Taatatsileʼex kaʼanseʼex tubeel a paalaleʼex

LE KA tʼaanaj le revista Time tiʼ baʼax ku yaʼalik upʼéel libro yoʼolal bix unaj u líiʼsaʼal le paalaloʼoboʼ, tu yaʼalaj: «Le ka tsʼoʼok u máan cien jaʼaboʼob joʼopʼok u kaxtaʼal tumen le sicologoʼob baʼax jeʼel u yáantaj utiaʼal u líiʼsaʼal tubeel le paalaloʼoboʼ, tu yiloʼobeʼ maʼ kʼaʼabéet u seguer u kaxtikoʼobiʼ, baʼaleʼ maʼ tumen wa tsʼoʼok u kaxtikoʼobiʼ, tumen tu yiloʼob minaʼan baʼax jeʼel u yáantajeʼ». Le libro xanoʼ, ku yaʼalikeʼ le paalaloʼoboʼ maases ku beetkoʼob baʼaxoʼob ku yilkoʼob u beetaʼal tumen u yéet paalaliloʼob, maʼ le baʼaxoʼob ku kaʼansaʼaltiʼob tumen u taataʼoboʼ.

Jeʼex k-ilkoʼ, le paalaloʼoboʼ jach séebaʼan jeʼel u kʼaskúuntaʼal u tuukuloʼob tumen u yéet paalaliloʼobeʼ (Proverbios 13:20; 1 Corintoiloʼob 15:33). William Brown, utúul periodistaeʼ, tu yaʼalaj: «Baʼax maas ku kaxtik le táankelem paalaloʼ ka lúubkoʼob utsil tiʼ u yéet paalaliloʼoboʼ. [...] Utiaʼal le táankelem paalaloʼoboʼ maas maʼalob ka kíimkoʼob ke ka pʼáatak maʼ u beetkoʼob le baʼaxoʼob ku beetik u yéet paalaliloʼoboʼ». Wa le taatatsiloʼob maʼatech u yeʼeskoʼob yaabilaj tiʼ u paalaloʼob yéetel wa maʼatech u máanskoʼob tiempo tu yéeteloʼobeʼ, táan u tsʼáaikoʼob tuʼux u kʼaskúuntaʼal u tuukuloʼob tumen u yéet paalaliloʼob.

Tsʼoʼoleʼ, teʼ tu tsʼook kʼiinoʼobaʼ, le familiaʼoboʼ jach táan u aktáantikoʼob upʼéel nojoch talmil, tumen jeʼex u yaʼalik le Bibliaoʼ, yaʼab máakeʼ chéen táan u kaxtik ayikʼaliloʼob, náaysaj óoloʼob yéetel chéen táan u kaxtik u yutsiloʼob. Le oʼolaleʼ, maʼ unaj u jaʼakʼal k-óol ken k-il le paalaloʼob bejlaʼoʼ maʼatech u yuʼubikoʼob u tʼaan u taataʼob, maʼatech u tsʼáaikoʼob u diosboʼotikil yoʼolal baʼax ku beetaʼal tu yoʼolaloʼob yéetel maʼatech u yeʼeskoʼob yaabilaj (2 Timoteo 3:1-3).

Le Bibliaoʼ ku yeʼesikeʼ jach kʼaʼabéet u yantal yaabilaj ichil le familiaoʼ. Le yaabilajaʼ letiʼ péeksik le taatatsiloʼob u kanáant yéetel u líiʼs tubeel u paalaloʼoboʼ, yéetel letiʼ xan péeksik le paalaloʼob u yuʼuboʼob u tʼaan u taataʼoboʼ. Baʼaleʼ, wa le taatatsiloʼob maʼatech u yeʼeskoʼob yaabilaj tiʼ u paalaloʼobeʼ, le paalaloʼoboʼ ken u aktáantoʼob wa baʼax talamileʼ yaan u kʼáatkoʼob áantaj tiʼ yaanal máak, maʼ xaaneʼ tiʼ u yéet paalaliloʼob; lelaʼ jeʼel u beetik u kʼaskúuntaʼal u tuukuloʼobeʼ. Utiaʼal maʼ u yúuchul lelaʼ, le taatatsiloʼoboʼ unaj u nuʼuktik u familiaʼob yéetel le baʼaxoʼob ku yaʼalik le Bibliaoʼ (Proverbios 3:5, 6).

