Maʼ u xuʼulul k-eʼesik nojbaʼal k-ilik le baʼaxoʼob u tsʼaamajtoʼon Diosoʼ
Maʼ u xuʼulul k-eʼesik nojbaʼal k-ilik le baʼaxoʼob u tsʼaamajtoʼon Diosoʼ
«In tiaʼal teneʼ [maas] koʼoj u tojol u kaʼambesaj a chiʼ [ke] yaʼabkach taakʼin beetaʼan yéetel oro wa yéetel plata.» (SALMO 119:72.)
1, 2. ¿Baʼaxten unaj k-ilik nojoch u tojol le Bibliaoʼ? Le salmistaoʼ, ¿bix u yilik kaʼach le baʼax ku yaʼalik u Tʼaan Diosoʼ?
LE TÁAN kaʼach u yutskíintaʼal u templo Jéeoba yaan tu kaajil Jerusalenoʼ, Hilquías (Hilcías), u nojchil le sacerdoteʼoboʼ, tu kaxtaj upʼéel baʼal jach maʼalob, lelaʼ letiʼe «u juʼunil u yaʼalmaj tʼaan Yuumtsil, j-tsʼaʼab tumen Moisesoʼ». ¿Bix a tuklik tu yuʼubiluba le rey Josías le ka eʼesaʼab le juʼun tiʼoʼ? Tumen u yojel le juʼun kaxtaʼabaʼ ochocientos jaʼaboʼob tsʼíibtaʼak tumen Moiseseʼ, tu yaʼalaj tiʼ Safán u secretario ka u xok kʼaʼam le baʼax ku yaʼalikoʼ (2 Crónicas 34:14-18).
2 Bejlaʼeʼ, u millonesi máakoʼob ku páajtal u xokikoʼob tuláakal le Bibliaoʼ wa chéen u jaats tiʼ letiʼoʼ. ¿Ku luʼsik wa le nojoch tojol yaan tiʼ le Biblia, le u páajtal u yantal tiʼ yaʼab máakoʼob upʼéel u copiailoʼ? Maʼatech. Tumen teʼ Bibliaoʼ, tiʼ yaan u tuukuloʼob Diosiʼ yéetel jeʼel u beetik u bintoʼon maʼalobileʼ (2 Timoteo 3:16). Le salmistaoʼ tu yaʼalaj bix u yilik le baʼax ku yaʼalik u Tʼaan Diosoʼ: «In tiaʼal teneʼ [maas] koʼoj u tojol u kaʼambesaj a chiʼ [ke] yaʼabkach taakʼin beetaʼan yéetel oro wa yéetel plata» (Salmo 119:72).
3. ¿Baʼax eʼesik Davideʼ utúul máak jach chúukpaj u yóol u meyajt Dios?
3 Jeʼex u yeʼesik le salmoʼob tu tsʼíibtoʼ, Davideʼ maʼ jáaw u yaabiltik Jéeobaiʼ mix jáaw u yilik nojoch u tojol u Tʼaan Diosiʼ yéetel le jaajil adoracionoʼ. Teʼ Salmo 27:4 tu tsʼíibtaj: «Chéen jumpʼéel baʼal tsʼoʼok in kʼáatik tiʼ Yuumtsil, chéen jumpʼéel baʼal kin tsʼíiboltik: ka yanaken tu [templo] Yuumtsil tuláakal u kʼiinil in kuxtal, utiaʼal ka in [adorart] tu [templo] yéetel ka in pakt u kiʼichkelmil». Ich hebreoeʼ, le tʼaan «ka in pakt u kiʼichkelmil[oʼ]» u kʼáat u yaʼal u xáantal táan u chaʼantik máak upʼéel baʼal, u jach ilik bix anik wa u jach ilik máak yéetel kiʼimak óolal upʼéel baʼal. Jeʼex k-ilkoʼ, Davideʼ utúul máak jach chúukpaj u yóol u meyajt Dios, jach nojbaʼal u yilik le baʼaxoʼob ku tsʼaʼabal tiʼ tumen Jéeobaoʼ yéetel jach ku kiʼimaktal u yóol ken u kan cada upʼéel tiʼ le kaʼansajoʼob ku taal tiʼ Diosoʼ. Toʼoneʼ bey xan unaj k-beetkoʼ (Salmo 19:7-11).
