Unaj u chúukpajal k-óol meyajt le Rey, Cristooʼ

«[Tiʼ letiʼeʼ] j-tsʼaʼab u páajtalil, u nojbeʼenil yéetel u [reino], u kajnáaliloʼob tuláakal le luʼumaʼ yéetel u tʼaanoʼobeʼ ku meyajtikoʼob.» (DANIEL 7:14.)

1, 2. ¿Baʼaxten k-ojel Cristoeʼ maʼ káaj u gobernar yóokʼol tuláakal le Luʼum teʼ Pentecostés tiʼ u jaʼabil 33?

¿MÁAX reyil jeʼel u tsʼáaik u kuxtal yoʼolal u kaajal yéetel ka kaʼa kuxlak utiaʼal u reinar tu kaʼatéeneʼ? ¿Máax reyil way Luʼum tsʼoʼok u lúubul utsil tiʼ u kaajal, tsʼoʼoleʼ ka xiʼik reinar desde teʼ kaʼanoʼ? Chéen Jesucristo tsʼoʼok u páajtal u beetik le baʼaloʼobaʼ (Lucas 1:32, 33). Teʼ Pentecostés tiʼ u jaʼabil 33, le ka suunaj Jesús teʼ kaʼanoʼ, Dioseʼ tu tsʼáaj u beet «u pool[il] tuláakal baʼal» yaan yil yéetel u kaajal (Efesoiloʼob 1:20-22; Beetaʼanoʼob [Hechos] 2:32-36). Bey túun káajik u gobernar Cristooʼ, baʼaleʼ maʼ yóokʼol tuláakal le Luʼumaʼ, chéen yóokʼol le máaxoʼob yéeyaʼanoʼob utiaʼal u binoʼob kaʼanoʼ, «le máaxoʼob jach u kaajaloʼob Jajal Diosoʼ» (Galaciailoʼob 6:16; Colosailoʼob 1:13).

² Óoliʼ 30 jaʼaboʼob máanak le Pentecostés tiʼ u jaʼabil 33, le apóstol Pablooʼ tu yaʼaleʼ Cristoeʼ maʼ káajak kaʼach u reinar utiaʼal u gobernar yóokʼol tuláakal le Luʼumaʼ; tu yaʼaleʼ tiaʼan kaʼach «tu x-noʼoj Jajal Dios[eʼ]. Tiʼ ku páaʼtaj tak ken tsʼaʼabak u j-pʼeekoʼob yáanal u yook[eʼ]» (Hebreob 10:12, 13). Tu tsʼoʼokbal le yáax siglooʼ, tiʼ le apóstol Juanoʼ tsʼaʼab u yil bix úuchik u tsʼáaik Jéeoba u beet u Reyil Jesús tiʼ le túumben Reino yaan teʼ kaʼanoʼ (Apocalipsis 11:15; 12:1-5). Bejlaʼeʼ jach yaʼab baʼax eʼesiktoʼon Cristoeʼ káaj u reinar teʼ kaʼan tu jaʼabil 1914. *

3. 1) Tu jaʼabil 1914, ¿baʼax káaj u kʼaʼaytaʼal ichil u maʼalob péektsilil le Reinooʼ? 2) ¿Baʼax kʼáatchiʼob maʼalob ka k-tukle?

