Unaj k-chaʼik nuʼuktaʼal tumen le máaxoʼob tsʼaʼanoʼob tumen Jéeobaoʼ
Unaj k-chaʼik nuʼuktaʼal tumen le máaxoʼob tsʼaʼanoʼob tumen Jéeobaoʼ
«Uʼuyeʼex u tʼaan le máaxoʼob nuʼuktikteʼex le bejoʼ yéetel aneneʼex yáanal u páajtaliloʼob.» (HEBREOB 13:17.)
1, 2. ¿Baʼax tekstoʼob tiʼ le Biblia ku yeʼeskoʼob Jéeoba yéetel Jesuseʼ ku nuʼuktajoʼob yéetel yaabilaj?
JÉEOBA yéetel Jesús, u Hijoeʼ, ku nuʼuktajoʼob yéetel yaabilaj. Isaiaseʼ tu yaʼalaj: «Yuumtsileʼ ku kʼuchul tu yéetel páajtalil, ku láaj tʼonkíintik yéetel u muukʼ u kʼab. [...] Bey juntúul j-kanan ku kanáantik u j-tamanoʼobeʼ; ku méekʼik le mejen j-tamanoʼob, ku bisikoʼob tuʼux ku chuʼuchoʼob bey xan ku kanáantik le táant u síijiloʼoboʼ» (Isaías 40:10, 11).
2 Le baʼax aʼalaʼabaʼ, yáax béeychaj le ka suunaj tu luʼumil Judá junmúuchʼ judíoʼob tu jaʼabil 537 táanil tiʼ u taal Cristooʼ (2 Crónicas 36:22, 23). Béeychaj xan tu jaʼabil 1919, teʼ jaʼabaʼ Jesuseʼ tu jóoʼsaj tiʼ «le nojoch Babilonia» le máaxoʼob kun binoʼob kaʼanoʼ (Apocalipsis 18:2; Isaías 44:28). Jesuseʼ, letiʼe «u muukʼ u kʼab» Jéeoba ku meyaj tiʼ utiaʼal u gobernartik le tamanoʼoboʼ, u muchʼkíintkoʼob yéetel u kanáantikoʼob yéetel yaabilaj. Jesuseʼ tu yaʼalaj: «Teen le maʼalob j-kanan tamanoʼ. In kʼaj óol in tamanoʼob, le in tiaʼaloʼoboʼ u kʼaj óolenoʼob xan» (Juan 10:14).
3. ¿Baʼaxten k-aʼalik Jéeobaeʼ u kʼáat ka kanáantaʼak maʼalob u tamanoʼob?
3 Isaías 40:10, 11 ku yeʼesikeʼ Jéeobaeʼ ku nuʼuktik u kaajal yéetel yaabilaj (Salmo 23:1-6). Le táan u kʼaʼaytaj way Luʼumeʼ, Jesuseʼ tu yeʼesaj yaabilaj tiʼ u disipuloʼob bey xan tiʼ u maasil máakoʼoboʼ (Mateo 11:28-30; Marcos 6:34). Jéeoba yéetel Jesuseʼ, tu kʼeyajoʼob xan le kʼasaʼan máakoʼob nuʼuktik Israel kaʼachoʼ, tumen maʼ táan u nuʼuktajoʼob tubeeliʼ yéetel tumen táan kaʼach u óotsilkuntkoʼob le kaajoʼ (Ezequiel 34:2-10; Mateo 23:3, 4, 15). Jéeobaeʼ tu yaʼalaj: «Teneʼ bin in kaʼaj in tok in j-tamanoʼob. Bin in kaʼaj in [xuʼuls] u yokoltaʼaloʼob. [...] Bin in kaʼaj in beet baʼax [toj] ichil in j-tamanoʼob. Bin in kaʼaj in beet u suut in palitsil David, utiaʼal ka in tsʼáa j-kananil chéen letiʼ, letiʼ bíin kanáantikoʼob. Letiʼ bíin u beet u j-kanan j-tamanil» (Ezequiel 34:22, 23). Tiʼ le tsʼook kʼiinoʼobaʼ, Jesucristo, le Nojoch Davidoʼ, letiʼ le u «juntúuliliʼ j-kanan taman» tsʼoʼok u tsʼáaik Jéeoba yóokʼol le máaxoʼob meyajtik way Luʼumeʼ: le máaxoʼob kun binoʼob kaʼanoʼ yéetel le «uláakʼ j-tamanoʼob[oʼ]» (Juan 10:16).
