Kʼaʼabéet k-eʼesik tsiikil yoʼolal le kiliʼich muchʼtáambaloʼob ku yantaltoʼonoʼ
Kʼaʼabéet k-eʼesik tsiikil yoʼolal le kiliʼich muchʼtáambaloʼob ku yantaltoʼonoʼ
«Bíin in taasoʼob tin kiliʼich witsil, bíin in beet u kiʼital u yóoloʼob tin najil tuʼux ku yúuchul payalchiʼ.» (ISAÍAS 56:7.)
1. ¿Baʼaxten unaj k-eʼesik tsiikil tu yoʼolal le muchʼtáambaloʼob ku yantaltoʼonoʼ?
JÉEOBAEʼ úuch joʼopʼok u beetik u muchʼkuba le máaxoʼob yéeyaʼanoʼob utiaʼal u binoʼob kaʼan bey xan le kun pʼáatloʼob way Luʼum, utiaʼal ka adorartaʼak tu «kiliʼich witsil», yéetel ku beetik xan u kiʼimaktal u yóoloʼob teʼ tu «najil payalchiʼ utiaʼal tuláakal kaajoʼob[oʼ]» (Isaías 56:7; Marcos 11:17). Le baʼax tsʼoʼok k-aʼalikaʼ ku yeʼeskeʼ le adoración ku tsʼaʼabal tiʼ Jéeobaoʼ jach kiliʼich. Le muchʼtáambaloʼob ku yantaltoʼonoʼ, ku meyaj utiaʼal k-kaambal yéetel utiaʼal k-adorartik Dios, le oʼolaleʼ kʼaʼabéet k-eʼesik tsiikil tu yoʼolaloʼob; wa k-beetikeʼ yaan k-eʼesik kiliʼich xan k-ilik le baʼax kiliʼich u yilik Diosoʼ.
2. ¿Baʼax eʼesik Jéeobaeʼ kiliʼich u yilik le kúuchil ku yéeyik utiaʼal u adorartaʼaloʼ? Jesuseʼ, ¿bix úuchik u yeʼesik kiliʼich xan u yilik le kúuchil jeʼeloʼoboʼ?
2 Le kúuchil tu yéeyaj Jéeoba utiaʼal ka adorartaʼak tumen le israelitaʼoboʼ unaj u yilkoʼob kaʼach bey upʼéel kiliʼich kúuchileʼ. Le oʼolaleʼ, le tabernáculo yéetel le nuʼukuloʼob yanoʼob ichiloʼ jumpáaykuntaʼaboʼob «utiaʼal u pʼáataloʼob sen kiliʼichoʼob» (Éxodo 30:26-29). U nojoch cuartoi le tabernaculooʼ «ku kʼaabaʼintaʼal Kiliʼich Kúuchil» yéetel u chichan cuartoileʼ«ku kʼaabaʼintaʼal jach Kiliʼich Kúuchil» (Hebreob 9:2, 3). Le ka jeelintaʼab le tabernáculo tumen le templo beetaʼab Jerusalenoʼ, teʼ kaajaʼ tiʼ ku láaj bin kaʼach le israelitaʼob u adorartoʼob Jéeobaoʼ, le oʼolal kʼaabaʼintaʼab «kiliʼich kaaj» (Nehemías 11:1; Mateo 27:53). Le ka kuxlaj way Luʼumeʼ, Jesuseʼ tu yeʼesaj tsiikil yoʼolal le templooʼ yéetel tsʼíikilnaj le ka tu yilaj yaʼab israelitaʼobeʼ chéen ku binoʼob koonoliʼ yéetel yaneʼ chéen ku máanoʼob ichil utiaʼal u xotʼkoʼob bej (Marcos 11:15, 16).
3. ¿Baʼax eʼesik tu úuchben kaajil Israeleʼ jach kiliʼich u yilaʼal le muchʼtáambaloʼoboʼ?
