U Tʼaan Jéeobaeʼ kuxaʼan

Baʼaloʼob maʼalobtak ku kanaʼal tiʼ u kaʼa jaats u libroi Ezequiel

TIAʼANOʼON tu mesil diciembre tiʼ u jaʼabil 609 táanil tiʼ u taal Cristoeʼ, u reyil Babiloniaeʼ u baʼpachmaj u tsʼook utéen u kaajil Jerusalén. Tak teʼ kʼiinoʼobaʼ, le profecíaʼob tu kʼaʼaytaj Ezequiel tiʼ le israelitaʼob bisaʼanoʼob Babiloniaoʼ, tʼaanajoʼob tiʼ u lúubul yéetel tiʼ u xuʼulsaʼal Jerusalén. Le kaajoʼob yaan naatsʼ tiʼoʼ yaan u kiʼimaktal u yóoloʼob ken u yiloʼob u xuʼulsaʼal tiʼ, le oʼolal Jéeobaeʼ tu yaʼalaj tiʼ Ezequiel ka u kʼaʼayt xan baʼax ku taal u kʼiin tu yóokʼoloʼob. Dieciocho meses baʼpachtaʼak Jerusalén ka xuʼulsaʼab tiʼ. Ka tsʼoʼokeʼ Ezequieleʼ joʼopʼ xan u kʼaʼaytik yaan u kʼuchul u kʼiinil u chʼaʼajoʼoltaʼal u adorartaʼal Jéeoba tu kaajil Jerusalén.

Ezequiel 25:1 tak 48:35 ku taasik profecíaʼob ku tʼaanoʼob tu contra le kaajoʼob yanoʼob naatsʼ tiʼ u kaajil Israeloʼ yéetel profecíaʼob ku tʼaanoʼob tiʼ u kaʼa suut le israelitaʼob tu luʼumoʼoboʼ. * Óoliʼ tuláakal le baʼaxoʼob ku yaʼalik le capituloʼobaʼ tsʼíibtaʼab tu tsoolol jeʼex úuchik u bin u yúuchloʼoboʼ, chéen Ezequiel 29:17-20 maʼ bey úuchik u tsʼíibtaʼabliʼ. Jeʼex u maasil libroʼob ichil le Bibliaoʼ, u libroi Ezequieleʼ «kuxaʼan yéetel yaan u páajtalil» (Hebreob 4:12).

LE LUʼUMOʼ YAAN U PʼÁATAL JEʼEX U JARDINIL «EDENEʼ»

(Ezequiel 25:1–39:29)

Jéeobaeʼ u yojel yaan u kiʼimaktal u yóoloʼob u kaajil Ammón, Moab, Edom, Filistea, Tiro yéetel Sidón ken u yiloʼob u xuʼulsaʼal tiʼ Jerusalén, le oʼolal tu yaʼalaj tiʼ Ezequiel ka u kʼaʼayt le talamil kun taal xan tu yóokʼoloʼoboʼ. Tu yaʼalaj xan tiʼ ka u kʼaʼayt yaan u chʼaʼabal le baʼaloʼob koʼojtak yaan tu kaajil Egiptooʼ, tu yaʼaleʼ «faraón u ajawil Egipto, yéetel [...] tuláakal u kaajaleʼ» yaan u xuʼulsaʼaltiʼob tumen u reyil Babilonia (Ezequiel 31:2, 3, 12; 32:11, 12).

U kaajil Jerusaleneʼ xuʼulsaʼab tu jaʼabil 607. Seis meses túun xuʼulsaʼak tiʼeʼ utúul tiʼ le máaxoʼob tu salvartubaʼoboʼ bin u yaʼal tiʼ Ezequiel: «Tsʼoʼok [...] u lúubul Jerusalén». Ezequiel túuneʼ káaj u kʼaʼaytaj tu kaʼatéen tiʼ le máaxoʼob bisaʼanoʼob Babiloniaoʼ (Ezequiel 33:21, 22). Tu kʼaʼaytaj yaan u kaʼa suutoʼob tu luʼumoʼob. Jéeobaeʼ tu yaʼaleʼ yaan u tsʼáaik David «u beet u j-kanan tamanil» tu yóokʼoloʼob (Ezequiel 34:23). U kaajil Edomeʼ yaan xan u xuʼulsaʼal tiʼ, baʼaleʼ u luʼumil Judaeʼ yaan u pʼáatal jeʼex u jardinil Edeneʼ (Ezequiel 36:35). Jéeobaeʼ tu yaʼalaj xaneʼ ken suunak u kaajaleʼ yaan u kanáantik utiaʼal maʼ u xuʼulsaʼal tiʼ tumen «Gog» (Ezequiel 38:2).

