaxeʼ unaj u kiʼimaktal k-óol tumen k-ojel táan k-beetik baʼax ku yaʼalik Dios (Hebreob 12:2). Yéetel tu tsʼookeʼ, Jesuseʼ tu yaʼalaj unaj k-tsaypachtik «mantatsʼ» (Salmo 73:26; 119:44; 145:2).
10 Tak yaʼab tiʼ le máaxoʼob u pʼekmoʼonoʼoboʼ ku tsʼáakoʼob cuenta tsʼoʼok k-kʼubikba tiʼ Jéeoba utiaʼal k-beetik baʼax ku yaʼalik. Jeʼex tu luʼumil Alemania, tu kʼiinil le naziʼoboʼ, tiʼ upʼéel kúuchil ku kʼaabaʼtik Buchenwald, tuʼux kʼalaʼan yaʼab j-jaajkunajoʼob kaʼacheʼ, tiʼ le sukuʼunoʼob maʼ tu yóotkoʼob u pʼat u meyajtkoʼob Jéeobaoʼ ku beetaʼal kaʼach u firmarkoʼob upʼéel juʼun ku yaʼalik: «Láayliʼ utúulen tiʼ le máaxoʼob ku xokikoʼob le Biblia u kʼubmubaʼob tiʼ Jéeobaoʼ yéetel mix bikʼin kun pʼáatal maʼ in tsʼoʼokbesik le baʼax in waʼalmaj tiʼ Jéeobaoʼ». Le tʼaanoʼobaʼ, ¡jach maʼalob u yeʼeskoʼob le bix u tuukul tuláakal le máaxoʼob u kʼubmubaʼob tiʼ Dios yéetel jach chúukaʼan u yóoloʼob u yuʼuboʼob u tʼaanoʼ! (Beetaʼanoʼob 5:32.)
Ka weʼesik utúul u j-jaajkunajech Jéeoba
11. ¿Baʼax ku kʼuchul u beetubaʼob le máaxoʼob ku yokjaʼoboʼ?
11 Tu kaʼapʼéel kʼáatchiʼ ku beetaʼal tiʼ le kun okjaʼoboʼ ku kʼáataʼaltiʼob wa táan u naʼatkoʼob ikil kun okjaʼobeʼ yaan u yeʼeskoʼob u j-jaajkunajoʼob Jéeoba. Ken jóoʼkoʼob teʼ jaʼ ken tsʼoʼokok u yokjaʼoboʼ ku kʼuchul u beetubaʼob ministroʼob kʼamaʼanoʼob tumen Jéeoba utiaʼal ku biskoʼob u kʼaabaʼ. Lelaʼ upʼéel baʼal jach maʼalob, baʼaleʼ maʼ chéen báaxliʼ. Tsʼoʼoleʼ ikil u yokjaʼobeʼ ku yantaltiʼob u páajtalil u kuxtaloʼob utiaʼal minaʼan u xuul wa ku chúukpajal u yóoloʼob tiʼ Jéeoba (Mateo 24:13).
12. ¿Baʼax ku páaʼtaʼal tiʼ le máaxoʼob bisik u kʼaabaʼ Jéeobaoʼ?
12 K-kʼaj óoltaʼal bey u j-jaajkunajoʼon Jéeobaeʼ upʼéel baʼal jach jatsʼuts. Le profeta Miqueasoʼ tu yaʼalaj: «Tuláakal le kaajaloʼoboʼ yaan u máanoʼob tu kʼaabaʼ u diosoʼob, baʼaleʼ toʼoneʼ yaan k-máan tu kʼaabaʼ Jéeoba k-Dios, utiaʼal yaʼabach kʼiinoʼob yéetel utiaʼal minaʼan u xuul» (Miqueas 4:5, NM). Baʼaleʼ yaan baʼax ku páaʼtaʼal ka k-beet ikil k-bisik u kʼaabaʼ Dios: le bix k-kuxtaloʼ kʼaʼabéet u taasik tsiikil tiʼ Jéeoba. Jeʼex tu yaʼalil Pablo tiʼ le cristianoʼob yanoʼob Romaoʼ, wa maʼ t-tsʼáaik ichil k-kuxtal le baʼax k-kʼaʼaytikoʼ, jeʼel k-beetik u yúuchul tʼaan «kʼaas tu contra [Jajal Dioseʼ]» (Romailoʼob 2:21-24).