3 Le israelitaʼoboʼ mantatsʼ u muchʼkubaʼob kaʼach utiaʼal u adorartoʼob Jéeoba yéetel utiaʼal u yuʼuboʼob u xokaʼal le Leyoʼ. Ken u beetoʼob le kʼiimbesajiloʼob aʼalaʼantiʼoboʼ ku beetkoʼob xan muchʼtáambaloʼob kʼaj óolaʼanoʼob bey «u kʼiiniloʼob kiliʼich muchʼtal» (Levítico 23:2, 3, 36, 37). Jeʼex tu kʼiiniloʼob Esdras yéetel Nehemíaseʼ, beetaʼab upʼéel nojoch muchʼtáambal tuʼux le levitaʼoboʼ tu tsoloʼob baʼax u kʼáat u yaʼal le Leyoʼ. Baʼaleʼ teʼ muchʼtáambalaʼ «tuláakal le kaaj táan [kaʼach] u yokʼol ikil u yuʼubikoʼob le baʼaxoʼob ku yaʼalik» le Leyoʼ, leʼ oʼolal aʼalaʼabtiʼob «ka u mak u chiʼob maʼ u yokʼoloʼob, tumen le kʼiinoʼ jumpʼéel kʼiin jumpáaykuntaʼan utiaʼal Yuumtsil». Le israelitaʼob túunoʼ, jáaw u yokʼoloʼob yéetel «siete kʼiinoʼob tu kʼiimbesajoʼob u kiʼimak óolalil» u kʼiimbesajil le Paseloʼob wa Cabañasoʼ; «líikʼbal u yáax kʼiin tak u tsʼook kʼiin[eʼ], Esdraseʼ sáamsamal tu xokaj u yaʼalmaj tʼaan [Dios], tu ocho kʼiineʼ yanchaj jumpʼéel [...] muchʼtal, jeʼel bix aʼalaʼanileʼ» (Nehemías 8:7-11, 17, 18.) Jeʼex k-ilkoʼ le muchʼtáambaloʼob ku beetaʼaloʼob teʼ kʼiinoʼob jeʼeloʼoboʼ jach kiliʼichoʼob, le oʼolal le israelitaʼoboʼ unaj u yeʼeskoʼob tsiikil tu yoʼolaloʼob.
K-muchʼtáambaloʼobeʼ kiliʼichoʼob
4, 5. ¿Baʼaxoʼob eʼesik kiliʼich le muchʼtáambaloʼoboʼ?
4 Kex bejlaʼa Jéeoba maʼ u yéeymaj upʼéel kaaj mix upʼéel templo utiaʼal ka adorartaʼakeʼ, baʼaleʼ maʼ u tuʼubultoʼoneʼ le muchʼtáambaloʼob k-beetik utiaʼal k-adorarkoʼ kiliʼichoʼob. Óoxtéen tiʼ upʼéel semana k-muchʼikba utiaʼal k-xokik le Bibliaoʼ, yéetel jeʼex tu kʼiinil Nehemíaseʼ, ku tsoʼolol xan toʼon baʼax ku kaʼansik (Nehemías 8:8). Utiaʼal u káajbal yéetel utiaʼal u tsʼoʼokbal le muchʼtáambaloʼobaʼ ku beetaʼal upʼéel oración, tsʼoʼoleʼ óoliʼ tiʼ tuláakal le muchʼtáambaloʼobaʼ ku kʼayaʼal kʼaayoʼob tiʼ Jéeoba (Salmo 26:12). Le muchʼtáambaloʼoboʼ ku meyajoʼob utiaʼal k-adorartik Jéeoba, le oʼolal tu yorailoʼobeʼ kʼaʼabéet k-kutal chʼenxikinte yéetel k-eʼesik xan tsiikil.
5 Jéeobaeʼ ku tsʼáaiktoʼon u yutsil ken muchʼlakoʼon utiaʼal k-adorartik, utiaʼal k-xokik u Tʼaan yéetel utiaʼal k-paklan líiʼsik k-óol yéetel k-sukuʼunoʼob. Jeʼel tuʼuxak ka yanak upʼéel muchʼtáambaleʼ «Yuumtsileʼ ku túuxtik u kiʼikiʼtʼaan[iʼ]» (Salmo 133:1, 3). Baʼaleʼ utiaʼal k-kʼamik u yutsil Dioseʼ, unaj k-bin teʼ muchʼtáambaloʼoboʼ yéetel k-jach chʼenxikintik le baʼax ku kaʼansaʼaloʼ. Tsʼoʼoleʼ, Jesuseʼ tu yaʼalaj: «Tuʼux yaan kaʼatúul wa óoxtúul muchʼukbal tin kʼaabaʼeʼ, tiʼ yanen chúumuk tiʼobeʼ». Le ka tu yaʼalaj Jesús lelaʼ, táan kaʼach u tʼaan tiʼ ken muchʼlak le ancianoʼob utiaʼal u yutskíintoʼob wa baʼax talmil yaan ichil le sukuʼunoʼoboʼ; baʼaleʼ jeʼel xan u páajtal k-aʼalik tiʼ yaan Jesús teʼ muchʼtáambaloʼoboʼ (Mateo 18:20). Cada ken k-muchʼba tu kʼaabaʼ Cristoeʼ, letiʼeʼ ku tsʼáaiktoʼon le kiliʼich muukʼoʼ, le oʼolal jeʼel u páajtal u yaʼalaʼal tiʼ yaan t-éeteleʼ. ¿Máasaʼ lelaʼ uláakʼ baʼax oʼolal unaj k-ilik jach kiliʼich le muchʼtáambaloʼoboʼ?
