¿Ka creertik wa jach tu jaajil yaan u kaʼa kuxkíintaʼal le kimenoʼoboʼ?
¿Ka creertik wa jach tu jaajil yaan u kaʼa kuxkíintaʼal le kimenoʼoboʼ?
«Yaan u kaʼapúut kuxtal le kimenoʼoboʼ.» (BEETAʼANOʼOB [HECHOS] 24:15.)
1. ¿Baʼaxten k-aʼalik k-enemigo le kíimiloʼ?
TU JAʼABIL 1789, utúul político tiʼ Estados Unidos ku kʼaabaʼtik Benjamín Franklineʼ, tu yaʼalaj: «Teʼ yóokʼol kaabaʼ maʼ tu páajtal u púutsʼul máak tiʼ le kíimiloʼ mix tiʼ u boʼotik impuestoʼob». Utiaʼal yaʼab máakoʼobeʼ jach jaaj le baʼax tu yaʼalaj le politicoaʼ. Kex beyoʼ, yaʼab máakoʼobeʼ ku yilkoʼob bix jeʼel u jechkoʼob u boʼotikoʼob le impuestoʼoboʼ. Baʼaleʼ, le kíimiloʼ bey mix máak jeʼel u páajtal u jechikeʼ. Le muknal tuʼux ku bin máak ken kíimikoʼ, bey u japmaj u chiʼ utiaʼal u lukʼik le máaxoʼob k-yaabilmoʼoboʼ (Proverbios 27:20). Baʼaleʼ, yaan upʼéel baʼal jach ku líiʼsik u yóol máak.
2, 3. 1) ¿Baʼaxten jeʼel u páajtal k-aʼalik yaan máaxoʼob maʼ kun kíimloʼob? 2) ¿Baʼax ken k-il teʼ xookaʼ?
2 Le Bibliaoʼ ku yaʼaliktoʼon yaan u kaʼa kuxkíintaʼal le kimenoʼoboʼ. Lelaʼ upʼéel baʼal jach yaan u yúuchul, tumen mix máak jeʼel u beetik maʼ u béeykuntaʼal tumen Jéeobaeʼ. Baʼaleʼ yaan máaxoʼob kuxaʼanoʼob teʼ kʼiinoʼobaʼ, maʼ kun kíimloʼob jeʼex u tuklaʼal kun úuchul tiʼ tuláakal máakeʼ. ¿Baʼaxten k-aʼalik lelaʼ? Tumen «yaʼabkach máakoʼob» ken u salvartubaʼob ken taalak le «nojoch yaayaj óolaloʼ» (Apocalipsis 7:9, 10, 14). Le ken tsʼoʼokok le nojoch yaayaj óolaloʼ, le yaʼabach máakoʼobaʼ yaan u yantaltiʼob u páajtalil u kuxtaloʼob utiaʼal minaʼan u xuul. Le oʼolal jeʼel u páajtal u yaʼalaʼaleʼ, letiʼobeʼ maʼ kun kíimloʼob. Tsʼoʼoleʼ, jeʼex u yaʼalik le Bibliaoʼ «u tsʼook baʼax kun xuʼulsbileʼ letiʼ le kíimiloʼ» (1 Corintoiloʼob 15:26).
3 Teʼ kʼiinoʼobaʼ, unaj k-creertik jach tu jaajil yaan u kaʼa kuxkíintaʼal le kimenoʼob, jeʼex úuchik u creertik apóstol Pablo le ka tu yaʼalaj: «Yaan u kaʼapúut kuxtal le kimenoʼoboʼ, le utstakoʼoboʼ bey xan le kʼasaʼanoʼoboʼ» (Beetaʼanoʼob 24:15). Koʼox tʼaan tiʼ óoxpʼéel kʼáatchiʼob yaan yil yéetel u kaʼa kuxkíintaʼal le kimenoʼoboʼ. Yáaxeʼ, ¿baʼaxoʼob eʼesiktoʼon jach yaan u kaʼa kuxkíintaʼal le kimenoʼoboʼ? U kaʼapʼéeleʼ, ¿bix u líiʼsik k-óol ojéeltik yaan u kaʼa kuxkíintaʼaloʼob? Yéetel u yóoxpʼéeleʼ, ¿bix u yáantkoʼon k-beet baʼax u kʼáat Dios?
