Jéeobaeʼ ku tsʼáaik ojéelbil «baʼax ku taal u kʼiin maʼiliʼ úuchukeʼ»
Jéeobaeʼ ku tsʼáaik ojéelbil «baʼax ku taal u kʼiin maʼiliʼ úuchukeʼ»
«[Teneʼ] kin waʼalik baʼax ku taal tu tsʼook kʼiin; kin waʼalik baʼax ku taal u kʼiin maʼiliʼ úuchukeʼ.» (ISAÍAS 46:10.)
1, 2. ¿Baʼax aʼalaʼab yoʼolal Babilonia, yéetel leloʼ baʼax ku yeʼesik yoʼolal Jéeoba?
UPʼÉEL u áakʼabil tiʼ u jaʼabil 539 táanil tiʼ u taal Cristoeʼ, u soldadoiloʼob medopersiaeʼ táan kaʼach u máanskoʼob u áalkab jaʼi Éufrates utiaʼal ka kʼuchkoʼob tu noj kaajil Babilonia. Ka kʼuchoʼob tu joolil le kaajoʼ, jaʼakʼ u yóoloʼob ka tu yiloʼob pʼataʼan jeʼekʼabil u joonailoʼob. Letiʼob túuneʼ ookoʼob ichil le kaajoʼ ka tu xuʼulsoʼob tiʼ. Ka tsʼoʼokeʼ Ciro, u nojchil le soldadoʼoboʼ, joʼopʼ u gobernar yóokʼol le kaajoʼob tsʼoʼok u tsʼáaikoʼob yáanal u páajtaliloʼoboʼ, tsʼoʼoleʼ maʼ sen úuch káajak u gobernareʼ, tu yaʼalaj ka jáalkʼabtaʼak le israelitaʼob palitsiltaʼanoʼoboʼ. Óoliʼ túun tu jaʼabil 537 táanil tiʼ u taal Cristoeʼ, u milesi israelitaʼobeʼ suunajoʼob Jerusalén utiaʼal u jel líiʼskoʼob u templo Jéeoba (2 Crónicas 36:22, 23; Esdras 1:1-4).
2 Le máaxoʼob ku xokkoʼob le baʼaxoʼob uchaʼantakoʼ ku yaʼalikoʼob xan jach jaaj le baʼax tsʼoʼok aʼalikaʼ. Baʼaleʼ, le baʼaloʼobaʼ úuch aʼalaʼak yaan u yúuchloʼob. Jéeobaeʼ, doscientos jaʼaboʼob táanil tiʼ u yúuchleʼ, tu beetaj u tsʼíibtaʼal tumen le profeta Isaías bix kun xuʼulsbil tiʼ u kaajil Babilonia (Isaías 44:24–45:7). Letiʼeʼ, maʼ chéen tu yaʼalaj bix kun xuʼulsbil tiʼiʼ, tu yaʼalaj xan u kʼaabaʼ le máax ken u xuʼuls tiʼ le kaajoʼ. * Jéeobaeʼ tu yaʼalaj tiʼ le israelitaʼoboʼ: «Kʼaʼajak tiʼ teʼex baʼaxoʼob tsʼoʼok u yúuchlaʼajal. Teneʼ [...], minaʼan in jeel; [...] minaʼan mix máak ketiken. Líikʼbal tu yáax chuuneʼ kin waʼalik baʼax ku taal tu tsʼook kʼiin; kin waʼalik baʼax ku taal u kʼiin maʼiliʼ úuchukeʼ» (Isaías 46:9, 10 yáax xéetʼ). Jeʼex túun k-ilkoʼ, Jéeobaeʼ utúul Dios ku páajtal u yojéeltik baʼax ku taal u kʼiinil.
3. ¿Baʼax kʼáatchiʼiloʼob ken k-il u núukiloʼob?
3 Jéeobaeʼ, ¿jach wa u yojel tuláakal baʼax kun úuchul? ¿U yojel wa tuláakal baʼax ken u beet cada utúul tiʼ toʼon? ¿Destinartaʼan wa máak tumen Dios desde ken síijik? Teʼ xookaʼ yéetel teʼ tuláakʼoʼ yaan k-ilik baʼax núukil ku tsʼáaik le Biblia tiʼ le kʼáatchiʼobaʼ bey xan tiʼ uláakʼ kʼáatchiʼob.
