Jéeobaeʼ ku líiʼsik u yóol le máaxoʼob lubaʼan u yóoloʼoboʼ
Jéeobaeʼ ku líiʼsik u yóol le máaxoʼob lubaʼan u yóoloʼoboʼ
«Máak toj u kuxtaleʼ ku mukʼyajtik yaʼabkach kʼaasoʼob, baʼaleʼ tiʼ tuláakal baʼal ku toʼokol tumen Yuumtsil». (SALMO 34:19.)
1, 2. ¿Baʼax talmil tu aktáantaj utúul kiik, yéetel baʼaxten yaan kʼiin jeʼel xan k-uʼuyikba jeʼex tu yuʼubiluba letiʼoʼ?
KARINAEʼ, * utúul chʼúupal tsʼoʼok veinte jaʼaboʼob joʼopʼok u meyajtik Jéeoba. Letiʼeʼ jach kiʼimak u yóol táan kaʼach u meyaj bey precursoraeʼ. Baʼaleʼ, maʼ úucheʼ jach lúub u yóol yéetel tu yuʼububaj jach tu juunal. Letiʼeʼ ku yaʼalik: «Chéen okʼol kin sen beetik kaʼachi». Utiaʼal u xuʼulul u yuʼubkuba beyoʼ, letiʼeʼ joʼopʼ u sen xakʼalxoktik le Bibliaoʼ. Baʼaleʼ, letiʼeʼ ku yaʼalik: «Kex beyoʼ láayliʼ jach lubaʼan in wóol kaʼacheʼ. Tin wuʼuyaj taakchaj tak in kíimil».
2 ¿Techeʼ yaan wa kʼiin tsʼoʼok a wuʼuykaba jeʼex tu yuʼubiluba le kiikaʼ? Wa j-jaajkunajech tiʼ Jéeobaeʼ yaan yaʼab baʼax oʼolal u kiʼimaktal a wóol, tumen «le u kʼubik u yóol máak tiʼ Jajal Diosoʼ [...] ku taasiktoʼon náajal utiaʼal le kuxtalaʼ bey xan utiaʼal le kuxtal bíin taalakoʼ» (1 Timoteo 4:8). Bejlaʼeʼ tiaʼanech bey tiʼ upʼéel paraíso ichil u kaajal Dioseʼ. Leloʼ, ¿u kʼáat wa túun u yaʼal mix bikʼin kun lúubul a wóol? Maʼatech, tumen tak le Bibliaoʼ ku yaʼalik: «Máak toj u kuxtaleʼ ku mukʼyajtik yaʼabkach kʼaasoʼob» (Salmo 34:19). Lelaʼ beyaʼ, tumen «u túulisil yóokʼol kaabeʼ tiʼ yaan yáanal u páajtalil kʼaasibaʼaleʼ» (1 Juan 5:19). Tuláakloʼon k-muʼyaj, tumen le yóokʼol kaabaʼ tiʼ yaan yáanal u kʼab le Kʼaasilbaʼaloʼ (Efesoiloʼob 6:12).
Le muʼyajiloʼob ku taasik u jach lúubul u yóol máakoʼ
3. ¿Máaxoʼob jach lúub u yóoloʼob úuchjeakil?
