Bix jeʼel k-natsʼikba tiʼ le Máax uʼuyik le oracionoʼoboʼ
Bix jeʼel k-natsʼikba tiʼ le Máax uʼuyik le oracionoʼoboʼ
«[¡Techeʼ] ka wuʼuyik payal[chiʼ]! Tuláakal yóokʼol kaab ku taal tiʼ teech.» (SALMO 65: 2.)
1. Wíinikeʼ, ¿baʼaxten jelaʼan tiʼ u maasil baʼaloʼob kuxaʼanoʼob teʼ yóokʼol kaabaʼ? ¿Yéetel baʼax jatsʼuts páajtalil yantoʼon?
TIʼ TULÁAKAL baʼax kuxaʼan teʼ yóokʼol kaabaʼ, chéen tiʼ wíinik tsʼaʼan u páajtalil u adorartik Dios. Chéen toʼon k-uʼuyik u kʼaʼabéetil k-meyajtik Dios. Yéetel chéen tiʼ toʼon yaan u jatsʼuts páajtalil k-natsʼikba tiʼ k-Taata yaan teʼ kaʼanoʼ.
2. ¿Baʼax úuch ka kʼebanchaj Adán yéetel Eva?
2 Dioseʼ tu beetaj wíinik yéetel u páajtalil u natsʼikuba tiʼ letiʼ. Ka beetaʼab Adán yéetel Evaeʼ minaʼan kʼeban tu wíinkliloʼob, le oʼolaleʼ ku páajtal kaʼach u tsikbaloʼob tu yéetel Dios jeʼex u beetik utúul hijotsil yéetel u taataeʼ. Baʼaleʼ, ka kʼebanchajoʼobeʼ, pʼáat maʼ tu páajtal u biskubaʼob yéetel Dios jeʼex kaʼacheʼ (Génesis 3:8-13, 17-24). Leloʼ, ¿u kʼáat wa túun u yaʼal, toʼon u paalaloʼon Adaneʼ, tsʼoʼok maʼ tu páajtal k-natsʼikba tiʼ Dios? Maʼatech, jeʼel u páajtaleʼ, tumen Jéeobaeʼ ku chaʼik k-natsʼikba tiʼ letiʼ, baʼaleʼ chéen wa k-beetik jeʼex u kʼáateʼ. ¿Bix u kʼáat ka k-natsʼba tiʼ letiʼ?
Le baʼax ku kʼáatik Dios tiʼ le máaxoʼob taak u natsʼkubaʼob tiʼ letiʼoʼ
3. Toʼon kʼeban wíinkoʼoneʼ, ¿baʼax kʼaʼabéet u yantaltoʼon yéetel baʼax kʼaʼabéet k-beetik utiaʼal k-natsʼikba tiʼ Dios? ¿Yéetel baʼax eʼesiktoʼon jach beyoʼ?
3 Upʼéel baʼax úuch yéetel u paalaloʼob Adaneʼ ku yeʼesiktoʼon baʼax ku kʼáatik Dios tiʼ le máaxoʼob taak u natsʼkubaʼob tiʼ letiʼoʼ. Caín yéetel Abeleʼ tu kʼuboʼob siibaloʼob utiaʼal u natsʼkubaʼob tiʼ Dios. Le baʼax tu kʼubaj Abeloʼ kʼaʼam tumen Dios, baʼaleʼ le baʼax tu kʼubaj Cainoʼ maʼ kʼaʼamiʼ (Génesis 4:3-5). ¿Baʼaxten? Hebreob 11:4 ku yaʼalik baʼaxten: «Tu yoʼolal le oksaj óolaloʼ Abeleʼ tu kʼubaj tiʼ Jajal Dios jumpʼéel siibal [maas] maʼalob tiʼ le tu kʼubaj Cainoʼ, le oʼolaleʼ j-kʼaʼam tumen Jajal Dios bey juntúul máak tojeʼ». Jeʼex túun k-ilkoʼ utiaʼal ka uʼuyaʼak k-oracionoʼob tumen Dioseʼ kʼaʼabéet u yantaltoʼon oksaj óolal wa fe. Uláakʼ baʼax kʼaʼabéet k-beetkeʼ letiʼe baʼax tu yaʼalaj Jéeoba tiʼ Cainaʼ: «Wa ka beet baʼal utseʼ, jeʼel u páajtal a líiʼsik a wicheʼ». Jeʼex k-ilkoʼ, wa Caín ka u beet kaʼach baʼax maʼalobeʼ, tsʼoʼok kaʼach u kʼaʼamal u siibal tumen Jéeobaeʼ. Baʼaleʼ, Caineʼ maʼ tu beetaj le baʼax aʼalaʼab tiʼ tumen Diosoʼ, baʼaxeʼ tu kíimsaj Abel, le beetik túuxtaʼab kajtal náach tiʼ u láakʼtsiloʼob (Génesis 4:7-12). Le baʼax úuch túun tu káajbal wíinikoʼ, ku yeʼeskeʼ utiaʼal k-natsʼikba tiʼ Dioseʼ kʼaʼabéet u yantaltoʼon fe yéetel k-beetik baʼax maʼalob.
