¿Táan wa a beetik baʼax kʼaʼabéet utiaʼal a salvarkaba?
¿Táan wa a beetik baʼax kʼaʼabéet utiaʼal a salvarkaba?
«Ichil tuláakal le máakoʼob yanoʼob tiʼ le kʼiinoʼobaʼ, chéen teech ka kuxtal jach jeʼel bix in kʼáateʼ. Tu yoʼolal leloʼ ooken yéetel a paalal ichil le cheemoʼ.» (GÉNESIS 7:1.)
1. Tu kʼiiniloʼob Noeiʼ, ¿baʼax tu tsʼáaj Jéeoba utiaʼal u salvarkuba wíinikoʼob?
TU KʼIINILOʼOB Noeiʼ, Jéeobaeʼ «tu túuxtaj le búulkabal tu yóokʼol le kʼasaʼan máakoʼoboʼ», baʼaleʼ yaan baʼax tu tsʼáaj utiaʼal u páajtal u salvarkuba wíinikoʼob (2 Pedro 2:5). Dioseʼ tu yaʼalaj tiʼ Noé bix ken u beetil upʼéel arca kun meyaj utiaʼal u salvarkuba wíinikoʼob tiʼ le Búulkabaloʼ (Génesis 6:14-16). «Noé túuneʼ tu beetaj tuláakal baʼax aʼalaʼab tiʼ tumen» Jajal Dios. Jeʼex túun k-ilkoʼ, ikil tu yuʼubaj tʼaan Noeiʼ kuxaʼanoʼon tak bejlaʼeʼ (Génesis 6:22).
2, 3. 1) ¿Baʼax tu beetaj le máakoʼob tu kʼiiniloʼob Noeoʼ? 2) ¿Baʼax jach u yojel Noé le ka ook teʼ arcaoʼ?
2 Maʼ chéen chʼaʼabil úuchik u beetaʼal le arcaoʼ. Maʼ xaneʼ yaʼab máakoʼob jaʼakʼ u yóoloʼob le ka tu yiloʼob le meyaj táan kaʼach u beetik Noé yéetel u familiaoʼ; baʼaleʼ kex beyoʼ maʼ tu yóotoʼob u creertoʼob unaj u yookloʼob teʼ arca utiaʼal u salvarkubaʼoboʼ. Tu tsʼookeʼ u máakiloʼob le kʼasaʼan yóokʼol kaaboʼ tu náaksoʼob u yóol Jéeoba (Génesis 6:3; 1 Pedro 3:20).
3 Ka tsʼoʼok u máan yaʼab jaʼaboʼob táan u meyaj yéetel u familiaeʼ, tiʼ Noeiʼ aʼalaʼab tiʼ tumen Dios: «Ichil tuláakal le máakoʼob yanoʼob tiʼ le kʼiinoʼobaʼ, chéen teech ka kuxtal jach jeʼel bix in kʼáateʼ. Tu yoʼolal leloʼ ooken yéetel a paalal ichil le cheemoʼ». Noeiʼ jach u yojel kaʼach yaan u béeychajal le baʼax aʼalaʼabtiʼoʼ, le oʼolaleʼ «j-ook yéetel u paalal, u yatan bey xan u yiliboʼob ichil le cheem» wa arcaoʼ. Jéeoba túuneʼ utiaʼal u kanáantik Noé yéetel u familiaeʼ tu kʼalaj u joonai le arcaoʼ. Le ka búul tuláakal le Luʼumoʼ, le arca tu yaʼalaj Dios ka beetaʼakoʼ le meyajnaj utiaʼal u salvarkuba Noé yéetel u familiaoʼ (Génesis 7:1, 7, 10, 16).
U kʼiiniloʼob Noeiʼ chíikaʼanoʼob tiʼ k-kʼiinoʼob
4, 5. 1) ¿Baʼax yéetel tu ketaj Jesús u kʼiiniloʼob u «taalbal»? 2) ¿Tiʼ baʼax chíikaʼan u kʼiiniloʼob Noé tiʼ k-kʼiinoʼob?
