Unaj k-chaʼik nuʼuktaʼal tumen Cristo yéetel tumen u palitsil chúukaʼan u yóoloʼ

«Le tsʼuuloʼ bíin u tsʼáa u kanáant tuláakal baʼax yaan tiʼ.» (MATEO 24:45-47.)

1, 2. 1) Jeʼex u yaʼalik le Bibliaoʼ, ¿máax u nojchil ichiloʼon? 2) ¿Baʼax eʼesik Cristo nuʼuktik le múuchʼuliloʼoboʼ?

UTÉENJEAKILEʼ, Jesuseʼ tu yaʼalaj: «[Maʼ] a wóoltikeʼex ka aʼalaʼak j-nojoch tiʼ teʼex, tumen chéen Cristo a j-nojocheʼex» (Mateo 23:10). Yéetel le tʼaanoʼobaʼ, Jesuseʼ tu yaʼalaj tiʼ u disipuloʼobeʼ letiʼ yéeyaʼan tumen Dios utiaʼal u beet u nojchil ichiloʼob. Jeʼex u yaʼalik le Bibliaoʼ Jéeobaeʼ «tu kaʼapúutkuxkíintaj Cristo» yéetel tu tsʼáaj tu yóokʼol le múuchʼuliloʼ «jeʼel bix u pool tuláakal baʼaleʼ» (Efesoiloʼob 1:20-23).

² Tumen Cristo «u pool tuláakal baʼal» yaan yil yéetel le múuchʼuliloʼ, ku yilik tuláakal baʼaxoʼob ku beetaʼal ichil yéetel mix baʼal ku púutsʼul tiʼ. Ku jach ilik wa táan u tsʼáaik u yóol u meyajtoʼob Jéeoba cada upʼéel tiʼ le múuchʼuliloʼoboʼ. Lelaʼ bey u yeʼesik le baʼaxoʼob tsʼaʼab u yil le apóstol Juan teʼ tu tsʼoʼokbal le yáax siglooʼ. Teʼeloʼ, Jesuseʼ tu túuxtaj tʼaan tiʼ siete múuchʼuliloʼob, yéetel cinco utéenel tu yaʼalajtiʼobeʼ u yojel le baʼaxoʼob maʼalobtak yéetel le baʼaxoʼob maʼ patal ku beetkoʼoboʼ, baʼaleʼ tu líiʼsaj u yóoloʼob yéetel tu tsolaj xan u nuʼuktiʼob, jeʼel bix kʼaʼabéetchaj tiʼ cada múuchʼulileʼ (Apocalipsis 2:2, 9, 13, 19; 3:1, 8, 15). Jeʼel u páajtal k-aʼalik xaneʼ, Jesuseʼ u yojel xan kaʼach bix yanik u maasil múuchʼuliloʼob, jeʼex le yanoʼob Asia Menoroʼ, Palestina, Siria, Babilonia, Grecia, Italia bey xan le yanoʼob tuláakʼ tuʼuxoʼoboʼ (Beetaʼanoʼob [Hechos] 1:8). ¿Bey wa xan u beetik bejlaʼeʼ?

 Utúul palitsil chúukaʼan u yóol

3. ¿Baʼaxten maʼalob ka keʼetek le múuchʼulil yéetel upʼéel wíinklil tuʼux Cristo u pooliloʼ?

³ Le ka tsʼoʼok u kaʼa kuxkíintaʼal, yéetel táanil tiʼ u bin kaʼaneʼ, Jesuseʼ tu yaʼalaj tiʼ u disipuloʼob: «Tiʼ teen tsʼaʼan tuláakal páajtalil kaʼan yéetel luʼum». Tsʼoʼoleʼ ka tu yaʼalaj xan tiʼob: «Ojéelteʼexeʼ teneʼ tiʼ yanen ta wéeteleʼex tuláakal kʼiinoʼob tak tu xuul yóokʼol kaab» (Mateo 28:18-20). Jesuseʼ tu yaʼalajtiʼobeʼ maʼ kun xuʼulul u nuʼuktikoʼob bey u Pooliloʼobeʼ. Teʼ cartaʼob tu túuxtaj tiʼ le disipuloʼob yanoʼob Éfeso yéetel Colosaoʼ, le apóstol Pablooʼ tu ketaj le múuchʼulil yéetel upʼéel «wíinklil» tuʼux u Poolileʼ Cristo (Efesoiloʼob 1:22, 23; Colosailoʼob 1:18). Le kettʼaanaʼ ku yaʼalikeʼ «maʼ chéen unaj u yantal u Pool le wíinkliloʼ, baʼaxeʼ le wíinkliloʼ ku beetik le baʼax ku túuxtaʼal tiʼ tumen le Pooloʼ», lelaʼ bey u yaʼalik upʼéel libro ku tʼaan yoʼolal le baʼax ku yaʼalik le Bibliaoʼ (The Cambridge Bible for Schools and Colleges). Baʼaleʼ, desde ka tsʼaʼab Cristo u beet u reyil teʼ kaʼan tu jaʼabil 1914, ¿máax tsʼoʼok u meyaj tiʼ utiaʼal u tsʼáaik nuʼuktaj? (Daniel 7:13, 14.)

