Koʼoneʼex áantik uláakʼ máakoʼob u beetoʼob le baʼax ku kaʼansik le Bibliaoʼ
Koʼoneʼex áantik uláakʼ máakoʼob u beetoʼob le baʼax ku kaʼansik le Bibliaoʼ
«Le iʼinaj lúub tiʼ maʼalob luʼumeʼ letiʼ le máaxoʼob ku yuʼubikoʼob le tʼaanoʼ yéetel maʼalob puksiʼikʼal bey xan yéetel chúukaʼan óolal. Le tʼaanoʼ ku pʼáatal tu puksiʼikʼaloʼob; bey túunoʼ ku tsʼáaikoʼob maʼalob ich.» (LUCAS 8:15.)
1, 2. 1) Aʼal baʼax oʼolal beetaʼab le libro ¿Baʼax jach tu jaajil ku kaʼansik le Bibliaoʼ? 2) Teʼ tsʼook jaʼaboʼobaʼ, ¿bix u chíikpajal le áantaj ku tsʼáaik Jéeoba tiʼ le máaxoʼob meyajtikoʼ?
«LE LIBROOʼ jach táaj maʼalob. Le máaxoʼob ku xookoʼob tin wéeteloʼ jach jatsʼuts u yilkoʼob, yéetel teneʼ bey xan in wilkoʼ. Jach maʼ talam in káajsik in xook yéetel le máakoʼob tak tu jool u yotochoʼoboʼ.» Lelaʼ letiʼ le baʼax tu yaʼalaj utúul precursora yoʼolal le libro ¿Baʼax jach tu jaajil ku kaʼansik le Bibliaoʼ? * Utúul sukuʼun tsʼoʼok u chan yantal u jaʼabiloʼobeʼ tu yaʼalaj xan: «Teʼ cincuenta jaʼaboʼob joʼopʼok in kʼaʼaytajoʼ, tsʼoʼok in wáantik yaʼab máakoʼob utiaʼal u kʼaj óoltoʼob Jéeoba. Baʼaleʼ, u jaajileʼ le libroaʼ jach táaj jatsʼuts. Le kettʼaanoʼob yéetel le dibujoʼob ku taaskoʼ jach maʼalobtakoʼob». Techeʼ, ¿bey wa xan a wilik le libro ¿Baʼax ku kaʼansik le Bibliaoʼ?? Le libroaʼ beetaʼan utiaʼal u yáantikoʼon k-beet le baʼax tu kʼubéentajtoʼon Jesusaʼ: «Xeeneʼex túun tiʼ u kajnáaliloʼob tuláakal kaajoʼobeʼ ka a [...] kaʼanseʼexoʼob u tsʼoʼokbesoʼob tuláakal baʼax in waʼalmaj tiʼ teʼex» (Mateo 28:19, 20).
2 Jéeobaeʼ jach wal ku kiʼimaktal u yóol ken u yil le 6,600,000 utúulul u j-Jaajkunajoʼob táan u kaʼanskoʼob uláakʼ máakoʼob jeʼex tu túuxtilak Jesusoʼ (Proverbios 27:11). Jach chíikaʼan táan u yáantaj Jéeoba utiaʼal ka beetaʼak le meyajaʼ. Tu mesiloʼob septiembre tiʼ 2004 tak agosto tiʼ 2005, le maʼalob péektsiloʼ kʼaʼaytaʼab tiʼ 235 luʼumiloʼob, yéetel cada mes xaneʼ kaʼansaʼab kex 6,061,500 utúulul máakoʼob. Yoʼolal lelaʼ yaʼab máakoʼob tu yuʼuboʼob le maʼalob péektsiloʼ yéetel tu kʼamoʼob «jeʼel bix u maʼalob péektsil Jajal Dioseʼ maʼ jeʼel bix u maʼalob péektsil máakoʼob[iʼ]» (1 Tesalonicailoʼob 2:13). Teʼ tu tsʼook kaʼapʼéel jaʼaboʼobaʼ maas tiʼ medio millón máakoʼob tsʼoʼok u káajal u kuxtaloʼob jeʼex u kʼáat Dioseʼ yéetel tsʼoʼok xan u kʼubik u kuxtaloʼob tiʼ letiʼ.
