Bix jeʼel k-tsʼáaikba tu contra le kʼasaʼan angeloʼoboʼ
Bix jeʼel k-tsʼáaikba tu contra le kʼasaʼan angeloʼoboʼ
«Le angeloʼob maʼ j-pʼáatoʼob tu kúuchiloʼoboʼ baʼaleʼ tu pʼatajoʼob u kajtaliloʼoboʼ, Jajal Dioseʼ u kʼalmajoʼob utiaʼal u nojoch kʼiinil le pʼis óoloʼ, kʼaxaʼanoʼob mantatsʼ ich éekʼjochʼeʼenil.» (JUDAS 6.)
1, 2. ¿Baʼax kʼáatchiʼiloʼob ku beetaʼal yoʼolal Satanás yéetel yoʼolal le kʼasaʼan angeloʼoboʼ?
LE APÓSTOL Pedrooʼ ku yaʼaliktoʼon: «Ilawileʼex maʼalob baʼax ka beetikeʼex yéetel pʼil ichneneʼex; tumen a enemigoʼex le kʼaasilbaʼaloʼ, táan u máan jeʼel bix león ku yáakameʼ, táan u kaxantik máax u lukʼe» (1 Pedro 5:8). Yoʼolal xan le kʼasaʼan angeloʼoboʼ, le apóstol Pablooʼ ku yaʼalik: «Maʼ in kʼáat ka yanak baʼal a wileʼex yéetel le kʼaakʼas pixanoʼoboʼ [wa kʼasaʼan angeloʼoboʼ]. Maʼ tu páajtal a wukʼikeʼex u yukʼul Yuumtsil, wa ka wukʼikeʼex u yukʼul le kʼaakʼas pixanoʼoboʼ. Mix ku páajtal a janaleʼex tu [mesa] Yuumtsil, wa ka janaleʼex tu [mesa] le kʼaakʼas pixanoʼoboʼ» (1 Corintoiloʼob 10:20, 21).
2 Baʼaleʼ ¿máax Satanás yéetel máaxoʼob le kʼasaʼan angeloʼoboʼ? ¿Baʼax kʼiin yéetel bix úuchik u yantaloʼob? ¿Dios wa beetoʼob? ¿Bukaʼaj páajtalil yantiʼob yóokʼol le wíinikoʼoboʼ? ¿Yaan wa bix jeʼel u páajtal k-kanáantikba tiʼobeʼ?
¿Bix úuchik u yantal Satanás yéetel le kʼasaʼan angeloʼoboʼ?
3. Utúul angeleʼ, ¿bix úuchik u beetikuba Diablo yéetel Satanás?
3 Tu káajbal wíinik tu jardinil Edeneʼ, utúul angeleʼ tu tsʼáajuba tu contra Dios. ¿Baʼaxten tu beetaj? Tumen maʼ kiʼimak u yóol kaʼach yéetel le meyajt tsʼaʼan u beet tumen Dios teʼ kaʼanoʼ. Le ka beetaʼab Adán yéetel Evaeʼ, le kʼasaʼan angelaʼ tu yilaj bix jeʼel u beetik u xuʼulul u adorartaʼal Dios utiaʼal ka adorartaʼak letiʼ tumen le máakoʼobaʼ. Le ka tu tsʼáajuba tu contra Dios yéetel le ka tu beetaj u kʼebantal Adán yéetel Evaeʼ, le angelaʼ tu beetuba Diablo yéetel Satanás. Tsʼoʼoleʼ, uláakʼ angeloʼobeʼ tu nupubaʼob xan tu yéetel. ¿Bix úuchik leloʼ? (Génesis 3:1-6; Romailoʼob 5:12; Apocalipsis 12:9.)
4. ¿Baʼax tu beetaj jujuntúul angeloʼob táanil tiʼ u taal le Búulkabaloʼ?
