Yanaktoʼon le kiʼimak óolal ku taal tiʼ u chʼaʼabal maʼalob saajkilil tiʼ Jéeobaoʼ
Yanaktoʼon le kiʼimak óolal ku taal tiʼ u chʼaʼabal maʼalob saajkilil tiʼ Jéeobaoʼ
«Teʼex a kʼubmabaʼex tiʼ Yuumtsileʼ, tsikeʼex, tumen mix baʼal jeʼel u bineltik tiʼ le máaxoʼob tsikik [wa chʼaʼik saajkilil tiʼoʼ].» (SALMO 34:9.)
1, 2. 1) Yaʼab religionoʼobeʼ, ¿baʼax tsʼoʼok u kaʼanskoʼob yoʼolal le u chʼaʼabal saajkilil tiʼ Diosoʼ? 2) ¿Baʼax kʼáatchiʼiloʼob ken k-núuk teʼ xookaʼ?
YAʼAB tiʼ le máaxoʼob ku kaʼansajoʼob teʼ religionoʼoboʼ ku kaʼansikoʼobeʼ unaj u chʼaʼabal saajkilil tiʼ Dios, tumen letiʼeʼ ku castigartik tiʼ upʼéel infierno le máaxoʼob ku kʼebankúunskubaʼoboʼ. Le baʼax ku kaʼansaʼalaʼ tiaʼan tu contra le baʼax ku kaʼansik le Bibliaoʼ, tumen le Bibliaoʼ ku yaʼalikeʼ Jéeobaeʼ utúul Dios jach yaan u yaabilaj yéetel toj baʼax ku beetik (Génesis 3:19; Deuteronomio 32:4; Romiloʼob 6:23; 1 Juan 4:8). Baʼaleʼ uláakʼ religionoʼobeʼ maʼatech u kaʼanskoʼob wa unaj u chʼaʼabal saajkilil tiʼ Diosiʼ, tumen ku yaʼalikoʼobeʼ ku kʼamik tuláakal máax jeʼel bixak ka kuxlakeʼ. Baʼaleʼ le kaʼansajaʼ tiaʼan xan tu contra le baʼax ku kaʼansik le Bibliaoʼ (Galaciailoʼob 5:19-21).
2 Le Bibliaoʼ ku kaʼansiktoʼon ka k-chʼaʼa saajkilil tiʼ Dios (Apocalipsis 14:7). Le baʼax ku kaʼansikaʼ ku beetik u yantal le kʼáatchiʼobaʼ: Wa jach u yaabilmoʼon Dioseʼ, ¿baʼaxten u kʼáat ka k-chʼaʼa saajkilil tiʼ? ¿Bix le saajkilil unaj k-chʼaʼik tiʼoʼ? ¿Baʼax utsiloʼob ku taasiktoʼon k-chʼaʼik saajkilil tiʼ? Le kʼáatchiʼobaʼ yaan k-ilik u núukiloʼob ken k-xakʼalt u tsʼook versiculoʼob le Salmo 34.
Baʼaxten kʼaʼabéet k-chʼaʼik saajkilil tiʼ Dios
3. 1) ¿Bix a wilik le u yaʼalaʼal tiʼ máak ka u chʼaʼa saajkilil tiʼ Diosoʼ? 2) ¿Baʼaxten yaan kiʼimak óolal tiʼ le máaxoʼob ku chʼaʼikoʼob saajkilil tiʼ Jéeobaoʼ?
