«Le yáax kaʼapúut kuxtaloʼ» tsʼoʼok u káajal

«Le máaxoʼob j-kíimoʼob táan u yoksaj óoltikoʼob Cristo[oʼ] yaan u kaʼapúut kuxtaloʼob táanil.» (1 TESALONICAILOʼOB 4:16.)

1, 2. 1) ¿Yaan wa esperanza tiʼ le máaxoʼob tsʼoʼok u kíimloʼoboʼ? 2) Techeʼ, ¿baʼaxten ka creertik yaan u kaʼa kuxkíintaʼal le kimenoʼoboʼ? (Ilaʼak le chan tsolajiloʼ.)

«MÁAXOʼOB kuxaʼanoʼobeʼ u yojeloʼob bíin kíimikoʼob». Lelaʼ letiʼe baʼax tsʼoʼok u yúuchul desde le ka kʼebanchaj Adanoʼ. Le máaxoʼob kuxaʼanoʼoboʼ u yojloʼob yaan u kʼuchul u kʼiinil u kíimloʼob; le oʼolaleʼ yaʼab tiʼ letiʼobeʼ ku kʼáatikoʼob: «¿Baʼax ku yúuchul tiʼ máak ken kíimik? ¿Bix yanil le kimenoʼoboʼ?». Le Bibliaoʼ ku yaʼalikeʼ «kimenoʼobeʼ maʼ u yojeloʼob mix baʼaliʼ» (Eclesiastés 9:5).

² ¿Yaan wa túun esperanza tiʼ le máaxoʼob tsʼoʼok u kíimloʼoboʼ? Yaan. Kʼaʼabéet u yantal utiaʼal ka béeychajak le baʼax u tukulmaj Dios utiaʼal wíinikoʼoboʼ. Úuchil tak bejlaʼeʼ, le máaxoʼob ku meyajkoʼob Diosoʼ u yojloʼobeʼ le Chʼiʼibal aʼalaʼan kun taaloʼ yaan u xuʼulsik tiʼ u Kʼaasilbaʼal yéetel yaan u yutskíintik tuláakal le loobil tu beetajoʼ (Génesis 3:15). Baʼaleʼ, yaʼab tiʼ le máaxoʼob ku meyajkoʼob Diosoʼ tsʼoʼok u kíimloʼob, le  oʼolal kʼaʼabéet u kaʼa kuxkíintaʼaloʼob utiaʼal u yilkoʼob bix u béeychajal le baʼax táan u páaʼtkoʼob kaʼachoʼ yéetel le uláakʼ baʼaloʼob u yaʼalmaj Diosoʼ (Hebreob 11:13). ¿Jach wa tu jaajil yaan u kaʼa kuxkíintaʼal le kimenoʼoboʼ? Jach jaaj. Le apóstol Pablooʼ tu yaʼaleʼ «yaan u kaʼapúut kuxtal le kimenoʼoboʼ, le utstakoʼoboʼ bey xan le kʼasaʼanoʼoboʼ» (Beetaʼanoʼob [Hechos] 24:15). Utéenjeakileʼ, Pabloeʼ tu kaʼa kuxkíintaj Eutico, utúul xiʼipal kíim úuchik u lúubul tiʼ upʼéel ventana yaan tu óoxpʼéel pisoi upʼéel naj. Le xiʼipalaʼ u tsʼook tiʼ le nueve máaxoʼob ku yaʼalaʼal teʼ Biblia kaʼa kuxkíintaʼaboʼoboʼ (Beetaʼanoʼob 20:7-12). *

3. ¿Bix tsʼoʼok u líiʼsik a wóol le baʼax tu yaʼalaj Jesús tu tekstoi Juan 5:28, 29, yéetel baʼaxten?