4 Le Bibliaoʼ ku yaʼalikeʼ, táanil tiʼ u taal le Búulkabaloʼ jujuntúul angeloʼobeʼ joʼopʼ u yutstal tu yichoʼob le koʼoleloʼoboʼ, baʼaleʼ le baʼax tu beetoʼobaʼ maʼ maʼalobiʼ. Le «u paalal [Diosaʼ] tu yilajoʼob kiʼichpamtak le x-koʼoleloʼobaʼ. Ka túun tu yéeyajoʼob utiaʼal u tsʼoʼokol u beeloʼob, x-yéetel [le jaytúul] tu yóoltajoʼobeʼ». Le angeloʼobaʼ jach maʼ maʼalob le baʼax tu beetoʼobaʼ tumen maʼ beetaʼanoʼob utiaʼal u tsʼoʼokol u beeloʼobiʼ, tsʼoʼoleʼ ka yanchaj u paalaloʼobeʼ jach kaʼanchaj u baakeloʼob yéetel kʼuch kʼaj óolbiloʼob bey nefilim (Génesis 6:2-4). Yéetel le baʼax tu beetoʼobaʼ, le angeloʼobaʼ tu tsʼáajubaʼob tu tséel Satanás yéetel binoʼob tu contra Jéeoba.
5. ¿Baʼax úuch tiʼ le kʼasaʼan angeloʼob le ka tu taasaj Jéeoba le Búulkabaloʼ?
5 Le nefilimoʼob yéetel u maamaʼoboʼ kíimoʼob teʼ Búulkabal tu taasaj Jéeobaoʼ. Le kʼasaʼan angeloʼob túunoʼ tu pʼatoʼob le wíinklil yantiʼoboʼ ka suunajoʼob teʼ kaʼanoʼ. Baʼaleʼ maʼ kʼaʼamoʼob tumen Diosiʼ. Baʼaxeʼ, tsʼaʼaboʼob «ich éekʼjochʼeʼenil» wa náachkuntaʼaboʼob tiʼ le sáasilil ku taal tiʼ Diosoʼ; yéetel le éekʼjochʼeʼenil tuʼux yanoʼobaʼ teʼ Bibliaoʼ ku kʼaabaʼintaʼal metnal wa Tártaro (Judas 6; 2 Pedro 2:4).
6. Le kʼasaʼan angeloʼoboʼ, ¿bix u tuskoʼob máak?
6 Le ka tu pʼatoʼob le kúuchil tsʼaʼantiʼob tumen Dios teʼ kaʼanoʼ, le angeloʼobaʼ tu beetubaʼob u kʼasaʼan angeloʼob Satanás yéetel joʼopʼ u yáantkoʼob xan utiaʼal u beetik le baʼax kʼaasoʼ. Le ka tu beetoʼob lelaʼ luʼsaʼabtiʼob u páajtalil u sutkubaʼob bey wíinikoʼobeʼ. Kex beyoʼ, letiʼobeʼ jeʼel u páajtal u túulchʼinkoʼob xiiboʼob yéetel koʼoleloʼob utiaʼal u beetkoʼob baʼaloʼob sen kʼaastak yéetel subtsiltak. Tsʼoʼoleʼ ku tuskoʼob xan máak yéetel baʼaloʼob jeʼex meenil wa espiritismo (Deuteronomio 18:10-13; 2 Crónicas 33:6). Jeʼex Satanaseʼ le kʼasaʼan angeloʼobaʼ yaan xan u xuʼulsaʼaloʼob utiaʼal mix bikʼin (Mateo 25:41; Apocalipsis 20:10). Baʼaleʼ, le maʼ kʼuchuk u kʼiinil u xuʼulsaʼaltiʼobeʼ unaj k-tsʼáaikba tu contraʼob. Le oʼolal maʼalob ka k-ojéelt bukaʼaj páajtalil yaan tiʼ Satanás yéetel baʼax unaj k-beetik utiaʼal k-kanáantikba tiʼ letiʼ bey xan tiʼ u kʼasaʼan angeloʼob.
¿Bukaʼaj páajtalil yaan tiʼ Satanás?
