Koʼoneʼex kaʼansik le baʼax jach tu jaajil ku kaʼansik le Bibliaoʼ
Koʼoneʼex kaʼansik le baʼax jach tu jaajil ku kaʼansik le Bibliaoʼ
«Xeeneʼex túun tiʼ u kajnáaliloʼob tuláakal kaajoʼobeʼ ka a beeteʼexoʼob j-kaambaloʼob; [...] yéetel kaʼanseʼexoʼob.» (MATEO 28:19, 20.)
1. ¿Baʼax jeʼel u páajtal u yaʼalaʼal yoʼolal le Bibliaoʼ?
UPʼÉEL tiʼ le libroʼob maas úuchbenoʼob yéetel maas kʼaj óolaʼanoʼob teʼ yóokʼol kaabaʼ letiʼe Kiliʼich Biblia, u Tʼaan Jajal Diosoʼ. Tu chúukaʼanil wa chéen u jaatseʼ, le Bibliaoʼ tsʼoʼok u jóoʼsaʼal ichil maas tiʼ dos mil trescientos tʼaanoʼob. Le beetikeʼ óoliʼ tuláakal máak jeʼel u páajtal u xokik le Biblia ichil u tʼaanoʼ.
2, 3. 1) ¿Baʼaxten yaʼab máakoʼob maʼ u yojloʼob baʼax jach tu jaajil ku kaʼansik le Bibliaoʼ? 2) ¿Baʼax kʼáatchiʼob ken k-il u núukiloʼob?
2 U millonesi máakoʼob xokik le Biblia sáamsamaloʼ, yéetel yaʼab tiʼ letiʼobeʼ tsʼoʼok tak u xokkoʼob yaʼab utéenel tu káajbal tak tu tsʼoʼokbal. U milesi religionoʼobeʼ ku yaʼalkoʼobeʼ teʼ Biblia u taal le baʼax ku kaʼanskoʼoboʼ, baʼaleʼ cada religioneʼ yaanal baʼax ku yaʼalik ku kaʼansik le Bibliaoʼ. Yaʼab tak utéeneleʼ, ichil le máaxoʼob yanoʼob ichil upʼéel religioneʼ, maʼ upʼéeliliʼ bix u naʼatkoʼob le Bibliaoʼ. Yaan máaxoʼobeʼ maʼ tu jach creerkoʼob baʼax ku kaʼansik le Bibliaoʼ, maʼ u jach yojloʼob tiʼ máax u taaliʼ yéetel mix u yojloʼob wa jach kʼaʼanan baʼax ku kaʼansikiʼ. Utiaʼal xan yaʼab máakeʼ, le Bibliaoʼ chéen upʼéel kiliʼich libro ku meyaj utiaʼal u beetaʼal upʼéel voto, wa utiaʼal u tsʼáaik u kʼab máak tu yóokʼol utiaʼal u yaʼalik u jaajil.
3 Baʼaleʼ, le Bibliaoʼ jach yaan u páajtalil yéetel ku yaʼaliktoʼon le baʼax u kʼáat Dios ka k-beetoʼ (Hebreob 4:12). Le oʼolaleʼ, toʼon u j-jaajkunajoʼon Jéeobaeʼ k-kʼáat ka kaambalnak le máakoʼob tiʼ le baʼax kaʼansik le Bibliaoʼ. Ku taasiktoʼon kiʼimak óolal k-beetik le baʼax tu kʼubentaj Jesús tiʼ u disipuloʼobaʼ: «Xeeneʼex túun tiʼ u kajnáaliloʼob tuláakal kaajoʼobeʼ ka a beeteʼexoʼob j-kaambaloʼob; [...] yéetel kaʼanseʼexoʼob» (Mateo 28:19, 20). Ken jóoʼkoʼon kʼaʼaytajeʼ k-tsikbal yéetel yaʼab máakoʼob chiʼichnakoʼob yoʼolal le jejeláas baʼaloʼob ku kaʼansaʼal teʼ religionoʼoboʼ. Le máakoʼobaʼ taak u yojéeltikoʼob máax jach tu jaajil Dios yéetel baʼax jach tu jaajil ku kaʼansik le Biblia yoʼolal baʼax oʼolal kuxaʼanoʼonoʼ. Le oʼolaleʼ, koʼox ilik óoxpʼéel kʼáatchiʼob ku beetaʼal tumen yaʼab máakoʼob. Ken k-il cada kʼáatchiʼeʼ, yáaxeʼ yaan k-tʼaan tiʼ baʼaxoʼob maʼ jaajtak ku kaʼansaʼal teʼ religionoʼoboʼ, ku tsʼoʼoleʼ k-ilik baʼax jach tu jaajil ku kaʼansik le Bibliaoʼ. Lelaʼ letiʼe kʼáatchiʼobaʼ: 1) ¿U yaabiltmoʼon wa Dios? 2) ¿Baʼax oʼolal kuxaʼanoʼon? 3) ¿Baʼax ku yúuchul tiʼ máak ken kíimik?