Nojoch baʼal unaj k-ilik le baʼax tsʼoʼok k-kanik teʼ Bibliaoʼ
4. ¿Baʼax beet u «sen kiʼimak[tal] u yóol» Jesús?
4 Utiaʼal k-naʼatik tubeel le baʼax ku kaʼansik le Bibliaoʼ, maʼ unaj u yantaltoʼon le naʼatil ku tsʼáaik le yóokʼol kaab chéen ku beetik u kaʼantal u yich máakoʼ. Baʼaxeʼ unaj u yantaltoʼon le naʼat ku tsʼáaik Jéeoba tiʼ le máaxoʼob kabal u yóoloʼob, uts u puksiʼikʼaloʼob yéetel u yojloʼob kʼaʼabéet u kaambaloʼob tiʼ letiʼoʼ (Mateo 5:3; 1 Juan 5:20). Le ka tuukulnaj yoʼolal le kʼeban wíinikoʼob kun tsʼíibbil u kʼaabaʼob teʼ kaʼanoʼ, Jesuseʼ «sen kiʼimakchaj u yóol [...] tu yoʼolal Kiliʼich Pixaneʼ ka tu yaʼalaj: Kin kiʼikiʼ tʼantikech in Taata, u Yuumtsil kaʼan yéetel luʼum, tumen le baʼaloʼob ta weʼesaj tiʼ le mejen paalaloʼoboʼ ta taʼakaj tiʼ le j-kaambalnajoʼob yéetel kaʼanal u naʼatoʼoboʼ» (Lucas 10:17-21).
5. U disipuloʼob Jesuseʼ, ¿baʼaxten maʼ unaj u tuʼubultiʼob jach koʼoj u tojol le baʼax tsʼaʼab u yojéeltoʼob yoʼolal le Reinooʼ?
5 Le ka tsʼoʼok u beetik le oracionaʼ, Jesuseʼ tu yaʼalaj tiʼ u disipuloʼob: «Kiʼ yóol le máaxoʼob ku paktikoʼob yéetel u yichoʼobeʼ le baʼaloʼob ka wilikeʼex teʼexaʼ; tumen kin waʼalik tiʼ teʼexeʼ yaʼab [profetaʼob] yéetel [reyoʼob] tu yóoltaj u yiloʼob le baʼaloʼob ka wilikeʼex teʼexaʼ, baʼaleʼ maʼ tu yilajoʼobiʼ; tu yóoltaj u yuʼuboʼob le baʼaloʼob ka wuʼuyikeʼex teʼexaʼ, baʼaleʼ maʼ tu yuʼubajoʼobiʼ». Jeʼex k-ilkoʼ Jesuseʼ tu yaʼalaj tiʼ disipuloʼobeʼ, maʼ u tuʼubultiʼob jach koʼoj u tojol le baʼax táan u tsʼaʼabal u yojéeltoʼob yoʼolal le Reinooʼ, tumen mix tiʼ le máaxoʼob meyajt Dios úuchil tsʼaʼab u yojéeltoʼoboʼ yéetel mix tak tiʼ «le j-kaambalnajoʼob yéetel kaʼanal u naʼatoʼob» kuxaʼanoʼob teʼ kʼiinoʼob jeʼeloʼoboʼ (Lucas 10:23, 24).
6, 7. 1) ¿Baʼaxten jach nojbaʼal unaj k-ilik le baʼaxoʼob tsʼoʼok k-kanik teʼ Bibliaoʼ? 2) ¿Bix yanik le religionoʼob minaʼan u jaajil tiʼoboʼ, baʼaleʼ bix yanik u kaajal Dios?
6 Toʼon bejlaʼeʼ maas jach nojbaʼal unaj k-ilik le baʼaxoʼob tsʼoʼok k-kanik teʼ Bibliaoʼ, tumen yéetel u yáantaj «le palitsil chúukpajaʼan u yóol yéetel yaan u naʼat[oʼ]» Jéeobaeʼ tsʼoʼok u yáantkoʼon utiaʼal k-maas naʼatik baʼax ku kaʼansik le Bibliaoʼ (Mateo 24:45; Daniel 12:10). Le ka tʼaanaj yoʼolal u tsʼook kʼiinoʼobeʼ, le profeta Danieloʼ tu tsʼíibtaj: «Yaʼab máakoʼob bíin [...] máanakoʼob tuláakal tuʼux táan u kaxantikoʼob u yaʼabkúuntikoʼob u kʼaj óolaloʼob» (Daniel 12:4). ¿Máasaʼ bejlaʼeʼ Jéeobaeʼ tsʼoʼok u beetik u yaʼabtal k-naʼatik baʼax ku yaʼalik u Tʼaan yéetel leloʼ tsʼoʼok u beetik u maas muʼukʼantal k-fe?