Dioseʼ ku tsʼáaik siibaloʼob tiʼ le múuchʼuliloʼ
4, 5. 1) ¿Baʼax nojoch siibalil tsʼoʼok u tsʼáaik Jéeoba tiʼ le máaxoʼob meyajtikoʼ? 2) ¿Baʼax siibalil tsʼoʼok u tsʼáaik Jesús tiʼ u múuchʼulil?
4 Jéeobaeʼ tsʼoʼok u tsʼáaik upʼéel nojoch siibal tiʼ le múuchʼuliloʼ, lelaʼ tu beetaj le ka tu tsʼáaj Jesucristo utiaʼal kanáantikoʼ. Le Máax kun nuʼuktik le múuchʼulil desde teʼ kaʼanoʼ ku chʼaʼachiʼitaʼal tu libroi Isaías 55:4, tuʼux ku yaʼalik: «Teneʼ tin tsʼáa utiaʼal u beet u j-jaajkunaj tiʼ tuláakal múuchʼ kaajoʼob, tin tsʼáa utiaʼal u [gobernart] [...] kaajoʼob». Le máaxoʼob yéeyanoʼob utiaʼal u binoʼob kaʼan bey xan le yanoʼob ichil le «yaʼabkach máakoʼoboʼ» tiʼ u taaloʼob tiʼ tuláakal kaajoʼob, chʼiʼibaloʼob yéetel ku tʼankoʼob jejeláas tʼaanoʼob (Apocalipsis 5:9, 10; 7:9). Tuláakloʼobeʼ tiʼ yanoʼob tiʼ «jumpʼéeliliʼ u múuchʼul j-tamanoʼob», nuʼuktaʼanoʼob tumen Jesucristo, le «juntúuliliʼ j-kanan tamanoʼ».
5 Jesuseʼ tsʼoʼok xan u tsʼáaik upʼéel nojoch siibal tiʼ u múuchʼulil. Tsʼoʼok u tsʼáaik xiiboʼob utiaʼal kanáantik le múuchʼulil yéetel yaabilaj, jeʼex le ku yeʼesik letiʼ yéetel u Taataoʼ. Apóstol Pabloeʼ le ka tʼaanaj tiʼ le nojoch siibalaʼ tu yaʼalaj tiʼ le sukuʼunoʼob yanoʼob Efesooʼ: «J-naʼak kaʼan, ka tu bisaj tu yéeteleʼ le máaxoʼob kʼalaʼanoʼoboʼ, ka tu tsʼáaj siibaloʼob tiʼ máakoʼob. [...] Tu tsʼáaj ka u beet u apostoliloʼob, tiʼ uláakʼoʼobeʼ ka u beet u profetailoʼob, tiʼ uláakʼoʼobeʼ ka u tseʼektoʼob le maʼalob péektsiloʼ, tiʼ uláakʼoʼobeʼ ka u beet u kanan j-tamaniloʼob yéetel u kaʼambesajiloʼob. Bey tu nuʼuktilak le máaxoʼob utiaʼaloʼoboʼ utiaʼal ka meyajnakoʼob» (Efesoiloʼob 4:8, 11, 12).
6. Tu libroi Apocalipsis 1:16, 20, ¿bix u ketaʼal le ancianoʼob yéeyaʼanoʼob utiaʼal u binoʼob kaʼanoʼ? ¿Baʼax jeʼel xan u páajtal u yaʼalaʼal yoʼolal le ancianoʼob yanoʼob ichil le uláakʼ tamanoʼoboʼ?