³ Tu jaʼabil 1914, ichil u maʼalob péektsilil le Reinooʼ, káaj xan u kʼaʼaytaʼaleʼ Cristo, le Reyoʼ, tsʼoʼok u káajal u gobernar tu Reino Dios yaan teʼ kaʼanoʼ, baʼaleʼ káaj u gobernar chúumuk tiʼ máaxoʼob pʼekmai (Salmo 110:1, 2; Mateo 24:14; Apocalipsis 12:7-12). Tsʼoʼoleʼ, tiʼ tuláakal le Luʼumaʼ, le máaxoʼob chúukaʼan u yóoloʼob tiʼ Cristooʼ ku tsʼáaikubaʼob yáanal u páajtalil ikil u beetkoʼob upʼéel nojoch meyaj mix utéen beetaʼan (Daniel 7:13, 14; Mateo 28:18). Le máaxoʼob yéeyaʼanoʼob utiaʼal u binoʼob kaʼanoʼ, wa u «paalal» le Reinooʼ, ku tʼaanoʼob «tu kʼaabaʼ Cristo»; tsʼoʼoleʼ ku yáantaʼaloʼob xan tumen le yaʼab máakoʼob ku keʼetloʼob yéetel «uláakʼ j-tamanoʼob[oʼ]»; le máakoʼobaʼ ku yáantkoʼob le máaxoʼob kun binoʼob kaʼan utiaʼal u kʼaʼaytoʼob u Reino Diosoʼ (Mateo 13:38, LTN; 2 Corintoiloʼob 5:20; Juan 10:16). Kex wa tiaʼanoʼon ichil le máaxoʼob kun binoʼob kaʼan wa ichil le máaxoʼob kun pʼáatloʼob way Luʼumeʼ tuláakloʼon unaj k-ilik wa táan k-tsʼáaikba yáanal u páajtalil Cristo. Le oʼolaleʼ, maʼalob ka k-tukle: «¿Jach wa chúukaʼan in wóol in meyajt Cristo? ¿Bix jeʼel u páajtal in weʼesik chúukaʼan in wóol tiʼ Cristo wa letiʼ táan u beetik u Reyil desde teʼ kaʼanoʼ?». Yáaxeʼ koʼoneʼex ilik baʼaxten unaj u chúukpajal k-óol tiʼ Cristo.

Utúul Rey ku péekskoʼon k-eʼes chúukaʼan óolal tiʼ

4. ¿Baʼax tu beetaj Jesús le ka kuxlaj way Luʼumeʼ?

⁴ Toʼoneʼ ku chúukpajal k-óol tiʼ Cristo, tumen  jach nojoch baʼal k-tiaʼal tuláakal baʼax u beetmaj yéetel tumen jach jatsʼuts u modos (1 Pedro 1:8). Le baʼaxoʼob tu beetaj Jesús le ka kuxlaj way Luʼumeʼ, tu yeʼesaj baʼax ken u beet way yóokʼol kaab le ken kʼuchuk u kʼiinil u beetik u Reyiloʼ. Letiʼeʼ maʼ chéen tu tséentaj máakoʼob wiʼijtakoʼobiʼ, tu tsʼakaj xan kʼojaʼanoʼob, chʼóopoʼob, móochoʼob, kóokoʼob yéetel tootoʼob, yéetel tu kuxkíintaj kimenoʼob (Mateo 15:30, 31; Lucas 7:11-16; Juan 6:5-13). K-ojéeltik baʼax tu beetaj Jesús ka taal way Luʼumeʼ ku yáantkoʼon k-il bix le modos ken u yeʼes ken u beet u Reyil tu yóokʼol tuláakal le Luʼumaʼ, le maas nojoch modos yantiʼoʼ letiʼ le yaabilajoʼ (Marcos 1:40-45). Le oʼolal Napoleón Bonaparteiʼ tu yaʼalaj: «Alejandro, César, Carlomagno yéetel teneʼ gobernarnajoʼon yóokʼol yaʼab luʼumoʼob, baʼaleʼ ¿bix béeychajik k-tsʼáaik yáanal k-páajtalil tuláakal le luʼumoʼobaʼ? Obligartbil t-beetiloʼob. Chéen Jesucristo tsʼoʼok u beetik u tsʼáaikuba máakoʼob yáanal u Reino yoʼolal le yaabilaj ku yuʼubkoʼob tu yoʼolaloʼ, bejlaʼeʼ u millonesi máakoʼob jeʼel u yóotik u tsʼáa u kuxtaloʼob tu yoʼolal Jesuseʼ».

5. ¿Baʼaxten jach yaʼab máakoʼob tu natsʼubaʼob tiʼ Jesús?