4. ¿Baʼax unaj k-éejemtik wa taak k-natsʼikba tiʼ Dios?
4 Uláakʼ baʼax kʼaʼabéet k-beetik utiaʼal ka páatak k-natsʼikba tiʼ Dioseʼ, letiʼe k-éejemtik kʼeban wíinkoʼonoʼ. Le kʼeban yaan t-wíinkliloʼ ku náachkuntkoʼon tiʼ Dios, jeʼex tu yeʼesil Jeremías le ka tu yaʼalaj tiʼ u úuchben kaajil Israeloʼ: «Toʼoneʼ j-kʼebanchajoʼon [...]. [Techeʼ] ta pixaba tiʼ jumpʼéel múuyal utiaʼal maʼ a wuʼuyik k-kʼáat óoloʼob» (Lamentaciones 3:42, 44). Kex beyoʼ, desde úuchileʼ Jéeobaeʼ tsʼoʼok u yeʼeskeʼ ku yuʼubik u oración le máaxoʼob yaan fe tiʼoboʼ, le máaxoʼob ku kʼáat óolaloʼob yéetel u jaajil u yóoloʼoboʼ yéetel ku beetikoʼob xan le baʼax ku yaʼalikoʼ (Salmo 119:145). ¿Máaxoʼob beet beyaʼ, yéetel baʼax k-kanik tiʼ le oracionoʼob tu beetoʼoboʼ?
5, 6. ¿Baʼaxoʼob k-kanik tiʼ le bix úuchik u natsʼkuba Abraham tiʼ Jéeobaoʼ?
5 Abrahameʼ utúul tiʼ le máaxoʼob tu natsʼubaʼob tiʼ Diosoʼ. Jéeobaeʼ tu chaʼaj u náatsʼal Abraham tiʼ letiʼ, yéetel tu yaʼaleʼ u amigo (Isaías 41:8). ¿Baʼax jeʼel k-kanik tiʼ le bix úuchik u natsʼikuba Abraham tiʼ Diosoʼ? Utéenjeakileʼ, tu kʼáataj tiʼ Jéeoba tiʼ máax ken u pʼat tuláakal baʼax yaan tiʼ ken kíimik, letiʼeʼ tu yaʼalaj: «Yuumtsil, ¿baʼax u biilal teen ka a tsʼáaten boʼolal, wa jach a wojel minaʼan in paalal?» (Génesis 15:2, 3;17:18). Uláakʼ utéeneʼ, le u kaʼaj xuʼulsbil u kʼasaʼan kaajiloʼob Sodoma yéetel Gomorra tumen Jéeobaeʼ, Abrahameʼ tu kʼáataj tiʼ Jéeoba wa yaan u xuʼulsik tuláakal u máakiloʼob le kaajoʼobaʼ (Génesis 18:23-33). Tu kʼáataj xan tiʼ Jéeoba ka u perdonart uláakʼ máakoʼob (Génesis 20:7, 17). Tu kʼubaj xan siibaloʼob tiʼ Jéeoba jeʼex úuchik u beetik Abeleʼ (Génesis 22:9-14).
6 Jeʼex k-ilkoʼ, Abrahameʼ maʼ sajakchaj tʼaan yéetel Jéeobaiʼ. Baʼaleʼ, kex tu yaʼalaj baʼax ku tuklikeʼ, Abrahameʼ ka tʼaanaj yéetel Jéeobaeʼ tu yeʼesaj nojoch tsiikil tiʼ. Tu libroiʼ Génesis 18:27 k-ilik bix úuchik u yeʼesik tsiikil tiʼ Jéeoba le ka tʼaanaj tu yéeteloʼ: «[Perdonart] in táabal j-tʼaan ta wéetel beyaʼ, tumen techeʼ [Diosech] teneʼ chéen juntúulen j-maʼ óol wíinik». ¿Máasaʼ jach maʼalob ka k-eʼes tsiikil tiʼ Jéeoba jeʼex tu beetil Abrahamoʼ?
