«Bejlaʼeʼ kin creertik yaan Dios»

UTÚUL koʼolel ucranianai, u kʼaabaʼ Alexandra, kajaʼan tu noj kaajil Pragaeʼ (tu luʼumil República Checa), upʼéel u kʼiinil táan u suut tu yotoch tsʼoʼok u meyajeʼ, tu yilaj upʼéel chan estuche ku titikchaʼataʼal tumen le máaxoʼob ku máanoʼob teʼ tu estacionil le trenoʼ. Letiʼ túuneʼ tu chʼaʼaj, le ka tu jeʼekʼabteʼ, jaʼakʼ u yóol ka tu yilaj yaan u tsʼapaʼ taakʼin ichil. Tu yilaj xaneʼ mix máak kaxtik le taakʼinoʼ. Jeʼex uláakʼ máakoʼobeʼ, Alexandraeʼ kʼaʼabéet kaʼach taakʼin tiʼ. Le oʼolaleʼ, ¿baʼax túun ken u beete?

Ka kʼuch tu yotocheʼ, letiʼeʼ tu yeʼesaj tiʼ Victoria, u hija, le chan estuche tu kaxtoʼ. Letiʼob túuneʼ tu xakʼaltoʼob utiaʼal u yilkoʼob wa tiaʼan u kʼaabaʼ yéetel tuʼux kajaʼan le máax tiaʼalintkoʼ, baʼaleʼ chéen tu kaxtoʼob upʼéel juʼun tuʼux tsʼíibtaʼan yaʼab numerosiʼ. Tu táan le juʼunoʼ tsʼíibtaʼan u numeroi upʼéel cuenta tiʼ bancoiʼ yéetel tu paacheʼ tsʼíibtaʼan uláakʼ numerosiʼ. Ichileʼ tu kaxtoʼob xan u direccioni upʼéel banco yaan teʼ noj kaajoʼ, tu kaxtoʼob xan upʼéel chan juʼun tuʼux tsʼíibtaʼan «330.000 coronas» (óoliʼ 10,000 dolaroʼob), lelaʼ jach letiʼe bukaʼaj taakʼin yaan ichil le chan estucheoʼ.

Yéetel le números tu kaxtaj Alexandra ichil le chan estucheoʼ tu yilaj u tʼaan teʼ bancooʼ baʼaleʼ maʼ núukaʼab tiʼiʼ. Ka túun tu tuklaj maas maʼalob ka xiʼik letiʼ yéetel u hija teʼ bancooʼ. Ka kʼuchoʼobeʼ tu kʼáatoʼob wa yaan teʼ banco le u numeroi le cuenta tu kaxtoʼoboʼ, baʼaleʼ aʼalaʼabtiʼobeʼ minaʼan. Ka sáaschaj uláakʼ kʼiineʼ, Alexandraeʼ tu bisaj uláakʼ numeroʼob teʼ bancooʼ, ka aʼalaʼab tiʼeʼ lelaʼ utiaʼal utúul koʼolel ku líiʼsik u taakʼin teʼ bancooʼ. Alexandra yéetel Victoria túuneʼ tʼaanajoʼob yéetel le koʼoleloʼ, le koʼolel túunaʼ tu yaʼalajtiʼob letiʼ satmil le taakʼin tu kaxtoʼoboʼ. Le ka tu yilubaʼobeʼ, le koʼoleloʼ jach tu tsʼáaj u diosboʼotikil tiʼ Alexandra yéetel tiʼ Victoria, yéetel tu yaʼalajtiʼob: «¿Baʼax unaj in tsʼáaikteʼex utiaʼal ka suteʼex ten le taakʼinoʼ?».

Victoriaeʼ tu yaʼalaj: «Mix baʼal. Tumen wa k-kʼáat kaʼach ka pʼáatak toʼon le taakʼinoʼ bejlaʼa maʼatan k-kaxtikech utiaʼal ka k-suttecheʼ.» Tsʼoʼoleʼ kex maʼ u jach yojel tʼaan ich checoeʼ Victoriaeʼ tu yaʼalaj tiʼ: «Táan k-sutik tech a taakʼin, tumen toʼoneʼ u j-jaajkunajoʼon Jéeoba, yéetel tsʼoʼok k-kanik teʼ Bibliaoʼ maʼ maʼalob ka k-chʼaʼa baʼax maʼ k-tiaʼaliʼ» (Hebreob 13:18). Le koʼolel túunoʼ yéetel kiʼimak óolal tu yaʼalaj: «Bejlaʼeʼ kin creertik yaan Dios».