13. Le máaxoʼob u kʼubmubaʼob tiʼ Jéeobaoʼ, ¿baʼaxten unaj u tʼaanoʼob tiʼ letiʼ?
13 Ken u beetuba máak u j-jaajkunaj Jéeobaeʼ ku éejemtik yaan u tʼaan tiʼ Jéeoba. Tiʼ u úuchben kaajil Israeleʼ Jéeobaeʼ tu yaʼalajtiʼob ka u beetubaʼob u j-jaajkunajoʼob utiaʼal ka u kʼaʼaytoʼob chéen letiʼ u jaajil Dios (Isaías 43:10-12, 21). Baʼaleʼ u kaajil Israeleʼ maʼ tu beetiʼ, le oʼolal jáaw u kʼamaʼaloʼob tumen Dios bey u kaajaleʼ. Bejlaʼeʼ, tiʼ toʼoneʼ ku taasik kiʼimak óolal k-tʼaan tiʼ Jéeoba. Lelaʼ k-beetik tumen k-jach yaabiltmaj yéetel tumen k-kʼáat ka kiliʼichkuntaʼak u kʼaabaʼ. Maʼ tu páajtal u pʼaatal maʼ k-aʼalik u jaajil tu yoʼolal Jéeoba yéetel tu yoʼolal baʼax u tukulmaj u beetik. K-uʼuyikba jeʼex tu yuʼubiluba le apóstol Pablo, le ka tu yaʼalaj: «Jach unaj in beetik. ¡Óotsilen wa maʼ tin tseʼektik le maʼalob péektsiloʼ!» (1 Corintoiloʼob 9:16).
14, 15. 1) ¿Baʼax jach kʼaʼabéettoʼon utiaʼal k-muʼukʼaʼankuntik k-oksaj óolal? 2) ¿Baʼax áantajiloʼob ku tsʼaʼabaltoʼon utiaʼal maʼ u lúubul k-óol meyajt Dios?
14 U kaʼapʼéel kʼáatchiʼ ku beetaʼal tiʼ le máaxoʼob kun okjaʼoboʼ ku kʼaʼajsik xan tiʼob unaj u múul meyajoʼob yéetel u kaajal Dios ku nuʼuktik yéetel máakoʼob u tsʼaamaj u kiliʼich muukʼ tiʼoboʼ. Maʼ tu páajtal k-meyajtik Dios chéen t-juunal, kʼaʼabéet k-áantaʼal yéetel u líiʼsaʼal k-óol tumen «le sukuʼunoʼob» teʼ múuchʼuliloʼ (1 Pedro 2:17; 1 Corintoiloʼob 12:12, 13). Jach kʼaʼabéettoʼon u yáantaj le máaxoʼob nuʼuktik u kaajal Dios utiaʼal k-maas muʼukʼankúuntik k-oksaj óolaloʼ. Letiʼobeʼ ku tsʼáaikoʼobtoʼon yaʼab libroʼob, revistaʼob yéetel uláakʼ baʼaloʼob utiaʼal k-maas naʼatik baʼax u kʼáat Dios, utiaʼal ka k-ojéelt bix jeʼel k-aktáantik le talamiloʼoboʼ yéetel utiaʼal k-ilik bix jeʼel k-maas natsʼikba tiʼ Dioseʼ. Jeʼex utúul maamatsil ku yilik ka janak maʼalob u paalaleʼ, «le palitsil chúukpajaʼan u yóol yéetel yaan u naʼat[oʼ]» jach tu yorai ku tsʼáaiktoʼon yaʼab áantajoʼob ku keʼetel yéetel janal utiaʼal k-maas natsʼikba tiʼ Jéeoba (Mateo 24:45-47; 1 Tesalonicailoʼob 2:7, 8).
