Maʼ kun xáantal ken xuʼuluk le muʼyajiloʼ
Maʼ kun xáantal ken xuʼuluk le muʼyajiloʼ
«U meyajoʼobeʼ sen maʼalobtak, baʼaxoʼob ku beetikeʼ tojtak.» (DEUTERONOMIO 32:4).
1, 2. 1) ¿Baʼaxten jach nojoch baʼal k-ilik le u yantaltoʼon u páajtalil k-kuxtal minaʼan u xuuloʼ? 2) ¿Baʼaxten yaʼab máakoʼobeʼ maʼ tu creertikoʼob wa yaan utúul Dios ku yaʼalik u tsʼáaiktoʼon maʼalob baʼaloʼob?
¿UTSTATʼAAN wa a tuukul tiʼ bix le kuxtal kun antal teʼ Paraísooʼ? Maʼ xaaneʼ ka wilkaba teʼ Paraíso táan a máan a kʼaj óolt tuláakal baʼax yaan way yóokʼol kaabeʼ, jeʼex u sen jejeláasil baʼaloʼob kuxaʼanoʼob way Luʼumeʼ. Maʼ xaaneʼ ka tuukul xan tiʼ le kiʼimak óolal ken u taastech a kanáantik le Luʼumaʼ yéetel a wáantaj utiaʼal ka suʼutuk upʼéel paraísoi. Maʼ xaan xaneʼ ka wilkaba bey táan a kanik a beetik u yoochel u jejeláas baʼaloʼob, a beetik u planosi najoʼob, a paax wa a beetik uláakʼ baʼaxoʼob minaʼantech u súutukil a kanik bejlaʼeʼ. Jeʼel baʼaxak ka a tukult a beetik teʼ Paraísooʼ, u jaajileʼ jach a kʼáat a wil «le kuxtal minaʼan u xuul» ku yaʼalik u tsʼáaik Jéeobaoʼ (1 Timoteo 6:19).
2 ¿Máasaʼ jach nojoch baʼal k-ilik le u páajtal k-tʼaan tiʼ le maʼalob baʼaloʼob ku yaʼalik Dios u tsʼáaiktoʼonoʼ? Baʼaleʼ, yaʼab máakoʼobeʼ ku yaʼalikoʼob chéen bey upʼéel wayakʼeʼ, upʼéel baʼal maʼ jaajiʼ yéetel chéen ku creertaʼal tumen máaxoʼob minaʼan u naʼatoʼob. Tsʼoʼoleʼ maʼatech xan u jach creerkoʼob wa yaan le Dios ku yaʼalik u tsʼáaik le kuxtal minaʼan u xuul tiʼ upʼéel paraísooʼ. ¿Baʼaxten maʼ tu creertikoʼob? Yoʼolal le sen kʼasaʼanil yaan bejlaʼoʼ. Yanoʼobeʼ ku yaʼalikoʼobeʼ wa yaan Dios yéetel sen yaan u páajtalil bey xan u yaabilajeʼ, maʼ unaj u yantal le kʼasaʼanil yéetel le muʼyajiloʼ. Ku tuklikoʼobeʼ maʼ tu páajtal u yantal utúul dios ka u chaʼa u yúuchul kʼaas, yéetel wa yaneʼ maʼ nojoch u páajtaliliʼ wa maʼ u yaabiltmoʼoniʼ. U jaajileʼ Satanaseʼ tsʼoʼok u yeʼesik jach u yojel u éekʼjochʼeʼenkúuns u tuukul le wíinikoʼoboʼ (2 Corintoiloʼob 4:4).
3. ¿Baʼax talam kʼáatchiʼi jeʼel u páajtal k-tsʼáaik u núukileʼ, yéetel baʼaxten chéen toʼon jeʼel u páajtal k-beetkeʼ?
