Baʼaloʼob maʼalobtak ku kanaʼal tiʼ u yáax jaats u libroi Ezequiel
U Tʼaan Jéeobaeʼ kuxaʼan
Baʼaloʼob maʼalobtak ku kanaʼal tiʼ u yáax jaats u libroi Ezequiel
TU JAʼABIL 613 táanil tiʼ u taal Cristoeʼ, profeta Jeremíaseʼ tiaʼan kaʼach tu luʼumil Judaeʼ. Letiʼeʼ táan kaʼach u kʼaʼaytik yaan u xuʼulsaʼal tiʼ u kaajil Jerusalén yéetel yaan u pʼáatal minaʼan u kajnáaliloʼob u luʼumil Judá. Nabucodonosor, u reyil Babiloniaeʼ, tsʼoʼok u bisik yaʼab tiʼ le israelitaʼob utiaʼal u palitsiltoʼoboʼ. Ichiloʼobeʼ tiaʼan Daniel yéetel óoxtúul tiʼ u amigoʼobiʼ, letiʼobeʼ tiʼ ku meyajoʼob kaʼach tu palacio le reyoʼ. U maas yaʼabil tiʼ le bisaʼaboʼoboʼ tiʼ yanoʼob kaʼach tu jáal u áalkab jaʼi Quebar, «tu luʼumil Babilonia» (Ezequiel 1:1-3). Kex tiaʼanoʼob kaʼach táanxel luʼumileʼ, Jéeobaeʼ tu yéeyaj Ezequiel, utúul máak yaan kaʼach 30 jaʼaboʼob tiʼ, utiaʼal u beet u profetai ichiloʼob.
U libroi Ezequieleʼ tsʼoʼoksaʼab u tsʼíibil tu jaʼabil 591 táanil tiʼ u taal Cristo; le libroaʼ ku taasik u tsikbalil baʼaxoʼob úuch ichil veintidós jaʼaboʼob. Ezequieleʼ jach chúukaʼan úuchik u tsʼíibtik u libro, maʼ chéen tu tsʼíibtaj baʼax jaʼabil ka aʼalaʼab le profecíaʼob tiʼoʼ, tu tsʼíibtaj xan baʼax mesil yéetel baʼax kʼiinil. U libroi Ezequieleʼ ku tʼaan tiʼ óoxpʼéel baʼaloʼob, yáaxeʼ tiʼ bix xuʼulsaʼabik tiʼ Jerusalén, u kaʼapʼéeleʼ tiʼ bix xuʼulsaʼabik tiʼ le kaajoʼob yanoʼob tu baʼpachoʼ, yéetel u yóoxpʼéeleʼ tiʼ bix úuchik u chʼaʼajoʼoltaʼal u adorartaʼal Jéeoba. Teʼ xookaʼ yaan u xakʼaltaʼal jujumpʼéel tiʼ le baʼaxoʼob tsʼíibtaʼab teʼ yáax veinticuatro capituloʼoboʼ, ichil leloʼobaʼ tiaʼan náayoʼob, profecíaʼob bey xan le baʼaxoʼob tu beetaj le profeta utiaʼal u yeʼesik baʼaxoʼob ku taal u kʼiin tiʼ u kaajil Jerusalenoʼ (Ezequiel 1:1–24:27).
«TSʼOʼOK IN TSʼÁAIKECH A BEET A J-KANANIL»
Ka tsʼoʼok u yeʼesaʼal tiʼ Ezequiel ichil upʼéel náay bix u trono Jéeobaeʼ, aʼalaʼab tiʼ tumen Jéeoba: «Tsʼoʼok in tsʼáaikech a beet a j-kananil utiaʼal in kaajal Israel. Le ken in tsʼáa tiʼ tech jumpʼéel péektsileʼ, u náajmal a bin a waʼaltiʼob tin kʼaabaʼ, utiaʼal ka u yojéeltoʼob baʼax kin waʼalik» (Ezequiel 3:17). Tiʼ Ezequieleʼ aʼalaʼab ka u beet kaʼapʼéel baʼal utiaʼal u yeʼesik bix kun baʼpachtbil Jerusalén yéetel baʼax talamiloʼob ken u taas tiʼ u kajnáaliloʼob. Jéeobaeʼ tu yaʼalaj tiʼ Ezequiel ka u yaʼal tiʼ u kaajil Judá: «Bin in kaʼaj in beet u taal baʼateʼel ta wóokʼoleʼex utiaʼal ka kʼaskúuntaʼak u kúuchiloʼob tuʼux ka [adorarkeʼex yaanal diosoʼoboʼ]» (Ezequiel 6:3). Tiʼ u kajnáaliloʼobeʼ tu yaʼalaj: «Táan u kʼuchul u kʼiinil [u xuʼulsaʼalteʼex]» (Ezequiel 7:7).