3. ¿Baʼax kʼáatchiʼiloʼob yaan yiloʼob yéetel le libro ¿Baʼax ku kaʼansik le Bibliaoʼ? ken k-il u núukiloʼob teʼ xookaʼ?
3 Techeʼ, ¿yaan wa máaxoʼob ka tsʼáaik xook tiʼob yéetel le Bibliaoʼ? Tiʼ tuláakal yóokʼol kaabeʼ láayliʼ yaan máakoʼob yantiʼob upʼéel «maʼalob puksiʼikʼal», máakoʼob ken u yuʼuboʼob le maʼalob péektsiloʼ «ku pʼáatal tu puksiʼikʼaloʼob; bey túunoʼ ku tsʼáaikoʼob maʼalob ich» (Lucas 8:11-15). Le oʼolaleʼ, koʼox ilik bix jeʼel u meyajtoʼon le libro ¿Baʼax ku kaʼansik le Bibliaoʼ? utiaʼal k-kaʼansik uláakʼ máakoʼob. Koʼox ilik u núukil le óoxpʼéel kʼáatchiʼobaʼ: 1) ¿Bix jeʼel a káajsik a xokik le Biblia yéetel wa máaxoʼ? 2) ¿Baʼax kʼaʼabéet a beetik utiaʼal ka kaʼansajnakech tubeel? 3) ¿Bix jeʼel a wáantik utúul j-xoknáal utiaʼal u kaʼansik tiʼ uláakʼ máakoʼob le baʼax ku kaʼansik le Bibliaoʼ?
Bix jeʼel a káajsik a xokik le Biblia yéetel wa máaxoʼ
4. ¿Baʼaxten yaan máaxoʼob maʼ tu jáan yóotik ka tsʼaʼabak xook tiʼob, yéetel bix jeʼel a wáantikoʼob utiaʼal ka káajak u xokkoʼob le Biblia ta wéeteloʼ?
4 Wa ka aʼalaʼaktech ka síitʼnakech utiaʼal a kʼáatmáan tiʼ upʼéel bej láaj buululeʼ, ¿máasaʼ maʼ ta jáan beetik? Baʼaleʼ, wa ka tsolaʼak tuunchoʼob ichil le jaʼ utiaʼal a máanoʼ, ¿máasaʼ maas jeʼel a wóotik máaneʼ? Bey túun xanoʼ, utúul máak yaʼab baʼal yaan u beeteʼ, maʼ xaaneʼ, maʼ tu jáan yóotik u xok le Biblia ta wéeteloʼ. Maʼ xaaneʼ ku tuklikeʼ talam yéetel yaʼab tiempo ken u bis tiʼ. ¿Bix jeʼel u páajtal a wáantik utiaʼal ka káajak u xokik le Biblia ta wéeteloʼ? Jeʼel u páajtal a bin a xíimbalt yaʼab utéenel utiaʼal ka tsikbalnakeʼex u chan súutuk tiʼ upʼéel baʼax ku yaʼalik le libro ¿Baʼax ku kaʼansik le Bibliaoʼ? Wa ka líiʼskaba tubeeleʼ, cada ken a xíimbalteʼ bey ka a tsʼáa upʼéel tuunich utiaʼal péeʼchaʼat le máakoʼ, utiaʼal beyoʼ u maas natsʼkuba tiʼ Jéeobaoʼ.
5. ¿Baʼaxten unaj a xokik le libro ¿Baʼax ku kaʼansik le Bibliaoʼ??