U núukil kʼáatchiʼob:

29:8-12. ¿Baʼax kʼiin ka pʼáat minaʼan u kajnáaliloʼob Egipto ichil cuarenta jaʼaboʼob? Le israelitaʼob pʼáatoʼob tu luʼumil Judá le ka xuʼulsaʼab tiʼ Jerusalén tu jaʼabil 607, maʼ tu beetoʼob baʼax aʼalaʼabtiʼob tumen profeta Jeremíasiʼ, baʼaxeʼ binoʼob tu luʼumil Egipto (Jeremías 24:1, 8-10; 42:7-22). Baʼaleʼ maʼ bin utsiltiʼobiʼ, tumen Nabucodonosoreʼ tu xuʼulsaj xan tiʼ u kaajil Egipto. Maʼ xaaneʼ, letiʼe ka pʼáat minaʼan u kajnáaliloʼob ichil le cuarenta jaʼaboʼoboʼ. Kex minaʼan uláakʼ baʼax eʼesik wa jach uchaʼan lelaʼ, toʼoneʼ k-ojel jach tu jaajil uchaʼan tumen Jéeobaeʼ mantatsʼ ku béeykuntik baʼax ku yaʼalik (Isaías 55:11).

29:18. ¿Baʼaxten ku yaʼalaʼal «tuláakal le j-baʼateloʼoboʼ kʼolistaʼaboʼob» yéetel «pokʼchaj xan u keléembaloʼob»? U soldadoʼob Nabucodonosoreʼ jach xáanchaj u baʼpachmoʼob u kaajil Tiro yéetel jach xáanchaj táan u baʼateltikoʼob, ikil u sen jiʼikuba túun u cascoʼob tu pooloʼobeʼ kʼolischajoʼob. U keléembaloʼobeʼ poʼchajoʼob úuchik u sen púutkoʼob le baʼaxoʼob  kʼaʼabéetchaj utiaʼal u ganarkoʼob u kaajil Tirooʼ (Ezequiel 26:7-12).

Baʼaxoʼob ku kaʼansiktoʼon:

29:19, 20. Le ka púutsʼ u kajnáaliloʼob Tiroeʼ tu bisoʼob yaʼab tiʼ le baʼaloʼob koʼojtak yantiʼoboʼ, le oʼolal óoliʼ mix baʼal pʼáat tiʼ rey Nabucodonosor. Kex jach kʼasaʼan yéetel jach nojbaʼal u taaskuba kaʼach Nabucodonosoreʼ, Jéeobaeʼ tu kʼubaj Egipto tu kʼab utiaʼal u «boʼotik u j-baʼateloʼob»; bey úuchik u boʼotaʼal tumen Jéeoba yoʼolal le meyaj tu beetoʼ. Le baʼax tu beetaj Jéeobaaʼ, ku kaʼansiktoʼoneʼ unaj k-boʼotik xan le impuestoʼob tiʼ le jalaʼach wíinkoʼoboʼ, kex wa ku beetoʼob baʼaloʼob maʼalobtak bey xan wa maʼatech (Romailoʼob 13:4-7).

33:7-9. Jeʼex tu beetil Ezequieleʼ, le sukuʼunoʼob yéeyaʼanoʼob utiaʼal u binoʼob kaʼan yéetel le yaʼabach máakoʼob kun pʼáatloʼob way Luʼumeʼ, unaj u kʼaʼaytkoʼob mantatsʼ u maʼalob péektsilil le Reinooʼ yéetel u kʼaʼaytikoʼob natsʼaʼan u kʼiinil u yilaʼal upʼéel jach nojoch muʼyajil (Mateo 24:21).

33:10-20. Utiaʼal ka salvartaʼakoʼoneʼ unaj k-pʼatik k-beetik baʼaloʼob kʼaastak yéetel unaj k-beetik chéen baʼax utstutʼaan Jéeoba. Tsʼoʼoleʼ, mix utéen unaj k-tuklik wa «maʼ tubeel baʼax ku beetik» Jéeobaiʼ.