³ Le baʼax ku yaʼalik le Biblia yoʼolal nueve utúulul máaxoʼob kaʼa kuxkíintaʼaboʼoboʼ, unaj u beetik k-creertik le baʼax tu yaʼalaj Pablooʼ. Tsʼoʼoleʼ, unaj xan u beetik k-creertik yaan u béeytal le baʼax tu yaʼalaj Jesusaʼ: «Bíin kʼuchuk u kʼiinil le ken uʼuyaʼak [in] tʼaan tumen tuláakal le kimenoʼoboʼ yéetel bin jóokʼokoʼob tiʼ le muknaloʼoboʼ» (Juan 5:28, 29). ¿Máasaʼ jach ku líiʼsik k-óol le tʼaanoʼobaʼ? Yéetel, ¿máasaʼ jach ku líiʼsik u yóol le u millonesi máakoʼob tsʼoʼok u kíimil wa máax u yaabiltmoʼoboʼ?

4, 5. ¿Baʼax óoxpʼéel clasesi kaʼapúut kuxtal ku yaʼalaʼal teʼ Bibliaoʼ, yéetel máakalmáak ken k-il teʼ xookaʼ?

⁴ Óoliʼ tuláakal le máaxoʼob kun kaʼa kuxkíintbiloʼoboʼ yaan u kuxtaloʼob way Luʼum ich jeetsʼelil yáanal u Reino Dioseʼ (Salmo 37:10, 11, 29; Isaías 11:6-9; 35:5, 6; 65:21-23). Baʼaleʼ táanil tiʼ leloʼ unaj u kaʼa kuxkíintaʼal uláakʼ máakoʼob. Yáaxeʼ, yanchaj u kaʼa kuxkíintaʼal Jesucristo utiaʼal u bisik tu táan u Taata u tojol u kuxtal tu kʼubaj t-oʼolaloʼ. Letiʼeʼ kíim yéetel kaʼa kuxkíintaʼab tu jaʼabil 33 teʼ yáax siglooʼ.

⁵ Tsʼoʼoleʼ, le máaxoʼob kun binoʼob kaʼan, tiaʼanoʼob ichil «u Israel Jajal Dios[oʼ]», unaj u kaʼa kuxkíintaʼaloʼob utiaʼal u muchʼkubaʼob yéetel Cristo teʼ kaʼanoʼ, bey xan utiaʼal ka yanakoʼob tu yéetel utiaʼal «mantatsʼ» (Gálatas 6:16, LTN; 1 Tesalonicailoʼob 4:17). Le Bibliaoʼ ku yaʼalikeʼ tiʼ letiʼob kun antal «le yáax kaʼapúut kuxtaloʼ» (Apocalipsis 20:6). Ken tsʼoʼokok u láaj kaʼa kuxkíintaʼaloʼobeʼ, yaan u káajal túun u kaʼa kuxkíintaʼal le u millonesi máakoʼob way Luʼum, utiaʼal u yantaltiʼob u páajtalil u kuxtaloʼob minaʼan u xuul teʼ Paraísooʼ. Le oʼolaleʼ, wa táan k-páaʼtik bin kaʼan wa k-kuxtal way Luʼumeʼ, unaj u taaktal k-ojéeltik u núukil le kʼáatchiʼobaʼ: ¿Bix kun úuchul «le yáax kaʼapúut kuxtaloʼ»? ¿Yéetel baʼax kʼiin ken úuchuk?

 «¿Baʼax wíinklil kun yantaltiʼob?»

6, 7. 1) ¿Baʼax kʼaʼabéet u yúuchul tiʼ le máaxoʼob yéeyaʼanoʼob táanil tiʼ u binoʼob kaʼanoʼ? 2) ¿Baʼax wíinklil kun tsʼaabiltiʼob tumen Dios?

⁶ Teʼ yáax tsʼíibil juʼun tu túuxtaj tiʼ le corintoiloʼoboʼ, Pabloeʼ tu beetaj le kʼáatchiʼobaʼ: «¿Bix kun kaʼapúut kuxtal le kimenoʼoboʼ? ¿Baʼax wíinklil kun yantaltiʼob?». Letiʼeʼ tu núukaj: «Le baʼax ka pakʼikoʼ maʼ tu kuxtal wa maʼ tu kíimil táanil. [...] Ku tsʼoʼokoleʼ Jajal Dioseʼ ku tsʼáaik tiʼ le semillaoʼ le wíinklil u kʼáatoʼ, [...] u jatsʼutsil le kaʼanil wíinkliloʼoboʼ jelaʼan tiʼ u jatsʼutsil le luʼumkabil wíinkliloʼoboʼ» (1 Corintoiloʼob 15:35-40).