7 Toʼon k-meyajtik Dioseʼ, tsʼoʼok k-kanik yéetel tsʼoʼok k-naʼatik yaʼab kaʼansajiloʼob tiʼ le Bibliaoʼ, baʼaleʼ le religionoʼob minaʼan u jaajil tiʼoboʼ maʼ tu naʼatkoʼob mix tech u páajtal u tsolkoʼob le baʼax ku kaʼansik le Bibliaoʼ; le oʼolaleʼ yaʼab máakoʼob lubaʼan u yóoloʼob wa kʼuxilnajaʼanoʼob yoʼolal le baʼaxoʼob ku kaʼansik le maʼ jaajil religionoʼobaʼ, tsʼoʼok u joʼopʼol u natsʼkubaʼob tiʼ u kaajal Dios. Le máakoʼobaʼ uts u puksiʼikʼaloʼob, maʼ u kʼáatoʼob táakpajal «tiʼ u kʼebanoʼob» «le nojoch Babiloniaoʼ» yéetel maʼ xan u kʼáat u kʼamoʼob le xuʼulsajil ku taal tu yóokʼoloʼ. Jéeoba yéetel le máaxoʼob meyajtikoʼ ku invitarkechoʼob utiaʼal ka táakpajkech ichil u kaajal (Apocalipsis 18:2-4; 22:17).
Yaʼab máaxoʼob táan u natsʼkubaʼob tiʼ Dios
8, 9. Teʼ kʼiinoʼobaʼ, ¿bix u béeychajal le baʼax ku yaʼalik Ageo 2:7?
8 Jéeobaeʼ tu yaʼalaj yoʼolal le adoración kun tsʼaabil tiʼoʼ: «Bíin in beet u kikilankil tuláakal múuchʼ kaajoʼob, bíin xan u taas u ayikʼaliloʼob, beyoʼ bíin chuʼupuk in [templo] yéetel nojbeʼenil» (Ageo 2:7). Le profecíaaʼ béeychaj tu kʼiiniloʼob Ageo; teʼ kʼiinoʼob jeʼeloʼ u yalaʼ tiʼ u kaajal Dioseʼ suunajoʼob Jerusalén utiaʼal u jel líiʼskoʼob le templooʼ. Teʼ kʼiinoʼobaʼ, le tʼaanoʼobaʼ táan xan u béeychajloʼob yoʼolal le baʼax táan u yúuchul tu kiliʼich templo Dios way Luʼumeʼ.
9 U millonesi máakoʼobeʼ tsʼoʼok u taaloʼob tu kiliʼich templo Dios utiaʼal u adorarkoʼob yéetel «pixan» bey xan yéetel «jaaj», yéetel tuláakal jaʼaboʼobeʼ u milesi uláakʼ máakoʼob tiʼ «tuláakal múuchʼ kaajoʼob» ku taaloʼob adorariʼ (Juan 4:23, 24). Tu mesiloʼob septiembre tiʼ 2005 tak agosto tiʼ 2006, 248,327 máakoʼob okjaʼanajoʼob utiaʼal u yeʼeskoʼob tsʼoʼok u kʼubik u kuxtaloʼob tiʼ Jéeoba, lelaʼ u kʼáat yaʼaleʼ ¡óoliʼ 680 máakoʼob okjaʼanajoʼob sáamsamal! Letiʼobeʼ jach u yaabilmoʼob le baʼax tsʼoʼok u kankoʼoboʼ yéetel jach u kʼáat u meyajtoʼob Jéeoba, lelaʼ ku yeʼesikeʼ Jéeoba natsʼkoʼob tu yiknal (Juan 6:44, 65).
10, 11. ¿Baʼax úuch tiʼ utúul máak yéetel tiʼ u yatan, ku yeʼesik bejlaʼeʼ yaʼab máakoʼob jach nojoch baʼal u yilkoʼob le baʼax tsʼoʼok u kankoʼob teʼ Bibliaoʼ?