¿U yaabiltmoʼon wa Dios?
4, 5. ¿Baʼaxten yaʼab máax tuklik maʼ u yaabiltmoʼon Diosiʼ?
4 Le yáax kʼáatchiʼoʼ ku yaʼalik: ¿U yaabiltmoʼon wa Dios? Yaʼab máakeʼ ku tuklikeʼ maʼatech. ¿Baʼaxten bey u tuukuloʼobaʼ? Yáaxeʼ tumen baʼax ku sen ilkoʼob teʼ yóokʼol kaabaʼ chéen pʼektajil, baʼatelil yéetel muʼyajil. Le beetikeʼ, maʼ xaaneʼ, ku tuklikoʼob: «Wa u yaabiltmoʼon Dioseʼ bejlaʼa maʼ tu chaʼik u yantal le muʼyajiloʼobaʼ».
5 Uláakʼ baʼax oʼolal yaʼab máax tuklik maʼ u yaabiltmoʼon Dioseʼ, tumen le máaxoʼob ku nuʼuktajoʼob ichil le religionoʼoboʼ tsʼoʼok u beetkoʼob u tuklaʼaleʼ Dioseʼ chéen táan u yilik baʼax ku yúuchultoʼon. ¿Baʼax suuk u yaʼalikoʼob ken úuchuk upʼéel nojoch loob? Utúul koʼoleleʼ, ka kíim kaʼatúul u mejen paalal tiʼ upʼéel accidenteiʼ, le máax ku nuʼuktaj ichil u religionoʼ tu yaʼalaj tiʼ: «Bey u kʼáat Dios ka úuchkoʼ. Tiʼ letiʼeʼ kʼaʼabéet kaʼach uláakʼ kaʼatúul mejen angeloʼob tiʼ». U jaajileʼ, ikil u yaʼalkoʼob baʼaloʼob beyaʼ, le máaxoʼob ku nuʼuktajoʼob ichil le religionoʼoboʼ, ku tsʼáaikoʼob naʼatbileʼ Dios beetik u yúuchul le loobiloʼoboʼ. Baʼaleʼ, le disipulo Santiagooʼ tu tsʼíibtaj: «Le ken túuntaʼak u yóol máak utiaʼal u beetik wa baʼax kʼaaseʼ, maʼ unaj u tukultik wa Jajal Dios máax túuntik u yóoliʼ; tumen Jajal Dioseʼ maʼ tu túuntaʼal u yóol tumen le kʼaasoʼ, mix letiʼ ku túuntik u yóol mix máakiʼ» (Santiago 1:13). Jeʼex k-ilkoʼ, Jéeobaeʼ mix utéen ku beetik u yúuchul baʼal kʼaas. Le Bibliaoʼ ku yaʼalik: «¡Mix a chéen tukultikeʼex wa jeʼel u beetik [Dios] [...] jumpʼéel baʼal kʼaas[eʼ!]» (Job 34:10).
6. ¿Máax beetik u yantal muʼyajil way yóokʼol kaabeʼ?
6 ¿Baʼaxten túun jach yaan muʼyajil? Yáaxeʼ, tumen wíinikeʼ tsʼoʼok u yilik u nuʼuktikuba chéen tu juunal yéetel maʼ u kʼáat u beet baʼax ku yaʼalik u yutsul leyoʼob Diosiʼ. Yoʼolal lelaʼ, wíinikeʼ, kex maʼ u yóoliliʼeʼ, tsʼoʼok u tsʼáaikuba yáanal u páajtalil Satanás, u nojoch enemigo Dios. Le Bibliaoʼ ku yaʼalik: «U túulisil yóokʼol kaabeʼ tiʼ yaan yáanal u páajtalil kʼaasibaʼaleʼ» (1 Juan 5:19). Le tekstoaʼ ku yeʼeskeʼ le yóokʼol kaabaʼ tiaʼan yáanal u kʼab u Kʼaasilbaʼaleʼ. K-ojeleʼ Satanaseʼ jach kʼaas u tuukul, chéen tuus ku beetik yéetel jach kʼasaʼan. Le oʼolaleʼ, le sen baʼaloʼob ku yilaʼal teʼ yóokʼol kaabaʼ chéen táan u yeʼeskoʼob bix Satanás, le máax ku gobernar tu yóokʼoloʼ. Lelaʼ ku yáantkoʼon k-naʼat baʼaxten jach yaan muʼyajil.