3 Wa jach ku xáantal lubaʼan k-óoleʼ, leloʼ jeʼel tak u beetik maʼ u jatsʼutstal k-ilik le kuxtaloʼ (Proverbios 15:15). Tuukulnakoʼon tiʼ Job; letiʼeʼ le ka tu aktáantaj upʼéel nojoch talamileʼ, tu yaʼalaj: «Le j-xiib sijnáal tiʼ koʼoleleʼ, jach kóom u kuxtal chuup xan tu yéetel mukʼyajiloʼob» (Job 14:1). Tiʼ letiʼeʼ jáaw u yantal kiʼimak óolal, yéetel kʼuch tak u tukult pʼaʼat tumen Jéeoba (Job 29:1-5). Baʼaleʼ maʼ chéen Job jach lúub u yóoliʼ. Le Bibliaoʼ ku yaʼalikeʼ, Anaeʼ jach okʼolnaj yéetel jach yaachaj u yóol tumen maʼ tu páajtal kaʼach u yantal u paalal (1 Samuel 1:9-11). Rebeca xaneʼ, yoʼolal upʼéel nojoch talmil yanchaj ichil u familiaeʼ, tu yaʼalaj: «Tsʼoʼok u sen náakal in wóol tiʼ le kuxtal[aʼ]» (Génesis 27:46). David xaneʼ, ka tu kʼaʼajsaj tuláakal u kʼebanoʼobeʼ, tu yaʼalaj: «Minaʼan u súutukil wa maʼ okʼom in wóol[iʼ]» (Salmo 38:6). Jeʼex tsʼoʼok k-ilkoʼ, yaʼab xiiboʼob yéetel koʼoleloʼob tu meyajtoʼob Jéeoba úuchileʼ, jach lúub xan u yóoloʼob.
4. ¿Baʼaxten maʼ unaj u jelaʼantal k-ilik u yantal sukuʼunoʼob jach lubaʼan u yóoloʼob teʼ kʼiinoʼobaʼ?
4 Tiʼ u disipuloʼob Jesús teʼ yáax siglooʼ, ¿yaan wa xan jach lúub u yóoloʼobiʼ? Yaan, tumen le apóstol Pablooʼ tu yaʼalaj tiʼ le sukuʼunoʼob yanoʼob Tesalonicaoʼ ka u líiʼsoʼob «u yóol le máaxoʼob lúubul u yóoloʼoboʼ» (1 Tesalonicailoʼob 5:14). Le baʼax tu yaʼalaj Pablooʼ ku yeʼesikeʼ, yanchaj tak sukuʼunoʼob kun binoʼob kaʼan jach lúub u yóoloʼob. Bejlaʼa xaneʼ, láayliʼ yaan sukuʼunoʼob jach ku luubul u yóoloʼobeʼ. ¿Baʼax beetik u yuʼubkubaʼob beyoʼ? Koʼox ilik óoxpʼéel baʼax beetik.
K-lúubul tiʼ kʼebaneʼ jeʼel u beetik u lúubul k-óoleʼ
5, 6. ¿Bix u líiʼsik k-óol le baʼax ku yaʼalik Romailoʼob 7:22-25?
5 U kʼasaʼan máakiloʼob le yóokʼol kaabaʼ «tsʼoʼok u minaʼantal u sublak[iloʼob]», baʼaleʼ le máax meyajtik Dioseʼ ku yaatal u yóol ken lúubuk tiʼ kʼeban (Efesoiloʼob 4:19). Maʼ xaaneʼ jeʼel u yuʼubikuba jeʼex Pablo, le ka tu tsʼíibtaj: «In puksiʼikʼaleʼ ku kiʼimaktal u yóol tu yoʼolal u [...] tʼaan Jajal Dios; baʼaleʼ kin wilikeʼ tiʼ in wíinklileʼ yaan baʼax ku bin tu contra in tuukul; lelaʼ u [ley] le kʼeban yaan tiʼ in wíinkliloʼ yéetel u palitsiltmaen». Tsʼoʼoleʼ ka tu yaʼalaj: «¡Jach óotsilen!» (Romailoʼob 7:22-24).
