¿Kiliʼich wa k-ilik le baʼaxoʼob kiliʼich u yilik Jéeobaoʼ?
¿Kiliʼich wa k-ilik le baʼaxoʼob kiliʼich u yilik Jéeobaoʼ?
«Kanáantabaʼex utiaʼal beyoʼ [...,] mix juntúul tiʼ teʼex ka nupkʼebanchajak, mix u pʼektik le baʼax kiliʼichoʼ». (HEBREOB 12:15, 16.)
1. ¿Baʼax tuukulil maʼ unaj u yantal tiʼ máaxoʼob meyajtik Jéeoba?
CADA kʼiin ku máaneʼ u máakiloʼob le yóokʼol kaabaʼ táan u pʼáatal mix baʼal u yilkoʼob le baʼaxoʼob kiliʼichoʼoboʼ. Edgar Morin, utúul máak ku xokik bix u kuxtal yéetel bix u biskuba wíinikeʼ, tu yaʼaleʼ tuláakal le baʼax ku yáantik máak kaʼach utiaʼal u yojéeltik baʼax maʼalob yéetel baʼax maʼ maʼalobeʼ, tsʼoʼok u pʼáatal maʼatech u beetaʼal u cuentai tumen le wíinikoʼob bejlaʼaʼ, baʼaxeʼ cada utúuleʼ ku yéeyik bix u tuklik maas maʼalob ka kuxlak. Le tuukul beyaʼ ku chíikbesik «u pixan yóokʼol kaab» yéetel lelaʼ letiʼe tuukul yaan «tiʼ le máaxoʼob maʼ tu yuʼubikoʼob u tʼaan Jajal Diosoʼ» (1 Corintoiloʼob 2:12; Efesoiloʼob 2:2). Baʼaleʼ, toʼon tsʼoʼok k-kʼubik k-kuxtal tiʼ Dios yéetel tsʼoʼok k-tsʼáaikba yáanal u páajtalileʼ maʼ bey k-tuukuloʼ (Romailoʼob 12:1, 2). Baʼaxeʼ, ichil le adoración k-tsʼáaik tiʼ Jéeobaoʼ yaan baʼaxoʼob unaj k-ilik kiliʼichoʼob wa sagradoʼob. ¿Máakalmáakoʼobiʼ? Teʼ xookaʼ yaan k-ilik cinco upʼéelal baʼaloʼob unaj k-ilik kiliʼichoʼob ichil k-kuxtal, yéetel le uláakʼ xookoʼ yaan u tʼaan tiʼ baʼaxten unaj k-ilik kiliʼich le muchʼtáambaloʼoboʼ. Baʼaleʼ, yáaxeʼ koʼoneʼex ilik baʼax u kʼáat u yaʼal le tʼaan kiliʼich wa santooʼ.
2, 3. 1) Le Bibliaoʼ, ¿bix u yeʼesik Jéeobaeʼ jach kiliʼich? 2) ¿Baʼax unaj k-beetik utiaʼal k-eʼesik kiliʼich u kʼaabaʼ Dios?
2 Le tʼaan kiliʼich wa santo ku chíikpajal teʼ Biblia ich hebreooʼ ku tsʼáaik naʼatbil upʼéel baʼal jumpáaykuntaʼan, yéetel ken chʼaʼachiʼitaʼak tiʼ baʼax yaan yil yéetel adoracioneʼ u kʼáat u yaʼal upʼéel baʼal jumpáaykuntaʼan utiaʼal u meyaj tiʼ máak ichil u adoración. Jéeobaeʼ utúul Dios «J-sen kiliʼich» yéetel minaʼan uláakʼ máax sen kiliʼich jeʼex letiʼeʼ (Proverbios 9:10; 30:3). Tu úuchben kaajil Israeleʼ, u nojchil le sacerdoteʼoboʼ, tu pix joʼoleʼ (wa turbanteiʼ) yaan upʼéel chan lamina de oro tuʼux ku yaʼalik: «Le kiliʼichiloʼ utiaʼal Jéeoba» (Éxodo 28:36, 37, NM). Tsʼoʼoleʼ le Biblia xanoʼ ku yaʼalikeʼ, le querubinoʼob yéetel le serafinoʼob yanoʼob tu baʼpaach u trono Jéeobaeʼ ku yaʼalikoʼob: «Kiliʼich, kiliʼich, kiliʼich Yuumtsil» (Isaías 6:2, 3; Apocalipsis 4:6-8). U yaʼalaʼal óox páak lelaʼ ku yeʼesikeʼ Jéeobaeʼ jach kiliʼich yéetel jach minaʼan mix baʼal kʼaas tiʼ letiʼ. Le oʼolal jeʼel u páajtal k-aʼalikeʼ, le kiliʼichiloʼ tiʼ letiʼ u taal.