Jach tu jaajil yaan u kaʼa kuxkíintaʼaloʼob
4. ¿Baʼaxten k-aʼalik le u kaʼa kuxkíintaʼal le kimenoʼoboʼ tiaʼan ichil le baʼaxoʼob u tukulmaj u beetik Diosoʼ?
4 Yaʼab baʼaxoʼob eʼesik yaan u kaʼa kuxtal le kimenoʼoboʼ. Yáaxeʼ, tumen leloʼ tiaʼan ichil le baʼaxoʼob u tukulmaj u beetik Jéeobaoʼ. Kʼaʼajaktoʼoneʼ úuchik u beetik Satanás u lúubul wíinik tiʼ kʼebaneʼ, le beet u yantal le kíimiloʼ. Le oʼolal Jesuseʼ tu yaʼaleʼ, le Kʼaasilbaʼaloʼ «juntúul kíimsaj wíinik tu yáax chuun» (Juan 8:44). Baʼaleʼ, Jéeobaeʼ tu yaʼaleʼ, le «koʼolel» wa le u angeloʼob yanoʼob teʼ kaʼan ku keʼetel bey u yataneʼ, yaan u yantal kaʼach utúul u «chʼiʼibal» yaan u pechʼik u pool «le úuchben kaan[oʼ]» wa yaan u xuʼulsik upuliʼ tiʼ Satanás (Génesis 3:1-6, 15; Apocalipsis 12:9, 10; 20:10). Jeʼex binik u yeʼesik Jéeoba baʼax ken u beet le Chʼiʼibaloʼ, chíikpajeʼ le Chʼiʼibaloʼ maʼ chéen yaan u xuʼulsik tiʼ Satanasiʼ. Le Bibliaoʼ ku yaʼalik: «U Paal Jajal Dioseʼ j-taal utiaʼal u mixbaʼalkúunt le baʼax u beetmaj kʼaasibaʼaloʼ» (1 Juan 3:8). Le kíimil anchaj úuchik u kʼebantal Adanoʼ, letiʼe yáax baʼax u kʼáat Jéeoba ka xuʼulsaʼak tumen Jesucristooʼ. Baʼaleʼ, utiaʼal ka béeyak lelaʼ kʼaʼabéetchaj u kíimil yéetel u kaʼa kuxtal Jesús (Beetaʼanoʼob 17:31; Romailoʼob 6:23).
5. Jéeobaeʼ, ¿bix ken u nojbeʼenkúunt u kʼaabaʼ le ken u kaʼa kuxkíint le kimenoʼoboʼ?
Génesis 2:16, 17; 3:4). Teʼ kʼiinoʼobaʼ láayliʼ táan xan u tusik wíinikoʼobeʼ, ku beetik u creerkoʼob yaan upʼéel pixan ku pʼáatal kuxaʼanil tiʼ máak ken kíimik le wíinkliloʼ. Baʼaleʼ, ken u kaʼa kuxkíint le kimenoʼoboʼ, Jéeobaeʼ yaan u yeʼesik chéen tuus ku beetik le Kʼaasilbaʼaloʼ. Letiʼeʼ yaan u yeʼesik chéen letiʼ jeʼel u kaʼa tsʼáaik kuxtal tiʼ wíinikeʼ.
5 Tsʼoʼoleʼ, Dioseʼ jach u chʼaʼatukulmaj u nojbeʼenkúuntik u kiliʼich kʼaabaʼ. Le Kʼaasilbaʼaloʼ tsʼoʼok u pʼatik kʼaasil u kʼaabaʼ Dios ikil u beetik u creertaʼal baʼaloʼob maʼ jaajtakiʼ. Letiʼeʼ tu tusaj Adán yéetel Eva le ka tu yaʼalajtiʼob maʼ kun kíimiloʼob wa ku jaantkoʼob u yich le cheʼ aʼalaʼabtiʼob maʼ u jaantkoʼoboʼ (6, 7. ¿Baʼax u kʼáat u beet Jéeoba tu yoʼolal le kimenoʼoboʼ, yéetel baʼax eʼesiktoʼon jach u kʼáat u beete?