4 «Jeʼel bix úuchik tu kʼiiniloʼob Noeeʼ, bey xan bíin úuchuk le ken taalak u Paal Máak.» (Mateo 24:37.) Yéetel le tʼaanoʼobaʼ, Jesuseʼ tu yaʼaleʼ u kʼiiniloʼob Noeiʼ jach chíikaʼanoʼob tiʼ le kʼiinoʼob kun ilbil ken «taalak» wa ken káajak u gobernaroʼ. Leloʼ jach bey tsʼoʼok u béeychajloʼ, tumen maases desde tu jaʼabil 1919 káaj u kʼaʼaytaʼal upʼéel baʼal jeʼex le tu kʼaʼaytaj Noeoʼ; baʼaleʼ le máakoʼoboʼ láayliʼ maʼ tu beetkoʼob baʼax ku yaʼalaʼaltiʼob jeʼex úuchik tu kʼiiniloʼob Noeoʼ.
5 Jéeobaeʼ tu taasaj le Búulkabal utiaʼal u xuʼulsik le kʼasaʼan máakoʼoboʼ, tumen le Luʼumaʼ jach chuup kaʼach yéetel «yaʼabkach loobiloʼob» (Génesis 6:13). Tu kʼiiniloʼob Noeiʼ tuláakal le máakoʼoboʼ u yojloʼobeʼ Noé yéetel u familiaeʼ maʼ táakaʼanoʼob tiʼ le loobiloʼob ku beetaʼaloʼ, u yojloʼob xaneʼ chéen tiaʼanoʼob tu paach u meeyjil le arcaoʼ. Lelaʼ jach chíikaʼan xan tiʼ baʼax ku yúuchul teʼ kʼiinoʼobaʼ. Bejlaʼeʼ le máaxoʼob uts u puksiʼikʼaloʼoboʼ ku yilkoʼob «u jelaʼanil máax uts tiʼ máax kʼasaʼan bey xan máax [adorartik] Yuumtsil tiʼ máax maʼ tu [adorartik]» (Malaquías 3:18). Le máaxoʼob meyajtik Diosoʼ kʼaj óolaʼanoʼob bey máaxoʼob maʼatech u yookoloʼob, ku yeʼesik u yutsiloʼob, maʼatech u yokskubaʼob tiʼ baʼateloʼob yéetel ku tsʼáaik u yóoloʼob meyaj, le oʼolaleʼ le máaxoʼob maʼ chich u puksiʼikʼaloʼoboʼ ku tʼaanoʼob maʼalob tiʼ u kaajal Dios. U j-jaajkunajoʼob Jéeobaeʼ u pʼekmoʼob u beetaʼal loob yéetel ku chaʼik u nuʼuktaʼaloʼob tumen u kiliʼich muukʼ Dios, le oʼolal yaan jeetsʼelil ichiloʼob yéetel ku beetkoʼob baʼax uts (Isaías 60:17).
6, 7. 1) U yéet kʼiiniloʼob Noeiʼ, ¿baʼax maʼ tu yóotaj u éejemtoʼobiʼ, yéetel bix xan u yúuchul teʼ kʼiinoʼobaʼ? 2) ¿Baʼax eʼesik u j-jaajkunajoʼob Jéeobaeʼ jelaʼanoʼob tiʼ máaxoʼob maʼatech u nuʼuktik u kuxtaloʼob yéetel le Bibliaoʼ?
6 U yéet kʼiiniloʼob Noeiʼ maʼ tu yóotoʼob u éejemtoʼob wa Jéeoba áantikiʼ, mix xan tu yóotoʼob u éejemtoʼob wa táan u beetik kaʼach baʼax aʼalaʼan tiʼ tumen Diosiʼ; le oʼolal tu tukloʼob maʼ jaaj baʼax ku kʼaʼaytik Noeiʼ yéetel maʼ tu beetoʼob baʼax ku yaʼalikiʼ. ¿Maʼ wa bey xan u yúuchul bejlaʼoʼ? Kex yaʼab máakoʼob ku jaʼakʼal u yóoloʼob yoʼolal le meyaj k-beetik yéetel yoʼolal bix k-kuxtaloʼ, óoliʼ tuláakloʼobeʼ maʼatech u creerkoʼob wa jaaj le baʼax k-kʼaʼaytikoʼ. Maʼ xaneʼ yaan tiʼ k-vecinoʼob, k-patronoʼob wa k-láakʼtsiloʼobeʼ ku tʼaanoʼob maʼalob tiʼ le jatsʼuts modos ku yeʼesik le máaxoʼob meyajtik Jéeobaoʼ, baʼaleʼ ken tsʼoʼokkeʼ ku yaʼalikoʼob: «Lastima j-jaajkunajoʼob tiʼ Jéeoba». Le máakoʼobaʼ maʼ tu tsʼáaikoʼob cuenta wa le yaabilaj, le jeetsʼelil, le utsil yéetel le chúukaʼan óolal k-eʼesikoʼ ku páajtal k-eʼesik tumen táan k-nuʼuktaʼal tumen u kiliʼich muukʼ Dios (Galaciailoʼob 5:22-25). Lelaʼ unaj u beetik u creerkoʼob le baʼax k-kʼaʼaytikoʼ.
