Natsʼaʼan u kʼiinil u xuʼulsaʼal tiʼ tuláakal baʼaloʼob kʼaastak

TUKULT bukaʼaj jaʼtsil wa kuxlak máak tiʼ upʼéel yóokʼol kaab tuʼux minaʼan kʼasaʼan máakoʼob, policíaʼob, carceloʼob, juesoʼob mix abogadoʼob; upʼéel tuʼux maʼ kun beetbil kʼaas tiʼ mix máakiʼ. Maʼ xaaneʼ ka tuklikeʼ mix bikʼin kun béeytal upʼéel kuxtal beyaʼ, baʼaleʼ lelaʼ letiʼe baʼax ku yaʼalik le Biblia ken u beet Dios maʼ kun xáantaloʼ. Le oʼolaleʼ, maʼalob ka a wil baʼax ku yaʼalik le Biblia yoʼolal le baʼaloʼob kʼaastak ku yilaʼaloʼob bejlaʼaʼ.

U libroi Salmoseʼ ku yaʼalik: «Maʼ a pʼuʼujul tu yoʼolal u siʼipil le j-kʼaakʼas máakoʼoboʼ, mix a tsʼíiboltik a beetik baʼax ku beetik le loolob máakoʼoboʼ, tumen séebaʼan u tijiloʼob jeʼel bix u tijil le suʼukoʼ; ¡ku kíimiloʼob jeʼel bix u kíimil le xíiwoʼ! Baʼaleʼ le j-kabal óoloʼoboʼ bíin u tiaʼalintoʼob le luʼumaʼ, bíin kuxlakoʼob ichil nojoch jéetsʼel óolal» (Salmo 37:1, 2, 11). U jaajileʼ, mix máak jeʼel u páajtal u beetik maʼ u béeytal le baʼax ku yaʼalik le tekstoaʼ bey xan le uláakʼ jatsʼuts baʼaloʼob u yaʼalmaj Dios u beetkoʼ.

Dioseʼ yéetel u Reinoeʼ, yaan u béeykuntik tuláakal le jatsʼuts baʼaloʼob u yaʼalmaj u beetkoʼ. Tu oracionil le padrenuestrooʼ, Jesucristoeʼ tu kaʼansaj tiʼ u disipuloʼob ka u kʼáatoʼob ka taalak le Reinooʼ yéetel ka beetaʼak baʼax u kʼáat Dios «way luʼumeʼ jeʼel bix u beetaʼal teʼ j-kaʼanoʼ» (Mateo 6:9, 10). Maʼ kun xáantaleʼ, yáanal u Reino Dioseʼ, mix máak ken u beet baʼaloʼob kʼaastak, tumen maʼ kun antal óotsilil yéetel mix máak ken u kaxt chéen u yutsil. Le Bibliaoʼ ku yaʼalikeʼ yaan u yantal «yaʼabkach baʼal jaantbil teʼ j-kaajoʼoboʼ» bey xan «tu kaʼanalil le puʼukoʼoboʼ» (Salmo 72:16). Jeʼex túun k-ilkoʼ, Jéeobaeʼ yaan u tsʼáaik yaʼabach baʼaloʼob maʼalobtak tiʼ u kajnáaliloʼob le Luʼumaʼ. Le yaabilaj tiʼ Dios yéetel tiʼ u maasil máakoʼoboʼ le kun péeksik tuláakal máak utiaʼal maʼ u beetik baʼaloʼob kʼaastak. Bey túunoʼ, mix bikʼin kun kaʼa beetbil baʼaloʼob kʼaastak way Luʼumeʼ.