«Tuláakal baʼax kʼaʼabéetteʼexeʼ aʼaleʼex mantatsʼ tiʼ Jajal Dios»
«Tuláakal baʼax kʼaʼabéetteʼexeʼ aʼaleʼex mantatsʼ tiʼ Jajal Dios»
«Tuláakal baʼax kʼaʼabéetteʼexeʼ aʼaleʼex mantatsʼ tiʼ Jajal Dios ich payalchiʼ, kʼáat óolneneʼex tiʼ yéetel tsʼaʼex gracias tiʼ xan» (FILIPOSILOʼOB 4:6.)
1. ¿Máax yéetel jeʼel u páajtal k-tʼaan jeʼel baʼalak ora yéetel jeʼel tuʼuxak ka yanakoʼoneʼ, yéetel baʼaxten ku kiʼimakkúuntik k-óol lelaʼ?
KOʼOX aʼalikeʼ, techeʼ ka bin a wuʼuy wa jeʼel u páajtal a tʼaan yéetel u presidentei le luʼum tuʼux kajaʼanechoʼ. A tuklikeʼ, ¿jeʼel wa u kʼamikecheʼ? ¿Máasaʼ jach talam ka páajchajak a tʼaan tu yéetel? Baʼaleʼ, lelaʼ maʼ bey u yúuchul yéetel Jéeoba, le Máax yaan tuláakal páajtalil tiʼoʼ. Letiʼeʼ ku chʼenxikintkoʼon jeʼel baʼalak oraeʼ yéetel jeʼel tuʼuxak ka yanakoʼoneʼ. Dioseʼ mantatsʼ ku chʼenxikintik k-oracionoʼob wa k-beetik jeʼex utstutʼaanoʼ (Proverbios 15:29). K-ojéeltik lelaʼ, jach ku kiʼimakkúuntik k-óol. Le oʼolaleʼ, ¿máasaʼ mantatsʼ unaj k-orar tiʼ Jéeoba, le Máax uʼuyik le oracionoʼoboʼ? (Salmo 65:2.)
2. ¿Bix jeʼel u yuʼubaʼal k-oracionoʼob tumen Dioseʼ?
2 Baʼaleʼ, yaan máax jeʼel u tuklikeʼ: «¿Bix jeʼel u yuʼubik Dios in oracionoʼobeʼ?». Le Bibliaoʼ ku yaʼalik upʼéel baʼax kʼaʼabéettoʼon utiaʼal ka uʼuyaʼak k-oracionoʼob: «Maʼ tu páajtal u lúubul máak utsil tu táan Jajal Dios wa minaʼan [u] oksaj óolal, tumen utiaʼal u natsʼikuba máak tiʼeʼ, kʼaʼabéet u yoksaj óoltaʼal yaan Jajal Dios yéetel letiʼeʼ ku boʼotik le máaxoʼob kaxtikoʼ» (Hebreob 11:6). Jeʼex t-ilaj teʼ xook máanikoʼ, utiaʼal k-natsʼikba tiʼ Dioseʼ kʼaʼabéet u yantaltoʼon oksaj óolal wa fe. Jéeobaeʼ ku chʼenxikintik k-oracionoʼob wa yantoʼon fe, wa táan k-beetik baʼax maʼalob yéetel wa k-beetik yéetel u jaajil k-óol.
3. 1) Jeʼex tu beetil yaʼab xiiboʼob yéetel koʼoleloʼob úuchileʼ, ¿yoʼolal baʼax jeʼel u páajtal k-orareʼ? 2) ¿Baʼax ku yeʼesik le baʼax tu yaʼalaj Pablo teʼ Filiposiloʼob 4:6, 7?