6. ¿Baʼax jeʼel u páajtal k-aʼalik yoʼolal le muchʼtáambaloʼob nojochtakoʼob wa chichantakoʼoboʼ?
6 Kex tumen Jéeoba maʼ kajaʼan tiʼ upʼéel templo beetaʼan tumen wíinikeʼ, baʼaleʼ u Najiloʼob Reino tuʼux k-muchʼikbaʼoʼ beetaʼanoʼob utiaʼal k-adorartik Jéeoba (Beetaʼanoʼob [Hechos] 7:48; 17:24). Teʼ kúuchiloʼobaʼ k-muchʼikba utiaʼal k-xakʼalxokik le Bibliaoʼ, utiaʼal k-orar yéetel utiaʼal k-kʼayik kʼaayoʼob tiʼ Jéeoba. Le xan k-beetik ken xiʼikoʼon teʼ nojoch kúuchiloʼob tuʼux ku beetaʼal nojoch muchʼtáambaloʼoboʼ. Le oʼolaleʼ ken k-muchʼba tiʼ upʼéel nojoch kúuchil alquilarbi beetaʼanil, jeʼex upʼéel nojoch local, upʼéel campo tuʼux ku yúuchul báaxaleʼ, teʼ kʼiinoʼob muchʼukbaloʼon teʼeloʼ le kúuchiloʼ ku suut upʼéel kiliʼich kúuchil. Kex wa nojoch wa chichan le muchʼtáambaloʼoboʼ jach unaj k-eʼesik tsiikil, lelaʼ yaan k-eʼesik yéetel baʼax ken k-beet táanil yéetel tu yorai le muchʼtáambaloʼ.
¿Bix jeʼel k-eʼesik tsiikil yoʼolal k-muchʼtáambaloʼobeʼ?
7. ¿Bix jeʼel k-eʼesik tsiikil yoʼolal le muchʼtáambaloʼoboʼ?
7 Yaʼab bix jeʼel u páajtal k-eʼesik tsiikil teʼ muchʼtáambaloʼoboʼ. Upʼéeleʼ letiʼe k-kʼuchul tu yorai utiaʼal k-kʼayik u kʼaayiloʼob le Reinooʼ. Yaʼab tiʼ le kʼaayoʼobaʼ oracionoʼob ku beetaʼal tiʼ Jéeoba, le oʼolal unaj u yeʼesaʼal tsiikil ken kʼayaʼakoʼob. Le apóstol Pablooʼ tu kʼaʼajsaj upʼéel baʼax tu yaʼalaj Jesús tsʼíibtaʼan teʼ Salmo 22, tu yaʼalaj: «Bíin tʼaanaken ta woʼolal tiʼ in sukuʼunoʼob, yéetel bíin in kʼaytech kʼaayoʼob chúumuk u múuchʼul le j-oksaj óoloʼoboʼ» (Hebreob 2:12). Le oʼolaleʼ, kʼaʼabéet tsʼoʼok kutal táanil tiʼ u yaʼalaʼal baʼax kʼaayil kun kʼaybil, yéetel ken kʼaaynakoʼoneʼ kʼaʼabéet k-ilik naʼatik baʼax u kʼáat u yaʼal le baʼax k-kʼaykoʼ. Kʼaʼabéet k-beetik jeʼex u yaʼalik le salmistaaʼ: «Yaan in kiʼikiʼtʼantik Yuumtsil yéetel tuláakal in puksiʼikʼal tiʼ u múuchʼkabil le utsil máakoʼoboʼ» (Salmo 111:1). Le oʼolaleʼ, kʼaʼabéet k-kʼuchul táanil tiʼ u káajal le muchʼtáambaloʼoboʼ yéetel k-páaʼtik tak ken tsʼoʼokok, utiaʼal beyoʼ k-kʼayik jatsʼuts kʼaayoʼob tiʼ Jéeoba.
