¿Baʼaxoʼob kun béeytal ken taalak Cristo?

«NOJOCH SAAJKILIL TU KAAJIL SÃO PAULO.» Lelaʼ bey u yaʼalik upʼéel revista ku kʼaabaʼtik Veja utiaʼal u yeʼesik bix tu yuʼubiluba u kajnáaliloʼob São Paulo, upʼéel nojoch kaaj jach ayikʼal yaan tu luʼumil Brasil. Ichil kampʼéel kʼiinoʼob tiʼ u mesil mayo tiʼ 2006, jach sajakkúuntaʼab u kajnáaliloʼob tumen le terroristaʼob líikʼoʼob baʼateʼel tu contra le gobiernooʼ. Ichil «maas tiʼ cien oraʼob táan le baʼateloʼ», kíimsaʼab kex ciento cincuenta máakoʼobiʼ, ichil le jeʼeloʼobaʼ tiaʼan policíaʼob, kʼasaʼan máakoʼob yéetel máakoʼob mix baʼal yaan u yiloʼob yéetel le baʼateloʼ.

Bejlaʼeʼ tuláakal yóokʼol kaab ku beetaʼal baʼaloʼob kʼaastak, tsʼoʼoleʼ le gobiernoʼoboʼ maʼ tu páajtal u xuʼulskoʼob. Baʼaxeʼ sáamsamal táan u bin u maas yaʼabtal. Maʼ xaaneʼ techeʼ ku lúubul a wóol, tumen jeʼel tuʼuxak ka xiʼikecheʼ jach yaʼab u beetaʼal baʼaloʼob kʼaastakiʼ. Baʼaleʼ natsʼaʼan u kʼiinil u xuʼulsaʼal tiʼ tuláakal le baʼaloʼobaʼ.

Jesuseʼ tu kaʼansaj u disipuloʼob ka u kʼáatoʼob ka taalak u Reino Dios bey xan ka beetaʼak baʼax u kʼáat u Taata «way luʼumeʼ jeʼel bix u beetaʼal teʼ j-kaʼanoʼ» (Mateo 6:9, 10). Le Reino wa gobierno tsʼaʼan tu kʼab Jesucristooʼ, yaan u xuʼulsik tuláakal le talamiloʼob ku yilaʼal teʼ kʼiinoʼobaʼ. Baʼaleʼ utiaʼal ka úuchuk lelaʼ, táanileʼ kʼaʼabéet u luʼsaʼal u gobierno wíinikoʼob; lelaʼ le ken u beet Cristo ken taalak.

¿Bix kun kʼambil u Reino Dios?

¿Yaan wa u yóotik le gobernanteʼob u tsʼáaubaʼob yáanal u gobernación Cristooʼ? Apóstol Juaneʼ ku yaʼalik baʼax ken u beetoʼob: «Ka túun tin wilaj le nojoch baʼalcheʼoʼ [u gobierno wíinikoʼob] yéetel u [reyiloʼob] yóokʼol kaab yéetel u baʼateʼel máakoʼobeʼ, tsʼoʼok u muchʼkubaʼob j-baʼateʼel utiaʼal u beetikoʼob loob tiʼ [Jesús,] le máax natʼmail le tsíiminoʼ yéetel u baʼateʼel máakoʼob» (Apocalipsis 19:19). ¿Baʼax kun úuchul tiʼ «u [reyiloʼob] yóokʼol kaab»? Le Bibliaoʼ ku yaʼalikeʼ, le Rey yéeyaʼan tumen Jéeobaoʼ letiʼ bíin xiixkúuntoʼob «jeʼel bix u kuumiloʼob kʼateʼ» (Salmo 2:9). Jach beyoʼ, u Reino Dioseʼ yaan «u xuʼulsik jumpuliʼ tuláakal» u gobierno wíinikoʼob, letiʼ túuneʼ «bíin pʼáatak u tiaʼal minaʼan u xuul» (Daniel 2:44).

