«¡Tsʼoʼok u náatsʼal u noj kʼiinil Yuumtsil!»
«¡Tsʼoʼok u náatsʼal u noj kʼiinil Yuumtsil!»
«¡Tsʼoʼok u náatsʼal u noj kʼiinil Yuumtsil! ¡Tsʼoʼok u náatsʼal, séebaʼan u taal!» (SOFONÍAS 1:14.)
1, 2. 1) ¿Baʼax noj kʼiinil táan k-jach páaʼtik u kʼuchul? 2) ¿Baʼax kʼáatchiʼiloʼob unaj k-ojéeltik u núukil, yéetel baʼaxten?
UTÚUL chʼúupaleʼ táan u jach páaʼtik u kʼuchul u kʼiinil u tsʼoʼokol u beel. Utúul koʼolel embarazadaeʼ táan u jach páaʼtik u kʼuchul u kʼiinil u síijil u chaambal. Utúul máak tsʼoʼok u sen kaʼanal meyajeʼ táan u jach páaʼtik u kʼuchul u kʼiinil u jóokʼol vacaciones. ¿Baʼax táan u beetik le óoxtúul máakoʼobaʼ? Tu óoxtúulaloʼob jach táan u páaʼtkoʼob u kʼuchul upʼéel kʼiin jach yaan baʼax u yil yéetel u kuxtaloʼob. Kex jelaʼan bix yuʼubikuba cada utúuleʼ tuláakloʼob jach u kʼáatoʼob ka kʼuchuk le kʼiin táan u páaʼtkoʼoboʼ.
2 Toʼon k-meyajtik Dioseʼ táan k-jach páaʼtik xan upʼéel kʼiin jach yaan baʼax yil yéetel k-kuxtal. Táan k-páaʼtik u kʼuchul «u noj kʼiinil Yuumtsil» (Isaías 13:9; Joel 2:1; 2 Pedro 3:12). ¿Baʼax túun «u noj kʼiinil Yuumtsil», yéetel baʼax yaan yil yéetel tuláakal wíinikoʼob? Tsʼoʼoleʼ, ¿bix jeʼel k-eʼesik táan k-páaʼtik u kʼuchul le kʼiin jeʼeloʼ? Jach kʼaʼabéet k-ojéeltik u núukil le kʼáatchiʼobaʼ, tumen tuláakal baʼax táan u yúuchuleʼ ku yeʼesik jach jaaj le baʼax ku yaʼalik le Bibliaaʼ: «¡Tsʼoʼok u náatsʼal u noj kʼiinil Yuumtsil! ¡Tsʼoʼok u náatsʼal, séebaʼan u taal!» (Sofonías 1:14).
«U noj kʼiinil Yuumtsil»
3. ¿Baʼax «u noj kʼiinil Yuumtsil»?
3 ¿Baʼax «u noj kʼiinil Yuumtsil»? Le Bibliaoʼ, ken tʼaanak tiʼ u «kʼiinil Yuumtsil[eʼ]» táan u tʼaan tiʼ le kʼiinoʼob ka tu xuʼulsaj Jéeoba tiʼ u enemigoʼob yéetel ka tu kiliʼichkúunsaj u kʼaabaʼoʼ. U kʼasaʼan kajnáaliloʼob Judá yéetel Jerusalén bey xan u nojoch luʼumiloʼob Babilonia yéetel Egiptoeʼ tu aktáantoʼob u jejeláas kʼiinoʼob Yuumtsil le ka xuʼulsaʼabtiʼob tumen Jéeobaoʼ (Isaías 2:1, 10-12; 13:1-6; Jeremías 46:7-10). Baʼaleʼ, u maas nojoch «kʼiinil Yuumtsil[eʼ]» maʼ kʼuchkiʼ. Lelaʼ, letiʼe «kʼiin» ken u xuʼuls Dios tiʼ tuláakal le máaxoʼob tsʼoʼok u mixbaʼalkúuntkoʼob u kʼaabaʼoʼ. Le «kʼiinaʼ» yaan u káajal ken xuʼulsaʼak tiʼ «le nojoch Babilonia» wa tuláakal le religionoʼob maʼatech u kaʼanskoʼob u jaajiloʼ, yéetel yaan u tsʼoʼokol ken láaj xuʼulsaʼak tiʼ u kʼasaʼan yóokʼol kaab Satanás, teʼ tu nojoch baʼatelil Armagedonoʼ (Apocalipsis 16:14, 16; 17:5, 15-17; 19:11-21).
