Le angeloʼoboʼ, ¿bix u yáantkoʼob wíinikoʼob?

«Ku tsʼoʼokol lelaʼ, tin wilaj uláakʼ ángel táan u yéemel kaʼan yéetel nojoch páajtalil [...]. J-kʼaʼam tʼaanaj [ka tu yaʼalaj]: Tsʼoʼok u lúubul, tsʼoʼok u lúubul le nojoch Babiloniaoʼ.» (APOCALIPSIS 18:1, 2.)

1, 2. ¿Baʼax eʼesik ku meyaj le angeloʼob tiʼ Jéeoba utiaʼal u béeykuntik le baʼax u tukulmajoʼ?

LE BISAʼAN kʼalbil le apóstol Juan tu islai Patmosoʼ, tsʼaʼab u yil baʼaloʼob kun taal u kʼiinil u yúuchloʼob. Ichil le baʼaloʼob tsʼaʼab u yiloʼ tiaʼan le baʼaxoʼob kun úuchul tu «kʼiinil Yuumtsil[oʼ]». Le kʼiin jeʼelaʼ káaj le ka beetaʼab reyil Jesús teʼ kaʼan tu jaʼabil 1914, yéetel yaan u xáantal tak ken tsʼoʼokok u reinar yoʼolal mil jaʼaboʼob (Apocalipsis 1:10).

² Yaan máax meyajnaj tiʼ Jéeoba utiaʼal u tsʼáaik u yojéelt Juan le baʼax kun úuchloʼ. Apocalipsis 1:1 ku yaʼalik: «Lelaʼ letiʼ le sáasilkunaj tu tsʼáaj Jajal Dios tiʼ Jesucristo utiaʼal ka u tsʼáa u yojéelt tiʼ u palitsiloʼob Jajal Dioseʼ le baʼax bíin úuchuk séebaʼanoʼ. Jesucristoeʼ tu tsʼáaj ojéeltbil le sáasilkunaj ikil tu túuxtilak u ángel tiʼ Juan u palitsil». Jéeobaeʼ tu yaʼalaj tiʼ Jesús ka u túuxt utúul ángel utiaʼal ka u tsʼáa u yojéelt tiʼ Juan le maʼalob baʼaloʼob yaan u yiloʼob yéetel «u kʼiinil Yuumtsil[oʼ]». Ka tsʼoʼokeʼ Juaneʼ tu yilaj xan «uláakʼ ángel táan u yéemel kaʼan yéetel nojoch páajtalil». ¿Baʼax meyaj yaan kaʼach tiʼ le angelaʼ? U libroi Apocalipsiseʼ ku yaʼalikeʼ le angelaʼ «j-kʼaʼam tʼaanaj» ka tu yaʼalaj: «Tsʼoʼok u lúubul, tsʼoʼok u lúubul le nojoch Babiloniaoʼ» (Apocalipsis 18:1, 2). Tiʼ le ángel sen yaan u páajtalilaʼ tsʼaʼab u maʼalob meyajil u yaʼalik tsʼoʼok u lúubul le Nojoch Babilonia wa tuláakal le religionoʼob minaʼan u jaajil tiʼoboʼ. Jeʼex k-ilkoʼ, tiʼ Jéeobaeʼ ku meyaj le angeloʼob utiaʼal u béeykuntik le baʼax u tukulmajoʼ. Baʼaleʼ táanil tiʼ k-ilik bix u meyaj le angeloʼob tiʼ Jéeoba yéetel bix u yáantkoʼob wíinikoʼob bejlaʼeʼ, maʼalob ka k-il bix úuchik u yantaloʼob.

¿Bix úuchik u yantal le angeloʼoboʼ?

3. ¿Baʼax baʼaloʼob maʼ jaajtak ku creertaʼal tumen yaʼab máakoʼob yoʼolal le angeloʼoboʼ?