⁷ Le baʼax tu yaʼalaj Pablooʼ ku yeʼeskeʼ le máaxoʼob yéeyaʼanoʼob tumen le kiliʼich muukʼoʼ kʼaʼabéet u kíimloʼob táanil tiʼ u binoʼob kaʼan. U luʼumkabil wíinkliloʼobeʼ unaj u suut teʼ luʼumoʼ (Génesis 3:19). Ken kʼuchuk túun le súutukil tukultaʼan tumen Diosoʼ, ku kaʼa kuxkíintaʼaloʼob yéetel upʼéel túumben wíinklil maʼalob utiaʼal ka kuxlakoʼob teʼ kaʼanoʼ (1 Juan 3:2). Le kuxtal ku tsʼaʼabaltiʼob tumen Diosaʼ upʼéel túumben kuxtal maʼ tu páajtal u xuʼulsaʼal tiʼ, baʼaleʼ leloʼ maʼ u kʼáat u yaʼal wa desde ka síijoʼob tsʼaʼabtiʼob tumen Dios upʼéel pixan maʼ tu kíimiliʼ. Pabloeʼ tu yaʼalaj: «Le k-wíinklil ku kíimilaʼ yaan u búukbesaʼal yéetel le wíinklil maʼ tu kíimil mix bikʼinoʼ». Le kuxtal beyaʼ Dios síik tiʼ le máaxoʼob kun binoʼob kaʼan ken u kaʼa kuxkíintoʼoboʼ (1 Corintoiloʼob 15:50, 53; Génesis 2:7; 2 Corintoiloʼob 5:1, 2, 8).

8. ¿Baʼaxten k-ojel Dioseʼ maʼ tu yéeyik le 144,000 ichil jejeláas religionoʼob?

⁸ Chéen le 144,000 kun kuxkíintbiloʼob teʼ yáax kaʼapúut kuxtaloʼ. Letiʼobeʼ káaj u yéeyaʼaloʼob tumen Jéeoba teʼ Pentecostés tiʼ u jaʼabil 33, le maʼ úuch kaʼa kuxkíintaʼak Jesusoʼ. Tuláakloʼobeʼ «tsʼíibtaʼan tu táan joʼoloʼobeʼ u kʼaabaʼ [Jesús] yéetel u kʼaabaʼ u Taata» (Apocalipsis 14:1, 3). Lelaʼ ku yeʼesiktoʼoneʼ maʼ tu yéeyaʼaloʼob ichil jejeláas religionoʼobiʼ. Tuláakloʼobeʼ u disipuloʼob Cristo yéetel tuláakloʼob ku biskoʼob u kʼaabaʼ Dios, Jéeoba. Ken kaʼa kuxkíintaʼakoʼobeʼ, ku tsʼaʼabaltiʼob upʼéel meyaj u beetoʼob teʼ kaʼanoʼ. Le u páajtal u meyajoʼob tu táan Dioseʼ ku beetik u jach kiʼimaktal u yóoloʼob.

¿Tsʼoʼok wa u káajal?

9. ¿Bix u yáantkoʼon Apocalipsis 12:7 yéetel 17:14 utiaʼal k-ilik bey tiʼ baʼax kʼiiniloʼob ku káajal le yáax kaʼapúut kuxtaloʼ?