10 Yaʼab máaxoʼob uts u puksiʼikʼaloʼobeʼ tsʼoʼok u natsʼkubaʼob tiʼ u kaajal Dios, tumen tu yiloʼob «u jelaʼanil máax uts tiʼ máax kʼasaʼan bey xan máax [adorartik] Yuumtsil tiʼ máax maʼ tu [adorartik]» (Malaquías 3:18). Utúul sukuʼun ku kʼaabaʼtik Wayne yéetel Virginia, u yataneʼ, bey úuchik tiʼoboʼ, letiʼobeʼ tiʼ yanoʼob kaʼach tiʼ upʼéel religión ku yaʼalikuba cristiano, baʼaleʼ yaʼab kʼáatchiʼob yantiʼob kaʼach maʼ páajchaj u núukaʼaltiʼobiʼ. Letiʼobeʼ u pʼekmoʼob le baʼateloʼob ku yantaloʼoboʼ, baʼaleʼ maʼ u yojloʼob kaʼach baʼaxten u nojchil le religionoʼoboʼ ku bendecirkoʼob le soldadoʼob yéetel le nuʼukuliloʼob ku meyajtiʼob utiaʼal u baʼateloʼoboʼ. Ka joʼopʼ u chʼíijloʼobeʼ, tu yiloʼob óoliʼ maʼatech u beetaʼal u cuentaʼob tumen u yéet religioniloʼob, kex tumen máan yaʼab jaʼaboʼob táan kaʼach u kaʼansaj Virginia utiaʼal domingos teʼ religión jeʼeloʼ. Letiʼobeʼ tu yaʼaloʼob: «Pʼat mix máak tʼankoʼon tiʼ teléfono yéetel mix máak áantkoʼon utiaʼal k-muʼukʼaʼankúunsik k-fe. Le Iglesia tuʼux k-binoʼ chéen u kʼáat kaʼach k-taakʼin. Maʼ k-ojel kaʼach baʼax unaj k-beetikiʼ». Maas jach lúub u yóoloʼob le ka tu yiloʼob u religionoʼobeʼ ku kʼamkoʼob le máakoʼob yaan baʼal u yiloʼob yéetel u yéet xiibiloʼob wa yéetel u yéet koʼoleliloʼoboʼ.
11 Baʼaleʼ, u yáabil yéetel u hija le kaʼatúul nojoch máakoʼobaʼ tu beetubaʼob j-jaajkunaj tiʼ Jéeoba. Kex tumen Wayne yéetel Virginia maʼ utstutʼaanoʼob kaʼacheʼ, ka tsʼoʼokeʼ joʼopʼ u xokkoʼob le Biblia yéetel u j-jaajkunajoʼob Jéeobaoʼ. Wayneeʼ tu yaʼalaj: «Chéen ichil óoxpʼéel mesoʼobeʼ, t-kanaj maas yaʼab baʼaloʼob tiʼ le kaʼansaʼabtoʼon ichil le setenta jaʼaboʼob t-beetaj teʼ religión tuʼux yanoʼon kaʼachoʼ. U puliʼ maʼ kaʼansaʼabtoʼon wa Jéeoba u kʼaabaʼ Diosiʼ; maʼ xan kaʼansaʼabtoʼon mix baʼal yoʼolal u Reino Dios mix yoʼolal le Paraíso kun yantal way yóokʼol kaabeʼ». Le máak yéetel u yatanaʼ, maʼ xáanchaj ka joʼopʼ u binoʼob teʼ muchʼtáambaloʼoboʼ yéetel u jóoʼloʼob kʼaʼaytaj. Virginiaeʼ tu yaʼalaj: «K-kʼáat kaʼans tiʼ tuláakal máak le baʼax tsʼoʼok k-kankoʼ». Tu kaʼatúulaloʼobeʼ, maas tiʼ 80 jaʼaboʼob yantiʼob ka okjaʼanajoʼob tu jaʼabil 2005. Letiʼobeʼ tu yaʼaloʼob: «Bejlaʼeʼ tiʼ yanoʼon ichil upʼéel nojoch familia tu kaajal Dioseʼ».