⁵ Jesús kaʼacheʼ kabal u yóol yéetel chúukaʼan u yóol u puksiʼikʼal, le oʼolaleʼ le máaxoʼob jach lubaʼan u yóoloʼob yoʼolal u chiʼichnakiloʼob yéetel u talamiloʼob le kuxtaloʼ, ku líikʼil u yóoloʼob kaʼach yoʼolal u maʼalob kaʼansaj yéetel yoʼolal u jatsʼuts modos (Mateo 11:28-30). Tak le mejen paaloʼob utstutʼaanoʼob kaʼach u yantaloʼob tu yéeteloʼ, yéetel le máaxoʼob kabal u yóoloʼob yéetel uts u puksiʼikʼaloʼoboʼ taak kaʼach u beetkubaʼob u disipuloʼob (Mateo 4:18-22; Marcos 10:13-16). Yoʼolal le jatsʼuts modos yéetel le tsiikil tu yeʼesaj Jesusoʼ yaʼab koʼoleloʼob u yaabiltmoʼob Dioseʼ chúukpaj u yóoloʼob tiʼ letiʼ, yaan tak tiʼ letiʼobeʼ tu jóoʼsaj u tiempoʼob, tu xupaj u muukʼoʼob yéetel tu tsʼáajoʼob baʼaxoʼob yantiʼob utiaʼal u yáantkoʼob Jesús le táan u kʼaʼaytaj way Luʼumeʼ (Lucas 8:1-3).

6. ¿Bix úuchik u yeʼesik u nojoch yaabilaj Jesús le ka kíim Lázarooʼ?

⁶ U nojoch yaabilaj Jesuseʼ jach chíikpaj le ka kíim Lázaro, u amigooʼ. Jesuseʼ jach péeknaj u yóol ka tak «j-okʼolnaj» le ka tu yilaj jach táan u yoʼtaʼal Lázaro tumen Marta yéetel María. Letiʼeʼ jach «j-okʼomchaj u yóol» yéetel «j-péeknaj u yóol u puksiʼikʼal» úuchik u kíimil Lázaro, kex u yojel yaan kaʼach u kaʼa kuxkíintik. Tsʼoʼoleʼ, yoʼolal u nojoch yaabilaj yéetel u chʼaʼa óotsilaleʼ, Jesuseʼ tu kaʼa líiʼsaj Lázaro yéetel le nojoch páajtalil tsʼaʼan tiʼ tumen Diosoʼ (Juan 11:11-15, 33-35, 38-44).

7. ¿Baʼaxten unaj k-meyajtik Cristo yéetel chúukaʼan óolal? (Ilaʼak xan le cuadro yaan teʼ t.j. 7.)

⁷ K-ojéeltik Jesús jach tu yaabiltaj baʼax maʼalob yéetel jach tu pʼektaj baʼax maʼ maʼalobeʼ ku péekskoʼon k-tsʼáa upʼéel nojoch tsiikil tiʼ. Jesuseʼ maʼ tu chʼaʼaj saajkil u jóoʼsik le máaxoʼob ku koonoloʼob kaʼach teʼ templooʼ (Mateo 21:12, 13; Juan 2:14-17). Tsʼoʼoleʼ, le tiaʼan xan way Luʼumeʼ tu máansaj yaʼab muʼyajiloʼob, le oʼolal páajchaj u naʼatik le talamiloʼob yéetel le chiʼichnakiloʼob ku muʼyajtik le wíinikoʼoboʼ (Hebreob 5:7-9). Jesuseʼ pʼektaʼabi yéetel aʼalaʼab baʼaloʼob maʼ jaajtak tu yoʼolaliʼ (Juan 5:15-18; 11:53, 54; 18:38–19:16). Tsʼoʼoleʼ, maʼ tu chʼaʼaj saajkil u muʼyajtik upʼéel yaayaj kíimil, utiaʼal u tsʼoʼokbesik baʼax u yaʼalmaj u Taataiʼ yéetel utiaʼal u tsʼáaik kuxtal minaʼan u xuul tiʼ wíinikoʼobiʼ (Juan 3:16). Tuláakal le baʼax tsʼoʼok k-kanik yoʼolal Cristoaʼ, ¿máasaʼ unaj u péekskoʼon k-meyajt yéetel chúukaʼan óolal? (Hebreob 13:8; Apocalipsis 5:6-10.) Baʼaleʼ ¿baʼax unaj k-beetik utiaʼal k-antal yáanal u Reino?