5 Baʼaleʼ táanil tiʼ a wáantik wa máax yéetel le libro ¿Baʼax ku kaʼansik le Bibliaoʼ?, techeʼ unaj a wojéeltik jach baʼax ku kaʼansik. ¿Tsʼoʼok wa a láaj xokik? Uʼuy a wuʼuy baʼax úuch tiʼ utúul sukuʼun yéetel u yatan káaj u xokkoʼob le libro le bijaʼanoʼob xíimbal tu jáal jaʼoʼ. Juntúul koʼolel tu máan koonoleʼ náatsʼ tu yiknaloʼob, ka tu yilaj u kʼaabaʼ le libro ¿Baʼax jach tu jaajil ku kaʼansik le Bibliaoʼ? Tu yaʼalajtiʼobeʼ táant u kʼáatik tiʼ Dios ka áantaʼak u kaxt u núukil le kʼáatchiʼ jeʼeloʼ. Letiʼob túuneʼ tu tsʼáajoʼob le libro tiʼoʼ. Kux túun teech, ¿tsʼoʼok wa a jóoʼsik u súutukil utiaʼal a láaj xokik le libro utéen wa tak kaʼatéenoʼ? Maʼ xaaneʼ jeʼel u páajtal a xokik le táan a viajar wa le táan a jeʼelel teʼ tu kúuchil a meyaj wa a xookoʼ (Efesoiloʼob 5:15, 16). Wa ka beetkeʼ maʼ chéen yaan a maas kʼaj óoltik le libroaʼ, maʼ xaaneʼ, yaan xan u páajtal a tsikbal yéetel wa máax yoʼolal le baʼax ku kaʼansikoʼ.
6, 7. ¿Bix jeʼel u páajtal u meyajtech le libro ¿Baʼax ku kaʼansik le Bibliaoʼ? utiaʼal a káajsik a xook yéetel le máakoʼoboʼ?
6 Ken a kʼaʼayt le librooʼ, meyajnaktech maʼalob le dibujoʼob, le tekstoʼob yéetel le kʼáatchiʼob yaan teʼ tu táan juʼuniloʼob 4, 5 yéetel 6. Jeʼel u páajtal a káajsik upʼéel tsikbal yéetel le kʼáatchiʼaʼ: «A tuklikeʼ, ¿yaan wa tuʼux jeʼel k-kaxtik áantaj utiaʼal k-aktáantik le talamiloʼoboʼ?». Chʼenxikint baʼax ken u núuke, tsʼoʼoleʼ xok 2 Timoteo 3:16, 17 yéetel tsoleʼ, le Bibliaoʼ ku yaʼalik yaan u xuʼulsaʼal tuláakal le talamiloʼoboʼ. Ken tsʼoʼokkeʼ, eʼes le táan juʼunoʼob 4 yéetel 5 yéetel kʼáat tiʼ: «¿Máakalmáak tiʼ le jatsʼuts baʼaloʼob ka wilik teʼ dibujo a kʼáat a wil u béeytaloʼ?». Ken u yéey upʼéeleʼ aʼal tiʼ ka u mach le libro utiaʼal a xokik teʼ Biblia le teksto ku tʼaan tiʼ leloʼ. Tsʼoʼoleʼ xok baʼax ku yaʼalik le táan juʼun 6 yéetel kʼáat tiʼ: «Tiʼ le seis kʼáatchiʼob yaan teʼelaʼ, ¿máakalmáak a kʼáat a wojéelt u núukiliʼ?». Ken u yaʼal máakalmáakeʼ, eʼes baʼax xookil tiʼ le libro ku núukik le kʼáatchiʼ jeʼeloʼ, pʼat le libro tiʼoʼ yéetel kʼáat baʼax kʼiin yéetel baʼax ora jeʼel u béeytal a kaʼa tsikbaleʼex yoʼolal le kʼáatchiʼ tu yéeyoʼ.