8. ¿Bix u yeʼesik le Biblia u kʼaʼabéetil u chʼenxikintaʼal le oracionoʼob ku beetaʼal teʼ muchʼtáambaloʼoboʼ?
8 Uláakʼ baʼal jach ku yáantkoʼon utiaʼal k-natsʼikba tiʼ Dioseʼ letiʼe oracionoʼob ku beetaʼal tu yoʼolal le máaxoʼob muchʼukbaloʼoboʼ. Le cristianoʼob teʼ yáax siglooʼ, «junmúuchʼ payalchiʼinajoʼob tiʼ Jajal Dios»; yoʼolal lelaʼ, páajchaj u kʼaʼaytikoʼob «yéetel kʼub óolal u maʼalob péektsil Jajal Dios» kex táan kaʼach u chʼaʼapachtaʼaloʼob (Beetaʼanoʼob 4:24-31). A waʼalikeʼ, ¿yaan wa tiʼ le cristianoʼob táan kaʼach u tuukuloʼob tiʼ yaanal baʼal tu yorai le oracionoʼ? Máasaʼ maʼatech, tumen «tuláakaloʼob junmúuchʼ» u oraroʼob kaʼachi. Le oracionoʼob ku beetaʼal teʼ muchʼtáambaloʼoboʼ ku chíikbeskoʼob bix u yuʼubkuba le máaxoʼob muchʼukbaloʼoboʼ; le oʼolal unaj k-chʼenxikintkoʼob yéetel u jaajil k-óol.
9. ¿Bix uláakʼ jeʼel k-eʼesik tsiikil yoʼolal le kiliʼich muchʼtáambaloʼoboʼ?
9 Uláakʼ bix k-eʼesik tsiikil yoʼolal le muchʼtáambaloʼoboʼ, letiʼe k-líiʼsikba tubeeloʼ. Le nookʼ k-búukintik yéetel le bix k-xáacheʼtik pooloʼ unaj u yeʼesik le tsiikil k-uʼuyik yoʼolal le muchʼtáambaloʼoboʼ. Yoʼolal lelaʼ, Pabloeʼ tu yaʼalaj: «In kʼáateʼ tuláakal tuʼux ka payalchiʼinak máakoʼob, táan u líikʼsikoʼob kiliʼich kʼaboʼob x-maʼ kʼuuxilil mix yéetel baʼateltʼaanoʼobiʼ. Bey xan le koʼoleloʼoboʼ ka u búukintoʼob kʼambeʼen nookʼoʼob, yéetel chʼaʼa subtalil bey xan yéetel kabal óolal ka u jatsʼutskíintubaʼob maʼ yéetel nikiʼ xáacheʼetaʼal u tsoʼotsel pooliʼ mix yéetel oroiʼ, perlaʼob wa koʼokoj nookʼobiʼ, baʼaleʼ yéetel maʼalob meyajoʼob, jeʼel bix unaj u beetikoʼob le koʼoleloʼob tsʼoʼok u jumpáaykuntikubaʼob utiaʼal Jajal Diosoʼ» (1 Timoteo 2:8-10). Wa píiʼkab le kúuchil tuʼux ku beetaʼal le muchʼtáambaloʼ, ken xiʼikoʼoneʼ maʼ xaaneʼ jeʼel u páajtal k-búukintik upʼéel nookʼ maʼalob utiaʼal ooxolileʼ wa maʼ xaaneʼ upʼéel nookʼ utiaʼal keʼelil, baʼaleʼ le nookʼ ken k-tsʼáaoʼ unaj u yeʼesik táan k-meyajtik Dios. Wa k-janal bey xan wa k-chaʼachik chicle tu yorai le noj muchʼtáambaloʼoboʼ, leloʼ ku yeʼesik minaʼan k-tsiikil tiʼ Jéeoba. Le bix u líiʼskuba máak yéetel le baʼax ku beetik tu yorai le muchʼtáambaloʼoboʼ jeʼel u nojbeʼenkuntik Jéeoba, le adoración k-tsʼáaiktiʼoʼ yéetel jeʼel xan u yeʼesik le tsiikil k-uʼuyik tu yoʼolal k-sukuʼunoʼoboʼ.