³ Bejlaʼeʼ u millonesi máakoʼob ku creerkoʼob yaan angeloʼob. Baʼaleʼ, yaʼab máaxoʼobeʼ maʼ u yojloʼob jach tuʼux u taal le angeloʼoboʼ yéetel baʼax meyajil ku beetkoʼob. Yaan máaxoʼobeʼ ku tuklikoʼobeʼ ken kíimik utúul u láakʼtsiloʼobeʼ, ku bisaʼal kaʼan tumen Dios utiaʼal ka suunak utúul tiʼ u angeloʼob. Baʼaleʼ ¿letiʼ wa le baʼax ku kaʼansik le Biblia yoʼolal le angeloʼoboʼ?

4. ¿Baʼax ku yaʼaliktoʼon le Biblia yoʼolal bix úuchik u yantal le angeloʼoboʼ?

⁴ Le ángel maas yaan u muukʼ yéetel u páajtaliloʼ, ku kʼaabaʼintaʼal arcángel Miguel (Judas 9). Le ángel ku yaʼalaʼalaʼ Jesucristo (1 Tesalonicailoʼob 4:16). Úuchileʼ, le ka tu chʼaʼatuklaj Jéeoba u beetik tuláakal baʼaloʼobeʼ, yáax máax tu beeteʼ Jesús (Apocalipsis 3:14). Tsʼoʼoleʼ, le u yáax Hijoaʼ meyajnaj tiʼ utiaʼal u beetik u chuukan angeloʼoboʼ (Colosailoʼob 1:15-17). Le ka tʼaanaj yoʼolal le angeloʼobaʼ, Jéeobaeʼ tu kʼáataj tiʼ Job: «¿Tuʼux yanech le ka tin wetsʼkúuntaj le luʼumoʼ? ¡Wa tumen jaaj sen yaan a ojéelajeʼ, aʼal tiʼ teen! [...] ¿Máax tsʼáa u yáax tuunichil u chuun pakʼil, [le] táan u núup kʼaayoʼob u eekʼiloʼob u píikʼ sáastal yéetel u sen kiʼimak óolal in palitsiloʼob yanoʼob tin kaʼanileʼ?» (Job 38:4, 6, 7). Jeʼex k-ilkoʼ, le angeloʼoboʼ beetaʼaboʼob tumen Dios táanil tiʼ u beetaʼal wíinikoʼob.

5. ¿Baʼax jejeláasil angeloʼob yaan?

⁵ U tsʼíibil juʼun 1 Corintoiloʼob 14:33 ku yaʼalik: «Jajal Dioseʼ u [Diosil] jeetsʼel, maʼ u [Diosil] xaʼakʼaʼan tuukuliʼ». Le oʼolal Jéeobaeʼ u beetmaj jejeláas angeloʼob yéetel u tsʼaamaj  xan u meyajoʼob: 1) serafinoʼob, letiʼobeʼ tiaʼanoʼob tu tséel u trono Dios, ku kʼaʼaytkoʼob u kiliʼichil yéetel ku kanáantkoʼob maʼ u yantal mix baʼal kʼaas ichil u kaajal; 2) querubinoʼob, letiʼob eʼesik chéen Jéeoba unaj u gobernar, yéetel 3) uláakʼ angeloʼob ku beetkoʼob le baʼax ku yaʼalaʼaltiʼob tumen Diosoʼ (Salmo 103:20; Isaías 6:1-3, NM; Ezequiel 10:3-5 NM; Daniel 7:10). ¿Bix u yáantkoʼob wíinik le angeloʼobaʼ? (Apocalipsis 5:11.)

¿Baʼax meyajiloʼob ku tsʼaʼabal tiʼ le angeloʼoboʼ?

6. ¿Baʼax meyajil tu tsʼáaj Dios tiʼ le querubinoʼob teʼ tu jardinil Edenoʼ?