7 U kʼaʼaytaʼal le libro jeʼex tsʼoʼok k-aʼalikaʼ chéen ku bisik kex cinco minutos u beetaʼal. Baʼaleʼ, ichil le chan súutukoʼ, yaan a wojéeltik baʼaxoʼob taak u yojéeltik le máakoʼ, yaan u béeytal a xokik yéetel a tsolik kaʼapʼéel tekstoʼob yéetel yaan a wilik baʼax ken a tsikbalt ken kaʼa suunakech. Maʼ xaaneʼ le chan tsikbal ta beetoʼ jeʼel u jach líiʼsik u yóol le máakoʼ. Le oʼolaleʼ, kex wa yaʼab baʼal yaan u beeteʼ, maʼ xaaneʼ yaan u jach páaʼtik a suut utiaʼal a kaʼa tsikbaleʼex u súutuk. Ken a beet beyoʼ yaan a wáantik utiaʼal ka náatsʼak tiʼ «le bej ku bin tiʼ kuxtaloʼ» (Mateo 7:14). Jeʼex kun bin u maas taaktal u kaambaleʼ maʼalob xan ka maas xáanchajak táan a xookeʼex. Utiaʼal leloʼ, maʼ xaaneʼ jeʼel u páajtal a waʼalik tiʼ ka kulakeʼex utiaʼal ka maas chan xooknakeʼexeʼ.
Bix jeʼel k-kaʼansaj tubeeleʼ
8, 9. 1) ¿Bix jeʼel a wáantik le j-xoknáal utiaʼal maʼ u lúubul u yóol ken u aktáant talamiloʼobeʼ? 2) ¿Tuʼux jeʼel u páajtal k-kaxtik le baʼaloʼob maʼalobtak utiaʼal u pʼáatal muʼukʼaʼan u fe máakoʼ?
8 Ken káajak u beetik le j-xoknáal le baʼax ku kaʼansik le Bibliaoʼ, maʼ xaaneʼ jeʼel u yantal wa baʼax talamil tiʼeʼ. Le apóstol Pablooʼ tu yaʼalaj: «Tumen tu jaajileʼ tuláakal le máaxoʼob u kʼáatoʼob kuxtal u kʼubmaj u yóoloʼob tiʼ Cristo Jesuseʼ yaan u mukʼyajtikoʼob chʼaʼapachtajiloʼob» (2 Timoteo 3:12). Pabloeʼ tu ketaj le talamiloʼob yéetel upʼéel kʼáakʼ ku tóokik le baʼaloʼob maʼ jach pataloʼoboʼ, baʼaleʼ maʼ tu beetik mix baʼal tiʼ le baʼaloʼob maʼalobtak jeʼex oro, plata yéetel le jatsʼuts tuunichoʼoboʼ (1 Corintoiloʼob 3:10-13; 1 Pedro 1:6, 7). Bey túunoʼ, utiaʼal u yantal tiʼ le j-xoknáal le baʼaxoʼob kun áantik utiaʼal maʼ u lúubul u yóol ken u aktáant talamiloʼoboʼ, techeʼ kʼaʼabéet a kaʼansik maʼalob utiaʼal ka pʼáatak bey upʼéel baʼal beetaʼan yéetel baʼaloʼob maʼ tu páajtal u yeleloʼobeʼ.
9 Le salmistaoʼ ku yaʼalikeʼ «u tsʼa tʼaanoʼob le Yuumtsiloʼ [...] beyoʼob jeʼe bix le maʼalob plataoʼ, máansajaʼan siete u téenel tiʼ chujkab utiaʼal ka lukʼsaʼak le u xaʼakʼaniloʼ» (Salmo 12:6, LSM). Le baʼaloʼob maʼalobtak kʼaʼabéet utiaʼal ka pʼáatak muʼukʼaʼan u fe máakeʼ tiaʼanoʼob teʼ Bibliaoʼ (Salmo 19:7-11; Proverbios 2:1-6). Le libro ¿Baʼax ku kaʼansik le Bibliaoʼ? ku yáantikoʼon utiaʼal u meyajtoʼon maʼalob le Bibliaoʼ.
10. ¿Bix jeʼel u páajtal a weʼesik tiʼ le j-xoknáal baʼax ku kaʼansik le tekstoʼoboʼ?