⁹ ¿Baʼax kʼiin ken úuchuk le yáax kaʼapúut kuxtaloʼ? Yaʼab baʼax eʼesik tsʼoʼok u káajal. Koʼox ilik bix u yeʼesaʼal tiʼ kaʼapʼéel capituloʼob tiʼ u libroi Apocalipsis. Yáaxeʼ koʼox ilik le capítulo 12; teʼeloʼ ku yaʼalaʼaleʼ le ka beetaʼab Reyil Jesús teʼ kaʼanoʼ, letiʼ yéetel u angeloʼobeʼ baʼatelnajoʼob tu contra u Kʼaasilbaʼal yéetel u kʼasaʼan angeloʼob (Apocalipsis 12:7-9). Teʼ revistaaʼ yaʼab utéenel tsʼoʼok u yaʼalaʼaleʼ le baʼateʼel jeʼeloʼ káaj tu jaʼabil  1914. * Baʼaleʼ, le Bibliaoʼ ken tʼaanak tiʼ le baʼatelaʼ maʼ tu yaʼalik wa tiaʼan yéetel Jesús le máaxoʼob yéeyaʼanoʼob utiaʼal u binoʼob kaʼanoʼ. Beoraaʼ, koʼox ilik baʼax ku yaʼalik le capítulo 17. Teʼeloʼ ku yaʼalikeʼ, ken tsʼoʼokok u xuʼulsaʼal tiʼ «le nojoch Babilonia[oʼ]», le j-Tamanoʼ yaan u xuʼulsik tiʼ le gobiernoʼoboʼ yéetel ku yaʼalikeʼ yaan u yantal tu yéetel «le máaxoʼob [...] tʼanaʼanoʼob yéetel yéeyaʼanoʼob tumen Jajal Dios, chúukaʼan u yóoloʼob tiʼ letiʼ[oʼ]» (Apocalipsis 17:5, 14). Wa tak le máaxoʼob «tʼanaʼanoʼob yéetel yéeyaʼanoʼob tumen Jajal Dios» yaan u yantaloʼob yéetel Cristo ken u xuʼuls tiʼ u kʼasaʼan yóokʼol kaab Satanaseʼ, leloʼ u kʼáat u yaʼaleʼ kaʼa kuxkíintaʼaboʼob táanil tiʼ u yúuchul le baʼateloʼ. Le oʼolaleʼ, jeʼel u páajtal k-aʼalikeʼ le máaxoʼob yéeyaʼanoʼob ku kíimloʼob táanil tiʼ u taal Armagedoneʼ ku kaʼa kuxkíintaʼaloʼob tu yáamil 1914 tak Armagedón.

10, 11. 1) ¿Máaxoʼob le veinticuatro ancianoʼob, yéetel baʼax tsʼaʼab u yojéelt Juan tumen utúul tiʼ letiʼobiʼ? 2) ¿Baʼax kanik tiʼ leloʼ?

¹⁰ Baʼaleʼ ¿jeʼel wa u páajtal k-maas ojéeltik jach baʼax kʼiin ka káaj le yáax kaʼapúut kuxtaloʼ? Jeʼeleʼ, utiaʼal lelaʼ yaan u yáantkoʼon le baʼax ku yaʼalik Apocalipsis 7:9-15; le tekstoaʼ ku yaʼalikeʼ le apóstol Juanoʼ tu yilaj «yaʼabkach máakoʼob [...] mix máak ku páajtal u xokik jaytúuloʼob». Tiʼ le apóstol Juanoʼ tsʼaʼab u yojéelt máax le «yaʼabkach máakoʼob» tumen utúul tiʼ le veinticuatro nuukiloʼob wa ancianoʼoboʼ; le ancianoʼobaʼ letiʼe 144,000 cristianoʼob yéeyaʼanoʼob utiaʼal u gobernaroʼob yéetel Cristo teʼ kaʼanoʼ (Lucas 22:28-30; Apocalipsis 4:4). * Juan kaʼacheʼ utúul tiʼ le máaxoʼob yéeyaʼanoʼob utiaʼal u binoʼob kaʼanoʼ, baʼaleʼ tiaʼan kaʼach way Luʼum le ka tʼaanaj yéetel le ancianooʼ, le oʼolaleʼ jeʼel u páajtal k-aʼalikeʼ Juaneʼ tu chíikbesaj le máaxoʼob yéeyaʼanoʼob tiaʼanoʼob way Luʼum yéetel maʼ u kʼamoʼob le yáax kaʼapúut kuxtaloʼ.