⁶ Le Bibliaoʼ ku yáax tʼaan tiʼ le angeloʼob tu libroi Génesis 3:24, le tekstoaʼ ku yaʼalik: «[Jéeobaeʼ] le ka j-tsʼoʼok u jóoʼsik le máakoʼ, tu tsʼáaj tu lakʼin le u kúuchil paakʼaloʼ u kajnáaliloʼob kaʼan, yaan tak u xiikʼoʼob bey xan jumpʼéel tʼabaʼan máaskab ku sutul suut tiʼ tuláakal u tséeliloʼob utiaʼal maʼ u chaʼik ka náatsʼak mix máak tiʼ u cheʼil le kuxtaloʼ». Le querubinoʼob tiʼ le ku yúuchul tʼaan teʼ tekstoaʼ tu jach kanáantoʼob u jardinil Edén utiaʼal maʼ u kaʼa okol Adán yéetel Evaiʼ. Lelaʼ úuch jach tu káajbal wíinik way Luʼumeʼ. Baʼaleʼ ¿baʼax jejeláasil meeyjiloʼob tsʼoʼok u beetik le angeloʼob desde teʼ kʼiinoʼob jeʼel tak bejlaʼoʼ?

7. Ich ebreo yéetel ich griegoeʼ, ¿baʼax u kʼáat u yaʼal le tʼaan «angeloʼ», yéetel baʼax ku kaʼansiktoʼon yoʼolal le meyaj ku beetik le angeloʼoboʼ?

⁷ Le ka tsʼíibtaʼab le Bibliaoʼ, le angeloʼoboʼ ku chʼaʼachiʼitaʼaloʼob óoliʼ cuatrocientos utéenel. Ich ebreo yéetel ich griegoeʼ, le tʼaan «angeloʼ» u kʼáat u yaʼal «j-bisaj tʼaan». Le angeloʼoboʼ ku meyajoʼob tiʼ Dios utiaʼal u tsʼáaik u yojéelt tiʼ wíinikoʼob le baʼax u kʼáat ka u yojéeltoʼoboʼ. Jeʼex le ka tu túuxtaj utúul ángel utiaʼal u yeʼesik tiʼ Juan baʼaxoʼob ku taal u kʼiinil u yúuchul, jeʼex t-ilaj tu káajbal le xookaʼ.

8, 9. 1) ¿Bix tu yuʼubiluba Manoa yéetel u yatan le ka tsʼoʼok u tʼaanoʼob yéetel le angeloʼ? 2) ¿Baʼax jeʼel u páajtal u kanik le taatatsiloʼob tiʼ le baʼax tu beetaj Manoaoʼ?

⁸ Tiʼ Jéeobaeʼ ku meyaj xan le angeloʼob utiaʼal u yáantik yéetel u líiʼsik u yóol le máaxoʼob meyajtikoʼ. Tu kʼiiniloʼob u juesiloʼob Israeleʼ, Manoa yéetel u yataneʼ u kʼáatoʼob kaʼach ka yanak utúul u hijoʼob, baʼaleʼ u yatneʼ maʼ tu páajtal kaʼach u yantal u chaambal. Jéeoba túuneʼ tu túuxtaj utúul ángel utiaʼal u yaʼalik tiʼ Manoa: «Bin u kaʼaj yantal juntúul a [hijo,] letiʼeʼ maʼ u náajmal u kʼoʼosol u tsoʼotsel u pooliʼ tumen le paaloʼ yaan u jumpáaykuntaʼal bey nazareo utiaʼal [Dios], maʼiliʼ síijikeʼ, letiʼeʼ bíin u káajes u tokik le j-israelitaʼob tiʼ u páajtalil le j-filisteoʼoboʼ» (Jueces 13:1-5).

⁹ U yatan Manoaeʼ anchaj utúul u chaambal tuʼ kʼaabaʼtaj Sansón, utúul máak jach kʼuch kʼaj óoltbil (Jueces 13:24). Táanil tiʼ u síijil Sansoneʼ, Manoaeʼ tu kʼáataj tiʼ Jéeoba ka suunak le ángel utiaʼal ka aʼalaʼak tiʼ bix ken u líiʼsil le paaloʼ. Manoaeʼ tu kʼáataj tiʼ le angeloʼ: «¿Bix bíin k-chʼíijes le paaloʼ? ¿Baʼax bíin k-beet yéetel?». Le ángel túunoʼ tu kaʼa tsolaj tiʼ Manoa le baʼax tsʼoʼok u yáax tsolik tiʼ u yatanoʼ (Jueces 13:6-14). Le baʼax tu yaʼalaj le angeloʼ, jach tu líiʼsaj wal u yóol Manoaeʼ. Bejlaʼeʼ le angeloʼoboʼ maʼatech u tʼaanoʼob yéetel wíinikoʼob, baʼaleʼ, jeʼex Manoaeʼ, le taatatsiloʼoboʼ maʼalob xan ka u kaxtoʼob u yáantaj Jéeoba utiaʼal u líiʼsik u paalaloʼob (Efesoiloʼob 6:4).