4. ¿Baʼaxten óoliʼ tuláakal wíinik kʼaʼabéet u chʼaʼik saajkil tiʼ u noj kʼiinil Yuumtsil?
4 ¿Baʼaxten óoliʼ tuláakal wíinik kʼaʼabéet u chʼaʼik saajkil u kʼuchul le kʼiin jeʼelaʼ? Jéeobaeʼ ku yaʼalik baʼaxten: «Le kʼiin bíin taalakoʼ u kʼiinil pʼujaʼanil, u kʼiinil yaamyamil yéetel yaj óolal, u kʼiinil óotsilkunaj yéetel láaj xuʼulsajil, u kʼiinil áakʼab yéetel éekʼjochʼeʼenil u kʼiinil múuyaloʼob yéetel boʼoyil u yéekʼjochʼeʼental». ¿Máasaʼ jach sajbeʼentsil le kʼiin jeʼelaʼ? Le profecíaoʼ ku seguer u yaʼalik: «Bíin in beet u yaayam le máakoʼoboʼ. [...] Tumen j-kʼebanchajoʼob tiʼ teen» (Sofonías 1:15, 17).
5. ¿Baʼaxten táan u páaʼtkoʼob u millonesi máakoʼob ka kʼuchuk u noj kʼiinil Jéeoba?
5 Baʼaleʼ, u millonesi máakoʼobeʼ táan u jach páaʼtkoʼob u kʼuchul u kʼiinil Jéeoba. ¿Baʼaxten? Tumen u yojloʼob u kʼiinil u salvartaʼal yéetel u jáalkʼabtaʼal le máaxoʼob beetik baʼax u kʼáat Diosoʼ, yéetel u kʼiinil xan u kiʼikiʼtʼantal Jéeoba yéetel u nojbeʼenkuntaʼal u kiliʼich kʼaabaʼ (Joel 3:16, 17; Sofonías 3:12-17). ¿Baʼaxten túun yaan máaxoʼob saajkoʼob tiʼ le kʼiinaʼ yéetel yaan xan máaxoʼob táan u jach páaʼtkoʼob u kʼuchul? Leloʼ ku yúuchul yoʼolal baʼax táan u beetkoʼob bejlaʼa yéetel u kuxtaloʼobeʼ. Kux túun teech, ¿táan wa a páaʼtik u noj kʼiinil Jéeoba wa saajkech tiʼ? ¿A líiʼsmaba wa utiaʼal ken kʼuchuk? ¿Baʼax ka beetik yéetel a kuxtal tumen a wojel tsʼoʼok u jach náatsʼal le kʼiinaʼ?
«Bíin taalak pʼaʼas máakoʼob»
6. Óoliʼ tuláakal u máakiloʼob le yóokʼol kaabaʼ, ¿bix u yilikoʼob u «kʼiinil Yuumtsil», yéetel máaxoʼob meyajtik Dioseʼ baʼaxten maʼ tu jaʼakʼal u yóoloʼob yoʼolal baʼax ku beetik le máakoʼoboʼ?