7. Le máaxoʼob meyajt Dios úuchiloʼ, ¿baʼax tu kʼáatoʼob tiʼ Jéeoba ichil u oracionoʼob?
7 Uláakʼ máaxoʼob tu meyajtoʼob Dios úuchiloʼ orarnajoʼob xan yoʼolal jejeláas baʼaloʼob, yéetel chʼenxikintaʼaboʼob tumen Jéeoba. Jeʼex Jacobeʼ, le ka tsʼoʼok u kʼáatik u yáantaj Jéeobaeʼ tu yaʼalaj xan tiʼ: «Tuláakal u kʼiiniloʼob in kuxtal bíin in tsʼáatech in [Dios] jun jaats tiʼ u diez jaatsal tiʼ tuláakal baʼax [ken] a tsʼáa tiʼ teen» (Génesis 28:20-22). Ka xan bin u yiluba yéetel u sukuʼuneʼ, Jacobeʼ tu kʼáat óoltaj tiʼ Jéeoba ka kanáantaʼak, letiʼeʼ tu yaʼalaj: «Beetten uts, maʼ a chaʼik in kíimil tu kʼab in sukuʼun Esaú. Saajken ka taalak u beetten loob» (Génesis 32:9-12). Job xaneʼ tu kʼubaj tóokbil baʼalcheʼob tiʼ Jéeoba utiaʼal u kʼáat óoltik ka perdonartaʼak u familia, yéetel le ka xan orarnaj utiaʼal ka perdonartaʼak le óoxtúul máakoʼob ku yaʼalikubaʼob kaʼach u amigoʼoboʼ, Jéeobaeʼ «tu yuʼubaj u payalchiʼ Job» (Job 1:5; 42:7-9). Le baʼaxoʼob tsʼoʼok k-ilkaʼ ku yeʼesiktoʼon baʼax jeʼel u páajtal k-kʼáatik ken orarnakoʼoneʼ. K-kanik xaneʼ Jéeobaeʼ ku chʼenxikintik le oracionoʼob ku beetaʼaloʼob jeʼex u kʼáat letiʼoʼ.
Bix meyajnajik le Ley utiaʼal u natsʼkuba le israelitaʼob tiʼ Jéeobaoʼ
8. ¿Máaxoʼob ku yaʼalik le Ley jeʼel u páajtal kaʼach u kʼáat óolaloʼob tiʼ Jéeoba tu kʼaabaʼ le kaajoʼ?
8 Jéeobaeʼ le ka tsʼoʼok u jóoʼsik le israelitaʼob tu luʼumil Egiptooʼ, tu tsʼáaj u Ley tiʼob. Le Leyaʼ ku yaʼalik kaʼacheʼ unaj u yantal sacerdoteʼob utiaʼal ka páatak u natsʼkuba le israelitaʼob tiʼ Jéeobaoʼ. Le oʼolaleʼ tsʼaʼab jujuntúul levitaʼob utiaʼal ka u beet u sacerdoteiloʼob yéetel utiaʼal ka kʼáat óolnakoʼob tu yoʼolal le kaajoʼ. Ken yanak wa baʼax yaan yil yéetel tuláakal le kaajoʼ, le rey wa utúul profetaeʼ ku orar kaʼach tiʼ Jéeoba tu kʼaabaʼ le kaajoʼ (1 Samuel 8:21, 22; 14:36-41; Jeremías 42:1-3). Jeʼex le ka kʼuʼub le templooʼ, le rey Salomonoʼ orarnaj tiʼ Jéeoba. Utiaʼal u yeʼesik táan u kʼamik le oracionoʼ, Jéeobaeʼ tu beetaj u chuʼupul le templo yéetel u nojbeʼeniloʼ ka tu yaʼalaj: «Bejlaʼeʼ, bíin in chʼenxikint le payalchiʼob ku beetaʼaloʼob [teʼ] kúuchilaʼ» (2 Crónicas 6:12–7:3, 15).