4. Jeʼex tu yaʼalil Malaquíaseʼ le ka túuxtaʼab Jesús u yil u templo Jéeobaeʼ, ¿baʼax tu yilaj táan u yúuchul?

⁴ Le ka tʼaanaj yoʼolal Jéeobaeʼ, le profeta Malaquíasoʼ tu yaʼaleʼ «u yuumil tuláakal páajtalileʼ» láakʼintaʼan tumen «u j-bisaj tʼaanil le [pacto]» wa Jesucristo le maʼ sen úuch tsʼaʼabak u beet u reyiloʼ, letiʼeʼ yaan u taal u yil yéetel u juzgart u templo Jéeoba. Le baʼaxoʼob úuch tu jaʼabil 1918, ku yeʼesik letiʼe jaʼab ka kʼuch «u kʼiinil u káajal le pʼis óoloʼ» yéetel le pʼis óolaʼ káaj yéetel u «otochnáaloʼob Jajal Dios» (Malaquías 3:1; 1 Pedro 4:17). * Le máaxoʼob túun ku yaʼalikoʼob táan u meyajkoʼob Dios jeʼex u utstutʼaan way Luʼumeʼ, ilaʼab wa jach tu jaajil táan u beetkoʼob beyoʼ. Le religionoʼob maʼ táan u kaʼanskoʼob kaʼach u jaajiloʼ maʼ kʼaʼamoʼob tumen Cristoiʼ, tumen úuch káajak u kaʼanskoʼob baʼaloʼob ku taasik subtsilil tiʼ Dios yéetel tumen xan jach táakpajoʼob tiʼ u kíimsaʼal yaʼab máakoʼob teʼ yáax nojoch baʼateltáambaloʼ. Baʼaleʼ, u yalab tiʼ le máaxoʼob yéeyaʼanoʼob utiaʼal u binoʼob kaʼanoʼ ilaʼab xan wa jach chúukaʼan u yóoloʼob u meyajtoʼob Dios, óoliʼ bey ka máansaʼakoʼob tiʼ kʼaʼakʼ jeʼel bix u beetaʼal tiʼ le orooʼ, baʼaleʼ letiʼobeʼ kʼaʼamoʼob tumen Cristo, yéetel béeychaj «u táanbesikoʼob» wa u kʼubikoʼob u siibaloʼob tiʼ Jéeoba (Malaquías 3:3).

5. Jeʼex u yeʼesik le profecía tu yaʼalaj Jesús yaan yil yéetel u «taalbal[oʼ]», ¿máax kʼuch u beetuba le «palitsil chúukpajaʼan u yóol[oʼ]»?