10 Ken xooknakeʼexeʼ, jach eʼes tiʼ le j-xoknáal baʼax ku kaʼansik le tekstoʼob yaan tiʼ cada upʼéel u xookil le librooʼ. Beet kʼáatchiʼob tiʼ le j-xoknáal utiaʼal a wáantik u naʼat le tekstoʼob maas kʼaʼanantakoʼoboʼ bey xan utiaʼal u yilik bix jeʼel u tsʼáaik ichil u kuxtal le baʼax ku yaʼalikoʼoboʼ. Baʼaleʼ, maʼ a waʼalik tiʼ baʼax unaj u beetik, baʼaxeʼ beet jeʼex tu beetil Jesuseʼ. Le ka beetaʼab upʼéel kʼáatchiʼ tiʼ Jesús tumen utúul máak jach u kʼaj óol le Ley tsʼaʼab tiʼ Moisesoʼ, letiʼeʼ tu núukaj: «¿Baʼax tsʼíibaʼan tiʼ le [leyoʼ]? ¿Bix a xokik?». Le máakoʼ tu núukaj upʼéel baʼal tsʼíibtaʼan teʼ kiliʼich tsʼíiboʼoboʼ, Jesús túuneʼ, yéetel upʼéel kettʼaaneʼ, tu yáantaj u yil bix unaj u tsʼáaik tu kuxtal le baʼax tu yaʼaloʼ (Lucas 10:25-37). Bey xan le libro ¿Baʼax ku kaʼansik le Bibliaoʼ?, ku taasik yaʼab kettʼaanoʼob maʼ talam u naʼataʼaloʼobiʼ; le kettʼaanoʼobaʼ jeʼel u meyajtech utiaʼal a wáantik le j-xoknáal u yil bix jeʼel u tsʼáaik ichil u kuxtal le baʼax ku yaʼalik le Bibliaoʼ.
11. ¿Jaypʼéel xóotʼoloʼob unaj u xokik máak yéetel le j-xoknáaloʼ?
11 Jesús kaʼacheʼ, ku tsolik baʼaloʼob talamtak yéetel tʼaanoʼob séeb u naʼataʼaloʼob. Le libro ¿Baʼax ku kaʼansik le Bibliaoʼ? jach tʼáalkab u tsolik xan le baʼax ku yaʼalik u Tʼaan Diosoʼ (Mateo 7:28, 29). Beet xan beyoʼ. Ken kaʼansajnakecheʼ tsol upʼéel bix séeb jeʼel u naʼataʼal le baʼax ka kaʼanskoʼ. Maʼ chéen unaj a wilik ka yaʼabchajak le xóotʼoloʼob ken a xokeʼexoʼ, baʼaxeʼ, utiaʼal a wilik bukaʼaj ken a xokeʼexeʼ ilawil tak bukaʼaj jeʼel u naʼatik le j-xoknáaloʼ yéetel bukaʼaj súutukil yaan tiʼ utiaʼal u xook. Jesús kaʼacheʼ u yojel tak bukaʼaj jeʼel u páajtal u naʼatik u disipuloʼobeʼ, le oʼolal chéen tu yaʼalajtiʼob le baʼax kʼaʼabéettiʼob teʼ súutukil jeʼeloʼ (Juan 16:12).
12. ¿Bix unaj u meyajtoʼon le tipʼaʼaniloʼ?
12 Le libro ¿Baʼax ku kaʼansik le Bibliaoʼ? ku taasik upʼéel u tipʼaʼanil tuʼux ku maas tʼaan tiʼ catorce baʼaloʼob jach kʼaʼanan u yojéeltaʼaloʼob. Letiʼ máak unaj u yilik bix kun meyaj le tipʼaʼanil utiaʼal ka u kaʼans le j-xoknáaloʼ. Maʼ xaaneʼ, yoʼolal baʼax ku creertik kaʼacheʼ, jeʼel u talamtal u naʼatik upʼéel kaʼansajeʼ wa jeʼel u yantal kʼáatchiʼob tiʼeʼ. Wa beyoʼ, jeʼel u páajtal a weʼesik tuʼux ku tsoʼolol ichil le tipʼaʼanil le baʼax maʼ tu naʼatikoʼ utiaʼal u xokik tu juunal. Baʼaleʼ, maʼ xaaneʼ, yaan tuʼux kun kʼaʼabéettal a múul xokik tu yéetel. Teʼ tipʼaʼaniloʼ ku tsoʼolol baʼaloʼob jeʼex: «“Alma” yéetel “pixan” wa “espíritu”: ¿jach baʼax u kʼáat u yaʼal le tʼaanoʼobaʼ?» yéetel «¿Baʼax le Nojoch Babiloniaoʼ?». Maʼ xaaneʼ yaan a wilik maʼalob ka a xok yéetel le j-xoknáal le jaatsoʼob tsʼoʼok k-aʼalikaʼ.Teʼ tipʼaʼaniloʼ maʼ tu chíikpajal u kʼáatchiʼiloʼob le xóotʼoloʼoboʼ, le oʼolaleʼ unaj a wojéeltik jach tiʼ baʼax ku tʼaanoʼob, utiaʼal a beetik maʼalob kʼáatchiʼob tiʼe j-xoknáaloʼ.