Baʼax unaj k-beetik utiaʼal k-antal yáanal u Reino Cristo

8. ¿Baʼax ku páaʼtaʼal tiʼ máaxoʼob u kʼáatoʼob antal yáanal u Reino Cristo?

⁸ Tuukulnakoʼon tiʼ lelaʼ: utiaʼal u chaʼabal tiʼ máak u pʼáatal kajtal tiʼ upʼéel luʼumileʼ, maʼ xaaneʼ jeʼel u kʼáataʼal tiʼ ka u beet baʼax ku yaʼalik u leyiloʼob le luʼum jeʼeloʼ, yéetel maʼ xan xaneʼ, kʼaʼabéet u yilaʼal wa minaʼan wa baʼax kʼojaʼanil tiʼ. Bey xanoʼ, le máaxoʼob u kʼáatoʼob antal yáanal u Reino Cristooʼ kʼaʼabéet u beetkoʼob baʼax ku yaʼalik u leyoʼob Dios yéetel u muʼukʼantal u oksaj óolaloʼob wa u fejoʼob (1 Corintoiloʼob 6:9-11; Galaciailoʼob 5:19-23).

9. ¿Bix jeʼel k-eʼesik chúukaʼan k-óol tiʼ Cristoeʼ?

⁹ Jesucristoeʼ, tiʼ tuláakal máaxoʼob u kʼáatoʼob antal tu yáanal u gobernacioneʼ, ku kʼáatik xan ka chúukpajak u yóoloʼob tiʼ letiʼ yéetel tiʼ u Reino,  lelaʼ ku yeʼeskoʼob ikil u tsʼáaik ichil u kuxtaloʼob tuláakal le baʼax tu kaʼansaj le ka taal way Luʼumeʼ. Letiʼobeʼ maʼ tu tsʼáaikoʼob táanil u kaxkoʼob ayikʼaliloʼob, baʼaxeʼ ku tsʼáaikoʼob táanil le Reinooʼ yéetel u beetkoʼob baʼax ku yaʼalik Dios (Mateo 6:31-34). Tsʼoʼoleʼ, kex táan u máanskoʼob talamiloʼobe,ʼ ku jach yilik u yeʼeskoʼob ichil u kuxtaloʼob le jatsʼuts modos tu yeʼesaj Jesusoʼ (1 Pedro 2:21-23). Jeʼex túun k-ilkoʼ, le máaxoʼob u kʼáatoʼob antal yáanal u Reino Cristoeʼ ku yáantkoʼob uláakʼ máakoʼob jeʼex tu beetil letiʼoʼ (Mateo 7:12; Juan 13:3-17).

10. ¿Bix jeʼel k-eʼesik chúukaʼan k-óol tiʼ Cristo 1) ichil k-familia yéetel 2) teʼ múuchʼuliloʼ?