Tu jaʼabil 612 táanil tiʼ u taal Cristoeʼ, ichil upʼéel náayeʼ eʼesaʼab tiʼ Ezequiel baʼaxoʼob táan kaʼach u beetaʼal tu kaajil Jerusalén. Letiʼeʼ jach kʼaas tu yilaj le baʼaxoʼob ku beetaʼal ichil u templo Diosoʼ. Ken túuxtaʼak le angeloʼob (wa le «seis wíinikoʼob») tumen Jéeoba utiaʼal ka u xuʼulsoʼob tiʼ le kʼasaʼan máakoʼoboʼ chéen le máaxoʼob yaan «jumpʼéel chíikul tu táan pool[oʼob]» ken u salvartubaʼob (Ezequiel 9:2-6). Baʼaleʼ táanil tiʼ u yúuchul lelaʼ, yaan u pulaʼal «tʼabaʼan chúukoʼob» yóokʼol le kaajoʼ, lelaʼ u kʼáat u yaʼaleʼ yaan u kʼaʼaytaʼal le xuʼulsajil ken u taas Diosoʼ (Ezequiel 10:2). Kex yaan u pʼis óoltaʼaloʼob yoʼolal le baʼaloʼob kʼaastak ku beetkoʼoboʼ, Jéeobaeʼ ku yaʼalikeʼ yaan u kaʼa sutik tu luʼumil Jerusalén le israelitaʼob bisaʼanoʼob táanxel luʼumiloʼ (Ezequiel 11:17-21).
Ka aaj Ezequieleʼ, aʼalaʼab tiʼ ka u beet upʼéel baʼal utiaʼal u yeʼesik bix kun púutsʼul rey Sedequías bey xan u kajnáaliloʼob Jerusalén. Le xiiboʼob yéetel le koʼoleloʼob ku yaʼalikubaʼob profetaʼob kex maʼ Jéeoba túuxtmiloʼoboʼ, aʼalaʼab yaan u xuʼulsaʼaltiʼob, le máaxoʼob adorartik yaanal diosoʼoboʼ eʼesaʼab maʼ kʼamaʼanoʼob tumen Jéeobaiʼ, u kaajil Judaeʼ ketaʼab yéetel ukúul uva maʼatech u yichankil. Ka tsʼoʼokeʼ aʼalaʼab tiʼ Ezequiel ka u tsikbalt upʼéel kettʼaan yaan yil yéetel kaʼatúul kóotoʼob yéetel ukúul uva, lelaʼ tu yeʼesaj le muʼyajiloʼob kun taal tu yóokʼol Jerusalén úuchik u kaxtik u yáantaj u reyil Egipto. Tu tsʼoʼokbal le kettʼaanaʼ, Jéeobaeʼ tu yaʼaleʼ yaan u pakʼik u muumun kʼuʼukʼ le uva tiʼ jumpʼéel jach kaʼanal puʼukoʼ (Ezequiel 17:22). Tu luʼumil Judaeʼ maʼ kun pʼáatal mix upʼéel «xóolteʼ» utiaʼal u yúuchul gobernariʼ (Ezequiel 19:14).
U núukil kʼáatchiʼob:
1:4-28. ¿Baʼax le u carro Jéeobaoʼ? Letiʼe tuláakal u angeloʼob Jéeobaoʼ. U muukʼil u meyaj le carrooʼ ku taal tiʼ le kiliʼich muukʼoʼ. Jéeoba, le máax nuʼuktikoʼ, jach nojoch u kiʼichkelmil. Le jatsʼuts chéel yaan tu baʼpachoʼ ku chíikbesik le jeetsʼelil ku taal tiʼ Diosoʼ.