Jach nojoch baʼal unaj k-ilik le kaʼansaj tsʼaʼantoʼon utiaʼal k-beetik «tuláakal u jejeláasil maʼalob meyajoʼob[oʼ]»
12. Jéeobaeʼ, ¿baʼax ku tsʼáaik mantatsʼ tiʼ máaxoʼob meyajtik, yéetel bix jeʼel xan u bintoʼon utsileʼ?
12 Jéeobaeʼ mantatsʼ ku yáantik le máaxoʼob meyajtik utiaʼal u tsʼoʼokbeskoʼob le baʼax u kʼáatoʼ. Jeʼex tiʼ Noeeʼ, tu yaʼalaj jach bix ken u beetil le arca utiaʼal ka pʼáatak maʼalobiloʼ. Yéetel bey xan pʼáatikoʼ. ¿Baʼaxten? Tumen Noeeʼ «tu beetaj tuláakal baʼax aʼalaʼab tiʼ tumen [Dios]» (Génesis 6:14-22). Bejlaʼeʼ, Jéeobaeʼ ku kaʼansik máaxoʼob meyajtik utiaʼal ka u beetoʼob le meyaj u tsʼaamajtiʼoboʼ. Le meyaj maas nojoch tsʼaʼantoʼonoʼ, letiʼe k-kʼaʼaytik u maʼalob péektsilil u Reino Dios yéetel k-kaʼansik le máakoʼob utiaʼal ka u beetubaʼob u disipuloʼob Jesús. Tsʼoʼoleʼ jeʼex úuchik yéetel Noeeʼ, utiaʼal u bintoʼon utsileʼ kʼaʼabéet k-beetik le meyaj jach jeʼex u yaʼaliktoʼon Diosoʼ. Kʼaʼabéet k-beetik jeʼex u yaʼaliktoʼon Dios teʼ Bibliaoʼ yéetel jeʼex u yaʼalik u kaajaloʼ (Mateo 24:14; 28:19, 20).
13. ¿Baʼaxoʼob ku meyaj tiʼ Jéeoba utiaʼal u kaʼanskoʼon?
13 Utiaʼal ka k-beet maʼalob le meyajoʼ kʼaʼabéet k-ilik ka meyajnaktoʼon maʼalob le Bibliaoʼ, tumen le Bibliaoʼ jach maʼalob «utiaʼal kaʼansaj, utiaʼal kʼeyaj, utiaʼal tojkinaj yéetel utiaʼal tsol xikin tiʼ jumpʼéel toj kuxtal, utiaʼal beyoʼ le máak utiaʼal Jajal Diosoʼ ka utsil chúukaʼanchajak yéetel nuʼukʼaʼan[chajak] utiaʼal u beetik [máak] tuláakal u jejeláasil maʼalob meyajoʼob» (2 Timoteo 2:15; 3:16, 17). Jeʼex tu beetil teʼ yáax siglooʼ, bejlaʼeʼ yéetel u kaajaleʼ, Jéeobaeʼ ku tsʼáaiktoʼon jach maʼalob nuʼuktaj. Teʼ 99,770 múuchʼuliloʼob yaan tuláakal yóokʼol kaabaʼ, ku yantal le u muchʼtáambaliloʼob Kaambalil utiaʼal Kaʼansaj yéetel u Muchʼtáambalil Kʼaʼaytaj utiaʼal u yáantkoʼon teʼ meyaj tsʼaʼan k-beetoʼ. ¿Nojoch baʼal wa k-tiaʼal le muchʼtáambaloʼobaʼ? Wa beyoʼ yaan k-ilik maʼ k-peʼertik mix upʼéeliʼ yéetel yaan xan k-ilik beetik le baʼax ku kaʼansaʼaloʼ (Hebreob 10:24, 25).
14. Máaxoʼob meyajtik Dioseʼ, ¿bix u yeʼeskoʼob nojoch baʼal u yilkoʼob le kaʼansaj ku tsʼaʼabal tiʼoboʼ? (Tʼaanen tiʼ le baʼax ku taasik le revista La Atalaya 1 tiʼ febrero tiʼ 2007, táan juʼunoʼob 27 tak 30.)