6 ¿Techeʼ tsʼoʼok wa wuʼuyikaba jeʼex tu yuʼubiluba Pablooʼ? K-kʼaʼajsik kʼeban wíinikoʼoneʼ maʼ kʼaasiʼ, tumen ku yáantkoʼon utiaʼal k-kanáantik maʼ k-beetik baʼax maʼ maʼalob tu táan Diosiʼ. Baʼaleʼ maʼ unaj k-chaʼik u jach lúubul k-óol yoʼolal le baʼaloʼob maʼ maʼalobtak tsʼoʼok beetkoʼ. Ka tsʼoʼok u yaʼalik Pablo le baʼax t-xokaj maʼ sáamoʼ, tu yaʼalaj xan: «Nib óolal kin tsʼik tiʼ Jajal Dios tioʼolal Jesucristo, k-Yuumtsil» (Romanos 7:25, LTN). Pabloeʼ u yojeleʼ, yoʼolal le u kʼiʼikʼel Cristo tu wekoʼ, jeʼel u páajtal u perdonartaʼal u kʼebanoʼobeʼ (Romailoʼob 5:18).
7. ¿Baʼax jeʼel u yáantik máak utiaʼal maʼ u jach lúubul u yóol yoʼolal u kʼebanoʼobeʼ?
7 Wa lubaʼan a wóol yoʼolal le baʼaloʼob maʼ maʼalobtak tsʼoʼok a beetkoʼ, jeʼel u líiʼsik a wóol le baʼax tu yaʼalaj apóstol Juanaʼ: «Wa yaan máax ku kʼebanchajaleʼ, yantoʼon juntúul máax ku tʼaan t-oʼolal tu táan le taataoʼ, lelaʼ Jesucristo, letiʼeʼ toj. Jesucristoeʼ [tu yoʼolal letiʼeʼ ku perdonartaʼal] k-kʼebanoʼob; maʼ chéen k-kʼeban toʼoniʼ baʼaleʼ tak u kʼebanoʼob tuláakal yóokʼol kaab» (1 Juan 2:1, 2). Wa ku lúubul a wóol yoʼolal a kʼebanoʼobeʼ, kʼaʼajaktecheʼ Jesuseʼ kíim tu yoʼolal kʼeban wíinkoʼob, maʼ tu yoʼolal máaxoʼob minaʼan u kʼebanoʼobiʼ. U jaajileʼ, tuláakloʼon kʼeban wíinkoʼon yéetel jach náach yaniloʼon tiʼ u nojbeʼenil Jajal Dios (Romailoʼob 3:23).
8, 9. ¿Baʼaxten maʼ unaj k-tuklik maʼ tu páajtal k-perdonartaʼal tumen Jéeobaeʼ?
8 ¿Kux túun wa úuchjeakileʼ lúub máak tiʼ upʼéel nojoch kʼeban? Wa beyoʼ, jach wal orarnaj máak yoʼolal baʼax tu beetoʼ yéetel áantaʼab xan tumen le ancianoʼoboʼ (Santiago 5:14, 15). Yéetel tumen jach arrepentirnaj máakeʼ maʼ jóoʼsaʼab ichil u kaajal Diosiʼ. Maʼ xaan xaneʼ jóokʼ máak tiʼ u kaajal Dios, baʼaleʼ ka máan kʼiineʼ arrepentirnajeʼ ka tu kaʼa natsʼuba tiʼ Dios. Wa uchaʼantoʼon beyaʼ, maʼ xaaneʼ yaan kʼiineʼ jeʼel u taal t-tuukul le baʼax maʼ maʼalob t-beetoʼ, yéetel leloʼ jeʼel u beetik u jach lúubul k-óoleʼ. Wa bey a wuʼuykabaoʼ, kʼaʼajaktecheʼ Jéeobaeʼ jach tu jaajil ku perdonartik le máax jach tu jaajil ku arrepentiroʼ (Isaías 55:7). Tsʼoʼoleʼ, letiʼeʼ maʼ u kʼáat ka a tukult wa minaʼan perdón atiaʼaliʼ. Letiʼe Kʼaasilbaʼal u kʼáat ka tuukulnakech beyoʼ (2 Corintoiloʼob 2:7, 10, 11). Le Kʼaasilbaʼaloʼ yaan u xuʼulsaʼal, tumen le u náajalmaj, baʼaleʼ u kʼáat xan ka a tukult a náajalmaj ka xuʼulsaʼakech (Apocalipsis 20:10). Maʼ a chaʼik tiʼ Satanás u beetik u yantaltech upʼéel tuukul beyaʼ, tumen leloʼ jeʼel u náachkuntkech tiʼ Dioseʼ (Efesoiloʼob 6:11). Baʼaxeʼ tsʼáaba tu contra le Kʼaasilbaʼaloʼ (1 Pedro 5:9).