6 Le «máaxoʼob» tsʼaʼaboʼob bey «siibaloʼob[eʼ]» letiʼe ancianoʼob wa le máaxoʼob ku nuʼuktajoʼob teʼ múuchʼuliloʼ, letiʼobeʼ yéeyaʼanoʼob tumen Jéeoba yéetel Jesús utiaʼal ka u kanáantoʼob le múuchʼulil yéetel yaabilajoʼ (Beetaʼanoʼob [Hechos] 20:28, 29). Tu káajbaleʼ, le máaxoʼob ku nuʼuktajoʼobaʼ xiiboʼob yéeyanoʼob utiaʼal u binoʼob kaʼan. Tu libroiʼ Apocalipsis 1:16, 20, le ancianoʼob yéeyaʼanoʼoboʼ ku keʼetloʼob yéetel «eekʼoʼob» wa «angeloʼob» yanoʼob tu x-noʼoj kʼab Cristo, utiaʼal u yeʼesaʼal tiaʼanoʼob yáanal u páajtalileʼ. Baʼaleʼ, teʼ tsʼook kʼiinoʼobaʼ táan u bin u maas pʼíittal le máaxoʼob yéeyaʼanoʼob yanoʼob way Luʼumeʼ. Le oʼolaleʼ, óoliʼ tuláakal u ancianoiloʼob le múuchʼuliloʼoboʼ tiaʼanoʼob ichil le uláakʼ tamanoʼoboʼ. Tiʼ letiʼobeʼ jeʼel xan u páajtal u yaʼalaʼal tiaʼanoʼob tu x-noʼoj kʼab wa yáanal u nuʼuktaj Jesucristoeʼ, tumen yéeyaʼanoʼob tumen le máaxoʼob tsʼaʼanoʼob tumen le Cuerpo Gobernante nuʼuktaʼanoʼob tumen le kiliʼich muukʼoʼ (Isaías 61:5, 6). Tumen u ancianoiloʼob k-múuchʼulil ku tsʼáaikubaʼob yáanal u nuʼuktaj Cristo, u Poolil le múuchʼuliloʼ, ku náajmatikoʼob ka múul meyajnakoʼon tu yéeteloʼob (Colosailoʼob 1:18).
Unaj k-uʼuyik u tʼaanoʼob yéetel k-antal yáanal u nuʼuktajoʼob
7. Apóstol Pabloeʼ, ¿bix tu yaʼalil unaj k-ilkeʼex le ancianoʼoboʼ?
7 Jéeoba yéetel Jesús, le Máaxoʼob nuʼuktikoʼonoʼ, u kʼáatoʼob ka k-uʼuy u tʼaan yéetel ka yanakoʼon yáanal u páajtalil le máaxoʼob nuʼuktikoʼob le múuchʼuliloʼ (1 Pedro 5:5). Apóstol Pabloeʼ tu tsʼíibtaj: «Kʼaʼajseʼex le máaxoʼob tu nuʼuktajteʼex le bejoʼ yéetel tu tseʼektajteʼex u tʼaan Jajal Diosoʼ; tukulteʼex bix binik tiʼob tiʼ u kuxtaloʼobeʼ ka a keteʼex u yoksaj óolaloʼob. Uʼuyeʼex u tʼaan le máaxoʼob nuʼuktikteʼex le bejoʼ yéetel aneneʼex yáanal u páajtaliloʼob; tumen letiʼob máaxoʼob kanáantik a [kuxtaleʼex], tumen a wojeleʼexeʼ letiʼobeʼ yaan u yaʼalikoʼob tiʼ Jajal Dios baʼax meyajiloʼob tu beetajoʼob. Ilawileʼex ka páatak u beetikoʼob le meyajoʼ yéetel kiʼimak óolal maʼ yéetel yaayaj óolaliʼ, tumen lelaʼ mix jumpʼéel uts jeʼel u taasik teʼexeʼ» (Hebreob 13:7, 17).
8. ¿Baʼax ku yaʼaliktoʼon Pablo ka k-ileʼex, yéetel baʼax u kʼáat u yaʼal le tʼaan «uʼuyeʼex u tʼaan[oʼ]»?
8 Teʼelaʼ, Pabloeʼ ku yaʼaliktoʼon ka k-ileʼex le utsiloʼob ku taasik le maʼalob modos ku yeʼesik le ancianoʼoboʼ, utiaʼal k-beetik jeʼex u beetikoʼoboʼ. Tsʼoʼoleʼ ku yaʼaliktoʼon xan ka k-uʼuy u tʼaanoʼob yéetel ka k-tsʼáaba yáanal u nuʼuktajoʼob. R. T. France, utúul máak jach u xokmaj baʼax u kʼáat u yaʼal u tʼaaniloʼob le Bibliaoʼ, ku yaʼalikeʼ le tʼaan ich griego «uʼuyeʼex u tʼaan[oʼ]», maʼ chéen u kʼáat u yaʼal «ka k-uʼuy tʼaaniʼ, baʼaxeʼ u kʼáat u yaʼal k-éejemtik yéetel kiʼimak óolal ka nuʼuktaʼakoʼon tumen letiʼob». Toʼoneʼ k-uʼuyik u tʼaan le ancianoʼoboʼ maʼ chéen tumen bey u yaʼalik le Bibliaoʼ, baʼaxeʼ k-beetik tumen k-ojel letiʼobeʼ táan u kaxtikoʼob táanil u Reino Dios yéetel u kʼáatoʼob ka xiʼiktoʼon utsil. U jaajileʼ, jach jeʼel u kiʼimaktal k-óol wa k-tsʼáaikba yáanal u páajtaliloʼobeʼ.
