«Upʼéel vaso maas séeb u paʼapajal» yéetel koʼoj u tojol

LE APÓSTOL Pedrooʼ tu yaʼalaj: «Bey xan teʼex íichamtsileʼex, muunchajak a puksiʼikʼaleʼex utiaʼal a wataneʼex. Tsʼaʼex tiʼob le tsiikil unaj u tsʼaʼabal tiʼoboʼ [«jeʼel bix upʼéel vaso maas séeb u paʼapajaleʼ», NM]» (1 Pedro 3:7). Ken keʼetek le koʼolel yéetel «upʼéel vaso maas séeb u paʼapajal» teʼ tekstoaʼ, ¿táan wa u mixbaʼalkúuntaʼal le koʼoleloʼ? Koʼox ilik baʼax tu yóotaj u yaʼal apóstol Pedro yéetel le tʼaanoʼobaʼ.

Le tʼaan ich griego ku suʼutul «tsiikil[oʼ]» u kʼáat xan u yaʼaleʼ u yilaʼal koʼoj u «tojol» upʼéel baʼal. Le oʼolaleʼ, utúul íichamtsil cristianoeʼ kʼaʼabéet u yaabiltik u yatan yéetel kʼaʼabéet u kanáantik, jeʼex u kanáantaʼal upʼéel vaso séeb u paʼapajal yéetel jach koʼoj u tojoleʼ. Bey túunoʼ, le baʼax ku yaʼalik le tekstooʼ maʼ táan u mixbaʼalkúuntik le koʼoleloʼ. Tuukulnakoʼon tiʼ bajux ku tojoltik upʼéel lámpara ku kʼaabaʼtik Tiffany, lelaʼ beetaʼan u baʼpaach yéetel u xéexetʼal vidrio ku formarkoʼob upʼéel lool ku kʼaabaʼtik loto. Le lámpara jach jatsʼutsaʼ upʼéel baʼal jach séeb u paʼapajal. Baʼaleʼ, ¿u kʼáat wa túun u yaʼal jach maʼ koʼojiʼ? Maʼatech. Tu jaʼabil 1997, le lámpara Tiffanioʼ koʼon tu yoʼolal dos millones ochocientos mil dólares. K-ilik túuneʼ, kex séeb u paʼapajleʼ leloʼ maʼ tu beetaj u pʼáatal maʼ koʼojiʼ.

Jeʼex u yúuchul yéetel le lamparaoʼ, ken aʼalaʼak ka tsʼaʼabak tsiikil tiʼ le koʼolel wa ka kanáantaʼak jeʼex u kanáantaʼal upʼéel vaso séeb u paʼapajaleʼ, maʼ u kʼáat u yaʼal wa táan u mixbaʼalkúuntaʼaliʼ, mix xan táan u tsʼáaik naʼatbil wa maas maʼalob utúul xiib tiʼ utúul koʼoleliʼ. Baʼaxeʼ lelaʼ u kʼáat u yaʼaleʼ utúul íichamtsil ku yeʼesik tsiikil tiʼ u yataneʼ ku chʼaʼik en cuentai baʼax jeʼel u páajtal u beetik u yataneʼ yéetel baʼax maʼ tu páajtal u beetik, baʼax utstutʼaan yéetel baʼax maʼ utstutʼaaniʼ, baʼaxoʼob ku tuklik yéetel bix u yuʼubikuba. Utúul íichamtsil xan yaan u yaabilajeʼ ku yeʼesik tsiikil tiʼ u yatan tumen u yojel maʼ upʼéeliliʼ bix u tuukuloʼobiʼ. Tsʼoʼoleʼ, ku yeʼesik xan tsiikil tiʼ u yatan «utiaʼal maʼ u [kʼatkuba] mix baʼal tiʼ [u] payalchiʼ» (1 Pedro 3:7). Jeʼex túun k-ilkoʼ wa le íichamtsil maʼ tu yeʼesik tsiikil tiʼ u yataneʼ leloʼ jeʼel u beetik u xuʼulul u biskuba Jéeoba tu yéeteleʼ. Bey túunoʼ, le Bibliaoʼ maʼatech u mixbaʼalkúuntik le koʼoleloʼ, baʼaxeʼ ku yaʼalik jach koʼoj u tojol yéetel ku yaʼalik unaj u yeʼesaʼal tsiikil tiʼ.

[U tsolajil le oochel teʼ táan juʼun 32]

© Christieʼs Images Limited 1997