3 Toʼon u j-jaajkunajoʼon Jéeobaeʼ jach jeʼel u páajtal k-áantik le máaxoʼob tusaʼanoʼob tumen Satanás yéetel tumen le kʼasaʼan yóokʼol kaabaʼ (1 Corintoiloʼob 1:20; 3:19). Yaʼab máaxoʼobeʼ maʼ tu creerkoʼob le baʼax ku yaʼalik Dios ken u beetoʼ, tumen maʼ u kʼaj óoloʼobiʼ. Maʼ xaaneʼ maʼ u yojloʼob bix u kʼaabaʼ Diosiʼ yéetel maʼ u yojloʼob baʼax u kʼáat u yaʼal u kʼaabaʼiʼ. Maʼ xaan xaneʼ maʼ u yojloʼob bix u modosiʼ, mix u yojloʼob bix úuchik u béeykuntik le baʼaxoʼob u yaʼalmoʼ. Baʼaleʼ, toʼoneʼ yantoʼon u jatsʼuts páajtalil k-ojéeltik yéetel k-naʼatik le baʼaloʼobaʼ. Le oʼolal maʼalob ka k-kʼaʼajs bix jeʼel u páajtal k-áantik le máaxoʼob «tsʼoʼok u éekʼjochʼeʼentaʼal u naʼatoʼob» utiaʼal u kaxkoʼob u núukil le kʼáatchiʼ jach yaʼab máax beetikaʼ: ¿baʼaxten ku chaʼik Dios u yantal le kʼasaʼanil yéetel le muʼyajiloʼ? (Efesoiloʼob 4:18.) Yáaxeʼ yaan k-ilik baʼax unaj k-beetik táanil tiʼ k-núukik le kʼáatchiʼoʼ, tsʼoʼoleʼ yaan k-ilik bix jeʼel k-eʼesik u jatsʼuts modosoʼob Jéeoba ken k-tsol baʼaxten ku chaʼik u yantal le kʼasaʼanil yéetel le muʼyajiloʼ.
Baʼax unaj k-beetik táanil tiʼ k-núukik le kʼáatchiʼoʼ
4, 5. Wa yaan máax ku kʼáatiktoʼon baʼaxten ku chaʼik Dios u yantal le muʼyajiloʼ, ¿baʼax maʼalob ka k-beet táanil tiʼ k-núukik u kʼáatchiʼ? Tsole.
4 ¿Baʼax k-beetik ken kʼáataʼaktoʼon tumen wa máax baʼaxten ku chaʼik Dios u yantal le muʼyajiloʼ? Maʼ xaaneʼ yáax baʼax k-beetkeʼ, letiʼe u joʼopʼol k-tʼaan tiʼ le baʼax úuch tu jardinil Edén utiaʼal u páajtal k-tsolik baʼaxten yaan le muʼyajiloʼ. Yaan kʼiineʼ letiʼe baʼax jeʼel u páajtal k-aʼalikoʼ, baʼaleʼ maas maʼalob ka k-tukult baʼax unaj k-beetik táanil tiʼ k-núukik le kʼáatchiʼoʼ (Proverbios 25:11; Colosailoʼob 4:6). Koʼox ilik óoxpʼéel baʼax unaj k-beetik táanil tiʼ k-núukik le kʼáatchiʼoʼ.
5 Yáaxeʼ, wa u yuumil naj jach chiʼichnak yoʼolal le sen kʼasaʼanil yanoʼ, maʼ xaaneʼ tumen letiʼ wa utúul tiʼ u láakʼtsiloʼobeʼ tsʼoʼok u muʼyajoʼob yoʼolal le kʼasaʼaniloʼ. Le oʼolaleʼ, maʼalob ka k-il naʼatik bix u yuʼubikuba. Le apóstol Pablooʼ tu yaʼalaj tiʼ le cristianoʼoboʼ: «Okʼolneneʼex yéetel máaxoʼob ku yokʼoloʼoboʼ» (Romailoʼob 12:15). Wa u yuumil naj ku yilik k-naʼatik bix u yuʼubikuba yéetel k-kʼáat áanteʼ, maʼ xaaneʼ leloʼ jeʼel u beetik u maas taaktal u yuʼubkoʼoneʼ (1 Pedro 3:8).