7. ¿Máakalmáak le uláakʼ kaʼapʼéel baʼax oʼolal yaan muʼyajiloʼ?
7 Uláakʼ baʼax beetik u yantal muʼyajileʼ letiʼe kʼeban yaan t-wíinkliloʼ. Yoʼolal lelaʼ, wíinikeʼ u kʼáat mandar tu yóokʼol u maasil yéetel ku baʼateltik u beetik; lelaʼ tsʼoʼok u beetik u sen yantal baʼatelil yéetel muʼyajil. Jeʼex u yaʼalik le Biblia tu libroi Eclesiastés 8:9, wíinikeʼ ku gobernarkuba chéen «utiaʼal u beet loob tiʼ u yéet» wíinikil. U yóoxpʼéel baʼax oʼolal yaan muʼyajileʼ tumen «u súutuk u jáan úuchul wa baʼax» (Eclesiastés 9:11, NM). Wa tiaʼan máak tuʼux ku jáan úuchul upʼéel loobeʼ, maʼ xaaneʼ jeʼel u yúuchul xan loob tiʼ máakeʼ.
8, 9. ¿Baʼaxten jach k-ojel Dioseʼ maʼ chéen ku yilik baʼax táan u yúuchultoʼoniʼ?
8 Ku taasiktoʼon kiʼimak óolal k-ojéeltik maʼ Dios beetik u yantal muʼyajiliʼ. Baʼaleʼ ¿táan wa u yilik Dios le baʼaxoʼob ku yúuchultoʼonoʼ? ¡Táan! Baʼaxten k-aʼalik beyoʼ, tumen le Bibliaoʼ ku yaʼalik baʼax oʼolal u chaʼamaj Dios tiʼ wíinik ka u bis upʼéel bej maʼ maʼalobiʼ. Yáaxeʼ ku yaʼalikeʼ yaan yil yéetel le derecho yaan tiʼ Dios utiaʼal u gobernar yóokʼol tuláakal baʼax u beetmajoʼ, u kaʼapʼéeleʼ yaan yil yéetel wa jeʼel u chúukpajal u yóol wíinik tiʼ Dioseʼ. Tumen Jéeoba beetmai tuláakal baʼal yéetel minaʼan u xuul u páajtalileʼ maʼ tsaaj u yaʼaliktoʼon baʼaxten ku chaʼik u yantal muʼyajiliʼ. Kex beyoʼ, tumen u yaabiltmoʼoneʼ letiʼeʼ ku yaʼaliktoʼon baʼaxten.
9 Koʼox ilik uláakʼ baʼax eʼesik Dioseʼ maʼ chéen táan u yilik baʼax ku yúuchultoʼoniʼ. Tu kʼiiniloʼob Noeiʼ, Dioseʼ «j-yaajchaj [u] yóol» tumen tu yilaj chuup le Luʼum yéetel kʼaasoʼ (Génesis 6:5, 6). Kux túun bejlaʼeʼ, ¿láayliʼ wa ku yaatal tu yóoleʼ? Láayliʼeʼ, tumen Jéeobaeʼ maʼatech u kʼexpajal (Malaquías 3:6). Letiʼeʼ láayliʼ u pʼekmaj tuláakal le baʼaxoʼob kʼaastak ku beetaʼaloʼ yéetel ku chʼaʼik xan óotsilil tiʼ le máaxoʼob ku muʼyajoʼoboʼ. Le Bibliaoʼ ku kaʼansik xaneʼ, maʼ kun xáantaleʼ Dioseʼ yaan u yutskíintik tuláakal le kʼaas tsʼoʼok u taasik u gobernación wíinik yaan yáanal u kʼab Satanasoʼ. Lelaʼ, ¿maʼ wa tu yeʼesikeʼ Dioseʼ jach u yaabiltmoʼon?