9. ¿Baʼaxten unaj k-uʼuyik tʼaan yéetel k-chaʼik nuʼuktaʼal?
9 Chéen baʼaleʼ, ¿kux túun wa k-tuklik maʼ jach maʼalob le tsolnuʼuk ku tsʼáaik le ancianoʼoboʼ? Wa beyoʼ tiʼ ken k-eʼes wa jach tu jaajil k-antal yáanal u nuʼuktajoʼobiʼ. Maʼ talam k-uʼuyik u tʼaanoʼob wa k-naʼatik baʼaxten ku beetkoʼob wa baʼaxiʼ, baʼaleʼ, jeʼex ken k-ileʼexoʼ k-tsʼáaikba yáanal u nuʼuktajoʼobeʼ u kʼáat u yaʼal k-beetik baʼax ku yaʼalikoʼob kex wa yaan kʼiin maʼ táan k-naʼatik baʼaxten ku yaʼalikoʼobiʼ. Bey tu beetil Pedro, utúul tiʼ le apostoloʼoboʼ (Lucas 5:4, 5).
Kampʼéel baʼax oʼolal unaj k-múul meyaj yéetel kiʼimak óolal
10, 11. Le ancianoʼob teʼ yáax siglooʼ yéetel le yanoʼob bejlaʼeʼ, ¿bix tsʼoʼok u «tseʼekt[tikoʼob] u tʼaan Jajal Dios» tiʼ u sukuʼunoʼob?
10 Tu libroi Hebreob 13:7, 17 tsʼoʼok k-xokikoʼ, le apóstol Pablooʼ ku yeʼesiktoʼon kampʼéel baʼax oʼolal unaj k-uʼuyik u tʼaan le ancianoʼoboʼ. Yáaxeʼ, tumen letiʼobeʼ «tu tseʼektaj[oʼobtoʼon]» «u tʼaan Jajal Dios». Kʼaʼajaktoʼoneʼ Jesuseʼ tu tsʼáaj «máaxoʼob» bey «siibaloʼob» tiʼ le múuchʼuliloʼ utiaʼal u nuʼuktik «le máaxoʼob utiaʼaloʼoboʼ» (Efesoiloʼob 4:11, 12). Jesuseʼ tu yutskíintaj bix u kuxtal yéetel bix u tuukul le cristianoʼob teʼ yáax siglooʼ, utiaʼal u beetik lelaʼ meyajnaj le ancianoʼob tiʼoʼ; jujuntúul tiʼ letiʼobeʼ tu tsʼíibtoʼob cartaʼob tiʼ le múuchʼuliloʼoboʼ. Yéetel u yáantaj le ancianoʼob yéeyanoʼob tumen le kiliʼich muukʼoʼ, tu nuʼuktaj yéetel tu líiʼsaj u yóol le yáax cristianoʼoboʼ (1 Corintoiloʼob 16:15-18; 2 Timoteo 2:2; Tito 1:5).
11 Teʼ kʼiinoʼobaʼ, Jesuseʼ ku nuʼuktikoʼon yéetel u «palitsil chúukpajaʼan u yóol yéetel yaan u naʼat[oʼ]». Le Cuerpo Gobernante yéetel u ancianoiloʼob le múuchʼuliloʼ ku tʼaanoʼob yoʼolal le palitsilaʼ (Mateo 24:45). Tumen k-eʼesik tsiikil tiʼ Jesucristo, le «nojoch j-kanan j-tamanoʼ», k-beetik le baʼax tu yaʼalaj Pabloaʼ: «Tsikeʼex le máaxoʼob ku meyajoʼob ichileʼexoʼ yéetel ku nuʼuktikoʼob a beeleʼex yéetel ku tsolikoʼob a xikineʼex tiʼ Yuumtsil» (1 Pedro 5:4; 1 Tesalonicailoʼob 5:12; 1 Timoteo 5:17).