3 Le apóstol Pablooʼ tu yaʼalaj tiʼ le yáax cristianoʼoboʼ: «Maʼ a sen sen tuukuleʼex tu yoʼolal mix baʼal, baʼaleʼ tuláakal baʼax kʼaʼabéetteʼexeʼ aʼaleʼex mantatsʼ tiʼ Jajal Dios ich payalchiʼ, kʼáat óolneneʼex tiʼ yéetel tsʼaʼex gracias tiʼ xan» (Filiposiloʼob 4:6, 7). Le Bibliaoʼ ku tʼaan tiʼ yaʼab xiiboʼob yéetel koʼoleloʼob tu yaʼaloʼob tiʼ Jéeoba baʼax chiʼichnakkúuntkoʼob, jujuntúul tiʼ letiʼobeʼ Ana, Elías, Ezequías yéetel Daniel (1 Samuel 2:1-10; 1 Reyes 18:36, 37; 2 Reyes 19:15-19; Daniel 9:3-21). U jaajileʼ, jach maʼalob ka k-beet jeʼex tu beetiloʼoboʼ. Pablo xaneʼ yéetel le baʼax tu yaʼaloʼ tu yeʼeseʼ jeʼel u páajtal k-orar utiaʼal k-tsʼáaik gracias tiʼ Dios yoʼolal baʼax ku beetik t-oʼolaleʼ, jeʼel xan u páajtal k-sen orar utiaʼal k-kʼáat óolal tiʼ Jéeobaeʼ wa utiaʼal k-kʼáatik wa baʼax tiʼeʼ (Lucas 11:2, 3). Jéeobaeʼ jach utstutʼaan ka orarnakoʼon utiaʼal k-tsʼáaik nib óolal wa gracias tiʼ, utiaʼal k-kʼáat óolal tiʼ wa utiaʼal k-kʼáatik wa baʼax.
4. Wa Jéeoba u yojel baʼax kʼaʼabéettoʼoneʼ, ¿baʼaxten unaj k-kʼáatik tiʼ?
4 Baʼaleʼ, maʼ xaaneʼ jeʼel k-tuklikeʼ: «¿Maʼ wa u yojel Jéeoba baʼax kʼaʼabéettoʼoniʼ?». U jaajileʼ u yojel (Mateo 6:8, 32). Wa beyoʼ, ¿baʼaxten túun u kʼáat ka k-aʼal tiʼ? Utiaʼal k-naʼatik lelaʼ, koʼox aʼalikeʼ u yuumil upʼéel tiendaeʼ ku yaʼalik yaan u síik wa baʼax tiʼ le máaxoʼob suuk u maanoʼob tu tiendaoʼ, baʼaleʼ, letiʼeʼ ku yaʼalikeʼ, le máax u kʼáat u kʼam le baʼax ken u síioʼ unaj u kʼáatik tiʼ. Le máax maʼ tu beetik lelaʼ ku yeʼesik maʼ u kʼáat u kʼam le baʼax ku síikoʼ. Bey túun xanoʼ maʼ t-orar tiʼ Jéeoba utiaʼal k-kʼáatik baʼax kʼaʼabéettoʼoneʼ, k-eʼesik maʼ k-kʼáat kʼam le áantaj jeʼel u tsʼáaiktoʼonoʼ. Jesuseʼ tu yaʼalaj: «Kʼáateʼex ka a kʼameʼex» (Juan 16:24). Wa k-beetik beyaʼ, k-eʼesik táan k-kʼubik óol tiʼ Jéeoba.
Bix unaj k-orar
5. ¿Baʼaxten unaj k-orar tu kʼaabaʼ Jesús?
5 Jéeobaeʼ maʼ u tsʼaamajtoʼon upʼéel nojoch lista tuʼux ku yaʼaliktoʼon bix unaj k-natsʼikba tiʼ letiʼiʼ, baʼaleʼ le Bibliaoʼ ku yaʼaliktoʼon bix u kʼáat letiʼ ka k-beete. Yáax baʼax kʼaʼabéeteʼ, letiʼe baʼax tu yaʼalaj Jesús tiʼ u disipuloʼobaʼ: «Tu jaajil kin waʼalik tiʼ teʼex, tuláakal baʼax ka a kʼáateʼex tin kaabaʼ tiʼ le Taataoʼ, bíin u tsʼáateʼex» (Juan 16:23). K-ilik túuneʼ, ken orarnakoʼone kʼaʼabéet k-beetik tu kʼaabaʼ Jesús, beyoʼ k-eʼesik k-éejemtik chéen letiʼ tsʼabaʼan tumen Dios utiaʼal u taasik yaʼab utsiloʼob tiʼ wíinikoʼob.