7. Satanaseʼ, ¿bukaʼaj páajtalil yaan tiʼ yóokʼol le wíinikoʼoboʼ?
7 Desde tu káajbal wíinikeʼ, Satanaseʼ yaʼab baʼaloʼob maʼ jaajtak tsʼoʼok u yaʼalik tu contra Jéeobaiʼ (Proverbios 27:11). Tsʼoʼoleʼ, tsʼoʼok xan u tusik yaʼab wíinikoʼob. Lelaʼ bey u yeʼesik 1 Juan 5:19 tuʼux ku yaʼalik, «yóokʼol kaabeʼ tiʼ yaan yáanal u páajtalil kʼaasibaʼaleʼ». Le oʼolal Satanaseʼ páajchaj u yaʼalik tiʼ Jesús wa ku adorartaʼal tumen letiʼeʼ jeʼel u tsʼáaik tiʼ «tuláakal u kaajiloʼob yóokʼol kaab» utiaʼal ka u gobernarte (Lucas 4:5-7). Le ka tʼaanaj yoʼolal Satanaseʼ, Pabloeʼ tu yaʼalaj: «Baʼaleʼ wa taʼakaʼan le maʼalob péektsil k-tseʼektikoʼ, taʼakaʼan chéen utiaʼaloʼob le máaxoʼob ku saʼataloʼoboʼ. Tumen tu yoʼolal maʼ táan u yoksaj óoloʼobeʼ, u [diosil] le yóokʼol kaabaʼ tu éekʼjochʼeʼenkunsaj u naʼatoʼob utiaʼal maʼ u sáasjomeʼentaʼal tiʼob u sáasilil u maʼalob péektsil Cristo máax kiʼichkelem, máax xan u chíikbesajil Jajal Dios» (2 Corintoiloʼob 4:3, 4). Satanaseʼ «juntúul j-tuus yéetel u taata le tuusoʼ», baʼaleʼ ku yeʼesikuba «bey jumpʼéel u ángel sáasilileʼ» (Juan 8:44; 2 Corintoiloʼob 11:14). Yaan u páajtalil tiʼ yéetel u yojel bix jeʼel u éekʼjochʼeʼenkúunsik u tuukul u gobernanteiloʼob le yóokʼol kaabaʼ yéetel máaxoʼob yanoʼob yáanal u páajtaliloʼoboʼ. Tsʼoʼok xan u tusik wíinikoʼob yéetel le baʼaxoʼob maʼ jaajtak ku kaʼansik le religionoʼoboʼ.
8. ¿Baʼax ku yaʼalik le Biblia yoʼolal le páajtalil yaan tiʼ Satanás yóokʼol le wíinikoʼoboʼ?
8 Le páajtalil yaan tiʼ Satanasoʼ, chíikpaj tu kʼiiniloʼob profeta Daniel. Le ka tu túuxtaj Jéeoba utúul ángel utiaʼal ka u líiʼs u yóol Danieleʼ, «u jalaʼach ángel, u [reyil] Persia tu kʼataj» u beel le ángel túuxtaʼab tumen Diosoʼ. Le angelaʼ veintiún kʼiinoʼob kʼataʼan u beel, tak ka taal áantbil tumen «Miguel juntúul jalaʼach ichil le angeloʼoboʼ». Le tekstooʼ ku tʼaan xan yoʼolal «u ángel u jalaʼachil Grecia» (Daniel 10:12, 13, 20). Yéetel Apocalipsis 13:1, 2 ku yaʼalik Satanaseʼ letiʼ «le kaan» ku tsʼáaik «u muukʼ yéetel u jalaʼach kʼáancheʼ tiʼ» le nojoch baʼalcheʼ wa tuláakal le gobiernoʼoboʼ.
9. ¿Tu contra máaxoʼob ku baʼateʼel le cristianoʼoboʼ?
9 Le oʼolal Pabloeʼ tu yaʼalaj «maʼ táan k-baʼateʼel tu contra máakoʼobiʼ, baʼaleʼ tu contra u muukʼ kʼaakʼas pixanoʼob yanoʼob tiʼ le kaʼanilbeʼen kúuchiloʼoboʼ [...], máaxoʼob ku tusbeeloʼob, jalaʼachoʼob yéetel yaan páajtalil tiʼob tu yóokʼol le éekʼjochʼeʼen yóokʼol kaabaʼ» (Efesoiloʼob 6:12). Tsʼoʼoleʼ tak bejlaʼeʼ, u kʼasaʼan angeloʼob Satanaseʼ kex maʼ tu yilaʼaloʼobeʼ ku túulchʼinkoʼob le gobiernoʼob yéetel tuláakal u máakiloʼob le yóokʼol kaab utiaʼal u beetkoʼob baʼaloʼob jach kʼaastak, jeʼex ka u kíimsoʼob yaʼab máakoʼob yaanal u razaʼob yéetel ka kíimsaʼak yaʼab máakoʼob tumen le terroristaʼoboʼ. Baʼaleʼ, koʼox ilik bix jeʼel u páajtal k-tsʼáaikba tu contra le kʼasaʼan angeloʼobaʼ.