Jéeobaeʼ, utúul Dios ku yaʼalik baʼax ku taal u kʼiinil
4. ¿Tiʼ máax u taal le profecíaʼob tsʼíibtaʼanoʼob teʼ Bibliaoʼ?
4 Tumen Jéeoba u yojel baʼax ku taal u kʼiinileʼ, tu beetaj u tsʼíibtaʼal yaʼab profecíaʼob tumen máaxoʼob meyajt úuchil, utiaʼal k-ojéeltik baʼax u tukulmaj u beetik. Jéeobaeʼ ku yaʼalik: «Il a wileʼex bix béeychajik baʼaxoʼob tin [w]aʼalaj ku taal u kʼiinil, bejelaʼeʼ in kaʼaj in kʼaʼayt túumben péektsiloʼob; kin waʼalik tiʼ teʼex maʼiliʼ úuchukoʼobiʼ» (Isaías 42:9). ¿Máasaʼ jach maʼalob ikil u tsʼáaik k-ojéelt Jéeoba baʼax ken u beete?
5. ¿Baʼax unaj k-beetik ken k-ojéelt baʼax u tukulmaj u beetik Jéeoba?
5 Le profeta Amosoʼ ku yaʼaliktoʼon: «Mix juntéen ku beetik wa baʼax Yuumtsil wa maʼ tu tsʼáaik ojéeltbil tumen u palitsiloʼob le [profetaʼoboʼ]». Úuchileʼ, le máaxoʼob tsʼaʼab u yojéeltoʼob tumen Dios baʼax ken u beeteʼ unaj u tsáaikoʼob ojéeltbil le baʼax aʼalaʼabtiʼoboʼ. Tuukulnakoʼon tiʼ le baʼax tu yaʼalaj Amosaʼ: «¿Máax maʼ tu kikilankil tu yoʼolal sajakil, wa ku yáakam le leonoʼ?». Ken áakamnak le leonoʼ, ku péeksik wíinik yéetel baʼalcheʼ u beet wa baʼax; bey xan u yúuchul ken tʼaanak Jéeobaoʼ, le profetaʼoboʼ ku yuʼubkoʼob kʼaʼabéet u séeb tsʼáaikoʼob ojéeltbil le baʼax aʼalaʼabtiʼoboʼ, jeʼex tu beetil Amosoʼ. «¿Máax maʼ tu tʼaan tu kʼaabaʼ Yuumtsil, wa letiʼ aʼalik ka tʼaanak?» (Amós 3:7, 8.)
U «tʼaan» Jéeobaeʼ ku béeychajal
6. ¿Bix béeychajik le baʼax u yaʼalmaj Dios tu yoʼolal Babiloniaoʼ?
6 Jéeobaeʼ tu beetaj u tsʼíibtaʼal tumen le profeta Isaíasoʼ: «Bíin béeychajak in [tuukuloʼob]; teneʼ kin beetik tuláakal baʼax kin tsʼáaikimba in beete» (Isaías 46:10 tsʼook xéetʼ). Utiaʼal u béeykuntik baʼax u tukulmeʼ, Jéeobaeʼ tu beetaj u lukʼul Ciro tu luʼumil Persia utiaʼal u bin u xuʼuls tiʼ Babilonia. Jéeobaeʼ úuchiliʼ u yaʼal kaʼach baʼax ken u beet tiʼ Babiloniaeʼ, yéetel jeʼex tsʼoʼok k-ilkoʼ béeychaj tu jaʼabil 539 táanil tiʼ u taal Cristo.
7. ¿Baʼax eʼesiktoʼon mantatsʼ ku béeychajal u «tʼaan» Jéeoba?