¹⁰ Uláakʼ bix jeʼel k-eʼesik chúukaʼan k-óol tiʼ Jesuseʼ, letiʼe k-eʼesik jatsʼuts modos ichil k-familiaoʼ. Le íichamtsiloʼoboʼ ku yeʼeskoʼob chúukaʼan u yóoloʼob tiʼ Jesús ken u tratartoʼob maʼalob u yatanoʼob yéetel u paalaloʼob, jeʼex úuchik u beetik Cristo yéetel u disipuloʼoboʼ (Efesoiloʼob 5:25, 28-30; 6:4; 1 Pedro 3:7). Le atantsiloʼob xanoʼ, ku yeʼeskoʼob chúukaʼan u yóoloʼob tiʼ Cristo ikil u yeʼeskoʼob tsiikil yéetel ikil u yeʼeskoʼob «jumpʼéel chʼujuk jéetsʼel óol[al]» (1 Pedro 3:1-4; Efesoiloʼob 5:22-24). Le paalaloʼob xanoʼ ku yeʼeskoʼob chúukaʼan u yóoloʼob tiʼ Cristo ken u yuʼuboʼob tʼaan jeʼex tu beetil Jesuseʼ; letiʼeʼ, tu paalileʼ, tu yuʼubaj u tʼaan u taataʼob kex kʼeban wíinkoʼob (Lucas 2:51, 52; Efesoiloʼob 6:1). Tsʼoʼoleʼ, le máaxoʼob u kʼáatoʼob antal yáanal u Reino Cristoeʼ ku paklan chʼaʼa óotsiltikubaʼob, ku yaabilkubaʼob «jeʼel bix sukuʼunoʼobeʼ» yéetel ku yantaltiʼob upʼéel utsul puksiʼikʼal jeʼex yanchajik tiʼ Cristoeʼ. Ku yilik xan u yeʼeskoʼob «kabal óolal» jeʼex letiʼeʼ, yéetel maʼatech u sutikoʼob «kʼaas tu yoʼolal kʼaas, mix poochʼil tu yoʼolal poochʼil» (1 Pedro 3:8, 9; 1 Corintoiloʼob 11:1).

Unaj k-tsʼoʼokbesik u ley Cristo

11. ¿Baʼax leyiloʼob nuʼuktik u kuxtal le máaxoʼob u kʼáatoʼob antal yáanal u Reino Cristooʼ?

¹¹ Jeʼex le máaxoʼob u kʼáatoʼob pʼáatal kajtal tiʼ upʼéel luʼum unaj u nuʼuktikubaʼob yéetel u leyiloʼob le luʼumoʼ, le máaxoʼob u kʼáatoʼob xan antal yáanal u Reino Cristoeʼ, ku nuʼuktikubaʼob yéetel «u [ley] Cristo» ikil u tsʼáaik ichil u kuxtaloʼob tuláakal baʼax tu kaʼansaj (Galaciailoʼob 6:2). Letiʼobeʼ maases ku tsʼoʼokbeskoʼob u «nojoch [leyil]» le yaabilajoʼ (Santiago 2:8). ¿Baʼax táakaʼan ichil le leyoʼobaʼ?

12, 13. ¿Bix k-eʼesik chúukaʼan k-óol k-tsʼoʼokbes «u [ley] Cristo»?

¹² Le máaxoʼob u kʼáatoʼob antal yáanal u Reino Cristooʼ kʼeban wíinikoʼob yéetel ku siʼipiltaloʼob (Romailoʼob 3:23). Le oʼolaleʼ unaj u yilik u tsʼoʼokbeskoʼob le baʼax ku yaʼalik le Bibliaaʼ: «Yaabil[teʼex] yéetel x-maʼ kaʼapʼéel ichil le sukuʼunoʼoboʼ. [...] Yaabil[tabaʼex] ta baatsileʼex yéetel tuláakal a puksiʼikʼaleʼex bey xan yéetel tuláakal a muukʼeʼex» (1 Pedro 1:22). Tsʼoʼoleʼ, wa utúul cristiano «yaan baʼal tiʼ tu contra uláakʼ» sukuʼuneʼ, ku tsʼoʼokbeskoʼob u ley Cristo ikil u paklan saʼasik u siʼipiloʼob. U beetkoʼob beyaʼ ku yáantaj utiaʼal maʼ u chʼaʼa kʼuuxiltikubaʼob yéetel utiaʼal ka u yaabiltubaʼob tu baatsiloʼob. ¿Máasaʼ jach ku taasiktoʼon kiʼimak óolal k-antal ichil máaxoʼob chúukaʼan u yóoloʼob tiʼ Cristo yéetel ku yeʼeskoʼob le  yaabilaj «ku nupik yéetel ku chúukbesik tuláakal baʼal[oʼ]»? (Colosailoʼob 3:13, 14.)