9. ¿Baʼax uláakʼ tu kʼáataj Jéeoba ka beetaʼak utiaʼal ka páatak u natsʼkuba le israelitaʼob tiʼ letiʼoʼ?
9 Le Ley tsʼaʼab tiʼ le israelitaʼoboʼ, ku yaʼalik xaneʼ yaan uláakʼ baʼax ku kʼáatik Jéeoba ka beetaʼak utiaʼal u páajtal u natsʼkuba le israelitaʼob tu yiknaloʼ. ¿Baʼaxiʼ? Tuláakal jaʼatskab kʼiin yéetel chíinil kʼiineʼ u nojchil le sacerdoteʼoboʼ kex yaan kaʼach u kʼubik kíimsbil baʼalcheʼobeʼ, baʼaleʼ unaj xan kaʼach u tóokik kiʼibok incienso tu táan Jéeoba. Ka máan kʼiineʼ, le sacerdoteʼoboʼ tsʼaʼab xan u beetoʼob le meyajaʼ, baʼaleʼ lelaʼ maʼ tu páajtal u beetkoʼob teʼ kʼiin tuʼux ku kʼuʼubul le baʼalcheʼob utiaʼal u perdonartaʼal u kʼebanoʼob le kaajoʼ. Wa maʼ u tóokaʼal le incienso utiaʼal u yeʼesaʼal tsiikil tiʼ Jéeobaoʼ, letiʼ kaʼacheʼ maʼ tu kʼamik le meyaj ku beetik le sacerdoteʼoboʼ (Éxodo 30:7, 8; 2 Crónicas 13:11).
10, 11. ¿Baʼaxoʼob eʼesik Jéeobaeʼ tu kʼamaj le oracionoʼob ku beetaʼal kaʼach tumen cada utúul tiʼ le israelitaʼoboʼ?
10 Le israelitaʼob kaʼachoʼ, ¿ku páajtal wa u natsʼkubaʼob tiʼ Jéeoba chéen yéetel u yáantaj le máaxoʼob tsʼaʼanoʼob utiaʼal ka tʼaanakoʼob tu kʼaabaʼoboʼ? Maʼatech. Le Bibliaoʼ ku yaʼalikeʼ Jéeobaeʼ ku chʼenxikintik le oracionoʼob ku beetik cada utúul tiʼ letiʼoboʼ. Teʼ oración tu beetaj Salomón le ka kʼuʼub le templooʼ, letiʼeʼ tu kʼáat óoltaj tiʼ Jéeoba: «Chʼenxikint túun jeʼel baʼalak payalchiʼil wa jeʼel baʼalak kʼáat óolil bíin beetaʼak tumen jeʼel máaxak, wa kex tumen tuláakal a kaajal Israeleʼ [...]. Chʼenxikint ta kaʼanil tiʼ le kúuchil tuʼux yanechoʼ» (2 Crónicas 6:29, 30). U evangelioi Lucaseʼ ku yaʼalikeʼ utéenjeakileʼ Zacarías, u taata Juan Bautistaeʼ, le táan u tóokik incienso teʼ templooʼ yaʼab israelitaʼobeʼ «táan u payalchiʼob táankab». Maʼ xaaneʼ, le israelitaʼoboʼ suukchaj u muchʼkubaʼob tu táankabil le templo utiaʼal u oraroʼob le táan u tóokaʼal le incienso utiaʼal Jéeoba tu yóokʼol le altar de orooʼ (Lucas 1:8-10).
11 Jeʼex túun k-ilkoʼ, le oracionoʼob ku beetaʼal jeʼex unajoʼ, ku kʼaʼamloʼob tumen Jéeoba, kex ka beetaʼak kaʼach tumen le israelitaʼoboʼ wa tumen le máaxoʼob tsʼaʼanoʼob utiaʼal ka tʼaanakoʼob tu yoʼolaloʼoboʼ. Kex bejlaʼa maʼ kuxaʼanoʼon yáanal le Ley tsʼaʼab tiʼ le israelitaʼoboʼ, le bix u natsʼikubaʼob kaʼach tiʼ Jéeobaoʼ yaʼab baʼax ku kaʼansiktoʼon yoʼolal bix unaj k-orar.
Bejlaʼeʼ k-natsʼikba tiʼ Jéeoba tu yoʼolal Cristo
12. ¿Baʼax u tsʼaamaj Jéeoba utiaʼal u páajtal k-natsʼikba tiʼ letiʼ?