6 Jéeobaeʼ jach u kʼáat u kaʼa kuxkíint le kimenoʼoboʼ. Le Bibliaoʼ bey u yeʼesikoʼ. Job, utúul máax chúukpaj u yóol u meyajt Dioseʼ, tu yaʼalaj: «¿Bíin kaʼa kuxlak wa le j-xiib ku kíimiloʼ? Jeʼel in páaʼtik loʼobal tuláakal u kʼiiniloʼob in kuxtaleʼ tak ken kʼuchuk u kʼiinil in wutstal yéetel u máan in yaj óolaloʼob. Techeʼ bíin a tʼanen, teen xaneʼ bíin in núuk a tʼaan; bíin wal a pakten yéetel yaakunajeʼ, tumen teech beetmajilen» (Job 14:14, 15). ¿Baʼax u kʼáat u yaʼal le tʼaanoʼobaʼ?
7 Jobeʼ jach u yojel ken kíimikeʼ, unaj u «páaʼtik» u kʼuchul u kʼiinil u líiʼsaʼal. Letiʼeʼ u yojel jach yaan u «kʼuch[ul] u kʼiinil» u yúuchul lelaʼ. ¿Baʼaxten? Tumen u yojel Jéeobaeʼ ku tsʼíiboltik u kaʼa paktik yéetel yaakunaj le máax chúukpaj u yóol meyajtikoʼ. Jach beyoʼ, Dioseʼ taak u kaʼa kuxkíintik tuláakal le máaxoʼob utstakoʼob tu beetoʼob baʼax u kʼáatoʼ. Yéetel yaan u tsʼáaik tiʼ uláakʼ máakoʼob u páajtalil u kuxtaloʼob utiaʼal minaʼan u xuul tiʼ upʼéel Paraíso way Luʼumeʼ (Lucas 23:43; Juan 5:28, 29). Wa Dios u kʼáat u beet lelaʼ, ¿máax jeʼel u beetik maʼ u béeykuntikeʼ?
8. ¿Bix tu yeʼesil Jéeoba yaan u kaʼa kuxkíintaʼal le kimenoʼoboʼ?
8 Le úuchik u kaʼa kuxkíintaʼal Jesusoʼ tu yeʼesaj jach tu jaajil yaan u kaʼa kuxkíintaʼal le kimenoʼoboʼ. Tiʼ upʼéel tsoltʼaan tu beetaj Pablo tu kaajil Atenaseʼ, tu yaʼalaj: «Jajal Dioseʼ u tsʼaamaj jumpʼéel kʼiin ikil ku bin u pʼis óolt yóokʼol kaab yéetel tojil, tu yoʼolal juntúul máak u yéeymaj; lelaʼ tu jaajkúuntaj tu táan tuláakal máak ikil tu kaʼapúut kuxkíintilak ichil le kimenoʼoboʼ» (Beetaʼanoʼob 17:31). Yaʼab máaxoʼob pʼaʼast Pablo le ka joʼopʼ u kaʼansik yaan u kaʼa kuxkíintaʼal le kimenoʼoboʼ, baʼaleʼ jujuntúuloʼobeʼ tu creertoʼob le baʼax tu kaʼansaj Pabloaʼ, maʼ xaaneʼ tumen u yojloʼob kaʼa kuxkíintaʼab Cristo. Jéeobaeʼ le ka tu kaʼa kuxkíintaj Jesuseʼ, tu beetaj upʼéel jach nojoch milagro: tu tokaj Jesús tu kʼab le kíimiloʼ yéetel tu tsʼáaj tiʼ upʼéel wíinklil jeʼex le yaan tiʼ kaʼach teʼ kaʼanoʼ (1 Pedro 3:18). Tsʼaʼab xan tiʼ upʼéel maas nojoch páajtalil ke le yaan tiʼ kaʼach le maʼ taalak way Luʼumeʼ, chéen Jéeoba maas yaan u páajtalil tiʼ. Yoʼolal le páajtalil tsʼaʼab tiʼoʼ yéetel tumen mix bikʼin kun kaʼa kíimileʼ, Jesuseʼ jeʼel u páajtal u beetik jeʼel baʼalak meyajil ka tsʼaʼabak tiʼ tumen u Taataeʼ. Letiʼ kun meyaj tiʼ Jéeoba utiaʼal u kaʼa líiʼsik le máaxoʼob kun binoʼob kaʼanoʼ yéetel le kun pʼáatloʼob way Luʼumeʼ. Tsʼoʼoleʼ Jesuseʼ, tu yaʼalaj: «Teen [...] le kaʼapúut kuxtaloʼ yéetel le kuxtaloʼ» (Juan 5:25; 11:25). Le ka tu kaʼa kuxkíintaj u Hijoeʼ, Jéeobaeʼ tu yeʼesaj tiʼ máaxoʼob meyajtikeʼ jach tu jaajil yaan u kaʼa kuxkíintik le kimenoʼoboʼ.