36:20, 21. Úuch kaʼacheʼ le u maasil kaajoʼoboʼ, u yojloʼobeʼ le israelitaʼoboʼ «u kaajaloʼob Yuumtsil» Jéeoba. Baʼaleʼ le israelitaʼoboʼ tu taasoʼob subtsilil tiʼ u kʼaabaʼ Dios tumen tu beetoʼob baʼaloʼob kʼaastak. Toʼoneʼ unaj k-kanáantik maʼ k-beetik baʼaloʼob jeʼel u taasik subtsilil tiʼ u kʼaabaʼ Dioseʼ.

36:25, 37, 38, NM. Toʼoneʼ, táakaʼanoʼon ichil le u múuchʼ máakoʼob kiliʼichoʼob ku adorarkoʼob Jéeobaoʼ. Le oʼolaleʼ, unaj k-kanáantik maʼ k-beetik baʼaloʼob kʼaastak.

38:1-23. ¡Jach ku líiʼsik k-óol ojéeltik Jéeobaeʼ yaan u kanáantik u kaajal ken taalak baʼateltbil tumen Gog tiʼ u luʼumil Magog! Le Gog ku yaʼalaʼalaʼ Satanás, «le máax ku tusbel way yóokʼol kaab» desde ka jóoʼsaʼab teʼ kaʼanoʼ. Le Magog xan ku yaʼalaʼaloʼ, letiʼe yóokʼol kaab tuʼux pulaʼab Satanás yéetel u kʼasaʼan angeloʼoboʼ (Juan 12:31; Apocalipsis 12:7-12).

«ILAWIL MAʼALOB TULÁAKAL BAʼAX BIN IN KAʼAJ IN WEʼES TIʼ TEECH»

(Ezequiel 40:1–48:35)

Tsʼoʼok u máan catorce jaʼaboʼob xuʼulsaʼak tiʼ u luʼumil Jerusalén (Ezequiel 40:1). Táan u bineltik 56 jaʼaboʼob utiaʼal ka suunak le israelitaʼob tu luʼumoʼoboʼ (Jeremías 29:10). Teʼ kʼiinoʼoboʼ Ezequieleʼ taʼaytak u chukik 50 jaʼaboʼob tiʼ, letiʼe xan ka tsʼaʼab u yil u luʼumil Israel ichil upʼéel náayoʼ. Ichil le náayoʼ tu yuʼubaj u yaʼalaʼal tiʼ: «[Pakten] maʼalob yéetel kiʼ chʼenxikinten; ilawil maʼalob tuláakal baʼax bin in kaʼaj in weʼes tiʼ teech» (Ezequiel 40:2-4). Ichil le náayaʼ eʼesaʼab upʼéel túumben templo tiʼ Ezequiel, ¡chéen tukult bukaʼaj wal úuchik u kiʼimaktal u yóol ka tu yileʼ!

Le kiʼichkelem templo tsʼaʼab u yil Ezequieloʼ yaan seis u joonailoʼob yéetel treinta u comedoriloʼob; tu yilaj xan le kúuchiloʼob ku kʼaabaʼtik Santo, Santísimo yéetel tu yilaj xan kaʼapʼéel altariʼ: upʼéeleʼ de cheʼ, uláakʼeʼ utiaʼal u kʼuʼubul  tóokbil siibaloʼob. Tu yilaj xaneʼ teʼ templooʼ ku jóokʼol upʼíit jaʼiʼ, lelaʼ jujumpʼíitil u bin u nojochtal tak ka tu beetuba upʼéel áalkab jaʼiʼ (Ezequiel 47:1). Ichil uláakʼ upʼéel náayeʼ, Ezequieleʼ tu yilaj bix jatsláantaʼanil le luʼum lakʼin tak chikʼin, le kun tsʼaabil tiʼ le israelitaʼoboʼ. Cada jaatseʼ utiaʼal upʼéel tribu. Tu chúumuk le jaatsoʼob tsʼaʼab tiʼ Judá yéetel Benjaminoʼ tiaʼan u chan jaats luʼum utiaʼal u yantal le gobernación tiʼ Israeloʼ. Teʼelaʼ tiʼ xan kun beetbil «u kʼuʼulnaj [wa u templo] Yuumtsil» Jéeobaiʼ bey xan upʼéel «kaaj» ku kʼaabaʼtik «[Jéeobaeʼ] tiʼ Yaan wayeʼ» (Ezequiel 48:9, 10, 15, 35).