6 Kex tumen tsʼoʼok u jach náatsʼal u «kʼiinil Yuumtsil[eʼ]», óoliʼ tuláakal u máakiloʼob le yóokʼol kaabaʼ maʼ táan u páaʼtkoʼob u kʼuchliʼ. Tsʼoʼoleʼ ku pʼaʼaskoʼob xan le máaxoʼob kʼaʼaytiktiʼob tsʼoʼok u náatsʼal le kʼiinaʼ. Baʼaleʼ, le máaxoʼob jach tu jaajil meyajtik Diosoʼ maʼ tu jaʼakʼal u yóoloʼob yoʼolal le baʼax ku beetik le máakoʼobaʼ, tumen ku kʼaʼajaltiʼob le baʼax tu yaʼalaj le apóstol Pedroaʼ: «Ojéelteʼex táanil lelaʼ: Tiʼ le u tsʼoʼok kʼiinoʼoboʼ bíin taalak pʼaʼas máakoʼob, táan u kuxtaloʼob jeʼel bix u kʼáat u kʼaakʼas tsʼíibolaloʼobeʼ, yéetel táan u yaʼalikoʼob: ¿Baʼax j-úuch yéetel u tsʼaatʼaanil bíin taalak Cristo? Tumen [desde] ka j-kíim le k-úuchben taataʼob tak bejlaʼeʼ tuláakal baʼal keet yanil jeʼel bix [...] yanil kaʼach le ka j-beetaʼab yóokʼol kaabeʼ» (2 Pedro 3:3, 4).
7. ¿Baʼax ken u yáantoʼon utiaʼal maʼ u tuʼubultoʼon naatsʼ yanik u noj kʼiinil Yuumtsil?
7 ¿Baʼax ken u yáantoʼon utiaʼal maʼ k-tuukul xan beyoʼ yéetel utiaʼal maʼ u tuʼubultoʼon náatsʼ yanik u noj kʼiinil Yuumtsil? Pedroeʼ ku yaʼalik: «Tin wóoltaj in beet yéetel tsolxikinoʼobeʼ ka yanakteʼex toj tuukul. Kʼaʼajakteʼex le baʼax tu yáax aʼalajoʼob le kiliʼich [profetaʼoboʼ] bey xan u yaʼalmaj tʼaan Yuumtsil [k-salvador] j-kaʼansaʼabteʼex tumen le apostoloʼoboʼ» (2 Pedro 3:1, 2). Jeʼex k-ilkoʼ, utiaʼal ka yanaktoʼon upʼéel «toj tuukul[eʼ]» unaj k-kʼaʼajsik mantatsʼ le baʼax tu yaʼalaj le profetaʼoboʼ. Maʼ xaaneʼ yaʼab utéenel tsʼoʼok k-uʼuyik le baʼax ku yaʼalik le profetaʼoboʼ, kex beyoʼ bejlaʼeʼ maas jach kʼaʼanan k-beetik baʼax ku yaʼalikoʼob (Isaías 34:1-4; Lucas 21:34-36).
8. ¿Baʼaxten yaan máaxoʼob maʼatech u beetikoʼob u cuentai le baʼax ku yaʼalik le Bibliaoʼ?
8 ¿Baʼaxten yaan máaxoʼob maʼatech u beetikoʼob u cuentai le baʼax ku yaʼalik le Bibliaoʼ? Pedroeʼ ku yaʼalik: «Letiʼobeʼ maʼ u kʼáat u kʼaj óoltoʼobeʼ le kaʼanoʼob yaniliʼob tiʼ le úuchben kʼiinoʼoboʼ bey xan le luʼumoʼ jóokʼ tiʼ le jaʼoʼ yéetel tʼubukbal ichil le jaʼoʼ tu yoʼolal u tʼaan Jajal Dios. Tu yoʼolal lelaʼ, le yóokʼol kaab yaan kaʼachoʼ xuʼulsaʼab tu yoʼolal u jaʼil le búulkabaloʼ» (2 Pedro 3:5, 6). Jeʼex k-ilkoʼ yaan máaxoʼob maʼ u kʼáatoʼob ka kʼuchuk u noj kʼiinil Jéeobaiʼ. Letiʼobeʼ maʼ u kʼáat u xul u kuxtaloʼob jeʼex suukil tiʼobeʼ yéetel maʼ u kʼáat u kʼuboʼob cuenta tiʼ Dios yoʼolal bix táan u kuxtaloʼobiʼ. Letiʼobeʼ taak u kuxtaloʼob jeʼex u kʼáatoʼobeʼ.
9. ¿Baʼax tu beetoʼob u yéet kʼiiniloʼob Noé yéetel u jaʼanoʼob Lot?