6. ¿Bix unaj k-antal ken orarnakoʼon?
6 ¿Bix unaj k-antal ken orarnakoʼon? Le Bibliaoʼ maʼatech u yaʼalik wa yaan upʼéel bix unaj k-antal utiaʼal ka uʼuyaʼak k-oracionoʼob tumen Diosiʼ (1 Reyes 8:22; Nehemías 8:6; Marcos 11:25; Lucas 22:41). Baʼax kʼaʼabéeteʼ ka orarnakoʼon tiʼ Dios yéetel u jaajil k-óol (Joel 2:12, 13).
7. 1) ¿Baʼax u kʼáat u yaʼal le tʼaan amenoʼ? 2) ¿Baʼax súutukil unaj u yaʼalaʼal?
7 ¿Baʼax jeʼel u páajtal k-aʼalik yoʼolal le tʼaan amenoʼ? Le Bibliaoʼ ku yeʼesikeʼ maʼalob ka aʼalaʼak ken tsʼoʼokok upʼéel oración, maases wa ku beetaʼal tu táan yaʼab máakoʼob (Salmo 72:19; 89:52). Le tʼaan ich ebreo ʼa·mén u kʼáat u yaʼal «ka béeyak». Le Diccionario Enciclopédico Espasa 1, ku yaʼalikeʼ le tʼaanaʼ ku yaʼalaʼal ken tsʼoʼokok u beetaʼal upʼéel oración «utiaʼal u yeʼesik máak ku éejemtik le baʼax tsʼoʼok u yaʼalaʼaloʼ wa utiaʼal u yeʼesik jach u kʼáat ka béeychajak». Le oʼolaleʼ, ken u yaʼal máak «amén» wa «ka béeyak» ken tsʼoʼokok u orareʼ ku yeʼesik tu puksiʼikʼal jóokʼ le baʼax tu yaʼaloʼ. Ken tsʼoʼokok u yaʼalik amén utúul sukuʼun utiaʼal u tsʼoʼoksik upʼéel oración tu beetaj tu kʼaabaʼ le múuchʼuliloʼ, ¿baʼax unaj u beetik le muchʼukbaloʼoboʼ? Jeʼel u páajtal xan u yaʼalikoʼob amén chéen tu tuukuloʼobeʼ wa u yaʼalikoʼob utiaʼal ka uʼuyaʼak, beyoʼ ku yeʼeskoʼob ku éejemkoʼob tuláakal le baʼax aʼalaʼab teʼ oracionoʼ (1 Corintoiloʼob 14:16).
8. Ken orarnakoʼoneʼ, ¿bix jeʼel k-beetik jeʼex Jacob yéetel Abrahameʼ, yéetel baʼax ken k-eʼes yéetel leloʼ?
8 Yaan kʼiineʼ Dioseʼ ku chaʼik k-eʼesik bukaʼaj kʼaʼananil k-tiaʼal le baʼax k-kʼáatik tiʼoʼ. Maʼ xaaneʼ jeʼel u kʼaʼabéettal k-beetik jeʼex Jacobeʼ; letiʼeʼ bul áakʼab yanchaj u mukʼulmukʼ yéetel utúul ángel utiaʼal ka bendecirtaʼak (Génesis 32:24-26). Maʼ xaan xaneʼ unaj k-beetik jeʼex Abrahameʼ; letiʼeʼ sen kʼáat óolnaj tu yoʼolal Lot yéetel tu yoʼolal jeʼel máaxak uts ka yanak Sodomaeʼ (Génesis 18:22-33). Jeʼex letiʼeʼ, maʼ xaaneʼ jeʼel u kʼaʼabéettal k-kʼáat óoltik tiʼ Jéeoba ka u yeʼes u justicia, u yutsil yéetel u chʼaʼa óotsilil, utiaʼal beyoʼ ka u yáantoʼon tiʼ wa baʼax kʼaʼanan k-tiaʼal.