9. ¿Bix u yeʼesik le Biblia yaan u kaʼa kuxkíintaʼal le kimenoʼoboʼ?
9 Úuchileʼ yanchaj máaxoʼob tu yiloʼob u kaʼa kuxkíintaʼal le kimenoʼoboʼ, tsʼoʼoleʼ tsʼíibtaʼan xan teʼ Biblia le baʼax úuchoʼ. Teʼ Bibliaoʼ ku tsikbaltaʼal bix úuchik u kaʼa kuxkíintaʼal ocho utúulal máakoʼob utiaʼal ka kuxlakoʼob way Luʼumeʼ, tsʼoʼoleʼ lelaʼ beetaʼaboʼob tu táan yaʼabach máakoʼob. Jesuseʼ tu kaʼa kuxkíintaj Lázaro, utúul máax tsʼoʼok cuatro kʼiinoʼob kíimik kaʼachi, lelaʼ tu beetaj tu táan yaʼabach máakoʼob, tuʼux maʼ xaaneʼ tiaʼan kaʼach u láakʼtsiloʼobiʼ, u amigoʼob yéetel u vecinoʼob. Le milagroaʼ jach tu yeʼesaj Jesuseʼ u Hijo Dios, yéetel tak le máaxoʼob pʼekmailoʼ tu tsʼáajoʼob cuenta, baʼaleʼ kex beyoʼ tu chʼaʼatukultoʼob bix jeʼel u kíimskoʼob Jesús bey xan Lázaroeʼ (Juan 11:17-44, 53; 12:9-11). Le oʼolal túun jach jeʼel u páajtal k-creertik yaan u kaʼa kuxkíintaʼal le kimenoʼoboʼ. Utiaʼal u líiʼsik k-óol yéetel utiaʼal u muʼukʼankúuntik k-fejeʼ, Dioseʼ tu beetaj u tsʼíibtaʼal teʼ Biblia u tsikbalil le máaxoʼob kaʼa kuxkíintaʼaboʼoboʼ.
K-ojéeltik yaan u kaʼa kuxkíintaʼal le kimenoʼoboʼ unaj u líiʼsik k-óol
10. ¿Baʼax unaj k-beetik utiaʼal ka u líiʼs k-óol u tsikbalil le máaxoʼob ku yaʼalik le Biblia kaʼa kuxkíintaʼaboʼoboʼ?