⁵ Utiaʼal ka u yojéelt u disipuloʼob tsʼoʼok u náatsʼal u kʼiinil u «taalbal yéetel ken xuʼuluk yóokʼol kaab[eʼ]», Jesuseʼ tu tsʼáajtiʼob upʼéel señal tuʼux táakaʼan jejeláas baʼaloʼobiʼ. Upʼéel tiʼ letiʼobeʼ yaan yil yéetel le baʼax tu yaʼalaj Malaquíasoʼ, tsʼoʼoleʼ yaan xan yil yéetel u kʼaj óoltaʼal utúul «palitsil». Jesuseʼ tu yaʼalaj: «¿Máax le palitsil chúukpajaʼan u yóol yéetel yaan u naʼat, ku pʼaʼatal tumen u tsʼuulil utiaʼal [ka u tsʼáa baʼax kʼaʼabéet tiʼ] le máaxoʼob otochnáaloʼob utiaʼal ka u tsʼáa janal tiʼob tu yorailoʼ? Kiʼ yóol le palitsiloʼ  wa le ken suunak u tsʼuuliloʼ ku yilik táan u beetik beyoʼ. Tu jaajil kin waʼalik tiʼ teʼexeʼ le tsʼuuloʼ bíin u tsʼáa u kanáant tuláakal baʼax yaan tiʼ» (Mateo 24:3, 45-47). ¿Baʼax tu yilaj Cristo le ka suunaj tu jaʼabil 1918 utiaʼal u yilik baʼax ku beetik le «palitsiloʼ»? Tu yileʼ le u yalab tiʼ le yéeyaʼanoʼoboʼ, desde tu jaʼabil 1879 táan u meyajtiʼob le revista La Atalaya yéetel uláakʼ jóoʼsaʼaniloʼob utiaʼal u tsʼáaikoʼob le «janal [wa kaʼansaj] tu yorailoʼ». Jesús túuneʼ tu kʼamoʼob bey u «palitsil[eʼ]», yéetel tu jaʼabil 1919 tu tsʼáajtiʼob u kanáantoʼob tuláakal le baʼaxoʼob yaan tiʼ way Luʼumeʼ.

Le máax kanáantik tuláakal le baʼax yaan tiʼ Cristo way Luʼumeʼ

6, 7. 1) ¿Bix uláakʼ úuchik u yaʼalik Jesús tiʼ le «palitsil chúukpajaʼan u yóol[oʼ]»? 2) ¿Baʼaxten meyajnaj tiʼ Jesucristo le tʼaan «j-kanan ayikʼalil»?

⁶ Táanil tiʼ u yaʼalik Jesús le profecía tiʼ bix kun taaloʼ, tsʼokaʼaniliʼ u yáax tʼaan tu yoʼolal le «palitsil[aʼ]». Baʼaleʼ le ka yáax tʼaanaj tu yoʼolal le palitsilaʼ meyajnaj tiʼ uláakʼ tʼaan ku yáankoʼon k-naʼat le meyajoʼob ken u beet le palitsiloʼ, letiʼeʼ tu yaʼalaj: «¿Máax le j-kanan ayikʼalil chúukaʼan u yóol yéetel yaan u naʼat, máax u tsʼuulil bin u tsʼa u kanáant u yotoch, utiaʼal u [tsʼáaik] janal jach tu kʼiinil? Tu jaajil kin waʼalik tiʼ teʼex, bin u tsʼáa yóokʼol tuláakal le baʼax utiaʼal[oʼ]» (Lucas 12:42, 44, LTN).

⁷ Teʼ tekstoaʼ, tiʼ le palitsiloʼ ku yaʼalaʼal tiʼ «j-kanan ayikʼalil», le tʼaanaʼ chʼaʼan tiʼ upʼéel tʼaan ich griego u kʼáat u yaʼal utúul «máak ku kanáantik upʼéel naj wa upʼéel terreno». Jeʼel u páajtal k-aʼalik túuneʼ le j-kanan ku yaʼalaʼalaʼ maʼ chéen u múuchʼ máakoʼob jach yaan u naʼatoʼob jeʼel u páajtal u tsolkoʼob le baʼaxoʼob talamtak ku yaʼalik le Bibliaoʼ. Tsʼoʼoleʼ, le palitsilaʼ maʼ chéen yaan u tsʼáaik «jach tu kʼiinil» le janal wa le kaʼansaj jach maʼaloboʼ, «le j-kanáan ayikʼalil[aʼ]» yaan xan u kanáantik u múuchʼulil Cristo yéetel yaan u kanáantik «tuláakal le baʼax utiaʼal» Cristo way Luʼumeʼ. ¿Baʼax táakaʼan ichil le baʼaxoʼob yaan tiʼ Cristo way Luʼumeʼ?

8, 9. ¿Baʼaxoʼob u tsʼaamaj Jesús u kanáant le palitsiloʼ?