12. ¿Bix táan u «kanáantik» k-kuxtaleʼex le ancianoʼoboʼ?
12 U kaʼapʼéel baʼax oʼolal kʼaʼabéet k-múul meyaj yéetel le ancianoʼoboʼ, tumen letiʼob «máaxoʼob kanáantik» k-kuxtaleʼexoʼ. Wa letiʼob ku yilikoʼob táan k-beetik upʼéel baʼax jeʼel u náachkuntkoʼon tiʼ Jéeobaeʼ, tu séebaʼanil ken u tsʼaʼobtoʼon tsolnuʼuk utiaʼal k-utskíintik kuxtal (Galaciailoʼob 6:1). Le tʼaan ich griego ku suʼutul «máaxoʼob kanáantik», u kʼáat yaʼaleʼ«maʼ tu weneloʼob». Jeʼex tu yaʼalil utúul máak jach u xokmaj baʼax u kʼáat u yaʼal u tʼaaniloʼob le Bibliaoʼ: «U kʼáat yaʼaleʼ bey utúul j-kanan taman mantatsʼ tu kananeʼ». Yaʼab utéeneleʼ, le ancianoʼoboʼ utiaʼal u kanáantikoʼob le múuchʼuliloʼ ku pʼáatal maʼ tu weneloʼob. Tumen le ancianoʼob ku beetikoʼob tuláakal le ku páajtal utiaʼal u kanáantkoʼob le múuchʼulil yéetel yaabilaj jeʼex tu beetil Jesús, le «nojoch j-kanan taman[oʼ]», ¿maʼ wa unaj k-múul meyaj yéetel kiʼimak óolal tu yéeteloʼobiʼ? (Hebreob 13:20.)
13. ¿Yoʼolal baʼax ken u kʼuboʼob cuenta le ancianoʼob yéetel le uláakʼ sukuʼunoʼoboʼ, yéetel tiʼ máax ken u kʼuboʼob?
13 U yóoxpʼéel baʼax oʼolal kʼaʼabéet k-múul meyaj yéetel kiʼimak óolal tu yéetel le ancianoʼoboʼ, tumen letiʼobeʼ «yaan u yaʼalikoʼob tiʼ Jajal Dios» bix tu kanáantiloʼonoʼob. Le ancianoʼobaʼ u yojloʼob táan u meyajkoʼob Jéeoba yéetel Jesucristo, le maas nojoch J-kanan tamanoʼoboʼ (Ezequiel 34:22-24). Jéeobaeʼ letiʼ u yuumil le tamanoʼob «tu manaj yéetel u kʼiʼikʼel» u Hijooʼ, yéetel yaan u kʼáatik cuenta tiʼ le ancianoʼoboʼ, le máaxoʼob unaj u nuʼuktikoʼob u kaajal yéetel yaabilajoʼ (Beetaʼanoʼob 20:28, 29). U jaajileʼ, tuláakloʼon yaan k-kʼubik cuenta tiʼ Jéeoba yoʼolal bix k-chaʼik nuʼuktaʼal (Romailoʼob 14:10-12). Le ken k-uʼuy u tʼaan le ancianoʼoboʼ, k-eʼesik táan k-tsʼáaikba yáanal u nuʼuktaj Cristo, u Poolil le múuchʼuliloʼ (Colosailoʼob 2:19).
14. ¿Baʼax jeʼel u beetik u meyaj le ancianoʼob «yéetel yaayaj óolal[oʼ]», yéetel baʼax jeʼel u yúuchuleʼ?
