«¡Bukaʼaj in yaakuntmail a kaʼansaj!»

LE SALMO 119 upʼéel kʼaay tuʼux le máax tsʼíibtoʼ ku yeʼesik bix u yilik kaʼach u Tʼaan Dios. Koʼoneʼex ilik jujumpʼéel tiʼ le baʼaxoʼob tu yaʼaloʼ: «Tsʼoʼok in taʼakik a tʼaanoʼob tin puksiʼikʼal». «Tsʼoʼok in tiaʼalintik a tsol tʼaanoʼob.» «Táan in tsʼíiboltik a tsolbeʼen tʼaanoʼob.» «In yaakuntmaj a waʼalmajtʼaanoʼob.» «¡Bukaʼaj in yaakuntmail a kaʼansaj! ¡Bul kʼiin in tsʼaamaj in tuukul tiʼ letiʼ!» «¡Yaan teen tsiikil tiʼ a pʼis óoloʼob!» (Salmo 119:11, 22, 40, 47, 97, 120.)

K-ilik túuneʼ, le salmistaoʼ jach u yaabiltmaj le baʼax ku yaʼalik Diosoʼ. ¿Bey wa xan a wilik le Bibliaoʼ? ¿A kʼáat wa xan a yaabilte? Wa beyoʼ, yáax baʼax kʼaʼabéet a beetkeʼ letiʼe ka suukak a xokik le Biblia sáamsamaloʼ. Jesucristoeʼ tu yaʼalaj: «Maʼ chéen yéetel waaj bíin kuxlak wíinikiʼ, tak yéetel tuláakal u tʼaan [Dios]» (Mateo 4:4). U kaʼapʼéel baʼax kʼaʼabéet a beetikeʼ letiʼe ka tuukulnakech tiʼ le baʼaxoʼob ku yaʼalik le Bibliaoʼ. Wa ka tuukul tiʼ le baʼaxoʼob ku kaʼansik yoʼolal Dios, yoʼolal u modos, yoʼolal le baʼaxoʼob utstutʼaan ka beetaʼak yéetel yoʼolal le baʼaxoʼob u tukulmaj u beetkoʼ, yaan xan a kʼuchul a jach yaabilt le Bibliaoʼ (Salmo 143:5). Baʼaleʼ baʼax maas kʼaʼabéet a beetkeʼ: a tsʼáaik ichil a kuxtal sáamsamal tuláakal baʼax ku kaʼansik (Lucas 11:28; Juan 13:17).

¿Jeʼel wa u taasiktech utsil a jach yaabiltik le baʼaxoʼob ku kaʼansik le Bibliaoʼ? Jeʼeleʼ, le Salmo 119:2 ku yaʼalik: «Kiʼ yóoloʼob le máaxoʼob ku táan óoltikoʼob u yaʼalmaj tʼaan Yuumtsil[oʼ]». U yaʼalmaj tʼaanoʼob wa u leyoʼob Dioseʼ ku yáantik máak u aktáant u talamiloʼob le kuxtalaʼ (Salmo 1:1-3). Ku yáantik xan máak utiaʼal ka u kan u kʼaj óolt baʼax maʼalob ka u beete yéetel tiʼ baʼaxoʼob kʼaʼabéet u kanáantikuba (Salmo 119:98-101). Tsʼoʼoleʼ, u yojéeltaʼal u jaajil tiʼ Dios yéetel tiʼ le baʼax u tukulmaj utiaʼal le Luʼumaʼ yaan u beetik u yuʼubik máak yaan u beelal u kuxtal yéetel yaan u tsʼáaik tiʼ máak u páajtalil utiaʼal u kuxtal minaʼan u xuul (Isaías 45:18; Juan 17:3; Apocalipsis 21:3, 4).

U j-jaajkunajoʼob Jéeobaeʼ jeʼel u yáantkechoʼob a maas naʼat tubeel le kaʼansajoʼob ku taasik le Biblia utiaʼal ka kʼuchkech xan a yaabiltoʼoboʼ. Le oʼolaleʼ, táan k-aʼaliktech ka tsʼíibnakech teʼ dirección ku chíikpajal kabalaʼ.