9 Apocalipsis 12:10 ku yaʼalikeʼ, Satanaseʼ «u j-takpool k-sukuʼunoʼob», le máaxoʼob kun binoʼob kaʼanoʼ. Letiʼeʼ ku «takik u pooloʼob yéetel kʼiin [bey xan] yéetel áakʼab tu táan k-Jajal Dios». Le baʼax ku yaʼalik le tekstoaʼ ku yáantkoʼon k-ileʼ Satanás, le j-takpooloʼ, jach jeʼel u kiʼimaktal u yóol wa ka a tukult maʼ tu páajtal a perdonartaʼal tumen Jéeobaeʼ, upʼéel baʼal maʼ jaajiʼ (1 Juan 3:19-22). Mix baʼal ka jóoʼsik wa ka chaʼik u sen lúubul a wóol yoʼolal baʼaxoʼob a beetmaj, ka tak a tukult tsʼokaʼantechiʼ. Maʼ a chaʼik tiʼ Satanás u náachkuntkech tiʼ Dios. Maʼ a chaʼik u tuskech ka tak tuʼubuktech Jéeobaeʼ utúul Dios «muun u puksiʼikʼal ku chʼaʼa óotsilil, chúukaʼan yóol, [yéetel] nojoch u yaakunaj» (Éxodo 34:6).
Le maʼ u páajtal k-beetik yaʼaboʼ jeʼel u beetik u lúubul k-óoleʼ
10. ¿Baʼax uláakʼ jeʼel u beetik u jach lúubul k-óoleʼ?
10 Yaan sukuʼunoʼobeʼ ku jach lúubul u yóoloʼob tumen maʼ tu páajtal u meyajtkoʼob Dios jeʼex u beetkoʼob kaʼacheʼ. ¿Bey wa u yúuchultechoʼ? Maʼ xaaneʼ maʼ tu páajtal a jóokʼol kʼaʼaytaj tumen yantech upʼéel nojoch kʼojaʼanil, tumen tsʼoʼok u yantal a jaʼabil, wa tumen yantech uláakʼ nojoch talamiloʼob. U jaajileʼ, le Bibliaoʼ ku yaʼalik jach unaj k-jóoʼsik tiempo utiaʼal k-meyajtik Dios (Efesoiloʼob 5:15, 16). Baʼaleʼ ¿baʼax jeʼel a beetik wa jach ku lúubul a wóol tumen maʼ tu páajtal a jach jóokʼol kʼaʼaytaj jeʼex a beetik kaʼacheʼ?
11. ¿Bix u yáankoʼon le baʼax tu yaʼalaj Pablo teʼ Galaciailoʼob 6:4?
11 Le Bibliaoʼ ku yaʼaliktoʼon maʼ k-maʼakʼóoltal, baʼaxeʼ ku yaʼaliktoʼon ka k-beetba jeʼex «le máaxoʼob tu yoʼolal [u fejoʼoboʼ] yéetel tu yoʼolal [chúukaʼan u yóoloʼobeʼ] táan u kʼamikoʼob le ayikʼalil aʼalaʼantiʼob tumen Jajal Diosoʼ» (Hebreob 6:12). Lelaʼ yaan u páajtal k-beetik chéen wa ku chúukpajal k-óol k-meyajt Dios yéetel wa ku yantaltoʼon upʼéel nojoch fe jeʼex le yanchajtiʼoboʼ. Baʼaleʼ maʼ unaj k-ketik bukaʼaj k-beetik yéetel bukaʼaj ku beetik uláakʼ sukuʼunoʼobiʼ, mix unaj k-tuklik jach upʼíit le bukaʼaj k-beetkoʼ. Maas maʼalob ka k-beet le baʼax tu yaʼalaj Pabloaʼ: «Cada juntúuleʼ unaj u yilik wa maʼalob baʼax ku beetik. Wa ku kiʼimaktal u yóol tu yoʼolaleʼ, lelaʼ chéen utiaʼal letiʼ maʼ utiaʼal u láakʼ máakiʼ» (Galaciailoʼob 6:4).