Le baʼax ku páaʼtaʼal ka k-beet teʼ muchʼtáambaloʼoboʼ
10. ¿Baʼax tu yaʼalaj Pablo yoʼolal le muchʼtáambaloʼ?
10 Teʼ yáax tiʼ Corintoiloʼob capítulo 14, apóstol Pabloeʼ tʼaanaj tiʼ bix unaj u beetaʼal le muchʼtáambaloʼoboʼ, yéetel tu tsʼoʼokbal le capitulooʼ tu yaʼalaj: «Tuláakaleʼ unaj u beetaʼal maʼalob yéetel tu tsoolol» (1 Corintoiloʼob 14:40). Le muchʼtáambaloʼoboʼ ku meyajoʼob utiaʼal k-adorartik Jéeoba, le oʼolal ken xiʼikoʼon muchʼtáambaleʼ unaj k-beetik baʼax ku páaʼtaʼal tiʼ utúul máax meyajtik Dios.
11, 12. 1) ¿Baʼax unaj u kaʼansaʼal tiʼ le mejen paalaloʼob yoʼolal le muchʼtáambaloʼoboʼ? 2) ¿Baʼax maʼalob ka u beet le mejen paalaloʼob teʼ muchʼtáambaloʼoboʼ?
11 Le mejen paalaloʼoboʼ, unaj xan u kutaloʼob yéetel u chʼenxikintkoʼob le muchʼtáambaloʼoboʼ. Le taatatsiloʼoboʼ unaj u kaʼansik tiʼ u paalaloʼobeʼ le Najil Reino yéetel le tuʼux ku beetaʼal u Xookil Librooʼ maʼ kúuchiloʼob utiaʼal u yúuchul báaxliʼ, kúuchiloʼob utiaʼal u adorartaʼal Jéeoba yéetel utiaʼal u xokaʼal le Bibliaoʼ. Le rey Salomonoʼ tu tsʼíibtaj: «Le ken xiʼikech tu [najil Dioseʼ] tukult maʼalob baʼax bíin a beete; [...] natsʼaba yéetel u tuukulil a wuʼuyajtʼantik [Dios]» (Eclesiastés 5:1). Moiseseʼ le ka tu yaʼalaj tiʼ le israelitaʼob u kʼaʼabéetil u muchʼkubaʼobeʼ, tu yaʼalaj xan tu yoʼolal le «mejen paalal[oʼoboʼ]»: «Unaj muchʼukbal tuláakal le kaajoʼ, [...] utiaʼal ka u yuʼuboʼob u xoʼokol le [leyoʼ], tu yoʼolal u kanikoʼob u tsikoʼob Yuumtsil a [Dioseʼex] bey xan ka u tsʼoʼokbesoʼob tuláakal baʼax tsʼíibtaʼaniʼ. Beyoʼ a paalaleʼex maʼ u yojeloʼob mix baʼal tiʼ leloʼ, bíin u yuʼuboʼob utiaʼal ka u kanoʼob u tsikoʼob Yuumtsil» (Deuteronomio 31:12, 13).
12 U jaajileʼ le taatatsiloʼoboʼ ku biskoʼob u paalal teʼ muchʼtáambaloʼob utiaʼal ka u yuʼuboʼob yéetel utiaʼal ka kaambalnakoʼob tiʼ le baʼax ku yaʼalaʼaloʼ. Le paalaloʼoboʼ ken u kanoʼob u chʼenxikintoʼob le muchʼtáambal yéetel ken páajchajak u chan naʼatkoʼob le baʼax ku kaʼansaʼaloʼ, jeʼel u páajtal u núukikoʼob le kʼáatchiʼob ku beetaʼaloʼ (Romailoʼob 10:10). Maʼ xaaneʼ, jeʼel u páajtal u yaʼalikoʼob wa jaypʼéel tʼaanoʼob utiaʼal u núukikoʼob upʼéel kʼáatchiʼ u yojloʼob u núukileʼ. Maʼ xaaneʼ tu káajbaleʼ xokbil ken u beetiloʼob u núukil le kʼáatchiʼoʼ, baʼaleʼ ken máanak kʼiineʼ yaan u kanik u núukoʼob jeʼel bix tu naʼatiloʼobeʼ. U beetkoʼob lelaʼ yaan u taasik yaʼab utsil yéetel kiʼimak óolal tiʼob, baʼaleʼ maʼ chéen tiʼ letiʼobiʼ tak tiʼ le máaxoʼob tsʼoʼok u nojoch máaktaloʼoboʼ. Baʼaleʼ, le taatatsiloʼoboʼ unaj xan u núukikoʼob le kʼáatchiʼoboʼ, utiaʼal ka páatchajak u yeʼeskoʼob tiʼ u paalaloʼob bix unaj u beetkoʼob. Tsʼoʼoleʼ, wa ku páajtaleʼ le mejen paalaloʼoboʼ unaj u yantal u Bibliaʼob, u libroi utiaʼal u kʼaayoʼob bey xan le baʼax kun xokbiloʼ, yéetel kʼaʼabéet xan u kanik u kanáantoʼob. Wa ku beetaʼal beyaʼ, le paalaloʼoboʼ yaan u kanik u yiloʼob jach kiliʼich le muchʼtáambaloʼoboʼ.