7 Óoliʼ cuatrocientos jaʼaboʼob táanil tiʼ u xuʼulsaʼal tiʼ Babilonia tumen Ciroeʼ, Josafat (Jehosafat), u reyil Judaeʼ baʼatelnaj tu contra u kaajiloʼob Amón yéetel Moab. Le reyaʼ jach tu kʼubaj u yóol tiʼ Jéeoba, le beetik tu yaʼalaj tiʼ: «¡Teech u [...] [Diosil] kaʼan, teech [gobernartik] tuláakal múuchʼ kaajoʼob! ¡Ta kʼab yaan muukʼ yéetel páajtalil: mix máak jeʼel u páajtal u baʼateʼel ta wéeteleʼ!» (2 Crónicas 20:6). Isaíaseʼ tu yaʼalaj xan: «Yuumtsil u yuumil tuláakal páajtalileʼ tsʼoʼok u yaʼalik u beetik. Mix máak bíin páatak u wetʼik tiʼ [wa u yaʼalik tiʼ maʼ u beetik]. U kʼabeʼ táan u yeʼesik jeʼel u jaatsʼeʼ, mix máak bíin beetik u kʼexpajal u tuukul» (Isaías 14:27). Ka máan yaʼab jaʼaboʼobeʼ, Nabucodonosor, u reyil Babiloniaeʼ, le ka utschaj tiʼ u kʼojaʼanileʼ tu yaʼalaj: «Mix máak ku páajtal u kʼatik u beel u páajtalil [Dios,] mix u kʼáatchiʼitik baʼaxten ku beetik beyoʼ» (Daniel 4:35). Tsʼoʼoleʼ Jéeobaeʼ ku yaʼalik tiʼ u kaajal: «Le tʼaan ku jóokʼol tin chiʼoʼ, maʼ bíin kaʼa suunak tin wiknal wa maʼ u beet u meyajiʼ, baʼaleʼ bíin u beet baʼax in [kʼáat], bíin xan u tsʼoʼokbes baʼax kin waʼalik» (Isaías 55:11). Tuláakal lelaʼ ku yeʼesiktoʼoneʼ u «tʼaan» Jéeobaeʼ mantatsʼ ku béeychajal. Le baʼax u tukulmoʼ maʼ tu pʼáatal maʼ u béeytal.
Le baʼax «u tukultmaj [Dios] tu yáax chuunil[oʼ]»
8. ¿Baʼax u kʼáat u yaʼal le tʼaan tu yaʼalaj le apóstol Pablo tiʼ le efesoiloʼoboʼ?
8 Tiʼ le tsʼíibil juʼun tu túuxtaj le apóstol Pablo tiʼ le cristianoʼob yanoʼob Efesooʼ, tu yaʼalajeʼ yaan baʼax «u tukultmaj [u beetik Dios] tu yáax chuunil» (Efesios 3:11, LTN). Lelaʼ maʼ u kʼáat u yaʼal wa Jéeobaeʼ ku kutal u tukult baʼax ken u beet utiaʼal u béeykuntik baʼax u kʼáat. Baʼaxeʼ u kʼáat u yaʼaleʼ Dioseʼ u yojliliʼ yaan u béeykuntik baʼax u tukulmaj utiaʼal le yokʼol kaab yéetel utiaʼal le wíinikoʼoboʼ (Génesis 1:28). Utiaʼal k-ilik mantatsʼ ku béeychajal baʼax u tukulmaj Dioseʼ kʼaʼabéet xakʼaltik le yáax profecía tsʼíibtaʼan teʼ Bibliaoʼ.
9. ¿Baʼax yaan yil Génesis 3:15 yéetel le baʼax u tukulmaj u beetik Diosoʼ?