 ¹¹ Jeʼex tsʼoʼok k-ilkoʼ tiʼ le apóstol Juanoʼ tsʼaʼab u yojéelt máax le «yaʼabkach máakoʼob» tumen utúul tiʼ le veinticuatro ancianoʼoboʼ, baʼaleʼ ¿leloʼ baʼax ku kaʼansiktoʼon? Ku kaʼansiktoʼoneʼ le máaxoʼob yanoʼob ichil le veinticuatro ancianoʼob tsʼoʼok u kaʼapúut kuxkíintaʼaloʼob teʼ kaʼanoʼ ku yáantajoʼob bejlaʼa utiaʼal u tsʼaʼabal ojéeltbil le baʼaloʼob jaajtak u taaloʼob tiʼ Diosoʼ. ¿Baʼaxten kʼaʼanan k-ojéeltik lelaʼ? Yáaxeʼ, koʼox kʼaʼajsikeʼ le máaxoʼob kun binoʼob kaʼan pʼaatloʼob way Luʼumeʼ, tu jaʼabil 1935 ka tsʼaʼab u yojéeltoʼob máaxoʼob le «yaʼabkach máakoʼob[oʼ]». Wa utúul tiʼ le veinticuatro ancianoʼob tu tsʼáaj ojéeltbil leloʼ, u kʼáat u yaʼaleʼ le ancianoaʼ kaʼa kuxkíintaʼab, u maas xaanileʼ tu jaʼabil 1935. Lelaʼ jeʼel u yeʼesikeʼ le yáax kaʼapúut kuxtaloʼ káaj tu yáamil 1914 tak 1935. Baʼaleʼ ¿jeʼel wa u páajtal k-maas ojéeltik jach baʼax kʼiin ka káaj le yáax kaʼapúut kuxtaloʼ?

12. Tsol baʼaxten, maʼ xaaneʼ, le yáax kaʼapúut kuxtaloʼ káaj tu mesil abril tiʼ u jaʼabil 1918.

¹² Beoraaʼ, koʼox ilik upʼéel baʼal, maʼ xaaneʼ ku chíikbesik bix u yúuchul le yáax kaʼapúut kuxtaloʼ. Jesucristoeʼ tu mesil octubre tiʼ u jaʼabil 29 teʼ yáax siglooʼ yéeyaʼab utiaʼal u beetik u Reyil tiʼ u Reino Dios, yéetel ka máan óoxpʼéel jaʼaboʼob yéetel uláakʼ táankucheʼ (tu mesil abril tiʼ le jaʼab 33), kaʼa kuxkíintaʼab ka tsʼaʼab nojoch páajtalil tiʼ. Yoʼolal lelaʼ, ¿jeʼel wa u páajtal k-aʼalik bey tumen Jesús kʼuch u beetuba Rey tu mesil octubre tiʼ u jaʼabil 1914, u disipuloʼob kun binoʼob kaʼaneʼ káaj u kaʼa kuxkíintaʼaloʼob ka máan óoxpʼéel jaʼab yéetel táankuch, tu mesil abril tiʼ u jaʼabil 1918? Maʼ xaaniʼ. Kex le Biblia maʼ tu jach eʼesik wa beyoʼ, lelaʼ maʼ tu bin tu contra le tekstoʼob ku yeʼeskoʼob le yáax kaʼapúut kuxtaloʼ jach tu jaajil káaj le maʼ úuch beetaʼak Reyil Jesucristooʼ.

13. ¿1 Tesalonicailoʼob 4:15-17 bix u yeʼesik le yáax kaʼapúut kuxtaloʼ káaj le maʼ úuch káajak u gobernar Cristooʼ?