6, 7. ¿Baʼaxten unaj k-aʼalik tiʼ le máax yéetel k-tsikbal maʼalob ikil tu beetil le kʼáatchiʼ chiʼichnakkúuntikoʼ?
6 U kaʼapʼéel baʼax unaj k-beetkeʼ, letiʼe k-aʼalik tiʼ le máax yéetel k-tsikbal jach maʼalob úuchik u beetik le kʼáatchiʼoʼ. Yaan máaxoʼob ku tuklikoʼobeʼ minaʼan u fejoʼob yéetel maʼ táan u yeʼeskoʼob tsiikil tiʼ Dios ikil u beetkoʼob le kʼáatchiʼobaʼ. Maʼ xaaneʼ utúul tiʼ u nojchil u religionoʼob aʼaltiʼob beyoʼ. Baʼaleʼ leloʼ maʼ jaajiʼ, tumen tak úuchileʼ yanchaj máaxoʼob chúukpaj u yóol u meyajtoʼob Dioseʼ tu beetajoʼob xan kʼáatchiʼob jeʼex le ku beetaʼal bejlaʼaʼ. Jeʼex Davideʼ tu kʼáataj: «Yuumtsil [Jéeoba], ¿Baʼaxten jach náach yanilech? ¿Baʼaxten ka taʼakbesikaba tu kʼiiniloʼob yaj óolal?» (Salmo 10:1). Le profeta Habacucoʼ tu yaʼalaj xan: «Yuumtsil [Jéeoba], ¿Baʼax kʼiin bíin a chʼenxikint in sen awat kʼáat óolalaʼ? ¿Baʼax kʼiin bíin jáawak in [orar] tu yoʼolal le meyaj loob utiaʼal ka taalakech a wáantoʼon? ¿Baʼax oʼolal ka beetik in wilik sen yaʼab yaj óolal yéetel kʼasaʼanil? Súutpachtaʼanen tumen meyaj loob bey xan tu yéetel chʼéejsaj; tuláakal tuʼux yaan x-woʼokin bey xan baʼateloʼob» (Habacuc 1:2, 3).
7 Le kaʼatúul wíinkoʼobaʼ jach tu yeʼesoʼob tsiikil tiʼ Dios. ¿Kʼeʼeyoʼob wa yoʼolal le kʼáatchiʼob tu beetoʼoboʼ? Maʼatech, baʼaxeʼ Jéeobaeʼ tu beetaj ka tsʼíibtaʼak teʼ Biblia le kʼáatchiʼob tu beetoʼoboʼ. Bejlaʼeʼ, le máaxoʼob chiʼichnakoʼob yoʼolal le kʼasaʼaniloʼ, maʼ xaaneʼ u kʼáatoʼob ka núukaʼak le kʼáatchiʼob ku beetkoʼob, chéen le Biblia jeʼel u páajtal u núukik tiʼoboʼ. Maʼ u tuʼubultoʼoneʼ Jesuseʼ tʼaanaj maʼalob tiʼ le máaxoʼob taak u kaambaloʼob tumen «ku kʼaj óoltikoʼob u yóotsilil u pixanoʼob[oʼ]» (Mateo 5:3). Toʼoneʼ, jach nojoch baʼal k-ilik áantik u maasil utiaʼal ka yanaktiʼob le kuxtal tu yaʼalaj Jesusoʼ.
8. ¿Baʼax kaʼansajiloʼob beetik u creertik yaʼab máakoʼob Dios beetik u yantal le muʼyajiloʼ? ¿Bix jeʼel u páajtal k-áantikoʼobeʼ?