14 U millonesi máakoʼob meyajtik Dios way yóokʼol kaabeʼ ku yeʼeskoʼob nojoch baʼal u yilkoʼob le kaʼansaj ku tsʼaʼabal tiʼoboʼ, lelaʼ ku yeʼeskoʼob ikil u tsʼáaik u yóoloʼob teʼ kʼaʼaytajoʼ. Lelaʼ bey u yeʼesik le meyaj beetaʼab tu mesiloʼob septiembre tiʼ 2005 tak agosto tiʼ 2006; teʼ jaʼab jeʼelaʼ 6,741,444 kʼaʼaytajoʼob tu máansoʼob 1,333,966,199 oraʼob táan u kʼaʼaytajoʼob yéetel táan u kaʼansajoʼob, yéetel tu xokoʼob xan le Biblia yéetel 6,286,618 máakoʼoboʼ. Le baʼax tsʼoʼok k-aʼalikaʼ chéen jujumpʼéel tiʼ tuláakal le baʼax ku taasik le revista La Atalaya 1 tiʼ febrero tiʼ 2007. Maʼalob ka a xakʼalt le baʼax ku taaskoʼ. Jach yaan u líiʼsik a wóol a wilik bix u bin le kʼaʼaytaj tiʼ uláakʼ tuʼuxoʼoboʼ, jeʼex úuchik u líikʼil u yóol le cristianoʼob teʼ yáax siglooʼ (Beetaʼanoʼob [Hechos] 1:15; 2:5-11, 41, 47; 4:4; 6:7).
15. ¿Baʼaxten mix máak unaj u lúubul u yóol wa táan u meyajtik Dios yéetel u jaajil u yóol?
15 Le jach maʼalob meyaj ku beetaʼal cada jaʼab tumen le máaxoʼob ku meyajtkoʼob Diosoʼ, ku yeʼesik jach nojoch baʼal u yilkoʼob u kʼaj óoltkoʼob Jéeoba yéetel u beetkubaʼob u j-jaajkunajoʼob (Isaías 43:10). U jaajileʼ, le meyaj ku beetik le sukuʼunoʼob kʼojaʼanoʼob wa le tsʼoʼok u chʼíijloʼoboʼ yaan kʼiineʼ jeʼel u páajtal u keʼetel yéetel le siibal tu beetaj le chʼijaʼan koʼolel kimen u yíichamoʼ. Baʼaleʼ, maʼ u tuʼubultoʼoneʼ Jéeoba yéetel Jesuseʼ jach u yaabilmoʼob le máaxoʼob ku tsʼáaik u yóoloʼob u meyajtoʼob Dios jeʼex u kʼáatoʼ (Lucas 21:1-4; Galaciailoʼob 6:4).
16. ¿Baʼax nuʼukuliloʼob utiaʼal kaʼansaj tsʼoʼok u tsʼáaiktoʼon Jéeoba teʼ tsʼook jaʼaboʼobaʼ?
16 Jéeobaeʼ maʼ chéen ku kaʼanskoʼon kʼaʼaytajiʼ, tsʼoʼok xan u beetik u tsʼaʼabaltoʼon tumen u kaajal maʼalob nuʼukuloʼob, jeʼex le libroʼob La verdad que lleva a vida eterna, Usted puede vivir para siempre en el paraíso en la Tierra yéetel El conocimiento que lleva a vida eterna. Yéetel beoraaʼ tsʼoʼok u tsʼáaiktoʼon le libro ¿Baʼax jach tu jaajil ku kaʼansik le Bibliaoʼ? Le máaxoʼob nojoch baʼal u yilkoʼob le nuʼukuloʼobaʼ, ku yilkoʼob ka maʼalob meyajnaktiʼob ken kʼaʼaytajnakoʼob yéetel ken kaʼansajnakoʼob.
Meyajnaktoʼon maʼalob le libro ¿Baʼax jach tu jaajil ku kaʼansik le Bibliaoʼ?
17, 18. 1) ¿Baʼax xookiloʼob tiʼ le libro ¿Baʼax ku kaʼansik le Bibliaoʼ? jach ku meyajtech teʼ kʼaʼaytajoʼ? 2) Utúul sukuʼun xíimbaltik le múuchʼuliloʼoboʼ, ¿baʼax tu yaʼalaj yoʼolal le libroaʼ?
17 Le libro ¿Baʼax jach tu jaajil ku kaʼansik le Bibliaoʼ? ku taasik diecinueve xookiloʼob yéetel upʼéel tipʼaʼanil. Le bix tsʼíibtaʼanik le libroaʼ maʼ talam u naʼataʼaliʼ; yoʼolal lelaʼ jach tsʼoʼok u yáankoʼon utiaʼal k-kaʼansik yaʼab máakoʼob. Jeʼex u doce xookil ku kʼaabaʼtik «Kuxlakoʼon jeʼex utstutʼaan Dioseʼ», ku tsolik tiʼ le j-xoknáal bix jeʼel u páajtal u beetikuba u amigo Dioseʼ; lelaʼ upʼéel baʼax óoliʼ mix máak ku tukultik u beetik wa ku tuklaʼal upʼéel baʼal maʼ tu páajtal u beetaʼaliʼ (Santiago 2:23). Le libroaʼ, ¿bix tsʼoʼok u meyaj utiaʼal u yáantaʼal uláakʼ máakoʼoboʼ?