Dios beet u yantal le familiaoʼ

Le ka tsʼoʼoksaʼab u beel Adán yéetel Eva tumen Dioseʼ, letiʼeʼ tu yaʼalajtiʼob: «Yaʼabchajak a paalaleʼex; chupeʼex le yóokʼol kaaboʼ». Bey túun úuchik u kʼuchul yantal le familiaoʼ, tuʼux yaan taatatsil, maamatsil yéetel paalaloʼob (Génesis 1:28; 5:3, 4; Efesoiloʼob 3:14, 15). Jéeobaeʼ tu beetaj wíinik yéetel u naʼatil utiaʼal u líiʼsik maʼalob u paalaloʼob. Baʼaleʼ, tu beetaj xan u tsʼíibtaʼal uláakʼ nuʼuktajoʼob jeʼel u meyaj tiʼ wíinikoʼobeʼ. Jujumpʼéel tiʼ le nuʼuktajoʼobaʼ ku yaʼalikoʼob bix unaj u bisik máak upʼéel toj kuxtal, bix unaj u natsʼkuba máak yiknal Dios yéetel bix unaj u líiʼsaʼal le paalaloʼoboʼ (Proverbios 4:1-4).

Dioseʼ ku yaʼalik tiʼ le taatatsiloʼoboʼ: «Tʼilkúunt ta tuukul [wa «ta puksiʼikʼal», NM] tuláakal le baʼaxoʼob tsʼoʼok in waʼaliktech bejelaʼaʼ. Kaʼambes mantatsʼ tiʼ a paalal; kʼaʼajes tiʼob jeʼel bix ichil a wotocheʼ, bey tiʼ le bejoʼ, bey xan le ken chilakech bey le ken líikʼikech» (Deuteronomio 6:6, 7; Proverbios  1:8, 9). Le tekstooʼ ku yaʼalikeʼ, táanil letiʼe taatatsiloʼob kʼaʼabéet u tsʼáaikoʼob tu puksiʼikʼaloʼob le baʼaxoʼob ku yaʼalik Jéeobaoʼ. ¿Baʼaxten maʼalob ka u beetoʼob beyoʼ? Tumen wa tu puksiʼikʼal le taatatsiloʼob ku jóokʼol le kaʼansaj ku tsʼáaikoʼoboʼ, yaan xan u kʼuchul tu puksiʼikʼal u paalaloʼob yéetel yaan u péekskoʼob u beetoʼob le baʼax ku yaʼalaʼaltiʼoboʼ. Yáax letiʼe taatatsiloʼob unaj u beetkoʼob le baʼax ku kaʼansikoʼob tiʼ u paalaloʼoboʼ, tumen beyoʼ le paalaloʼoboʼ yaan u yilkoʼob jach maʼalob le baʼax ku kaʼansaʼaltiʼoboʼ (Romailoʼob 2:21).

Tiʼ le taatatsil cristianoʼoboʼ, ku yaʼalaʼaltiʼobeʼ desde tu chichnil u mejen paalaloʼob unaj u líiʼskoʼob tiʼ «jumpʼéel toj kuxtal yéetel tiʼ u kaʼansajil Yuumtsil» (Efesoiloʼob 6:4; 2 Timoteo 3:15). Utúul maamatsileʼ tu tsʼíibtaj: «Yaan kʼiineʼ, tumen mejentak k-paalaleʼ, k-tuklik bey mix baʼal jeʼel u páajtal u kanikoʼobeʼ. Baʼaleʼ, le mejen paalaloʼoboʼ maas séeb u tʼíililtiʼob baʼax ku kaʼansaʼaltiʼob, chéen kʼaʼabéet k-ilik k-kaʼanskoʼob tubeel». Leloʼ jach jaaj, le mejen paalaloʼ jach utstutʼaan u kaambaloʼob, tsʼoʼoleʼ wa le taatatsiloʼob u yaabiltmoʼob Jéeobaoʼ, letiʼobeʼ yaan xan u kanik u yaabiltoʼob Jéeoba. Le mejen paalaloʼoboʼ ku kʼuchul u naʼatoʼobeʼ, wa ku beetkoʼob baʼaxoʼob ku yaʼalaʼaltiʼob tumen u taataʼobeʼ yaan u bin utsil tiʼob. Le oʼolaleʼ, le taatatsiloʼob u yaabiltmaj u paalaloʼobeʼ ku yilik u máanskoʼob maʼalob súutukil tu yéeteloʼob, ku tsikbaloʼob tu yéeteloʼob yéetel ku chúukpajal u yóol u kaʼansoʼob tubeel, tsʼoʼoleʼ maʼatech u chéen ilkoʼob u beetkoʼob baʼax maʼ maʼalobiʼ. *

Kanáant a paalaleʼex

Tu luʼumil Alemaniaeʼ, utúul u directori upʼéel escuelaeʼ, tu tsʼíibtaj: «Taatatsileʼex, k-kʼáatikteʼex ka maas tsʼáa a wóoleʼex a kaʼanseʼex a paalaleʼex, maʼ chaʼikeʼex u kaʼansaʼaloʼob tumen le televisionoʼ mix tumen yaanal máakoʼob, tumen teʼex unaj a kaʼansikeʼex tiʼob baʼax unaj u beetkoʼob».