10 Ken kíimik utúul wa máax k-yaabilmeʼ, ¿máasaʼ jach k-kʼáat ka líiʼsaʼak k-óol? U tsikbalil le máaxoʼob kaʼa kuxkíintaʼaboʼob tsʼíibtaʼanoʼob teʼ Bibliaoʼ jach jeʼel u líiʼsik k-óoleʼ. K-xokikoʼob, k-tuukul tu yoʼolaloʼob yéetel k-máansik k-tuukul bix úuchikoʼobeʼ jeʼel u beetik k-maas creertik yaan u kaʼa kuxkíintaʼal le kimenoʼoboʼ (Romailoʼob 15:4). Jach tu jaajil anchaj máaxoʼob kaʼa kuxkíintaʼaboʼob. Le máaxoʼob kaʼa kuxkíintaʼaboʼoboʼ wíinikoʼob jeʼex toʼoneʼ, ojéelaʼan tuʼux kajlajoʼob yéetel baʼax kʼiin ka kuxlajoʼob. Koʼox tʼaan tiʼ le yáax máax kaʼa kuxkíintaʼab ku yaʼalik le Bibliaoʼ.
11, 12. 1) ¿Baʼax jach nojoch muʼyajil tu aktáantaj le koʼolel kimen u yíichamoʼ, yéetel tak baʼax kʼuch u yaʼale? 2) Yéetel u yáantaj profeta Elíaseʼ, ¿baʼax tu beetaj Jéeoba tu yoʼolal le koʼolel kimen u yíichamoʼ?
11 Koʼox ilik baʼax úuchi. Tsʼoʼok u máan kaʼach kʼiinoʼob joʼopʼok u kʼubéentikuba profeta Elías tu yotoch le koʼolel kimen u yíicham kajaʼan Sareptaoʼ. Teʼ kʼiinoʼob jeʼeloʼ tu kaajil Sarepta yéetel tu baʼpachiloʼobeʼ táan kaʼach u muʼyajtaʼal upʼéel sen nojoch wiʼijil tu beetaj u kíimil yaʼab máakoʼob. Yéetel upʼéel milagro tu beetaj Elíaseʼ, Jéeobaeʼ tsʼokaʼaniliʼ u yáax eʼesik u yutsil tiʼ le koʼolel jach anchaj u fejoʼ. Le koʼolel yéetel u hijoeʼ táan kaʼach u xuʼupul baʼal u jaantoʼob, chéen u jaanlil upʼéel kʼiin pʼaataltiʼob kaʼach le ka yaʼabkuntaʼabtiʼob le harina yéetel le aceite tumen le profetaoʼ. Baʼaleʼ, le koʼolelaʼ tu aktáantaj uláakʼ upʼéel nojoch muʼyajil. U hijoeʼ kʼojaʼanchaji yéetel séeb úuchik u kíimil. Le koʼolelaʼ jach lúub u yóol. Talam u kaxtik u kuxtal kaʼach tumen kimen u yíicham, u tsʼookeʼ ka kíim xan u juntúuliliʼ hijo. Le nojoch muʼyaj ku aktáantikoʼ, tu beetaj tak u yaʼalikeʼ Elías yéetel Jéeoba beetikoʼob u muʼyaj. ¿Baʼax túun tu beetaj Elías?
12 Elíaseʼ maʼ tu kʼeyaj le koʼolel yoʼolal baʼax tu yaʼalajoʼ, baʼaxeʼ tu yaʼalaj tiʼ: «Tsʼáa tiʼ teen a waaloʼ». Letiʼeʼ tu bisaj le chan xiʼipal teʼ cuarto yaan kaʼanal teʼ tuʼux ku kʼubéentikubaoʼ, ka tu sen kʼáataj tiʼ Dios ka u beet u kaʼa kuxtal. Jéeoba 1 Reyes 17:8-24). Le koʼolel túunoʼ maas muʼukʼanchaj u fe tiʼ Jéeoba yéetel tiʼ u profeta.
túuneʼ tu yuʼubaj u kʼáat óolal Elías. Chéen tukult bukaʼaj úuchik u kiʼimaktal u yóol Elías le ka tu yilaj tsʼoʼok u kaʼa káajal u chʼaʼik u yiikʼ le chan xiʼipaloʼ. Le ka tu bisaj u kʼub le chan xiʼipal tiʼ u maamaoʼ, tu yaʼalaj tiʼ: «¡[Ile], a waaleʼ kuxaʼan!». Le koʼolel jach kiʼimakchajaʼan u yóoloʼ, tu yaʼalaj: «Bejelaʼeʼ jach tu jaajil in wojel techeʼ juntúul u paalech [Dios], le baʼax ka waʼalikoʼ jumpʼéel jaaj tiʼ Yuumtsil u taal» (13. ¿Baʼaxten ku líiʼsik k-óol u tsikbalil úuchik u kaʼa kuxkíintaʼal u hijo le koʼolel kimen u yíichamoʼ?