¹³ Upʼéel tiʼ le tekstoʼob ku yeʼesik le baʼax tsʼoʼok k-aʼalikoʼ, letiʼe baʼax tu tsʼíibtaj Pabloaʼ: «Toʼon máaxoʼon bíin pʼáatakoʼon kuxaʼanoʼon le ken taalak Yuumtsileʼ [maʼ tak tu xuul u taalbaliʼ], maʼ bíin máanakoʼon táanil tiʼ le máaxoʼob kimenoʼoboʼ. Tumen Yuumtsileʼ yaan u yéemel tiʼ le kaʼanoʼ yéetel nojoch páajtalil, yéetel u tʼaan arcángel bey xan yéetel u trompeta Jajal Dios. Tiʼ le oraʼob le máaxoʼob j-kíimoʼob táan u yoksaj óoltikoʼob Cristo yaan u kaʼapúut kuxtaloʼob táanil; ku tsʼoʼokoleʼ le máaxoʼob j-pʼáatoʼob kuxaʼanoʼoboʼ bíin bisaʼakoʼob junmúuchʼ tu yéeteloʼob ichil le múuyaloʼob utiaʼal k-núuptáantikba yéetel Yuumtsil teʼ j-iikʼoʼ. Bey bíin yanakoʼon yéetel Yuumtsil mantatsʼoʼ» (1 Tesalonicailoʼob 4:15-17). Le tekstoaʼ ku yeʼesikeʼ, le máaxoʼob yéeyaʼanoʼob kíimoʼob táanil tiʼ u «taal[bal]» wa ken káajak u gobernar Jesús teʼ kaʼanoʼ, kaʼapúut kuxkíintaʼaboʼob táanil tiʼ le máaxoʼob kuxaʼanoʼob tu kʼiiniloʼob le táan u gobernaroʼ. Lelaʼ u kʼáat u yaʼaleʼ, le yáax kaʼapúut kuxtaloʼ káaj le maʼ úuch «taalak» wa káajak u gobernar Jesusoʼ, yéetel ku seguer tak le táan u gobernaroʼ (1 Corintoiloʼob 15:23). Le máaxoʼob kun binoʼob kaʼanoʼ maʼ u puul u láaj kaʼa kuxkíintaʼaloʼobiʼ; le yáax kaʼapúut kuxtaloʼ ku xáantal jaʼaboʼob táan u yúuchul.

«J-tsʼaʼabtiʼob sak nookʼ u búukintoʼob»

14. 1) ¿Baʼax jaʼabil ka béeychaj baʼax ku yaʼalik Apocalipsis capítulo 6? 2) ¿Baʼax ku yaʼalik Apocalipsis 6:9?

¹⁴ Beoraaʼ koʼox ilik baʼax ku kaʼansiktoʼon u capítulo 6 tiʼ Apocalipsis. Tu káajbal le capitulooʼ ku tʼaan tiʼ Jesús bey utúul Rey ku tsʼáanchaʼatik u enemigoʼob. (Apocalipsis 6:2). U yantal nukuch baʼateloʼob way Luʼumeʼ (Apocalipsis 6:4). U muʼyajtaʼal wiʼijil tuláakal tuʼux (Apocalipsis 6:5, 6). U kíimil yaʼabach máakoʼob yoʼolal le kʼaakʼas kʼojaʼaniloʼoboʼ (Apocalipsis 6:8). Tuláakal le baʼaloʼob aʼalaʼab kun úuchulaʼ jach bey káajik u yúuchul tu jaʼabil 1914. Baʼaleʼ yaan uláakʼ baʼax aʼalaʼab kun úuchul. Ku yaʼalaʼaleʼ tu yiknal upʼéel altareʼ tiʼ yaan «u pixanoʼob [wa u kuxtal] le máaxoʼob kíimsaʼanoʼob tu yoʼolal u tʼaan Jajal Dios yéetel tu yoʼolal le jaajkunaj tu beetajoʼoboʼ» (Apocalipsis 6:9). Bey tumen «tuláakal baʼax kuxaʼaneʼ, kuxaʼan tumen yaan u kʼiʼikʼel[eʼ]», le baʼax yaan tu yiknal le altaroʼ letiʼ u kʼiʼikʼel u disipuloʼob Cristo kíimsaboʼob úuchik u chúukpajal u yóoloʼob kʼaʼaytajoʼ (Levítico 17:11).

15, 16. ¿Baʼaxten k-aʼalik Apocalipsis 6:10, 11 táan u tʼaan tiʼ le yáax kaʼapúut kuxtaloʼ? Tsole.