3 Jéeoba, u kʼaabaʼ Dioseʼ jach kiliʼich xan. Le salmistaoʼ tu yaʼalaj: «Kiʼikiʼtʼantaʼak u nojoch yéetel tsikbeʼen [wa kiliʼich] kʼaabaʼ; Jajal Dioseʼ kiliʼich» (Salmo 99:3, LSM). Le ka tu kaʼansaj Jesús bix unaj k-orareʼ tu yaʼalaj: «K-Yuum yanech teʼ j-kaʼanoʼ, kiliʼichkúunsaʼak a kʼaabaʼ» (Mateo 6:9). María, u maama Jesuseʼ, tu yaʼalaj xan: «In pixaneʼ ku kiʼ tʼantik Yuumtsil. Tumen [...] Jajal Dioseʼ tsʼoʼok u beetik nukuch baʼaloʼob tiʼ teen. ¡Kiliʼich u kʼaabaʼ!» (Lucas 1:46, 49). Bejlaʼeʼ, toʼon k-meyajtik Dioseʼ jach kiliʼich xan k-ilik u kʼaabaʼ yéetel k-kanáantikba utiaʼal maʼ k-beetik wa baʼax jeʼel u taasik subtsilil tiʼ u kʼaabaʼeʼ. Tsʼoʼoleʼ, kiliʼich xan k-ilik le baʼax kiliʼich u yilik letiʼoʼ (Amós 5:14, 15).
Baʼaxten jach unaj k-eʼesik tsiikil tiʼ Jesús
4. ¿Baʼaxten le Bibliaoʼ ku yaʼalik Jesuseʼ kiliʼich?
4 Jesuseʼ, letiʼ«u juntúuliliʼ u Paal» Jéeobaoʼ. Letiʼeʼ beetaʼab tumen le Dios jach kiliʼichoʼ, le oʼolaleʼ letiʼ xaneʼ kiliʼich (Juan 1:14; Colosailoʼob 1:15; Hebreob 1:1-3). Le ka taal way Luʼumeʼ láayliʼ xan kiliʼicheʼ, tumen u kiliʼich muukʼ Dios máans u kuxtal Jesús tu jobnel María utiaʼal ka síijik bey wíinikeʼ. Úuch jeʼex úuchik u yaʼalik le ángel tiʼ Maríaaʼ: «Kiliʼich Pixan kun j-taal ta wóokʼol [...]. Le beetik xaneʼ le kiliʼich chan paal kun síijiloʼ yaan u tʼaʼanal u Paal Jajal Dios» (Lucas 1:35). Tsʼoʼoleʼ, le ka orarnaj xan le cristianoʼob yanoʼob Jerusalenoʼ, le ka tʼaanajoʼob yoʼolal Jesuseʼ, kaʼatéen tu yaʼaloʼob tiʼ Jéeoba: «Jesús a kiliʼich paal» (Beetaʼanoʼob [Hechos] 4:27, 30).
5. ¿Baʼax kiliʼich meyaj tu beetaj Jesús le ka taal way Luʼumeʼ? ¿Baʼaxten jach kiliʼich xan le u kʼiʼikʼel tu tsʼáaj t-oʼolaloʼ?