13 ¿Máasaʼ jach ku líiʼsik k-óol k-tuukul tiʼ le baʼax úuchaʼ? Jeʼex tsʼoʼok k-ilkoʼ, Jéeobaeʼ yaan u xuʼulsik tiʼ le kíimiloʼ. Chéen tukult le ken kʼuchuk u kʼiinil u yaʼalik Jéeoba tiʼ u Hijo ka u kaʼa kuxkíint le kimenoʼoboʼ. Yaʼabach máakoʼob kun kiʼimaktal u yóoloʼob jeʼex le koʼolel kimen u yíichamoʼ, yéetel teʼ kaʼan xanoʼ jach yaan u yantal kiʼimak óolaliʼ (Juan 5:28, 29). ¿Yaan wa máax a yaabilmaj tsʼoʼok u kíimil? ¡Jach ku líiʼsik k-óol ojéeltik yaan u kaʼa kuxkíintaʼal le kimenoʼob tumen Jéeobaoʼ!
K-ojéeltik yaan u kaʼa kuxkíintaʼal le kimenoʼoboʼ ku yáantikoʼon k-beet baʼax u kʼáat Dios
14. ¿Bix jeʼel u yáantkech le a wojéeltik yaan u kaʼa kuxkíintaʼal le kimenoʼoboʼ?
14 ¿Bix u yáantkech le a wojéeltik yaan u kaʼa kuxkíintaʼal le kimenoʼoboʼ? Jeʼel u yáantkech a aktáant le talamiloʼoboʼ, le chʼaʼapachtajiloʼ wa uláakʼ baʼaloʼob jeʼel u beetiktoʼon loobeʼ. Satanaseʼ u kʼáat ka a jach chʼaʼa saajkil tiʼ le kíimiloʼ, utiaʼal ka a pʼáat a meyajtik Jéeoba. Kʼaʼajaktecheʼ le Kʼaasilbaʼaloʼ tu yaʼalaj tiʼ Jéeoba: «Wíinikeʼ, jeʼel u kʼubik tuláakal baʼax utiaʼal, tu yoʼolal maʼ u kíimsaʼal[eʼ]» (Job 2:4). Le baʼax tu yaʼalaj Satanasaʼ, tu pʼataj kʼaasil tuláakal wíinikoʼob, tuʼux tak teech táakaʼanechiʼ. ¿Jach wa tu jaajil yaan a pʼatik Dios ken a aktáant upʼéel baʼax jeʼel u beetiktech loobeʼ? Wa mantatsʼ ka kʼaʼajsik yaan u kaʼa kuxtal le kimenoʼoboʼ, leloʼ yaan u yáantkech a chʼaʼatukult maʼ u jáawal a beetik baʼax u kʼáat Dios.