Baʼax unaj k-kʼáatik
9. Ken orarnakoʼoneʼ, ¿tiʼ baʼax maas kʼaʼanan ka tʼaanakoʼon?
9 Maʼ u tuʼubultoʼoneʼ Pabloeʼ tu yaʼalaj: «Tuláakal baʼax kʼaʼabéetteʼexeʼ aʼaleʼex mantatsʼ tiʼ Jajal Dios» (Filiposiloʼob 4:6). Lelaʼ u kʼáat u yaʼaleʼ ken orarnakoʼoneʼ jeʼel u páajtal k-tʼaan óoliʼ tiʼ jeʼel baʼalakeʼ; baʼaleʼ maʼ unaj u tuʼubultoʼoneʼ maas kʼaʼanan ka tʼaanakoʼon tiʼ baʼaxoʼob yaan yil yéetel Dios. Lelaʼ bey tuʼ yeʼesil Daniel. Letiʼeʼ le ka tu kʼáat óoltaj tiʼ Jéeoba ka u chʼaʼa óotsilil tiʼ le israelitaʼob táan u muʼyajoʼob yoʼolal u kʼebanoʼoboʼ, tu yaʼalaj: «[¡]Yuumtsil koʼoten a wáantoʼon! ¡Ta woʼolal, in [Dios] yéetel tu yoʼolal a noj kaaj, bey xan tu yoʼolal a kaajal ku payalchiʼitik a kʼaabaʼ[!]» (Daniel 9:15-19). Jeʼex Danieleʼ, yéetel k-oracionoʼobeʼ unaj k-eʼesik k-kʼáat ka nojbeʼenkuntaʼak u kʼaabaʼ Dios yéetel ka béeychajak baʼax u kʼáat.
10. ¿Baʼax eʼesik maʼalob ka orarnakoʼon yoʼolal baʼaxoʼob kʼaʼabéettoʼon?
10 Maʼalob xan ka k-kʼáat tiʼ Dios ka u yáantoʼon k-maas naʼat tubeel le baʼaxoʼob ku kaʼansik le Bibliaoʼ. Lelaʼ bey tu beetil le salmista, le ka tu yaʼalaj: «Tsʼáaten naʼat utiaʼal in tsʼoʼokbesik a kaʼansaj, ¡in kʼáat in wuʼuyajtʼant yéetel tuláakal [in] puksiʼikʼal!» (Salmo 119:33, 34; Colosailoʼob 1:9, 10). Jesús xaneʼ, orarnaj «yéetel j-kʼáat óolnaj yéetel kʼaʼam tʼaan bey xan yéetel u jaʼil u yich, tiʼ Jajal Dios, máax yaan páajtalil tiʼ utiaʼal u tokik tiʼ kíimil» (Hebreob 5:7). Le baʼax tu beetaʼ ku yeʼesiktoʼoneʼ maʼalob ka k-kʼáat óol tiʼ Jéeoba ka u tsʼáatoʼon u muukʼil utiaʼal k-aktáantik jeʼel baʼalak talmil wa muʼyajileʼ. Jesús xaneʼ, le ka tu kaʼansaj tiʼ u disipuloʼob u oracionil le padrenuestrooʼ, ichileʼ tu yaʼalaj maʼalob ka u kʼáat máak ka perdonartaʼak u kʼebanoʼob yéetel ka u kʼáat xan le baʼaxoʼob kʼaʼabéet tiʼ utiaʼal le kʼiinoʼ.