12. ¿Baʼaxten unaj u kiʼimaktal k-óol yoʼolal le bukaʼaj meyaj k-beetik utiaʼal Jéeobaoʼ?
12 Kex maʼ tu páajtal k-beetik le bukaʼaj k-beetik kaʼach tumen táan k-aktáantik upʼéel nojoch kʼojaʼanileʼ, unaj u kiʼimaktal k-óol. Le Bibliaoʼ ku yaʼaliktoʼon: «Jajal Dioseʼ toj, yéetel maʼ bíin u tuʼubs le baʼax tsʼoʼok a beetikeʼexoʼ yéetel le yaakunaj tsʼoʼok a weʼesikeʼex tiʼoʼ» (Hebreob 6:10). Wa kex a kʼáat, baʼaleʼ yaan baʼax maʼ tu chaʼik a jach jóokʼol kʼaʼaytaj jeʼex a beetik kaʼacheʼ, yéetel u yáantaj Dioseʼ jeʼel u páajtal a kʼaʼaytaj tiʼ teléfono wa tiʼ cartaeʼ. Maʼ u tuʼubultecheʼ Jéeobaeʼ yaan u yeʼesiktech u yutsil ikil a meyajtik yéetel u jaajil a wóol yéetel ikil a weʼesik a yaabilaj tiʼ letiʼ yéetel tiʼ u maasil máakoʼob (Mateo 22:36-40).
Le «talam kʼiinoʼob» kuxlikoʼonaʼ jeʼel u beetkoʼob u lúubul k-óoleʼ
13, 14. 1) ¿Bix u jach lúuʼsik k-óol le «talam kʼiinoʼob» kuxlikoʼonaʼ? 2) Teʼ kʼiinoʼobaʼ, ¿bix u yilaʼal maʼatech u yeʼesaʼal yaakunaj?
13 Kex k-ojel taʼaytak u kʼuchul u túumben yóokʼol kaab Jajal Dioseʼ, bejlaʼeʼ kuxaʼanoʼon tiʼ «talam kʼiinoʼob» (2 Timoteo 3:1). Jach ku líiʼsik k-óol k-ojéeltikeʼ, le talam kʼiinoʼobaʼ ku yeʼesikoʼob taʼaytak u xuʼulsaʼal tuláakal le muʼyajiloʼoboʼ; baʼaleʼ leloʼ maʼ u kʼáat u yaʼal wa maʼ ken k-aktáant talamiloʼob jeʼel u beetik u lúubul k-óoleʼ. Maʼ xaaneʼ, minaʼantech meyaj. Tsʼoʼoleʼ wa tsʼoʼok u yúuchtal joʼopʼok a kaxtik meyajeʼ, maʼ xaaneʼ jeʼel u joʼopʼol a tuklik Jéeobaeʼ maʼ táan u yilik baʼax táan u yúuchultechiʼ yéetel mix táan u yuʼubik a oracionoʼobiʼ. Maʼ xaan xaneʼ yaan máaxoʼob pʼekmilech wa yaan uláakʼ baʼaloʼob táan u beetaʼaltech. Maʼ xaaneʼ chéen ikil a xokik le periodicooʼ ka wuʼuyikaba jeʼex Loteʼ. Letiʼeʼ jach yaachaj u yóol yoʼolal le baʼax kʼaas ku beetik u yéet kaajaloʼoboʼ (2 Pedro 2:7).