⁸ Ichil le baʼaxoʼob ku kanáantik le palitsiloʼ táakaʼan le kúuchiloʼob ku meyajoʼob tiʼ u disipuloʼob Cristo wa u j-jaajkunajoʼob Jéeoba, utiaʼal u beetaʼal le meeyjil kʼaʼaytaj tuláakal yóokʼol kaaboʼ. Ichil le baʼaloʼobaʼ tiaʼan xan le u noj najil meyaj tuʼux ku nuʼuktaʼal tuláakal le kʼaʼaytaj ku beetaʼaloʼ, u najiloʼob Betel yaan tiʼ jejeláas luʼumiloʼob, u Najiloʼob Reino yéetel u Najiloʼob Asambleaʼob. Le palitsilaʼ ku yilik xan baʼaxoʼob kun kaʼansbil teʼ muchʼtáambaloʼob ku beetaʼal cada semanaoʼ yéetel le baʼaxoʼob kun kaʼansbil teʼ asambleaʼob ku beetaʼal cada jaʼaboʼ. Teʼ muchʼtáambaloʼobaʼ ku tsoʼolol bix táan u béeytal le profecíaʼob yanoʼob teʼ Bibliaoʼ yéetel ku kaʼansaʼal xan bix jeʼel u tsʼáaik máak ichil u kuxtal le baʼax ku kaʼansik u Tʼaan Diosoʼ.

⁹ Upʼéel meyaj maas kʼaʼanan ku yilik le palitsil ka beetaʼakoʼ letiʼe u kʼaʼaytaʼal «u maʼalob péektsilil le [Reinooʼ]» yéetel u beetaʼal disipuloʼob tiʼ tuláakal máakoʼob. Lelaʼ u kʼáat u yaʼaleʼ, unaj k-kaʼansik tiʼ tuláakal máak ka u beet xan tuláakal le baʼax ku yaʼaliktoʼon Cristo ka k-beet teʼ tu tsʼook kʼiinoʼobaʼ (Mateo 24:14; 28:19, 20; Apocalipsis 12:17). Yoʼolal le meyajaʼ tsʼoʼok u muchʼkíintaʼal «yaʼabkach máakoʼob» táan u yáantkoʼob le u yalab le yéeyaʼanoʼob kun binoʼob kaʼanoʼ. Letiʼobeʼ u «ayikʼaliloʼob» tuláakal múuchʼ kaajoʼob ku yaʼalik le Bibliaoʼ yéetel táakpajaʼanoʼob xan ichil «tuláakal le baʼax utiaʼal» Cristo ku kanáantaʼal tumen le palitsil chúukaʼan u yóoloʼ (Apocalipsis 7:9; Ageo 2:7).

Le Cuerpo Gobernanteoʼ ku tʼaan tu yoʼolal le palitsiloʼ

10. Teʼ yáax siglooʼ, ¿máaxoʼob ku meyajoʼob kaʼach bey Cuerpo Gobernanteeʼ, yéetel bix u kʼaʼamal kaʼach tumen le múuchʼuliloʼob le baʼax ku chʼaʼatuklikoʼoboʼ?

¹⁰ Utiaʼal ka u tsʼoʼokbes u nukuch meyajoʼobeʼ, le palitsil chúukaʼan u yóoloʼ unaj u chʼaʼatuklik baʼax ken u beete yéetel bix kun beetbil. Teʼ yáax siglooʼ letiʼe apostoloʼob yéetel le ancianoʼob tiʼ Jerusalén ku meyajoʼob bey Cuerpo Gobernante ku tʼaan tu yoʼolal le palitsiloʼ, letiʼob chʼaʼatukultik kaʼach baʼaxoʼob kun beetbil teʼ múuchʼuliloʼoboʼ (Beetaʼanoʼob 15:1, 2). Le baʼax ku chʼaʼatukultik le Cuerpo Gobernante kaʼachoʼ, ku tsʼaʼabal u yojéelt le múuchʼuliloʼob tiʼ  cartaʼob wa ku túuxtaʼal wa máax aʼaliktiʼob. Le sukuʼunoʼob túunoʼ ku kʼamkoʼob yéetel kiʼimak óolal le tsolnuʼukoʼoboʼ, yéetel ken u beetoʼob le baʼax ku yaʼalaʼaltiʼoboʼ ku yantal jeetsʼelil ichil le múuchʼuliloʼ (Beetaʼanoʼob 15:22-31; 16:4, 5; Filiposiloʼob 2:2).

