Baʼax jeʼel u yáantkoʼon utiaʼal maʼ k-sen tuukuleʼ

¿TALAM wa a wilik a luʼsik ichil a tuukul baʼaloʼob maʼatan u taasikoʼobtech mix upʼéel uts? ¿Séeb wa a kʼuuxil wa u lúubul a wóol? ¿Ka jach chiʼichnaktal wa yoʼolal le talmiloʼob yaan tiʼ le kuxtalaʼ? ¿Baʼax jeʼel u páajtal a beetkeʼ?

U jaajileʼ tuláakal máak ku yuʼubikuba beyaʼ. Baʼaleʼ, wa ku kanik máak u controlart le baʼaxoʼob ku yuʼubikoʼ jeʼel u yantal kiʼimak óolal tiʼeʼ. Le Bibliaoʼ ku yaʼalikeʼ, le chiʼichnakiloʼob yéetel le talmiloʼoboʼ jeʼel u beetkoʼob u jáawal k-tuukul tu beeleʼ yéetel jeʼel tak u beetkoʼob k-aʼalik wa k-beetik baʼaloʼob maʼ maʼalobtakeʼ (Eclesiastés 7:7). Tsʼoʼoleʼ, yoʼolal le sen baʼaloʼob kʼaastak ku yúuchul teʼ yóokʼol kaabaʼ tuláakal máak ku sen chiʼichnaktal. Baʼaleʼ, le Bibliaoʼ ku yaʼalik: «Tsʼoʼok in wilikeʼ minaʼan mix baʼal [maas] maʼalob tiʼ wíinik ka u [kiʼimakkúunt] u yóol yéetel u meyaj» wa yéetel baʼaxoʼob ku beetik (Eclesiastés 3:22). Utiaʼal túun ka yanaktoʼon kiʼimak óolal ichil k-kuxtaleʼ kʼaʼabéet k-tuukul tiʼ baʼaloʼob jeʼel u taasiktoʼon utsileʼ. ¿Bix jeʼel u páajtal k-beetkeʼ, yéetel baʼax kun áantkoʼon utiaʼal maʼ k-tuukul tiʼ baʼaloʼob maʼatan u taasiktoʼon utsil?

Yaan jujumpʼéel baʼaxoʼob jeʼel u yáantkoʼon utiaʼal maʼ k-tuukul tiʼ baʼaloʼob maʼatan u taasiktoʼon mix upʼéel utsileʼ. Jeʼex wa yaan upʼéel talmil chiʼichnakkúuntkoʼon maʼ tu páajtal k-utskíintkeʼ, maas maʼalob ka k-beet yaanal baʼal utiaʼal maʼ u seguer k-tuklik. Tsʼoʼoleʼ, maʼ xaaneʼ jeʼel u xuʼulul k-chiʼichnaktal yéetel jeʼel xan u líikʼil k-óol wa k-jóokʼol xíimbal, k-uʼuyik upʼéel jatsʼuts paax, k-beetik ejercicio bey xan wa k-áantik utúul máax jach kʼaʼabéet áantaj tiʼeʼ (Beetaʼanoʼob 20:35).

Baʼaleʼ, upʼéel baʼax maas jeʼel u yáantkoʼoneʼ, letiʼe ka k-kʼáat áantaj tiʼ Diosoʼ. Wa maʼ tu xuʼulul k-tuukul tiʼ baʼaloʼob maʼatan u taasiktoʼon utsileʼ, maʼalob ka k-aʼal tiʼ Dios baʼaxoʼob sen chiʼichnakkúuntkoʼon (1 Pedro 5:6, 7). Le Bibliaoʼ ku yaʼaliktoʼon: «Yuumtsileʼ naatsʼ yaan utiaʼal u tok le máaxoʼob kʼiilil u puksiʼikʼaloʼoboʼ [...]. Máak toj u kuxtaleʼ ku mukʼyajtik yaʼabkach kʼaasoʼob, baʼaleʼ tiʼ tuláakal [le baʼaloʼobaʼ] ku toʼokol tumen Yuumtsil» (Salmo 34:18, 19). Baʼaleʼ ¿baʼax jeʼel u yáantkoʼon k-il chéen Dios jeʼel u páajtal u yáantikoʼon yéetel u jóoʼskoʼon tiʼ le talamiloʼoboʼ? (Salmo 40:17.) Baʼax jeʼel u yáantkoʼoneʼ ka k-xok le Bibliaoʼ yéetel ka tuukulnakoʼon tiʼ le tekstos ku yeʼeskoʼobtoʼon jach tu jaajil yaabiltaʼanoʼon tumen Diosoʼ.