14 Maʼ unaj xan k-tuʼubsikeʼ le Bibliaoʼ u yaʼalmeʼ teʼ tu tsʼook kʼiinoʼobaʼ yaʼab máakoʼobeʼ «maʼ tun yantal u yaakunajoʼob» (2 Timoteo 3:3). Ichil yaʼab familiaʼobeʼ minaʼan yaabilajiʼ. Yoʼolal lelaʼ, le libro Family Violence (U beetaʼal loob ichil le familiaoʼ) ku yaʼalikeʼ «bejlaʼeʼ maas séeb jeʼel u beetaʼal loob tiʼ máak, u kíimsaʼal, u mixbaʼalkuntaʼal wa u violartaʼal tumen utúul tiʼ u láakʼtsiloʼobeʼ ke tumen utúul máax maʼ u kʼaj óoliʼ. [ . . . ] Yaʼab nojoch máakoʼob yéetel mejen paalaloʼobeʼ kex unaj u kanáantaʼaloʼob yéetel u yaabiltaʼaloʼob tu yotochoʼobeʼ, tiʼ ku beetaʼal loob tiʼobiʼ». Le máaxoʼob likʼaʼanoʼob ichil upʼéel familia tuʼux minaʼan yaabilajeʼ, maʼ xaaneʼ ken máanak le jaʼaboʼoboʼ jeʼel u jach chiʼichnaktaloʼob ka tak jach lúubuk u yóoloʼobeʼ. ¿Bey wa wuʼuykaba techoʼ?
15. ¿Baʼax eʼesik maas nojoch u yaabilaj Jéeoba tiʼ le yaabilaj jeʼel u yeʼesik wíinikoʼobeʼ?
15 Le rey Davidoʼ tu kʼayaj: «Kex in taata yéetel in maama ka u xúumpʼattenoʼobeʼ, Yuumtsileʼ letiʼ bíin u [kanáanten]» (Salmo 27:10). ¿Máasaʼ jach ku líiʼsik k-óol k-ojéeltik le yaabilaj ku yeʼesiktoʼon Jéeobaoʼ maas nojoch tiʼ le yaabilaj jeʼel u yeʼesik utúul taatatsileʼ? Kex jeʼel u jach yaatal k-óol ka pʼektaʼakoʼon, ka beetaʼaktoʼon loob wa ka xúumpʼattaʼakoʼon tumen k-taataʼobeʼ, kʼaʼajaktoʼoneʼ Jéeobaeʼ maʼ kun jáawal u yaabilkoʼon (Romailoʼob 8:38, 39). Maʼ u tuʼubultoʼoneʼ Jéeobaeʼ ku natsʼik tu yiknal máax u yaabiltmaj (Juan 3:16; 6:44). ¿Máasaʼ jach ku kiʼimaktal k-óol k-ojéeltik, kex jeʼel baʼalak tsʼoʼok u beetaʼaltoʼon tumen wa máaxeʼ, le k-Taata yaan teʼ kaʼanoʼ jach u yaabiltmoʼon?
¿Baʼax jeʼel u yáantkoʼon utiaʼal u líikʼil k-óoleʼ?
16, 17. Utúul máak luubul u yóoleʼ, ¿baʼax jeʼel u páajtal u beetik utiaʼal u líikʼil u yóoleʼ?