10, 11. 1) ¿Baʼax tu beetaj Eliseo le ka tu yilaj le soldadoʼob baʼpachmiloʼoboʼ, baʼaleʼ baʼax tu beetaj le máax áantikoʼ? 2) ¿Baʼax jeʼel k-kanik tiʼ le baʼax úuch teʼ kʼiinoʼob jeʼeloʼoboʼ?

 ¹⁰ Le áantaj ku tsʼáaik le angeloʼoboʼ jeʼel u páajtal k-ilik xan tiʼ le baʼax úuch tu kʼiiniloʼob le profeta Eliseo, le tiaʼan tiʼ upʼéel kaaj israelita ku kʼaabaʼtik Dotán. Upʼéel kʼiineʼ, le máax áantik Eliseooʼ líikʼ tempranoeʼ ka tu yileʼ le kaajoʼ láaj baʼpachtaʼan tumen soldadoʼob yéetel u carroiloʼob baʼateʼel túuxtaʼanoʼob tumen u reyil Siria utiaʼal u machoʼob Eliseo. ¿Baʼax tu beetaj le ka tu yilaj leloʼ? Tu chʼaʼaj saajkileʼ ka awatnaj táan u yaʼalik: «J-kaʼambesaj bejelaʼaʼ túuneʼ, ¿baʼax k-bin j-beeteʼ?». Le máakaʼ ku tuklik kaʼacheʼ mix baʼal ku páajtal u beetkoʼob, baʼaleʼ Eliseoeʼ tu yaʼalaj tiʼ: «Maʼ a chʼaʼik sajakil, tumen [maas] yaʼab le yanoʼob t-éeteloʼ, tiʼ le yanoʼob tu yéeteloʼoboʼ». ¿Baʼax tu yóotaj u yaʼal Eliseo yéetel le tʼaanoʼobaʼ? (2 Reyes 6:11-16.)

¹¹ Eliseoeʼ u yojel kaʼacheʼ táan u kanáantaʼaloʼob tumen le angeloʼoboʼ. Baʼaleʼ, le máax áantikoʼ maʼ tu yilaj le angeloʼoboʼ, le oʼolaleʼ Eliseoeʼ tu kʼáataj tiʼ Dios: «Yuumtsil kin kʼáat óoltik tiʼ teech, ka a sáasilkúunt u yich utiaʼal ka paakatnak». Jéeoba «túuneʼ tu sáasilkuntaj u yich u palitsil» Eliseo, letiʼ túuneʼ «tu yilaj le puʼukoʼoboʼ chuup yéetel j-natʼ tsíiminoʼob bey [xan] yéetel u [carroiloʼob] kʼáakʼ tu bakʼpach Eliseo» (2 Reyes 6:17). Le máax áantik Eliseooʼ páajchaj u yilik le yaʼab angeloʼoboʼ. Teʼ kʼiinoʼob xanaʼ, yoʼolal le naʼat yantoʼon yoʼolal le baʼax tsʼoʼok kanik teʼ Bibliaoʼ, k-ojleʼ le angeloʼob yanoʼob yáanal u páajtalil Jéeoba yéetel Jesucristooʼ ku yáantkoʼob yéetel ku kanáantkoʼob u kaajal Dios.

Le áantaj tu tsʼáaj le angeloʼob tu kʼiiniloʼob Cristooʼ

12. ¿Bix áantaʼabik María tumen le ángel Gabrieloʼ?

