Upʼéel baʼax unaj k-beetik xan toʼon

TU KAAJIL Cruzeiro do Sul tu luʼumil Brasileʼ, Nelma, utúul kiik ku kʼooseʼ, tu yeʼesaj wa jach chúukaʼan u yóol u beet baʼax utstutʼaan Dios. Le ka búul le tuʼux kajaʼan tumen sen kʼáax jaʼeʼ, utúul koʼolel suuk u bin ka kʼoʼosok u pool tumen Nelmaeʼ, tu síiaj yaʼab nookʼoʼob tiʼ. Le ka joʼopʼ u jóoʼsik Nelma le nookʼoʼob siʼib tiʼoʼ tu yileʼ ichil upʼéel u bolsai le pantalonoʼoboʼ yaan kex 1,000 dolaresiʼ.

Le taakʼin kaʼachoʼ letiʼe bukaʼaj jeʼel u náajaltik Nelma ichil siete meses teʼ tuʼux ku meyajoʼ, tsʼoʼoleʼ jach kʼaʼabéet kaʼach taakʼin tiʼ. U yotocheʼ kʼaschaj úuchik u sen búulul le tuʼux kajaʼanoʼ, tsʼoʼoleʼ óoliʼ tuláakal le baʼaloʼob yaan tiʼ u taata bey xan tiʼ u láakʼtsiloʼobeʼ kʼaschaji. Yéetel le bukaʼaj taakʼin kaʼachoʼ jeʼel u páajtal u yutskíintik u yotocheʼ, yéetel jeʼel tak u yáantik u láakʼtsiloʼobeʼ. Baʼaleʼ yoʼolal le baʼax u kammaj teʼ Bibliaoʼ, maʼ pʼáat yéetel le taakʼin tu kaxtoʼ (Hebreob 13:18).

Ka sáaschaj tuláakʼ kʼiineʼ bin meyaj, yéetel táanil tiʼ u jeʼebel le tuʼux ku meyajoʼ, tu tʼanaj le koʼolel síi le nookʼ tiʼoʼ. Nelmaeʼ tu tsʼáaj u diosboʼotikil tiʼ yoʼolal le nookʼoʼ, baʼaleʼ tiaʼalaj tiʼeʼ u kʼáat u sut le taakʼin tu kaxtaj ichil u bolsai upʼéel pantalonoʼ. Le koʼoleloʼ jach kiʼimakchaj u yóol, tumen le taakʼinoʼ u jóoʼsmaj kaʼach utiaʼal u boʼotik u j-meyajoʼob. Le koʼoleloʼ tiaʼalaj tiʼ Nelma: «Bejlaʼeʼ óoliʼ mix máak jeʼel u beetik le baʼax ta beetoʼ».

Maʼ xaaneʼ yaan máax jeʼel u tuklikeʼ maʼ tsaa ka u sut máak tiʼ u yuumil upʼéel baʼax ku kaxtikiʼ. Baʼaleʼ, le máaxoʼob ku tsʼáaik u yóoloʼob u beetoʼob le baʼax utstutʼaan Diosoʼ jach ku yilkoʼob maʼ u chʼaʼikoʼob baʼax maʼ u tiaʼaloʼobiʼ, yéetel mantatsʼ ku yilik u yaʼalikoʼob u jaajil. (Efesoiloʼob 4:25, 28). Nelmaeʼ ku yaʼalik: «Wa maʼ in sutik kaʼach le taakʼinoʼ, bejlaʼa maʼ kiʼimak in wóoleʼ».