Kʼáatchiʼob ku beetaʼal

¿Baʼax le «u baʼatelil u nojoch kʼiinil [Dios]» kun úuchul Armagedonoʼ yéetel baʼax ken u béeykunte? (Apocalipsis 16:14, 16.)

Le «u baʼatelil u nojoch kʼiinil [Dios]» kun úuchul Armagedonoʼ, letiʼe nojoch baʼateʼel tuʼux kun xuʼulsaʼal tuláakal u enemigoʼob Dios tumen Jesucristo, le Rey tsʼaʼan tumen Jéeobaoʼ. Le Bibliaoʼ ku yaʼalikeʼ le u enemigoʼob Dios, «tuláakal u [reyiloʼob] yóokʼol kaab[eʼ]», ku nuʼuktaʼaloʼob tumen «u pixanoʼob kʼaasilbaʼaloʼob ku beetikoʼob chíikuloʼob». Le reyoʼobaʼ ku muchʼkíintaʼaloʼob «utiaʼal u baʼatelil u nojoch kʼiinil [...] Jajal Dios, tiʼ máax yaan tuláakal páajtalil  [...] tiʼ le kúuchil ku kʼaabaʼintik ich [hebreo] Armagedon[oʼ]» (Apocalipsis 16:14, 16).

Le tuʼux kun muchʼkíintbil le máaxoʼob kun baʼateloʼoboʼ maʼ jach upʼéel kúuchiliʼ. Le tʼaan «Armagedonoʼ» yaan Bibliaʼobeʼ ku sutkoʼob yéetel le tʼaan «U puʼukil Meguido» (Apocalipsis 16:16). Baʼaleʼ, u jaajileʼ minaʼan mix upʼéel puʼuk ku kʼaabaʼtik beyoʼ. Tsʼoʼoleʼ «u [reyiloʼob] yóokʼol kaab yéetel u baʼateʼel máakoʼobeʼ» maʼ tu páajtal u muchʼkíintaʼaloʼob chéen tiʼ upʼéeliliʼ tuʼux (Apocalipsis 19:19). Le tʼaan «kúuchil» ku yaʼalik le Bibliaoʼ, táan u tʼaan tiʼ le ken u tsʼáauba le gobiernoʼob yéetel le máaxoʼob yanoʼob tu yéeteloʼob tu contra Jéeoba yéetel tu contra Jesucristo, «u Yuumtsil yuumtsiloʼob[oʼ]» (Apocalipsis 19:14, 16).

Le tʼaan Armagedonoʼ yaan yil yéetel upʼéel u úuchben kaajil Israel ku kʼaabaʼtik Meguido. Teʼ kaajaʼ jach yaʼab u máan kaʼach j-koonoloʼobiʼ yéetel yaʼab xan u máan soldadoʼobiʼ, le oʼolaleʼ upʼéel kaaj jach kʼaj óolaʼan. Tsʼoʼoleʼ teʼ kaajaʼ úuch xan yaʼab nojoch baʼateloʼobiʼ. Upʼéel tiʼ le baʼateloʼoboʼ letiʼeʼ úuch «tu jáal u jaʼiloʼob Meguido» tuʼux ganartaʼab u soldadoʼob Sísara tumen le juez israelita Baracoʼ (Jueces 4:12-24; 5:19, 20). Uláakʼ upʼéel baʼateʼel úucheʼ letiʼe tuʼux ganartaʼab le madianitaʼob tumen le juez Gedeonoʼ (Jueces 7:1-22). Le baʼaxoʼob úuch Meguidooʼ ku yeʼesikeʼ teʼ tu «baʼatelil u nojoch kʼiinil [Diosoʼ]», Jéeoba yéetel u yáantaj Jesucristoeʼ yaan u xuʼulsik tiʼ tuláakal le u enemigoʼoboʼ.

¿Baʼax ken u béeykunt le «u baʼatelil u nojoch kʼiinil [Dios]» kun úuchul Armagedonoʼ? Yaan u láaj xuʼulsik tiʼ le máaxoʼob ku beetikoʼob baʼaloʼob kʼaastakoʼ yéetel, ken tsʼoʼokokeʼ yaan u yilaʼal upʼéel jach maʼalob kuxtal jeʼex mix utéen ilaʼakeʼ (Apocalipsis 21:1-4). Yáanal u nuʼuktaj Dioseʼ, le Luʼumoʼ yaan u suʼutul upʼéel paraíso, tuʼux kun kajtal le máaxoʼob utsoʼob utiaʼal minaʼan u xuuloʼ (Salmo 37:29).