13. Le oracionoʼoboʼ, ¿bix jeʼel u maas muʼukʼankúuntik u fe le j-xoknáaloʼ?
13 Le Salmo 127:1 ku yaʼalik: «Wa le Yuumtsil maʼ tu beetik [le najoʼ] mix baʼal u biilal ka meyajnak le máaxoʼob beetikoʼ». Le oʼolaleʼ, ken a líiʼsaba utiaʼal a tsʼáaik xookoʼ kʼáat tiʼ Jéeoba ka u yáantech. Tsʼoʼoleʼ, ken a tsʼáa xookeʼ, le oracionoʼob ken a beet tu káajbal yéetel tu tsʼoʼokbaloʼ unaj u yeʼeskoʼob bukaʼaj a yaabilmaj Jéeoba. Aʼal tiʼ le j-xoknáal ka orarnak utiaʼal u kʼáatik tiʼ Dios ka áantaʼak u naʼat le Bibliaoʼ, bey xan utiaʼal u beetik le baʼax ku kankoʼ (Santiago 1:5). Wa ku beetik le baʼax ken a waʼal tiʼaʼ, yaan u kʼamik u muukʼil utiaʼal u aktáantik le talamiloʼoboʼ yéetel yaan xan u maas muʼukʼantal u fe.
Bix jeʼel k-áantik le j-xoknáal utiaʼal ka u kaʼans uláakʼ máakoʼob
14. ¿Baʼax kʼaʼabéet xan u beetik le j-xoknáaloʼ?
14 Utiaʼal ka u beet le j-xoknáal «tuláakal baʼax» tu túuxtaj Jesús tiʼ u disipuloʼoboʼ, kʼaʼabéet xan u kaʼansik tiʼ uláakʼ máakoʼob le baʼax ku yaʼalik le Bibliaoʼ (Mateo 28:19, 20; Beetaʼanoʼob [Hechos] 1:6-8). ¿Bix jeʼel a wáantik utúul j-xoknáal utiaʼal ka u beet beyoʼ?
15. ¿Baʼaxten kʼaʼabéet a invitartik le j-xoknáal ka xiʼik teʼ muchʼtáambaloʼoboʼ?
15 Desde ken káajak a xook yéetel wa máaxeʼ, invitart ka xiʼik ta wéetel teʼ muchʼtáambaloʼoboʼ. Tsol tiʼeʼ tiʼ ta kanaj bix unaj u kaʼansaʼal le baʼax ku yaʼalik le Bibliaoʼ. Ichil wa jaypʼéel semanaʼobeʼ, ken tsʼoʼokok a xookeʼexeʼ, jóoʼs u chan súutuk utiaʼal a tsolik tiʼ le j-xoknáal bix u beetaʼal le muchʼtáambaloʼob yéetel le noj muchʼtáambaloʼoboʼ. Yéetel kiʼimak óolaleʼ, tsikbalt baʼax utsiloʼob ka jóoʼsik tiʼ le muchʼtáambaloʼoboʼ (Hebreob 10:24, 25). Wa le j-xoknáal ku suuktal u bin teʼ muchʼtáambaloʼoboʼ jach jeʼel u kanik u kaʼans tubeel le baʼax ku yaʼalik le Bibliaoʼ.