1:5-11. ¿Máaxoʼob le «kantúul j-kuxaʼanoʼob[oʼ]»? Le ka tsʼaʼab tiʼ Ezequiel u yil tu kaʼatéen u carro Jéeobaeʼ tu yaʼaleʼ le «kantúul j-kuxaʼanoʼob[oʼ]» letiʼe querubinoʼoboʼ (Ezequiel 10:1-11, NM; 11:22, NM). Tuláakʼ versiculoeʼ, Ezequieleʼ ku tʼaan tiʼ u táan yich utúul querubín, maʼ tiʼ u táan yich utúul wakaxiʼ (Ezequiel 10:14, NM). Le baʼax tu yaʼalaʼ jach maʼalob tumen le wakaxoʼ ku meyaj utiaʼal u yúuchul tʼaan tiʼ páajtalil bey xan tiʼ muukʼ; tiʼ le querubinoʼoboʼ yaan xan le kaʼapʼéel baʼaloʼobaʼ.
2:6, NM. ¿Baʼaxten yaʼab utéenel aʼalaʼab tiʼ Ezequiel «u paal máak»? Jéeobaeʼ tu beetaj utiaʼal u kʼaʼajsik tiʼ Ezequiel, letiʼeʼ chéen wíinik yéetel le baʼax ken u kʼaʼaytoʼ tiʼ Jéeoba u taal maʼ tiʼ wíinikiʼ. Ichil le Evangelioʼoboʼ kex ochenta utéenel ku yaʼalaʼal tiʼ Jesucristo «u Paal Máak», utiaʼal u yeʼesaʼaleʼ ka taal way Luʼumeʼ jach tu jaajil síij bey wíinikeʼ.
2:9–3:3. ¿Baʼaxten jach chʼujuk úuchik u yuʼubik Ezequiel le rollo tuʼux tsʼíibtaʼan u tʼaaniloʼob yaayaj óolaloʼ? Tumen yéetel kiʼimak óolal tu kʼamaj le meyaj túuxtaʼab u beetoʼ. Letiʼeʼ jach utstutʼaan kaʼach u meyajtik Jéeoba bey u profetaeʼ.
4:1-17. ¿Jach wa tu jaajil tu beetaj Ezequiel le baʼax aʼalaʼab tiʼ utiaʼal u yeʼesik baʼax kun úuchul ken baʼpachtaʼak Jerusalenoʼ? Jach tu jaajil tu beetaj, upʼéel baʼax eʼesikeʼ, letiʼe úuchik u kʼáatik tiʼ Jéeoba ka chaʼabak u meyaj yaanal baʼax tiʼ utiaʼal u takʼankúuntik u yoʼochoʼ, bey xan le úuchik u yaʼalaʼal tiʼ jeʼel u páajtal u beetik jeʼex tu kʼáatiloʼ. Ka tsʼoʼokeʼ Ezequieleʼ chilaj yóokʼol u x-tsʼíik ich trescientos noventa kʼiinoʼob utiaʼal u yeʼesik le trescientos noventa jaʼaboʼob kʼebanchaj u reinoi le diez tribusoʼ, le diez tribusaʼ káaj u kʼebanchajloʼob tu jaʼabil 997 tak le ka xuʼulsaʼab tiʼ u kaajil Jerusalén tu jaʼabil 607 táanil tiʼ u taal Cristo. Tsʼoʼoleʼ chilaj xan yóokʼol u x-noʼoj ich cuarenta kʼiinoʼob utiaʼal u yeʼesik le cuarenta jaʼaboʼob kʼebanchaj u kajnáaliloʼob Judaoʼ, letiʼobeʼ káaj u kʼebanchajloʼob tu jaʼabil 647, tu kʼiiniloʼob ka yéeyaʼab Jeremías u beet u profetai, tak tu jaʼabil 607 táanil tiʼ u taal Cristo. Ichil le cuatrocientos treinta kʼiinoʼob táan u beetik Ezequiel le baʼaloʼobaʼ, jach chéen upʼíit baʼax tu jaantaj yéetel chéen upʼíit jaʼ tu yukʼaj utiaʼal u yeʼesik le wiʼijil ken u yil u kajnáaliloʼob Jerusalén ken baʼpachtaʼakoʼ.