5 Jesuseʼ taal way Luʼum utiaʼal u beetik upʼéel kiliʼich meyajeʼ. Le ka okjaʼanaj tu jaʼabil 29, yéeyaʼab utiaʼal u beet u Nojoch Sacerdotei tiʼ u kiliʼich templo Jéeoba (Lucas 3:21, 22; Hebreob 7:26; 8:1, 2). Tsʼoʼoleʼ, kʼaʼabéetchaj u kʼubik u kuxtal, tumen u kʼiʼikʼeleʼ ku tsʼáaik tiʼ le kʼeban wíinikoʼob u páajtalil u salvarkubaʼoboʼ (Mateo 20:28; Hebreob 9:14). Le oʼolaleʼ kiliʼich xan k-ilik le u kʼiʼikʼel tu tsʼáaj t-oʼolaloʼ (1 Pedro 1:19).
6. ¿Baʼaxten unaj k-eʼesik tsiikil tiʼ Jesucristo?
6 Le apóstol Pablooʼ tu yeʼesaj baʼaxten jach unaj k-eʼesik tsiikil tiʼ Jesús, le Rey yéetel Nojoch Sacerdoteoʼ, Pabloeʼ tu yaʼalaj: «Jajal Dioseʼ tu tsʼáaj le maas kaʼanal nojbeʼenil tiʼoʼ, yéetel jumpʼéel kʼaabaʼ yaan tu yóokʼol tuláakal kʼaabaʼ. Utiaʼal beyoʼ le ken uʼuyaʼak u kʼaabaʼ Jesuseʼ, ka xolak tuláakal le máaxoʼob yanoʼob teʼ j-kaʼanoʼ, teʼ j-luʼumoʼ yéetel yáanal luʼum, yéetel utiaʼal ka kʼaj óoltaʼak tumen tuláakal máak yéetel ka u yaʼaloʼobeʼ Jesucristoeʼ letiʼ Yuumtsil, utiaʼal u nojbeʼenil Jajal Dios le Taataoʼ» (Filiposiloʼob 2:9-11). Wa k-tsʼáaikba yáanal u páajtalil Jesús, le máax nuʼuktik u kaajal Diosoʼ, táan k-eʼesik kiliʼich k-ilik le baʼax kiliʼich u yilaʼal xan tumen Diosoʼ (Mateo 23:10; Colosailoʼob 1:18).
7. ¿Baʼax u kʼáat xan u yaʼal u tsʼáaikuba máak yáanal u páajtalil Jesús?
7 U tsʼáaikuba máak yáanal u páajtalil Jesuseʼ u kʼáat xan u yaʼal yaan k-eʼesik tsiikil tiʼ le máaxoʼob u tsʼaamaj way Luʼum utiaʼal u nuʼuktikoʼob le kʼaʼaytajoʼ. Le Cuerpo Gobernante (u múuchʼ sukuʼunoʼob yéeyaʼanoʼob utiaʼal u binoʼob kaʼan) bey xan le ancianoʼob ku yéeyik utiaʼal ka u tsʼaʼob nuʼuktaj (teʼ najiloʼob Betel, teʼ circuitoʼob, distritoʼob yéetel teʼ múuchʼuliloʼoboʼ) ku beetkoʼob upʼéel kiliʼich meyaj; le oʼolaleʼ unaj k-eʼesik tsiikil tiʼob yéetel unaj k-tsʼáaikba yáanal u nuʼuktajoʼob (Hebreob 13:7, 17).
Upʼéel kiliʼich kaaj
8, 9. 1) ¿Baʼaxten kiliʼich kaʼach u kaajil Israel? 2) Jéeobaeʼ, ¿bix tu kaʼansil tiʼ le israelitaʼob u kʼaʼabéetil u kiliʼichtaloʼob tu táan letiʼoʼ?