10. ¿Bix u yuʼubkuba Dios ken u yil u muʼyaj wíinik?
10 Jeʼex túun tsʼoʼok k-ilkoʼ, le máaxoʼob ku nuʼuktajoʼob ichil le religionoʼoboʼ maʼatech u kaʼanskoʼob u jaajil ken u yaʼaloʼob Dios beetik u yúuchul le yaayaj baʼaloʼob k-muʼyajtik yaan kʼiinoʼ. U jaajileʼ Jéeobaeʼ jach u kʼáat u luʼs tuláakal baʼax beetik u muʼyaj wíinik. 1 Pedro 5:7 ku yaʼalikeʼ «letiʼeʼ u tsʼaamaj u yóol u kanáant[oʼon]». Lelaʼ letiʼe baʼax jach tu jaajil ku kaʼansik le Bibliaoʼ.
¿Baʼax oʼolal kuxaʼanoʼon?
11. ¿Baʼax ku kaʼansaʼal teʼ religionoʼob yoʼolal baʼax oʼolal kuxaʼanoʼon way Luʼumeʼ?
11 Koʼox ilik uláakʼ kʼáatchiʼ ku beetik yaʼabach máakoʼob: ¿baʼax oʼolal kuxaʼanoʼon? Le máaxoʼob ku nuʼuktajoʼob ichil le religionoʼoboʼ ku yaʼalikoʼobeʼ wíinikeʼ chéen jáan máan ku beetik way Luʼumeʼ. Ku yaʼalikoʼobeʼ le Luʼumaʼ chéen upʼéel tuʼux ku jáan jeʼelel wíinik utiaʼal u bin kuxtal yaanal tuʼux ken kíimik. Yaan tak tiʼ letiʼobeʼ ku kaʼanskoʼobeʼ Dioseʼ yaan u kʼuchul u kʼiinil u xuʼulsik le Luʼumaʼ. Yoʼolal le baʼax ku kaʼanskoʼobaʼ, yaʼabach máakoʼob tsʼoʼok u kʼuchul u tukloʼobeʼ u maas maʼalobileʼ ka u yil u kiʼimakkúuntik u yóoloʼob le bukaʼaj ku páajtaleʼ, tumen mix baʼal uláakʼ ku páaʼtikoʼob, chéen kíimil. Baʼaleʼ ¿baʼax jach tu jaajil ku kaʼansik le Biblia yoʼolal baʼax oʼolal kuxaʼanoʼonoʼ?
12-14. ¿Baʼax ku kaʼansik le Biblia yoʼolal baʼaxten beetaʼab le Luʼum yéetel wíinikoʼob tumen Diosoʼ?
12 Le Bibliaoʼ ku kaʼansikeʼ Dioseʼ yaan baʼax oʼolal tu beetaj le Luʼumaʼ bey xan wíinikoʼob. Letiʼeʼ «maʼ chéen tu beetaj» le Luʼumaʼ, baʼaleʼ tu beetaj «utiaʼal ka yanak u kajnáaliloʼob» (Isaías 45:18). Tsʼoʼoleʼ, Jéeobaeʼ tu tsʼáaj le Luʼum «yóokʼol u chuumpakʼiloʼob utiaʼal mix bikʼin ka péeknak tu kúuchil[oʼ]» (Salmo 104:5). K-ojéeltik baʼax oʼolal beetaʼab le Luʼum yéetel wíinikoʼob tumen Diosoʼ, ku yáantkoʼon k-naʼat baʼax oʼolal kuxaʼanoʼon.
13 U yáax kaʼapʼéel capituloʼob Génesiseʼ ku yeʼeskoʼobeʼ jach maʼalob úuchik u beetaʼal le Luʼum tumen Jéeoba utiaʼal ka kajlak le wíinikoʼoboʼ. Le Bibliaoʼ ku yaʼalikeʼ le ka tsʼoʼok u beetik Dios le Luʼumoʼ «tu yilaj tuláakal baʼax tu beetajoʼ sen maʼalob» (Génesis 1:31). Dioseʼ tu tsʼáaj le yáax xiib yéetel le yáax koʼolel tu jatsʼuts jardinil Edenoʼ, yéetel tu tsʼáaj xan tuláakal baʼax kʼaʼabéettiʼob utiaʼal u jaantoʼobiʼ. Tsʼoʼoleʼ, tu yaʼalaj xan tiʼob: «Ka yaʼabchajak a paalaleʼex; chupeʼex le yóokʼol kaaboʼ, méekʼtáanteʼex xan». Ken yanak kaʼach u paalal Adán yéetel Evaeʼ minaʼan kʼeban tu wíinkliloʼob, yaan kaʼach u sutkoʼob tuláakal le Luʼum upʼéel paraísooʼ yéetel yaan xan u kanáantkoʼob tuláakal le baʼalcheʼoboʼ (Génesis 1:26-28).
