¿Ku yilik wa Dios baʼaxoʼob ka beetik?

JÉEOBA, le Máax beetmil tuláakal baʼaloʼ, ¿ku páajtal wa u yilik baʼax ku beetik wíinik? ¡Ku páajtal! Le Bibliaoʼ ku yaʼalik: «¿Maʼ wa tu [páajtal u] paakat le máax beet le ichoʼoboʼ?» (Salmo 94:9). U paakat Jéeobaeʼ píit máanjaʼan tiʼ u paakat wíinik. Letiʼeʼ chíikaʼan u yilik tak baʼax yaan ichil u tuukul máak, le Bibliaoʼ ku yaʼalikeʼ «le tuukuloʼoboʼ [Jéeoba] beetik u yojéeltaʼal» yéetel chéen letiʼ ku páajtal u yaʼalik «wa noʼojaʼan baʼax ku tuklik» máak (Proverbios 17:3; 21:2). Jeʼex túun k-ilkoʼ, letiʼeʼ ku páajtal u yilik wa maʼalob bey xan wa maʼ maʼalob baʼaxoʼob ku tuklik yéetel ku tsʼíiboltik máak tu tsʼuʼ u puksiʼikʼaliʼ.

Jéeobaeʼ u yojel baʼax talamiloʼob k-aktáantik yéetel wa k-kaxtik u yáantajeʼ letiʼeʼ jeʼel u tsʼáaiktoʼoneʼ. Utúul salmistaeʼ tu tsʼíibtaj yoʼolal Jéeoba: «Yuumtsileʼ u tsʼaamaj u paakat yóokʼol le utsil máakoʼoboʼ yéetel ku chʼenxikintik u yawatoʼob. Yuumtsileʼ naatsʼ yaan utiaʼal u tok le máaxoʼob kʼiilil u puksiʼikʼaloʼoboʼ, le máaxoʼob minaʼan u alab óolaloʼoboʼ» (Salmo 34:15, 18). Jach ku líiʼsik k-óol ojéeltik Jéeobaeʼ u yojel baʼaxoʼob chiʼichnakkúuntkoʼon yéetel ku chʼenxikintik le payalchiʼ k-beetik yéetel u jaajil k-óoloʼ.

Jéeobaeʼ ku yilik tak le baʼaxoʼob taʼakumbai u beetaʼaloʼ. Le Bibliaoʼ ku yaʼalik: «Tuláakal jéechkab yéetel jeʼekʼab tiʼ u yich le máax tiʼ unaj k-tsolik baʼax k-beetikoʼ» (Hebreob 4:13). Le beetikeʼ, wa maʼalob baʼax k-beetik bey xan wa maʼeʼ Dioseʼ chíikaʼan u yilik (Proverbios 15:3). Jeʼex tu libroi Génesis 6:8 yéetel 9, ku yaʼalikeʼ «Noeeʼ lúub utsil tu táan» Jéeoba yéetel ku yaʼalik xaneʼ «kuxlaj kaʼach jeʼel bix tu yóoltilak» Jéeobaeʼ. Letiʼeʼ kʼamaʼab tumen Jéeoba yéetel mantatsʼ bin utsil tiʼ tumen tu beetaj baʼax u kʼáat Dios (Génesis 6:22). Baʼaleʼ le máaxoʼob kuxlajoʼob tu kʼiinil Noeoʼ máakoʼob jach kʼasaʼanoʼob yéetel ku beetkoʼob baʼaloʼob subtsiltak. Dioseʼ tu yilaj le baʼaxoʼob tu beetoʼoboʼ. Le Bibliaoʼ ku yaʼalik: «Tu yilaj máan tipʼaʼan u kʼasaʼanil le wíinik yóokʼol le luʼumaʼ, mantatsʼ xan chéen loob ku tukultik u beetik». Ka tsʼoʼokeʼ, Jéeobaeʼ tu xuʼulsaj tiʼ le kʼasaʼan máakoʼoboʼ, baʼaleʼ tu salvartaj Noé yéetel u familia (Génesis 6:5; 7:23).

Techeʼ, ¿ka lúubul wa xan utsil tiʼ Jéeoba? Letiʼeʼ «mantatsʼ táan u yilik baʼax ku yúuchul tu yóokʼol kaab utiaʼal u muʼukʼaʼankíintik máax oksaj óoltik tu jaajil u yóol» (2 Crónicas 16:9). Maʼ kun xáantal xaneʼ, Jéeobaeʼ yaan u xuʼulsik tiʼ tuláakal le kʼasaʼan máakoʼoboʼ, baʼaleʼ yaan u salvartik le máaxoʼob beetik baʼaloʼob maʼalobtakoʼ (Salmo 37:10, 11).