¿Baʼax kun úuchul tiʼ le máaxoʼob ken u tsʼáaubaʼob tu contra u Reino Diosoʼ? Le Bibliaoʼ ku yaʼalikeʼ «le kʼiin ken chíikpajak Yuumtsil Jesús teʼ [kaʼan] yéetel u muʼukʼaʼan  [angeloʼob] ichil u tóochʼbal [kʼáakʼeʼ]», yaan u «[castigartik] le máaxoʼob maʼ tu kʼaj óoltikoʼob Jajal Diosoʼ [yéetel] mix tu yuʼubikoʼob u maʼalob péektsil k-Yuumtsil Jesucristo[oʼ]» (2 Tesalonicailoʼob 1:7, 8). Proverbios 2:22 ku yaʼalik xan: «Le loolob máakoʼob yéetel le j-kaʼapʼéel ichoʼoboʼ bíin jóokʼesaʼakoʼob, bíin tojolchʼintaʼakoʼob xan tiʼ» le Luʼumaʼ.

Le Bibliaoʼ ku yaʼalik yoʼolal u taalbal Cristo: «¡Ileʼex, táan u taal Cristo ichil le múuyaloʼoboʼ! Yaan u yilaʼal tumen tuláakal máakoʼob» (Apocalipsis 1:7). U jaajileʼ, mix máak kun páajtal u yilik Cristo, tumen desde ka suunaj teʼ kaʼanoʼ letiʼeʼ utúul espíritu «kuxaʼan tiʼ sáasil tuʼux mix máak ku páajtal u natsʼikubaiʼ. Mix juntúul máak ilmail mix ku páajtal u yilik» (1 Timoteo 6:16).

Jesuseʼ maʼ tsa ka u sutuba wíinikil tu kaʼatéen utiaʼal ka ilaʼak tumen tuláakal máakiʼ, jeʼex Jéeoba maʼ kʼaʼabéetchaj xan u sutkuba wíinikil le ka tu taasaj le diez noj yajiloʼob tu yóokʼol le egipcioʼob tu kʼiiniloʼob Moisesoʼ. Teʼ kʼiinoʼob jeʼeloʼ, kex maʼ ilaʼab Jéeobaeʼ, mix máak tukult wa maʼ letiʼ beet u taal le noj yajiloʼoboʼ (Éxodo 12:31). Bey túun xanoʼ ken kʼuchuk u kʼiinil u xuʼulsaʼal tiʼ le j-kʼasaʼan máakoʼob tumen Cristooʼ, letiʼobeʼ yaan u «yilkoʼob», wa yaan u kʼuchul u jach naʼatoʼobeʼ, Jesuseʼ letiʼe juez yéeyaʼan tumen Diosoʼ, lelaʼ bey kun úuchloʼ tumen desde bejlaʼeʼ táan u tsʼaʼabal u yojéeltoʼob. Bey túunoʼ, Jesuseʼ «yaan u yilaʼal tumen tuláakal máakoʼob, [...] tuláakal u kajnáaliloʼob yóokʼol kaabeʼ bíin okʼolnakoʼob tu yoʼolal letiʼ» (Apocalipsis 1:7).

Utiaʼal ka kaʼa yanak jeetsʼelil yéetel kiʼimak óolal teʼ Luʼumaʼ, táanileʼ kʼaʼabéet u xuʼulsaʼal tiʼ le kʼasaʼan máakoʼoboʼ bey xan tiʼ u gobernacionoʼob. Lelaʼ Cristo kun beetik, ken tsʼoʼokokeʼ yaan u káajal u reinar yóokʼol le Luʼumaʼ. Ken káajak túun u reinareʼ yaan u taasik yaʼab utsil tiʼ tuláakal máak.