8 Jéeobaeʼ le ka tu yéeyaj le israelitaʼob utiaʼal u kaajaltoʼoboʼ, tu beetaj xan upʼéel pacto tu yéeteloʼob tuʼux tu yaʼalajtiʼob yaan u kiliʼichtaloʼob wa yaan u jumpáaytkuntkoʼob tiʼ u chuukaʼan kaajoʼoboʼ. Jéeobaeʼ tu yaʼalajtiʼob: «Teʼexeʼ unaj a kiliʼichtaleʼex in tiaʼal, tumen teen Yuumtsileʼ, kiliʼichen, bey xan kin jelaʼankuúntikeʼex tiʼ uláakʼ kaajoʼob tu yoʼolal in tiaʼalintkeʼex» (Levítico 19:2; 20:26).
9 Jéeobaeʼ tu kaʼansaj tiʼ le israelitaʼob u kʼaʼabéetil u kiliʼichtaloʼob tu táan letiʼoʼ. Letiʼeʼ tu yaʼalajtiʼobeʼ maʼ unaj u machkoʼob le puʼuk tuʼux ken u tsʼáatiʼob le Diez Mandamientosoʼ, tumen wa ku machkoʼobeʼ yaan u kíimloʼob. Le kʼiin jeʼeloʼ, u puʼukil Sinaíeʼ pʼáat bey upʼéel baʼal kiliʼicheʼ (Éxodo 19:12, 23). Letiʼobeʼ unaj xan u yilkoʼob kiliʼich le meyaj ku beetik kaʼach le sacerdoteʼoboʼ bey xan le tabernáculo yéetel le baʼaxoʼob yanoʼob ichiloʼ (Éxodo 30:26-30). Baʼaleʼ ¿baʼax jeʼel u páajtal u yaʼalaʼal yoʼolal le cristianoʼoboʼ?
10, 11. ¿Baʼaxten k-aʼalikeʼ le máaxoʼob yéeyaʼanoʼob utiaʼal u binoʼob kaʼanoʼ kiliʼich xan u yilaʼaloʼob tumen Dios? ¿Bix u yuʼubikuba le «uláakʼ j-tamanoʼob» yoʼolal lelaʼ?
10 Le múuchʼ sukuʼunoʼob yéeyaʼanoʼob utiaʼal u binoʼob kaʼanoʼ kiliʼich xan u yilaʼaloʼob tumen Jéeoba (1 Corintoiloʼob 1:2). Tsʼoʼoleʼ, le sukuʼunoʼobaʼ ku yilaʼaloʼob bey upʼéel kiliʼich temploeʼ, baʼaleʼ maʼ letiʼe u nojoch templo Jéeobaoʼ (tuláakal baʼax u tsʼaamaj Jéeoba utiaʼal u natsʼikuba máak tu yiknal utiaʼal u adorartaʼaloʼ). Le apóstol Pablooʼ, le ka tʼaanaj tiʼ le kiliʼich templo tuʼux u tsʼaamaj u kiliʼich muukʼ Jéeobaoʼ, tu yaʼalaj: «Tu yóokʼol [Cristoeʼ] tuláakal le najoʼ beetaʼan jach maʼalob, yéetel táan u líikʼil tak ken kʼuchukeʼex béeytal jumpʼéel templo kʼubaʼan yéetel nupaʼan tiʼ Yuumtsileʼ. Bey xan teʼex nupaʼaneʼex tiʼ Cristo, táan xan a nuʼupuleʼex yéetel le uláakʼoʼoboʼ utiaʼal ka kʼuʼubukeʼex béeytal jumpʼéel naj tuʼux kajaʼan Jajal Dios tu yoʼolal Kiliʼich Pixaneʼ» (Efesoiloʼob 2:21, 22; 1 Pedro 2:5, 9).