11. ¿Bix u yáantkoʼon le oración utiaʼal maʼ k-lúubul tiʼ baʼax maʼ maʼaloboʼ?
11 Teʼ padrenuestrooʼ, Jesuseʼ tu kʼáataj xan tiʼ Dios: «Maʼ a chaʼik k-lúubul tiʼ túuntaj óolal, baʼaleʼ tokoʼon tiʼ kʼaas» (Mateo 6:9-13). Jesuseʼ tu yaʼalaj xan: «Pʼil ichneneʼex yéetel payalchiʼineneʼex utiaʼal maʼ a lúubuleʼex tiʼ túuntaj óolal» (Mateo 26:41). Le oʼolaleʼ, le tiaʼanoʼon tu kúuchil k-meyaj wa tu kúuchil k-xookeʼ, jach kʼaʼanan ka orarnakoʼon ken joʼopʼok k-túulchʼintaʼal utiaʼal ka k-beet upʼéel baʼal tiaʼan tu contra baʼax ku yaʼalik le Bibliaoʼ. Maʼ xaaneʼ, jeʼel u yantal máaxoʼob aʼaliktoʼon ka táakpajkoʼon tiʼ baʼaloʼob maʼ maʼalobtak tu táan Diosiʼ. Le oʼolaleʼ, jeʼex tu yaʼalil Jesusoʼ maʼalob ka k-kʼáat tiʼ Dios ka u yáantoʼon utiaʼal maʼ k-lúubul tiʼ baʼax maʼ maʼalobiʼ.
12. ¿Yoʼolal baʼaxoʼob jeʼel u páajtal k-tʼaan yéetel Jéeobaeʼ, yéetel baʼax jeʼel k-páaʼtik ka u beeteʼ?
12 Toʼon k-meyajtik Jéeobaeʼ láayliʼ k-aktáantik jejeláas talamiloʼobeʼ. Le kʼojaʼaniloʼoboʼ, le sen loob ku beetaʼaloʼ, le óotsililoʼ yéetel uláakʼ talmiloʼobeʼ, jach jeʼel u beetkoʼob k-chiʼichnaktal wa u lúubul k-óoleʼ. Le oʼolal jach ku líiʼsik k-óol k-ojéeltik Jéeobaeʼ ku chʼenxikintkoʼon ken k-aʼal tiʼ baʼax talamiloʼob k-aktáantik. Le Salmo 102:17 ku yaʼalikeʼ, Jéeobaeʼ ku yuʼubik «u payalchiʼ óotsil» yéetel ku yuʼubik «u kʼáat óolaloʼob».
13. 1) ¿Yoʼolal uláakʼ baʼaxoʼob jeʼel u páajtal k-orareʼ? 2) Aʼal máax beet beyoʼ.
13 U jaajileʼ, jeʼel u páajtal k-orar yoʼolal jeʼel baʼalak yaan yil yéetel k-natsʼikba tiʼ Dios wa yéetel k-meyajtikeʼ (1 Juan 5:14). Le oʼolal maʼalob ka u kʼáat máak u yáantaj Dios tiʼ baʼaloʼob yaan yil yéetel u tsʼoʼokol u beel, u meyaj, wa u maas táakpajal teʼ kʼaʼaytaj yéetel teʼ kaʼansajoʼ. Utúul chʼúupal kajaʼan filipinaseʼ taak kaʼach u beetik u precursorai, baʼaleʼ minaʼan kaʼach meyaj tiʼ. Letiʼeʼ ku yaʼalik: «Utiaʼal upʼéel sabadoeʼ tin beetaj upʼéel oración tiʼ Jéeoba utiaʼal ka u yáanten in beet in precursorai. Teʼ kʼiin jeʼeloʼ le táan in kʼaʼaytik upʼéel libro tiʼ utúul chʼúupaleʼ, letiʼeʼ chéen ka tu jáan aʼalajten: “Maʼalob ka xiʼikech lunes temprano teʼ tuʼux kin xookoʼ”. Teeneʼ tin núukaj tiʼ “¿Baʼaxten?”. Letiʼ túuneʼ tu yaʼalajteneʼ táan u kaxtaʼal utúul máax meyajiʼ. Teen túuneʼ, binen in wil le meyajoʼ ka tsʼaʼabten. ¡Maʼ tin tukultaj kaʼach wa jach séeb ken in kaxtil meyajiʼ...!». Jeʼex úuch tiʼ le kiikaʼ yaʼab sukuʼunoʼob xaneʼ jach tsʼoʼok u yilkoʼob u yáantaj Jéeoba. Le oʼolal maʼ unaj u xuʼulul k-aʼalik tiʼ Jéeoba ich oración baʼax talamiloʼob k-aktáantikiʼ bey xan k-kʼáatik u yáantaj.