¹² Utúul angeleʼ tu yaʼalaj tiʼ María: «Bin a kaʼaj kʼojaʼantal tiʼ [chaambal] yéetel yaan u yantal juntúul a j-xibil paal, Jesús kan a tsʼáa u kʼaabaʼinte». Táanil tiʼ u yaʼalik tiʼ María le tʼaanoʼobaʼ, le ángel Gabriel túuxtaʼab tumen Diosoʼ, tu yaʼalaj tiʼ: «María, maʼ a sajaktal, tumen tsʼoʼok a lúubul utsil tu táan Jajal Dios» (Lucas 1:26, 27, 30, 31). ¡Jach túun líikʼ wal u yóol María le ka aʼalaʼab tiʼ tumen le ángel jach ku lúubul utsil tiʼ Diosoʼ!

13. ¿Bix úuchik u yáantaʼal Jesús tumen le angeloʼoboʼ?

¹³ Uláakʼ baʼax eʼesik bix le áantaj ku tsʼáaik le angeloʼoboʼ, letiʼe baʼax úuch le ka óotaʼab táabsbil Jesús tumen Satanás teʼ desiertooʼ. Le Bibliaoʼ ku yaʼalikeʼ le ka pʼataʼab Jesús tumen le Kʼaasilbaʼaloʼ «le angeloʼob[oʼ] taaloʼob ka tu meyajtoʼob» Jesús (Mateo 4:1-11, LTN). Bey xan áantaʼabik Jesús le áakʼab táanil tiʼ u kíimsaʼaloʼ. Letiʼeʼ jach yaachaj u yóol yoʼolal baʼax kun úuchul, le oʼolal xolajeʼ ka orarnaj tiʼ Dios táan u yaʼalik: «In yuum, wa a kʼáateʼ token tiʼ le mukʼyajaʼ, baʼaleʼ maʼ u beetaʼal le baʼax in kʼáat teneʼ, baʼaleʼ le baʼax a kʼáat techeʼ». Ku tsʼoʼokol u orareʼ «j-chíikpaj juntúul u ángel kaʼan utiaʼal tsʼáaik muukʼ tiʼ» (Lucas 22:42, 43). Baʼaleʼ ¿bix k-áantaʼal tumen le angeloʼob teʼ kʼiinoʼobaʼ?

Le áantaj ku tsʼáaik le angeloʼob teʼ kʼiinoʼobaʼ

14. Teʼ kʼiinoʼobaʼ, ¿baʼax talmiloʼob tsʼoʼok u aktáantik u j-jaajkunajoʼob Jéeoba, yéetel bix tsʼoʼok u bintiʼob?

¹⁴ Ken tuukulnakoʼon tiʼ le kʼaʼaytaj tsʼoʼok u beetik u j-jaajkunajoʼob Jéeoba teʼ kʼiinoʼobaʼ, ¿máasaʼ k-tsʼáaik cuenta táan u yáantaʼaloʼob tumen le angeloʼoboʼ? Jeʼex tu luʼumil Alemania yéetel tiʼ le luʼumiloʼob yanoʼob tu chikʼinil Europaoʼ, máaxoʼob meyajtik Jéeobaeʼ chúukpaj  u yóoloʼob kex chʼaʼapachtaʼaboʼob tumen le naziʼob tu kʼiiniloʼob le kaʼapʼéel Nojoch Baʼateʼel anchaj tu jaʼabiloʼob 1939 tak 1945. Tu luʼumiloʼob España, Italia yéetel Portugaleʼ chʼaʼapachtaʼaboʼob xan tumen le gobiernoʼob catolicoʼoboʼ. Ichil yaʼab jaʼaboʼobeʼ jach chʼaʼapachtaʼaboʼob xan teʼ luʼumil ku kʼaabaʼtaʼal kaʼach Unión Soviéticaoʼ bey xan teʼ luʼumiloʼob yanoʼob yáanal u páajtaliloʼ. Tsʼoʼoleʼ tsʼoʼok xan u sen chʼaʼapachtaʼal u kaajal Dios tiʼ yaʼab luʼumiloʼob yanoʼob África. * Maʼ sen úuch xaneʼ, joʼopʼ u chʼaʼapachtaʼal u j-jaajkunajoʼob Jéeoba yanoʼob tu luʼumil Georgia. Jeʼex tsʼoʼok k-ilkoʼ, Satanaseʼ jach táan u yilik u xuʼulsik le meyaj ku beetik u j-jaajkunajoʼob Jéeobaoʼ. Baʼaleʼ, maʼ u xuʼulstiʼobiʼ, baʼaxeʼ tsʼoʼok tak u maas yaʼabtaloʼob, tumen táan u yáantaʼaloʼob yéetel táan u kanáantaʼaloʼob tumen le angeloʼoboʼ (Salmo 34:7; Daniel 3:28; 6:22).