Wa ka chaʼikeʼex u kaʼansaʼaloʼob tumen le televisión wa tumen uláakʼ máakoʼobeʼ, leloʼ u kʼáat u yaʼaleʼ, táan a chaʼikeʼex u kaʼansaʼaloʼob tumen le máaxoʼob maʼatech u beetkoʼob baʼax u kʼáat Diosoʼ (Efesoiloʼob 2:1, 2). Jeʼex upʼéel kʼaʼamkach iikʼ ku kʼiʼitbesik semilla tuláakal tuʼuxeʼ, le tuukul yaan tiʼ le máakoʼob maʼatech u beetkoʼob baʼax u kʼáat Diosoʼ ku kʼiʼitbesik tuláakal tuʼux le «luʼumkabil naʼat [...] tiʼ kʼaasilbaʼal u taal[oʼ]», yéetel ku yoksik tu puksiʼikʼal le máaxoʼob maʼ yiijchajaʼan u naʼatoʼoboʼ (Santiago 3:15). Le tuukul yaan tiʼ le máakoʼob maʼatech u beetkoʼob baʼax u kʼáat Dioseʼ, jeʼel u beetik u kʼastal le baʼaxoʼob yaan tu tuukul yéetel tu puksiʼikʼal máakoʼ. Lelaʼ bey úuchik u yeʼesik Jesús le ka tu yaʼalaj: «Juntúul máak utseʼ baʼaloʼob maʼalobtak ku yaʼalik, tumen le utsoʼ tiʼ yaan tu puksiʼikʼaleʼ; bey xan juntúul máak kʼasaʼaneʼ ku yaʼalik baʼaloʼob kʼaastak, tumen le kʼaasoʼ tiʼ yaan xan tu puksiʼikʼaleʼ. Tumen ku yaʼalik yéetel u chiʼeʼ le baʼax chupmajil u puksiʼikʼaloʼ» (Lucas 6:45). Le oʼolaleʼ, le Bibliaoʼ ku yaʼaliktoʼon: «Utsi kanáant a tuukul [wa a puksiʼikʼal] yéetel chúukaʼan óolal, tumen letiʼ u sayabil a kuxtal» (Proverbios 4:23).

Baʼaleʼ yaan mejen paalaleʼ, kex ka tsoʼolok u nuʼuk tiʼobeʼ maʼatech u yuʼubikoʼob tʼaan (Génesis 8:21). Le oʼolaleʼ, ¿bix jeʼel u yáantaʼaloʼob tumen u taataʼobeʼ? Le Bibliaoʼ ku yaʼalik: «J-maʼ naʼatileʼ u tsʼeʼetsʼek tuukul táankelemil, baʼaleʼ ku lukʼul yéetel jaatsʼil kaʼambesaj» (Proverbios 22:15). Yaan máaxeʼ ku yaʼalikeʼ maʼ maʼalob ka jatsʼaʼak le paalaloʼoboʼ. U jaajileʼ, le Bibliaoʼ ku yaʼalik xan maʼ u beetaʼal loob tiʼ le paalaloʼoboʼ yéetel maʼ u kiimsaj jatsʼtaʼaloʼob. Yaan kʼiineʼ, ken meyajnak le tʼaan «jaatsʼ» ichil le Bibliaoʼ táan u tʼaan tiʼ u jatsʼaʼal le paalaloʼoboʼ, baʼaleʼ yaʼab utéeneleʼ táan u tʼaan tiʼ le autoridad tsʼaʼan tiʼ le taatatsiloʼob utiaʼal ka u tsoloʼob u nuʼuk tiʼ u  paalaloʼob yéetel utiaʼal ka u castigartoʼoboʼ; baʼaleʼ lelaʼ, kʼaʼabéet u beetkoʼob yéetel yaabilaj yéetel jeʼel bix kʼaʼabéeteʼ tumen u kʼáatoʼob u kaxtoʼob u yutsil u paalaloʼob (Hebreob 12:7-11).