9 Génesis 3:15 ku yaʼalikeʼ le ka tsʼoʼok u kʼebantal Adán yéetel Evaeʼ, Jéeobaeʼ tu yaʼaleʼ u yataneʼ (tuláakal le angeloʼob yanoʼob teʼ kaʼanoʼ) yaan u yantal u chʼiʼibal wa u descendencia. Tu yaʼalaj xan yaan u yantal upʼéel baʼateʼel ichil le koʼolel yéetel le Kʼaasilbaʼaloʼ, bey xan ichil u chʼiʼibaloʼob. Jéeobaeʼ tu yaʼaleʼ yaan u chiʼibil tu tuunkuy u Chʼiʼibal le koʼoleloʼ, baʼaleʼ tu yaʼalaj xaneʼ, ken kʼuchuk u kʼiinileʼ, le Chʼiʼibalaʼ yaan u peʼechaʼtik u pool le kaan, wa Satanasoʼ. Baʼaleʼ le maʼiliʼ kʼuchuk le kʼiin jeʼeloʼ, le baʼax u tukulmaj Diosoʼ, bin u béeytal tak ka síij Jesús, le Mesías aʼalaʼanoʼ (Lucas 3:15, 23-38; Galaciailoʼob 4:4).
Le baʼax u tukulmiliʼ Jéeoba ka úuchkoʼ
10. ¿Tu destinarta wa Jéeoba ka kʼebanchajak Adán yéetel Eva? Tsol baʼaxten bey a núukikoʼ.
10 Le ka tʼaanaj le apóstol Pedro tiʼ baʼax yaan yil Jesús yéetel baʼax u tukulmiliʼ Jéeoba u beetikoʼ, tu yaʼalaj: «Letiʼeʼ yéeyaʼaniliʼ maʼiliʼ beetaʼak yokʼol kaabeʼ, baʼaleʼ chíikbesaʼab tu tsʼok kʼiinoʼob tioʼolal yaakunaj tiʼ teʼex» (1 Pedro 1:20, LTN). ¿Tu destinarta wa Jéeoba ka kʼebanchajak Adán yéetel Eva utiaʼal ka kʼaʼabéetchajak u tsʼáaik u kuxtal Cristo utiaʼal u salvartik wíinikoʼob? Maʼatech. Le tʼaan «maʼiliʼ beetaʼak[oʼ]», ich griegoeʼ ku tsʼáaik naʼatbil maʼiliʼ yanak u paalal máakiʼ. ¿Yanchaj wa u paalal Adán yéetel Eva táanil tiʼ u kʼebantaloʼob? Maʼatech, tsʼokaʼaniliʼ u kʼebantaloʼob ka yanchaj u paalaloʼobeʼ (Génesis 4:1). Bey túunoʼ, ka tsʼoʼok u kʼebantal Adán yéetel Eva, le maʼ yanak u paalaloʼoboʼ, Jéeobaeʼ tu yaʼalaj yaan u yantal le «chʼiʼibal» ku yaʼalaʼal teʼ Génesis 3:15. Yéetel u kuxtal Jesús tu tsʼáaj t-oʼolaloʼ, Jéeobaeʼ tu tsʼáaj upʼéel boʼol utiaʼal u luʼsaʼal le kʼeban t-wíinkliloʼ yéetel utiaʼal u mixbaʼalkuntaʼal le baʼaxoʼob u beetmaj le Kʼaasilbaʼaloʼ (Mateo 20:28; Hebreob 2:14; 1 Juan 3:8).
11. ¿Baʼax uláakʼ tu yilaj Jéeoba ka úuchuk jeʼex u tukulmiloʼ?