15, 16. ¿Baʼax áantajil ku tsʼaʼabal tiʼ u j-jaajkunajoʼob Jéeoba teʼ meyaj ku beetkoʼoboʼ?

¹⁵ U j-jaajkunajoʼob Jéeobaeʼ jach ku yilik u kʼaʼaytikoʼob u maʼalob péektsilil u Reino Dios tuláakal tuʼux, bey xan u kaʼanskoʼob le baʼax ku yaʼalik le Biblia tiʼ le máaxoʼob taak u kaambaloʼoboʼ (Mateo 28:19, 20). Baʼaleʼ, u yojloʼob maʼ tu páajtal u beetkoʼob le meyaj tsʼaʼantiʼob wa maʼ tu yáantaʼaloʼob tumen le angeloʼoboʼ. Le oʼolaleʼ, jach ku líikʼil u yóoloʼob ken u xokoʼob le baʼax ku yaʼalik Apocalipsis 14:6, 7. Teʼeloʼ k-xokik: «[Teen apóstol Juaneʼ] tin wilaj túun uláakʼ ángel táan u xikʼnal chúumuk le kaʼanoʼ yaan tiʼeʼ le maʼalob péektsil minaʼan u xuuloʼ utiaʼal u [kʼaʼayt] tiʼ le máaxoʼob kajaʼanoʼob luʼumoʼ, tiʼ tuláakal múuchʼ kaajoʼob, jejeláas tʼaanoʼob, chʼiʼibaloʼob yéetel kaajoʼob. Táan u kʼaʼam aʼalik: Chʼaʼex sajakil tiʼ Jajal Dios yéetel nojbeʼenkúunteʼex u kʼaabaʼ, tumen tsʼoʼok u kʼuchul u kʼiinil u pʼis óol. [Adorarteʼex] le máax beet le kaʼanoʼ, le luʼumoʼ, le kʼáaʼnáaboʼ, bey xan le sayaboʼoboʼ».

¹⁶ Le tʼaanoʼobaʼ ku yeʼeskoʼobeʼ le angeloʼoboʼ ku yáantajoʼob yéetel ku tsʼáaikoʼob nuʼuktaj teʼ meeyjil kʼaʼaytaj ku beetik u j-jaajkunajoʼob Jéeobaoʼ. Tiʼ Jéeobaeʼ ku meyaj le angeloʼob utiaʼal u taasik ichil u kaajal le máaxoʼob taak u kaambaloʼoboʼ, bey xan utiaʼal u yeʼesik tiʼ u j-jaajkunajoʼob tuʼux yaan le máaxoʼob uts u puksiʼikʼaloʼoboʼ. Le oʼolal yaʼab utéenel tsʼoʼok k-uʼuyik u yaʼalaʼal utúul j-jaajkunajeʼ kʼuch u xíimbalt wa máax jach luubul u yóol wa jach táan u kaxtik ka áantaʼak u kʼaj óolt Dios.