15. Ken k-aktáant wa baʼax loobiloʼobeʼ, ¿bix u líiʼsik k-óol le baʼax tu yaʼalaj Jesús teʼ Mateo 10:28?
15 Jesuseʼ tu yaʼalajeʼ maʼ unaj k-chʼaʼik «sajakil tiʼ le máaxoʼob ku kíimsikoʼob le wíinkliloʼ, baʼaleʼ maʼ táan u páajtal» u luʼskoʼob k-kuxtal utiaʼal mix bikʼin, baʼaxeʼ tu yaʼaleʼ ka k-chʼaʼa «sajakil tiʼ le máax ku páajtal» u luʼsik k-kuxtal utiaʼal mantatsʼoʼ (Mateo 10:28). Maʼ unaj k-chʼaʼik saajkil tiʼ Satanasiʼ mix tiʼ le máaxoʼob meyajtik way Luʼumeʼ. U jaajileʼ yaan jujuntúul máakoʼob jeʼel u beetkoʼobtoʼon loobeʼ, wa tak u kíimskoʼonoʼobeʼ, baʼaleʼ jeʼel baʼalak ka u beetoʼob toʼoneʼ maʼ utiaʼal mantatsʼiʼ. Jéeobaeʼ, yaan u yutskíintik jeʼel baʼalak ka u muʼyajt le máaxoʼob meyajtikoʼ, yéetel wa ku kíimloʼobeʼ yaan u kaʼa kuxkíintkoʼob. Chéen Jéeoba ku náajaltik ka k-chʼaʼa saajkil tiʼ, ka k-uʼuy u tʼaan yéetel ka k-eʼes tsiikil tiʼ. Chéen letiʼ jeʼel u páajtal u luʼsik k-kuxtal utiaʼal mix bikʼineʼ. Jach ku kiʼimakkúuntik óol k-ojéeltik Jéeobaeʼ maʼ u kʼáat ka úuchuktoʼon lelaʼ (2 Pedro 3:9). Tumen k-ojel yaan u kaʼa kuxtal le kimenoʼoboʼ, maʼatech k-chʼaʼik saajkil tiʼ le kíimiloʼ. Le máaxoʼob kun chúukpajal u yóol u meyajtoʼob Diosoʼ yaan u yantaltiʼob kuxtal minaʼan u xuul, yéetel mix Satanás mix le máaxoʼob tsaypachtik jeʼel u páajtal u kʼaskúuntkoʼob le baʼax u tukulmaj u beetik Jéeobaoʼ (Salmo 118:6; Hebreob 13:6).
16. K-ojéeltik yaan u kaʼa kuxkíintaʼal le kimenoʼoboʼ, ¿bix u yáantkoʼon k-il baʼax unaj k-tsʼáaik táanil ichil k-kuxtal?
16 Wa k-creertik jach tu jaajil yaan u kaʼa kuxkíintaʼal le kimenoʼoboʼ, leloʼ yaan u yáantkoʼon utiaʼal k-kuxtal jeʼex u kʼáat Jéeobaeʼ. Yaan u kʼuchul k-naʼateʼ, «wa kuxaʼanoʼoneʼ, kuxaʼanoʼon utiaʼal Yuumtsil, wa k-kíimileʼ, k-kíimil utiaʼal Yuumtsil» (Romailoʼob 14:7, 8). Wa k-naʼatik le baʼax tsʼoʼok k-aʼalikaʼ yaan k-beetik le baʼax tu yaʼalaj le apóstol Pabloaʼ: «Maʼ a kuxtaleʼex jeʼel bix u yaʼalik le yóokʼol kaabaʼ; baʼaleʼ kʼexeʼex a tuukuleʼex utiaʼal ka túumbenchajak a kuxtaleʼex. Beyoʼ jeʼel a wojéeltikeʼex máakalmáak u yóolal Jajal Dioseʼ, u kʼáat u yaʼaleʼ le baʼax maʼaloboʼ, baʼax utstutʼaanoʼ yéetel baʼax jach tubeel» (Romailoʼob 12:2). Yaʼab máakoʼobeʼ ku yilkoʼob ka yanaktiʼob tu séebaʼanil tuláakal le baʼax ku tsʼíibolkoʼoboʼ. Tumen ku yilkoʼob jach kóom le kuxtalaʼ, ku chʼíikil u kaxtoʼob chéen baʼax utstuyichoʼob, yéetel kex wa yaan u religionoʼobeʼ, maʼatech u beetkoʼob «baʼax utstutʼaan» Dios.
17, 18. 1) Le Bibliaoʼ, ¿bix u yaʼalik jach kóom u kuxtal wíinik, baʼaleʼ baʼax u kʼáat Dios ka yanaktoʼon? 2) ¿Baʼax péekskoʼon k-nojbeʼenkúunt Jéeoba sáamsamal?