Le utsiloʼob ken u taas u Reino Cristooʼ

Utéenjeakeʼ, apóstol Pedroeʼ tʼaanaj tiʼ le kʼiin ken «tsoʼolok tuláakal baʼal tumen Jajal Dios, jeʼel bix tu yaʼaljilak tu chiʼ u kiliʼich [profetaʼob] kuxlajoʼob tiʼ le úuchben kʼiinoʼoboʼ» (Beetaʼanoʼob [Hechos] 3:21). Ichil lelaʼ tiaʼan xan u jatsʼutskíintaʼal le Luʼum yáanal u gobernación Cristooʼ. Utúul tiʼ le profetaʼob tʼaanajoʼob tiʼ le kʼiin ken kaʼa «tsoʼolok tuláakal baʼal» tumen Diosoʼ, Isaías. Letiʼeʼ kuxlaj teʼ siglo ocho táanil tiʼ u síijil Cristooʼ. Isaíaseʼ tu yaʼaleʼ Jesucristo, le u Principei jeetsʼeliloʼ, yaan u kaʼa beetik u yantal jeetsʼelil way Luʼumeʼ. Ka tʼaanaj xan tiʼ u gobierno Cristoeʼ, tu yaʼalaj: «U páajtalil u [reinoeʼ], bíin kʼiʼitpajak tuláakal tuʼux maʼ xan bíin xuʼuluk u [jeetsʼeliliʼ]» (Isaías 9:6, 7). Jeʼex túun k-ilkoʼ, Jesuseʼ yaan u kaʼansik le máaxoʼob ku gobernartik utiaʼal ka «kuxlakoʼob ichil nojoch jeetsʼel óolal» (Salmo 37:11).

¿Yaan wa u yilaʼal óotsilil yéetel u muʼyajtaʼal wiʼijil yáanal u Reino Cristo? Isaíaseʼ tu yaʼalaj: «Yuumtsil u yuumil tuláakal páajtalileʼ táan u nuʼukbesik utiaʼal tuláakal múuchʼ kaajoʼob jumpʼéel kiʼikiʼ noj janal yéetel paj ukʼuloʼob, bey xan kiʼikiʼ janaloʼob yéetel u [maas] maʼalobil vinoʼob» (Isaías 25:6). Le salmista xanoʼ tu kʼayaj: «¡Ka yanak yaʼabkach baʼal jantbil teʼ j-kaajoʼoboʼ; ka yaʼabak xan tu kaʼanalil le puʼukoʼoboʼ!» (Salmo 72:16). Tsʼoʼoleʼ Jéeobaeʼ ku yaʼalik xaneʼ teʼ kʼiin jeʼeloʼ, «máaxoʼob ku beetikoʼob u yotochoʼobeʼ bin kajlakoʼob ichiloʼob, máaxoʼob pakʼik uvaʼobeʼ bíin u jaantoʼob u yich. Maʼ bíin kajlak yaanal máak tiʼ le naj ku beetaʼal tumen uláakʼ máakiʼ, wa ka jaantaʼak u yich u pakʼal uva tumen u yaanal. In kaajaleʼ bíin chowakchajak u kuxtal jeʼel bix u kuxtal junkúul cheʼeʼ; le máaxoʼob in yéeymajoʼobeʼ bíin u jaantoʼob u yich u meyajoʼob» (Isaías 65:21, 22).

Isaíaseʼ tu yaʼalaj xan yaan u luʼsaʼal le kʼojaʼaniloʼob yéetel le kíimiloʼ. Letiʼe tu tsʼíibtaj baʼax ku yaʼalik Dios ken u beete: «Le chʼóopoʼob túunoʼ bíin paakatnakoʼob, le kóokoʼoboʼ bíin uʼuyajnakoʼob; le móochoʼoboʼ bíin síitʼnakoʼob bey kéejoʼobeʼ le tootoʼob xanoʼ, bíin awatnakoʼob» (Isaías 35:5, 6). Teʼ kʼiin jeʼeloʼ, «mix juntúul kajnáal bíin u yaʼal: Kʼojaʼanen» (Isaías 33:24). Dioseʼ «bíin u xuʼuls jumpuliʼ le kíimiloʼ,  bíin u choʼo u jaʼil u yich tuláakal máak» (Isaías 25:8).

¿Baʼax túun kun úuchul tiʼ tuláakal le kimenoʼoboʼ? (Juan 5:28, 29.) Isaíaseʼ ku yaʼalik: «Baʼaleʼ a kimenoʼobeʼ, bíin kaʼa kuxlakoʼob» (Isaías 26:19). Jeʼex túun k-ilkoʼ, tuláakal le kimenoʼoboʼ yaan u kaʼa kuxkíintaʼaloʼob.