3 Unaj k-chʼaʼik saajkilil tiʼ Jéeoba tumen letiʼ beet tuláakal baʼal, le oʼola letiʼ u yuumil (1 Pedro 2:17). Baʼaleʼ, leloʼ maʼ u kʼáat u yaʼal wa unaj k-chʼaʼik saajkilil tiʼ Dios tumen k-tuklik utúul dios jach kʼasaʼaniʼ, baʼaxeʼ u kʼáat u yaʼal k-eʼesik tsiikil tiʼ Jéeoba yéetel k-kanáantik maʼ k-meentik baʼax jeʼel u beetik u yaatal u yóoleʼ. K-chʼaʼik saajkilil tiʼ Dioseʼ upʼéel baʼal jach maʼalob yéetel ku taasiktoʼon kiʼimak óolal, maʼ upʼéel saajkilil ku lúuʼsik k-óoliʼ. Jéeoba, «le Dios kiʼimak u yóoloʼ» u kʼáat ka kuxlakoʼon ichil kiʼimak óolal (1 Timoteo 1:11, NM). Baʼaleʼ, utiaʼal leloʼ kʼaʼabéet k-beetik le baʼax ku yaʼaliktoʼonoʼ yéetel yaan kʼiineʼ ku kʼaʼabéetchajal k-beetik jujumpʼéel kʼeexoʼob ichil k-kuxtal. Le máaxoʼob ku kʼexkoʼob bix u kuxtaloʼoboʼ ku yilkoʼob jach jaaj le baʼax ku yaʼalik le salmista Davidaʼ: «Ilawileʼex bukaʼaj utsil le Yuumtsiloʼ. ¡Uts yanil le máax ku kʼubik u yóol tiʼ! Teʼex a kʼubmabaʼex tiʼ Yuumtsileʼ, tsikeʼex, tumen mix baʼal jeʼel u bineltik tiʼ le máaxoʼob tsikik» wa chʼaʼik saajkilil tiʼoʼ (Salmo 34:8, 9). Le máaxoʼob tsikik wa ku chʼaʼikoʼob saajkil tiʼ Jéeobaeʼ maʼatech u bineltik mix baʼal maʼalob tiʼob tumen jach náatsʼ yanikoʼob tiʼ letiʼ.
4. David yéetel Jesuseʼ, ¿bix úuchik u kʼubik u yóoloʼob tiʼ Jéeoba?
4 Jeʼex k-ilkoʼ Davideʼ tu yeʼesaj tsiikil tiʼ le máaxoʼob yanoʼob tu yéetel le ka tu yaʼalaj tiʼob: «teʼex a kʼubmabaʼex tiʼ Yuumtsil». Yéetel maʼalob úuchik u yaʼaliktiʼob beyaʼ tumen tiʼ yanoʼob ichil le kiliʼich kaaj u kʼubmuba tiʼ Diosoʼ yéetel tumen binoʼob tu paach David kex jeʼel tak u kíimsaʼaloʼobeʼ. Kex tumen táan kaʼach u chʼaʼapachtaʼaloʼob tumen rey Sauleʼ, Davideʼ jach u yojeleʼ yaan u tsʼaʼabal le baʼaxoʼob kʼaʼabéet tiʼ tumen Jéeobaoʼ. Letiʼeʼ tu tsʼíibtaj: «Le ayikʼaloʼoboʼ ku yóotsiltaloʼob yéetel ku mukʼyajtikoʼob wiʼijil, baʼaleʼ le máaxoʼob ku kaxtikoʼob Yuumtsileʼ mix bikʼin jeʼel u bineltik wa baʼax tiʼobeʼ» (Salmo 34:10). Jesuseʼ bey úuchik xan u muʼukʼaʼankúunsik u fe u disipuloʼoboʼ (Mateo 6:33).
5. 1) ¿Ayikʼal wa yaʼab tiʼ le máaxoʼob tu beetuba u disipuloʼob Jesusoʼ? 2) ¿Baʼax tu yaʼalaj Jesús yoʼolal u chʼaʼabal saajkilil?