14 U kampʼéel baʼax oʼolal tu yaʼalaj Pablo unaj k-chaʼik nuʼuktaʼal tumen le ancianoʼoboʼ letiʼ lelaʼ: «[Utiaʼal] ka páatak u beetikoʼob le meyajoʼ yéetel kiʼimak óolal maʼ yéetel yaayaj óolaliʼ, tumen lelaʼ mix upʼéel uts jeʼel u taasik teʼexeʼ» (Hebreob 13:17). Le ancianoʼoboʼ jach nojoch meyaj tsʼaʼantiʼob, jeʼex u kaʼansajoʼob, u tsʼáaikoʼob nuʼuktaj, u biskoʼob u táanilil teʼ kʼaʼaytajoʼ, u tsʼáaikoʼob baʼax kʼaʼabéet tiʼ u familiaʼob yéetel u yilik u yutskíintkoʼob le talamiloʼob ku yantal teʼ múuchʼuliloʼ (2 Corintoiloʼob 11:28, 29). Wa maʼ k-chaʼik nuʼuktaʼal tumen letiʼobeʼ, yaan k-maas yaʼabkuntik le meyaj yantiʼoboʼ, yéetel yaan u beetkoʼob yéetel yaayaj óolal. Wa maʼ k-jach kʼáat múul meyaj yéeteloʼobeʼ jeʼel k-náachtal tiʼ Jéeobaeʼ yéetel maʼ xaaneʼ jeʼel xan u bintoʼon kʼaasileʼ. Chéen baʼaleʼ, wa k-eʼesik tsiikil yéetel k-múul meyaj yéetel le ancianoʼoboʼ, letiʼobeʼ yaan u páajtal u beetik u meyajoʼob yéetel kiʼimak óolal. Wa k-beetik beyaʼ, yaan u yantal jeetsʼel ichil le múuchʼuliloʼ yéetel yaan k-maas táakpajal yéetel kiʼimak óolal tiʼ u kʼaʼaytaʼal le Reinooʼ (Romailoʼob 15:5, 6).
Unaj k-chaʼik nuʼuktaʼal
15. ¿Bix jeʼel k-eʼesik uʼuyik tʼaan yéetel k-chaʼik nuʼuktaʼal?
15 Yaʼab bix jeʼel k-múul meyaj yéetel le ancianoʼoboʼ. Maʼ xaaneʼ, utiaʼal u maas kʼaʼaytaʼal le maʼalob péektsiloʼ, letiʼobeʼ ku yilkoʼob maʼalob ka kʼexaʼak u kʼiinil yéetel u yorai le muchʼtáambaloʼob utiaʼal u jóokʼol máak kʼaʼaytajoʼ. ¿Yaan wa u kʼaʼabéettal k-beetik kʼeexoʼob ichil k-kuxtal utiaʼal k-kʼuchul tu yorai le muchʼtáambaloʼoboʼ? Unaj k-beetik tuláakal le ku páajtal utiaʼal k-antal le ora aʼalaʼanoʼ; wa k-beetikeʼ, maʼ xaaneʼ jeʼel k-kʼamik utsiloʼobeʼ. Bey xan, wa le superintendente tiʼ servicio táan u xíimbaltik le xookil libro tuʼux yanoʼonoʼ, ¿baʼax jeʼel u páajtal k-beetikeʼ? Unaj k-maas jóokʼol kʼaʼaytaj teʼ semana jeʼeloʼ. Wa xan ku tsʼaʼabaltoʼon upʼéel xóotʼ utiaʼal ka k-máans tu muchʼtáambalil Kaambalil utiaʼal Kaʼansajoʼ, ¿baʼax unaj k-chʼaʼatuklik beetik? Unaj k-máansik le xóotʼ tsʼaʼabtoʼonoʼ. ¿Kux túun wa le máax ilik u xookil libro ku yaʼalik tiʼ toʼon ku tocar limpiartik u Najil le Reinooʼ? Unaj k-beetik xan tuláakal le ku páajtal utiaʼal k-áantikoʼ. Wa k-beetik lelaʼ bey xan uláakʼ baʼaloʼobeʼ yaan k-eʼesik chaʼik k-nuʼuktaʼal tumen le máaxoʼob tsʼaʼanoʼob tumen Jéeoba yéetel Jesús utiaʼal ka u kanáantoʼob le múuchʼuliloʼ.
16. ¿Baʼaxten maʼ unaj k-luʼsikba yáanal u nuʼuktaj utúul anciano kex yaan kʼiin maʼ tu jach beetik baʼax tu nuʼuk?
