Jéeobaeʼ jach utstutʼaan ka k-beet baʼax ku yaʼalik
Jéeobaeʼ jach utstutʼaan ka k-beet baʼax ku yaʼalik
«In xibil paal, yanak a wojéelajil utiaʼal a beetik u kiʼimaktal in wóol.» (PROVERBIOS 27:11.)
1. ¿Máax beetik maʼ u yuʼubik tʼaan le wíinikoʼoboʼ?
TEʼ YÓOKʼOL KAABAʼ óoliʼ mix máak utstutʼaan u yuʼubik tʼaan mix u tsʼáaikuba yáanal u páajtalil wa máax. Teʼ carta tu tsʼíibtaj tiʼ le efesoiloʼoboʼ, le apóstol Pablooʼ tu tsolaj baʼaxten jach yaan le tuukulaʼ: «[Teʼex kaʼacheʼ ka] beetikeʼex le baʼax ku beetik le yóokʼol kaabaʼ yéetel [ka] tsʼoʼokbesikeʼex u yóolal kʼaasilbaʼal máax ku meyaj tiʼ le máaxoʼob maʼ tu yuʼubikoʼob u tʼaan Jajal Diosoʼ» (Efesoiloʼob 2:1, 2). Jach beyoʼ, Satanaseʼ, letiʼe máax beetik maʼ u yóotik u yuʼub tʼaan le wíinikoʼoboʼ. Bey tu beetil teʼ yáax siglooʼ, yéetel bey u seguer u beetik desde ka jóoʼsaʼab teʼ kaʼan tu kʼiiniloʼob le yáax Nojoch Baʼateʼeloʼ (Apocalipsis 12:9).
2, 3. ¿Baʼaxten kʼaʼabéet k-uʼuyik u tʼaan Jéeoba?
2 Baʼaleʼ, toʼoneʼ k-ojel unaj k-uʼuyik u tʼaan Jéeoba yéetel k-beetik le baʼax ku yaʼalikoʼ, tumen letiʼ beetmailoʼon, letiʼ tsʼáaiktoʼon tuláakal baʼax kʼaʼabéettoʼon, letiʼ maas yaabiltikoʼon yéetel letiʼ salvarkoʼon (Salmo 148:5, 6; Beetaʼanoʼob [Hechos] 4:24; Colosailoʼob 1:13; Apocalipsis 4:11). Tu kʼiiniloʼob Moiseseʼ, le israelitaʼoboʼ u yojloʼobeʼ Jéeoba tsʼáaik kuxtal tiʼob yéetel letiʼ salvarkoʼob; le oʼolaleʼ aʼalaʼabtiʼob tumen Moisés: «Beeteʼex tuláakal le baʼax tsʼoʼok u yaʼalikteʼex Yuumtsil[oʼ]» (Deuteronomio 5:32). Baʼaleʼ, kex tumen u yojloʼob unaj u beetkoʼob le baʼax kʼáataʼabtiʼob tumen Diosoʼ, maʼ xáanchaj ka jáaw u tsʼoʼokbeskoʼob u leyoʼobiʼ.
3 ¿Baʼaxten kʼaʼabéet k-uʼuyik u tʼaan le Máax beet tuláakal baʼaloʼ? Utéenjeakileʼ, Jéeobaeʼ tu yaʼalaj tiʼ le profeta Samuel ka u yaʼal tiʼ le rey Sauloʼ: «[Maas] maʼalob u yuʼubaj tʼantaʼal [Dios] yéetel u chʼenxikintaʼal tiʼ u kʼuʼubul kíimsbil baʼalcheʼob» (1 Samuel 15:22, 23). ¿Baʼaxten maas maʼalob le u beetik máak baʼax u kʼáat Diosoʼ?
Maas maʼalob u beetaʼal baʼax ku yaʼalik «tiʼ u kʼuʼubul kíimsbil baʼalcheʼob»
4. ¿Baʼax u kʼáat Jéeoba ka k-beete?