14 U tuukul Dioseʼ ka kuxlak wíinikoʼob way Luʼum, tuʼux maʼ kun kʼojaʼantaloʼob, maʼ kun chʼíijloʼob mix kun kíimloʼob. Jéeobaeʼ ku yaʼalik teʼ Bibliaoʼ: «Le utsil máakoʼoboʼ bíin u tiaʼalintoʼob le luʼumaʼ; tiʼ bíin kajlakoʼob utiaʼal jaʼaboʼob minaʼan u xuul[iʼ]» (Salmo 37:29). Jach beyoʼ: wíinikoʼobeʼ beetaʼaboʼob utiaʼal ka kuxlakoʼob minaʼan u xuul tiʼ upʼéel paraíso way Luʼumeʼ. Lelaʼ letiʼe baʼax u chʼaʼatukulmaj Diosoʼ, yéetel letiʼe baʼax jach tu jaajil ku kaʼansik le Bibliaoʼ.
¿Baʼax ku yúuchul tiʼ máak ken kíimik?
15. ¿Baʼax ku kaʼansik óoliʼ tuláakal le religionoʼob yoʼolal baʼax ku yúuchul tiʼ máak ken kíimik?
15 Beoraaʼ koʼox tʼaan tiʼ le u yóoxpʼéel kʼáatchiʼ ku beetik yaʼabach máakoʼoboʼ: ¿baʼax ku yúuchul tiʼ máak ken kíimik? Óoliʼ tuláakal le religionoʼoboʼ ku kaʼanskoʼobeʼ yaan baʼax ku pʼáatal kuxaʼanil tiʼ máak ken kíimik u wíinklil. Yaan xan religionoʼob ku kaʼanskoʼobeʼ Dioseʼ ku beetik u muʼyaj le kʼasaʼan máakoʼob tiʼ upʼéel infierno tuʼux ku tóokaʼaloʼob utiaʼal mantatsʼoʼ. Baʼaleʼ ¿jach wa jaaj le baʼaxoʼob ku kaʼansaʼalaʼ? ¿Baʼax jach tu jaajil ku kaʼansik le Biblia yoʼolal le kíimiloʼ?
16, 17. Le Bibliaoʼ, ¿bix u yaʼalik yanik le kimenoʼoboʼ?
16 Le Bibliaoʼ ku yaʼalik: «Máaxoʼob kuxaʼanoʼobeʼ u yojeloʼob bíin kíimikoʼob, baʼaleʼ kimenoʼobeʼ maʼ u yojeloʼob mix baʼaliʼ maʼ xan tu náajaltikoʼob mix baʼal». Le tekstoaʼ ken u yaʼal «maʼ u yojeloʼob mix baʼaliʼ», u kʼáat u yaʼaleʼ maʼ tu páajtal u chʼenxikinoʼob, mix u paakatoʼob, mix u tʼaanoʼob, mix u muʼyajoʼob, mix u tuukuloʼob. «Maʼ xan tu náajaltikoʼob mix baʼal», tumen maʼ tu páajtal u beetkoʼob mix upʼéel meyaj. Tsʼoʼoleʼ, «ku xuʼulul» xan u yaabilajoʼob, u pʼektajoʼob yéetel «u tsʼíibolaloʼob»; lelaʼ u kʼáat u yaʼaleʼ mix baʼal xan ku yuʼubikoʼob (Eclesiastés 9:5, 6, 10).
17 Jach tʼáalkab baʼax ku yaʼalik le Bibliaoʼ: ken kíimik máakeʼ jach xuʼulul ku beetik u kuxtal. Mix baʼal ku pʼáatal kuxaʼanil tiʼ le wíinklil ken kíimik máakoʼ, mix baʼal tiʼ toʼon jeʼel u páajtal u kaʼa síijil tiʼ yaanal wíinklil jeʼex u tuklik le máaxoʼob ku creerkoʼob ku kaʼa síijil máakoʼ. K-kuxtaleʼ jeʼel u páajtal u keʼetel yéetel u kʼáakʼil upʼéel kibeʼ. Ken tuʼupkeʼ maʼ tu bin mix tuʼux, xuʼulul ku beetik.