9 Le máaxoʼob ku pʼaʼasoʼoboʼ maʼ u kʼáat u tsʼaʼob cuentaeʼ, Jéeobaeʼ tu xuʼulsaj tiʼ le kʼasaʼan wíinikoʼob kuxlajoʼob úuchiloʼ. Jesucristo yéetel apóstol Pedroeʼ tʼaanajoʼob tiʼ kaʼapʼéel bix úuchik u xuʼulsaʼal tiʼ wíinikoʼob tumen Jéeoba: yáaxeʼ letiʼe úuch «tu kʼiiniloʼob Noe[oʼ]» yéetel u kaʼapʼéeleʼ letiʼe úuch «tu kʼiiniloʼob Lot[oʼ]» (Lucas 17:26-30; 2 Pedro 2:5-9). Táanil tiʼ u taal le Búulkabaloʼ, u yéet kʼiiniloʼob Noeeʼ maʼ tu chʼenxikintoʼob le baʼax kʼaʼaytaʼab tiʼoboʼ. Tsʼoʼoleʼ, le ka xan tu yaʼalaj Lot tiʼ u jaʼanoʼob yaan u xuʼulsaʼal tiʼ u kaajiloʼob Sodoma yéetel Gomorraeʼ, letiʼobeʼ «maʼ tu tukultajoʼob wa jaaj le baʼax ku yaʼalaʼaltiʼob tumen Lot[oʼ]» (Génesis 19:14).
10. ¿Baʼax ken u beet Jéeoba yéetel le máaxoʼob maʼatech u beetikoʼob u cuentai le baʼax ku kʼaʼaytaʼaltiʼoboʼ?
10 Bey xan u yúuchul bejlaʼeʼ. Baʼaleʼ, koʼox ilik baʼax ken u beet Jéeoba tiʼ le máaxoʼob maʼatech u beetikoʼob u cuentai le baʼax ku kʼaʼaytaʼaltiʼoboʼ: «Bíin in jatsʼ túun le máakoʼob jeetsʼel u yuʼubikubaʼob jeʼel bix jeetsʼel akakbalil vinoeʼ, jeʼel bix u yaʼalik tu baatsi[loʼoboʼ]: ¡Yuumtsileʼ mix baʼal bíin u beete, mix uts mix kʼaas! Tu yoʼolal leloʼ bíin láaj okoltaʼak u ayikʼaliloʼob bey xan bíin láaj paʼabak u yotochoʼob. Bíin u beetoʼob najoʼob, baʼaleʼ maʼ bíin kajlakoʼobiʼ; bíin u pakʼoʼob uvaʼob, baʼaleʼ maʼ bíin u yukʼoʼob u kʼaabiʼ» (Sofonías 1:12, 13). Le máakoʼoboʼ, maʼ xaaneʼ, láayliʼ táan u kuxtaloʼob jeʼex suukiltiʼobeʼ, baʼaleʼ le sen meyaj ku beetkoʼoboʼ maʼ ken u taas mix upʼéel utsiltiʼob utiaʼal mantatsʼ. ¿Baʼaxten? Tumen u noj kʼiinil Jéeobaeʼ yaan u kʼuchul tiʼ upʼéel kʼiin maʼ táan u páaʼtkoʼobiʼ, yéetel tuláakal u ayikʼaliloʼobeʼ maʼ kun meyajtiʼob utiaʼal ka u salvartubaʼobiʼ (Sofonías 1:18).
«Techeʼ páaʼtej»
11. ¿Baʼax maʼ unaj u tuʼubultoʼoniʼ?