4 Jéeobaeʼ u yuumil tuláakal baʼax yantoʼon, tumen letiʼ beetmil tuláakal baʼal. Wa letiʼ u yuumil tuláakal baʼaleʼ, ¿baʼax túun jeʼel u páajtal k-tsʼáaik tiʼeʼ? Jeʼel u páajtal k-tsʼáaik tiʼ upʼéel baʼal jach yaʼab u tojleʼ. ¿Baʼaxiʼ? U núukileʼ, tiʼ yaan ichil le tʼaanoʼobaʼ: «In xibil paal, yanak a wojéelajil utiaʼal a beetik u kiʼimaktal in wóol; beyoʼ bíin yanak baʼax in waʼal tiʼ máaxoʼob u kʼáatoʼob u pajoʼob in subtal» (Proverbios 27:11). Jéeobaeʼ jach utstutʼaan ka k-beet baʼax ku yaʼalik. Kex jejeláas baʼaxoʼob k-aktáantikeʼ, wa k-uʼuyik u tʼaan Dioseʼ yaan k-eʼesik maʼ jaaj wa yaan k-pʼatik Dios jeʼex u yaʼalmil Satanasoʼ. ¿Máasaʼ jach nojoch baʼal k-ilik le u páajtal k-beetik lelaʼ?
5. ¿Bix k-loobiltik Jéeoba wa maʼ k-beetik le baʼax ku yaʼalikoʼ? Ketej.
5 Dioseʼ u kʼáat ka k-chʼaʼatukult k-beetik baʼax maʼalob, yéetel jeʼel k-loobiltik wa maʼ k-beetik le baʼax ku yaʼalikoʼ. Baʼaleʼ ¿bix k-loobiltik? Letiʼeʼ jach ku yaatal u yóol u yilik u chʼaʼatuklaʼal u beetaʼal baʼax maʼ maʼalobiʼ (Salmo 78:40, 41). Koʼox aʼalikeʼ, utúul máak yaan diabetes tiʼeʼ maʼ tu jaantik le baʼax aʼalaʼab tiʼ tumen le doctor unaj u jaantikoʼ, baʼaxeʼ ku seguer u jaantik le baʼaxoʼob beetik loob tiʼoʼ. ¿Bix a tuklik u yuʼubikuba le doctor u kʼáat u yutsil le máakaʼ? Jeʼex le doctoraʼ, Jéeoba xaneʼ ku yaatal u yóol ken u yil maʼ t-uʼuyik u tʼaan, tumen letiʼeʼ u yojel baʼax kun úuchultoʼon wa maʼ k-beetik le baʼax ku yaʼalikoʼ.
6. ¿Baʼax jeʼel u yáantikoʼon utiaʼal k-beetik baʼax u kʼáat Dioseʼ?
6 ¿Baʼax jeʼel u yáantikoʼon k-beet baʼax u kʼáat Dioseʼ? Cada utúul tiʼ toʼoneʼ unaj u kʼáatik tiʼ Dios ka tsʼaʼabak tiʼ «jumpʼéel puksiʼikʼal [yaan] u yóol» u beet baʼax ku yaʼalaʼal tiʼ, jeʼex tu beetil le rey Salomón, le máax kʼaʼabéet kaʼach u «kʼaj óoltik baʼax uts yéetel baʼax kʼaas» utiaʼal ka páajchajak u juzgartik u yéet israelitailoʼoboʼ (1 Reyes 3:9). Tiʼ toʼoneʼ kʼaʼabéet u yantal «jumpʼéel puksiʼikʼal [yaan] u yóol» u yuʼub tʼaan, utiaʼal «[k-]kʼaj óoltik baʼax uts yéetel baʼax kʼaas» teʼ yóokʼol kaab tuʼux óoliʼ mix máak utstutʼaan u beetik le baʼax ku yaʼalaʼal tiʼoʼ. Le oʼolal Dioseʼ tsʼoʼok u tsʼáaiktoʼon le Bibliaoʼ, libroʼob, revistaʼob, muchʼtáambaloʼob bey xan sukuʼunoʼob ku nuʼuktajoʼob yéetel yaabilaj. ¿Táan wa u jach meyajtoʼon maʼalob le nojoch siibaloʼobaʼ?