7 Utéenjeakileʼ, u j-jaajkunajoʼob Jéeoba tiʼ upʼéel u noj kaajil Rusiaeʼ táan kaʼach u beetkoʼob upʼéel u Najil Reinoeʼ ka jeʼel utúul máak tsikbal yéetel utúul tiʼ le sukuʼunoʼob táan u meyajoʼob teʼeloʼ. Le máakoʼ tu yaʼalaj: «¡Maʼ túun tuláakal tuʼux ku páajtal u yilaʼal baʼal beyaʼ! Mix máak táan u tsʼuʼutsʼ chamal, mix máak táan u yaʼalik baʼaloʼob kʼaastak yéetel mix máak u yukʼmaj táan u meyajiʼ. ¿Maʼ wa ta tʼaan utúul u j-jaajkunajech Jéeobaiʼ?» Le sukuʼunoʼ tu yaʼalaj tiʼ: «Wa ka in waʼaltech maʼatecheʼ, ¿jeʼel wa a creerkeʼ?», le máak túunoʼ tu núukaj: «Maʼatan». Tiʼ uláakʼ upʼéel u noj kaajil Rusiaeʼ, le presidenteoʼ jach jaʼakʼ u yóol le ka tu yilaj bix u beetaʼal upʼéel Najil Reino tumen u j-jaajkunajoʼob Jéeoba. Letiʼeʼ tu yaʼaleʼ ku tuklik kaʼacheʼ le religionoʼoboʼ upʼéeliliʼ bixoʼob, baʼaleʼ le ka tu yilaj bix u tsʼáaik u yóol meyaj u j-jaajkunajoʼob Jéeobaeʼ jelpaj bix u tuukul. Lelaʼ chéen jujumpʼéel baʼax eʼesik u j-jaajkunajoʼob Jéeobaeʼ jelaʼanoʼob tiʼ máaxoʼob maʼatech u nuʼuktik u kuxtaloʼob yéetel baʼax ku yaʼalik le Bibliaoʼ.
8. ¿Baʼax unaj k-beetik utiaʼal k-salvartikba tiʼ le xuʼulsajil kun taaloʼ?
8 Yaʼab jaʼaboʼob táanil tiʼ u xuʼulsaʼal tiʼ «le úuchben yóokʼol kaab» teʼ Búulkabaloʼ, Noeiʼ chúukpaj u yóol u kʼaʼayt «toj kuxtal» (2 Pedro 2:5). Teʼ tu tsʼook kʼiinoʼob pʼaatal tiʼ le kʼasaʼan yóokʼol kaabaʼ u kaajal Dioseʼ táan xan u tsʼáaik kʼaj óoltbil u leyoʼob Dios yéetel táan xan u kʼaʼaytik jeʼel u salvarkuba máak tiʼ le xuʼulsajiloʼ yéetel u kajtal tiʼ upʼéel paraíso (2 Pedro 3:9-13). Tsʼoʼoleʼ, jeʼex le arca meyajnaj utiaʼal u salvarkuba Noé yéetel u familiaeʼ, bejlaʼa xaneʼ chéen jeʼel u páajtal k-salvartikba wa yantoʼon oksaj óolal wa fe yéetel chéen wa tiaʼanoʼon ichil u kaajal Jéeobaeʼ.
Kʼaʼabéettoʼon oksaj óolal utiaʼal k-salvartikba
9, 10. ¿Baʼaxten jach kʼaʼanan u yantal oksaj óolal tiʼ máak utiaʼal ka u salvartuba tiʼ le xuʼulsajiloʼ?