13. ¿Baʼax k-tsʼíiboltik ka u yaʼal le máaxoʼob yáax u muchʼkubaʼob t-éeteloʼ?
13 Le muchʼtáambaloʼob k-beetkoʼ maʼ jeʼex le muchʼtáambaloʼob ku beetik le uláakʼ religionoʼob tuʼux maʼatech u yeʼesaʼal yaabilaj, tuʼux tuláakal baʼax kʼaas u yilkoʼob wa tuʼux tak awat tʼaan ku beetaʼaliʼ. Baʼaxeʼ, k-kʼáat ka eʼesaʼak yaabilaj teʼ muchʼtáambaloʼoboʼ yéetel tuláakal máak ka u yuʼububa maʼalobiliʼ, baʼaleʼ maʼ unaj u yilaʼal bey upʼéel kúuchil tuʼux ku bin máak chéen utiaʼal xíimbaliʼ. Le muchʼtáambaloʼoboʼ utiaʼal k-adorartik Jéeoba, le oʼolal le baʼaxoʼob ken k-beetoʼ unaj u yeʼeskoʼob bey k-ilkoʼ. ¿Máasaʼ jach jeʼel u kiʼimaktal k-óol wa ka k-uʼuy u yaʼalaʼal tumen le máaxoʼob yáax u binoʼob muchʼtáambal: «Jajal Dios[eʼ] tiʼ yaan ta wéeteleʼex», tumen tu yiloʼob baʼax k-beetik yéetel baʼax ku beetik k-paalaloʼob? (1 Corintoiloʼob 14:25).
Maʼ kun xuʼulul k-muchʼikba utiaʼal k-adorartik Jéeoba
14, 15. 1) ¿Bix jeʼel k-eʼesik maʼ táan «k-xúumpʼattik u [najil k-Diosiʼ]»? 2) Teʼ kʼiinoʼobaʼ, ¿bix u béeytal le baʼax ku yaʼalik Isaías 66:23?
14 Jeʼex tsʼoʼok k-aʼalikoʼ, Jéeobaeʼ táan u muchʼkíintik u kaajal yéetel táan xan u beetik u kiʼimaktal u yóol tu «najil tuʼux ku yúuchul payalchiʼ» (Isaías 56:7). Nehemíaseʼ tu kʼaʼajsaj tiʼ u yéet judíoiloʼob u kʼaʼabéetil u yeʼeskoʼob tsiikil yoʼolal le templo yaan kaʼach Jerusalenoʼ yéetel u síikoʼob taakʼin utiaʼal u yutskíintaʼal. Tu yaʼalajtiʼob: «Maʼ k-xúumpʼattik u [najil k-Dios]» (Nehemías 10:39). Bejlaʼeʼ, toʼon xaneʼ maʼ unaj u jáawal k-chʼenxikintik le invitación ku beetik Jéeoba utiaʼal ka k-adorart tu «najil tuʼux ku yúuchul payalchiʼ» wa oraroʼ.