11 Yaan xan uláakʼ baʼax u yaʼalmaj Jéeoba yaan u beetik u yúuchul jach jeʼex u tukulmiloʼ. Bey tu yeʼesil Pablo ka tu yaʼalaj tiʼ le efesoiloʼoboʼ «Jajal Dioseʼ yaan u nupik yáanal u páajtalil Cristoeʼ tuláakal baʼal, le yanoʼob kaʼanoʼ bey xan le yanoʼob luʼumoʼ». Tsʼoʼoleʼ le ka tʼaanaj tiʼ le baʼaloʼob «yanoʼob kaʼanoʼ» (le máaxoʼob yéeyaʼanoʼob utiaʼal u gobernaroʼob yéetel Cristooʼ), tu yaʼalaj: «Jajal Dioseʼ tu yéeyajoʼon maʼiliʼ yanakoʼoneʼ utiaʼal k-kʼamik le jaats k-tiaʼalintikoʼ tiʼ le baʼax kun u tsʼáa letiʼoʼ; tuláakal lelaʼ maʼalob yanil yéetel baʼax u tukultmaj Jajal Dios» (Efesoiloʼob 1:10, 11). Jeʼex túun k-ilkoʼ, Jéeobaeʼ tu yaʼalaj yaan u yantal junmúuchʼ máakoʼob yaan u táakpajloʼob ichil u chʼiʼibal le «koʼoleloʼ» yéetel yaan u taaskoʼob yéetel Cristo yaʼab utsiloʼob way yóokʼol kaabeʼ (Romailoʼob 8:28-30). Le apóstol Pedrooʼ ku yaʼalikeʼ letiʼobeʼ «jumpʼéel kaaj kiliʼich» (1 Pedro 2:9). Tiʼ le apóstol Juanoʼ tsʼaʼab u yojéelteʼ 144,000 utúulal le máaxoʼob kun gobernaroʼob yéetel Cristooʼ (Apocalipsis 7:4-8; 14:1, 3). Junmúuchʼ yéetel le Rey, Cristooʼ, ku meyajoʼob «utiaʼal ka kiʼikiʼtʼantaʼak Jajal Dios tu yoʼolal u nojbeʼenil» (Efesoiloʼob 1:12-14).
12. ¿Bix k-ojéeltik Jéeobaeʼ maʼ u destinarma cada utúul tiʼ le 144,000 máakoʼoboʼ?
12 Kex tumen Jéeoba tu yaʼalaj yaan u yantal 144,000 máakoʼob kun gobernaroʼob yéetel Cristoeʼ, leloʼ maʼ u kʼáat u yaʼal wa tu destinartaj cada utúul tiʼ letiʼob utiaʼal maʼ u xuʼulul u kʼubik u yóoloʼob tiʼ letiʼ. Lelaʼ k-ilik beyaʼ tumen le Kiliʼich Tsʼíiboʼob ich Griegooʼ tsʼíibtaʼab utiaʼal u nuʼuktaʼal yéetel utiaʼal u líiʼsaʼal u yóol le máaxoʼob kun binoʼob kaʼanoʼ, utiaʼal beyoʼ ka chúukpajak u yóoloʼob u meyajtoʼob Dios (Filiposiloʼob 2:12; 2 Tesalonicailoʼob 1:5, 11; 2 Pedro 1:10, 11). Jéeobaeʼ u yojliliʼ yaan u yantal 144,000 máakoʼob kun meyajoʼob tiʼ utiaʼal u béeykuntik baʼax u tukulmaj. ¿Jach máaxoʼobiʼ? Lelaʼ yaan u yojéeltaʼal tak ken ilaʼak baʼax tu beetaj yéetel u kuxtal le máaxoʼob tsʼoʼok u invitartaʼaloʼob utiaʼal u binoʼob kaʼanoʼ; letiʼob kun yéeyik wa yaan u chúukpajal u yóoloʼob u meyajtoʼob Dios (Mateo 24:13).
Le baʼax u yojel Jéeoba kex maʼiliʼ úuchkoʼ
13, 14. ¿Baʼax ku chíikbesik le bix u meyaj tiʼ Jéeoba u páajtalil u yojéeltik baʼax ku taal u kʼiiniloʼ, yéetel baʼaxten?
13 Jéeoba, le Dios ku yaʼalik profecíaʼob, le Dios yaan baʼax u tukulmaj u beetkoʼ, ¿bix u meyaj le páajtalil yaan tiʼ utiaʼal u yojéeltik baʼax ku taal u kʼiiniloʼ? Yáaxeʼ k-ojleʼ tuláakal baʼax ku beetik Dioseʼ jach maʼalob yéetel ku beetik yoʼolal u yaabilaj. Teʼ yáax siglooʼ, le ka tsʼíibnaj Pablo tiʼ le ebreoʼoboʼ, tu yaʼaleʼ «Jajal Dioseʼ maʼ tu páajtal u tuus» ken u yaʼal upʼéel baʼal (Hebreob 6:17, 18). Le ka tsʼíibnaj xan tiʼ Titoeʼ, letiʼeʼ tu kaʼa aʼaleʼ Jéeobaeʼ «maʼ tu tuus» (Tito 1:2).