5 Yaʼab tiʼ le judíoʼob tu yuʼuboʼob le baʼax tu kaʼansaj Jesusoʼ óotsiloʼob yéetel maʼatech u beetaʼal u cuentailoʼob, le oʼolal Jesuseʼ «tu chʼaʼaj óotsilil tiʼob tumen yaajtak u yóoloʼob yéetel lubaʼantak u yóoloʼob jeʼel bix j-tamanoʼob minaʼan máax kanáantikoʼob[eʼ]» (Mateo 9:36). Le máakoʼobaʼ, ¿jeʼel wa u yóotkoʼob kaʼach u beetubaʼob u disipuloʼob Jesuseʼ? Wa u kʼáat u tsaypachtoʼob Cristoeʼ unaj kaʼach u chʼaʼikoʼob saajkilil tiʼ Dios maʼ tiʼ wíinikoʼobiʼ. Jesuseʼ tu yaʼalajtiʼob: «Maʼ a chʼaʼikeʼex sajakil tiʼ le máaxoʼob ku kíimsikoʼob le wíinkliloʼ ku tsʼoʼokoleʼ mix baʼal uláakʼ ku páajtal u beetikoʼob. Baʼaleʼ bin in kaʼaj in waʼal tiʼ teʼexeʼ tiʼ máax unaj a chʼaʼikeʼex sajakil: Chaʼex sajakil tiʼ le máax, ku tsʼoʼokol u lukʼsik le kuxtaloʼ, yaan xan páajtalil tiʼ utiaʼal u pulik metnal [ich griegoeʼ, Gehena]. Tu jaajil chʼaʼex sajakil tiʼ letiʼ. ¿Maʼ wa ku koʼonol cinco mejen chʼíichʼoʼob tu yoʼolal kaʼapʼéel mejen taakʼiniʼ? Baʼaleʼ Jajal Dioseʼ maʼatech u tuʼubsik mix juntúul tiʼ letiʼobiʼ. Tumen tak u tsoʼotsel a pooleʼexeʼ láaj xokaʼantak. Maʼ a chʼaʼikeʼex sajakil, tumen teʼexeʼ [maas] yaan a tojoleʼex tiʼ yaʼabkach mejen chʼíichʼoʼob» (Lucas 12:4-7).
6. 1) ¿Baʼax tʼaaniloʼob tu beetaj Jesús tsʼoʼok u muʼukʼaʼankúunsik le máaxoʼob meyajtik Diosoʼ? 2) ¿Baʼaxten Jesuseʼ jach jeʼel u páajtal u kaʼansiktoʼon baʼax utsiloʼob ku taasik le u chʼaʼik máak saajkilil tiʼ Jéeobaoʼ?
6 Ken chʼaʼapachtaʼak le máaxoʼob meyajtik Jéeoba utiaʼal ka jáawak u meyajtikoʼobeʼ, maʼalob ka u kʼaʼajsoʼob le baʼax tu yaʼalaj Jesusaʼ: «Tuláakal le máaxoʼob ku utsil tʼaanoʼob tin woʼolal tu táan máakoʼobeʼ, bey xan u Paal Máak bíin utsil tʼaanak tu yoʼolaloʼob tu táan u angeloʼob Jajal Dios. Baʼaleʼ le máaxoʼob maʼ tu utsil tʼaanoʼob tin woʼolal tu táan máakoʼobeʼ, maʼ bíin utsil tʼantaʼak tu táan u angeloʼob Jajal Diosiʼ» (Lucas 12:8, 9). Le tʼaanoʼobaʼ tsʼoʼok u muʼukʼaʼankúunsik yaʼab tiʼ le máaxoʼob meyajtik Jéeoba, maases le yanoʼob teʼ luʼumoʼob tuʼux maʼatech u chaʼabal u yúuchul kʼaʼaytajoʼ. Le sukuʼunoʼobaʼ láayliʼ ku nojbeʼenkúuntkoʼob Jéeoba teʼ muchʼtáambaloʼob yéetel teʼ kʼaʼaytajoʼ, baʼaleʼ ku kanáantikoʼob bix u beetkoʼob (Beetaʼanoʼob [Hechos] 5:29). Jesuseʼ, letiʼe máax maas maʼalob u yeʼesiktoʼon bix unaj k-chʼaʼik «kiliʼich saajkil» tiʼ Diosoʼ (Hebreos 5:7, LTN). Isaiaseʼ tu yaʼalaj tu yoʼolal Jesús: «U pixan Yuumtsileʼ, tiʼ bíin yanak mantatsʼ tu yóokʼoleʼ, utiaʼal ka u tsʼáa tiʼeʼ, [...] u sajbeʼentsil Yuumtsil» (Isaías 11:2, 3). Le oʼolal Jesuseʼ jach jeʼel u páajtal u kaʼansiktoʼon baʼax utsiloʼob ku taasik le u chʼaʼik máak saajkilil tiʼ Jéeobaoʼ.