16, 17. Utúul j-xoknáaleʼ, ¿bey baʼaxoʼob jeʼel u páajtal u chʼaʼatukultik u beetkeʼ?
16 Áant le j-xoknáal utiaʼal u chʼaʼatukultik baʼaloʼob jeʼel u páajtal u beetkeʼ. Jeʼel u páajtal a líiʼsik u yóol utiaʼal ka u tsikbalt tiʼ utúul u amigo wa utúul u láakʼ le baʼax táan u kankoʼ. Jeʼel xan u páajtal a líiʼsik u yóol utiaʼal ka u chʼaʼatukult u láaj xokik le Bibliaoʼ. Wa ka wáantik utiaʼal u xokik le Biblia sáamsamaloʼ, letiʼeʼ tak ken tsʼoʼokok u yokjaʼeʼ yaan seguer u yilik u yutsil u beetik beyoʼ. Tu káajbal cada upʼéel u xookil le libro ¿Baʼax ku kaʼansik le Bibliaoʼ? ku taasik kʼáatchiʼob yaan u yiloʼob yéetel le baʼax kun xokbiloʼ, maʼalob ka a waʼal tiʼ le j-xoknáal ka u yil u kanik kex upʼéel teksto ku núukik upʼéel tiʼ le kʼáatchiʼoboʼ. Beyoʼ, le j-xoknáaloʼ yaan u kʼuchul u beetuba «juntúul j-meyaj kʼambeʼen, minaʼan baʼax oʼolal u chʼaʼik subtaleʼ, tumen ku tsolik maʼalob u tʼaaniloʼob le jaajoʼ» (2 Timoteo 2:15).
17 Kaʼans tiʼ le j-xoknáal bix unaj u tsolaʼal le tekstoʼoboʼ, maʼ chéen ka u kan baʼax ku yaʼalikoʼobiʼ. Beyoʼ yaan u kanik u núuk le kʼáatchiʼob kun beetbil tiʼoʼ. Jach maʼalob xan ka a ensayart tu yéetel bix jeʼel u núukik le kʼáatchiʼob ku beetaʼal tiʼ tumen utúul u láakʼ wa tumen utúul u yéet meyaj; utiaʼal lelaʼ techeʼ jeʼel u páajtal a beetikaba bey utúul u yéet meyajeʼ wa bey utúul u láakʼtsileʼ. Ken a beet lelaʼ, eʼes tiʼ le j-xoknáal bix jeʼel u tsolik «yéetel kabal óolal bey xan yéetel tsiikil» le baʼax ku kʼáataʼal tiʼoʼ (1 Pedro 3:15).
18. ¿Bix jeʼel u páajtal u yáantaʼal utúul j-xoknáal tsʼoʼok u beetik tuláakal le baʼax ku kʼáataʼal utiaʼal ka káajak u jóokʼol kʼaʼaytajoʼ?
18 Ken máanak kʼiineʼ, maʼ xaaneʼ le j-xoknáaloʼ jeʼel u beetik tuláakal le baʼax ku kʼáataʼal utiaʼal ka káajak u jóokʼol kʼaʼaytajoʼ. Jach eʼes tiʼeʼ, u jóokʼol máak teʼ kʼaʼaytajoʼ upʼéel jach jatsʼuts meyaj Dios tsʼáaik tiʼ máak (2 Corintoiloʼob 4:1, 7). Ken aʼalaʼak tumen le ancianoʼob jeʼel u páajtal u jóokʼol kʼaʼaytajeʼ, áant le j-xoknáal utiaʼal u yil bix jeʼel u káajsik upʼéel tsikbaleʼ yéetel jóokʼen kʼaʼaytaj tu yéetel. Ilawil a táakpajal mantatsʼ tu yéetel teʼ kʼaʼaytaj yéetel kaʼansajoʼ yéetel eʼes xan tiʼ bix jeʼel u líiʼskuba utiaʼal u suut u xíimbalt le máaxoʼob taak u kaambaloʼoboʼ. U jaajileʼ, ken u yil bix a meyajeʼ yaan u yilik xan u beetik jeʼex techoʼ (Lucas 6:40).