¹³ Tsʼoʼoleʼ, le yaabilaj tu yaʼalaj Jesús ka eʼesaʼakoʼ maas nojoch tiʼ le suuk u yeʼesik wíinikoʼ (Juan 13:34, 35). Wa k-yaabiltik chéen máaxoʼob yaabiltmailoʼoneʼ le yaabilaj k-eʼesikoʼ maʼ chúukaʼaniʼ. Jesuseʼ tu yaʼalaj ka k-eʼes upʼéel yaabilaj jeʼex le ku yeʼesik Diosoʼ; tu yaʼalaj unaj k-yaabiltik tak máaxoʼob pʼekmailoʼon yéetel ku chʼaʼapachkoʼonoʼoboʼ (Mateo 5:46-48). Le yaabilaj tu yaʼalaj Jesús ka k-eʼesoʼ le péekskoʼon utiaʼal ka chúukpajak k-óol k-beet le meyaj tu pʼatajtoʼonoʼ. ¿Máakalmáak le meyajaʼ?

Unaj k-eʼesik chúukaʼan k-óol

14. ¿Baʼaxten jach kʼaʼanan le kʼaʼaytajoʼ?

¹⁴ Le máaxoʼob u kʼáatoʼob antal yáanal u Reino Diosoʼ unaj u chúukpajal u yóol u kʼaʼaytoʼob le Reinooʼ (Beetaʼanoʼob 28:23). Le meyajaʼ jach kʼaʼanan u beetaʼal, tumen le Reino yaan tu kʼab Cristooʼ letiʼ kun eʼesik chéen Jéeoba unaj u gobernar yóokʼol tuláakal (1 Corintoiloʼob 15:24-28). Le maʼalob péektsil k-kʼaʼaytikoʼ ku tsʼáaik tiʼ le máakoʼob u páajtalil u yantaloʼob yáanal le gobiernoaʼ. Tsʼoʼoleʼ, le bix u kʼamkoʼob le maʼalob péektsiloʼ le kun meyaj tiʼ le Rey, Cristo, utiaʼal u juzgarkoʼoboʼ (Mateo 24:14; 2 Tesalonicailoʼob 1:6-10). Le oʼolaleʼ, k-eʼesik chúukaʼan k-óol tiʼ Cristo wa k-kʼaʼaytik u maʼalob péektsilil le Reino, jeʼex u túuxmailoʼ (Mateo 28:18-20).

15. ¿Baʼaxten jach kʼaʼabéet u chúukpajal u yóol le cristianoʼoboʼ?

¹⁵ Jeʼex k-ojliloʼ, Satanaseʼ táan u beetik tuláakal le ku páajtal utiaʼal u jeʼelsik le kʼaʼaytajoʼ, tsʼoʼoleʼ le gobiernoʼob xanoʼ u tsʼaamubaʼob tu contra Cristo, le Rey tsʼaʼan tumen Diosoʼ (Salmo 2:1-3, 6-8). Le oʼolal Jesuseʼ tu yaʼalaj tiʼ u disipuloʼob: «Mix juntúul palitsil maas nojoch tiʼ u tsʼuulil. Wa teen tu chʼaʼapachtenoʼobeʼ bey xan teʼex yaan a chʼaʼapachtaʼaleʼex» (Juan 15:20). Bey túunoʼ, u disipuloʼob Jesuseʼ yantiʼob upʼéel baʼateʼel tu contra le kʼasaʼan angeloʼoboʼ, le oʼolal kʼaʼabéet u chúukpajal u yóoloʼob tiʼ Cristo (2 Corintoiloʼob 10:3-5; Efesoiloʼob 6:10-12).

16. Le máaxoʼob ku tsʼáaikubaʼob yáanal u páajtalil le Reinooʼ, ¿bix u tsʼáaikoʼob «tiʼ Jajal Dios baʼax utiaʼal Jajal Dios»?