11 Pabloeʼ tu kʼáataj xan tiʼ le máaxoʼob yéeyaʼanoʼoboʼ: «¿Maʼ wa a wojeleʼex teʼexeʼ u najileʼex Jajal Diosiʼ, yéetel kajakbal tiʼ teʼexeʼ u kiliʼich Pixan Jajal Dios? [...] Tumen u najil Jajal Dioseʼ kiliʼich, teʼex u najil Jajal Dios» (1 Corintoiloʼob 3:16, 17). Tumen Jéeoba u tsʼaamaj u kiliʼich muukʼ tiʼ le yéeyaʼanoʼoboʼ, jeʼel u páajtal u yaʼalaʼaleʼ, Letiʼeʼ tiʼ kajaʼan ichiloʼobeʼ (2 Corintoiloʼob 6:16). Dioseʼ mantatsʼ ku nuʼuktik le u «palitsil chúukpajaʼan u yóol[oʼ]» (Mateo 24:45-47). Le oʼolaleʼ, le «uláakʼ j-tamanoʼob[oʼ]» jach kiʼimak u yóoloʼob tumen yaan u páajtalil tiʼob u múul meyajoʼob yéetel le máaxoʼob kun binoʼob kaʼanoʼ (Juan 10:16; Mateo 25:37-40).
Baʼaloʼob unaj u yilaʼal kiliʼichoʼob
12. ¿Baʼax kaʼapʼéel baʼaloʼob jach kiliʼich unaj k-ilkoʼob, yéetel baʼaxten?
12 U jaajileʼ, yaʼab baʼaloʼob unaj u yilaʼal kiliʼich tumen le máaxoʼob kun binoʼob kaʼan bey xan tumen le máaxoʼob kun pʼáatloʼob way Luʼumeʼ. Upʼéeleʼ letiʼe u bisikuba máak yéetel Jéeobaoʼ (1 Crónicas 28:9; Salmo 36:7). K-bisikba yéetel Jéeobaeʼ nojoch baʼal k-ilik, leʼ oʼolal maʼatech k-chaʼik k-náachkuntaʼal tiʼ letiʼ (2 Crónicas 15:2; Santiago 4:7, 8). Le oración xanoʼ uláakʼ baʼax jach kʼaʼabéet utiaʼal k-maas natsʼikba tiʼ letiʼ. Le profeta Danieloʼ jach kiliʼich u yilik kaʼach le oracionoʼ, le oʼolaleʼ kex jeʼel tak u kíimsaʼal kaʼacheʼ maʼ jáaw u orar tiʼ Jajal Dios jeʼex suuk u beetkeʼ (Daniel 6:7-11). «U payalchiʼob le máaxoʼob kiliʼichoʼoboʼ» (le máaxoʼob kun binoʼob kaʼanoʼ) ku keʼetel yéetel le incienso ku tóokaʼal kaʼach teʼ templooʼ (Apocalipsis 5:8; 8:3, 4; Levítico 16:12, 13). U ketaʼal le oracionoʼob yéetel le inciensooʼ ku yeʼesik bukaʼaj kiliʼichil le oracionoʼoboʼ. ¿Máasaʼ jach ku kiʼimakkúuntik k-óol ojéeltik jeʼel u páajtal k-tʼaan yéetel u Yuumil tuláakal baʼaleʼ? Le oʼolal le oracionoʼ upʼéel baʼal jach kiliʼich yéetel jach kʼaʼanan ichil k-kuxtal.
13. ¿Baʼax uláakʼ kiliʼich, yéetel bix k-eʼesik k-kʼáat ka u yáantoʼon?
13 Yaan xan upʼéel muukʼ kiliʼich u yilaʼal tumen le máaxoʼob kun binoʼob kaʼan bey xan tumen le kun pʼáatloʼob kuxtal way Luʼumeʼ, lelaʼ letiʼe «Kiliʼich Pixan» wa kiliʼich muukʼoʼ. Le muukʼaʼ letiʼe u muukʼ Diosoʼ, yéetel ku meyaj tiʼ letiʼ utiaʼal u beetik baʼax u kʼáat, le oʼolal jach maʼalob ka kʼaabaʼintaʼak «Kiliʼich Pixan» wa kiliʼich muukʼ (Juan 14:26; Romailoʼob 1:4). Yéetel le muukʼ jeʼelaʼ, Jéeobaeʼ ku tsʼáaik muukʼ tiʼ máaxoʼob meyajtik utiaʼal u chúukpajal u yóol u kʼaʼaytoʼob u Reino (Beetaʼanoʼob 1:8; 4:31). Letiʼeʼ ku tsʼáaik u kiliʼich muukʼ tiʼ «le máaxoʼob ku yuʼubikoʼob u tʼaanoʼ», le máaxoʼob ku kuxtaloʼob «jeʼel bix [u] yaʼalik le Kiliʼich Pixanoʼ» maʼ jeʼex u kʼáat u kʼeban wíinkliloʼobeʼ (Beetaʼanoʼob 5:32; Galaciailoʼob 5:16, 25; Romailoʼob 8:5-8). Yoʼolal le nojoch muukʼaʼ ku páajtal u yeʼesik máak «u yich u meyaj Kiliʼich Pixan», bey xan u beetik máak baʼax maʼalob yéetel u kuxtal ich kiliʼichil (Galaciailoʼob 5:22, 23; 2 Pedro 3:11). Wa kiliʼich k-ilik le muukʼaʼ, maʼ ken k-beeteʼex «u yokʼomtal u yóol», lelaʼ u kʼáat u yaʼaleʼ maʼ ken k-beet mix baʼal jeʼel u yeʼesik maʼ k-kʼáat ka u yáantoʼoniʼ (Efesoiloʼob 4:30).