8 Maʼ xaaneʼ, u yóoxpʼéel baʼax kʼaʼabéet k-beetkeʼ letiʼe k-áantik le máax yéetel k-tsikbal utiaʼal u tsʼáaik cuenta maʼ Dios beetik u yantal le kʼasaʼaniloʼ. Tiʼ yaʼab máakoʼobeʼ ku kaʼansaʼaltiʼob Dios gobernartik le yóokʼol kaabaʼ, yéetel úuchiliʼ u yaʼal baʼax kun úuchultoʼoneʼ yéetel chéen letiʼ u yojel baʼaxten ku beetik u muʼyaj wíinkoʼob. ¡Le baʼax ku kaʼansaʼalaʼ jach maʼ jaajiʼ! Le baʼax ku kaʼansaʼaloʼobaʼ ku jach pʼatkoʼob kʼaasil u kʼaabaʼ Dios yéetel ku tsʼáaikoʼob naʼatbil letiʼ beetik u yantal le kʼasaʼanil yéetel le muʼyajiloʼ. Le oʼolal maʼ xaaneʼ yaan u kʼaʼabéettaltoʼon le Biblia utiaʼal k-áantkoʼob u yiloʼob maʼ jaaj le baʼax tsʼoʼok u kaʼansaʼaltiʼobaʼ (2 Timoteo 3:16). U jaajileʼ, Satanás gobernartik le yóokʼol kaabaʼ, maʼ Jéeobaiʼ (1 Juan 5:19). Jéeobaeʼ, maʼatech u chʼaʼatuklik baʼax kun úuchul yéetel u kuxtal le máaxoʼob u beetmoʼ, baʼaxeʼ ku chaʼik u yéeykoʼob baʼax ken u beetoʼob yéetel u kuxtaloʼob (Deuteronomio 30:19). Tsʼoʼoleʼ, maʼ Jéeoba beet u yantal le kʼasaʼaniloʼ, letiʼeʼ u pʼekmaj u beetaʼal baʼal kʼaas yéetel maʼ utstutʼaan ka muʼyajnak mix máakiʼ (Job 34:10; Proverbios 6:16-19; 1 Pedro 5:7).
9. ¿Baʼax áantajiloʼob tsʼoʼok u tsʼáaiktoʼon «le palitsil» utiaʼal k-tsolik baʼaxten ku chaʼik Dios ka yanak le muʼyajiloʼ, yéetel bix jeʼel u meyajtoʼon le áantajoʼobaʼ?
9 Ken tsʼoʼokok k-beetik le óoxpʼéel baʼax tsʼoʼok k-ilkaʼ jeʼel u páajtal túun k-tsolik tiʼ le máax yéetel k-tsikbaloʼ baʼaxten ku chaʼik Dios ka yanak le muʼyajiloʼ. Utiaʼal lelaʼ «le palitsil chúukpajaʼan u yóol yéetel yaan u naʼat[oʼ]» ku tsʼáaiktoʼon jejeláas áantajoʼob (Mateo 25:45-47). Teʼ noj muchʼtáambal tiʼ distrito tu kʼaabaʼtaj «Kʼaʼabéet k-uʼuyik u tʼaan Dios» tiʼ u jaʼabil 2005 yéetel 2006, jóoʼsaʼab le tratado Maʼ kun xáantal ken xuʼuluk le muʼyajiloʼ. Maʼalob ka k-xok le chan juʼunaʼ. Le libro ku kʼaabaʼtik ¿Baʼax jach tu jaajil ku kaʼansik le Bibliaoʼ?, beetaʼan ich 157 jejeláas tʼaaniloʼobeʼ, tiʼ upʼéel u capituloeʼ ku tsolik xan baʼaxten maʼ u luʼs Dios le muʼyajiloʼ. Unaj k-ilik u jach meyajtoʼon le jóoʼsaʼaniloʼobaʼ, tumen ku jach tsolikoʼob bix úuchik u yaʼalaʼal tu jardinil Edén maʼ maʼalob bix u gobernar Diosiʼ yéetel baʼaxten maʼ tu jáan utskíintaj Jéeoba le baʼax úuchoʼ. Kʼaʼajaktoʼoneʼ, ken tʼaanakoʼon yoʼolal lelaʼ táan u yantaltoʼon u páajtalil k-maas kʼaj óoltik bix Jéeoba yéetel baʼax jatsʼuts modosi yaan tiʼ.