11 Toʼoneʼ maʼ unaj k-beetik jeʼex u kʼasaʼan máakiloʼob le yóokʼol kaabaʼ, baʼaxeʼ unaj k-kʼaʼajsik le baʼaxoʼob tu yaʼalaj le profeta Habacucaʼ: «Yaan tsʼeʼetsʼek kʼiin u bin utiaʼal ka béeyak le baʼax tsʼoʼok a wilik tiʼ le náayaʼ; baʼaleʼ maʼ bíin pʼáatak maʼ u yúuchuliʼ. Techeʼ páaʼtej kex ka a wilaʼaʼ táan u xáantal, tumen bíin kʼuchuk jach u kʼiinil u béeytal» (Habacuc 2:3). Kex bey ka k-il táan u xáantal u kʼuchul le kʼiin jeʼeloʼ, maʼ u tuʼubultoʼoneʼ tiʼ Jéeobaeʼ maʼ tu chúunkʼintal tiʼ utiaʼal u tsʼoʼokbesik baʼax u yaʼalmaj. U kʼiinil Jéeobaeʼ yaan u taal tiʼ le kʼiin u tukulmoʼ, tiʼ upʼéel kʼiin maʼ táan u páaʼtaʼal tumen wíinikoʼobiʼ (Marcos 13:33; 2 Pedro 3:9, 10).
12. ¿Baʼax tu yaʼalaj Jesús maʼ unaj u yúuchultoʼoniʼ, baʼaleʼ baʼax ku beetik u disipuloʼob yanoʼob ichil le palitsil chúukpajaʼan u yóoloʼ?
12 Jesuseʼ tu yaʼalaj xan baʼaxten maʼ unaj u jáawal k-páaʼtik u kʼuchul u noj kʼiinil Yuumtsiliʼ, tu yaʼaleʼ yaan tiʼ u disipuloʼobeʼ yaan u náayal u yóoloʼob le táan u páaʼtoʼob le kʼiin jeʼeloʼ. Letiʼeʼ tu yaʼalaj tu yoʼolaloʼob: «Wa le palitsil juntúul kʼaakʼas máakoʼ yéetel ku tukultik yaan u xáantal ken suunak u tsʼuulileʼ, ku joʼopʼol túun u jaʼajaʼatsʼik le uláakʼ palitsiloʼoboʼ bey xan ku janal yéetel ku yukʼul yéetel le kalaʼanoʼoboʼ, bíin suunak u tsʼuulil tiʼ le kʼiin maʼ táan u páaʼtikeʼ yéetel tiʼ le ora maʼ u yojeloʼ bíin tsʼaʼabak túun u [maas] yajil jaatsʼ tiʼ» (Mateo 24:48-51). Baʼaleʼ, u disipuloʼob Jesús yanoʼob ichil le palitsil chúukpajaʼan u yóol yéetel yaan u naʼatoʼ maʼatech u náayal yóoloʼob. Tsʼoʼoleʼ, tumen maʼ jáawak u páaʼtikoʼob yéetel tumen u tsʼaamaj u yóoloʼob meyajeʼ, Jesuseʼ tsʼoʼok u tsʼáaiktiʼob «u kanáant[oʼob] tuláakal baʼax yaan tiʼ» way Luʼumeʼ (Mateo 24:42-47).
Maʼ unaj u náayal k-óoliʼ
13. ¿Bix tu yeʼesil Jesús tiʼ u disipuloʼob maʼ unaj u náayal u yóoloʼobiʼ?
13 Le cristianoʼob teʼ yáax siglooʼ jach kʼaʼabéetchaj u kanáantkubaʼob utiaʼal maʼ u náayal u yóoloʼob. ¿Baʼaxten? Tumen kʼaʼabéet kaʼach u séeb jóoʼloʼob tiʼ u kaajil Jerusalén ken u yiloʼob «bakʼpachtaʼan [...] tumen soldadoʼob» (Lucas 21:20, 21). Lelaʼ úuch tu jaʼabil 66 teʼ yáax siglooʼ. Baʼaleʼ, Jesuseʼ tsʼoʼokaʼaniliʼ u yaʼalik tiʼ u disipuloʼob maʼ unaj u náayal u yóoloʼobiʼ; letiʼeʼ tu yaʼalaj tiʼob: «Le máax yaan yóokʼol u yotocheʼ maʼ u yéemel ka okok u chʼaʼa wa baʼax, le máax bijaʼan kʼáaxeʼ maʼ u suut mix u chʼaʼa u nookʼ» (Mateo 24:17, 18). Baʼaleʼ wa Jerusalén xuʼulsaʼab tiʼ tak tu jaʼabil 70, ¿baʼaxten túun tu jaʼabil 66 unaj u beetikoʼob kaʼach le cristianoʼob le baʼax tu yaʼalaj Jesusoʼ?