9 ¿Baʼax unaj u beetik máak utiaʼal u salvarkuba tiʼ le xuʼulsajil kun taal yóokʼol u kʼasaʼan yóokʼol kaab Satanasoʼ? (1 Juan 5:19.) Yáaxeʼ, unaj k-éejemtik kʼaʼabéet kanáantaʼal yéetel k-kʼamik le áantaj ku tsʼaʼabaltoʼon utiaʼal k-kanáantaʼaloʼ. Tu kʼiiniloʼob Noeiʼ, le máakoʼoboʼ maʼ tu tsʼáajoʼob cuenta wa kʼaʼabéet u kanáantaʼaloʼob tiʼ le xuʼulsajil kun taaloʼ, le oʼolal seguernaj u kuxtaloʼob jeʼel bix suukiltiʼobeʼ. Uláakʼ baʼax maʼ tu beetoʼob xaneʼ: maʼ anchaj u oksaj óolaloʼob tiʼ Diosiʼ.
10 Baʼaleʼ, Noé yéetel u familiaeʼ tu éejemtoʼob kʼaʼabéet áantaj tiʼob, yéetel tu yoksaj óoltoʼob Jéeoba Dios, u Yuumil tuláakal baʼal. Le apóstol Pablooʼ tu tsʼíibtaj: «Maʼ tu páajtal u lúubul máak utsil tu táan Jajal Dios wa minaʼan [u] oksaj óolal, tumen utiaʼal u natsʼikuba máak tiʼeʼ, kʼaʼabéet u yoksaj óoltaʼal yaan Jajal Dios yéetel letiʼeʼ ku boʼotik le máaxoʼob kaxtikoʼ. Tu yoʼolal le oksaj óolaloʼ Noeeʼ, le ka j-aʼalaʼab tiʼ tumen Jajal Dios bíin u kaʼaj úuchul baʼaloʼob maʼiliʼ páatak u yilaʼaloʼobeʼ, tu yuʼubaj tʼaan ka tu beetaj le cheem utiaʼal u tokik u yotochoʼ. Tu yoʼolal anji u yoksaj óolaleʼ, tu xotʼkʼintaj le máaxoʼob yóokʼol kaabiloʼoboʼ yéetel j-kʼaʼam bey utúul máak toj tu táan Jajal Dioseʼ, tu yoʼolal le oksaj óolaloʼ» (Hebreob 11:6, 7).
11. ¿Baʼax kanik tiʼ le bix úuchik u kanáantik Jéeoba le máaxoʼob meyajt úuchiloʼ?
11 Utiaʼal k-salvartikba le ken xuʼulsaʼak le kʼasaʼan yóokʼol kaaboʼ, maʼ chéen unaj k-creertik yaan u xuʼulsaʼaliʼ, unaj u yantaltoʼon oksaj óolal tiʼ Dios yéetel k-jóoʼsik utsil tiʼ tuláakal le baʼaxoʼob ku tsʼáaiktoʼon Jéeoba utiaʼal k-salvartikbaoʼ. Tsʼoʼoleʼ, unaj xan u yantaltoʼon oksaj óolal tiʼ u kʼiʼikʼel Jesús tu wekaj t-oʼolal utiaʼal u salvarkoʼonoʼ (Juan 3:16, 36). Baʼaleʼ, unaj k-kʼaʼajsikeʼ chéen le máaxoʼob ookoʼob ichil le arca tu salvartubaʼob tiʼ le Búulkabaloʼ. Tu úuchben luʼumil Israel xaneʼ tsʼaʼab kaajoʼob utiaʼal u kanáantaʼal le máaxoʼob maʼ tu yóoliliʼob tu kíimsoʼob u yéet wíinikiloʼ, baʼaleʼ le máakoʼoboʼ unaj u binoʼob teʼ kaajoʼobaʼ yéetel unaj u pʼáatloʼob tak ken kíimik u nojchil le sacerdoteʼoboʼ (Números 35:11-32). Tu kʼiiniloʼob Moisés xaneʼ, le u tsʼook diez noj yajil tu taasaj Dios yóokʼol Egiptooʼ tu kíimsaj u yáax paalal le egipcioʼoboʼ, baʼaleʼ tiʼ u paalal le israelitaʼoboʼ maʼ úuch mix baʼal tiʼobiʼ. ¿Baʼaxten? Tumen Jéeobaeʼ tu yaʼalaj tiʼ Moisés: «Ka chʼaʼikeʼex u kʼiʼikʼel[ le tamanoʼ] ka kuʼultikeʼex tu x-pakʼab cheʼil u jool le naj tuʼux bíin a jaanteʼex le baʼalcheʼoʼ [...]. Mix utúul tiʼ teʼex unaj u jóokʼol tu yotoch maʼiliʼ sáaschajkeʼ» (Éxodo 12:7, 22). A tuklikeʼ, ¿yaan wa utúul tiʼ u yáax paalal le israelitaʼob jeʼel u yóotik jóokʼol tiʼ le naj kuʼultaʼan u kʼiʼikʼel le taman tu marcoi le joonajoʼ?