U núukil kʼáatchiʼob:

40:3–47:12. ¿Baʼax ku chíikbesik le templo ilaʼab ichil le náayoʼ? Le nojoch templo tu yilaj Ezequieloʼ maʼ beetaʼabiʼ, baʼaxeʼ meyajnaj utiaʼal u chíikbesaʼal le baʼaxoʼob u tsʼaamaj Jéeoba utiaʼal k-adorartikoʼ (Ezequiel 40:2; Miqueas 4:1; Hebreob 8:2; 9:23, 24). Le baʼax tu yilaj Ezequiel tu náayil le templooʼ, táan u béeytal teʼ tu tsʼook kʼiinoʼob le táan xan u yilaʼal wa chúukaʼan u yóol le sukuʼunoʼob yéeyaʼanoʼob utiaʼal u binoʼob kaʼanoʼ, baʼaleʼ le baʼax ilaʼab teʼ náayoʼ tiʼ kun tsʼok béeychajal teʼ Paraísooʼ (2 Timoteo 3:1; Ezequiel 44:10-16; Malaquías 3:1-3). Tu kʼiiniloʼob Ezequieleʼ, le náayaʼ meyajnaj utiaʼal u yeʼesaʼal tiʼ le judíoʼob yaan u kʼuchul u kʼiinil u kaʼa chʼaʼajoʼoltkoʼob u adorarkoʼob Jéeoba yéetel cada familiaeʼ yaan u tsʼaʼabal u jaats luʼum tiʼ utiaʼal u kajtal.

40:3–43:17. ¿Baʼaxten jach nojoch baʼax u kʼáat u yaʼal úuchik u pʼiʼisil le templooʼ? Tumen lelaʼ tu yeʼesaj jach yaan u béeytal le baʼax u tukulmaj u beetik Jéeoba utiaʼal u chʼaʼajoʼoltaʼal u adorartaʼaloʼ.

43:13-20. ¿Baʼax tu chíikbesaj le altar tu yilaj Ezequiel ichil le náayoʼ? Le altaroʼ tu chíikbesaj le bix u tukulmi Dios u salvartik máak yoʼolal le u kuxtal Jesucristo tu kʼubaj t-oʼolaloʼ. Le u kuxtal Jesús tu kʼuboʼ ku tsʼáaik u páajtalil tiʼ le sukuʼunoʼob yéeyaʼanoʼob utiaʼal u binoʼob kaʼan yéetel tiʼ le «yaʼabkach máakoʼob» utiaʼal ka pʼáatkoʼob limpioi tu táan Diosoʼ (Apocalipsis 7:9-14; Romailoʼob 5:1, 2). Lelaʼ ku yáantkoʼon k-naʼat baʼaxten ichil le náay tsʼaʼab tiʼ Ezequieloʼ maʼ tu yilaj upʼéel «nojoch chulub [wa káat] utiaʼal jaʼ» jeʼex le yaan teʼ templo tu beetaj Salomón, le ku meyaj kaʼach utiaʼal u pʼoʼik u kʼab yéetel u yook le j-kʼiinoʼoboʼ (1 Reyes 7:23-26).

44:10-16. ¿Máaxoʼob tu chíikbesaj le j-kʼiinoʼoboʼ? Tu chíikbesaj le sukuʼunoʼob yéeyaʼanoʼob utiaʼal u binoʼob kaʼan, le máaxoʼob pʼataʼaboʼob limpioi tumen Jéeoba le ka taal tu templo tu jaʼabil 1918 utiaʼal u pʼis óoltoʼoboʼ (Malaquías 3:1-5). Le máaxoʼob pʼataʼaboʼob limpioi wa le máaxoʼob tu yutskíintaj u kuxtaloʼoboʼ chaʼab u seguer u meyajtikoʼob Dios. Baʼaleʼ kʼaʼabéet xan u kanáantikubaʼob utiaʼal «maʼ u kʼóokʼolkintiku[baʼob] [...] yéetel u kʼaakʼas baʼaloʼobil le yóokʼol kaabaʼ», beyoʼ ku yeʼeskoʼob tiʼ le «yaʼabkach máakoʼob», chíikbesaʼab tumen u maasil israelitaʼob, baʼax xan unaj u beetkoʼoboʼ (Santiago 1:27; Apocalipsis 7:9, 10).