7. Tu táan Jéeobaeʼ, ¿baʼaxten maas maʼalob u beetaʼal baʼax ku yaʼalik, tiʼ u kʼuʼubul tóokbil baʼalcheʼob tiʼ?
7 Utiaʼal k-ilik u kʼaʼananil k-beetik baʼax ku yaʼalik Dioseʼ, unaj k-kʼaʼajsik úuchileʼ tu yaʼalaj tiʼ u kaajaleʼ maas maʼalob u yuʼubaʼal u tʼaan tiʼ u kʼuʼubul tóokbil baʼalcheʼob tiʼ (Proverbios 21:3, 27; Oseas 6:6; Mateo 12:7). ¿Baʼaxten maas maʼalob u yuʼubaʼal u tʼaan Dios, tiʼ u kʼuʼubul tóokbil baʼalcheʼob tiʼ? ¿Maʼ wa letiʼ aʼal ka kʼuʼubuk le siibaloʼobaʼ? ¿Baʼax péeksik kaʼach utúul israelita u kʼub le siibaloʼobaʼ? ¿Ku beetik wa utiaʼal ka lúubuk utsil tu táan Dios, wa chéen ku beetik tumen bey aʼalaʼanil ka beetaʼakoʼ? Le cristiano jach tu jaajil u kʼáat lúubul utsil tu táan Dioseʼ yaan u yilik u beetik tuláakal le baʼax ku kʼáataʼal tiʼoʼ. Tiʼ Dioseʼ maʼ kʼaʼabéet ka k-kʼub tóokbil baʼalcheʼob tiʼiʼ, baʼaleʼ jach utstutʼaan k-beetik baʼax ku yaʼalik.
Unaj k-kaambal tiʼ le baʼax uchaʼanoʼ
8. Dioseʼ, ¿baʼaxten jáaw u kʼamik Saúl bey reyileʼ?
8 Le baʼax ku yaʼalik le Biblia yoʼolal le rey Sauloʼ, ku kaʼansiktoʼon baʼaxten kʼaʼabéet k-beetik baʼax ku yaʼalaʼaltoʼon. Tu káajbaleʼ, Sauleʼ utúul rey jach kabal u yóol kaʼach yéetel jach «jumpʼíit baʼal» u yuʼubikuba, baʼaleʼ ka tsʼoʼokeʼ joʼopʼ u kaʼantal u yich yéetel xuʼul u chʼaʼatuklik u beetik baʼax maʼalob (1 Samuel 10:21, 22; 15:17). Upʼéel u kʼiinil u kaʼaj baʼateʼel tu contra le filisteoʼoboʼ, aʼalaʼab tiʼ Saúl ka u páaʼt u kʼuchul Samuel, le máax ken u kʼub tóokbil baʼalcheʼob tiʼ Jéeobaoʼ yéetel le máax kun aʼalik baʼax unaj u beetaʼaloʼ. Le ka tu yilaj táan u xáantal u kʼuchul le profeta yéetel táan u pʼataʼal tu juunal tumen le kaajoʼ, Sauleʼ «tu kʼabil tu láaj [kʼubaj] le tóokbil baʼalcheʼoboʼ». Jach upuliʼ maʼ maʼalob tu yilil Jéeoba le baʼax tu beetaʼ. Le ka kʼuch túun Samueleʼ, le reyoʼ utiaʼal maʼ u yaʼalaʼal mix baʼal tiʼeʼ, tu yaʼaleʼ tumen tu yilaj maʼ tu kʼuchul le profetaoʼ, tu xachuba u kʼub le tóokbil baʼalcheʼoboʼ. Utiaʼal Sauleʼ, maas jach kʼaʼanan u kʼubik kaʼach le siibal ke u páaʼtik ka kʼuchuk Samuel jeʼex aʼalaʼabik tiʼoʼ. Le oʼolal aʼalaʼab tiʼ tumen Samuel: «¡Le baʼax ta beetajaʼ chéen chokol poolal! Wa ka wuʼuyajtʼan[t] le baʼax kaʼach tu [yaʼalaj] tiʼ teech Yuumtsiloʼ bejelaʼa ku jetsʼkúuntik utiaʼal a beet a [reyileʼ]». Tumen maʼ tu beetaj le baʼax aʼalaʼab tiʼoʼ, Sauleʼ tu peʼertaj u reino (1 Samuel 10:8; 13:5-13).
9. ¿Bix tu yeʼesil Saúl maʼ utstutʼaan u beetik baʼax ku yaʼalaʼal tiʼiʼ?
