Táakbesaʼab uláakʼ kaʼatúul sukuʼunoʼob ichil le Cuerpo Gobernanteoʼ

TU JAʼATSKABIL miércoles 24 tiʼ agosto tiʼ 2005, tiʼ le sukuʼunoʼob ku meyajoʼob tu Betelil Estados Unidos yéetel Canadaoʼ, tsʼaʼab u yojéeltoʼobeʼ le 1 tiʼ septiembre tiʼ 2005, yaan u káajal u meyaj uláakʼ kaʼatúul sukuʼunoʼob ichil le Cuerpo Gobernanteoʼ, u kʼaabaʼobeʼ: Geoffrey W. Jackson yéetel Anthony Morris III.

Le sukuʼun Jacksonoʼ, káaj u beetik u precursori tu mesil febrero tiʼ 1971 tu kaajil Tasmania (tu luʼumil Australia). Letiʼeʼ tsʼoʼok u beel yéetel Jeanette (Jenny) tu mesil junio tiʼ 1974, yéetel maʼ úuch tiʼ leloʼ, yéeyaʼaboʼob utiaʼal u beet u precursor especialiloʼob. Tu jaʼabil 1979 tak 2003, tu beetaj u misioneroiloʼob tu islai Tuvalu, Samoa yéetel Fiji, teʼ Pacífico suroʼ. Le tiaʼanoʼob teʼ islaʼobaʼ áantajnajoʼob utiaʼal u jóoʼsaʼal libros, revistaʼob, yéetel uláakʼ jóoʼsaʼaniloʼob tiʼ le Biblia ichil le tʼaan ku beetaʼaloʼoboʼ. Tu jaʼabil 1992, le sukuʼun Jacksonoʼ, táakpaj ichil u Comitei u Sucursalil Samoa, yéetel tu jaʼabil 1996, tiʼ Fiji. Tu jaʼabil xan 2003, binoʼob meyaj tu Betelil Estados Unidos, teʼelaʼ meyajnajoʼob teʼ Departamento tiʼ Servicios tiʼ Traducción. Maʼ úuch túun káajak u meyajoʼobeʼ, le sukuʼun Jacksonoʼ yéeyaʼab utiaʼal u yáant le Comité tiʼ Enseñanza tiʼ le Cuerpo Gobernanteoʼ.

Le sukuʼun Morrisoʼ, káaj u beetik u precursori tu jaʼabil 1971 tu luʼumil Estados Unidos. Tu mesil diciembre teʼ jaʼab xan jeʼeloʼ, tsʼoʼok u beel yéetel Susan, ka seguernaj u beetik u precursoriloʼob ich óoliʼ kampʼéel jaʼaboʼob, baʼaleʼ tu pʼatoʼob le ka yanchaj Jesse, u chan hijoʼob. Ku máan kʼiineʼ yanchaj uláakʼ utúul u hijoʼob, u kʼaabaʼeʼ Paul. Sukuʼun Morriseʼ tu kaʼa chʼaʼajoʼoltaj xan u precursori tu jaʼabil 1979, u yataneʼ tu kaʼa chʼaʼajoʼoltaj xan u beetik u precursorai le ka joʼopʼ u bin u mejen paalaloʼob xook. Le sukuʼun Morrisoʼ binoʼob kajtal yéetel u familia tu kaajil Rhode Island yéetel Carolina del Norte (EE.UU.), tumen teʼ noj kaajoʼobaʼ maas kʼaʼabéet áantajiʼ. Sukuʼun Morriseʼ tu beetaj u sustitutoi tiʼ superintendente tiʼ circuito tu kaajil Carolina del Norte, u paalaloʼob xaneʼ tu beetaj u precursoriloʼob. Ka tu tsʼáaj 19 jaʼaboʼo tiʼ Jesse yéetel tiʼ Pauleʼ invitartaʼaboʼob meyaj tu Betelil Estados Unidos. Teʼ kʼiinoʼob xan jeʼeloʼ sukuʼun Morriseʼ káaj u beetik u superintendentei tiʼ circuito. Tu jaʼabil 2002, letiʼ yéetel u yataneʼ invitartaʼaboʼob xan meyaj tu najil Betel, teʼelaʼ káaj u meyajoʼob 1 tiʼ agosto. Sukuʼun Morriseʼ meyajnaj teʼ Departamento tiʼ Servicio yaan Pattersonoʼ, yéetel ka máan kʼiineʼ meyajnaj xan teʼ Comité tiʼ Servicio tiʼ le Cuerpo Gobernanteoʼ.

Uláakʼ sukuʼunoʼob xan yanoʼob ichil le Cuerpo Gobernanteoʼ, letiʼ leloʼobaʼ: C. W. Barber, J. E. Barr, S. F. Herd, M. S. Lett, G. Lösch, T. Jaracz, G. H. Pierce, A. D. Schroeder, D. H. Splane yéetel D. Sydlik. Tuláakal le sukuʼunoʼob yanoʼob ichil le Cuerpo Gobernanteoʼ láaj yéeyaʼanoʼob utiaʼal u binoʼob kaʼan.