«A tronoeʼ, Jajal Dios»

Le u taalbal Cristo ku yaʼalik le Bibliaoʼ yaan u béeykuntik u kaʼa sutaʼal paraísoi le Luʼumaʼ; Ken úuchuk lelaʼ tuláakal máak kun adorartik Jéeoba, le u jaajil Diosoʼ. ¿Baʼaxten k-ojel Jesucristoeʼ jach jeʼel u páajtal u luʼsik tuláakal le baʼaloʼob kʼaastak ku beetaʼaloʼ?

Koʼox ilik máax tsʼáa le páajtalil tiʼ Cristooʼ. Le Bibliaoʼ ku yaʼalik yoʼolal Jesús: «A tronoeʼ, Jajal Dios, utiaʼal kʼiinoʼob minaʼan u xuul; a jalaʼachileʼ jumpʼéel jalaʼachil toj; tsʼoʼok a yaabiltik le baʼax tojoʼ yéetel tsʼoʼok a pʼektik le baʼax kʼaasoʼ» (Hebreos 1:8, 9, Le Tumben Nuptʼan). U trono Jesús wa le páajtalil yantiʼoʼ Jéeoba tsʼaamil tiʼ. Le oʼolal Jesuseʼ yaan u páajtal u yutskíintik tuláakal le talamiloʼoboʼ.

Ka tsʼoʼok u kaʼa kuxkíintaʼaleʼ, Jesuseʼ tu yaʼalaj tiʼ u apostoloʼob: «Tiʼ teen tsʼaʼan tuláakal páajtalil [teʼ] kaʼan yéetel [teʼ] luʼum[oʼ]» (Mateo 28:18). Apóstol Pedro xaneʼ tu yaʼalaj yoʼolal Jesús: «Yáanal u kʼabeʼ tiʼ yaan xan le angeloʼoboʼ, le jalaʼachoʼoboʼ yéetel le páajtaliloʼoboʼ» (1 Pedro 3:22). Jesuseʼ yaan u láaj xuʼulsik tiʼ jeʼel máaxak ka líikʼik tu contraeʼ. Mix baʼal jeʼel u páajtal u beetik maʼ u taasik Jesucristo le utsiloʼob yóokʼol tuláakal máakoʼ.

Bix u yáantik máak u yojéeltik baʼaxoʼob kun béeytal ken taalak Cristo

Apóstol Pabloeʼ tu tsʼíibtaj tiʼ le tesalonicailoʼoboʼ: «K-kʼaʼajsik tu táan Jajal Dios yéetel tu táan k-Taataeʼ yéetel bukaʼaj oksaj óolal meyajnajikeʼex, yéetel bukaʼaj yaakunaj táan óolnajikeʼex, yéetel bix pʼaatlil jach jeetsʼel a alab óolaleʼex tiʼ k-Yuumtsil Jesucristo» (1 Tesalonicailoʼob 1:3). Yéetel le tʼaanoʼobaʼ Pabloeʼ ku yeʼesikeʼ u chúukpajal u yóol máak u páaʼt u taal Jesucristoeʼ yaan baʼax yil yéetel u jach tsʼáaik u yóol u meyajt Dios. Wa k-creertik jach tu jaajil yaan u taal Cristo yéetel yaan u luʼsik tuláakal le talamiloʼoboʼ, yaan u tsʼáaiktoʼon u muukʼil utiaʼal ka chúukpajak k-óol aktáantoʼob.

Tuukulnakoʼon tiʼ Carlos, utúul sukuʼun kajaʼan São Paulo (Brasil). Letiʼeʼ tu mesil agosto tiʼ 2003 ka tu yojéeltaj yaan cáncer tiʼ. Tak bejlaʼeʼ tsʼoʼok ocho utéenel u operartaʼal, lelaʼ tsʼoʼok u jach beetik u muʼyaj yéetel u debiltal. Kex beyoʼ, jach ku líiʼsik u yóol u maasil. Utéenjeak táan u kʼaʼaytaj aktáan tiʼ upʼéel hospitaleʼ, tu yilaj utúul kiik u taasmaj u yíicham utiaʼal ka tsʼaʼabak tiʼ upʼéel tratamiento ku kʼaabaʼtik quimioterapia. Carloseʼ u yojel baʼaxoʼob ku muʼyajtik utúul máak yaan cáncer tiʼ, le oʼolal páajchaj u líiʼsik u yóol le kiik yéetel u yíichamoʼ. Ka máan kʼiineʼ, le kiik yéetel u yíichamoʼ tu yaʼaloʼob jach líiʼsaʼab u yóoloʼob tumen le baʼax aʼalaʼabtiʼoboʼ. Carlos túuneʼ tu yilaj jach jaaj le baʼax ku yaʼalik apóstol Pabloaʼ: «Jajal Dioseʼ ku kiʼimakkúuntik k-óol tiʼ tuláakal k-mukʼyajoʼob, utiaʼal ka páatak k-kiʼimakkúuntik u yóol le máaxoʼob ku mukʼyajoʼoboʼ, ikil k-tsʼáaik tiʼob le kiʼimak óolal u tsʼaamaj toʼon Jajal Diosoʼ» (2 Corintoiloʼob 1:4).