5:1-3. ¿Baʼax tu yeʼesaj le úuchik u kʼaxik Ezequiel tu chiʼ u nookʼ tsʼeʼetsʼek tiʼ le tsoʼots tu pulaj kaʼachoʼ? Lelaʼ u kʼáat u yaʼaleʼ ken tsʼoʼokok le setenta jaʼaboʼob xuʼulsaʼak tiʼ le kaajoʼ, yaan tiʼ le israelitaʼob kun suutoʼob tu luʼumil Judá utiaʼal u kaʼa adorartoʼob Jéeobaoʼ (Ezequiel 11:17-20).
17:1-24. ¿Máaxoʼob tu chíikbesaj le kaʼatúul nukuch kóotoʼoboʼ, baʼax u kʼáat u yaʼal u chʼaʼakal u kaʼanal kʼab ukúul kʼuulcheʼ wa cedro, yéetel máax ku chíikbesik le muumun kʼuʼukʼ pakʼaʼab tumen Jéeobaoʼ? Le kaʼatúul kóotoʼoboʼ tu chíikbesoʼob u reyil Babilonia yéetel u reyil Egipto. Le yáax kóotoʼ taal tu yóokʼol le cedrooʼ, le cedrooʼ ku chíikbesik u gobernación u chʼiʼibal David. Le kóot wa u reyil Babiloniaoʼ tu kachaj u muumun yóol le cedro le ka tu luʼsaj rey Joaquín tu luʼumil Judá yéetel ka tu tsʼáaj Sedequías u jeelinte. Kex Sedequías u yaʼalmaj kaʼach yaan u tsʼáaikuba yáanal u páajtalil u reyil Babiloniaeʼ, letiʼeʼ bin u kaxt u yáantaj uláakʼ utúul kóot, faraón u reyil Egipto, baʼaleʼ chéen kunel úuchik u beetik, tumen yaan u bisaʼal palitsiltbil tu luʼumil Babilonia yéetel tiʼ kun kíimiliʼ. Jéeobaeʼ tu jekʼaj upʼéel u muumun kʼuʼukʼ le cedrooʼ, le muumun kʼuʼukʼoʼ ku chíikbesik le Rey Yéeyaʼan tumen Jéeobaoʼ. Le kʼuʼukʼaʼ pakʼaʼab «yóokʼol u puʼukil Sión», teʼ kaʼanoʼ, teʼeloʼ tiʼ kun kʼuchul u beetuba jach «nojoch kúul cheʼil[iʼ]», yéetel yaan u taasik yaʼab utsiloʼob tiʼ u kajnáaliloʼob le Luʼumaʼ (Apocalipsis 14:1).
Baʼaxoʼob ku kaʼansiktoʼon:
2:6-8; 3:8, 9, 18-21. Maʼ unaj k-chʼaʼik saajkil tiʼ le kʼasaʼan máakoʼoboʼ mix unaj k-chaʼik u péekskoʼob k-óol utiaʼal maʼ k-kʼaʼaytiktiʼob le xuʼulsajil ku taaloʼ. Tsʼoʼoleʼ wa maʼ tu kʼaʼamal le baʼaxoʼob k-kʼaʼaytik bey xan wa ku yaʼalaʼaltoʼon baʼaleʼ, maʼ unaj k-beetik u cuentailiʼ mix xan unaj k-kʼuuxiliʼ. Jesuseʼ tu chʼaʼaj óotsilil tiʼ le máaxoʼob tu kʼaʼaytaj le maʼalob péektsiloʼ; toʼon xaneʼ bey unaj k-beetkoʼ (Mateo 9:36).
3:15. Ka tsʼoʼok u beetaʼal profetai Ezequieleʼ, bin tu kaajil Tel Abib, tiʼ pʼáat ichil siete kʼiinoʼob táan u máansik tu tuukul bix ken u kʼaʼaytik le baʼax aʼalaʼabtiʼoʼ. Lelaʼ ku yeʼesiktoʼon u kʼaʼabéetil k-jóoʼsik u súutukil utiaʼal k-xakʼalxoktik le Bibliaoʼ, bey xan k-tuukul tiʼ le baʼaxoʼob ku kaʼansikoʼ.