Unaj k-jach tʼaan tiʼ u jatsʼuts modos Jéeoba
10. ¿Baʼax maʼ tu naʼatik yaʼab máakoʼob? ¿Baʼax jeʼel u yáantikoʼob u naʼatoʼobeʼ?
10 Ken k-áant wa máax utiaʼal ka u naʼat baʼaxten ku chaʼik Dios ka yanak le wíinikoʼob yáanal u páajtalil Satanaseʼ, unaj k-ilik jach eʼesik le jatsʼuts modos yaan tiʼ Jéeobaoʼ. Yaʼab wíinikoʼobeʼ u yojloʼob Dioseʼ jach yaan u páajtalil, tsʼoʼoleʼ suuk u yuʼubikoʼob u yaʼalaʼal minaʼan u xuul u páajtalil. Kex beyoʼ, maʼ xaaneʼ maʼ tu jach naʼatkoʼob baʼaxten maʼ tu luʼsik le kʼasaʼanil yéetel le muʼyajil wa jach tu jaajil sen yaan u páajtaliloʼ. Maʼ xaaneʼ maʼ tu jach naʼatkoʼob bix u meyaj tiʼ Dios le uláakʼ modosoʼob yaan tiʼoʼ, jeʼex le kiliʼichiloʼ, le tojiloʼ, le ojéelaliloʼ yéetel le yaabilajoʼ. Ken u chʼaʼatukult u beetik wa baʼaxeʼ, Jéeobaeʼ ku yilik u yeʼesik tuláakal le jatsʼuts modos yaan tiʼoʼ; le oʼolal ku yaʼalik le Biblia tu yoʼolaloʼ: «U meyajoʼobeʼ sen maʼalobtak» (Deuteronomio 32:4). ¿Bix jeʼel u páajtal k-tʼaan tiʼ u modosoʼob Dios ken k-núuk tiʼ wa máax baʼaxten ku chaʼik Dios u muʼyaj le wíinikoʼoboʼ? Koʼox ilik bixi.
11, 12. 1) ¿Baʼaxten maʼ perdonartaʼab Adán yéetel Eva le ka kʼebanchajoʼoboʼ? 2) ¿Baʼaxten maʼ ken u chaʼa Jéeoba ka seguernak u yantal le kʼebanoʼ?
11 ¿Maʼ wa tu páajtal kaʼach u perdonartik Jéeoba le baʼax tu beetaj Adán yéetel Evaoʼ? Maʼ tu páajtal. Tumen minaʼan kaʼach kʼeban tu wíinkliloʼobeʼ, chéen tu juunaloʼob tu chʼaʼatukultajoʼob u luʼsikubaʼob yáanal u nuʼuktaj Jéeoba utiaʼal u tsʼáaikubaʼob yáanal u nuʼuktaj Satanás. Le beetik mix baʼal eʼes wa yaachaj u yóoloʼob yoʼolal le baʼax tu beetoʼoboʼ. Baʼaleʼ ken u beet wa máax le kʼáatchiʼaʼ, u jaajileʼ táan u kʼáatik baʼaxten Jéeobaeʼ maʼ tu kʼexaj le baʼax u yaʼalmoʼ yéetel ka u kʼam u kʼeban Adán yéetel Eva. Utiaʼal u núukaʼal le kʼáatchiʼaʼ, maʼ unaj u tuʼubsaʼaleʼ Jéeobaeʼ jach kiliʼich (Éxodo 28:36; 39:30).
12 Teʼ Bibliaoʼ jach yaʼab utéenel ku yaʼalaʼal Jéeobaeʼ kiliʼich, baʼaleʼ kex beyoʼ maʼ yaʼab máak u yojel baʼaxten ku yaʼalaʼal tiʼ beyaʼ. Tiʼ Jéeobaeʼ ku yaʼalaʼal kiliʼich, tumen minaʼan mix baʼal kʼaas tiʼ, yéetel minaʼan mix upʼíit u kʼeban (Isaías 6:3; 59:2). Letiʼeʼ yaan máax tsʼoʼok u tsʼáaik utiaʼal u xuʼulsik tiʼ le kʼebanoʼ, maʼ ken u chaʼa u seguer u yantal utiaʼal mantatsʼ. Wa ka u chaʼa u pʼáatal le kʼebanoʼ, jach mix bikʼin kun bintoʼon utsil (Proverbios 14:12). Jéeobaeʼ yaan u kʼuchul u kʼiinil u láaj maʼalobkíintik wa u kiliʼichkúuntik le baʼaxoʼob u beetmajoʼ. Yéetel bey kun úuchloʼ tumen bey u kʼáat u beetoʼ.