Kex kʼojaʼan Carloseʼ, ¿baʼax áantik utiaʼal maʼ u xuʼulul u líiʼsik u yóol u maasil? Letiʼ u páaʼtik yéetel chúukaʼan óolal u taal Cristooʼ bey xan le baʼaxoʼob ken u béeykuntoʼ, lelaʼ le áantik utiaʼal maʼ u «kaʼanal [u] beet uts» tiʼ u maasil (Galaciailoʼob 6:9).

Tuukulnakoʼon xan tiʼ Samuel, u yíitsʼineʼ tiʼ kíimsaʼab kex 50 metros tiʼ u yotochoʼobeʼ, diez upuulul tsʼoʼontsʼonaʼabi. Le táan u yilaʼal tumen le policíaʼob máax kíimsoʼ, ocho oraʼob pʼataʼab pektal u wíinklil teʼ tuʼux kíimsaʼaboʼ. Samueleʼ jach mix bikʼin kun tuʼubul tiʼ le baʼax úuch teʼ kʼiin jeʼeloʼ. Baʼaleʼ baʼax líiʼsik u yóoleʼ letiʼe u kʼaʼajsik Jesucristoeʼ yaan u luʼsik tuláakal le baʼaloʼob kʼaastakoʼ, yéetel u gobiernoeʼ yaan u taasik yaʼab utsiloʼob tiʼ tuláakal  máak. Samueleʼ jach ku tsʼíiboltik u kʼuchul u kʼiinil u méekʼik u yíitsʼin ken kaʼa kuxkíintaʼak teʼ Luʼum sutaʼan paraísoiloʼ (Beetaʼanoʼob 24:15).

¿Baʼax unaj a beetik?

Wa ka páaʼtik yéetel chúukaʼan óolal u taalbal Cristo bey xan le baʼaxoʼob ken u béeykuntoʼ, jach yaan u líikʼil a wóol. Jesucristoeʼ yaan u luʼsik tuláakal le baʼaxoʼob beetik u muʼyaj máakoʼ.

¿Baʼax unaj a beetik utiaʼal a kʼamik le utsiloʼob ken u taas u reino Cristooʼ? Unaj a jóoʼsik u súutukil utiaʼal a xokik le Bibliaoʼ. Jesuseʼ tu yaʼalaj tiʼ u Taata: «Le kuxtal minaʼan u xuuloʼ letiʼ lelaʼ: ka u kʼaj óoltoʼob teech chéen juntúuliliʼ Jajal Dios, yéetel ka u kʼaj óoltoʼob Jesucristo le máax ta túuxtajoʼ» (Juan 17:3). Chʼaʼatukult a kanik baʼaxoʼob ku kaʼansik le Bibliaoʼ. U j-jaajkunajoʼob Jéeoba ku kʼaʼaytajoʼob teʼ tuʼux kajaʼanechoʼ jeʼel u yáantkechoʼob a beeteʼ. Utiaʼal lelaʼ tʼaanen yéeteloʼob wa túuxt upʼéel carta tiʼ le máaxoʼob jóoʼsik le revistaaʼ.

[U tsolajil le oochel teʼ táan juʼun 7]

Le ku chíikpajal teʼ cuadrooʼ: Rhino and Lion Park (Gauteng, Sudáfrica)

[U tsolajil le oochel teʼ táan juʼun 7]

Le u taalbal Cristo yaan u béeykuntik u kaʼa sutaʼal paraísoi le Luʼumaʼ