7. 1) ¿Baʼax invitacioni ku kʼamik le máaxoʼob ku kuxtaloʼob jeʼex Jesusoʼ? 2) Le taatatsiloʼoboʼ, ¿bix jeʼel u beetkoʼob jeʼex Davideʼ?
7 Le máaxoʼob ku kuxtaloʼob jeʼex Jesús yéetel ku beetkoʼob le baʼax tu yaʼaloʼ, táan xan kʼamkoʼob le invitación tu yaʼalaj Davidaʼ: «Koʼoteneʼex, in paalaleʼex, uʼuyeneʼex xaniʼ: bin in kaʼaj in kaʼambeseʼex a tsikeʼex [wa a chʼaʼikeʼex saajkilil tiʼ] le Yuumtsiloʼ» (Salmo 34:11). Davideʼ, tu yaʼalaj u paalal le máaxoʼob yanoʼob tu yéeteloʼ tumen letiʼ máax nuʼuktikoʼob. Letiʼeʼ, tu yáantoʼob utiaʼal ka u natsʼubaʼob tiʼ Jéeoba yéetel ka u bisubaʼob tu yéetel. Lelaʼ ku yeʼesik baʼax unaj u beetik le taatatsiloʼoboʼ, tumen tsʼaʼantiʼob u páajtalil utiaʼal u líiʼskoʼob u paalaloʼob «tiʼ jumpʼéel toj kuxtal yéetel tiʼ u kaʼansajil Yuumtsil» (Efesoiloʼob 6:4). Wa sáamsamal u tʼaan le taatatsiloʼob yéetel u paalaloʼob yoʼolal Dios yéetel mantatsʼ u múul xojkoʼob le Biblia tu yéeteloʼoboʼ, yaan u yáantikoʼob u chʼaʼob saajkilil tiʼ Jéeoba yéetel ka yanak kiʼimak óolal tiʼob (Deuteronomio 6:6, 7).
Bix k-eʼesik chʼaʼamaj maʼalob saajkilil tiʼ Dios
8, 9. 1) ¿Baʼax utsil ku taasiktoʼon le k-chʼaʼik maʼalob saajkilil tiʼ Diosoʼ? 2) ¿Baʼax u kʼáat u yaʼal u kanáantik máak u yaakʼ?
8 Jeʼex tsʼoʼok aʼalikoʼ le saajkilil tiʼ Diosoʼ maʼ tu luʼsiktoʼon le kiʼimak óolaloʼ. Davideʼ tu kʼáataj: «¿A kʼáat wa kuxtal yaʼabkach kʼiin? ¿A kʼáat wa kuxtal yéetel kiʼimak óolal?» (Salmo 34:12). Le saajkilil tiʼ Jéeobaoʼ letiʼe baʼax kʼaʼabéettoʼon utiaʼal ka yanaktoʼon upʼéel kuxtal minaʼan u xuul ich kiʼimak óolaloʼ. U yaʼalik máak u yaabiltmaj Dioseʼ maʼ talmiʼ, baʼaleʼ maʼ chéen unaj u yaʼalik máakiʼ unaj u yeʼesik. Le oʼolal Davideʼ tu tsolaj bix jeʼel u páajtal k-eʼesikeʼ.
9 «Kanáant a waakʼ, maʼ u yaʼalik baʼal kʼaas; mix bikʼin ka jóokʼok tuus ta chiʼ.» (Salmo 34:13.) Lelaʼ letiʼe baʼax tu chʼaʼachiʼitaj le apóstol Pedro le ka tsʼoʼok u yaʼalik tiʼ le yáax cristianoʼob ka u paklan yaabiltubaʼoboʼ (1 Pedro 3:8-12). U kanáantik máak u yaakʼeʼ u kʼáat u yaʼal maʼ u tʼaan kʼaas tiʼ u maasil, tumen leloʼ jach ku beetik loob. Mantatsʼ unaj k-aʼalik u jaajil yéetel unaj k-tsikbal tiʼ baʼaxoʼob jeʼel u líiʼsik yóol u maasiloʼobeʼ (Efesoiloʼob 4:25, 29, 31; Santiago 5:16).