11. Teʼ kʼiinoʼobaʼ, ¿máaxoʼob ku meyaj tiʼ Cristo utiaʼal u nuʼuktik u múuchʼulil, yéetel baʼax unaj k-beetik toʼon?

¹¹ Teʼ kʼiinoʼobaʼ, jeʼel bix tu kʼiiniloʼob le apostoloʼoboʼ, le Cuerpo Gobernanteoʼ upʼéel u chan múuchʼ sukuʼunoʼob yéeyaʼanoʼob tumen u kiliʼich muukʼ Dios utiaʼal u tsʼáaikoʼob nuʼuktaj. Tiʼ Cristo, u Poolil le múuchʼuliloʼ, ku meyaj u «x-noj kʼaab» (le páajtalil yaan tiʼoʼ) utiaʼal u nuʼuktik le u múuchʼ sukuʼunoʼob ku yilkoʼob u beetaʼal u meeyjil le Reinooʼ (Apocalipsis 1:16, 20). Albert Schroeder, utúul sukuʼun maʼ sen úuch kíimik, meyajnaj yaʼabach jaʼaboʼob ichil le Cuerpo Gobernanteoʼ, tu yaʼalaj yoʼolal le múuchʼ sukuʼunoʼobaʼ: «Tuláakal miércoles ku yantaltiʼob upʼéel muchʼtáambal, yéetel le muchʼtáambalaʼ ku káajal yéetel upʼéel oración tuʼux ku kʼáataʼal u nuʼuktaj u kiliʼich muukʼ Jéeoba. Tuláakal baʼax ku yilaʼal yéetel ku chʼaʼatuklaʼaleʼ ku jach ilaʼal u beetaʼal jeʼex u yaʼalik le Bibliaoʼ». * Le múuchʼ sukuʼunoʼobaʼ ku náajaltikoʼob ka yanakoʼon yáanal u nuʼuktajoʼob. Le oʼolal, unaj k-beetik le baʼax tu yaʼalaj Pabloaʼ: «Uʼuyeʼex u tʼaan le máaxoʼob nuʼuktik teʼex le bejoʼ yéetel aneneʼex yáanal u páajtaliloʼob; tumen letiʼob máaxoʼob kanáantik a [kuxtaleʼex]» (Hebreob 13:17).

Unaj k-eʼesik le tsiikil ku náajmatik le palitsil chúukaʼan u yóoloʼ

12, 13. ¿Baʼax oʼolal ku yaʼalik le Biblia unaj k-eʼesik tsiikil tiʼ le palitsiloʼ?

¹² Unaj k-eʼesik tsiikil tiʼ le palitsil chúukaʼan u yóoloʼ, tumen wa k-beetikeʼ k-eʼesik tsiikil tiʼ k-Tsʼuulil Jesucristo. Le apóstol Pablooʼ tu yaʼalaj tiʼ le yéeyaʼanoʼoboʼ: «Le máax jáalkʼab le ka j-tʼaʼanoʼ, bejelaʼeʼ u palitsil Cristo. Tumen jach nojoch u tojol maʼanikeʼex» (1 Corintoiloʼob 7:22, 23; Efesoiloʼob 6:6). Bey túunoʼ, ken anakoʼon yáanal u nuʼuktaj le palitsil chúukaʼan u yóol yéetel u Cuerpo Gobernanteoʼ, táan k-tsʼáaikba yáanal u nuʼuktaj Cristo, u Tsʼuulil le palitsiloʼ. Ken k-eʼes tsiikil tiʼ le máaxoʼob ku meyaj tiʼ Cristo utiaʼal u kanáantik le baʼaxoʼob yaan tiʼ way Luʼumeʼ, k-éejemtik «Jesucristoeʼ letiʼ Yuumtsil, utiaʼal u nojbeʼenil Jajal Dios le Taataoʼ» (Filiposiloʼob 2:11).

¹³ Yaan uláakʼ baʼax oʼolal unaj k-eʼesik tsiikil tiʼ le yéeyaʼanoʼob pʼaatloʼob way Luʼumeʼ. Le Bibliaoʼ ku yaʼalikeʼ, letiʼobeʼ beyoʼob u «najil» tuʼux kajaʼan u kiliʼich muukʼ Jéeoba, le oʼolal ku yaʼalaʼal u múuchʼ máaxoʼob «kiliʼich[oʼob]» (1 Corintoiloʼob 3:16, 17; Efesoiloʼob 2:19-22). Jesuseʼ u tsʼaamaj tiʼ le palitsil wa le kiliʼich templo u kanáant le baʼaxoʼob yaan tiʼ way Luʼumeʼ. Le oʼolal yaan baʼaxoʼob chéen letiʼe palitsil jeʼel u páajtal u chʼaʼatukultik u beetaʼal ichil u kaajal Diosoʼ. Le beetikeʼ jach kʼaʼabéet k-tsʼáaikba yáanal u nuʼuktaj le palitsil chúukaʼan u yóol yéetel u Cuerpo Gobernanteoʼ. Le «uláakʼ j-tamanoʼob[oʼ]» jach nojoch baʼal u yilkoʼob u yáantikoʼob u beetoʼob le meyajoʼob tu pʼataj Cristooʼ (Juan 10:16).