14. ¿Baʼax kiliʼich xan u yilaʼal tumen le máaxoʼob kun binoʼob kaʼanoʼ? ¿Yéetel baʼaxten kiliʼich xan u yilaʼal tumen le máaxoʼob kun pʼáatloʼob way Luʼumeʼ?
14 Uláakʼ xan baʼax kiliʼicheʼ letiʼe u páajtalil k-bisik u kʼaabaʼ le kiliʼich Dios, Jéeoba, yéetel k-beetikba u j-jaajkunajoʼon (Isaías 43:10-12, 15). Jéeobaeʼ tsʼoʼok u kaʼansik le máaxoʼob kun binoʼob kaʼan utiaʼal ka u meyajtoʼob «yáanal jumpʼéel túumben nup tʼaan» wa pactooʼ (2 Corintoiloʼob 3:5, 6). Le oʼolaleʼ tsʼaʼan xan tiʼob u meyajil u kʼaʼaytkoʼob «u maʼalob péektsil le [reinooʼ]» yéetel u kaʼanskoʼob u máakiloʼob tuláakal luʼumiloʼob (Mateo 24:14; 28:19, 20). Letiʼobeʼ jach táan u beetkoʼob le meyaj tsʼaʼantiʼobaʼ, le oʼolal u millonesi máakoʼobeʼ táan u yaʼalikoʼob: «Toʼoneʼ k-kʼáat bin ta wéeteleʼex tumen tsʼoʼok k-uʼuyik tiʼ yaan [Jajal Dios] ta wéeteleʼexeʼ» (Zacarías 8:23). Le máaxoʼob kun pʼáatloʼob way Luʼumeʼ jach táan u yáantkoʼob le máaxoʼob kun binoʼob kaʼan utiaʼal ka u tsʼoʼokbesoʼob le meyaj tsʼaʼantiʼobaʼ, le oʼolal le kun pʼáatloʼob way Luʼumeʼ jeʼel u páajtal u ketaʼaloʼob yéetel j-kolnáaloʼobeʼ (Isaías 61:5, 6).
15. ¿Baʼax kiliʼich u yilik kaʼach le apóstol Pablooʼ, yéetel baʼaxten bey k-ilik xan toʼonoʼ?
15 Le apóstol Pablooʼ jach kiliʼich tu yilil, u meeyjil kaʼansaj. Le oʼolal tu yaʼalaj: «Le meyaj kin beetikoʼ letiʼ lelaʼ: in [kʼaʼay]tik u maʼalob péektsilil le [salvación] u yaʼalmaj Jajal Diosoʼ» (Romailoʼob 15:16). Teʼ carta tu tsʼíibtaj tiʼ le cristianoʼob yanoʼob Corintooʼ, tu tsʼáaj naʼatbileʼ ku yilik le meeyjil kaʼansaj bey upʼéel «ayikʼalil[eʼ]» (2 Corintoiloʼob 4:1, 7). Yoʼolal le kʼaʼaytaj k-beetik xanoʼ k-tsʼáaik ojéeltbil «u tʼaanoʼob Jajal Dios» (1 Pedro 4:11). Le oʼolaleʼ, wa yéeyaʼanoʼon utiaʼal k-bin kaʼan wa utiaʼal k-pʼáatal kuxtal way Luʼumeʼ, unaj k-ilik bey upʼéel baʼal kiliʼich le kʼaʼaytajoʼ.