Bix jeʼel k-kanáantikbaeʼ
10, 11. ¿Bix jeʼel u páajtal k-tsʼáaikba tu contra Satanás yéetel u kʼasaʼan angeloʼoboʼ?
10 Maʼ tu páajtal k-tsʼáaikba tu contra Satanás yéetel u kʼasaʼan angeloʼob chéen yéetel k-muukʼ wa yéetel le naʼat yantoʼonoʼ. Pabloeʼ ku yaʼaliktoʼon: «Muʼukʼaʼankunsabaʼex tiʼ Yuumtsil tu yoʼolal u muʼukʼaʼanil páajtalil». U jaajileʼ, kʼaʼabéet kanáantaʼal tumen Jéeoba. Le apostoloʼ ku seguer u yaʼalik: «Búukinteʼex tuláakal le u nuʼukulil baʼateʼel ku tsʼáaikteʼex Jajal Diosoʼ, utiaʼal ka páatak a jéetsʼel pʼáataleʼex tu contra u táabsajiloʼob kʼaasilbaʼal. [...] Chʼaʼex tuláakal le u nuʼukulil baʼateʼel ku tsʼáaikteʼex Jajal Diosoʼ, utiaʼal ka páatak a xachikabaʼex tiʼ le kʼaakʼas kʼiinoʼ, yéetel ku tsʼoʼokol a xachikabaʼexeʼ, ka páatak a jéetsʼel pʼáataleʼex» (Efesoiloʼob 6:10, 11, 13).
11 Pabloeʼ u kaʼatéen u yaʼalik tiʼ u yéet cristianoiloʼob ka u tsʼaʼob «tuláakal le u nuʼukulil baʼateʼel ku [tsʼáaik] Jajal Diosoʼ». Le tʼaan «tuláakal» ku tsʼáaik naʼatbil kʼaʼabéet jach k-tsʼáaik óol utiaʼal maʼ u beetkoʼobtoʼon loob le kʼasaʼan angeloʼoboʼ. Le oʼolal, le máaxoʼob meyajtik Diosoʼ kʼaʼabéet u búukintkoʼob tu séebaʼanil cada upʼéel tiʼ le u nuʼukuliloʼob baʼateʼel ku tsʼáaik Diosoʼ. ¿Máakalmáak leloʼobaʼ?
¿Bix jeʼel k-jéetsʼel pʼáatleʼ?
12. Le máaxoʼob meyajtik Diosoʼ, ¿bix jeʼel u páajtal u jepʼikubaʼob yéetel u jaajileʼ?
12 Pabloeʼ ku yaʼalik: «Jéetsʼel pʼáateneʼex túun, a kʼaxnakʼtmajeʼex le jaajoʼ bey jumpʼéel kʼaxnakʼeʼ, yéetel kanáantaʼaneʼex tumen le tojoʼ jeʼel bix le u búukil baʼateʼel ku kanáantik u tseem le soldadooʼ» (Efesoiloʼob 6:14). Le kaʼapʼéel nuʼukuliloʼob baʼateʼel ku yaʼalaʼal teʼelaʼ upʼéel kʼaxnakʼ yéetel upʼéel baʼax pixik u tseen le soldadooʼ. Le soldadooʼ unaj kaʼach u jepʼikuba maʼalob yéetel upʼéel kʼaxnakʼ utiaʼal u kanáantik u paach yéetel u chuun u nakʼ. Toʼon xaneʼ unaj k-jepʼikba yéetel le baʼax ku kaʼansik le Biblia utiaʼal ka kuxlakoʼon jeʼex u kʼáat Dioseʼ. ¿K-jóoʼsik wa u súutukil utiaʼal k-xokik le Biblia sáamsamaloʼ? ¿Ku xokaʼal wa xan tumen tuláakal k-familia? ¿Suuk wa k-múul xokik yéetel k-familia le teksto utiaʼal le kʼiinoʼ? Tsʼoʼoleʼ, ¿k-xokik wa le túumben baʼaloʼob ku jóoʼsik «le palitsil chúukpajaʼan u yóol yéetel yaan u naʼat» teʼ libroʼob, revistaʼob yéetel uláakʼ jóoʼsaʼaniloʼoboʼ? (Mateo 24:45.) Wa k-beetikeʼ, k-eʼesik tsʼáaik k-óol beet le tsolnuʼuk tu tsʼáaj Pablooʼ. Yaan xan toʼon videocasetoʼob yéetel DVD ku yeʼeskoʼobtoʼon baʼax ku kaʼansik le Bibliaoʼ. Bey túunoʼ, k-jepʼikba yéetel u jaajileʼ ku yáantkoʼon utiaʼal k-chʼaʼatuklik beetik baʼax maʼalob yéetel utiaʼal k-kanáantik maʼ k-beetik baʼax kʼaas.