4:1–5:4. Utiaʼal ka páajchajak u yeʼesik Ezequiel le baʼaxoʼob ku taal u kʼiin yóokʼol Jerusalenoʼ kʼaʼabéetchaj u yeʼesik kabal óolal yéetel maʼ u chʼaʼik saajkil. Toʼon xaneʼ jeʼel baʼalak meyajil ka u tsʼáatoʼon Dios ka k-beeteʼ, unaj k-beetik yéetel kabal óolal bey xan yéetel x-maʼ saajkilil.
7:4, 9; 8:18; 9:5, 10. Maʼ unaj k-chʼaʼik óotsilil tiʼ le kʼasaʼan máakoʼob ken xuʼulsaʼaktiʼob tumen Diosoʼ.
7:19. Ken kʼuchuk u kʼiinil u xuʼulsaʼal tiʼ le kʼasaʼan yóokʼol kaabaʼ, le taakʼinoʼ yaan u pʼáatal mix baʼal u beelal.
8:5-18. Le baʼaxoʼob ku yaʼalik le máaxoʼob tsʼoʼok u pʼatkoʼob u jaajiloʼ, jeʼel u beetik u náachtal máak tiʼ Dioseʼ. Le Bibliaoʼ ku yaʼalik: «U tʼaanoʼob le loolob máakoʼ ku beetik kʼaas tiʼ [u] yéet wíinik[il]» (Proverbios 11:9). Wa maʼ k-kʼáat ka xiʼiktoʼon kʼaasileʼ, maʼ unaj u máan t-tuukul k-chʼenxikintik baʼax ku yaʼalik le kʼasaʼan máakoʼobaʼ.
9:3-6. Utiaʼal k-salvartikba tiʼ le «táaj yaʼab muʼyajil» ku taal u kʼiinoʼ kʼaʼabéet u yantaltoʼon le chíikul eʼesik k-kʼubmaj k-kuxtal utiaʼal k-meyajtik Diosoʼ (Mateo 24:21). Teʼ kʼiinoʼobaʼ le máax bisik u nuʼukul u tsʼíib utúul secretariooʼ letiʼe máaxoʼob yéeyaʼanoʼob utiaʼal u binoʼob kaʼanoʼ, tumen letiʼob nuʼuktik le kʼaʼaytaj yéetel le kaʼansaj ku tsʼaʼabal tiʼ uláakʼ máakoʼoboʼ. Le meyajaʼ ku keʼetel yéetel u tsʼaʼabal upʼéel chíikul tu táan poolal le máakoʼoboʼ. Utiaʼal ka yanaktoʼon mantatsʼ le chíikulaʼ unaj k-jach tsʼáaik k-óol múul kʼaʼayt le maʼalob péektsil tu yéeteloʼoboʼ.
12:26-28. Ezequieleʼ unaj u yaʼalik tak tiʼ le máaxoʼob pʼaʼastikoʼ: «[U tʼaanoʼob Jéeobaeʼ] maʼ bíin xáanak ken béeychajakoʼobiʼ». Táanil tiʼ u xuʼulsaʼal tiʼ le kʼasaʼan yóokʼol kaabaʼ, toʼon xaneʼ unaj k-áantik le máakoʼob utiaʼal ka u kʼub u yóoloʼob tiʼ Jéeobaoʼ.
14:12-23. Le máax u kʼáat u salvartubaeʼ letiʼ unaj u kaxtik tumen mix máak jeʼel u páajtal u kaxtik tu yoʼolaleʼ (Romailoʼob 14:12).
18:1-29. Cada utúuleʼ yaan u kʼamik u boʼolil yoʼolal baʼaxoʼob u beetmaj.