16 Yaan baʼax jeʼel u páajtal a beetik utiaʼal u líikʼil a wóoleʼ. Upʼéel baʼax jeʼel u yáantkecheʼ letiʼe a tsʼáaik a wóol a meyajt Diosoʼ yéetel a tuukul tiʼ baʼax ka xokik teʼ Bibliaoʼ, lelaʼ maas unaj a beetik wa jach luubul a wóol. Le salmistaoʼ tu kʼayaj: «Le ka tin waʼalaj juntéeneʼ: In wookoʼobeʼ táan u jakchajloʼob, a yaakunajeʼ Yuumtsil tu yáanten. Chúumuk tiʼ le sen tuukulil baʼaloʼob ku muchʼikubaʼob tin sutpacheʼ, techeʼ ka tsʼáaikten jeʼelel yéetel kiʼimak óolal» (Salmo 94:18, 19). Wa ka xokik le Biblia mantatsʼoʼ yaan a wilik tʼaanoʼob jach jeʼel u líiʼskoʼob a wóoleʼ.
17 Le oración xanoʼ jach jeʼel u yáantkecheʼ. Kex maʼ tu páajtal a waʼalik tiʼ Jéeoba jach bix a wuʼuykabaeʼ, letiʼeʼ u yojel baʼax a kʼáat a waʼal tiʼ (Romailoʼob 8:26, 27). Le salmistaoʼ ku yaʼaliktoʼon: «Pʼat a chiʼichnakiloʼob tiʼ Yuumtsil, letiʼ túuneʼ yaan u tsʼáaiktech jeetsʼel; mix bikʼin jeʼel u chaʼik u lúubul le máax toj u kuxtaloʼ» (Salmo 55:22, LSM).
18. ¿Baʼax unaj u beetik máax jach lubaʼan u yóol?
18 Yaan máaxoʼobeʼ mantatsʼ jach lubaʼan u yóoloʼob tumen kʼojaʼanil yaniltiʼob. * Wa yantech le kʼojaʼanilaʼ, maʼalob ka tuukulnakech tiʼ le túumben yóokʼol kaab ken u taas Diosoʼ, tuʼux «mix juntúul kajnáal bíin u yaʼal: Kʼojaʼanen» (Isaías 33:24). Wa jach ku xáantal jach lubaʼan a wóoleʼ, maʼalob ka xiʼikech tu yiknal doctor (Mateo 9:12). Maʼalob ka u yil u kanáantik u wíinklil máak. Maʼalob ka a jaant baʼaloʼob jeʼel u tʼaʼajkúunsik a wíinklileʼ yéetel a beetik upʼíit ejercicio. Ilawil a jeʼelel tubeel. Maʼ u jach áakʼabtaltech táan a chaʼantik televisión, mix a náaysik a wóol yéetel baʼaloʼob jach jeʼel u sen kaʼanskechoʼobeʼ. Ilawil xan maʼ u jáawal a beetik baʼax utstutʼaan Dios. Kex maʼ kʼuchuk u kʼiinil u luʼsaʼal tumen Jéeoba tuláakal muʼyajileʼ, letiʼeʼ jeʼel u yáantkech utiaʼal ka a aktáant jeʼel baʼalak talamileʼ (Apocalipsis 21:4; 1 Corintoiloʼob 10:13).
Tiaʼanoʼon «yáanal u páajtalil u kʼab Jajal Dios[eʼ]»
19. ¿Baʼax ku yaʼalik Jéeoba u tsʼáaik tiʼ le máaxoʼob jach lubaʼan u yóoloʼoboʼ?
19 Le Bibliaoʼ ku yaʼaliktoʼoneʼ, kex yaʼab talamiloʼob ka yanak tiʼ máax utseʼ «tiʼ tuláakal baʼal ku toʼokol tumen Yuumtsil» (Salmo 34:19). ¿Bix u beetik Dios lelaʼ? Le ka tu kʼáataj apóstol Pablo tiʼ Jéeoba ka luʼsaʼak tiʼ «jumpʼéel mukʼyaj bey jeʼel bix jumpʼéel kʼiʼix chʼiikil [tu] wíinklileʼ», Jéeobaeʼ tu yaʼalaj tiʼ: «In páajtalileʼ ku yeʼesikuba [maas] maʼalob wa juntúul máak minaʼan u muukʼ» (2 Corintoiloʼob 12:7-9). Jéeobaeʼ, ¿baʼax tu yaʼalaj u tsʼáaik tiʼ Pablo, yéetel baʼax ku yaʼalik u tsʼáaiktech? Maʼ tu yaʼalik u luʼsiktech le muʼyajiloʼ, baʼaxeʼ ku yaʼalik u tsʼáaiktech u muukʼil utiaʼal a aktáantik.