12 Bejlaʼeʼ maʼ kʼaʼabéettoʼon wíinikoʼob utiaʼal ka u beet u sacerdoteiloʼob utiaʼal ka tʼaanakoʼob t-oʼolaliʼ, mix xan kʼaʼabéettoʼon upʼéel templo utiaʼal ka k-pakt ken orarnakoʼoniʼ. Baʼaleʼ, Jéeobaeʼ láayliʼ yaan baʼax u tsʼaamaj utiaʼal u páajtal k-natsʼikba tiʼ letiʼeʼ. ¿Baʼax le u tsʼaamoʼ? Upʼéel templo maʼ beetaʼan tumen wíinikoʼobiʼ, le temploaʼ káaj u meyaj tu jaʼabil 29 teʼ yáax siglo le ka weʼek espíritu santo tu yóokʼol Jesusoʼ. Teʼ kʼiin jeʼelaʼ, tiʼ yéeyaʼab xan utiaʼal u beet u Nojoch Sacerdotei tiʼ le temploaʼ. * Yoʼolal le u kʼiʼikʼel Jesús tu wekaj t-oʼolaloʼ, ku páajtal k-natsʼikba utiaʼal ka k-adorart Jéeoba teʼ templo maʼ beetaʼan tumen wíinikoʼoboʼ (Hebreob 9:11, 12).
13. Bejlaʼeʼ, ¿yéetel baʼax ku keʼetel le oracionoʼob k-beetik tiʼ Jéeobaoʼ?
13 Yaʼab tiʼ le baʼaxoʼob ku beetaʼal kaʼach tu templo Jerusalenoʼ ku yeʼeskoʼob baʼaxoʼob ku beetaʼal bejlaʼa teʼ templo maʼ beetaʼan tumen wíinikoʼoboʼ; jujumpʼéel tiʼ letiʼobeʼ yaan u yiloʼob yéetel le oracionoʼ (Hebreob 9:1-10). Jeʼex le incienso ku tóokaʼal kaʼach tiʼ Jéeoba teʼ Kiliʼich Kúuchil jaʼatskab kʼiin yéetel chíinil kʼiinoʼ, ¿baʼax yéetel ku keʼetel bejlaʼeʼ? U libroi Apocalipsiseʼ, ku yaʼalikeʼ le inciensooʼ «u payalchiʼob le máaxoʼob kiliʼichoʼoboʼ» (Apocalipsis 5:8; 8:3, 4). David xaneʼ tu tsʼíibtaj: «In payalchiʼeʼ ka kʼuchuk ta táan bey u kiʼibokil [inciensoeʼ]» (Salmo 141:2). Bey túunoʼ tu kaajal Jéeobaeʼ le inciensooʼ, u kʼáat u yaʼal le oracionoʼob yéetel le kiʼikiʼ tʼaanoʼob ku kʼamaʼaloʼob tumen Jéeobaoʼ (1 Tesalonicailoʼob 3:10).
14, 15. ¿Bix u natsʼkubaʼob tiʼ Jéeoba 1) le máaxoʼob kun binoʼob kaʼanoʼ? 2) le «uláakʼ j-tamanoʼob[oʼ]»?
14 ¿Máaxoʼob ku páajtal u natsʼkubaʼob tiʼ Jéeoba teʼ templo maʼ beetaʼan tumen wíinikoʼoboʼ? Tu temploi Jerusaleneʼ, le sacerdoteʼob yéetel le levitaʼoboʼ ku meyajoʼob kaʼach tu chichan táankabil le templooʼ, baʼaleʼ chéen le sacerdoteʼob ku páajtal kaʼach u yokloʼob teʼ Kiliʼich Kúuchiloʼ. Le cristianoʼob yéeyaʼanoʼob utiaʼal u binoʼob kaʼanoʼ bey táan u meyajkoʼob Dios tu chichan táankabil yéetel tu Kiliʼich Kúuchilil le templo maʼ beetaʼan tumen wíinikoʼoboʼ, le oʼolal ku páajtal u natsʼkubaʼob tiʼ Dios ich oración yéetel u nojbeʼenkuntkoʼob u kʼaabaʼ.