¿Kux túun wa tsʼoʼok k-lúubul tiʼ kʼeban?
14, 15. 1) ¿Baʼaxten maʼ unaj u jáawal k-orar kex tumen tsʼoʼok lúubul tiʼ kʼebaneʼ? 2) ¿Baʼax uláakʼ jeʼel u yáantaj utiaʼal ka páatak u kaʼa natsʼikuba máak tiʼ Jéeobaeʼ?
14 Le oracionoʼ, ¿bix jeʼel u yáantik utúul máax tsʼoʼok u kʼebantaleʼ? Yaan máaxoʼobeʼ, ken kʼebanchajkoʼobeʼ ku jáawal u oraroʼob, tumen suʼlaktaloʼob u natsʼubaʼob tiʼ Dios; baʼaleʼ leloʼ maʼ maʼalobiʼ. Utiaʼal k-naʼatik baʼaxteneʼ, koʼox tuukul tiʼ utúul u pilotoi upʼéel avión. Letiʼeʼ u yojleʼ, wa ku saʼatleʼ jeʼel u páajtal u kʼáatik áantaj tiʼ máaxoʼob nuʼuktik le avionoʼoboʼ. Baʼaleʼ ¿baʼax jeʼel u yúuchul wa suʼlak u kʼáat áantaj tiʼobeʼ? Maʼ xaaneʼ, leloʼ jeʼel u beetik u yúuchul upʼéel nojoch loobeʼ. Jeʼex le pilotooʼ, máax tsʼoʼok u kʼebantal ku jáawal u orar tumen suʼlakeʼ, jeʼel xan u bin kʼaasil tiʼeʼ. Maʼ unaj u jáawal k-tʼaan yéetel Jéeoba chéen tumen suʼlakoʼon yoʼolal baʼax tsʼoʼok beetkiʼ. Tiʼ máaxoʼob tsʼoʼok u lúubloʼob tiʼ upʼéel kʼebaneʼ, Jéeobaeʼ ku yaʼalik ka orarnakoʼob tiʼ. Le profeta Isaíasoʼ tu yaʼalaj tiʼ le israelitaʼob tsʼoʼok u kʼebantaloʼoboʼ, ka kʼáat óolnakoʼob tiʼ Jéeoba, tumen letiʼeʼ jach «nojoch u saʼatsaj» wa jach ku perdonar (Isaías 55:6, 7). Baʼaleʼ, utiaʼal ka kʼaʼamkoʼon tumen Jéeobaeʼ, yáaxeʼ kʼaʼabéet k-éejemtik tsʼoʼok k-beetik baʼax kʼaas. Utiaʼal lelaʼ kʼaʼabéet u yaatal k-óol yoʼolal baʼax t-beetaj yéetel k-kanáantikba utiaʼal maʼ k-kaʼa lúubul tiʼ baʼax kʼaas (Salmo 119:58; Daniel 9:13).