14 Tsʼoʼoleʼ, kex Jéeoba tuláakal ku páajtal u beetikeʼ, mix utéen ku beetik baʼax maʼ maʼalobiʼ. Moiseseʼ tu yaʼalaj tu yoʼolal: «Letiʼ u [Diosil] jaaj tiʼ letiʼeʼ minaʼan baʼax maʼ tu beeliʼ, ¡letiʼeʼ [toj baʼax ku beetik], letiʼ xan u jaajil!» (Deuteronomio 32:4). Tuláakal baʼax ku beetkeʼ ku chíikbesik bix letiʼ. Tiʼ tuláakal le baʼaloʼob ku beetkoʼ ku yeʼesik u yaabilaj, u naʼatil, u justicia yéetel u páajtalil.
15, 16. ¿Baʼax tu yaʼalaj Jéeoba tiʼ Adán teʼ tu jardinil Edenoʼ?
15 Koʼox ilik bix tu yeʼesil Jéeoba u jatsʼuts modos teʼ tu jardinil Edenoʼ. Yoʼolal u nojoch yaabilajeʼ Jéeobaeʼ tu tsʼáaj tiʼ le yáax wíinikoʼob baʼax kʼaʼabéettiʼoboʼ. Tu tsʼáaj tiʼ Adán u páajtalil u tuukul yéetel u yilik baʼax maʼalob ka u beete. Adán kaʼacheʼ maʼ jeʼex le baʼalcheʼoboʼ, tumen tiʼ letiʼeʼ tsʼaʼan u páajtalil u yéeyik baʼax ken u beete. Le oʼolaleʼ, le ka tu yilaj Dios «tuláakal baʼax tu beetajoʼ» tu yileʼ «sen maʼalob» (Génesis 1:26-31; 2 Pedro 2:12).
16 Le ka tu yaʼalaj Jéeoba tiʼ Adán maʼ u jaantik «u cheʼil u kʼaj [óolalil] uts yéetel kʼaas[eʼ]», tu tsʼáaj nuʼuktajoʼob tiʼ utiaʼal u yojéeltik baʼax unaj u beetik. Tu yaʼalaj tiʼeʼ jeʼel u páajtal u jaantik «u yich tuláakal u cheʼiloʼob le kúuchil[oʼ]», chéen upʼéel maʼ unaj u jaantik u yichiʼ, yéetel tu yaʼalaj tiʼ yaan u kíimil wa ku jaantik (Génesis 2:16, 17). Jeʼex k-ilkoʼ Jéeobaeʼ tu yaʼalaj tiʼ Adán baʼax kun úuchul wa maʼ tu yuʼubik tʼaan. ¿Baʼax túun ken u beet kaʼach le yáax wíinikoʼ?
17. ¿Baʼaxten jeʼel u páajtal k-aʼalikeʼ Jéeoba yéeyik wa yaan u yojéeltik baʼax ku taal u kʼiin wa maʼ?
17 Jéeobaeʼ kex jeʼel u páajtal kaʼach u yojéeltik baʼax ken u beet Adán yéetel Evaeʼ, jeʼel u páajtal k-aʼalikeʼ maʼ tu beetiʼ. Jeʼex túun k-ilkoʼ kex Jéeoba ku páajtal u yojéeltik baʼax ku taal u kʼiineʼ, letiʼ yéeyik wa yaan u beetik wa maʼ. Tsʼoʼoleʼ, tumen Jéeoba utúul Dios jach yaan yaabilaj tiʼeʼ k-ojleʼ maʼ tu destinarta Adán yéetel Eva utiaʼal ka kʼebanchajkoʼob yéetel ka muʼyajnakoʼob tu yoʼolaliʼ (Mateo 7:11; 1 Juan 4:8). Jeʼex túun k-ilkoʼ, Jéeoba yéeyik wa yaan u yilik baʼax ku taal u kʼiin wa maʼ.