14, 15. Le cristianoʼob teʼ yáax siglooʼ, ¿baʼaxten kʼaʼabéetchaj u séeb beetkoʼob le baʼax tu yaʼalaj Jesús le ka tu yiloʼob baʼpachtaʼan u kaajil Jerusalén?
14 Kex tumen le romanoʼob maʼ tu xuʼulsoʼob tiʼ u kaajil Jerusalén tu jaʼabil 66, teʼ kampʼéel jaʼaboʼob máan tak tu jaʼabil 70, anchaj yaʼab talamiloʼob ichil le judíoʼoboʼ. Jach yanchaj baʼateloʼob yéetel yaʼab máaxoʼob kíimsaʼaboʼobiʼ. Utúul máak jach u xokmaj baʼax úuch teʼ kʼiinoʼob jeʼeloʼoboʼ, tu yaʼaleʼ ichil u kajnáaliloʼob Jerusaleneʼ anchaj upʼéel nojoch baʼateʼel tuʼux yaʼab máakoʼob kíimoʼob yéetel pʼáat tuláakal máak sajak. Jeʼex le táankelem xiʼipalaloʼoboʼ ku bisaʼaloʼob kaʼach utiaʼal u yutskíinkoʼob u baʼpakʼiloʼob le kaajoʼ, utiaʼal ka u beet u soldadoiloʼob, utiaʼal ka baʼatelnakoʼob yéetel utiaʼal u kaʼansaʼaloʼob baʼateʼel. Tsʼoʼoleʼ, le máaxoʼob maʼ tu táakpajloʼob teʼ baʼateʼel ku beetaʼaloʼ ku yilaʼal bey tiaʼanoʼob tu contra le máaxoʼob ku baʼateloʼoboʼ. Yoʼolal tuláakal le baʼax úuchaʼ, wa ka pʼáatak kaʼach le cristianoʼob Jerusaleneʼ, tsʼoʼok kaʼach u aktáankoʼob nojoch talamiloʼobeʼ (Mateo 26:52; Marcos 12:17).
15 Tsʼoʼoleʼ, Jesuseʼ tu yaʼalaj xaneʼ tak «le máaxoʼob yanoʼob Judea» unaj u púutsʼloʼoboʼ, maʼ chéen le yanoʼob Jerusalenoʼ. Lelaʼ upʼéel baʼax jach kʼaʼanan u beetaʼal kaʼachi, tumen maʼ yaʼab mesoʼob lukʼuk u soldadoiloʼob Roma tu kaajil Jerusaleneʼ ka káaj u baʼateloʼob tu kaʼatéen tu contra uláakʼ kaajoʼob. Yáaxeʼ tu jaʼabil 67 tu chʼaʼajoʼob u luʼumil Galilea, yéetel tu jaʼabil 68 ookoʼob tu luʼumil Judea ka bin u chʼaʼikoʼob jujumpʼíitil. Tsʼoʼoleʼ jujumpʼíitil ka bin u maas talamtal u púutsʼul utúul judío tiʼ u kaajil Jerusalén. U jool najiloʼob le kaajoʼ jach kanáantaʼanoʼob kaʼach, yéetel tuláakal le máax ku yóotik jóoʼleʼ ku yilaʼal bey táan u tsʼáaikuba tu tséel le romanoʼoboʼ.
16. ¿Baʼax anchaj u beetik le cristianoʼob teʼ yáax siglo utiaʼal u salvartik u kuxtaloʼoboʼ?
16 Yoʼolal le baʼax tsʼoʼok k-ilkaʼ, k-naʼatik baʼaxten tu yaʼalaj Jesús maʼ unaj u náayal u yóol u disipuloʼobiʼ. Le cristianoʼobaʼ unaj kaʼach u yóotik u pʼatoʼob «tuláakal baʼal yaan tiʼ[ob]» yéetel maʼ unaj u chaʼikoʼob u náaysaʼal u yóoloʼob tumen le ayikʼaliloʼoboʼ, utiaʼal beyoʼ u beetkoʼob le baʼax tu yaʼalaj Jesusoʼ (Lucas 14:33). Le máaxoʼob séeb jóokʼoʼob ka binoʼob tuláakʼ u tséelil u yáalkab jaʼil Jordán jeʼex tu yaʼalil Jesuseʼ bin utsil tiʼob tumen tu salvartubaʼob.