15 Yaan uláakʼ baʼax oʼolal kʼaʼabéet u orar máak ken lúubuk tiʼ baʼax kʼaas. Le disipulo Santiagooʼ tu yaʼaleʼ, le máax kʼaʼabéet áantaj tiʼeʼ «unaj u tʼanik u nuukiloʼob le [múuchʼuliloʼ], utiaʼal ka payalchiʼinakoʼob tu yoʼolal» utiaʼal beyoʼ ka «líikʼsaʼa[k] tumen Yuumtsil» (Santiago 5:14, 15). Jeʼex túun k-ilkoʼ, le máax tsʼoʼok u lúubul tiʼ kʼebanoʼ kʼaʼabéet u yaʼalik tiʼ Jéeoba le baʼax tsʼoʼok u beetkoʼ, baʼaleʼ kʼaʼabéet xan u yaʼalik tiʼ le ancianoʼob ka orarnakoʼob tu yoʼolal, tumen leloʼ yaan u yáantaj utiaʼal ka páatak u kaʼa natsʼikuba tiʼ Jéeoba.
Jejeláas bix u núukaʼal le oracionoʼoboʼ
16, 17. 1) ¿Bix u núukik Dios le oracionoʼoboʼ? 2) ¿Baʼax tsikbaliloʼob eʼesik ku meyaj tiʼ Jéeobaeʼ le kʼaʼaytaj utiaʼal u núukik le oracionoʼoboʼ?
16 ¿Bix u núukik Dios le oracionoʼoboʼ? Yaan kʼiineʼ, jach séebaʼan yéetel jach chíikaʼan u yilaʼal bix u núukik (2 Reyes 20:1-6). Baʼaleʼ, yaan kʼiin xaneʼ ku maas chan xáantal yéetel maʼ jach chíikaʼan u yilaʼal bix u núukkiʼ. Jeʼex le koʼolel kimen u yíicham tu yaʼalaj Jesús sen kʼáat óolnaj tiʼ utúul juez utiaʼal ka beetaʼak justicia tiʼeʼ, toʼon xaneʼ yaan kʼiineʼ ku kʼaʼabéettal k-sen kʼáat óoltik wa baʼax tiʼ Jéeoba (Lucas 18:1-8). Baʼaleʼ, wa k-orar tiʼ Jéeoba jeʼex u kʼáateʼ, letiʼeʼ mix utéen ken yaʼaltoʼon le tʼaanoʼobaʼ: «Maʼ a beetik in pʼuʼujul» (Lucas 11:5-9).
17 Toʼon k-meyajtik Jéeobaeʼ, k-ojel letiʼeʼ ku núukik le oracionoʼoboʼ. Lelaʼ bey u yeʼesik le baʼaxoʼob k-ilik yaan kʼiin ken jóoʼkoʼon kʼaʼaytajoʼ. Utéenjeakileʼ kaʼatúul kiikoʼob kajaʼanoʼob Filipinaseʼ, le táan u kʼaʼaytajoʼoboʼ, tu pʼatoʼob upʼéel chan tratado tiʼ utúul koʼolel. Le koʼolelaʼ, joʼopʼ u yokʼoleʼ ka tu yaʼalajtiʼob: «Oʼniakileʼ tin kʼáataj tiʼ Dios ka u túuxten wa máax utiaʼal ka u tsolten le baʼax ku yaʼalik le Bibliaoʼ, le oʼolal kin tuklikeʼ táan u núukik le baʼax tin kʼáataj tiʼoʼ». Maʼ úuch tiʼ leloʼ, le koʼolelaʼ joʼopʼ u bin teʼ muchʼtáambaloʼoboʼ. Tiʼ upʼéel u luʼumil Asiaeʼ, utúul sukuʼuneʼ óoliʼ chan sajak kaʼachi, tumen kʼaʼabéet u yokol kʼaʼaytaj tiʼ upʼéel kúuchil maʼ jeʼel máaxak jeʼel u páajtal u yookleʼ; letiʼ túuneʼ orarnaj tiʼ Jéeobaeʼ, tsʼoʼoleʼ ka ook kʼaʼaytaj teʼ kúuchil jeʼeloʼ. Le ka kʼoopnaj tiʼ upʼéel najeʼ, utúul chʼúupal jóokʼiʼ. Le ka tu yaʼalaj baʼax ku máan u beeteʼ, le chʼúupaloʼ túupʼ u yokʼoleʼ ka tu yaʼalaj tiʼeʼ táan u kaxtik kaʼach u j-jaajkunajoʼob Jéeoba, yéetel tsʼoʼok u sen kʼáatik tiʼ Dios ka áantaʼak u kaxtoʼob. Le sukuʼun túunoʼ tu yáantaj le chʼúupal utiaʼal ka u natsʼuba tiʼ le múuchʼuliloʼ.