13. ¿Bix jeʼel u páajtal k-kanáantik k-puksiʼikʼaleʼ?
13 Le pix tseemoʼ ku kanáantik kaʼach u tseen, u puksiʼikʼal yéetel uláakʼ tuʼuxoʼob jeʼel u beetaʼal loob tiʼ le soldadooʼ. Le cristiano xanoʼ wa ku kanik u yaabilt le baʼax toj yéetel ku beetik le baʼax ku kʼáatik Jéeobaoʼ, yaan u kanáantik u puksiʼikʼal wa le baʼax péeksik u beet wa baʼaxoʼ. Jeʼex upʼéel pix tseemeʼ, wa k-yaabiltik yéetel k-ilik beetik baʼax u kʼáat Dioseʼ maʼ ken k-taas bey mix baʼalil le baʼax ku kaʼansik le Bibliaoʼ. Ken «¡[k-]pʼekteʼex le kʼaasoʼ!» yéetel ken «¡[k-]yaabilteʼex le utsoʼ!», k-kanáantikba «tiʼ tuláakal kʼaakʼas bej» (Amós 5:15; Salmo 119:101).
14. ¿Baʼax u kʼáat u yaʼal u tsʼáaik u «xanab» le cristianoʼob utiaʼal u biskoʼob «tu séeblakil u maʼalob péektsilil jéetsʼel óolal[oʼ]»?
14 Le soldadoʼob romanoʼoboʼ ku tsʼáaikoʼob kaʼach maʼalob xanaboʼob utiaʼal u xíimbalkoʼob yaʼab kilómetros tiʼ u bejiloʼob Roma. ¿Baʼax u kʼáat u yaʼal u tsʼáaik u «xanab» le cristianoʼob «utiaʼal [u] bis[koʼob] tu séeblakil u maʼalob péektsilil jéetsʼel óolal[oʼ]»? (Efesios 6:15, LTN.) U kʼáat u yaʼal u listokíintmubaʼob utiaʼal u kʼaʼaytkoʼob u maʼalob péektsilil le Reino tiʼ jeʼel baʼaxak súutukil ku páajtaleʼ (Romailoʼob 10:13-15). K-táakpajal mantatsʼ teʼ kʼaʼaytajoʼ ku yáantkoʼon utiaʼal k-kanáantikba tiʼ «u táabsajiloʼob» Satanás (Efesoiloʼob 6:11).
15. 1) ¿Baʼax eʼesik kʼaʼabéettoʼon upʼéel nojoch fe jeʼel bix upʼéel nojoch escudoe? 2) ¿Baʼax «tʼabaʼan juluboʼob» jeʼel u beetkoʼob u xuʼulul u yantal k-fe tiʼ Dioseʼ?
