Le baʼaxoʼob jeʼel u páajtal u beetik le aakʼoʼ

UCHOWAKIL u yaakʼ utúul jirafaeʼ ku chukik tak 45 centímetros yéetel jach yaan u muukʼ utiaʼal u kotsik u leʼ le cheʼoboʼ. U aalil u yaakʼ utúul ballena azuleʼ bey jeʼex u aalil utúul elefanteiʼ. ¡Chéen tukult bukaʼaj muukʼ kʼaʼabéet utiaʼal u péeksaʼal tak chéen u yaakʼoʼ!

Tu tséel u yaakʼ le baʼalcheʼobaʼ, u yaakʼ máakeʼ bey jach mix baʼaleʼ, tumen maas chichan yéetel maas minaʼan u muukʼ. Baʼaleʼ kex chichaneʼ maas yaan páajtalil tiʼ utiaʼal u beetik baʼaloʼob nuuktak, le Bibliaoʼ ku yaʼalik: «U kuxtal yéetel [u] kíimil wíinikeʼ yaan baʼax u yilaʼa yéetel u yaakʼ» (Proverbios 18:21). Lelaʼ jach jaaj, tumen cada k-uʼuyik u yaʼalaʼal u bin kʼaasil wa u kíimil yaʼab máakoʼob tu yoʼolal upʼéel tuus wa yoʼolal u yaʼalaʼal upʼéel baʼax maʼ jaaj tu contra wa máax mix baʼal u beetmiʼ.

Le tʼaanoʼob xan ku beetik u yaatal u yóol máakoʼ ku beetik u kʼuuxil tak máakoʼob úuch joʼopʼok u biskubaʼob, yéetel le tʼaanoʼob ku beetaʼal chéen minaʼan u cuentailoʼ ku beetik u lúubul u yóol máak. Job, utúul máak sen pʼaʼastaʼab tumen óoxtúul máakoʼob ku yaʼalikubaʼob u amigoʼob kaʼacheʼ, tu yaʼalaj: «¿Baʼax kʼiin bíin jáawak a beetikeʼex in mukʼyaj yéetel a kʼilkeneʼex yéetel a tʼaaneʼex?» (Job 19:2). Santiago, utúul u disipulo Jesuseʼ, tu yeʼesaj baʼax yéetel jeʼel u páajtal u ketaʼal le nojoch loob jeʼel u beetik upʼéel aakʼ ku tʼaan chéen minaʼan u cuentaileʼ: «U yaakʼ [wíinikeʼ] jun jaats jach chichan tiʼ le wíinkliloʼ, baʼaleʼ ku tukultikuba jach yaan u páajtalil utiaʼal u beetik yaʼabkach nukuch baʼaloʼob. ¡Bukaʼaj nukuch kʼáaxoʼob ku páajtal u tóokaʼal yéetel jumpʼéel chan kʼáakʼ! U yaakʼ wíinikeʼ jumpʼéel kʼáakʼ» (Santiago 3:5, 6).

Baʼaleʼ le aakʼoʼ jeʼel xan u páajtal u tsʼáaik kuxtaleʼ. Le jatsʼuts tʼaanoʼob ku beetaʼal utiaʼal u líiʼsaʼal u yóol máakoʼ, tsʼoʼok u yáantik yaʼab tiʼ le máaxoʼob jach lubaʼan u yóoloʼoboʼ tak le táan u tuklik u kíimskubaʼoboʼ. Le maʼalob tsolnuʼukoʼob xanoʼ tsʼoʼok u yáantik u yutskíint u kuxtal yéetel tsʼoʼok u luʼsik tu chiʼ kíimil yaʼab tiʼ le máaxoʼob ku drogarkubaʼoboʼ bey xan le máaxoʼob ku kíimskoʼob uláakʼ máakoʼoboʼ. Jeʼex túun k-ilkoʼ, u tʼaanoʼob utúul máax utseʼ bey «u cheʼil kuxtal[eʼ]», yéetel le «tʼaanoʼob ku yaʼalaʼal tu kʼiinileʼ beyoʼob manzana oro u kaʼaj bajaʼan plata tiʼeʼ» (Proverbios 15:4; 25:11).

Baʼaleʼ upʼéel bix maas maʼalob jeʼel u meyajtoʼon k-aakʼeʼ, letiʼeʼ ka k-kʼaʼayt u maʼalob péektsilil le Reinooʼ yéetel ka k-kaʼans tiʼ uláakʼ máakoʼob le baʼaxoʼob ku yaʼalik le Bibliaoʼ; ken k-beet lelaʼ k-kiʼikiʼtʼantik Jéeoba Dios. ¿Baʼaxten? Jesuseʼ tu yaʼalaj: «Le kuxtal minaʼan u xuuloʼ letiʼ lelaʼ: ka u kʼaj óoltoʼob teech chéen juntúuliliʼ Jajal Dios, yéetel ka u kʼaj óoltoʼob Jesucristo le máax ta túuxtajoʼ» (Juan 17:3; Mateo 24:14; 28:19, 20).