18. 1) ¿Baʼax unaj k-beetik ken núukaʼak k-oracionoʼob tumen Dios? 2) ¿Baʼax utsiloʼob ken k-kʼam wa k-orar mantatsʼ tiʼ Jéeoba?
18 K-ilik túuneʼ, le oracionoʼ upʼéel maʼalob siibal u tsʼaamajtoʼon Jéeoba, yéetel tsʼoʼok k-ilik xaneʼ ku yuʼubik yéetel ku núukik k-oracionoʼob (Isaías 30:18, 19). Baʼaleʼ, kʼaʼabéet k-jach tsʼáaik cuenta bix u núukik k-oracionoʼob, tumen yaan kʼiineʼ maʼ tu núukik jeʼex táan k-páaʼtikoʼ. Yéetel le ken k-tsʼáa cuenta táan u núukiktoʼoneʼ, maʼ unaj u tuʼubultoʼon k-tsʼáaik u graciasi tiʼ bey xan k-nojbeʼenkúuntik u kʼaabaʼ (1 Tesalonicailoʼob 5:18). Maʼ unaj u tuʼubultoʼon le baʼax tu yaʼalaj le apóstol Pabloaʼ: «Tuláakal baʼax kʼaʼabéetteʼexeʼ aʼaleʼex mantatsʼ tiʼ Jajal Dios ich payalchiʼ, kʼáat óolneneʼex tiʼ yéetel tsʼaʼex gracias tiʼ xan». Le oʼolaleʼ, orarnakoʼon mantatsʼ tiʼ Jéeoba. Wa k-beetik beyaʼ, maʼ kun xuʼulul u núukik k-oracionoʼob yéetel yaan xan k-kʼamik le utsiloʼob tu yaʼalaj Pabloaʼ: «Jajal Dios túuneʼ bíin u tsʼáateʼex u jeetsʼel óolal, lelaʼ maas nojoch tiʼ le ku páajtal u naʼatik máakoʼ; le jeetsʼel óolal [túunaʼ] bíin u kanáant a puksiʼikʼaleʼex yéetel a tuukuleʼex» (Filiposiloʼob 4:6, 7).
¿Baʼax jeʼel a núukikeʼ?
• ¿Baʼax ku yeʼesik le baʼax tu yaʼalaj Pablo teʼ Filiposiloʼob 4:6, 7?
• ¿Bix unaj k-orar?
• ¿Yoʼolal baʼaxoʼob jeʼel u páajtal k-orareʼ?
• Le oracionoʼ, ¿bix jeʼel u yáantik utúul máax tsʼoʼok u kʼebantaleʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 29]
K-orar yéetel u jaajil k-óoleʼ ku yáantkoʼon utiaʼal maʼ k-lúubul tiʼ baʼax maʼ maʼalobiʼ
[U tsolajil le oochel teʼ táan juʼun 31]
Jeʼel u páajtal k-orar utiaʼal k-tsʼáaik gracias tiʼ Dioseʼ, utiaʼal k-aʼalik tiʼ baʼax chiʼichnakkúuntkoʼon wa utiaʼal k-kʼáatik wa baʼaxeʼ