45:1; 47:13–48:29. ¿Baʼax tu chíikbesaj «le luʼum[oʼ]» yéetel baʼax tu chíikbesaj le úuchik u tʼoʼoxloʼ? «Le luʼum[oʼ]» tu chíikbesaj u kaajal Dios teʼ kʼiinoʼobaʼ. Bey túunoʼ le máaxoʼob beetik baʼax utstutʼaan Jéeobaoʼ, jeʼel tuʼuxak ka yanakoʼobeʼ Jéeobaeʼ ku kʼaʼamkoʼob ichil u kaajal, lelaʼ bey ka u tsʼáa u xóotʼ «luʼum» tiʼobeʼ. Baʼaleʼ teʼ túumben yóokʼol kaaboʼ, cada utúul tiʼ le máaxoʼob meyajtik Diosoʼ yaan u tsʼaʼabal u xóotʼ luʼum tiʼ utiaʼal u kajtal (Isaías 65:17, 21).

45:7, 16. ¿Baʼax ku chíikbesik le úuchik u siʼibil u  xóotʼ luʼum utiaʼal u templo Jéeoba yéetel utiaʼal le «j-méekʼtáan» wa le u nuuktakiloʼob Israeloʼ? Ku chíikbesik le siibaloʼob ku beetik u kaajal Jéeobaoʼ, lelaʼ maases u kʼáat u yaʼal u múul meyajoʼob yéetel u tsʼáaikoʼob áantaj tiʼ u maasil.

47:1-5. ¿Baʼax ku chíikbesik u jaʼi le áalkab jaʼ tu yilaj Ezequiel ichil le náayoʼ? Ku chíikbesik le baʼaxoʼob u tsʼaamaj Jéeoba utiaʼal u yantaltoʼon kuxtal minaʼan u xuuloʼ. Ichil leloʼobaʼ táakaʼan le u kuxtal Jesús tu kʼuboʼ bey xan le u tʼaan Dios yaan ichil le Bibliaoʼ (Jeremías 2:13; Juan 4:7-26; Efesoiloʼob 5:25-27). Teʼ kʼiinoʼobaʼ, jeʼex u bin u maas yaʼabtal le máaxoʼob ku natsʼkubaʼob tiʼ Jéeobaoʼ bey xan u bin u yaʼabtal u jaʼi le áalkab jaʼoʼ (Isaías 60:22). Ichil le mil jaʼaboʼob kun gobernar Cristooʼ, u jaʼi le kuxtal ku taal tiʼ le áalkab jaʼoʼ yaan u tuul yéetel tuláakal u muukʼ, ichil u jaʼi le kuxtaloʼ táakaʼan le baʼaxoʼob ken k-kan teʼ «libroʼob» wa rolloʼob kun jeʼebiloʼoboʼ (Apocalipsis 20:12; 22:1, 2).

47:12. ¿Baʼax ku chíikbesik le cheʼob ku yichankiloʼoboʼ? Le cheʼobaʼ ku chíikbesik le baʼaxoʼob ku taal tiʼ Dios ku luʼsik le kʼeban yaan tu wíinklil máakoʼ.

48:15-19, 30-35. ¿Baʼax ku chíikbesik le kaaj ilaʼab ichil le náayoʼ? Tumen maʼ tiʼ upʼéel luʼum kiliʼich yaan «le kaaj» ilaʼaboʼ, ku tsʼáaik k-naʼateʼ upʼéel baʼax luʼum yaan. Maʼ xaaneʼ ku chíikbesik le u múuchʼ máakoʼob ken u tsʼaʼob nuʼuktaj tiʼ u kajnáaliloʼob «le túumben luʼum[oʼ]» (2 Pedro 3:13). Le joonajoʼob yaan tu kan tséelil le kaajoʼ ku yeʼesikeʼ maʼ talam u yokol máakiʼ. Teʼ kʼiinoʼobaʼ, le sukuʼunoʼob tsʼáaik nuʼuktaj ichil u kaajal Diosoʼ unaj u yeʼeskoʼob jatsʼuts modos utiaʼal maʼ u talamtal tiʼ u maasil sukuʼunoʼob u natsʼkubaʼob u kʼáatoʼob áantaj tiʼob.

Baʼaxoʼob ku kaʼansiktoʼon:

40:14, 16, 22, 26. Le xaʼanoʼob bonaʼanoʼob tu pakʼil u yookbal le templooʼ ku yeʼeskoʼobeʼ chéen máakoʼob ku bisikoʼob upʼéel toj kuxtal ku páajtal u yookloʼobiʼ (Salmo 92:12). Lelaʼ ku kaʼansiktoʼoneʼ, wa maʼ táan k-bisik upʼéel toj kuxtaleʼ Jéeobaeʼ maʼ ken u kʼam le adoración k-tsʼáaiktiʼoʼ.