9 ¿Tu kanaj wa u yuʼub tʼaan Saúl yéetel le baʼax úuchaʼ? Maʼatech. Ka máan kʼiineʼ, Jéeobaeʼ tu yaʼalaj tiʼ ka u xuʼuls tiʼ u kaajil Amaleq, tumen le kaajaʼ kex mix baʼal ku beetaʼal tiʼeʼ bin u baʼatelt u kaajil Israel; aʼalaʼab tiʼ ka u xuʼuls tak tiʼ tuláakal u yalakʼ baʼalcheʼ le kaajaʼ. «Saúl túuneʼ tu baʼateltaj le j-amalekitaʼob likʼbal Havilaeʼ tak Shur.» Le ka bin Samuel u yil Sauleʼ, le reyoʼ tumen jach kiʼimak u yóoleʼ, tu yaʼalaj tiʼ: «Yuumtsil ka u kiʼtʼantech. Tsʼoʼok in tsʼoʼokbesik baʼax tu yaʼalaj Yuumtsil». Baʼaleʼ Saúl yéetel le kaajoʼ maʼ tu beetoʼob tuláakal le baʼax aʼalaʼabtiʼoboʼ, baʼaxeʼ «tu pʼatajoʼob kuxaʼan Agag, bey xan maʼ tu kíimsajoʼob u jatsʼutstakiloʼob le j-tamanoʼoboʼ, le wakaxoʼoboʼ, mix le mejen wakaxoʼob [maas] poloktakoʼoboʼ, mix le j-yuukoʼoboʼ, mix tu kʼaskúuntajoʼob le baʼaxoʼob koʼoj u tojoloʼoboʼ». Utiaʼal maʼ u yaʼalaʼal mix baʼal tiʼeʼ, Sauleʼ tu yaʼalaj: «Le máakoʼoboʼ tu pʼatajoʼob u [maas] maʼalobil le j-tamanoʼob yéetel le wakaxoʼob utiaʼal u kíimsoʼob yéetel u [kʼubkoʼob] tiʼ Yuumtsil[oʼ]» (1 Samuel 15:1-15).
10. ¿Baʼax maʼ tu kanaj Sauliʼ?
10 Samuel túuneʼ tu yaʼalaj tiʼ Saúl: «[Maas] ku kiʼimaktal u yóol Yuumtsil ka tsʼoʼokbesaʼak u tʼaan, tiʼ le kíimsbil baʼalcheʼob yéetel le ku láaj tóokaʼaloʼoboʼ; [maas] maʼalob u yuʼubajtʼantaʼal yéetel u chʼenxikintaʼal tiʼ u kʼuʼubul kíimsbil baʼalcheʼob yéetel u tsaatsel j-yuukoʼob» (1 Samuel 15:22). Kex ka kʼuʼubuk kaʼach le baʼalcheʼob tiʼ Jéeobaoʼ, letiʼeʼ maʼ tu kʼamikoʼob tumen tu yaʼalaj ka láaj xuʼulsaʼaktiʼob.
Unaj k-beetik le baʼaxoʼob ku yaʼalaʼaltoʼonoʼ
11, 12. 1) ¿Bix u yilik Jéeoba le k-tsʼáaik óol meyajt jeʼex u kʼáatoʼ? 2) ¿Baʼaxten chéen táan u tuskuba le máax ku tuklik jeʼel u seguer u kʼamaʼal tumen Dios kex ka u kʼebankúuntubaoʼ?
11 Jéeobaeʼ jach ku kiʼimaktal u yóol ken u yil bix u chúukpajal u yóol le máaxoʼob meyajtik kex ka u aktáantoʼob chʼaʼapachtajiloʼob, ken u kʼaʼaytoʼob u maʼalob péektsilil le Reino kex tumen yaan máaxoʼob maʼ utstutʼaanoʼoboʼ, bey xan yéetel ken xiʼikoʼob muchʼtáambal kex maʼ chéen chʼaʼabil u kaxkoʼob baʼal u jaantoʼobiʼ. Jéeobaeʼ jach nojoch baʼal u yilik le k-tsʼáaik óol k-meyajtoʼ. Kex tumen yaan máaxoʼob maʼatech u tsʼáaikoʼob cuenta baʼax k-beetkeʼ, baʼaleʼ Jéeobaeʼ ku yilik tuláakal baʼax k-beetik utiaʼal k-meyajtik yéetel maʼ tu tuʼubsik (Mateo 6:4).