10. 1) Tsol baʼax u kʼáat u yaʼal u náachkuntikuba máak tiʼ le kʼasaʼaniloʼ. 2) ¿Baʼax u kʼáat u yaʼal u beetik máak le baʼax utsoʼ?
10 «Náachkuntaba tiʼ le kʼasaʼaniloʼ beet xan uts; kanáant le jeetsʼeloʼ xeen xan tu paach.» (Salmo 34:14.) Toʼon k-meyajtik Dioseʼ k-náachkuntikba tiʼ le baʼaxoʼob maʼ utstutʼaan letiʼoʼ, jeʼex le núupkʼebanoʼ, le ookoliloʼ, le espiritismooʼ, le baʼateloʼ, le káaltaliloʼ yéetel le drogasoʼoboʼ; tsʼoʼoleʼ maʼatech k-náaysik k-óol yéetel baʼaloʼob kʼaastak jeʼex le pornografiaoʼ (Efesoiloʼob 5:10-12). Baʼaxeʼ, k-ilik beetik baʼax uts. Jeʼex ken jóoʼkoʼon kʼaʼayt u maʼalob péektsilil le Reinooʼ yéetel kaʼansik le máakoʼob utiaʼal ka páajchajak u salvarkubaʼoboʼ (Mateo 24:14; 28:19, 20). K-beetik xan baʼax utseʼ u kʼáat u yaʼal k-líiʼsikba yéetel le baʼax kun ilbil teʼ muchʼtáambaloʼoboʼ yéetel maʼ u pʼáatal maʼ k-biniʼ, k-áantaj utiaʼal ka seguernak u kʼaʼaytaʼal le maʼalob péektsiloʼ, k-kanáantik le kúuchil tuʼux k-muchʼikbaoʼ yéetel k-áantik le sukuʼunoʼoboʼ.
11. 1) Davideʼ, ¿bix úuchik u yeʼesik bin tu paach le jeetsʼeliloʼ? 2) ¿Bix jeʼel u páajtal k-kanáantik le jeetsʼelil yaan teʼ múuchʼuliloʼ?
11 Davideʼ utúul tiʼ le máaxoʼob binoʼob tu paach le jeetsʼeliloʼ. Kaʼatéen anchaj u páajtalil tiʼ utiaʼal u kíimsik le rey Sauloʼ, baʼaleʼ maʼ tu beetiʼ baʼaxeʼ tu tʼaanaj yéetel tsiikil, utiaʼal beyoʼ ka yanak jeetsʼelil ichiloʼob (1 Samuel 24:8-11; 26:17-20). ¿Baʼax jeʼel u páajtal k-beetik wa k-ilik yaan baʼax jeʼel u luʼsik le jeetsʼelil yaan teʼ múuchʼuliloʼ? Kʼaʼabéet k-ilik ka yanak «jeetsʼel» yéetel k-ilik xan bin «tu paach». Le oʼolaleʼ, wa k-ilik yantoʼon wa baʼax talmil yéetel utúul sukuʼuneʼ, unaj k-beetik le baʼax tu yaʼalaj Jesusaʼ: «Xeen táanil a kaxant kiʼimak óolal yéetel a sukuʼun». Ku tsʼoʼokol k-beetik lelaʼ jeʼel u páajtal k-tsʼoʼokbesik uláakʼ baʼaloʼob yaan yil yéetel le adoración k-tsʼáaik tiʼ Diosoʼ (Mateo 5:23, 24; Efesoiloʼob 4:26).
K-chʼaʼik maʼalob saajkilil tiʼ Dioseʼ ku taasiktoʼon yaʼab utsiloʼob
12, 13. 1) ¿Baʼax utsiloʼob ku kʼamik le máaxoʼob ku chʼaʼikoʼob maʼalob saajkilil tiʼ Diosoʼ? 2) ¿Baʼax ken u beet Jéeoba yoʼolal le máaxoʼob meyajtikoʼ?