«TULÁAKAL BÍIN IN SUT JEENEL JEN X-LAB KAAJIL»
Tu jaʼabil 611 táanil tiʼ u taal Cristoeʼ, tu siete jaʼabil bisaʼak le israelitaʼob táanxel luʼumiloʼ, u ancianoiloʼob Israeleʼ binoʼob yiknal Ezequiel utiaʼal ka u yuʼuboʼob baʼax kun aʼalbiltiʼob tumen Jéeoba. Tsʼaʼab u yojéeltoʼob jach úuch joʼopʼok u beetaʼal baʼaloʼob kʼaastak tumen u kaajil Israel yéetel yaan u xuʼulsaʼabtiʼob tumen Jéeoba (Ezequiel 20:1; 21:3). Jéeobaeʼ tu yaʼalaj tiʼ Sedequías, u reyil Israel: «Bíin lukʼesaʼak u nookʼil a pix joʼol, yaan u toʼokol a x-péet joʼol [wa corona], bíin jelpajak tuláakal. ¡Kʼuchuk tu kaʼanalil le wits le baʼax yaan teʼ táax kʼóomoʼ, lúubuk xan luʼum le baʼax yaan teʼ jach kaʼanaloʼ! Tuláakal bíin in sut jeenel jen x-lab kaajil. Baʼaleʼ lelaʼ chéen bíin úuchuk le ken taalak le máax in waʼalmaj ka u beet xotʼ kʼiin[oʼ]» (Ezequiel 21:26, 27).
Tiʼ Ezequieleʼ eʼesaʼab baʼax kun úuchul tiʼ u kaajil Jerusalén. Tsʼaʼab u yojéelt le baʼaloʼob kʼaastak ku beetik kaʼach Ohola (Israel) yéetel Oholiba (Judá). Oholaeʼ kʼuʼub tu kʼab le asirioʼob, le máaxoʼob yéetel núupkʼebanchajoʼ (Ezequiel 23:9). Eʼesaʼab xan tiʼ natsʼaʼan u kʼiinil u xuʼulsaʼal tiʼ Oholiba. Tu jaʼabil 609 táanil tiʼ u taal Cristoeʼ, u kaajil Jerusaleneʼ baʼpachtaʼab ich dieciocho meses. Ka kʼuch u kʼiinil u xuʼulsaʼal tiʼ le kaajaʼ, le judíoʼoboʼ pʼáat maʼ tu kaxtikoʼob baʼax ken u beetoʼob. Baʼaleʼ, tiʼ Ezequieleʼ aʼalaʼab tiʼ maʼ u jáan tsikbaltik tiʼ le judíoʼob bisaʼanoʼob Babilonia baʼaxoʼob kun úuchul tiʼ u kaajil Jerusalenoʼ, baʼaxeʼ yaan u tsikbaltik tak ken kʼuchuk le máaxoʼob maʼ kíimoʼob tiʼ le xuʼulsajiloʼ (Ezequiel 24:26, 27).
U núukil kʼáatchiʼob:
21:3. ¿Baʼax le «máaskab kaʼamáat u yej» ku jóoʼsik Jéeobaoʼ? Le «máaskab» meyajnaj tiʼ Jéeoba utiaʼal u beetik baʼaxoʼob u yaʼalmaj tu contra Jerusalén yéetel Judaoʼ, Nabucodonosor, u reyil Babilonia, u soldadoʼob yéetel maʼ xaaneʼ tak le angeloʼob yanoʼob teʼ kaʼanoʼ.
24:6-14. ¿Baʼax le u «kuuxum» wa le u yiits le kuumoʼ? Le u kaajil Jerusalén baʼpachtaʼaboʼ keʼet yéetel upʼéel kuum kóoch u jool. U yiitseʼ letiʼe baʼaloʼob kʼaastak ku beetaʼal teʼ kaajoʼ: le kʼaakʼas kuxtal ku biskoʼoboʼ yéetel le yaʼabach kʼiʼikʼ tsʼoʼok u wekikoʼoboʼ. U kajnáaliloʼob Jerusaleneʼ jach yaʼab baʼaloʼob kʼaastak tu beetoʼob, le oʼolal ku keʼetel yéetel upʼéel kuum jach u yiitsintmuba kex ka jach chokokíintaʼakeʼ maʼ tu chaʼik u yiits.