15 Le profeta Isaíasoʼ, utiaʼal u yeʼesik maʼ u jáawal k-muchʼikbaeʼ, tu yaʼalaj: «Tu kʼiinil chichan [Lunaeʼ], yéetel tu jujumpʼéelil sábado, tuláakal le j-xiiboʼob bíin taalakoʼob [chintal] tin táan. Teen Yuumtsil tsʼoʼok in waʼalik» (Isaías 66:23). Le tʼaanoʼobaʼ táan u béeytaloʼob teʼ kʼiinoʼobaʼ. Láalaj semana yéetel láalaj meseʼ, toʼoneʼ k-adorartik Jéeoba; lelaʼ k-beetik ken k-muchʼba utiaʼal k-kaambal tiʼ letiʼ bey xan ken jóoʼkoʼon kʼaʼaytaj. Techeʼ, ¿tiaʼanech wa ichil le máaxoʼob mantatsʼ ku binoʼob chintal tu táan Jéeobaoʼ?
16. ¿Baʼaxten unaj u suuktaltoʼon k-bin mantatsʼ teʼ muchʼtáambaloʼoboʼ?
16 Le baʼax ku yaʼalik Isaías 66:23 yaan u jach béeytal teʼ túumben yóokʼol kaab u yaʼalmaj Dios u tsʼáaikoʼ. Ken kʼuchuk le kʼiin jeʼeloʼ jach láalaj semana bey xan láalaj meseʼ, tuláakal máak «bíin taalakoʼob» utiaʼal u adorarkoʼob Jéeoba utiaʼal kʼiinoʼob minaʼan u xuul. Teʼ paraíso kun yantaloʼ, mantatsʼ yaan k-muchʼikba utiaʼal k-adorartik Jéeoba, le oʼolaleʼ unaj u suuktaltoʼon k-bin mantatsʼ teʼ muchʼtáambaloʼoboʼ.
17. Teʼ tu tsʼook kʼiinoʼobaʼ, ¿baʼaxten maas jach kʼaʼabéet k-bin teʼ muchʼtáambaloʼoboʼ?
17 Jach táan u náatsʼal u kʼiinil u xuʼulsaʼal tiʼ le kʼasaʼan yóokʼol kaabaʼ, le oʼolaleʼ kʼaʼabéet k-jach chʼaʼatuklik k-bin tiʼ tuláakal le muchʼtáambaloʼoboʼ. Wa kiliʼich k-ilik le muchʼtáambaloʼoboʼ, maʼ kun pʼáatal maʼ k-bin kex yaʼab meyaj yaan k-beete, kex yaʼab tarea pʼataʼantoʼon wa kex de áakʼab k-bin xook. Kʼaʼabéet k-muchʼikba utiaʼal k-paklan líiʼsik k-óol yéetel k-sukuʼunoʼob. Tsʼoʼoleʼ, le muchʼtáambaloʼoboʼ ku tsʼáaiktoʼon u páajtalil utiaʼal k-maas kʼaj óoltik k-suʼukuʼunoʼob yéetel «utiaʼal ka yanaktoʼon yaakunaj yéetel utiaʼal k-beetik baʼax uts». K-beetik lelaʼ jach kʼaʼanan tumen táan u maas «náatsʼal u kʼiinil Yuumtsil» (Hebreob 10:24, 25). Le oʼolaleʼ, maʼ u jáawal k-bin teʼ muchʼtáambaloʼoboʼ, k-líiʼsikba tubeel bey xan k-eʼesik tsiikil yéetel baʼaxoʼob k-beetik. Wa k-beetik beyaʼ k-eʼesik xan kiliʼich k-ilik le baʼax kiliʼich u yilaʼal tumen Jéeobaoʼ.
Utiaʼal u kʼaʼajsaʼal
• ¿Baʼax eʼesik tu úuchben kaajil Israeleʼ jach kiliʼich u yilaʼal le muchʼtáambaloʼoboʼ?
• ¿Baʼaxoʼob eʼesik kiliʼich le muchʼtáambaloʼoboʼ?
• Le mejen paalaloʼoboʼ, ¿bix jeʼel u yeʼeskoʼob tsiikil yoʼolal le kiliʼich muchʼtáambaloʼoboʼ?
• ¿Baʼaxten unaj u suuktaltoʼon k-bin mantatsʼ teʼ muchʼtáambaloʼoboʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 28]
Kiliʼich tuláakal le muchʼtáambaloʼob ku beetaʼal utiaʼal u adorartaʼal Jéeobaoʼ
[U tsolajil le oochel teʼ táan juʼun 31]
K-paalaloʼobeʼ ku binoʼob teʼ muchʼtáambaloʼob utiaʼal ka u yuʼuboʼob le baʼax ku yaʼalaʼaloʼ yéetel utiaʼal ka kaambalnakoʼob xan