Unaj «k-chúukaʼanchajal tiʼ kiliʼichil»
16. ¿Baʼax unaj k-beetik utiaʼal maʼ u joʼopʼol «pʼek[tik] le baʼax kiliʼichoʼ»?
16 Pabloeʼ le ka tsʼoʼok u yaʼalik tiʼ u sukuʼunoʼob ka u kanáantubaʼob utiaʼal maʼ u kʼuchul «u pʼek[toʼob] le baʼax kiliʼichoʼ», tu yaʼalajtiʼob: «Il a wileʼex u yantalteʼex [...] jumpʼéel kiliʼich kuxtal [...]. Kanáantabaʼex utiaʼal [...] maʼ u pʼáatal mix juntúul jeʼel bix jun kúul paakʼal kʼáaj u yicheʼ, ku beetik loob yéetel ku kʼaskúuntik yaʼab máakoʼob ichileʼex» (Hebreob 12:14-16). Le tʼaan «jun kúul paakʼal kʼáaj u yicheʼ» táan u tʼaan tiʼ le máaxoʼob yanoʼob teʼ múuchʼulil ku tʼaanoʼob tu contra le baʼax ku beetaʼal teʼ múuchʼuliloʼ. Maʼ xaaneʼ le máakoʼobaʼ maʼatech u yóotik u yiloʼob le tsʼoʼokol beel jeʼex u yilaʼal tumen Diosoʼ yéetel maʼ maʼalob u yilkoʼob le baʼaxoʼob maʼalob u yilik Diosoʼ (1 Tesalonicailoʼob 4:3-7; Hebreob 13:4). Maʼ xaan xaneʼ, tsʼoʼok u káajal u creerkoʼob baʼaloʼob ku binoʼob tu contra le Biblia ku kaʼansaʼal tumen le máaxoʼob «tsʼoʼok u tselikubaʼob tiʼ le jaajoʼ» yéetel tsʼoʼok u joʼopʼol u yaʼalikoʼob «chéen kunel yéetel luʼumkabil tʼaanoʼob» (2 Timoteo 2:16-18).
17. Le máaxoʼob kun binoʼob kaʼanoʼ, ¿baʼaxten kiliʼich unaj u yilkoʼob le baʼax ku yaʼalik Jéeoba kiliʼichoʼ?
17 Pabloeʼ tu yaʼalaj tiʼ le máaxoʼob kun binoʼob kaʼanoʼ: «[Sukuʼuneʼex,] koʼoneʼex pʼatik tuláakal u kʼokʼol kuxtal bakʼel yéetel pixan, táan k-chúukaʼanchajal tiʼ kiliʼichil tioʼolal sajak-tsiikil tiʼ Jajal Dios» (2 Corintios 7:1, LTN). Le tʼaanoʼobaʼ ku yeʼeskoʼobeʼ, le máaxoʼob yéeyaʼanoʼoboʼ, wa «le máaxoʼob tʼanaʼanoʼob tumen Jajal Diosoʼ», unaj u yeʼeskoʼob ichil u kuxtaloʼob kiliʼich xan u yilkoʼob le baʼax ku yaʼalik Jéeoba kiliʼichoʼ (Hebreob 3:1). Yoʼolal lelaʼ, le apóstol Pedrooʼ tu yaʼalaj xan tiʼ le kun binoʼob kaʼanoʼ: «Jeʼel bix paalaloʼob ku yuʼubikoʼob tʼaaneʼ maʼ a kuxtaleʼex jeʼel bix u nuʼuktik le tsʼíibolaloʼob yanteʼex kaʼach maʼiliʼ a kʼaj óolteʼex Jajal Diosoʼ. Baʼax unajeʼ tiʼ tuláakal baʼaleʼ kuxleneʼex ich kiliʼichil tumen Jajal Dios máax tʼaneʼexeʼ kiliʼich» (1 Pedro 1:14, 15).