Náays a wóoleʼex yéetel a paalaleʼex

Tsʼoʼok u yilaʼaleʼ, utiaʼal ka líikʼik tʼaʼaj le mejen paalaloʼoboʼ kʼaʼabéet u báaxloʼob yéetel u náaysik u yóoloʼob. Le taatatsiloʼoboʼ unaj u jóoʼskoʼob u súutukil utiaʼal u báaxaloʼob yéetel u mejen paalaloʼob, lelaʼ yaan u yáantaj utiaʼal ka u maas bisubaʼob tu yéeteloʼob. Beyoʼ, le taatatsiloʼoboʼ maʼ chéen yaan u yáantkoʼob u paalaloʼob u yéeyoʼob maʼalob náaysaj óoloʼobiʼ, yaan xan u yeʼeskoʼob tiʼ u paalaloʼob utstutʼaanoʼob u máanskoʼob jatsʼuts súutukil tu yéeteloʼob.

Utúul taatatsil j-jaajkunajeʼ ku yaʼalikeʼ suukaʼan kaʼach u jóokʼol báaxal bola yéetel u chan hijo ken suunak tu meyaj. Utúul maamatsil xaneʼ ku yaʼalikeʼ, letiʼ yéetel u paalaleʼ suuk kaʼach u jóoʼskoʼob u súutukil utiaʼal u báaxtikoʼob dominó, rompecabezas wa uláakʼ báaxloʼob jeʼex leloʼobaʼ. Utúul kiik xaneʼ ku kʼaʼajsikeʼ letiʼob kaʼach ich familiaileʼ ku jóoʼloʼob u natʼoʼob bicicleta. Tuláakal le paalaloʼobaʼ láaj nuuktakoʼob bejlaʼeʼ, baʼaleʼ láayliʼ jach u yaabiltmoʼob u taataʼobeʼ yéetel jach u yaabiltmoʼob xan Jéeoba.

Wa le taatatsiloʼob ku yaʼalikoʼob yéetel ku yeʼeskoʼob jach tu jaajil u yaabiltmaj u paalaloʼob yéetel ku yeʼeskoʼob jach utstutʼaanoʼob u máanskoʼob jatsʼuts súutukil tu yéeteloʼobeʼ, le paalaloʼoboʼ mix bikʼin bíin u tuʼubsoʼob. Yaʼab tiʼ le sukuʼunoʼob tsʼoʼok u binoʼob teʼ Escuela Bíblica tiʼ Galaad tiʼ le Watchtoweroʼ, tsʼoʼok u yaʼalikoʼobeʼ le baʼax péeksoʼob utiaʼal ka u maas tsʼáa u yóoloʼob u meyajtoʼob Jéeobaeʼ letiʼe baʼaxoʼob tu yiloʼob u beetaʼal tumen u taataʼoboʼ yéetel le bix úuchik u líiʼsaʼal u yóoloʼoboʼ. Lelaʼ upʼéel baʼal jach jatsʼuts yéetel jach ku taasik kiʼimak óolal tiʼ le taatatsiloʼoboʼ. Kex maʼ tuláakal le paalaloʼob jeʼel u páajtal u beetik u precursoriloʼob wa u misioneroiloʼob ken nuukchajkoʼoboʼ, baʼaleʼ tuláakloʼob ken u jóoʼsoʼob utsil wa u taataʼob ku yeʼeskoʼob u yaabilmoʼob Dios, wa ku jach biskubaʼob maʼalob tu yéeteloʼob yéetel wa ku tsʼáaikoʼob ichil u kuxtaloʼob le baʼax ku kaʼansikoʼob tiʼ u paalaloʼoboʼ (Proverbios 22:6; Efesoiloʼob 6:2, 3).