12. ¿Baʼax unaj k-tuklik, yéetel baʼaxten?
12 Jeʼex túun k-ilkoʼ, kʼaʼabéet k-jach tuklik baʼax táan k-beetik. ¿Táan wa k-jach jóoʼsik utsil tiʼ tuláakal le kaʼansaj ku tsʼáaik Jéeoba utiaʼal u kanáantkoʼonoʼ? Ken taalak túun le xuʼulsajiloʼ, le máaxoʼob tu kaxtoʼob ka kanáantakoʼob tumen Jéeobaoʼ yaan u jach kiʼimaktal u yóoloʼob yéetel yaan u tsʼáaikoʼob nib óolal tiʼ Jéeoba, baʼaleʼ u maasil máakoʼobeʼ yaan u yooʼloʼob yoʼolal le muʼyajil ken u máansoʼoboʼ.
Le kʼeexoʼob tsʼoʼok u yantaloʼoboʼ ku yáantkoʼonoʼob utiaʼal k-salvartikba
13. 1) ¿Baʼaxten tsʼoʼok u beetaʼal yaʼab kʼeexoʼob ichil u kaajal Jéeoba? 2) Aʼal baʼax kʼeexiloʼob tsʼoʼok u beetaʼal.
13 Jéeobaeʼ táan u bin u beetik kʼeexoʼob ichil u kaajal. Le kʼeexoʼobaʼ tsʼoʼok u meyajoʼob utiaʼal u maas maʼalobkíintaʼal bix u meyaj u kaajal u tsʼaamaj utiaʼal u kanáantkoʼonoʼ. Tu jaʼabil 1870 yéetel tak tu jaʼabil 1932, ku beetaʼal kaʼach votacionoʼob utiaʼal u yéeyaʼal máaxoʼob ken u beet u ancianoiloʼob yéetel u diáconoiloʼoboʼ. Baʼaleʼ teʼ jaʼab jeʼeloʼ, le múuchʼuliloʼoboʼ xuʼul u yéeykoʼob le ancianoʼob yéetel le diáconoʼoboʼ ka káaj u yéeykoʼob u múuchʼ sukuʼunoʼob utiaʼal ka múul meyajnakoʼob yéetel le sukuʼun nuʼuktik le kʼaʼaytaj kʼaj óolaʼan kaʼach bey director de serviciooʼ. Tuʼ jaʼabil 1938 jáaw u beetaʼal votacionoʼob utiaʼal u yéeyaʼal máaxoʼob ku nuʼuktajoʼob teʼ múuchʼuliloʼoboʼ. Yéetel desde tu jaʼabil 1972 tak bejlaʼeʼ, yáanal u nuʼuktaj le Cuerpo Gobernante tiʼ u j-jaajkunajoʼob Jéeobaoʼ, ku yaʼalaʼal máaxoʼob jeʼel u páajtal u beetik u ancianoiloʼob wa u siervo ministerialiloʼob, yéetel wa ku kʼaʼamloʼobeʼ ku túuxtaʼal upʼéel juʼun utiaʼal u tsʼaʼabal ojéelbil tiʼ le múuchʼuliloʼoboʼ. Jeʼex úuchik u bin u máan le jaʼaboʼoboʼ, bey xan binik u maas yaʼabtal le meyaj yaan tiʼ le Cuerpo Gobernanteoʼ, le oʼolal tsʼoʼok u beetaʼal kʼeexoʼob utiaʼal u páajtal u láaj beetkoʼob le meyaj kʼaʼabéetoʼ.
14. ¿Baʼax xookil káaj u tsʼaʼabal tu jaʼabil 1959?