12 Utiaʼal k-lúubul utsil tu táan Dioseʼ, unaj k-beetik tuláakal baʼax ku yaʼaliktoʼon. Maʼ unaj k-tuklik wa jeʼel u páajtal k-beetik baʼaloʼob maʼ utstutʼaan Dios yéetel ka seguernak u kʼamkoʼoneʼ. Maʼ xaaneʼ, yaan máaxeʼ jeʼel u tuklikeʼ wa ku maas tsʼáaik u yóol u meyajt Dioseʼ jeʼel u seguer u lúubul utsil tiʼeʼ kex ka u kʼebankúuntuba. Baʼaleʼ le tuukulaʼ jach upuliʼ maʼ maʼalobiʼ (Galaciailoʼob 6:7, 8).
13. ¿Bix jeʼel u páajtal k-eʼesik chúukpajaʼan k-óol beet baʼax u kʼáat Dios tak tuʼuxoʼob mix máak ilkoʼonoʼ?
13 Le oʼolal maʼalob ka k-tukult lelaʼ: «¿Táan wa in beetik sáamsamal tuláakal le baʼax ku kʼáatikten Jéeobaoʼ?». Jesuseʼ tu yaʼalaj: «Le máax chúukaʼan u yóol u meyajt jumpʼíit baʼaleʼ chúukaʼan u yóol xan u meyajt yaʼab baʼaloʼob; le máax maʼ tu chúukpajal u yóol u meyajt jumpʼíit baʼaleʼ, mix tiʼ u yaʼabil ku chúukpajal u yóol» (Lucas 16:10). ¿K-kanáantik wa maʼ k-beetik mix baʼal kʼaas tak ichil k-najil tuʼux mix máak ilkoʼon? (Salmo 101:2.) Jach beyoʼ, tak ichil k-najil unaj u chúukpajal k-óol beet baʼax ku yaʼaliktoʼon Jéeoba. Maʼ sen úucheʼ, le máax taak u chaʼantik baʼaloʼob subtsiltakeʼ, kʼaʼabéet u bin kaʼach teʼ kúuchiloʼob tuʼux ku máansaʼal le baʼaloʼobaʼ; baʼaleʼ bejlaʼeʼ, teʼ luʼumiloʼob tuʼux jach yaʼab u meyaj le computadoraʼoboʼ, chéen kʼaʼabéet u tsʼáankʼabtik máak jujumpʼéel teclaʼob utiaʼal u páajtal u chaʼantik le baʼaloʼobaʼ. Le oʼolaleʼ, unaj k-uʼuyik le baʼax tu yaʼalaj Jesusaʼ: «Jeʼel máaxak ku paktik juntúul koʼolel utiaʼal u tsʼíibolteʼ tsʼoʼok u núupkʼebantal tu puksiʼikʼal tu yéetel». Maʼ unaj mix k-chaʼantik le baʼaloʼob subtsiltak ku máansaʼaloʼob teʼ televisión wa tiʼ uláakʼ tuʼuxoʼ (Mateo 5:28; Job 31:1, 9, 10; Salmo 119:37; Proverbios 6:24, 25; Efesoiloʼob 5:3-5.) Baʼaleʼ ¿kux túun ken máansaʼak upʼéel chaʼan tuʼux ku beetaʼal loobil? ¿K-beetik wa jeʼex Jéeoba, le Máax «ku pʼektik yéetel tuláakal u yóol le máaxoʼob [u] yaabiltmajoʼob le meyaj looboʼ»? (Salmo 11:5.) ¿Kux túun le u píitmáan u yukʼik máak tu yotoch tuʼux mix máak ilkoʼ? Le Bibliaoʼ maʼ chéen ku yaʼalik maʼ maʼalob le káaltaliloʼ, ku yaʼalik xan maʼ maʼalob ka píitmáanak u yukʼik máakiʼ (Tito 2:3, NM; Lucas 21:34, 35, NM; 1 Timoteo 3:3).
14. ¿Bix jeʼel k-eʼesik táan k-beetik baʼax u kʼáat Dios tiʼ tuláakal baʼax yaan yil yéetel taakʼineʼ?