¹⁶ Kex le máaxoʼob u tsʼaamubaʼob yáanal u Reino Dios ku chúukpajal u yóoloʼob tiʼ Cristoeʼ, leloʼ maʼ u kʼáat u yaʼal wa maʼatech u yeʼeskoʼob tsiikil tiʼ le gobiernoʼob yanoʼob teʼ yóokʼol kaabaʼ (Tito 3:1, 2). Jesuseʼ tu yaʼalaj: «Tsʼaʼex tiʼ César baʼax utiaʼal César, yéetel tsʼaʼex tiʼ Jajal Dios baʼax utiaʼal Jajal Dios» (Marcos 12:13-17). Bey túunoʼ, le máaxoʼob yanoʼob yáanal u páajtalil Cristoeʼ ku beetkoʼob baʼax ku yaʼalik le gobiernoʼoboʼ, baʼaleʼ chéen wa maʼ tu binoʼob tu contra baʼax ku yaʼalik Dios (Romailoʼob 13:1-7). Utéenjeakileʼ, u nuuktakil le judíoʼoboʼ tu tsʼáajubaʼob tu contra baʼax ku yaʼalik Dios, letiʼobeʼ tu yaʼaloʼob tiʼ u disipuloʼob Jesús ka u xul u kʼaʼaytajoʼob, baʼaleʼ le disipuloʼoboʼ tu yaʼaloʼob yéetel tsiikil: «Unaj k-uʼuyik u tʼaan Jajal Dios, táanil tiʼ u tʼaan máakoʼob» (Beetaʼanoʼob 1:8; 5:27-32).

17. ¿Baʼaxten maʼ unaj k-chʼaʼik saajkil k-aktáant le chʼaʼapachtajiloʼ?

¹⁷ U jaajileʼ, utiaʼal u chúukpajal u yóol máak tiʼ Cristoeʼ kʼaʼabéet maʼ u chʼaʼik saajkil u aktáant le chʼaʼapachtajiloʼ. Kex beyoʼ, Jesuseʼ tu yaʼalaj: «Kiʼ a wóoleʼex le ken poʼochʼokeʼex tumen máakoʼob, ken beetaʼak tiʼ teʼex baʼaloʼob kʼaastak, bey xan ken líikʼesaʼak ta wóokʼoleʼex tuláakal tuusoʼob tin woʼolal. Kiʼichajak a wóoleʼex, tumen bíin a kʼameʼex jumpʼéel nojoch boʼolal teʼ j-kaʼanoʼ» (Mateo 5:11, 12). U yáax disipuloʼob Jesuseʼ tu yiloʼob jach jaaj le baʼax ku yaʼalik le tekstoaʼ. Kex jaʼajatsʼaʼaboʼob ikil u kʼaʼaytajoʼobeʼ, «jach kiʼimak[chaj] u yóoloʼob [...] tumen Jajal Dioseʼ tu yóoltaj ka u mukʼyajtoʼob sublakil tu kʼaabaʼ Jesús». Letiʼobeʼ «maʼ jáaw u kaʼansikoʼob yéetel u [kʼaʼay]tikoʼob u kʼaabaʼ Jesucristoiʼ, sáamsamal teʼ [templo] bey xan teʼ j-najoʼoboʼ» (Beetaʼanoʼob 5:41, 42). Tuláakal máaxoʼob meyajtik Jéeobaeʼ jach maʼalob  baʼax ku beetkoʼob, tumen ku chúukpajal u yóoloʼob ken u aktáantoʼob talamiloʼob, kʼojaʼaniloʼob, chʼaʼapachtajiloʼob wa ken kíimik utúul máax u yaabiltmoʼob (Romailoʼob 5:3-5; Hebreob 13:6).

18. ¿Baʼax ku yeʼesik le baʼax tu yaʼalaj Jesús tiʼ Poncio Pilatooʼ?