«Bíin a tokaba teech yéetel bíin a tok xan le máaxoʼob uʼuyikechoʼ»
19, 20. ¿Baʼax kʼaʼabéet k-ilik beetik, yéetel baʼaxten?
19 U jaajileʼ, maʼ chéen chʼaʼabil u yáantaʼal utúul máak utiaʼal «ka kʼuchuk u chúukaʼan kʼaj [óolt] le jaajoʼ» (1 Timoteo 2:4). Baʼaleʼ, jach nojoch kiʼimak óolal ku taasik u yáantaʼal utúul máak u beet baʼax ku kaʼansik le Bibliaoʼ (1 Tesalonicailoʼob 2:19, 20). ¡Bukaʼaj kiʼimak óolal yantoʼon ikil k-beetikba «éet meyajoʼon» tiʼ Jajal Dios teʼ kaʼansaj ku beetaʼal tuláakal yóokʼol kaaboʼ! (1 Corintoiloʼob 3:9.)
20 Maʼ kun xáantaleʼ, yéetel le páajtalil tsʼaʼan tiʼ tumen Jéeobaoʼ, Jesucristo yéetel u angeloʼobeʼ yaan u xuʼulskoʼob tiʼ «le máaxoʼob maʼ tu kʼaj óoltikoʼob Jajal Diosoʼ mix tu yuʼubikoʼob u maʼalob péektsil k-Yuumtsil Jesucristo» (2 Tesalonicailoʼob 1:6-8). Lelaʼ u kʼáat u yaʼaleʼ yaʼab máakoʼob maʼ ken u salvartubaʼob. Le oʼolaleʼ, jach maʼalob ka a wil a tsʼáaik xook kex tak chéen tiʼ utúul wa máax yéetel le libro ¿Baʼax jach tu jaajil ku kaʼansik le Bibliaoʼ? Maʼ u tuʼubultecheʼ a kaʼansik uláakʼ máakoʼobeʼ ku tsʼáaik tuʼux a tokkaba wa a salvarkaba teech bey xan le máaxoʼob uʼuyikechoʼ (1 Timoteo 4:16). Maʼ u tuʼubultoʼoneʼ, teʼ kʼiinoʼobaʼ maas jach kʼaʼabéet k-áantik uláakʼ máakoʼob u beetoʼob le baʼax ku kaʼansik le Bibliaoʼ.
[Tsolajiloʼob]
^ xóot’ol 1 Beetaʼan tumen u j-jaajkunajoʼob Jéeoba.
¿Baʼax tsʼoʼok a kanik?
• Aʼal baʼax oʼolal beetaʼab le libro ¿Baʼax jach tu jaajil ku kaʼansik le Bibliaoʼ?
• ¿Bix jeʼel u páajtal u meyajtech le libro ¿Baʼax ku kaʼansik le Bibliaoʼ? utiaʼal a káajsik a xook yéetel le máakoʼoboʼ?
• ¿Baʼax kʼaʼabéet a beetik utiaʼal ka kaʼansajnakech tubeel?
• ¿Bix jeʼel a wáantik utúul j-xoknáal utiaʼal u kaʼansik tiʼ uláakʼ máakoʼob le baʼax ku yaʼalik le Bibliaoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 12]
¿Táan wa u meyajtech maʼalob le librooʼ?
[U tsolajil le oochel teʼ táan juʼun 13]
A xook kex chéen u chan súutuk yéetel wa máaxeʼ jeʼel u beetik u taaktal u maas kaambaleʼ
[U tsolajil le oochel teʼ táan juʼun 15]
¿Bix jeʼel u páajtal a weʼesik tiʼ le j-xoknáal baʼax ku kaʼansik le tekstoʼoboʼ?
[U tsolajil le oochel teʼ táan juʼun 16]
Áant le j-xoknáal utiaʼal u kanik kʼaʼaytajoʼ
[U tsolajil le oochel teʼ táan juʼun 12]
¿BAʼAX jach tu jaajil KU KAʼANSIK LE BIBLIAOʼ?