¿Unaj wa k-chʼaʼik saajkil tiʼ u taalbal Cristo?

¿BAʼAXOʼOB ka tuklik kun úuchul ken taalak Cristo? ¿Yaan wa u sen yantal muʼyajil yéetel yaan wa u xuʼulsaʼal tiʼ wíinik? ¿Yaan wa u xuʼulsaʼal le talamiloʼob k-aktáantikoʼ? ¿Unaj wa k-chʼaʼik saajkil wa unaj k-tsʼíiboltik u taalbal?

Le Bibliaoʼ ku yaʼalik yoʼolal u taalbal Cristo: «¡Ileʼex, táan u taal Cristo ichil le múuyaloʼoboʼ! Yaan u yilaʼal tumen tuláakal máakoʼob, [...] tuláakal u kajnáaliloʼob yóokʼol kaabeʼ bíin okʼolnakoʼob tu yoʼolal letiʼ» (Apocalipsis 1:7). Le tekstoaʼ táan u tʼaan tiʼ u kʼiinil u taalbal Cristo utiaʼal u salvart le máakoʼob toj u kuxtaloʼoboʼ yéetel utiaʼal u castigart le máaxoʼob beetik baʼaloʼob kʼaastakoʼ.

Apóstol Juaneʼ maʼ tu chʼaʼaj saajkil tiʼ u kʼiinil u taalbal Cristoiʼ, baʼaxeʼ tu tsʼíiboltaj ka taalak. Ka tsʼoʼok u yeʼesaʼal tiʼ bix kun taal Cristo yéetel baʼax utsiloʼob ken u taas way yóokʼol kaabeʼ, letiʼeʼ tu yaʼalaj: «¡Koʼoten, Yuumtsil Jesús!» (Apocalipsis 22:20). Chéen baʼaleʼ, ¿baʼaxten túun ku yokʼol «tuláakal u kajnáaliloʼob yóokʼol kaab [...] tu yoʼolal» Cristo? ¿Baʼaxten ku yaʼalaʼal yaan u yilaʼal «tumen tuláakal máak»? ¿Baʼax utsiloʼob ken u taase, yéetel baʼaxten maʼalob ka chúukpajak k-óol páaʼt u taalbal? Le kʼáatchiʼobaʼ yaan u núukaʼaloʼob teʼ tuláakʼ xookoʼ.