15 Pabloeʼ ku seguer u yaʼalik: «Tu yóokʼol tuláakaleʼ yanakteʼex le oksaj óolal [wa fe] bey jeʼel bix jumpʼéel pixibeʼ, utiaʼal ka páatak a tupikeʼex tuláakal u tʼabaʼan juluboʼob kʼasilbaʼal» (Efesoiloʼob 6:16). Le tʼaan «yóokʼol tuláakal» ku meyaj tiʼ Pablo utiaʼal u tʼaan tiʼ le fejoʼ, ku yeʼesikeʼ le fejoʼ upʼéel u nuʼukulil baʼateʼel jach kʼaʼabéet tiʼ máak. K-fejeʼ kʼaʼabéet nojoch. Jeʼex upʼéel nojoch pixib wa escudoeʼ, le fejoʼ ku kanáantkoʼon tiʼ «u tʼabaʼan juluboʼob» Satanás. ¿Baʼax le «juluboʼob[aʼ]»? Maʼ xaaneʼ letiʼe poochʼiloʼob yéetel tuusoʼob ku yaʼalaʼal tumen le máaxoʼob pʼekmailoʼon wa tumen máaxoʼob tsʼoʼok u xúumpʼatkoʼob u jaajil, lelaʼ ku beetkoʼob tumen u kʼáatoʼob ka xuʼuluk u yantal k-fe tiʼ Dios. Ichil le juluboʼobaʼ táakaʼan xan le u chʼíikil máak u kaxt chéen u baʼalubaʼob le yóokʼol kaabaʼ wa tak ka taakak k-kuxtal jeʼex u kuxtal le ayikʼaloʼoboʼ. Maʼ xaaneʼ le máakoʼobaʼ tsʼoʼok u yantaltiʼob upʼéel maas maʼalob yéetel nojoch naj wa camión, wa maʼ xaaneʼ ku tsʼáaikoʼob koʼokoj joyas wa nookʼoʼob jach de moda yanikoʼob. Baʼaleʼ jeʼel baʼaxak ka u beet u maasileʼ, unaj u yantaltoʼon upʼéel jach nojoch fe utiaʼal k-jechik le «tʼabaʼan juluboʼob[aʼ]». ¿Bix jeʼel u páajtal u yantaltoʼon mantatsʼ upʼéel nojoch fejeʼ? (1 Pedro 3:3-5; 1 Juan 2:15-17.)
16. ¿Baʼax ken u yáantoʼon utiaʼal ka yanaktoʼon upʼéel fe muʼukʼaʼan?
16 K-xokik mantatsʼ le Biblia yéetel k-orar yéetel u jaajil k-óoleʼ ku natsʼkoʼon tiʼ Jéeoba. Jeʼel u páajtal k-kʼáatik tiʼ ka u yáantoʼon k-muʼukʼaʼankúuns k-fejeʼ yéetel unaj xan k-ilik kuxtal jeʼex táan k-kʼáatkoʼ. Jeʼex utiaʼal u muchʼtáambalil u xookil U Pʼíich Tulumileʼ, ¿k-líiʼsikba wa tu yéetel táanil tiʼ k-bin teʼ muchʼtáambal utiaʼal beyoʼ k-táakpajal tu xookiloʼ? Wa k-xokik le Biblia yéetel le uláakʼ jóoʼsaʼaniloʼob chʼaʼaban tiʼoʼ, k-fejeʼ yaan u muʼukʼaʼantal (Hebreob 10:38, 39; 11:6).
17. ¿Bix jeʼel u páajtal u yantaltoʼon «le [salvación] bey jeʼel bix jumpʼéel chichich pʼóokeʼ»?
17 Pabloeʼ, utiaʼal u tsʼoʼokbal u tʼaan tiʼ le u búukil baʼateʼel ku tsʼáaik Diosoʼ, tu yaʼalaj: «Yanakteʼex le [salvación] bey jeʼel bix jumpʼéel chichich pʼóokeʼ yéetel chʼaʼex u kiliʼich tʼaan Jajal Dios bey jeʼel bix le máaskab ku tsʼáaikteʼex le Kiliʼich pixanoʼ» (Efesoiloʼob 6:17). Le chichich pʼóokoʼ ku kanáantik kaʼach u pool yéetel u tsʼoʼomel le soldadooʼ. Jeʼex le pʼóok wa cascoaʼ, le maʼalob baʼaloʼob u yaʼalmaj Dios u tsʼáaiktoʼonoʼ ku kanáantik k-tuukul (1 Tesalonicailoʼob 5:8). Maʼ unaj k-chʼíikil tuukul chéen tiʼ u baʼalubaʼob le yóokʼol kaabaʼ, baʼaxeʼ unaj k-tuukul tiʼ le maʼalob baʼaloʼob ken u tsʼáatoʼon Dios, jeʼex tu beetil Jesusoʼ (Hebreob 12:2).
18. ¿Baʼaxten maʼ unaj u jáawal k-xokik sáamsamal le Bibliaoʼ?