15 Teʼ muchʼtáambaloʼob ku beetaʼal cada semanaoʼ ku tsʼaʼabaltoʼon kaʼansajiʼ yéetel ku líiʼsaʼal k-óoliʼ. Tuláakal lelaʼ jach kʼaʼabéettoʼon utiaʼal u chúukpajal k-óol k-meyajt Jéeoba (Hebreob 10:24, 25). Teʼ tu muchʼtáambalil Kaambalil utiaʼal Kaʼansajoʼ ku kaʼansaʼaltoʼon bix unaj k-tʼaan tu táan uláakʼ máakoʼob, tu Muchʼtáambalil Kʼaʼaytaj xaneʼ ku kaʼansaʼaltoʼon bix jeʼel k-kʼaʼaytaj maas maʼalobeʼ. Le muchʼtáambaloʼob ku yantaltoʼonoʼ, bey xan le libroʼob, le revistaʼob yéetel le uláakʼ áantajoʼob ku tsʼaʼabaltoʼonoʼ, jach ku yeʼeskoʼobeʼ Jéeobaeʼ táan u nuʼuktik u kaajal yéetel u kiliʼich muukʼ. Tuláakal lelaʼ ku tsʼaʼabaltoʼon tumen Dios utiaʼal k-kanáantikba tiʼ baʼaloʼob jeʼel u beetiktoʼon kʼaaseʼ, utiaʼal k-kaʼansaj tubeel yéetel utiaʼal maʼ u xuʼulul k-tsʼáaik k-óol meyajte (Salmo 19:7, 8, 11; 1 Tesalonicailoʼob 5:6, 11; 1 Timoteo 4:13).
Le baʼax péeksik máak utiaʼal ka okjaʼanakoʼ
16. ¿Baʼax péekskoʼon k-kʼub kuxtal tiʼ Jéeoba?
16 Jeʼex tsʼoʼok k-ilkoʼ, le kaʼapʼéel kʼáatchiʼob ku beetaʼal tiʼ le máaxoʼob kun okjaʼoboʼ ku kʼaʼajsiktiʼob baʼax u kʼáat u yaʼal le okjaʼ ken u beetoʼoboʼ yéetel baʼax ku páaʼtaʼal ka u beetoʼob. Baʼaleʼ ¿baʼax péeksik máak utiaʼal ka okjaʼanak? Toʼoneʼ mix máak túulchʼinkoʼon utiaʼal ka okjaʼanakoʼon, baʼaxeʼ k-beetik tumen Jéeoba natsʼkoʼon tiʼ letiʼ (Juan 6:44). «Jajal Dioseʼ yaakunaj», le oʼolal u kʼáat ka k-meyajt tumen k-yaabiltmaj, maʼ tumen táan k-túulchʼintaʼal k-beetiʼ (1 Juan 4:8). Jéeobaeʼ ku náatsʼkoʼon tu yiknal yéetel le u jatsʼuts modos ku yeʼeskoʼ. Tu tsʼáaj xan u juntúuliliʼ Paal t-oʼolal yéetel u kʼáat ka yanaktoʼon kuxtal minaʼan u xuul (Juan 3:16). Le oʼolal toʼoneʼ ku taaktal k-kʼubik kuxtal tiʼ letiʼ (Proverbios 3:9; 2 Corintoiloʼob 5:14, 15).
17. ¿Tiʼ máax tsʼoʼok k-kʼubikba?
17 Toʼoneʼ maʼ t-kʼubakba tiʼ upʼéel meyajiʼ, t-kʼubakba tiʼ Jéeoba. Kex Jéeoba yaan ora ku kʼexik le meyaj ku tsʼáaik tiʼ máaxoʼob meyajtikoʼ, baʼaleʼ le baʼax t-aʼalaj ka t-kʼubakba tiʼ letiʼoʼ maʼ tu kʼexpajal. Jeʼex tiʼ Abraham yéetel tiʼ Jeremíaseʼ yáanal baʼax tu kʼáataj tiʼ cada utúul ka u beete (Génesis 13:17, 18; Jeremías 1:6, 7). Baʼaleʼ tu kaʼatúulal tu beetoʼob jach jeʼel bix aʼalaʼabiktiʼob tumen Diosoʼ, tumen u yaabiltmoʼob yéetel tumen jach u kʼáat u beetoʼob baʼax ku yaʼalik. Teʼ tu tsʼook kʼiinoʼob xanaʼ, toʼon tsʼoʼok k-okjaʼ jeʼex tu yaʼalil Cristoeʼ, k-tsʼáaik k-óol utiaʼal k-kʼaʼaytik u maʼalob péektsilil le Reinooʼ yéetel k-beetik kaambaloʼoboʼ (Mateo 24:14; 28:19, 20). U chúukpajal k-óol beet le meyajaʼ upʼéel bix k-eʼesik k-yaabiltmaj Jéeoba yéetel jach tu jaajil tsʼoʼok k-kʼubikba tiʼ letiʼ (1 Juan 5:3).