18. Ken u kan utúul j-xoknáal bix yanik le kimenoʼoboʼ, ¿baʼaxoʼob ku kʼuchul u naʼate?
18 Le baʼax ku yaʼalik le Biblia yoʼolal bix yanik le kimenoʼoboʼ maʼ talam u naʼataʼaliʼ, tsʼoʼoleʼ jach jeʼel u yáantik máakeʼ. Utúul j-xoknáaleʼ, ken u kan bix yanik le kimenoʼoboʼ, ku kʼuchul u naʼateʼ, kex jach pʼektaʼan kaʼach tumen wa máax tsʼoʼok u kíimleʼ, tsʼoʼok maʼ tu páajtal u beetaʼal mix baʼal tiʼ. Yaan xan u naʼatkeʼ u láakʼtsiloʼob yéetel u amigoʼob tsʼoʼok kíimloʼobeʼ maʼ tu páajtal u yuʼubkoʼob u tʼaan máak, maʼ tu páajtal u paakatoʼob, u tʼaanoʼob, u tuukuloʼob mix u yuʼubkoʼob mix baʼal. Le beetik u yojel maʼ xan táan u muʼyajoʼob tiʼ upʼéel purgatorioiʼ mix xan tiʼ upʼéel infierno tuʼux ku tóokaʼaloʼobiʼ. Baʼaleʼ, kex kimenoʼobeʼ, le Bibliaoʼ ku kaʼansikeʼ le máaxoʼob yanoʼob tu tuukul Dioseʼ yaan u kaʼa kuxkíintaʼaloʼob. ¿Máasaʼ jach táaj jatsʼuts le baʼax ku yaʼalik le Bibliaaʼ? (Juan 5:28, 29.)
Upʼéel túumben libro utiaʼal ka meyajnaktoʼon
19, 20. Toʼon k-meyajtik Jéeobaeʼ, ¿baʼax kʼaʼabéet beetik, yéetel baʼax libroi tsʼoʼok u jóoʼsaʼal utiaʼal k-kaʼansik le máakoʼoboʼ?
19 Tsʼoʼok k-ilik óoxpʼéel tiʼ le kʼáatchiʼob ku beetik yaʼabach máakoʼoboʼ. Tu yóoxpʼelaleʼ t-ilaj jach tʼáalkab yanik yéetel jach séeb u naʼataʼal le baʼax ku kaʼansik le Bibliaoʼ. ¿Máasaʼ jach ku taasiktoʼon kiʼimak óolal k-kaʼansik le máaxoʼob taak u yojéelkoʼob baʼax núukil ku tsʼáaik le Biblia tiʼ le kʼáatchiʼobaʼ? Baʼaleʼ yaʼab uláakʼ kʼáatchiʼob yaan tiʼ le máaxoʼob uts u puksiʼikʼaloʼoboʼ. Toʼon k-meyajtik Jéeobaeʼ kʼaʼabéet k-áantkoʼob u kaxtoʼob u núukil u kʼáatchiʼob.
20 Baʼaleʼ maʼ chéen chʼaʼabil u kaʼansaʼal le baʼax ku yaʼalik le Biblia upʼéel bix séeb jeʼel u naʼataʼaleʼ. Le oʼolaleʼ, utiaʼal u yáantkoʼoneʼ, «le palitsil chúukpajaʼan u yóol yéetel yaan u naʼat[oʼ]» tsʼoʼok u jóoʼsik upʼéel libro utiaʼal ka meyajnaktoʼon ken kaʼansajnakoʼon (Mateo 24:45-47). Le libro 224 u táan juʼuniloʼobaʼ, ku kʼaabaʼtik: ¿Baʼax jach tu jaajil ku kaʼansik le Bibliaoʼ?
21, 22. Aʼal baʼax baʼaloʼob maʼalobtak ku taasik le libro ¿Baʼax jach tu jaajil ku kaʼansik le Bibliaoʼ?