15 ¿Kux túun le «uláakʼ j-tamanoʼob» kun pʼáatloʼob kuxtal way Luʼumeʼ, baʼax ku yaʼalaʼal tu yoʼolaloʼob? (Juan 10:16.) Le profeta Isaíasoʼ tu yaʼaleʼ, teʼ tsʼook kʼiinoʼobaʼ, u kajnáaliloʼob yaʼab luʼumiloʼobeʼ yaan u adorarkoʼob Jéeoba (Isaías 2:2, 3). Tu yaʼalaj xaneʼ yaan «j-táanxel luʼumiloʼob» ken u muchʼubaʼob utiaʼal u meyajtoʼob Jéeoba. Dios xaneʼ, tu yeʼesaj yaan u kʼamkoʼob, le ka tu yaʼalaj: «Teneʼ bíin in taasoʼob tin kiliʼich witsil, bíin in beet u kiʼital u yóoloʼob tin najil tuʼux ku yúuchul payalchiʼ» (Isaías 56:6, 7). Apocalipsis 7:9-15 ku yaʼalik xan yaan u yantal «yaʼabkach máakoʼob taaljaʼanoʼob tiʼ tuláakal [...] jejeláas kaajoʼob» ken u muchʼkubaʼob utiaʼal u adorarkoʼob Dios yéetel utiaʼal u oraroʼob «bul kʼiin yéetel bul áakʼab» tu nojoch táankabil u templo Dios. Jach ku kiʼimakkúuntik k-óol k-ojéeltik jeʼel u páajtal k-natsʼikba tiʼ Dioseʼ, tumen k-ojel letiʼeʼ ku chʼenxikintik k-oracionoʼob.
¿Bix le oracionoʼob ku chʼenxikintik Diosoʼ?
16. ¿Baʼax k-kanik tiʼ le oracionoʼob tu beetaj le yáax cristianoʼoboʼ?
16 Le yáax cristianoʼoboʼ jach ku oraroʼob kaʼachi. ¿Yoʼolal baʼaxoʼob ku oraroʼob? Le ancianoʼob kaʼachoʼ, ku kʼáatkoʼob u yáantaj Dios utiaʼal u yéeykoʼob le máaxoʼob kun nuʼuktajoʼob teʼ múuchʼuliloʼ (Beetaʼanoʼob 1:24, 25; 6:5, 6). Epafraseʼ orarnaj tu yoʼolal u sukuʼunoʼob (Colosailoʼob 4:12). Le ka kʼaʼal le apóstol Pedrooʼ, le múuchʼulil yaan Jerusalenoʼ orarnaj tu yoʼolal (Beetaʼanoʼob 12:5). Le yáax cristianoʼob xanoʼ tu kʼáatoʼob tiʼ Dios ka áantaʼakoʼob utiaʼal ka u aktáantoʼob le chʼaʼapachtajiloʼ, letiʼobeʼ tu yaʼaloʼob: «Yuumtsil, [...] tsʼáa túun a kʼub óolal tiʼ a palitsiloʼob utiaʼal ka u tseʼektoʼob a maʼalob péektsil x-maʼ sajakil» (Beetaʼanoʼob 4:23-30). Santiago xaneʼ, tu yaʼalaj tiʼ le cristianoʼob ka u kʼáatoʼob naʼatil tiʼ Dios utiaʼal u aktáantkoʼob jeʼel baʼalak talamileʼ (Santiago 1:5). Toʼon xaneʼ ken orarnakoʼoneʼ, ¿k-kʼáatik wa tiʼ Jéeoba baʼaloʼob jeʼex le tsʼoʼok aʼalikaʼ?
17. ¿Bix le payalchiʼob ku chʼenxikintik Diosoʼ?
17 Baʼaleʼ, Jéeobaeʼ maʼ tu chʼenxikintik tuláakal le oracionoʼob ku beetaʼal tiʼoʼ. ¿Bix jeʼel k-ojéeltik wa ku chʼenxikintik le oracionoʼob k-beetik tiʼoʼ? Úuchjeakileʼ Dioseʼ tu chʼenxikintaj u oración le máaxoʼob tu jaajil u yóoloʼob tu natsʼubaʼob tiʼ letiʼoʼ, tu yeʼesoʼob yaan u fejoʼob yéetel tu beetoʼob baʼax maʼalob. Wa toʼon xan k-natsʼikba tiʼ Dios jeʼex tu beetiloʼoboʼ, letiʼeʼ yaan xan u chʼenxikintkoʼon.
18. ¿Baʼax uláakʼ unaj k-beetik utiaʼal ka chʼenxikintaʼak k-oracionoʼob?