14 Unaj k-kanáantikba xan tiʼ tuláakal baʼax yaan yil yéetel taakʼin. ¿Jeʼel wa k-táakpajal tiʼ upʼéel negocio k-ojel yaan u yoklaʼal yaʼab máakoʼob utiaʼal ka ayikʼalchakoʼoneʼ? ¿Jeʼel wa k-beetik baʼaloʼob ku binoʼob tu contra le gobiernoʼob utiaʼal maʼ k-boʼotik le impuestoʼoboʼ? ¿K-ilik wa k-beetik le baʼax ku yaʼalik le Bibliaaʼ: «Boʼot tiʼ tuláakal máakeʼ le baʼax unajeʼ. [...] Tiʼ máax unaj a boʼotikeʼex le [impuestoʼoboʼ], boʼoteʼex le impuestoʼoboʼ»? (Romailoʼob 13:7.)
K-beetik baʼax ku yaʼalik tumen k-yaabiltmaj
15. ¿Baʼaxten k-beetik le baʼax ku yaʼaliktoʼon Diosoʼ?
15 Yaʼab utsiloʼob ku taasiktoʼon k-beetik le baʼax ku yaʼalik Diosoʼ. Le maʼ k-tsʼuʼutsʼik chamal, le k-bisik upʼéel kuxtal jeʼex u kʼáat Dios yéetel k-ilik le kʼiʼikʼ bey upʼéel baʼal kiliʼicheʼ, ku yáantkoʼon utiaʼal maʼ u tsaʼayaltoʼon upʼéel kʼaakʼas kʼojaʼanil. Tsʼoʼoleʼ, wa k-beetik le baʼax ku yaʼalik le Bibliaoʼ, maʼ ken k-xuʼuxup k-taakʼin chéen beyoʼ, yéetel maʼ ken k-peʼert amigoʼob mix k-láakʼtsiloʼob (Isaías 48:17). Le baʼaloʼobaʼ letiʼe utsiloʼob ku taasiktoʼon k-beetik baʼax ku yaʼaliktoʼon Diosoʼ, baʼaleʼ u jaajileʼ k-meyajtik tumen k-yaabilmaj maʼ chéen tumen k-ojel yaan baʼax ken k-kʼam jeʼex úuchik u yaʼalik Satanasoʼ (Job 1:9-11; 2:4, 5). Jéeobaeʼ tu tsʼáajtoʼon u páajtalil k-yéeyik máax ken k-meyajte, yéetel toʼoneʼ tsʼoʼok chʼaʼatuklik k-uʼuyik u tʼaan, tumen k-kʼáat kiʼimakkúuns u yóol yéetel k-kʼáat beet baʼax uts (Romailoʼob 6:16, 17; 1 Juan 5:3).
16, 17. 1) ¿Bix tu yeʼesil Jesús unaj k-beetik baʼax ku yaʼalik Dios? 2) ¿Bix jeʼel u páajtal k-beetik jeʼex Jesuseʼ?
16 Jesuseʼ tu yeʼesajtoʼon kʼaʼabéet k-uʼuyik u tʼaan Dios yoʼolal le yaabilaj k-uʼuyik tu yoʼolaloʼ (Juan 8:28, 29). Le ka taal way Luʼumeʼ Jesuseʼ «tu kanaj uʼuyaj tʼaan tu yoʼolal baʼax yanchaj u mukʼyajtik» (Hebreob 5:8, 9). ¿Bix úuchik u kanik u yuʼub tʼaan? Jesuseʼ «tu kabalkúuntaj u yóol yéetel tu yoʼolal u yuʼubaj tʼaaneʼ bin tiʼ kíimil» (Filiposiloʼob 2:7, 8). Kex tumen tsʼoʼokaʼaniliʼ u yeʼesik teʼ kaʼan ku yuʼubik tʼaaneʼ, way Luʼumeʼ tu aktáantaj yaʼab baʼaloʼob utiaʼal u yeʼesik ku beetik tuláakal baʼax ku yaʼalaʼal tiʼ. Yoʼolal le baʼax tu beetaʼ k-ojel chéen letiʼ jeʼel u páajtal u tʼaan tu táan u Taata, bey Nojoch Sacerdote, tu yoʼolal le máaxoʼob kun binoʼob kaʼan yéetel le máaxoʼob ku tsʼáaik u fejoʼob tiʼ letiʼoʼ (Hebreob 4:15; 1 Juan 2:1, 2).