 Maʼ kun xáantaleʼ yaan u beetkoʼob upʼéel nojoch meyaj

17. Utúuliliʼ angeleʼ, ¿baʼax tu beetaj tiʼ le asirioʼoboʼ?

¹⁷ Jeʼex tsʼoʼok k-ilkoʼ, le angeloʼoboʼ ku tsʼáaikoʼob ojéelbil baʼax u kʼáat Dios yéetel ku tsʼáaikoʼob áantaj tiʼ máaxoʼob meyajtik, baʼaleʼ yaan uláakʼ meyaj ku beetkoʼob. Úuchileʼ tu taasoʼob xan xuʼulsajil yóokʼol u enemigoʼob Dios. Jeʼex teʼ siglo 8 táanil tiʼ u taal Cristooʼ, le ka bin baʼateltbil Jerusalén tumen u kaajil Asiriaeʼ, Jéeobaeʼ tu yaʼalaj: «Teen bíin in kanáant le kaajaʼ teen xan bíin in toke». Le Bibliaoʼ ku yaʼalik xan: «Tiʼ le áakʼaboʼ u ángel Yuumtsileʼ j-bineʼ ka tu kíimsaj ciento [ochentaicinco] mil máakoʼob tuʼux ku jeʼeleloʼob le j-asirioboʼ, tuláakʼ kʼiineʼ sáaschaj láaj kimenoʼob» (2 Reyes 19:34, 35). ¿Máasaʼ jach minaʼan u muukʼ le bukaʼaj soldadoʼob wa ka k-ket yéetel u muukʼ le utúuliliʼ angeloʼ?

18, 19. Maʼ kun xáantaleʼ, ¿baʼax nojoch meyaj ken u beet le angeloʼoboʼ, yéetel baʼax kun úuchul tiʼ le máaxoʼob maʼatech u kʼamkoʼob le maʼalob péektsiloʼ?

¹⁸ Maʼ kun xáantaleʼ, tiʼ Jéeobaeʼ yaan u meyaj le angeloʼob utiaʼal xan u taasik upʼéel xuʼulsajil. Ichil upʼíit kʼiineʼ, Jesuseʼ yaan u taal «yéetel u muʼukʼaʼan angeloʼobeʼ ichil u tóochʼbal kʼáakʼ» «utiaʼal u jatsʼ le máaxoʼob maʼ tu kʼaj óoltikoʼob Jajal Diosoʼ mix tu yuʼubikoʼob u maʼalob péektsil k-Yuumtsil Jesucristo» (2 Tesalonicailoʼob 1:7, 8). ¡Jach túun nojoch le baʼax ku taal tu yóokʼol le yóokʼol kaabaʼ! Yaan u taal xuʼulsajil yóokʼol le máaxoʼob maʼatech u kʼamkoʼob u maʼalob péektsilil u Reino Dios táan u kʼaʼaytaʼal tiʼ tuláakal le Luʼumaʼ. Chéen le máaxoʼob ku kaxkoʼob Jéeoba yéetel ku beetkoʼob baʼax ku yaʼalikeʼ, chéen letiʼob kun kanáantbiloʼob ken taalak «u kʼiinil u pʼujaʼanil Yuumtsil» (Sofonías 2:3).

¹⁹ Jach unaj k-tsʼáaik nib óolal tiʼ Jéeoba ikil u túuxtik u angeloʼob utiaʼal u yáantik yéetel u líiʼsik u yóol le máaxoʼob meyajtik way Luʼumeʼ. Tsʼoʼoleʼ, k-naʼatik bix u táakpajal le angeloʼob tiʼ le baʼax u tukulmaj u beetik Diosoʼ ku líiʼsik xan k-óol, tumen yaan uláakʼ angeloʼob u tsʼaamubaʼob tu contra Dios yéetel tiʼ yanoʼob yáanal u kʼab Satanaseʼ. Teʼ tuláakʼ xookoʼ yaan k-ilik baʼax jeʼel u páajtal k-beetik utiaʼal k-kanáantikba tiʼ Satanás yéetel tiʼ u kʼasaʼan angeloʼob.

[Tsolajiloʼob]

¿Baʼax tsʼoʼok a kanik?

• ¿Bix úuchik u yantal le angeloʼoboʼ?

• ¿Baʼax meyajiloʼob tu beetaj le angeloʼob úuchiloʼ?

• Apocalipsis 14:6, 7, ¿bix u yeʼesiktoʼon baʼax táan u beetik le angeloʼob teʼ kʼiinoʼobaʼ?

• Maʼ kun xáantaleʼ, ¿baʼax nojoch meyaj ken u beet le angeloʼoboʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 13]

Manoa yéetel u yatneʼ jach líiʼsaʼab u yóoloʼob tumen utúul ángel

[U tsolajil le oochel teʼ táan juʼun 15]

«[Maas] yaʼab le yanoʼob t-éeteloʼ, tiʼ le yanoʼob tu yéeteloʼoboʼ»