 Unaj k-múul meyaj tu yéetel

14. Jeʼex úuchik u yaʼalik Isaíaseʼ, ¿bix u bin le uláakʼ tamanoʼob tu paach le palitsil yéeyaʼanoʼ, yéetel baʼaxten ku yaʼalaʼaltiʼob «kolnáaliloʼob» maʼatech u náajaloʼob?

¹⁴ Le profeta Isaíasoʼ tu yaʼalaj bix kun meyaj yéetel kiʼimak óolal le uláakʼ tamanoʼob yéetel le yéeyaʼanoʼoboʼ, letiʼeʼ tu yaʼalaj: «Yuumtsileʼ ku yaʼalik tiʼ Israel: U kolnáaliloʼob Egipto [maʼatech u náajaloʼob], u j-koonoloʼob Etiopía yéetel u kajnáaliloʼob Sabá máaxoʼob kaʼanal baʼaloʼob, bíin tʼonlakoʼob ta táan, bíin a palitsiltoʼob; bíin xiʼikoʼob ta paach, kʼaxaʼanoʼob yéetel x-jokʼenjookʼob, bíin xolakoʼob ta táan utiaʼal u kʼáat óolaloʼob tiʼ teech; tu jaajileʼ tiʼ yaan [Dios] ichileʼexeʼ, minaʼan uláakʼ, minaʼan uláakʼ [Dios]» (Isaías 45:14). Le uláakʼ tamanoʼoboʼ, ¿bix u binoʼob tu paach le palitsil yéetel u Cuerpo Gobernante teʼ kʼiinoʼobaʼ? Ku beetkoʼob ikil u tsʼáaikubaʼob yáanal u nuʼuktajoʼob. ¿Baʼaxten xan ku yaʼalaʼaltiʼob «kolnáaliloʼob» maʼatech u náajaloʼob? Tumen ku xupik u muukʼoʼob yéetel uláakʼ baʼaxoʼob yantiʼob utiaʼal u beetaʼal le meeyjil kʼaʼaytaj tu pʼataj Cristo tiʼ le yéeyaʼanoʼoboʼ (Beetaʼanoʼob 1:8; Apocalipsis 12:17).

15. ¿Bix u yeʼesaʼal tu tekstoi Isaías 61:5, 6, le múul meyaj ken u beet le uláakʼ tamanoʼob yéetel le yéeyaʼanoʼoboʼ?

¹⁵ Le uláakʼ tamanoʼoboʼ jach yéetel kiʼimak óolal ku meyajkoʼob Jéeoba yáanal u nuʼuktaj le palitsil chúukaʼan u yóol yéetel u Cuerpo Gobernanteoʼ. Ku éejemtkoʼobeʼ, le máaxoʼob yéeyaʼanoʼoboʼ u «kaajaloʼob Jajal Dios» (Galaciailoʼob 6:16). Le uláakʼ tamanoʼoboʼ beyoʼob «j-táanxel luʼumiloʼob» ku yáantkoʼob le yéeyaʼanoʼoboʼ. Ku meyajoʼob yéetel kiʼimak óolal bey j-meyaj kʼáaxoʼob yéetel j-pakʼal uvaʼob yáanal u nuʼuktaj le yéeyaʼanoʼoboʼ, yéetel le yéeyaʼanoʼobaʼ ku yaʼalaʼaltiʼob «u [sacerdoteʼob] Yuumtsil», yéetel «u palitsil[oʼob]» Jéeoba (Isaías 61:5, 6). Jach u tsʼaamaj u yóoloʼob u kʼaʼaytoʼob u maʼalob péektsilil le Reinooʼ yéetel u beetkoʼob disipuloʼob tiʼ u máakiloʼob tuláakal luʼumiloʼob. Ku múul meyajoʼob yéetel le palitsil utiaʼal u kanáantkoʼob yéetel u tsʼáaikoʼob le maʼalob janal wa kaʼansaj tiʼ le máaxoʼob beyoʼob tamanoʼoboʼ.