21 Teʼ noj muchʼtáambaloʼob óoxpʼéel kʼiin «Kʼaʼabéet k-uʼuyik u tʼaan Dios», beetaʼab tu jaʼabil 2005 tumen u j-jaajkunajoʼob Jéeobaoʼ tiʼ eʼesaʼab le túumben libroaʼ. U yáax cinco táan juʼuniloʼob le túumben libroaʼ, jach táan u yáantik yaʼab sukuʼunoʼob utiaʼal u káajsik u xokikoʼob le Biblia yéetel le máakoʼoboʼ. Le dibujoʼob yéetel le tekstoʼob ku taasik le yáax cinco táan juʼuniloʼobaʼ jach jeʼel xan u yáantkechoʼob utiaʼal a káajsik upʼéel tsikbal yéetel u yuumil naj. Jeʼel xan u páajtal u meyajtech le cuadro yaan teʼ táan juʼunoʼobaʼ utiaʼal a tsolik tiʼ le máax ka tsʼáaik xook bix u kaxtaʼal le capituloʼob yéetel le versiculoʼob teʼ Bibliaoʼ.
22 Le bix beetaʼanil le libroaʼ jach jatsʼuts yéetel jach maʼ talam u naʼataʼaliʼ. Jach ilaʼab u beetaʼal utiaʼal ka kʼuchuk tu puksiʼikʼal le máax ku xookoʼ yéetel ka u yileʼ le baʼax ku xokkoʼ yaan baʼax u yil yéetel u kuxtal. Tu káajbal cada upʼéel u xookil le libroaʼ ku taasik kʼáatchiʼob yaan u yiloʼob yéetel le baʼax kun xokbiloʼ yéetel tu tsʼoʼokbal xan cada u xookileʼ yaan upʼéel cuadro ku kʼaabaʼtik «Le baʼax ku kaʼansik le Bibliaoʼ»; teʼ cuadroaʼ tiʼ ku chíikpajal u núukil le kʼáatchiʼob ku beetaʼal tu káajbal cada xookoʼ bey xan u tekstosil le Biblia tuʼux jóoʼsaʼan u núukiloʼ. Le dibujoʼob yéetel u chan tsolajiloʼob, bey xan le kettʼaanoʼob ku taasik le libroaʼ yaan u yáantik le j-xoknáal utiaʼal u naʼatik le túumben baʼaloʼob ku kankoʼ. Le bix beetaʼanik le libroaʼ maʼ talam u naʼataʼal baʼax ku yaʼalikiʼ, baʼaleʼ wa le máax ku kaambal kʼaʼabéet u maas tsoʼolol upʼéel kaʼansaj tiʼeʼ, le libroaʼ yaan upʼéel u tipʼaʼanil tuʼux ku maas tʼaan tiʼ catorce baʼaloʼob jach kʼaʼanan u yojéeltaʼaloʼob.
23. ¿Bix unaj u meyajtoʼon le libro ¿Baʼax ku kaʼansik le Bibliaoʼ? ken k-kaʼans le j-xoknáaloʼoboʼ?
23 Le libro ¿Baʼax ku kaʼansik le Bibliaoʼ? beetaʼab utiaʼal k-áantik tuláakal máak, kex kaʼanchajaʼan u xook wa maʼ, yéetel kex jeʼel máakalmáak u religioneʼ. Wa le j-xoknáal maʼ u yojel mix baʼal tiʼ le baʼax ku kaʼansik le Bibliaoʼ, maʼ xaaneʼ, yaan u kʼaʼabéettal k-xook maas tiʼ utéen tu yéetel utiaʼal k-tsʼoʼoksik upʼéel u xookil le librooʼ. Maʼ unaj k-ilik chéen k-jáan tsʼoʼoksik upʼéel u xookiliʼ, baʼaxeʼ unaj k-ilik ka kʼuchuk le kaʼansaj tu puksiʼikʼal le j-xoknáaloʼ. Wa le j-xoknáal maʼ tu naʼatik upʼéel kettʼaan ku taasik le librooʼ, tsol tiʼ wa kʼex yéetel uláakʼ. Líiʼsaba tubeel yéetel le librooʼ, ilawil u meyajtech maʼalob yéetel kʼáat tiʼ Dios ka u yáantech utiaʼal a «tsolik maʼalob u tʼaaniloʼob le jaajoʼ» (2 Timoteo 2:15).
Unaj k-tsʼáaik nib óolal yoʼolal le baʼaxoʼob tsʼaʼantoʼonoʼ
24, 25. ¿Baʼax maʼalob baʼaloʼob u tsʼaamaj Jéeoba tiʼ máaxoʼob meyajtik?