13, 14. ¿Baʼaxten maʼ tu jáan xuʼulsaj Jéeoba tiʼ le máaxoʼob tu tsʼáajubaʼob tu contra tu jardinil Edénoʼ?
13 ¿Maʼ wa tu páajtal kaʼach u xuʼulsik Jéeoba tiʼ le máaxoʼob tu tsʼáajubaʼob tu contra teʼ tu jardinil Edén yéetel ka u jel beet wíinikeʼ? Tiʼ Jéeobaeʼ yaan u páajtalil utiaʼal u beetik kaʼachi, yéetel maʼ kun xáantaleʼ yaan u láaj xuʼulsik tiʼ le kʼasaʼan wíinikoʼoboʼ. Le oʼolal yaan máax ku yaʼalik: «¿Baʼaxten maʼ tu xuʼulsaj tiʼ le óoxtúul máaxoʼob tu tsʼáajubaʼob tu contra desde tu káajbaloʼ? Wa ka u beeteʼ, ¿maʼ wa bejlaʼa minaʼan kaʼach le kʼeban mix le muʼyajil k-aktáantikoʼ?». Baʼaleʼ ¿baʼaxten maʼ tu beetaj Jéeoba beyoʼ? Deuteronomio 32:4 ku yaʼalik yoʼolal Jéeoba: «Baʼaxoʼob ku beetikeʼ tojtak». Jéeobaeʼ jach toj wa justo tiʼ tuláakal baʼax ku beetik. Letiʼeʼ jach «u yaakuntmaj baʼax noʼojaʼan» (Salmo 37:28). Tumen u yaabilmaj baʼax tojeʼ maʼ tu xuʼulsaj tiʼ le máaxoʼob tu tsʼáajubaʼob tu contra teʼ tu jardinil Edenoʼ. ¿Baʼaxten k-aʼalik lelaʼ?
14 Úuchik u tsʼáaikuba tu contra Jéeobaeʼ, Satanaseʼ tu tsʼáaj naʼatbil maʼ maʼalob bix u gobernar Diosiʼ. Tumen Jéeoba jach toj tuláakal baʼax ku beetkeʼ, tu yilaj jach kʼaʼabéet u yeʼesik maʼ jaaj le baʼax tu yaʼalaj Satanasoʼ. Wa ka u xuʼuls kaʼach tiʼ le máaxoʼob tu tsʼáajubaʼob tu contraoʼ, maʼ kun ilbil kaʼach wa jaaj le baʼax tu tsʼáaj naʼatbil Satanasoʼ. Kex tumen Jéeoba tsʼoʼok kaʼach u yeʼesik sen nojoch u páajtalileʼ, baʼaleʼ maʼ yoʼolal le jeʼel tʼaanaj Satanasoʼ. Tsʼoʼoleʼ, Dioseʼ tsʼoʼokaʼaniliʼ u yaʼalik tiʼ Adán yéetel tiʼ Eva baʼax u kʼáat ka u beetoʼoboʼ: ka yanak u paalaloʼob, ka u chupoʼob le Luʼumaʼ yéetel ka u kanáantoʼob (Génesis 1:28). Wa ka u xuʼuls Jéeoba tu séebaʼanil tiʼ Adán yéetel tiʼ Evaeʼ, le baʼax tu yaʼalajtiʼoboʼ tsʼoʼok kaʼach u pʼáatal chéen kuneleʼ. Tumen jach toj tuláakal baʼax ku beetikeʼ, Jéeobaeʼ maʼ tu chaʼaj u pʼáatal maʼ u béeychajal le baʼax u yaʼalmoʼ (Isaías 55:10, 11).