Le familiaʼob tuʼux chéen le taatatsil wa le maamatsil líiʼsik le paalaloʼoboʼ jeʼel u bin utsil tiʼobeʼ

Bejlaʼeʼ, yaʼab mejen paalaleʼ chéen letiʼe taatatsil wa chéen letiʼe maamatsil líiʼskoʼoboʼ. Kex ku chan talamtal u líiʼsaʼal le paalaloʼob ichil familiaʼob beyaʼ, baʼaleʼ leloʼ maʼ u kʼáat u yaʼal wa maʼ tu páajtal u bin utsil tiʼobiʼ. Upʼéel baʼax jeʼel u líiʼsik u yóol le taatatsiloʼob chéen tu juunaloʼob ku líiʼsik u paalaloʼoboʼ, letiʼe baʼax ku yaʼalik le Biblia tu yoʼolal Eunice, utúul judía tu meyajtaj Jéeoba teʼ yáax siglooʼ. Letiʼeʼ tsʼokaʼan u beel kaʼach yéetel utúul máak maʼatech u meyajtik Dios, le oʼolaleʼ, maʼ xaaneʼ maʼ áantaʼab u kaʼans tiʼ u chan hijo bix unaj u meyajtik Diosiʼ. Baʼaleʼ, letiʼeʼ jach maʼalob úuchik u kaʼansik Timoteo, u hijo. Le maʼalob kaʼansaj tu tsʼáaj tiʼ Timoteo tu chichniloʼ, bey xan le tu tsʼáaj Loida, u abuela Timoteooʼ, tu yáantaj Timoteo utiaʼal maʼ u chaʼik u kʼaskúuntaʼal u tuukul tumen u yéet paaliloʼob (Beetaʼanoʼob [Hechos] 16:1, 2; 2 Timoteo 1:5; 3:15).

Yaʼab táankelem paalaloʼob líiʼsaʼaboʼob ich upʼéel familia tuʼux utúul tiʼ le taatatsiloʼob maʼatech u meyajtik Jéeoba wa ichil upʼéel familia tuʼux yaan chéen le taatatsil wa le maamatsiloʼ, láayliʼ xan ku yeʼeskoʼob jatsʼuts modos jeʼex le tu  yeʼesaj Timoteooʼ. Utúul tiʼ letiʼobeʼ Ryan, utúul xiʼipal yaan 22 jaʼaboʼob tiʼ yéetel precursor regular. Ryan, u sukuʼun yéetel u kiikeʼ chéen u maama líiʼsoʼob. U taataʼob kaʼacheʼ jach ku káaltal, yéetel kampʼéel jaʼaboʼob yaan tiʼ Ryan ka pʼataʼaboʼob. Ryaneʼ ku kʼaʼajsik: «In maamaeʼ jach u kʼáat kaʼach ka k-meyajt Jéeoba mantatsʼ, yéetel jach tu tsʼáaj u yóol u kaʼansoʼon».

Ryaneʼ ku yaʼalik xan: «In maamaeʼ, ku jach ilik wa le máaxoʼob yéetel k-bisikbaoʼ u yaabiltmoʼob xan Jéeoba. Mix utéen tu chaʼaj k-bisikba yéetel máaxoʼob maʼatech u beetkoʼob baʼax u kʼáat Dios, mix tak yéetel le ku yaʼalikubaʼob sukuʼunoʼoboʼ. Tu kaʼansaj xan toʼon bix unaj k-ilik u sen kaʼantal u xook máak». Kex u maama Ryan jach yaʼab u meyaj yéetel jach kaʼanaʼan ken suunakeʼ, tu yilaj u kaʼansik u paalal yéetel u tsʼáaiktiʼob le baʼax kʼaʼabéettiʼoboʼ. Ryaneʼ ku yaʼalik: «Ku yilik u jóoʼsik u súutukil utiaʼal ka tsikbalnak t-éetel. Jach chúukpaj u yóol u kaʼansoʼon, yéetel mix utéen tu chéen ilaj k-beetik baʼax maʼ maʼalobiʼ, ku beetik xan kaʼach tuláakal le ku páajtal utiaʼal ka xooknakoʼon ich familiai. Yéetel mantatsʼ tu yilaj u beetik baʼax ku yaʼalik le Bibliaoʼ».

Ken u kʼaʼajs Ryan bix líiʼsaʼabikoʼobeʼ, ku yilkeʼ le baʼax maas áantoʼoboʼ letiʼe bix yaabiltaʼanil Jéeoba tumen u maamaoʼ yéetel le yaabilaj eʼesaʼabtiʼoboʼ. Le oʼolaleʼ taatatsileʼex, wa tu kaʼatulaleʼex ka líiʼsik a paalaleʼex, bey xan wa chéen ta juunaleʼex tumen kimen a núupeʼex wa tumen maʼatech u meyajtik Dioseʼ, maʼ u lúubul a wóoleʼex yoʼolal le talmil ka aktáantikeʼexoʼ, baʼaxeʼ kaʼanseʼex mantatsʼ tiʼ a paalaleʼex u beetoʼob baʼax u kʼáat Jéeoba. Maʼ xaaneʼ, yaan tiʼ le paalaloʼoboʼ jeʼel u jóoʼloʼob ichil u kaajal Dios, jeʼex tu beetil le xiʼipal tiʼ le tʼaanaj Jesús tiʼ upʼéel kettʼaaneʼ. Baʼaleʼ, ken u yiloʼob mix upʼíit utsil ku taasik le yóokʼol kaaboʼ, maʼ xaaneʼ jeʼel u kaʼa suutoʼob ichil u kaajal Jéeobaeʼ. K-ilik túuneʼ, wa le taatatsiloʼob ku kaʼansik u paalaloʼob u yaabiltoʼob Jéeobaoʼ yaan u yantaltiʼob kiʼimak óolal bey xan tiʼ u paalaloʼob (Proverbios 20:7; 23:24, 25; Lucas 15:11-24).