17 U jaajileʼ, kóom le kuxtaloʼ. «¡Séebaʼan u máan le jaʼaboʼoboʼ bey xan toʼon!» U maasil u náakal k-kuxtaleʼ setenta wa ochenta jaʼaboʼob (Salmo 90:10). K-kuxtaleʼ bey jeʼex upʼéel xíiweʼ, jeʼex upʼéel boʼoy ku máaneʼ, jeʼex upʼéel múus iikʼeʼ, bejlaʼeʼ way yanoʼoneʼ sáamaleʼ maʼatech (Salmo 103:15; 144:3, 4). Baʼaleʼ, Dioseʼ maʼ tu beetoʼon chéen utiaʼal ka nojochchajkoʼon, ka kaambalnakoʼon yéetel ka yanak k-naʼatiʼ, tsʼoʼoleʼ ka kʼojaʼanchajkoʼon, ka chʼíijkoʼon yéetel ka kíimkoʼoniʼ. Le ka tu beetaj wíinikeʼ, Jéeobaeʼ tu tsʼáaj u tsʼíibolalil tiʼ u kuxtal utiaʼal minaʼan u xuul. Le Bibliaoʼ ku yaʼalik: «Tu tsʼáaj xan tiʼ wíinik u tuukulil minaʼan xuʼulul» (Eclesiastés 3:11). ¿Kʼasaʼan wa Dios ikil tu tsʼáajilaktoʼon u tsʼíibolalil k-kuxtal utiaʼal mantatsʼ, ku tsʼoʼoleʼ maʼ u chaʼik u béeychajal? Maʼatech, tumen «Jajal Dioseʼ yaakunaj» (1 Juan 4:8). Letiʼeʼ yaan u kaʼa kuxkíintik le máaxoʼob tsʼoʼok u kíimloʼoboʼ utiaʼal u tsʼáaiktiʼob u páajtalil u kuxtaloʼob minaʼan u xuul.
18 Tumen k-ojel yaan u kaʼa kuxkíintaʼal le kimenoʼoboʼ, maʼ ken k-chʼaʼa saajkil tiʼ jeʼel baʼalak ka k-aktáanteʼ. Maʼ maʼalob ka kuxlakoʼon chéen utiaʼal k-kaxtik k-tsʼíibolaloʼobiʼ. Maʼ unaj xan k-ilik «náajaltik» u baʼalubaʼob le yóokʼol kaab táan u bin u xuʼululaʼ (1 Corintoiloʼob 7:29-31; 1 Juan 2:17). U maasil máakoʼobeʼ maʼ táan u páaʼkoʼob le baʼax táan k-páaʼtik toʼonoʼ, toʼoneʼ k-ojleʼ wa ku chúukpajal k-óol meyajt Dioseʼ, yaan k-kuxtal utiaʼal minaʼan u xuul, utiaʼal k-nojbeʼenkúuntik Dios yéetel utiaʼal k-jach kiʼikiʼ óoltik le kuxtaloʼ. Le oʼolaleʼ, koʼox nojbeʼenkúuntik sáamsamal Jéeoba, le Máax aʼalik jach tu jaajil yaan u kaʼa kuxkíintik le kimenoʼoboʼ.
¿Bix jeʼel k-núukikeʼ?
• ¿Bix unaj k-uʼuyikba ikil k-ojéeltik yaan u kaʼa kuxkíintaʼal le kimenoʼoboʼ?
• ¿Baʼaxoʼob eʼesiktoʼon yaan u kaʼa kuxkíintaʼal le kimenoʼoboʼ?
• ¿Baʼax unaj a beetik utiaʼal ka u líiʼs a wóol u tsikbalil le máaxoʼob kaʼa kuxkíintaʼaboʼob úuchiloʼ?
• Le k-ojéeltik yaan u kaʼa kuxkíintaʼal le kimenoʼoboʼ, ¿bix u yáantkoʼon bejlaʼeʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 19]
«¡[Ile], a waaleʼ kuxaʼan!»
[U tsolajil le oochel teʼ táan juʼun 20]
Jobeʼ u yojel kaʼach Jéeobaeʼ u kʼáat u kaʼa kuxkíint le máaxoʼob utsoʼoboʼ