15, 16. ¿Bix jeʼel u páajtal k-áantik utúul máax aʼalik jeʼel u kanik u yutskíint le talamil anchaj tu jardinil Edenoʼ?
15 ¿Yaan wa máax maas yaan u naʼat tiʼ Jéeoba jeʼel u yutskíintik le baʼax aʼalaʼab tu contraoʼ? Yaan máaxoʼob ku yaʼalikoʼob u yojloʼob bix jeʼel u yutskíintkoʼob le baʼax úuchoʼ, baʼaleʼ ken u beetoʼobeʼ, táan u tsʼáaikoʼob naʼatbil maas yaan u naʼatoʼob tiʼ Dios utiaʼal u yutskíintkoʼob. Maʼ xaaneʼ le baʼax ku yaʼalikoʼobaʼ maʼ tu beetkoʼob utiaʼal u mixbaʼalkuntkoʼob Diosiʼ, baʼaleʼ maʼ u kʼaj óoloʼob Jéeobaiʼ yéetel maʼ u yojloʼob bukaʼaj naʼatil yaan tiʼiʼ. Teʼ carta tu tsʼíibtaj tiʼ le Romailoʼoboʼ, le apóstol Pablooʼ jach tʼaanaj tiʼ le nojoch naʼatil yaan tiʼ Diosoʼ. Tʼaanaj tiʼ le «baʼax u taʼakmaj[oʼ]» wa tiʼ bix kun meyaj u Reino Cristo tiʼ Jéeoba utiaʼal u salvartik le máaxoʼob meyajtikoʼ yéetel utiaʼal u kiliʼichkuntik u kʼaabaʼ. ¿Bix u yilik kaʼach Pablo le sen ojéelal yaan tiʼ Dios, le Máax tsʼáa le Reino tiʼ Cristo utiaʼal u maʼalobkíintik le baʼaloʼoboʼ? Pabloeʼ tu tsʼíibtaj: «¡Tiʼ Jajal Dios, máax chéen letiʼ yaan u naʼat, yanak nojbeʼenil tu yoʼolal Jesucristo mantatsʼ! Amén» (Romailoʼob 11:25; 16:25-27).
16 Pabloeʼ u yojel kaʼacheʼ «chéen» Jéeoba sen «yaan u naʼat». ¿Yaan wa utúul kʼeban wíinik jeʼel u páajtal u yutskíintik maas maʼalob jeʼel baʼaxak talamil, jeʼex le baʼax aʼalaʼab tu contra Jéeobaoʼ? Unaj k-kaʼansik tiʼ le wíinikoʼob u chʼaʼob xan le maʼalob saajkil k-uʼuyik yoʼolal Dios, le máax «sen nojoch u páajtalil yéetel u naʼat[oʼ]» (Job 9:4). Jeʼex kun bin k-maas kʼaj óoltik Jéeobaeʼ, bey kun bin k-ilik chéen letiʼ jeʼel u yutskíintik maas maʼalob le talamiloʼoboʼ (Proverbios 3:5, 6).
Nojoch baʼal unaj k-ilik u yaabilaj Jéeoba
17. U naʼatik máak bix u yeʼesik u yaabilaj Jéeobaeʼ, ¿bix jeʼel u yáantik máak utiaʼal u naʼatik baʼaxten ku chaʼik Dios u yantal le muʼyajiloʼ?