18, 19. 1) Ken okjaʼanakoʼoneʼ, ¿bey baʼax táan k-aʼalik tu táan u maasileʼ? 2) ¿Baʼax ken k-il teʼ tuláakʼ xookoʼ?
18 Jeʼex túun k-ilkoʼ, k-kʼamik yaʼab utsiloʼob ikil k-okjaʼ, baʼaleʼ maʼ unaj k-ilik chéen bey upʼéel báaxaleʼ (Lucas 14:26-33). Ken okjaʼanakoʼoneʼ, k-eʼesik tsʼoʼok chʼaʼatuklik meyajtik Jéeoba, le baʼax maas kʼaʼanan tiʼ tuláakal baʼaloʼ (Lucas 9:62). Ken okjaʼanakoʼoneʼ bey ka k-aʼal tu táan u maasileʼ: «[Jéeobaeʼ letiʼ] k-Jajal [Dios] utiaʼal jaʼaboʼob minaʼan u xul. Letiʼ bisikoʼon utiaʼal jaʼaboʼob minaʼan u xul» (Salmo 48:14).
19 Le uláakʼ xookoʼ yaan u núukik uláakʼ kʼáatchiʼob yaan yil yéetel le okjaʼoʼ: ¿Yaan wa baʼax jeʼel u beetik maʼ u yokjaʼ wa máaxeʼ? ¿Tak jaypʼéel jaʼaboʼob unaj u yantal tiʼ máak utiaʼal u páajtal u yokjaʼ? ¿Bix jeʼel k-eʼesik tsiikil tu yorai le okjaʼoʼ?
¿Jeʼel wa u páajtal a tsolkeʼ?
• Táanil tiʼ u yokjaʼ máakeʼ, ¿baʼaxten kʼaʼabéet tsʼoʼok u pʼatik tuláakal baʼax maʼ maʼalobiʼ?
• ¿Baʼax u kʼáat u yaʼal u kʼubikuba máak tiʼ Dios?
• ¿Baʼaxoʼob ku páaʼtaʼal ka u beet le máaxoʼob bisik u kʼaabaʼ Jéeobaoʼ?
• ¿Baʼax unaj u péeksik máak utiaʼal ka okjaʼanak?
[U kʼáatchiʼiloʼob le xookoʼ]
Foto yéetel cuadro yaan teʼ táan juʼun 28
Le kaʼapʼéel kʼáatchiʼob ku beetaʼal tiʼ le máaxoʼob kun okjaʼoboʼ
Tu yoʼolal u kʼiʼikʼel Cristo tu wekajoʼ, ¿tsʼoʼok wa a pʼatik le baʼaloʼob maʼ maʼalobtak ka beetik kaʼachoʼ, tsʼoʼok wa a kʼubik a kuxtal tiʼ Jéeoba utiaʼal a beetik baʼax u kʼáat?
Úuchik a kʼubik a kuxtal tiʼ Dios yéetel ikil a kaʼaj okjaʼeʼ, ¿ka naʼatik wa táan a weʼesik utúul u j-jaajkunajech Jéeoba táakaʼanech ichil u kaajal ku nuʼuktik yéetel u kiliʼich muukʼoʼ?
[Foto yaan teʼ táan juʼun 29]
K-kʼubikba tiʼ Jéeoba ken k-aʼal tiʼ ich payalchiʼ táan k-kʼubik k-kuxtal tiʼ letiʼ
[Foto yaan teʼ táan juʼun 31]
Ken kʼaʼaytajnakoʼoneʼ k-eʼesik tsʼoʼok k-kʼubikba tiʼ Dios