14 Tu jaʼabil 1950, jach xakʼaltaʼab baʼax ku yaʼalik Salmo 45:16 ka chʼaʼatuklaʼab u kaʼansaʼal mantatsʼ máaxoʼob ku nuʼuktajoʼob teʼ múuchʼuliloʼoboʼ. Le tekstoaʼ ku yaʼalik: «A paalaloʼobeʼ, rey, yaan u kutaloʼob tu jalaʼach kʼáancheʼ a úuchben chʼiʼibaloʼob, yéetel yaan a beetik u jalaʼachtikoʼob [wa u gobernartikoʼob] tuláakal a kaajal» (Salmo 45:16, LSM). Le ancianoʼoboʼ táan u kaʼansaʼaloʼob utiaʼal ka u beetoʼob maʼalob u meyajoʼob bejlaʼeʼ bey xan ken tsʼoʼokok le Armagedonoʼ (Apocalipsis 16:14, 16). Tu jaʼabil 1959 káaj u yantal le Escuela del Ministerio del Reino. Le xokaʼ upʼéel mes ku xantal kaʼachi yéetel chéen utiaʼal le siervos de congregación, jeʼex kʼaj óolaʼanil kaʼach le superintendentes presidentesoʼ. Bejlaʼeʼ, le xookaʼ ku tsʼaʼabal tiʼ tuláakal le ancianoʼob yéetel siervo ministerialoʼoboʼ, letiʼob túuneʼ ku kaʼanskoʼob xan le sukuʼunoʼob teʼ múuchʼuliloʼoboʼ. Beyoʼ, tuláakal le sukuʼunoʼoboʼ ku kaʼansaʼaloʼob yéetel ku yáantaʼaloʼob utiaʼal ka u kʼaʼaytoʼob maas maʼalob u péektsilil le Reinooʼ (Marcos 13:10).
15. Aʼal kaʼapʼéel bix u kanáantaʼal le múuchʼuliloʼ.
15 Máaxoʼob u kʼáatoʼob antal ichil u kaajal Dioseʼ yaan baʼaxoʼob ku páaʼtaʼal ka u beetoʼob. Le máaxoʼob ku pʼaʼasoʼoboʼ maʼ tu chaʼabal u yookloʼob ichil u kaajal Dios jeʼex úuchik tiʼ le máakoʼob maʼ chaʼab u yokloʼob teʼ arca tu kʼiiniloʼob Noeoʼ (2 Pedro 3:3-7). Ku tsʼoʼokol xaneʼ, maases desde tu jaʼabil 1952, u j-jaajkunajoʼob Jéeobaeʼ ku éejemkoʼob ka jóoʼsaʼak ichil u kaajal Jéeoba le máaxoʼob tsʼoʼok u lúubloʼob tiʼ nojoch kʼeban yéetel maʼ tu yutskíintik u kuxtaloʼoboʼ, utiaʼal beyoʼ ka kanáantaʼak le múuchʼuliloʼ. Baʼaleʼ, le máaxoʼob ku yilik u yutskíintik u kuxtaloʼoboʼ ku yáantaʼaloʼob utiaʼal ka suunakoʼob teʼ «toj bejoʼ» (Hebreob 12:12, 13; Proverbios 28:13; Galaciailoʼob 6:1).
16. ¿Baʼax beetik u bin utsil tiʼ u kaajal Dios?
16 Yaan baʼax beetik u bin utsil tiʼ u kaajal Jéeoba. Letiʼeʼ tu yaʼalaj tiʼ le profeta Isaías ka u tsʼíibt le tʼaanoʼobaʼ: «In palitsiloʼobeʼ bíin yanak baʼal u jaantoʼob, baʼaleʼ teʼexeʼ bíin a mukʼyajteʼex wiʼij; letiʼobeʼ bíin yanak jaʼ u yukʼoʼob, baʼaleʼ teʼexeʼ bíin a mukʼyajteʼex ukʼaj; letiʼobeʼ bíin kiʼimakchajak u yóoloʼob, baʼaleʼ teʼexeʼ, bíin a chʼaʼex subtal; letiʼobeʼ bíin kʼaaynakoʼob yéetel u kiʼimak óolalil u puksiʼikʼaloʼob, baʼaleʼ teʼexeʼ, bíin awat okʼolnakeʼex yéetel u okʼom óolalil a yaj óoleʼex» (Isaías 65:13, 14). Jéeobaeʼ láayliʼ jach tu kʼiinil táan u tsʼáaiktoʼon yaʼabach kaʼansaj ku keʼetel yéetel maʼalob janal, utiaʼal beyoʼ ka muʼukʼaʼanchajkoʼon (Mateo 24:45).