18 Tu tsʼookeʼ le baʼax ku kaʼansik le Bibliaoʼ ku kanáantkoʼon tiʼ u táabsajiloʼob Satanás yéetel tiʼ u kʼasaʼan angeloʼob. Le oʼolal maʼ unaj u jáawal k-xokik le Biblia sáamsamaloʼ. K-ojéeltik jach tubeel baʼax ku kaʼansikeʼ yaan u kanáantkoʼon utiaʼal maʼ k-creertik le baʼaloʼob maʼ jaajtak ku kaʼansik Satanás yéetel le kʼasaʼan angeloʼoboʼ, bey xan le baʼaxoʼob ku kaʼansik le máaxoʼob tsʼoʼok u xúumpʼatkoʼob u jaajiloʼ.
Unaj k-orar «mantatsʼ»
19, 20. 1) ¿Baʼax kun úuchul tiʼ Satanás yéetel tiʼ u kʼasaʼan angeloʼob? 2) ¿Baʼax jeʼel u muʼukʼaʼankúunsik k-fejeʼ?
19 Maʼ kun xáantal ken xuʼulsaʼak tiʼ Satanás, tiʼ u kʼasaʼan angeloʼob yéetel tiʼ le kʼasaʼan yóokʼol kaabaʼ. Le Kʼaasilbaʼaloʼ u yojel «chéen jumpʼíit kʼiin pʼaatal tiʼ», le oʼolal jach pʼujaʼan yéetel táan u baʼateʼel tu contra «le máaxoʼob ku tsʼoʼokbesikoʼob u yaʼalmaj tʼaan Jajal Diosoʼ yéetel ku pʼáataloʼob yéetel chúukaʼan óolal tiʼ u jaajkunaj Jesucristo» (Apocalipsis 12:12, 17). Le oʼolal jach kʼaʼabéet k-tsʼáaikba tu contra Satanás yéetel u kʼasaʼan angeloʼob.
20 K-ojéeltik jeʼel u páajtal k-tsʼáaik le búukil ku taal tiʼ Diosoʼ ku taasiktoʼon kiʼimak óolal. Pabloeʼ ku tsʼoʼokol u tʼaan yoʼolal le u búukil baʼateʼel ku taal tiʼ Dios beyaʼ: «Beeteʼex tuláakal lelaʼ yéetel [oración] táan a kʼáat óolaleʼex mantatsʼ tiʼ Jajal Dios tu yoʼolal le Kiliʼich Pixanoʼ. Pʼil ichneneʼex yéetel maʼ u lúubul a wóoleʼex, [orarneneʼex] xan tu yoʼolal tuláakal le máaxoʼob utiaʼaloʼob Jajal Diosoʼ» (Efesoiloʼob 6:18). Le oracionoʼ yaan u muʼukʼaʼankúunsik k-fe yéetel yaan u yáantkoʼon k-kanáantba. Le oʼolaleʼ, unaj k-beetik le baʼax tu yaʼalaj Pablooʼ yéetel maʼ unaj u xuʼulul k-orariʼ, tumen beyoʼ yaan u páajtal k-tsʼáaikba tu contra Satanás yéetel tu contra u kʼasaʼan angeloʼob.
¿Baʼax tsʼoʼok a kanik?
• ¿Bix úuchik u yantal Satanás yéetel le kʼasaʼan angeloʼobo?
• ¿Bukaʼaj páajtalil yaan tiʼ Satanás?
• ¿Bix jeʼel u páajtal k-tsʼáaikba tu contra Satanás yéetel u kʼasaʼan angeloʼoboʼ?
• ¿Bix jeʼel u páajtal k-búukintik le búukil baʼateʼel ku taal tiʼ Diosoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 18]
«U paalal [Dioseʼ] tu yilajoʼob kiʼichpamtak le x-koʼoleloʼobaʼ»
[U tsolajil le oochel teʼ táan juʼun 19]
Le baʼaloʼobaʼ, ¿bix u yáantkoʼonoʼob utiaʼal k-kanáantikba tiʼ Satanás yéetel tiʼ u kʼasaʼan angeloʼob?
[U tsolajil le oochel teʼ táan juʼun 20]
¿A wojel wa máakalmáak cada upʼéel tiʼ le seis nuʼukul yaan tiʼ u búukil baʼateʼel ku taal tiʼ Jéeobaoʼ?