16. ¿Baʼax péeksik le uláakʼ tamanoʼob u yáantoʼob le palitsil chúukpajaʼan u yóol yéetel yaan u naʼatoʼ?

¹⁶ Le uláakʼ tamanoʼoboʼ ku éejemtkoʼob jach ku kanáantaʼaloʼob yéetel ku jóoʼskoʼob yaʼab utsil tiʼ le jach maʼalob kaʼansaj ku tsʼaʼabaltiʼob tumen le palitsil chúukaʼan u yóoloʼ. Ku éejemtkoʼob xaneʼ wa maʼ tu yoʼolal le palitsiloʼ, maʼ tu yojéelkoʼob óoliʼ mix baʼal yoʼolal le baʼaxoʼob jach kʼaʼanantak ku kaʼansik le Biblia jeʼex le derecho yaan tiʼ Jéeoba utiaʼal u gobernaroʼ, u kiliʼichkúuntaʼal u kʼaabaʼ, u Reino, le túumben kaʼanoʼoboʼ, le túumben luʼumoʼ, le almaoʼ, le bix yanil le kimenoʼoboʼ yéetel jach máax Jéeoba, u Hijo yéetel baʼax le kiliʼich muukʼoʼ. Le kiʼimak óolal ku yuʼubkoʼob yoʼolal le nuʼuktaj ku tsʼaʼabaltiʼoboʼ, le túulchʼintik le uláakʼ tamanoʼob u yáantoʼob yéetel yaabilaj u «sukuʼunoʼob» Cristo teʼ tu tsʼook kʼiinoʼobaʼ (Mateo 25:40).

17. ¿Baʼax tsʼoʼok u yilik kʼaʼabéet u beetik le Cuerpo Gobernanteoʼ, yéetel baʼax ken k-il teʼ tuláakʼ xookoʼ?

¹⁷ Tumen maʼ yaʼab tiʼ le yéeyaʼanoʼob pʼaatloʼob way Luʼumeʼ, letiʼobeʼ maʼ tu páajtal u yantaloʼob tiʼ cada múuchʼuliloʼob utiaʼal u kanáantkoʼob tuláakal le baʼaxoʼob utiaʼal Cristooʼ. Le oʼolal le Cuerpo Gobernanteoʼ ku yéeyik xiiboʼob ichil le uláakʼ tamanoʼoboʼ utiaʼal ka u nuʼuktoʼob le meyajoʼob ku beetaʼal tu najiloʼob Beteloʼ, teʼ distritoʼoboʼ, teʼ circuitoʼoboʼ yéetel teʼ tu múuchʼuliloʼob u j-jaajkunajoʼob Jéeobaoʼ. Le k-tsʼáaikba yáanal u nuʼuktaj le xiiboʼob yéeyaʼanoʼobaʼ, ¿yaan wa baʼax yil yéetel k-tsʼáaikba yáanal u nuʼuktaj Cristo bey xan le palitsil chúukaʼan u yóoloʼ? Lelaʼ le ken k-il teʼ tuláakʼ xookoʼ.

[Tsolajiloʼob]

Utiaʼal kʼaʼajsbil

• ¿Máax yéeyaʼan tumen Dios utiaʼal u beet u nojchil ichiloʼon, yéetel baʼax eʼesik u yojel xan bix yanik le múuchʼuliloʼoboʼ?

• Le ka taal ilbil le templooʼ, ¿máaxoʼob tu yeʼesoʼob táan u meyajoʼob bey utúul palitsil chúukaʼan u yóoleʼ, yéetel baʼaxoʼob tsʼaʼab u kanáantoʼob?

• ¿Baʼax oʼolal ku yaʼalik le Biblia unaj k-múul meyaj yéetel le palitsiloʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 23]

Ichil «tuláakal le baʼax utiaʼal» Cristo ku kanáantik le palitsiloʼ, tiaʼan jejeláas kúuchiloʼobiʼ, le baʼaxoʼob ku kaʼansaʼal teʼ muchʼtáambaloʼoboʼ yéetel le meeyjil kʼaʼaytajoʼ

[U tsolajil le oochel teʼ táan juʼun 25]

Le uláakʼ tamanoʼoboʼ ku yáantkoʼob le palitsil ikil u tsʼáaik u yóoloʼob teʼ kʼaʼaytajoʼ