¹⁵ Jeʼex u kʼiʼikʼel Abeleʼ, u kʼiʼikʼel u disipuloʼob Cristo kíimsaboʼoboʼ awatbil u kʼáatik ka beetaʼak justicia (Génesis 4:10). «Ku yaʼalikoʼob yéetel kʼaʼam tʼaan: Kiliʼich Yuumtsil máax u jaajil, ¿tak baʼax kʼiin ken a pʼis óolt yéetel a sutik loob tiʼ le máaxoʼob kajaʼanoʼob yóokʼol kaaboʼ tu yoʼolal tu wekiloʼob k-kʼiʼikʼel?». ¿Baʼax ku yúuchul ken tsʼoʼokok u yaʼalikoʼob lelaʼ? «J-tsʼaʼabtiʼob sak nookʼ u búukintoʼob, ka aʼalaʼabtiʼob ka u jeʼelsubaʼob uláakʼ jumpʼíit kʼiin, kaʼalikil u chúukpajal u numeroil u sukuʼunoʼob yéetel u yéet palitsiloʼob tiʼ u meeyjul Cristo, máaxoʼob bíin kíimsaʼakoʼob jeʼel bix letiʼobeʼ.» (Apocalipsis 6:10, 11.)

¹⁶ ¿Jach wa túun tsʼaʼab sak nookʼ utiaʼal u búukint le kʼiʼikʼel yaan yiknal le altaroʼ? Maʼatech. Tsʼaʼab tiʼ le  máaxoʼob tiaʼalintik le kʼiʼikʼ ku yaʼalaʼal wekaʼan teʼ altaroʼ. Letiʼobeʼ tu kʼubaj u kuxtaloʼob tu kʼaabaʼ Jesús, beora túunaʼ ku kaʼa kuxkíintaʼaloʼob bey espirituʼobeʼ. ¿Baʼaxten k-aʼalik lelaʼ? Tumen teʼ capítulo 3 tiʼ Apocalipsiseʼ k-xokik: «Le máax ku tsʼáanchaʼatik le kʼaasoʼ yaan u sak búukbesaʼal, maʼ bíin in tup u kʼaabaʼ tiʼ u libroil le kuxtaloʼ». Kʼaʼajaktoʼon xaneʼ, le veinticuatro nuukiloʼob wa ancianoʼoboʼ «u búukbesmajubaʼob yéetel sak nookʼoʼob; tu pooloʼobeʼ yaan [coronaʼob] beetaʼan yéetel oro» (Apocalipsis 3:5; 4:4). Bey túunoʼ, ka káaj u sen yantal baʼatelil, wiʼijil yéetel kʼojaʼaniloʼob way Luʼumeʼ, le máaxoʼob kimenoʼob yanoʼob ichil le 144,000, ku keʼetloʼob yéetel le kʼiʼikʼ yaan tu yiknal le altaroʼ, kaʼa kuxkíintaʼaboʼob teʼ kaʼanoʼ, lelaʼ bey ka tsʼaʼabaktiʼob sak nookʼ u búukintoʼoboʼ.

17. ¿Bix ken «u jeʼelsubaʼob» le máaxoʼob tsʼaʼab sak nookʼob u búukintoʼoboʼ?

¹⁷ Tiʼ le máaxoʼob ku kaʼa kuxkíintaʼaloʼobaʼ ku yaʼalaʼaltiʼob ka «u jeʼelsubaʼob», wa ka u páaʼtoʼob u kʼuchul u kʼiinil u xuʼulsik Dios tiʼ u enemigoʼob. Tsʼoʼoleʼ, «u yéet palitsiloʼob» wa le máaxoʼob yéeyaʼanoʼob pʼáatloʼob way Luʼumeʼ kʼaʼabéet xan u chúukpajal u yóoloʼob tak tu xuul. Ken kʼuchuk u kʼiinil u xuʼulsik Dios tiʼ u enemigoʼobeʼ tiʼ kun xuʼulul u jeʼelskubaʼobiʼ (Apocalipsis 7:3). Tsʼoʼoleʼ yaan u yáantkoʼob Yuumtsil Jesucristo u xuʼuls tiʼ le máaxoʼob kʼasaʼanoʼoboʼ, tuʼux táakaʼan xan le máaxoʼob tu kíimsoʼob le cristianoʼoboʼ (2 Tesalonicailoʼob 1:7-10).