44:23. Toʼoneʼ jach k-tsʼáaik nib óolal tiʼ le sukuʼunoʼob yéeyaʼanoʼob utiaʼal u binoʼob kaʼan yoʼolal le baʼaxoʼob ku beetkoʼob t-oʼolaloʼ. Jeʼex teʼ kʼiinoʼobaʼ «le palitsil chúukpajaʼan u yóol yéetel yaan u naʼat[oʼ]» ku tsʼáaiktoʼon kaʼansajoʼob jach kʼaʼabéettoʼon ku keʼeteloʼob yéetel janal. Le kaʼansajoʼobaʼ ku yáantkoʼon k-kʼaj óolt baʼax maʼalob yéetel baʼax maʼ maʼalob tu táan Jéeobaiʼ (Mateo 24:45).

47:9, 11. Le jaʼ wa le baʼaxoʼob tsʼaʼan utiaʼal u salvarkuba máak, tuʼux táakaʼan xan u kʼaj óoltaʼal Diosoʼ, táan u yáantik yaʼab máakoʼob utiaʼal ka u kaxtoʼob u salvacionoʼob (Juan 17:3). Baʼaleʼ le máaxoʼob maʼ tu yóotik u yukʼoʼob le jaʼaʼ, yaan u tsʼaʼabal «chʼóochʼ jaʼ» u yukʼoʼob, lelaʼ u kʼáat u yaʼaleʼ yaan u xuʼulsaʼaltiʼob. Le oʼolaleʼ, toʼoneʼ unaj k-ilik «tsolik maʼalob u tʼaaniloʼob le jaajoʼ» (2 Timoteo 2:15).

«BIN IN KAʼAJ IN WEʼES [...] U KILIʼICHIL IN NOJOCH KʼAABAʼ»

Ka tsʼoʼok u lúubul le u tsʼook rey taal tu chʼiʼibal Davidoʼ, Jéeobaeʼ tu chaʼaj u máan yaʼab jaʼaboʼob utiaʼal ka «taalak le máax» tiʼ u «yaʼalmaj» u tsʼáaik le Reinooʼ. Baʼaleʼ kex tumen máan yaʼab jaʼaboʼobeʼ, maʼ u kʼáat u yaʼal wa u tuʼubsmaj kaʼach le pacto u beetmaj yéetel Davidoʼ (Ezequiel 21:27; 2 Samuel 7:11-16). U profecíai Ezequieleʼ ku yaʼalik, «in palitsil David», le máax kun kʼuchul u beetuba «j-kanan tamanil» yéetel reyiloʼ (Ezequiel 34:23, 24; 37:22, 24, 25). Le j-kanan taman yéetel reyoʼ Jesucristo, tumen letiʼeʼ tsʼoʼok u beetaʼal Reyil teʼ kaʼanoʼ (Apocalipsis 11:15). Tsʼoʼoleʼ letiʼ xan yéeyaʼan utiaʼal u kiliʼichkúuntik u kʼaabaʼ Jéeoba (Ezequiel 36:23).

Maʼ kun xáantaleʼ, le máaxoʼob taasik subtsilil tiʼ u kiʼichkelem kʼaabaʼ Diosoʼ yaan u xuʼulsaʼaltiʼob. Baʼaleʼ, le máaxoʼob nojbeʼenkúuntik yéetel adorartik Jéeoba jeʼex u yaʼalikoʼ yaan u kʼamkoʼob kuxtal minaʼan u xuul. Le oʼolaleʼ, teʼ kʼiinoʼobaʼ unaj k-ilik maas jóoʼsik utsil tiʼ u jaʼi le kuxtal tsʼoʼok u maas yaʼabtal u tuuloʼ yéetel unaj k-ilik tsʼáaik táanil ichil k-kuxtal k-adorartik Jéeoba.

[Tsolajiloʼob]

[U tsolajil le oochel teʼ táan juʼun 9]

Le kiʼichkelem templo tu yilaj Ezequiel ichil upʼéel náayoʼ

[U tsolajil le oochel teʼ táan juʼun 10]

¿Baʼax ku chíikbesik u áalkab jaʼi le kuxtal tu yilaj Ezequieloʼ?

[U tsolajil le oochel teʼ táan juʼun 10]

◀ Pictorial Archive (Near Eastern History) Est.