18 Utúul sukuʼun tiʼ Australia ku xíimbaltik le múuchʼuliloʼoboʼ ku yaʼalikeʼ, le librooʼ «jach jatsʼuts u yilaʼal yéetel jach séeb u beetik u tsikbal le máakoʼoboʼ». Ku yaʼalik xaneʼ, le libroaʼ jach maʼ talam u yúuchul kʼaʼaytaj tu yéeteliʼ, tsʼoʼoleʼ tsʼoʼok u yáantik yaʼab sukuʼunoʼob «utiaʼal u lukʼul u saajkiloʼob kʼaʼaytaj yéetel tsʼoʼok u jach taasik kiʼimak óolal tiʼob. Le oʼolal yaʼab sukuʼunoʼobeʼ ku yaʼalikoʼobeʼ le libroaʼ bey u Xéetʼ Oroeʼ».
19-21. Tsikbalt baʼax tsʼoʼok u beetik jujuntúul máakoʼob ku yeʼesik upʼéel nuʼukul jach maʼalob le libro ¿Baʼax ku kaʼansik le Bibliaoʼ?
19 «In waʼalikeʼ Dios túuxtech», bey tu yaʼalil utúul koʼolel kajaʼan tu luʼumil Guyana tiʼ utúul precursor kʼoopnaj tu joonajil u negocio. Le koʼolelaʼ táant u pʼataʼal yéetel kaʼatúul u mejen paal tumen le máak kajakbal tu yéetel kaʼachoʼ. Le precursoroʼ tu jeʼaj u yáax xookil le libro ¿Baʼax ku kaʼansik le Bibliaoʼ? ka tu kaxtaj le chan joʼol xook ku yaʼalik «¿Bix u yuʼubikuba Dios yoʼolal baʼaxoʼob k-muʼyajtik?», ka tu xokaj le xóotʼol 11. Le precursoroʼ ku yaʼalik: «Le baʼax tin xokoʼ jach kʼuch tu puksiʼikʼal le koʼoleloʼ; le oʼolal líikʼeʼ ka bin okʼol». Ka tsʼoʼokeʼ, le koʼolelaʼ tu yóotaj u xok le Biblia yéetel utúul kiikoʼ yéetel jach táan u tsʼáaik ichil u kuxtal le baʼax ku kanikoʼ.
20 José, utúul máak kajaʼan tu luʼumil Españaeʼ, kíim u yatan tiʼ upʼéel accidente. Yoʼolal lelaʼ, Joseiʼ joʼopʼ u drogarkuba yéetel káaj tak u bin tu yiknal sicologoʼob utiaʼal ka áantaʼak, baʼaleʼ le sicologoʼoboʼ maʼ páajchaj u núukikoʼob le kʼáatchiʼ jach chiʼichnakkúunsik kaʼach Joseaʼ: «¿Baʼaxten tu chaʼaj Dios ka kíimik in watan?». Upʼéel kʼiineʼ, Joseiʼ tu kʼaj óoltaj Francesc, utúul máak ku meyaj xan tuʼux ku meyaj letiʼoʼ. Francesqueʼ tu invitartaj José utiaʼal ka u múul xokoʼob le 11 xookil tiʼ le libro ¿Baʼax jach tu jaajil ku kaʼansik le Bibliaoʼ?; le xookaʼ ku kʼaabaʼtik «¿Baʼaxten ku chaʼik Dios u yantal muʼyajil?». Le núukil ku tsʼáaik le Biblia yéetel u kettʼaanil le maestro yéetel u j-xoknáaloʼ jach tu beetaj u naʼatik José baʼaxten jach yaan muʼyajil. Joseiʼ káaj túun u maas tsʼáaik u yóol xook, bin xan tiʼ upʼéel noj muchʼtáambal tiʼ circuito yéetel bejlaʼeʼ ku bin mantatsʼ teʼ muchʼtáambaloʼoboʼ.
