«¿Baʼax le jaajoʼ?»

LELAʼ letiʼe baʼax kʼáataʼab tiʼ Jesús tumen Poncio Pilato, u gobernadori Roma. Le bix úuchik u beetik le kʼáatchiʼaʼ tu yeʼesaj maʼ taak u yojéeltik u núukiliʼ, le oʼolal Jesuseʼ maʼ xan tu núukajtiʼiʼ. Maʼ xaaneʼ, Pilatoeʼ ku tuklik kaʼacheʼ le u jaajiloʼ maʼ tu páajtal u naʼataʼal (Juan 18:38).

Bejlaʼa xaneʼ yaʼab máakoʼobeʼ bey u tuukuloʼoboʼ, ichiloʼobeʼ tiaʼan u nuuktakil le religionoʼoboʼ, j-kaʼansajoʼob yéetel politicoʼob. Letiʼobeʼ ku tuklikoʼobeʼ le u jaajiloʼ maʼ upʼéeliliʼiʼ yéetel mantatsʼ ku kʼexpajal, jeʼex le yaan yil yéetel bix unaj u kuxtal máak bey xan bix unaj u natsʼkuba yiknal Diosoʼ. Le oʼolal ku tuklikoʼobeʼ jeʼel u páajtal u chʼaʼatuklikoʼob tu juunaloʼob baʼax maʼalob yéetel baʼax maʼ maʼalobeʼ (Isaías 5:20, 21). Le tuukuloʼob beyaʼ ku beetik xan maʼ u tsʼáaikoʼob tu kuxtaloʼob le nuʼuktajiloʼob meyajnaj tiʼ le úuchben máakoʼoboʼ tumen ku tuklikoʼob tsʼoʼok u pʼáatal maʼ maʼalobtakoʼobiʼ.

Jach maʼalob ka tuukulnakoʼon tiʼ baʼax tu yaʼalaj Jesús táanil tiʼ u beetaʼal le kʼáatchiʼ tiʼ tumen Pilatooʼ. Jesuseʼ tu yaʼalaj: «Teneʼ síijen yéetel taalen way yóokʼol kaabeʼ utiaʼal in tʼaan tu yoʼolal le jaajoʼ» (Juan 18:37). Jeʼex túun k-ilkoʼ, utiaʼal Jesuseʼ le u jaajiloʼ upʼéel baʼal jeʼel u páajtal u naʼataʼaleʼ. Letiʼeʼ tu yaʼalaj tiʼ u disipuloʼob: «Bíin a kʼaj óolteʼex le jaajoʼ, le jaaj túunoʼ bíin u jáalkʼabteʼex» (Juan 8:32).

¿Tuʼux jeʼel u páajtal k-kaxtik u jaajiloʼ? Utéenjeakileʼ, Jesuseʼ tu yaʼalaj tiʼ Dios ich payalchiʼ: «A tʼaaneʼ letiʼ u jaajil» (Juan 17:17, LTN). Le Biblia tuʼux tsʼíibtaʼan u tʼaan Diosoʼ ku kaʼansiktoʼon le u jaajil. Le u jaajiloʼ ku tsʼáaiktoʼon maʼalob nuʼuktajoʼob yéetel ku yáantkoʼon k-páaʼt upʼéel kuxtal minaʼan u xuul teʼ kʼiinoʼob ku taaloʼ (2 Timoteo 3:15-17).

Pilatoeʼ tu peʼertaj le páajtalil yanchaj tiʼ utiaʼal u kanik u jaajiloʼ. ¿Kux túun teech? ¿Baʼaxten maʼ ta kʼáatik tiʼ u j-jaajkunajoʼob Jéeoba baʼax «le jaaj» tu chʼaʼachiʼitaj Jesusoʼ? Letiʼobeʼ jach jeʼel u tsolikoʼobtecheʼ.