24 Jéeobaeʼ tsʼoʼok u tsʼáaiktoʼon maʼalob baʼaloʼob. Tsʼoʼok u chaʼik kʼaj óoltik u jaajil tu yoʼolal letiʼ; lelaʼ mix utéen kʼaʼabéet u tuʼubultoʼon bukaʼaj maʼalobil. Kʼaʼajaktoʼoneʼ, Jéeobaeʼ chéen tiʼ máaxoʼob kabal u yóoloʼob tsʼoʼok u tsʼáaik u yojéeltoʼob baʼaxoʼob u tukulmaj u beetik, baʼaleʼ u taʼakmaj tiʼ máaxoʼob noj baʼal u yuʼubkubaʼob. Yoʼolal lelaʼ, Jesuseʼ tu yaʼalaj: «Kin kiʼikiʼtʼantikech, in Yuum, u Yuumtsil kaʼan yéetel luʼum, tumen ta weʼesaj tiʼ le máaxoʼob kabal u yóoloʼoboʼ le baʼaxoʼob ta taʼakaj tiʼ le máaxoʼob j-ojéelajoʼoboʼ yéetel yaan u naʼatoʼoboʼ» (Mateo 11:25). Le oʼolaleʼ, jach ku taasiktoʼon nojoch kiʼimak óolal k-ojéeltikeʼ utiaʼal Dioseʼ tiaʼanoʼon ichil le máaxoʼob kabal u yóoloʼoboʼ.
25 Jéeobaeʼ u tsʼaamaj xan toʼon u jatsʼuts páajtalil k-kaʼansik tiʼ uláakʼ máakoʼob u jaajil yoʼolal letiʼoʼ. Kʼaʼajaktoʼoneʼ le máaxoʼob ku nuʼuktajoʼob ichil le religionoʼoboʼ tsʼoʼok u pʼatkoʼob kʼasil Dios ikil u kaʼanskoʼob baʼaloʼob maʼ jaajtak tu yoʼolaliʼ. Yoʼolal lelaʼ yaʼab máakoʼobeʼ tsʼoʼok u kʼuchul u tukloʼobeʼ Jéeobaeʼ chéen táan u yilik k-muʼyaj yéetel maʼatech u chʼaʼik óotsilil toʼon, baʼaloʼob jach upuliʼ maʼ jaajtakiʼ. Le beetkeʼ, ¿jach wa táan a tsʼíiboltik a weʼesik maʼ jaaj le baʼaxoʼob ku yaʼalaʼal tu yoʼolal Jéeobaoʼ? ¿A kʼáat wa ka kʼaj óoltaʼak u jaajil tu yoʼolal Jéeoba tumen tuláakal le máaxoʼob taak u kaambaloʼoboʼ? Wa beyoʼ, eʼes ka wuʼuyik u tʼaan Dios ikil a beetik tuláakal le ku páajtal utiaʼal a maas kʼaʼaytik yéetel a maas kaʼansik le baʼaloʼob jach maʼalobtak ku kaʼansik le Bibliaoʼ. Le máaxoʼob taak u kanikoʼob u jaajiloʼ kʼaʼabéet u yojéelkoʼob baʼax jach tu jaajil ku kaʼansik le Bibliaoʼ.
¿Baʼax jeʼel a núukikeʼ?
• ¿Baʼaxten k-aʼalik jach tu jaajil yaabiltaʼanoʼon tumen Dios?
• ¿Baʼax oʼolal kuxaʼanoʼon way Luʼumeʼ?
• ¿Baʼax ku yúuchul tiʼ máak ken kíimik?
• Aʼal baʼax maas utstawich tiʼ le libro ¿Baʼax jach tu jaajil ku kaʼansik le Bibliaoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 8]
Oocheloʼob: chan chʼúupal: © Bruno Morandi/age fotostock; koʼolel táan u yokʼol: AP Photo/Gemunu Amarasinghe; máakoʼob táan u púutsʼloʼob: © Sven Torfinn/Panos Pictures
[U tsolajil le oochel teʼ táan juʼun 8]
Le Bibliaoʼ ku kaʼansikeʼ Dioseʼ yaan u xuʼulsik le muʼyajiloʼ
[U tsolajil le oochel teʼ táan juʼun 9]
Le utsul máakoʼoboʼ yaan kuxtaloʼob minaʼan u xuul teʼ Paraísooʼ