12 «Yuumtsileʼ u tsʼaamaj u paakat yóokʼol le utsil máakoʼoboʼ yéetel ku chʼenxikintik u yawatoʼob.» (Salmo 34:15.) Le bix úuchik u yáantaʼal David tumen Diosoʼ ku yeʼesik jach jaaj le baʼax ku yaʼalik le tekstoaʼ. K-ojéeltik táan k-kanáantaʼal tumen Jéeobaeʼ ku taasiktoʼon kiʼimak óolal yéetel jeetsʼelil. Kex jach nojoch le talmil táan k-aktáantikoʼ k-ojel letiʼeʼ yaan u yáantkoʼon. Toʼon k-meyajtik Dioseʼ k-ojel yaan u kʼuchul u kʼiinil k-maas chʼaʼapachtaʼal tumen Gog tiʼ Magog wa Satanás yéetel k-ojel xaneʼ yaan u taal u «nojochil yéetel sajbeʼentsil u kʼiinil Yuumtsil» (Joel 2:11, 31; Ezequiel 38:14-18, 21-23). Jeʼel baʼaxak ka úuchuk teʼ kʼiinoʼob jeʼeloʼoboʼ, yaan k-ilik u béeychajal le baʼax tu yaʼalaj Davidaʼ: «Yuumtsileʼ ku [yuʼubik] u kʼáat óolal le máak uts u tuukuloʼ ku tokik xan tiʼ tuláakal u yaj óolaloʼob» (Salmo 34:17).
13 ¡Jach túun yaan u kiʼimaktal k-óol ken k-il bix ken u nojbeʼenkúuntil Jéeoba u kʼaabaʼ! Le bix ken u beetiloʼ yaan u beetik u jaʼakʼal k-óol yéetel yaan u péekskoʼon eʼes tsiikil tiʼ, baʼaleʼ le máaxoʼob pʼekmailoʼonoʼ yaan u xuʼulsaʼaloʼob. «Yuumtsileʼ ku sutikuba tu yóokʼol le j-loolob máakoʼoboʼ utiaʼal maʼ u kʼaʼajsaʼaloʼob tumen mix máak.» (Salmo 34:16.) K-salvartaʼal yéetel k-antal ichil le túumben yóokʼol kaaboʼ, ¿máasaʼ upʼéel baʼal jach maʼalob ken u tsʼáatoʼon Jéeoba?
Baʼaxoʼob kun áantkoʼon utiaʼal maʼ u jáawal k-meyajtik Dios
14. ¿Baʼax ken u yáantoʼon k-aktáant le muʼyajiloʼoboʼ?
14 Teʼ yóokʼol kaab tsʼoʼok u jach kʼastalaʼ kʼaʼabéet u chúukpajal k-óol meyajt Jéeoba. Kʼaʼabéet k-chʼaʼik maʼalob saajkilil tiʼ Dios utiaʼal maʼ u xuʼulul k-beetik baʼax u kʼáat. Tumen jach talam le kuxtal yaan beoraaʼ, yaʼab tiʼ le máaxoʼob meyajtik Jéeobaoʼ ku aktáankoʼob nojoch muʼyajiloʼob ku beetik u pʼáatal bey kʼiilil u puksiʼikʼaloʼob yéetel ku beetik u yuʼubikoʼob bey mix máak áantkoʼobeʼ. Baʼaleʼ maʼ unaj u tuʼubskoʼobeʼ wa ku kaxkoʼob u yáantaj Jéeobaeʼ, letiʼeʼ yaan u yáantkoʼob u aktáantoʼob le talamiloʼoboʼ. Davideʼ ku líiʼsik k-óol yéetel le tʼaanoʼobaʼ: «Yuumtsileʼ naatsʼ yaan utiaʼal u [salvart] le máaxoʼob kʼiilil u puksiʼikʼaloʼoboʼ, le máaxoʼob minaʼan u alab óolaloʼoboʼ» (Salmo 34:18). Tsʼoʼoleʼ ku yaʼalik xan le jatsʼuts tʼaanoʼobaʼ: «Máak toj u kuxtaleʼ ku mukʼyajtik yaʼabkach kʼaasoʼob, baʼaleʼ tiʼ tuláakal baʼal ku toʼokol tumen Yuumtsil» (Salmo 34:19). Jeʼel bukaʼaj talamiloʼob ka k-aktáanteʼ, Jéeobaeʼ jeʼel u tokikoʼon wa u salvarkoʼon tiʼ tuláakloʼobeʼ.