Maʼ k-chaʼik u tuʼubultoʼon náatsʼ yanik u noj kʼiinil Jéeobaiʼ
17. ¿Baʼaxten maʼ unaj k-chaʼik u tuʼubultoʼon naatsʼ yanik u noj kʼiinil Jéeobaiʼ?
17 U profeciailoʼob le Bibliaoʼ ku yeʼeskoʼobeʼ jach náatsʼ yanik u kʼiinil u xuʼulsaʼal tiʼ le yóokʼol kaab jach tsʼoʼok u kʼastalaʼ. Le oʼolal jumpuliʼ maʼ unaj u náayal k-óoliʼ, maʼ unaj k-chaʼik u tuʼubultoʼon náatsʼ yanik u noj kʼiinil Jéeobaiʼ.Tuukulnakoʼon tiʼ utúul soldado. Tu kʼiiniloʼob minaʼan baʼateleʼ, maʼ xaaneʼ jeʼel u náayal u yóol ka tak pʼáatak maʼatech u líiʼskuba utiaʼal upʼéel baʼateleʼ. Baʼaleʼ ¿baʼax kun úuchul ken tʼanaʼak utiaʼal u bin baʼateʼel? Tumen maʼ tu líiʼsubaʼeʼ, maʼ xaaneʼ jeʼel u kíimsaʼaleʼ. Jeʼex le soldadooʼ, wa toʼon k-chaʼik u bin u náayal k-óoleʼ, maʼ xaaneʼ maʼ kun páajtal k-jechik le talamiloʼob ken k-aktáantoʼ yéetel u noj kʼiinil Jéeobaeʼ yaan u machkoʼon tiʼ le kʼiin maʼ táan k-páaʼtikoʼ (Lucas 21:36; 1 Tesalonicailoʼob 5:4). Le oʼolaleʼ, wa yaan máaxoʼob tsʼoʼok u «tselikubaʼob tiʼ» Jéeobaeʼ, bejlaʼeʼ u kʼiinil utiaʼal u kaʼa natsʼkubaʼob tiʼ letiʼeʼ (Sofonías 1:3-6; 2 Tesalonicailoʼob 1:8, 9).
18, 19. ¿Baʼax ken u yáantoʼon utiaʼal maʼ u xuʼulul k-páaʼtik u kʼuchul «u kʼiinil Jajal Dios»?
18 Le oʼolal le apóstol Pedrooʼ ku yaʼaliktoʼon: «Páaʼteʼex yéetel séebkunteʼex u kʼuchbal u kʼiinil Jajal Dios». ¿Bix jeʼel k-beetik lelaʼ? Upʼéel bixeʼ letiʼe k-kuxtal yéetel «kʼub óolal [bey xan] yéetel kiliʼichil» (2 Pedro 3:11, 12). K-kʼubikba k-beet baʼaloʼob kiliʼich u yilaʼaloʼob tumen Dioseʼ yaan u yáantkoʼon utiaʼal maʼ u xuʼulul k-páaʼtik u kʼuchul «u kʼiinil Jajal Dios». U jaajileʼ maʼ tu páajtal k-séebkuntik u kʼuchul u noj kʼiinil Jéeoba. Baʼaleʼ, wa k-tsʼaamaj k-óol meyajt Dioseʼ maas séeb ken k-il u kʼuchul le kʼiin jeʼeloʼ (1 Corintoiloʼob 15:58).