18. U yéeyik Jéeoba, wa yaan u yilik baʼax ku taal u kʼiineʼ, ¿u kʼáat wa túun u yaʼal minaʼan u sen páajtalil wa yaan baʼax maʼ tu páajtal u beetik maʼalob?
18 Wa Jéeoba, yaan kʼiin, ku yéeyik maʼ u yilik baʼax ku taal u kʼiineʼ, ¿u kʼáat wa túun u yaʼaleʼ, Jéeobaeʼ minaʼan u sen páajtalil wa yaan baʼax maʼ tu páajtal u beetik maʼalob? Maʼatech. Moiseseʼ tu yaʼaleʼ tuláakal «u meyajoʼob» Jéeobaeʼ «sen maʼalobtak». Tuláakal le talamiloʼob ku aktáantik wíinikoʼ maʼ Dios beetik u yantaliʼ, le talamiloʼobaʼ káaj u yantal le ka kʼebanchaj le yáax wíinikoʼoboʼ. Le apóstol Pablooʼ bey tu yeʼesil le ka tu yaʼalaj: «Tu yoʼolal juntúuliliʼ máak j-ook le kʼeban tiʼ le yóokʼol kaabaʼ ka tu taasaj yéeteleʼ le kíimiloʼ, bey xan máanik xan le kíimiloʼ tiʼ tuláakal máakoʼob tumen tuláakal kʼebanchaajoʼob» (Deuteronomio 32:4, 5; Romailoʼob 5:12; Jeremías 10:23).
19. ¿Baʼax kʼáatchiʼiloʼob ken k-núuk teʼ tuláakʼ xookoʼ?
19 Jeʼex tsʼoʼok ilik túunoʼ, Jéeobaeʼ utúul Dios jach toj tiʼ tuláakal baʼax ku beetik (Salmo 33:5). Le oʼolaleʼ, u páajtalil, u jatsʼuts modos yéetel u leyoʼobeʼ ku yáantajoʼob utiaʼal u béeykuntik baʼax u tukulmaj (Romailoʼob 8:28). Jéeoba, le Dios ku yaʼalik profecíaʼoboʼ, ku yaʼalik «baʼax ku taal tu tsʼook kʼiin» yéetel ku yaʼalik «baʼax ku taal u kʼiin maʼiliʼ úuchukeʼ» (Isaías 46:9, 10). Tsʼoʼok xan k-ilikeʼ letiʼ yéeyik wa yaan u yojéeltik baʼax ku taal u kʼiin wa maʼ. Baʼaleʼ ¿baʼax unaj u péekskoʼon k-beet le baʼax tsʼoʼok kanikaʼ? ¿Bix jeʼel k-ojéeltik wa le baʼax tsʼoʼok k-chʼaʼatuklik k-beetkoʼ letiʼ le baʼax u kʼáat Dios ka k-beetoʼ? ¿Baʼax utsiloʼob ken k-kʼam wa k-beetik baʼax utstutʼaan Dios? Le uláakʼ xookoʼ yaan u núukik le kʼáatchiʼobaʼ.
[Tsolajiloʼob]
^ xóot’ol 2 Ilaʼak le t.j. 28 tiʼ le folleto Un libro para todo el mundo, beetaʼan tumen u j-jaajkunajoʼob Jéeoba.
¿Jeʼel wa u páajtal a tsolkeʼ?
• ¿Baʼax eʼesiktoʼon mantatsʼ ku béeychajal u «tʼaan» Jéeoba?
• ¿Baʼax tu yilaj Jéeoba ka úuchuk jeʼex u tukulmiloʼ?
• ¿Bix u meyaj tiʼ Jéeoba le páajtalil yaan tiʼ utiaʼal u yojéeltik baʼax ku taal u kʼiiniloʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 24]
Josafateʼ jach tu kʼubaj u yóol tiʼ Jéeoba
[U tsolajil le oochel teʼ táan juʼun 25]
Dioseʼ tu yaʼalaj yaan u kíimsaʼal yéetel yaan u kaʼa kuxkíintaʼal Jesús
[U tsolajil le oochel teʼ táan juʼun 26]
¿Tu destinarta wa Jéeoba ka kʼebanchajak Adán yéetel Eva?