18, 19. 1) Le máaxoʼob yanoʼob ichil le «yaʼabkach máakoʼob[oʼ]», ¿bix u yeʼeskoʼob kiliʼich u yilkoʼob le baʼax kiliʼich u yilaʼal tumen Diosoʼ? 2) ¿Baʼax ken k-kan teʼ tuláakʼ xookoʼ?
18 ¿Baʼax jeʼel u páajtal k-aʼalik yoʼolal le «yaʼabkach máakoʼob» kun kuxtaloʼob way Luʼum ken tsʼoʼokok le «nojoch yaayaj óolal» kun taaloʼ? Letiʼobeʼ unaj xan u yilkoʼob kiliʼich le baʼax kiliʼich u yilaʼal tumen Diosoʼ. U libroi Apocalipsiseʼ ku yaʼalikeʼ, le máakoʼobaʼ «táan u meyajtikoʼob» Jéeoba way Luʼumeʼ, tu táankabil u templo Dios. Yoʼolal u fejoʼob tiʼ le u kuxtal Cristo tu kʼuboʼ, jeʼel u páajtal u yaʼalaleʼ «u pʼoʼomaj u nookʼoʼob yéetel u sakkúuntmajoʼob [...] yéetel u kʼiʼikʼel le j-Tamanoʼ» (Apocalipsis 7:9, 14, 15). Ken u beetoʼob lelaʼ ku pʼáatloʼob limpioʼob tu táan Jéeoba yéetel ku páaʼtaʼal ka u «pʼat[oʼob] tuláakal u kʼokʼol kuxtal bakʼel yéetel pixan, táan [u chúukaʼanchajloʼob] tiʼ kiliʼichil».
19 Upʼéel baʼal jach kʼaʼanan utiaʼal le máaxoʼob kun binoʼob kaʼan bey xan utiaʼal le máaxoʼob kun pʼáatloʼob way Luʼumeʼ letiʼe u muchʼkubaʼob mantatsʼ utiaʼal u adorartoʼob Jéeoba yéetel utiaʼal u xakʼalxokikoʼob le Bibliaoʼ. Jéeobaeʼ kiliʼich u yilik le muchʼtáambaloʼobaʼ. Le uláakʼ xookoʼ yaan u yeʼesiktoʼon bix jeʼel k-eʼesik táan k-ilik le muchʼtáambaloʼob jeʼex u yilik Jéeobaoʼ yéetel yaan xan k-ilik baʼaxten unaj k-beetik beyoʼ.
Utiaʼal u kʼaʼajsaʼal
• ¿Baʼax tuukulil maʼ unaj u yantal tiʼ máaxoʼob meyajtik Jéeoba?
• ¿Baʼaxten jeʼel u páajtal k-aʼalik le kiliʼichiloʼ tiʼ Jéeoba u taal?
• ¿Bix k-eʼesik tsiikil tiʼ Jesús, u kiliʼich Hijo Dios?
• Utúul cristianoeʼ, ¿baʼaxoʼob unaj u yilik kiliʼichoʼob ichil u kuxtal?
[U kʼáatchiʼiloʼob le xookoʼ]
[U tsolajil le oochel teʼ táan juʼun 23]
Tu kaajil Israeleʼ kiliʼich u yilaʼal kaʼach le meyaj ku beetik le sacerdoteʼoboʼ bey xan le tabernáculo yéetel le baʼaxoʼob yanoʼob ichiloʼ
[U tsolajil le oochel teʼ táan juʼun 24]
Le cristianoʼob ku binoʼob kaʼanoʼ ku yilaʼaloʼob bey upʼéel kiliʼich temploeʼ
[U tsolajil le oochel teʼ táan juʼun 25]
Le oración yéetel le meeyjil kaʼansajoʼ kiliʼich unaj u yilaʼaloʼob