Unaj k-beetik baʼax kʼaʼabéet utiaʼal k-salvartikba
17. ¿Baʼax kun áantkoʼon utiaʼal k-beetik baʼax kʼaʼabéet utiaʼal k-salvartikba?
17 Bejlaʼeʼ jach u kʼiinil «utiaʼal ka yanak toʼon yaakunaj [t-baatsil] yéetel utiaʼal k-beetik baʼax uts. Maʼ unaj k-ketikba yéetel le máaxoʼob suuk tiʼob maʼ u taaloʼob j-muchʼtal t-éeteliʼ, baʼaleʼ unaj k-líikʼ óoltikba t-baatsil» (Hebreob 10:23-25). Yaan k-beetik baʼax kʼaʼabéet utiaʼal k-salvartikba wa k-ilik maʼ k-náachkuntikba tiʼ k-múuchʼulil —upʼéel tiʼ le maas tiʼ noventaiocho mil yanoʼob way Luʼumeʼ— yéetel wa k-múul meyaj tu yéetel. Beyoʼ yaan k-áantaʼal tumen k-sukuʼunoʼob utiaʼal ka k-búukint «le túumben wíinikoʼ» yéetel utiaʼal k-kaʼansik tiʼ u maasil bix jeʼel k-jóoʼsik utsil tiʼ tuláakal le baʼaxoʼob ku tsʼáaiktoʼon Jéeoba utiaʼal k-salvartikbaoʼ (Efesoiloʼob 4:22-24; Colosailoʼob 3:9, 10; 1 Timoteo 4:16).
18. ¿Baʼaxten unaj k-chʼaʼatuklik maʼ k-náachtal tiʼ u kaajal Dios?
18 Kex Satanás yéetel u kʼasaʼan yóokʼol kaab u kʼáat u tusoʼonoʼob utiaʼal ka náachchajkoʼon tiʼ u kaajal Dioseʼ, jeʼel u páajtal k-antal náatsʼ tiʼ Dioseʼ yéetel jeʼel u páajtal k-salvartikba tiʼ le xuʼulsajil kun taaloʼ. Le yaabilaj k-uʼuyik tu yoʼolal Jéeoba yéetel tu yoʼolal le baʼaxoʼob ku tsʼáaiktoʼonoʼ, yaan u yáantkoʼon utiaʼal k-aktáantik tuláakal le talamiloʼob ku tsʼáaiktoʼon Satanasoʼ. K-tuukul xan tiʼ le utsiloʼob k-kʼamik bejlaʼoʼ jeʼel u yáantkoʼoneʼ. Teʼ tuláakʼ xookoʼ yaan k-ilik jujumpʼéel tiʼ le utsiloʼob tsʼoʼok k-kʼamikoʼ.
¿Baʼax jeʼel a núukikeʼ?
• ¿Tiʼ baʼax chíikaʼan k-kʼiinoʼob tiʼ u kʼiiniloʼob Noé?
• ¿Baʼax kʼaʼabéettoʼon utiaʼal k-salvartikba?
• Jéeobaeʼ, ¿baʼax kʼeexiloʼob tsʼoʼok u beetik u yantal ichil u kaajal u tsʼaamaj utiaʼal u kanáantkoʼonoʼ?
• ¿Bix jeʼel k-beetik baʼax kʼaʼabéet utiaʼal k-salvartikbaeʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 12]
U yéet kʼiiniloʼob Noeiʼ tu tukloʼob maʼ jaaj baʼax ku kʼaʼaytikiʼ
[U tsolajil le oochel teʼ táan juʼun 13]
U yoksaj óoltaʼal baʼax ku yaʼalik Dioseʼ ku taasik yaʼab utsiloʼob
[U tsolajil le oochel teʼ táan juʼun 14]
¿Baʼax u beelal le Escuela del Ministerio del Reinooʼ?
[U tsolajil le oochel teʼ táan juʼun 15]
Bejlaʼeʼ u kʼiinil utiaʼal maʼ k-náachkuntikba tiʼ u kaajal Jéeoba