17 Toʼon xaneʼ jeʼel u páajtal k-beetik jeʼex Jesús wa k-tsʼáaik táanil ichil k-kuxtal le baʼax ku yaʼalik Diosoʼ (1 Pedro 2:21). Jach ku taasiktoʼon kiʼimak óolal k-beetik baʼax ku yaʼalik Dios tak ken túulchʼintaʼakoʼon k-beet baʼax kʼaas wa tak ken k-tsʼíibolt beetik baʼax maʼ maʼalobiʼ (Romailoʼob 7:18-20). K-beetik baʼax u kʼáat Dioseʼ, u kʼáat xan u yaʼal k-chaʼik nuʼuktaʼal tumen le máaxoʼob u tsʼaamaj utiaʼal nuʼuktik le múuchʼuliloʼ kex kʼeban wíinikoʼob (Hebreob 13:17). Jéeobaeʼ jach utstutʼaan ka k-tsʼáa ichil k-kuxtal tuláakal baʼax ku yaʼaliktoʼon.
18, 19. ¿Baʼax ku beetik Jéeoba yoʼolal le máax meyajtik yéetel yaabilajoʼ?
18 Utiaʼal k-beetik baʼax ku yaʼalik Dioseʼ, maʼ xaaneʼ yaan u kʼaʼabéettal u chúukpajal k-óol aktáant chʼaʼapachtajiloʼob (Beetaʼanoʼob 5:29). Tsʼoʼoleʼ utiaʼal k-kʼaʼaytik le Reino yéetel k-kaʼansik uláakʼ máakoʼob jeʼex u yaʼalik Dioseʼ, unaj u chúukpajal k-óol tak ken xuʼulsaʼak le kʼasaʼan yóokʼol kaabaʼ (Mateo 24:13, 14; 28:19, 20). Kʼaʼabéet xan u chúukpajal k-óol utiaʼal maʼ u jáawal k-muchʼikba yéetel k-sukuʼunoʼob, kex táan k-aktáantik talmiloʼob wa muʼyajiloʼob. Jéeobaeʼ mantatsʼ táan u yilik bix tsʼáaik k-óol utiaʼal k-beetik le baʼax ku yaʼalikoʼ. Baʼaleʼ, utiaʼal k-jach tsʼoʼokbesik le baʼaxoʼob ku yaʼaliktoʼonoʼ, maʼ unaj k-chaʼik túulchʼintaʼal beet baʼax kʼaas tumen le kʼeban yaan t-wíinkliloʼ, baʼaxeʼ unaj k-yaabiltik yéetel k-beetik baʼax uts (Romailoʼob 12:9).
19 Ken k-meyajt Jéeoba tumen k-yaabilmaj bey xan tumen taak k-tsʼáaik nib óolalil tiʼeʼ, k-tsʼáaik cuentaeʼ «letiʼeʼ ku boʼotik le máaxoʼob kaxtikoʼ» (Hebreob 11:6). Jéeobaeʼ nojoch baʼal u yilik le baʼaxoʼob ku beetaʼal tumen le máaxoʼob meyajtikoʼ, baʼaleʼ maas ku kiʼimaktal u yóol ken u yil u beetaʼal baʼax ku yaʼalik yoʼolal le yaabilaj ku yuʼubaʼal tu yoʼolaloʼ (Proverbios 3:1, 2).
¿Baʼax jeʼel a núukikeʼ?
• ¿Baʼax u kʼáat Jéeoba ka k-beete?
• ¿Baʼax baʼaloʼob maʼ maʼalobtak tu beetaj Sauliʼ?
• ¿Bix k-eʼesik jach tu jaajil k-creertik le u yuʼubaʼal tʼaanoʼ maas maʼalob tiʼ u kʼuʼubul tóokbil baʼalcheʼob?
• ¿Baʼax péekskoʼon k-beet le baʼax ku yaʼalik Jéeobaoʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 18]
¿Bix u yuʼubikuba utúul doctor wa le máax kʼojaʼanoʼ maʼ tu beetik le baʼax ku yaʼalik tiʼ utiaʼal u yutstaloʼ?
[U tsolajil le oochel teʼ táan juʼun 20]
Jéeobaeʼ, ¿baʼaxten jáaw u kʼamik Saúl bey reyileʼ?
[U tsolajil le oochel teʼ táan juʼun 21]
Ta wotocheʼ, ¿ka kanáantik wa maʼ a beetik baʼax maʼ maʼalobiʼ?