Baʼax tsʼoʼok k-kanik

18, 19. 1) ¿Baʼax oʼolal jeʼel u páajtal k-aʼalik tsʼoʼok u káajal le yáax kaʼapúut kuxtaloʼ? 2) ¿Bix a wuʼuykaba beora tsʼoʼok a kanik yaʼab baʼaloʼob yaan yil yéetel le yáax kaʼapúut kuxtaloʼ?

¹⁸ Le Bibliaoʼ maʼ tu yaʼalik jach baʼax kʼiin ka káaj le yáax kaʼapúut kuxtaloʼ baʼaleʼ ku yeʼesikeʼ ku xáantal jaʼaboʼob táan u yúuchul, yéetel ku yúuchul le táan u gobernar Cristooʼ. Le máaxoʼob ku yáax kaʼa kuxkíintaʼaloʼoboʼ letiʼe j-yéeyaʼanoʼob kíimoʼob táanil tiʼ u káajal u gobernar Cristo. Tsʼoʼoleʼ le máaxoʼob ku kíimiloʼob le táan u gobernar Cristooʼ, chéen pʼelak u kíimloʼob ku kaʼa kuxkíintaʼaloʼob bey espirituʼobeʼ (1 Corintoiloʼob 15:52). ¿Yaan wa u kaʼa kuxkíintaʼal tuláakal le máaxoʼob kun binoʼob kaʼan táanil tiʼ u káajal u baʼatelil Armagedón? Maʼ k-ojliʼ. Baʼaleʼ k-ojleʼ, Dioseʼ yaan u láaj muchʼkíintik teʼ kaʼan le 144,000 tiʼ le kʼiin ku tuklik maas maʼaloboʼ.

¹⁹ K-ojel xaneʼ óoliʼ tuláakal le 144,000 tiaʼanoʼob teʼ kaʼan yéetel Cristo bejlaʼeʼ, yéetel chéen u yaalab tiʼ letiʼob pʼaatloʼob way Luʼumeʼ, lelaʼ ku yeʼesikeʼ tu jaajil táan u jach náatsʼal le xuʼulsajil ken u taas Diosoʼ. Maʼ kun xáantaleʼ yaan u xuʼulsaʼal tiʼ u kʼasaʼan yóokʼol kaab Satanás, yéetel letiʼeʼ yaan u kʼaʼalal. Letiʼ túun ken káajak u kaʼa kuxkíintaʼal wíinikoʼob, yéetel yoʼolal u kuxtal Jesús tu kʼubaj t-oʼolaloʼ, tiʼ le máaxoʼob kun chúukpajal u yóoloʼoboʼ yaan u tsʼaʼabaltiʼob upʼéel kuxtal jeʼex le yaan tiʼ Adán táanil tiʼ u kʼebantaloʼ. Le baʼax tu yaʼalaj Jéeoba teʼ Génesis 3:15 jach táan u bin u béeychajal. ¿Máasaʼ jach táaj kiʼimak k-óol tumen kuxaʼanoʼon teʼ kʼiinoʼobaʼ?

[Tsolajiloʼob]

¿Jeʼel wa u páajtal a tsolikeʼ?

Le tekstoʼobaʼ, ¿bix u yáantkoʼon utiaʼal k-ojéeltik tiʼ baʼax kʼiin ku yúuchul «le yáax kaʼapúut kuxtaloʼ»?

• Apocalipsis 12:7; 17:14

• Apocalipsis 7:13, 14

• 1 Corintoiloʼob 15:23; 1 Tesalonicailoʼob 4:15-17

• Apocalipsis 6:2, 9-11

[U kʼáatchiʼiloʼob le xookoʼ]

[U tsolajil le oochel teʼ táan juʼun 28]

¿Baʼax kaʼapʼéel clasesi kaʼapúut kuxtal ku yantal táanil tiʼ u kaʼa kuxkíintaʼal wíinikoʼob way Luʼumeʼ?

[U tsolajil le oochel teʼ táan juʼun 31]

¿Baʼaxten ku yaʼalaʼal tsʼaʼab «sak nookʼ» tiʼ jujuntúul cristianoʼob kimenoʼob kaʼachoʼ?