19 K-tuukul tiʼ baʼax ku yaʼalik le Biblia yéetel tiʼ le kʼaʼajsajiloʼob ku tsʼáaikoʼ yaan u yáantkoʼon «[k-]páaʼtikeʼex» yéetel «[k-]yanyantikeʼex» «u taalbal u kʼiinil Jajal Dios» (2 Pedro 3:12, LTN). Ichil le kʼaʼajsajiloʼobaʼ táakaʼan xan yaʼab profecíaʼob ku tʼaanoʼob tiʼ u noj kʼiinil Yuumtsil yéetel tiʼ le nojoch utsiloʼob ken u kʼam le máaxoʼob kun páaʼtajoʼob tiʼ Jéeobaoʼ (Sofonías 3:8).
20. ¿Baʼax ku yaʼalik le profeta Sofonías unaj k-beetkoʼ?
20 U jaajileʼ, bejlaʼeʼ u kʼiinil utiaʼal k-jach beetik le baʼax ku yaʼaliktoʼon profeta Sofoniasaʼ: «Maʼiliʼ [taalak] ta wóokʼoleʼex u sen pʼujaʼanil Yuumtsil; maʼiliʼ [lúubuk] ta wóokʼoleʼex u kʼiinil u pʼujaʼanil Yuumtsil[eʼ,] tuláakaleʼex u kabal óolalileʼex yóokʼol kaabeʼ kaxanteʼex Yuumtsil, teʼex ka wuʼuyaj tʼantikeʼex u yaʼalmaj tʼaanoʼoboʼ. Meyajneneʼex tubeel yéetel kabal óolajil, maʼ xaan ka a kaxteʼex tuʼux a taʼakbesikabaʼex tiʼ u kʼiinil u pʼujaʼanil Yuumtsileʼ» (Sofonías 2:2, 3).
21. Máaxoʼob meyajtik Dioseʼ, ¿baʼax tsʼoʼok u chʼaʼatuklik u beetikoʼob tu jaʼabil 2007?
21 Le oʼolal utiaʼal u jaʼabil 2007, jach maʼalob úuchik u yéeyaʼal le teksto ku yaʼalik: «¡Tsʼoʼok u náatsʼal u noj kʼiinil Yuumtsil!». Máaxoʼob tu jaajil ku meyajtikoʼob Dioseʼ jach u yojloʼob u noj kʼiinil Jéeobaeʼ «¡tsʼoʼok u náatsʼal, séebaʼan u taal!» (Sofonías 1:14). «Maʼ bíin pʼáatak maʼ u yúuchuliʼ.» (Habacuc 2:3.) Le oʼolaleʼ maʼ u náayal k-óol páaʼt u kʼuchul le kʼiinaʼ, tumen jeʼex k-ojliloʼ taʼaytak u béeychajal tuláakal le baʼax ku yaʼalik le profecíaʼoboʼ.
¿A wojel wa u núukil?
• ¿Baʼax «u noj kʼiinil Yuumtsil»?
• ¿Baʼaxten yaan máaxoʼob maʼatech u beetikoʼob u cuentai tsʼoʼok u jach náatsʼal u noj kʼiinil Yuumtsil?
• Le cristianoʼob teʼ yáax siglooʼ, ¿baʼaxten jach kʼaʼabéetchaj u kanáantkubaʼob utiaʼal maʼ u náayal yóoloʼob?
• ¿Baʼaxten maʼ unaj k-chaʼik u tuʼubultoʼon naatsʼ yanik u noj kʼiinil Jéeobaiʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 11]
U tekstoi le jaʼab 2007 letiʼ lelaʼ: «¡Tsʼoʼok u náatsʼal u noj kʼiinil yuumtsil!» (Sofonías 1:14).
[U tsolajil le oochel teʼ táan juʼun 9]
Jeʼex úuch tu kʼiiniloʼob Noeeʼ, u noj kʼiinil Jéeobaeʼ yaan u kʼuchul tiʼ upʼéel kʼiin maʼ táan u páaʼtaʼal tumen le máaxoʼob ku pʼaʼastajoʼoboʼ
[U tsolajil le oochel teʼ táan juʼun 10]
Le cristianoʼob teʼ yáax siglooʼ kʼaʼabéetchaj u séeb beetkoʼob le baʼax tu yaʼalaj Jesús le ka tu yiloʼob baʼpachtaʼan u kaajil Jerusalenoʼ