¹⁸ Le Rey Jesucristooʼ tu yaʼalaj tiʼ le gobernador romano Poncio Pilatooʼ: «In [reinoeʼ] maʼ yóokʼol kaabiliʼ. Wa yóokʼol kaabileʼ in tsaypachoʼobeʼ tsʼoʼok kaʼach u baʼateloʼobeʼ utiaʼal maʼ in kʼuʼubul tiʼ le judíoʼoboʼ. Baʼaleʼ in [reinoeʼ] maʼ wayileʼ» (Juan 18:36). Le máaxoʼob ku tsʼáaikubaʼob yáanal le Reinooʼ maʼatech u binoʼob baʼateʼel mix tu yoksikubaʼob tiʼ mix upʼéel baʼateʼel ku beetaʼal teʼ yóokʼol kaabaʼ. Tumen chúukaʼan u yóoloʼob tiʼ Cristo, le Rey kun taasik le jeetsʼeliloʼ, upuliʼ maʼatech u yokskubaʼob tiʼ le talamiloʼob ku beetaʼal u yantal tumen u máakiloʼob le yóokʼol kaabaʼ (Isaías 2:2-4; 9:6, 7).

Nojoch utsiloʼob kun tsʼaabil tiʼ le máaxoʼob chúukaʼan u yóoloʼoboʼ

19. ¿Baʼax táan u páaʼtik le máaxoʼob ku tsʼáaikubaʼob yáanal u Reino Cristo?

¹⁹ Le máaxoʼob chúukaʼan u yóoloʼob tiʼ Cristo, u maas nojchil le reyoʼoboʼ, táan u páaʼtkoʼob u kʼuchul u kʼiinil u yeʼesik Jesús le nojoch páajtalil yantiʼoʼ (Apocalipsis 19:11–20:3; Mateo 24:30). U yalaʼ le máaxoʼob yéeyaʼanoʼob utiaʼal u binoʼob kaʼan, wa u «paalal» le Reinooʼ, táan u páaʼtkoʼob u kʼuchul u kʼiinil u bisaʼaloʼob kaʼan utiaʼal ka reinarnakoʼob yéetel Cristo (Mateo 13:38; Lucas 12:32). Le «uláakʼ j-tamanoʼob» chúukaʼan u yóoloʼob tiʼ Cristooʼ táan xan u páaʼtkoʼob u kʼuchul u kʼiinil u yaʼalaʼaltiʼob tumen le Reyoʼ: «Koʼoteneʼex teʼex máaxeʼex kiʼikiʼ tʼantaʼaneʼex tumen in Taata, kʼameʼex [le Paraíso kun gobernarbil tumen] le [reino] nuʼuktaʼan atiaʼaleʼex le ka tu beetaj Jajal Dios yóokʼol kaaboʼ» (Juan 10:16; Mateo 25:34). Le oʼolal túuneʼ, wa taak k-antal yáanal u Reino Dioseʼ, unaj u chúukpajal k-óol meyajt mantatsʼ le Rey, Cristooʼ.

[Tsolajiloʼob]

¿Jeʼel wa u páajtal a tsolkeʼ?

• ¿Baʼaxten unaj k-meyajtik Cristo yéetel chúukaʼan óolal?

• ¿Bix jeʼel k-eʼesik táan u chúukpajal k-óol tiʼ Cristoeʼ?

• ¿Baʼaxten a kʼáat a weʼes chúukaʼan óolal tiʼ le Rey, Cristooʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 7]

CRISTO XANEʼ:

[U tsolajil le oochel teʼ táan juʼun 7]

Igual tu yilil tuláakal máak (Juan 4:7-30).

Tu chʼaʼaj óotsilil (Mateo 9:35-38; 12:18-21; Marcos 6:30-34).

Tu yeʼesaj yaabilaj (Juan 13:1; 15:12-15).

Chúukpaj u yóol tiʼ Dios (Mateo 4:1-11; 28:20; Marcos 11:15-18).

Tuukulnaj yoʼolal u maasil (Marcos 7:32-35; Lucas 7:11-15; Hebreob 4:15, 16).

Maʼ tu chichkúuntaj u puksiʼikʼaliʼ (Mateo 15:21-28).

[U tsolajil le oochel teʼ táan juʼun 5]

Ken k-eʼes yaabilaj t-baatsileʼ k-eʼesik táan k-tsʼoʼokbesik u ley Cristo

[U tsolajil le oochel teʼ táan juʼun 7]

Le bix Jesusoʼ, ¿ku péekskech wa utiaʼal ka chúukpajak a wóol a meyajte?