Baʼaxoʼob ku kaʼansiktoʼon:
20:1, 49. Le baʼax tu beetaj u ancianoiloʼob Israeloʼ tu yeʼesaj maʼ tu creertikoʼob le baʼaxoʼob tu kʼaʼaytaj Ezequieloʼ. Toʼoneʼ maʼ unaj u pʼáatal maʼ k-creertik le baʼaxoʼob ku yaʼalik Jéeobaoʼ. Yéetel mix utéen unaj k-tuukul jeʼex letiʼoboʼ, baʼaxeʼ kʼaʼabéet k-creertik tuláakal le baʼaxoʼob ku yaʼalik Jéeobaoʼ.
21:18-22. Kex meyajnaj adivinación tiʼ Nabucodonosor utiaʼal u yilik baʼax kaajil kun bin u baʼatelteʼ, u jaajileʼ Jéeoba beet u líikʼil baʼateʼel tu contra Jerusalén. Lelaʼ ku kaʼansiktoʼoneʼ mix le kʼasaʼan angeloʼob jeʼel u páajtal u beetkoʼob maʼ u tsʼoʼokbesaʼal baʼax u yaʼalmaj Jéeoba kun úuchloʼ.
22:6-16. Jéeobaeʼ u pʼekmaj u yaʼalaʼal baʼal maʼ jaaj tu contra wa máaxiʼ, u beetik máak baʼaloʼob kʼaastak, u meyaj maʼ maʼalob le páajtalil ku tsʼaʼabal tiʼ máakoʼ yéetel u boʼotaʼal wa máax utiaʼal ka u beet upʼéel baʼax maʼ maʼalobiʼ. Le oʼolaleʼ unaj k-kanáantik maʼ k-beetik mix upʼéel tiʼ le baʼaloʼobaʼ.
23:5-49. Israel yéetel Judaeʼ tu bisubaʼob yéetel uláakʼ kaajoʼob, lelaʼ le bis u adorartoʼob u diosoʼob le kaajoʼobaʼ. Toʼoneʼ unaj k-kanáantik maʼ k-bisikba yéetel le yóokʼol kaaboʼ, tumen jeʼel u beetik k-náachtal tiʼ Jéeobaeʼ (Santiago 4:4).
Le baʼax ku kaʼanskoʼ kuxaʼan yéetel yaan u páajtalil
¿Máasaʼ jach jatsʼuts le baʼaxoʼob ku kaʼansik le yáax veinticuatro capituloʼob tiʼ u libro Ezequieloʼ? Le baʼaxoʼob ku kaʼansikoʼ ku yeʼesik baʼaxoʼob beetik maʼ u kʼamaʼal máak tumen Dios, baʼax unaj u beetik máak utiaʼal ka chʼaʼabak óotsilil tiʼ yéetel baʼaxten kʼaʼabéet k-tsʼáaik u yojéelt le kʼasaʼan máakoʼob baʼax ku taal u kʼiinoʼ. Le profecíaʼob ku tʼaanoʼob tiʼ le xuʼulsajil taal yóokʼol Jerusalenoʼ ku yeʼesiktoʼoneʼ, Jéeobaeʼ utúul Dios ku tsʼáaik u yojéelt u kaajal le baʼaloʼob «maʼiliʼ úuchukoʼob[oʼ]» (Isaías 42:9).
Le profecíaʼob jeʼex le ku taasik Ezequiel 17:22-24 yéetel 21:26, 27 ku tʼaanoʼob tiʼ bix úuchik u beetaʼal reyil Jesucristo teʼ kaʼanoʼ. Maʼ kun xáantaleʼ le Reinoaʼ yaan u yilik ka beetaʼak baʼax u kʼáat Dios way Luʼumeʼ (Mateo 6:9, 10). Toʼoneʼ unaj k-páaʼtik yéetel chúukaʼan óolal tuláakal le nukuch utsiloʼob ken u taas le Reinooʼ. Jeʼex túun k-ilkoʼ «u tʼaan Jajal Dioseʼ kuxaʼan yéetel yaan u páajtalil» (Hebreob 4:12).
[U tsolajil le oochel teʼ táan juʼun 14]
¿Baʼax ku chíikbesik le u carro Jéeobaoʼ?
[U tsolajil le oochel teʼ táan juʼun 16]
Utiaʼal ka yanaktoʼon mantatsʼ le chíikuloʼ unaj k-jach tsʼáaik k-óol kʼaʼayt le maʼalob péektsiloʼ