18 Yaan xan uláakʼ baʼax unaj k-beetik utiaʼal ka chʼenxikintaʼak k-oracionoʼob. Le apóstol Pablooʼ tu yaʼalaj máakalmáakiʼ: «Tumen tu yoʼolal Cristoeʼ [...], k-natsʼikba tiʼ le Taataoʼ» (Efesoiloʼob 2:13, 18). Jeʼex túun k-ilkoʼ, kʼaʼabéet k-éejemtik chéen tu yoʼolal Jesús ku páajtal k-natsʼikba tiʼ Jéeoba (Juan 14:6; 15:16; 16:23, 24).
19. 1) ¿Baʼaxten yaan kʼiineʼ Jéeobaeʼ maʼ kiʼibok tu yuʼubil le incienso tóokaʼab tumen le israelitaʼoboʼ? 2) ¿Baʼax unaj k-beetik utiaʼal ka chʼenxikintaʼak k-oracionoʼob tumen Jéeoba?
19 Jeʼex tsʼoʼok k-aʼalikoʼ, le incienso ku kʼubaʼal tumen le sacerdoteʼob úuchiloʼ u kʼáat u yaʼal le oracionoʼob ku beetaʼal tiʼ Dios yéetel ku kʼamikoʼ. Baʼaleʼ, yanchaj kʼiineʼ Jéeobaeʼ maʼ kiʼibok tu yuʼubil le incienso tóokaʼab tumen le israelitaʼoboʼ. Jeʼex le ka tu tóokoʼob incienso teʼ templo le táan u chintaloʼob tu táan yaanal diosoʼoboʼ (Ezequiel 8:10, 11). Bejlaʼa xaneʼ, utiaʼal Jéeobaeʼ bey upʼéel baʼal tuʼ u oración le máaxoʼob ku yaʼalikoʼob táan meyajkoʼoboʼ baʼaleʼ maʼ tu beetkoʼob baʼax ku yaʼalikoʼ (Proverbios 15:8). Le oʼolaleʼ, wa k-kʼáat ka uʼuyaʼak k-oracionoʼob tumen Jéeobaeʼ, kʼaʼabéet k-bisik upʼéel toj kuxtal. Utiaʼal Jéeobaeʼ bey kiʼibok incienso u oración le máaxoʼob ku kuxtaloʼob jeʼex u kʼáatoʼ (Juan 9:31). Baʼaleʼ, maʼalob xan ka k-núuk le kʼáatchiʼobaʼ: ¿Bix unaj k-orar? ¿Yoʼolal baʼaxoʼob jeʼel u páajtal k-orareʼ? ¿Bix u núukik Dios le oracionoʼoboʼ? Teʼ tuláakʼ xookoʼ yaan u núukaʼal le kʼáatchiʼobaʼ bey xan uláakʼ kʼáatchiʼob.
[Tsolajiloʼob]
^ xóot’ol 12 Ilaʼak le revista La Atalaya 15 tiʼ mayo tiʼ 2001, t.j. 27.
¿Baʼax jeʼel a núukikeʼ?
• Toʼon kʼeban wíinkoʼoneʼ, ¿bix jeʼel u páajtal k-natsʼikba tiʼ Dioseʼ?
• Ken orarnakoʼoneʼ, ¿bix jeʼel k-beetik jeʼex le máakoʼob tu meyajtoʼob Dios úuchiloʼ?
• ¿Baʼax k-kanik tiʼ le oracionoʼob tu beetoʼob le yáax cristianoʼoboʼ?
• ¿Baʼax unaj k-beetik utiaʼal ka kʼuchuk k-oracionoʼob tu yiknal Jéeoba bey kiʼibok inciensoeʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 23]
Dioseʼ, ¿baʼaxten tu kʼamaj u siibal Abel, baʼaleʼ maʼ tu kʼamaj u siibal Cainiʼ?
[U tsolajil le oochel teʼ táan juʼun 24]
«Chéen juntúulen j-maʼ óol wíinik»
[U tsolajil le oochel teʼ táan juʼun 25]
«Bíin in tsʼáatech [...] jun jaats tiʼ u diez jaatsal tiʼ tuláakal baʼax [ken] a tsʼáa tiʼ teen»
[U tsolajil le oochel teʼ táan juʼun 26]
Tu táan Jéeobaeʼ, ¿bey wa kiʼibok incienso k-oracionoʼobeʼ?