[Tsolajiloʼob]

[U tsolajil le oochel teʼ táan juʼun 11]

DIOS YÉEY

U TAATAʼOB JESÚS

[U tsolajil le oochel teʼ táan juʼun 11]

Ka tu túuxtaj Dios u Hijo utiaʼal ka síijik way Luʼumeʼ, jach tu yilaj máaxoʼob jeʼel u líiʼskoʼob tubeeleʼ. Baʼaleʼ, letiʼeʼ maʼ tu yéeyaj máaxoʼob ayikʼaloʼobiʼ, tu yéeyaj utúul xiib yéetel utúul koʼolel óotsiloʼob yéetel jach u tsʼaamaj u yóoloʼob u meyajtoʼob Dios; letiʼobeʼ jach maʼalob úuchik u líiʼskoʼob Jesús, tu kaʼansoʼob tiʼ baʼaxoʼob ku yaʼalik le Bibliaoʼ, tu kaʼansoʼob meyaj bey xan u beet tuláakal baʼax ku páaʼtaʼal tiʼ letiʼ (Proverbios 29:21; Lamentaciones 3:27). Joseiʼ tu kaʼansaj Jesús meyaj tiʼ carpintería; tsʼoʼoleʼ tumen Jesús letiʼ kaʼach le yáax hijotsiloʼ, aʼalaʼab tiʼ tumen José yéetel tumen María ka u kanáant u yíitsʼinoʼob, leloʼobaʼ yaan kex seis utúulaloʼob kaʼachi (Marcos 6:3).

Tuukulnakoʼon tiʼ bix u yáantaj kaʼach tuláakal u paalaloʼob José yéetel María ken joʼopʼok u líiʼskubaʼob utiaʼal u binoʼob tu kaajil Jerusalén utiaʼal le Pascua ku kʼiimbesaʼal cada jaʼaboʼ (kex 200 kilómetros ku xíimbaltkoʼob utiaʼal u bimbaloʼob yéetel u suutbaloʼob). Upʼéel familia tuʼux yaan kex nueve utúulaloʼobeʼ maʼ chéen chʼaʼabil kaʼach u binoʼob tu kaajil Jerusaleniʼ (Lucas 2:39, 41). Baʼaleʼ, kex chan talam kaʼacheʼ, José yéetel Maríaeʼ ku yilik u binoʼob tu kʼiimbesajil le Pascuaoʼ, yéetel maʼ xaaneʼ le táan u binoʼob kaʼach tu kaajil Jerusalenoʼ ku tsikbaltikoʼob tiʼ u paalaloʼob le nukuch baʼaloʼob tu beetaj Jéeoba yoʼolal u kaajal úuchiloʼ.

Le tiaʼan kaʼach Jesús yéetel u taataʼoboʼ «láayliʼ ku sen uʼuyaj tʼantikoʼobeʼ» yéetel «bin [xan] u nojochtal [...] tiʼ u wíinklil yéetel tiʼ u yojéelaj, kʼambeʼen xan tu táan Jajal Dios yéetel tu táan máakoʼob» (Lucas 2:51, 52). Jeʼex túun k-ilkoʼ, José yéetel Maríaeʼ jach maʼalob tu beetiloʼob le meyaj tsʼaʼabtiʼob tumen Diosoʼ. Le taatatsiloʼob bejlaʼaʼ jach maʼalob xan ka u beetoʼob jeʼex tu beetiloʼob José yéetel Maríaeʼ (Salmo 127:3.)

[U tsolajil le oochel teʼ táan juʼun 11]

 

[U tsolajil le oochel teʼ táan juʼun 11]

 

[U tsolajil le oochel teʼ táan juʼun 11]