20. Kex jeʼel baʼalak talmil ka k-aktáanteʼ, ¿baʼax ku jaajkúuntiktoʼon 1 Pedro 5:6, 7?
20 Le apóstol Pedrooʼ tu tsʼíibtaj: «Kabalchajak túun a wóoleʼex yáanal u páajtalil u kʼab Jajal Dios, utiaʼal ka líikʼsakeʼex tumen letiʼ le ken kʼuchuk u kʼiinil. Pʼateʼex tuláakal a yaamyam óolaleʼex tu kʼab Jajal Dios, tumen letiʼeʼ u tsʼaamaj u yóol u kanáanteʼex» (1 Pedro 5:6, 7). Jéeobaeʼ jach u yaabiltmech. Letiʼeʼ maʼ ken u pʼatech, yaan u tsʼáaiktech u muukʼil utiaʼal a aktáantik jeʼel baʼalak talamileʼ. Maʼ u tuʼubultecheʼ le máaxoʼob ku chúukpajal u yóoloʼob tiʼ Dioseʼ tiaʼanoʼob «yáanal u páajtalil u kʼab[eʼ]». Wa k-meyajtikeʼ, letiʼeʼ yaan u tsʼáaiktoʼon u muukʼil utiaʼal k-aktáantik le talamiloʼoboʼ. Wa ku chúukpajal k-óoleʼ, mix baʼal jeʼel u beetik k-náachtal tiʼ letiʼeʼ. Le oʼolaleʼ, maʼ u jáawal k-beetik baʼax utstutʼaan Jéeoba; tumen wa k-beetik beyoʼ yaan u yantaltoʼon kuxtal minaʼan u xuul teʼ paraísooʼ yéetel yaan xan k-ilik u kʼuchul u kʼiinil tuʼux mix máak kun lúubul u yóol.
[Tsolajiloʼob]
^ xóot’ol 1 Kʼexaʼan u kʼaabaʼ.
^ xóot’ol 18 Le kʼojaʼanilaʼ maʼ chéen wa baʼax kʼiin lubaʼan u yóol máakiʼ. Ku xáantal jach chiʼichnakchajaʼan yéetel jach lubaʼan u yóol máak. Utiaʼal a wojéeltik u maasil tiʼ lelaʼ xok La Atalaya 15 tiʼ octubre tiʼ 1988, t.jnob. 25-29; 15 tiʼ noviembre tiʼ 1988, t.jnob. 21-24, yéetel 1 tiʼ septiembre tiʼ 1996, t.jnob. 30, 31.
¿Kʼajaʼan wa tech?
• ¿Baʼaxten tak máaxoʼob meyajtik Jéeobaeʼ jach ku lúubul u yóoloʼob?
• ¿Baʼaxoʼob jeʼel u beetkoʼob u lúubul k-óoleʼ?
• ¿Bix u yáantkoʼon Jéeoba utiaʼal k-aktáantik le muʼyajiloʼob yantoʼonoʼ?
• ¿Baʼax u kʼáat u yaʼal k-antal «yáanal u páajtalil u kʼab Jajal Dios»?
[U kʼáatchiʼiloʼob le xookoʼ]
[U tsolajil le oochel teʼ táan juʼun 17]
Máaxoʼob meyajtik Jéeobaeʼ yaan yaʼab baʼax oʼolal u kiʼimaktal u yóoloʼob
[U tsolajil le oochel teʼ táan juʼun 20]
U kʼaʼaytaj máak tiʼ telefonoeʼ upʼéel bix u yeʼesik u yaabilaj tiʼ Jéeoba