17 «Jajal Dioseʼ yaakunaj.» (1 Juan 4:8.) Yéetel le tʼaanoʼobaʼ le Bibliaoʼ ku yeʼesik máakalmáak u maas nojochil u modos Jéeoba, yéetel ku líiʼsik u yóol le máaxoʼob chiʼichnakoʼob yoʼolal le kʼasaʼaniloʼ. Jéeobaeʼ tsʼoʼok u yeʼesik u yaabilaj yéetel le baʼaxoʼob tsʼoʼok u beetik utiaʼal u xuʼulsik le muʼyajil tsʼoʼok u taasik le kʼebanoʼ. Yoʼolal u yaabilajeʼ, Jéeobaeʼ tu tsʼáaj tiʼ u paalaloʼob Adán yéetel Eva u páajtalil u yantaltiʼob kuxtal minaʼan u xuul yéetel u páajtalil u natsʼkubaʼob tiʼ ich oración (Génesis 3:15). Yoʼolal u yaabilajeʼ, tu tsʼáaj upʼéel boʼol utiaʼal ka perdonartaʼak tuláakal le kʼebanoʼoboʼ yéetel utiaʼal u kaʼa yantal tiʼ wíinikoʼob u páajtalil u kuxtaloʼob minaʼan u xuul (Juan 3:16). Yéetel yoʼolal u yaabilaj xaneʼ, Jéeobaeʼ maʼ u xuʼuls tiʼ le wíinikoʼoboʼ, baʼaxeʼ tsʼoʼok u tsʼáaiktiʼob u páajtalil u luʼskubaʼob yáanal u páajtalil Satanás utiaʼal u tsʼáaikubaʼob yáanal u nuʼuktaj letiʼ (2 Pedro 3:9).
18. ¿Baʼax jatsʼuts páajtalil yantoʼon? ¿Baʼax ken k-kan teʼ tuláakʼ xookoʼ?
18 Le ka kʼaʼajsaʼab upʼéel nojoch loobil tu beetaj le terroristaʼoboʼ, utúul u nojchil upʼéel religioneʼ tu yaʼalaj tiʼ le máaxoʼob u muchʼmubaʼoboʼ: «Maʼ k-ojel baʼaxten maʼ u luʼs Dios le muʼyajil yéetel le kʼasaʼaniloʼ». Jach yaj bix yaniloʼob. Baʼaleʼ, tiʼ toʼoneʼ yaan u jatsʼuts páajtalil k-ojéeltik u núukil le kʼáatchiʼaʼ (Deuteronomio 29:29). Tumen Jéeoba jach toj tuláakal baʼax ku beetikeʼ, tumen jach yaan u naʼat yéetel tumen jach yaan u yaabilajeʼ, k-ojel maʼ kun xáantal ken u xuʼuls tiʼ tuláakal le muʼyajiloʼ. Tsʼoʼoleʼ, u yaʼalmaj xan yaan u beetik (Apocalipsis 21:3, 4). Baʼaleʼ ¿baʼax kun úuchul yéetel tuláakal le máaxoʼob tsʼoʼok u kíimloʼoboʼ? Le bix u bin u yutskíintaʼal le baʼax tsʼaʼab naʼatbil tu jardinil Edenoʼ, ¿tsʼoʼok wa u beetik u tuʼubsaʼal le kimenoʼob tumen Jéeobaoʼ? Maʼatech. Yoʼolal xan u yaabilajeʼ, Dioseʼ yaan u kaʼa kuxkíintkoʼob. Lelaʼ letiʼe baʼax ken k-kan teʼ tuláakʼ xookoʼ.
¿Baʼax jeʼel a núukikeʼ?
• ¿Baʼax jeʼel u páajtal k-núukik tiʼ le máax ku kʼáatik baʼaxten ku chaʼik Dios u yantal le muʼyajiloʼ?
• Yéetel le bix u bin u yutskíintik le baʼax úuch tu jardinil Edenoʼ, ¿bix u chíikbesik u kiliʼichil yéetel u tojil Jéeoba?
• ¿Baʼaxten unaj k-áantik k-éet wíinikiloʼob u naʼatoʼob tubeel bix jejeláas u yeʼesiktoʼon u yaabilaj Jéeobaoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 13]
Unaj k-ilik áantik le máaxoʼob chiʼichnakoʼob yoʼolal le muʼyajiloʼoboʼ
[U tsolajil le oochel teʼ táan juʼun 15]
David yéetel Habacukeʼ tu beetoʼob kʼáatchiʼob tiʼ Dios yoʼolal baʼaxoʼob yaakúuntik u yóoloʼob