16 Yaan kʼiineʼ, maʼ xaaneʼ utúul ancianoeʼ maʼ táan u jach beetik le baʼax ku yaʼalik le palitsil chúukaʼan u yóol yéetel le u Cuerpo Gobernanteoʼ. Wa maʼ táan u kʼexik bix u tuukuleʼ, yaan u kʼubik cuenta tiʼ Jéeoba, «máax kanáantik[oʼon] jeʼel bix juntúul j-kanan j-tamaneʼ» (1 Pedro 2:25). Chéen baʼaleʼ, kex wa utúul anciano ku beetik baʼaxoʼob maʼ jach tu nuʼukeʼ, leloʼ maʼ u kʼáat u yaʼal wa maʼalob ka k-luʼsba yáanal le nuʼuktaj ku tsʼáaikoʼ. Jéeobaeʼ maʼatech u tsʼáaik u yutsil tiʼ le máaxoʼob maʼ tu yuʼubkoʼob tʼaan yéetel maʼ tu chaʼik u nuʼuktaʼaloʼoboʼ (Números 12:1, 2, 9-11).
Jéeobaeʼ ku tsʼáaik u yutsil tiʼ máax ku múul meyaj yéetel kiʼimak óolal
17. ¿Bix unaj k-ilik le ancianoʼoboʼ?
17 Jéeoba Dioseʼ u yojleʼ le máaxoʼob u tsʼaamaj u beet u ancianoiloʼobeʼ kʼeban wíinikoʼob. Kex beyoʼ, maʼ tu luʼsik le meyaj u tsʼaamajtiʼoboʼ, baʼaxeʼ ku yáantikoʼob yéetel u kiliʼich muukʼ utiaʼal ka u kanáantoʼob u kaajal. Kex wa ancianoʼon wa maʼatecheʼ, ku béeytal tiʼ toʼon le tʼaanoʼobaʼ: «Le nojoch páajtalilaʼ tiʼ Jajal Dios u taal, maʼ tiʼ toʼoniʼ» (2 Corintoiloʼob 4:7). Bey túunoʼ, unaj k-tsʼáaik nib óolal tiʼ Jéeoba yoʼolal le baʼax ku beetaʼal tumen le ancianoʼoboʼ, yéetel unaj k-múul meyaj yéetel kiʼimak óolal tu yéeteloʼob.
18. ¿Baʼax ken k-eʼes wa k-chaʼik nuʼuktaʼal tumen le ancianoʼoboʼ?
18 Le ancianoʼoboʼ jach ku yilik u beetikoʼob le baʼax ku yaʼalik Jéeoba tiʼ le máaxoʼob u tsʼaamaj utiaʼal ka u kanáantoʼob u kaajal teʼ tsʼook kʼiinoʼobaʼ: «Bíin in tsʼáa le Méekʼtáanoʼob in [kʼáateʼ], letiʼob bíin [gobernartikeʼex] yéetel ojéelajil bey [xan] yéetel naʼat» (Jeremías 3:15). U jaajileʼ, le máaxoʼob nuʼuktik le múuchʼuliloʼoboʼ jach táan u kaʼanskoʼob yéetel u kanáantkoʼob u kaajal Jéeoba. Le oʼolaleʼ koʼoneʼex múul meyaj tu yéeteloʼob, koʼoneʼex uʼuyikeʼex u tʼaanoʼob yéetel k-chaʼik u nuʼuktikoʼonoʼob. Wa k-beetik beyaʼ yaan k-eʼesik jach kiʼimak k-óol yoʼolal le meyaj ku beetikoʼoboʼ yéetel yaan xan k-eʼesik yaabiltmaj Jéeoba yéetel Jesús, le Máaxoʼob kanáantkoʼonoʼ.
Utiaʼal kʼaʼajsbil
• Jéeoba yéetel Jesuseʼ, ¿bix tsʼoʼok u yeʼesikoʼob ku nuʼuktajoʼob yéetel yaabilaj?
• ¿Baʼaxten unaj k-uʼuyik tʼaan yéetel k-chaʼik nuʼuktaʼal?
• ¿Bix jeʼel k-eʼesik chaʼik nuʼuktaʼal?
[U kʼáatchiʼiloʼob le xookoʼ]
[U tsolajil le oochel teʼ táan juʼun 28]
Le ancianoʼoboʼ ku tsʼáaikubaʼob yáanal u nuʼuktaj Cristo
[U tsolajil le oochel teʼ táan juʼun 29]
Yaʼab bix jeʼel k-eʼesik tsʼáaikba yáanal u nuʼuktaj le ancianoʼob tsʼaʼanoʼob tumen Jéeobaoʼ