21 Romaneʼ, utúul máak yaan 40 jaʼaboʼob tiʼ, yaan upʼéel u negocio yéetel tiʼ kajaʼan Poloniaeʼ. Letiʼeʼ jach ku yeʼesik tsiikil yoʼolal baʼax ku yaʼalik le Bibliaoʼ, baʼaleʼ tumen jach u chʼikmuba tiʼ u negocioeʼ maʼ seguernaj u kʼamik upʼéel xook tiʼ le Bibliaoʼ. Baʼaleʼ, ka bin tiʼ upʼéel noj muchʼtáambal tiʼ distritoeʼ tu kʼamaj le libro ¿Baʼax ku kaʼansik le Bibliaoʼ? Desde le ka tu kʼamaj le librooʼ, letiʼeʼ joʼopʼ u kʼexik bix u tuukul. Letiʼeʼ ku yaʼalik: «Leʼ libroaʼ jach maʼalob u tsolik le kaʼansajoʼob kʼaʼanan u yáax kanaʼal tiʼ le Bibliaoʼ». Bejlaʼeʼ Romaneʼ mantatsʼ u xokik le Bibliaoʼ yéetel jach táan u bin u beetik le baʼax ku kanikoʼ.
Maʼ u xuʼulul k-eʼesik nojbaʼal k-ilik le baʼaxoʼob u tsʼaamajtoʼon Diosoʼ
22, 23. ¿Bix k-eʼesik nojoch baʼal k-ilik le salvación ken u tsʼáatoʼon Diosoʼ?
22 Jeʼex aʼalaʼabik teʼ asamblea de Distrito tu kʼaabaʼtaj «¡Natsʼaʼan u kʼiinil k-jáalkʼabtaʼal!», toʼon k-meyajtik Dioseʼ k-tsʼíiboltik ka kʼuchuk u kʼiinil k-salvartaʼal utiaʼal «minaʼan u xuul», yéetel lelaʼ yaan u béeychajal tu yoʼolal u kʼiʼikʼel Jesús tu wekaj t-oʼolaloʼ. Le oʼolal nojoch baʼal k-ilik le salvación ken u tsʼáatoʼon Diosoʼ, yéetel k-eʼesik ken k-chaʼa u «pʼoʼik k-tuukul tiʼ le meyajoʼob ku bisikoʼob máak tiʼ kíimiloʼ, utiaʼal ka páatak k-meyajtik» jeʼex u kʼáatoʼ (Hebreob 9:12, 14).
23 U yantal maas tiʼ seis millones máaxoʼob kʼaʼaytik u maʼalob péektsil le Reinooʼ jeʼel u páajtal u yaʼalaʼal upʼéel milagroeʼ, tumen bejlaʼeʼ óoliʼ tuláakal máak ku kaxtik chéen u yutsil. Tsʼoʼoleʼ ku yeʼesik xaneʼ, toʼon k-meyajtik Dioseʼ nojoch baʼal k-ilik le meyaj tsʼaʼan k-beetoʼ, tumen k-ojel le meyaj k-beetik «jun múuchʼ yéetel Yuumtsileʼ maʼ chéen kuneliʼ». Le oʼolaleʼ, maʼ u xuʼulul k-eʼesik nojoch baʼal k-ilik le baʼaxoʼob u tsʼaamajtoʼon Diosoʼ (1 Corintoiloʼob 15:58; Salmo 110:3).
¿Baʼax jeʼel a núukikeʼ?
• Le salmistaoʼ, ¿bix tu yeʼesil maʼ unaj u jáawal k-yaabiltik Jéeoba, mix xan u jáawal k-ilik nojoch u tojol u Tʼaan yéetel le jaajil adoracionoʼ?
• Teʼ kʼiinoʼobaʼ, ¿bix u béeychajal le baʼax ku yaʼalik Ageo 2:7?
• Jéeobaeʼ, ¿bix u kaʼansik le máaxoʼob meyajtik utiaʼal ka u beetoʼob le meyaj u tsʼaamajtiʼoboʼ?
• ¿Baʼax unaj k-beetik utiaʼal k-eʼesik nojoch baʼal k-ilik le baʼaxoʼob u tsʼaamajtoʼon Jéeobaoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 25]
Jéeobaeʼ ku kaʼanskoʼon utiaʼal k-beetik le meyaj u tsʼaamajtoʼonoʼ
[U tsolajil le oochel teʼ táan juʼun 25]
¿BAʼAX jach tu jaajil KU KAʼANSIK LE BIBLIAOʼ?