15, 16. 1) ¿Baʼax tu yojéeltaj David le maʼ úuch u tsʼíibt le Salmo 34? 2) ¿Baʼax ken u yáantoʼon k-aktáant le talamiloʼoboʼ?
15 Maʼ úuch u tsʼíibt le Salmo 34 Davideʼ tu yojéelteʼ, Sauleʼ tu beetaj u kíimsaʼal u kajnáaliloʼob Nob yéetel óoliʼ tuláakal le sacerdoteʼoboʼ. U yojéeltik David xuʼulsaʼab tiʼ u kajnáaliloʼob Nob ikil ookik letiʼ ichil le kaajoʼ tu beetaj wal u jach lúubul u yóoleʼ (1 Samuel 22:13, 18-21). Le oʼolal Davideʼ tu kaxtaj wal u yáantaj Jéeoba yéetel tu muʼukʼaʼankúuntaj xan u yóol u kʼaʼajsik yaan u kaʼa kuxkíintaʼal le utsul máakoʼoboʼ (Beetaʼanoʼob 24:15).
16 K-ojéeltik yaan u kaʼa kuxkíintaʼal le kimenoʼoboʼ ku muʼukʼaʼankúunsik xan k-óol, tumen jeʼel baʼaxak loobil ka beetaʼaktoʼoneʼ Jéeobaeʼ jeʼel u yutskíintkeʼ (Mateo 10:28). Davideʼ bey tu yeʼesil le ka tu yaʼalaj: «Yuumtsil kanáantik tuláakal u baakeloʼob [le utsul máakoʼ], maʼ bíin kaʼachak mix jumpʼéeliʼ» (Salmo 34:20). Le tʼaanoʼobaʼ jach béeychaj tiʼ Jesús. Kex tumen jach yaaj bix úuchik u kíimsaʼaleʼ, maʼ «kaʼach» mix upʼéel tiʼ u baakeloʼobiʼ (Juan 19:36). Baʼaleʼ le baʼax ku yaʼalik le Salmo 34:20 ku kaʼansik xan toʼoneʼ, jeʼel baʼalak talamil ka u aktáant le máaxoʼob kun binoʼob kaʼan yéetel le «uláakʼ j-tamanoʼob» kun pʼaatloʼob way Luʼumeʼ yaan u yáantaʼaloʼob tumen Jéeoba yéetel yaan u yutskíintaʼal jeʼel baʼaxak loobil ka beetaʼaktiʼobeʼ; le oʼolal jeʼel u páajtal u yaʼalaʼaleʼ maʼ kun kachbil mix upʼéel u baakeloʼob (Juan 10:16).
17. ¿Baʼax kun úuchul tiʼ le máaxoʼob maʼ tu jáawal u beetkoʼob loob tiʼ kaajal Jéeobaoʼ?
17 Baʼaleʼ, le kʼasaʼan máakoʼoboʼ maʼ kun kanáantbiloʼob, baʼaxeʼ yaan u jochkoʼob le baʼax táan u paʼkoʼoboʼ. «Le j-loolob máakoʼoboʼ, u kʼasaʼaniloʼob kíimsikoʼob; le máaxoʼob ku pʼektikoʼob máak toj u kuxtaleʼ yaan u jaʼatsʼaloʼob.» (Salmo 34:21.) Le máaxoʼob maʼ tu jáawal u beetkoʼob loob tiʼ kaajal Dioseʼ yaan u jach bintiʼob kʼaasil. Ken taalak Jesús utiaʼal u xuʼulsik tiʼ u enemigoʼob Dioseʼ, letiʼobeʼ «bíin jaʼatsʼakoʼob yéetel saʼatalil minaʼan u xuul» (2 Tesalonicailoʼob 1:9).
18. ¿Bix u toʼokol le «yaʼabkach máakoʼob[oʼ]», yéetel baʼax utsiloʼob ken u kʼamoʼob?
18 Le salmo tu tsʼíibtaj Davidoʼ ku tsʼoʼokol yéetel le jatsʼuts tʼaanoʼobaʼ: «Baʼaleʼ Yuumtsileʼ ku tokik u kuxtal u palitsiloʼob, ¡maʼ bíin jaʼatsʼak le máaxoʼob ku kʼubik u yóoloʼob tiʼ letiʼeʼ!» (Salmo 34:22). Le taʼaytak u tsʼoʼokol le cuarenta jaʼaboʼob tu beetaj u reyiloʼ, Davideʼ tu yaʼalaj: «[Dioseʼ] tu tokajen tiʼ tuláakal yaj óolal» (1 Reyes 1:29). Jeʼex Davideʼ, maʼ kun xáantaleʼ le máaxoʼob chʼaʼik maʼalob saajkilil tiʼ Diosoʼ yaan u páajtal u kʼaʼajskoʼob le baʼax tu aktáantoʼoboʼ yéetel yaan u kiʼimaktal u yóoloʼob tumen tsʼoʼok u perdonartaʼal le baʼaloʼob maʼ maʼalobtak tu beetoʼoboʼ yéetel tumen áantaʼaboʼob u aktáantoʼob le talamiloʼoboʼ. Óoliʼ tuláakal u sukuʼunoʼob Cristo yéeyaʼanoʼoboʼ tsʼoʼok u binoʼob kaʼan. Le u yalab pʼáatloʼob way Luʼumeʼ ku meyajtkoʼob Dios junmúuchʼ yéetel «yaʼabkach máakoʼob» maʼalob yanikoʼob tu táan Dios tumen yaan u fejoʼob tiʼ u kʼiʼikʼel Cristo tu tsʼáaj utiaʼal u salvartik wíinikoʼoboʼ. Ken gobernarnak Cristo yoʼolal le mil jaʼaboʼoboʼ, le yaʼabach máakoʼobaʼ jach yaan u yilkoʼob le yaʼabach utsiloʼob ken u taas le u kʼiʼikʼel Jesús tu wekajoʼ, jeʼex le u luʼsaʼal le kʼeban tu wíinkliloʼoboʼ (Apocalipsis 7:9, 14, 17; 21:3-5).
19. ¿Baʼax tsʼoʼok u chʼaʼatuklik u beetik le «yaʼabkach máakoʼob[oʼ]»?
19 ¿Baʼaxten yaan u kʼamkoʼob yaʼab utsiloʼob le «yaʼabkach máakoʼob» meyajtik Diosoʼ? Tumen tsʼoʼok u chʼaʼatuklikoʼob maʼ u jáawal u chʼaʼikoʼob maʼalob saajkilil tiʼ Jéeoba, u yeʼeskoʼob tsiikil tiʼ yéetel u beetkoʼob le baʼax ku yaʼalikoʼ. Jeʼex tsʼoʼok ilkoʼ k-chʼaʼik maʼalob saajkil tiʼ Jéeobaeʼ ku taasiktoʼon kiʼimak óolal ichil le kuxtal yantoʼon bejlaʼeʼ yéetel ku yáantkoʼon utiaʼal k-machik «le kuxtal minaʼan u xuul» teʼ paraíso ken u taas Diosoʼ (1 Timoteo 6:12, 18, 19; Apocalipsis 15:3, 4).
¿Kʼajaʼan wa tech?
• ¿Baʼaxten kʼaʼabéet k-chʼaʼik saajkilil tiʼ Dios yéetel baʼax u kʼáat u yaʼal k-beetik leloʼ?
• ¿Bix k-eʼesik chʼaʼamaj maʼalob saajkilil tiʼ Dios?
• ¿Baʼax utsiloʼob ku kʼamkoʼob le máaxoʼob ku chʼaʼikoʼob maʼalob saajkilil tiʼ Diosoʼ?
• ¿Baʼaxoʼob kun áantkoʼon utiaʼal maʼ u jáawal k-meyajtik Dios?
[U kʼáatchiʼiloʼob le xookoʼ]
[U tsolajil le oochel teʼ táan juʼun 28]
Teʼ tuʼuxoʼob maʼatech chaʼabal u yúuchul kʼaʼaytajoʼ, le máaxoʼob ku chʼaʼikoʼob maʼalob saajkililoʼ láayliʼ ku nojbeʼenkúuntkoʼob Jéeoba, baʼaleʼ ku kanáantikoʼob bix u beetkoʼob