Kuxlakoʼon jeʼex u kʼáat Dioseʼ
Kuxlakoʼon jeʼex u kʼáat Dioseʼ
«Cristoeʼ j-kíim tu yoʼolal tuláakal, utiaʼal beyoʼ le máaxoʼob kuxaʼanoʼoboʼ maʼ u kuxtaloʼob chéen utiaʼal letiʼob.» (2 CORINTOILOʼOB 5:15.)
1. ¿Baʼax úuch tiʼ utúul misionero yaan tu luʼumil África?
UTÚUL misionero Aarón u kʼaabaʼeʼ tu yaʼalaj: «Le ka tsʼoʼok upʼéel baʼateʼel anchaj tu luʼumil Africaeʼ, le coche k-biskoʼ letiʼe yáax kʼuch tiʼ upʼéel chan kajtalil yaan teʼ luʼumil jeʼeloʼ. * Maʼ k-ojel kaʼach bix yanil le sukuʼunoʼob yanoʼob teʼ chan kajtaliloʼ, le oʼolal binoʼon k-il wa yaan baʼax kʼaʼabéettiʼob. Táan kaʼach k-bisiktiʼob janal, nookʼ yéetel jóoʼsaʼaniloʼob, bey xan le videocaset Los testigos de Jehová... la organización tras el nombre. * Le videoaʼ t-máansaj tiʼ upʼéel nojoch suʼukinaj ku meyaj bey upʼéel “cinema” teʼ kajtaliloʼ, teʼeloʼ yaan upʼéel televisión yéetel upʼéel u nuʼukulil utiaʼal u máansaʼal video. Yaʼab máakoʼob binoʼob u chaʼantoʼob le videooʼ, le oʼolal anchaj k-máansik kaʼatéen. Cada ken tsʼoʼokok máansik le videoaʼ, yaʼab máakoʼob ku yaʼalkoʼob jeʼel u xokkoʼob le Biblia t-éeteloʼ. Le baʼax úuchoʼ tu yeʼesaj maʼ chéen kunel le baʼax t-chʼaʼatuklaj k-beetkoʼ».
2. 1) Máaxoʼob meyajtik Dioseʼ, ¿baʼaxten ku chʼaʼatuklik u kʼubik u kuxtaloʼob tiʼ letiʼ? 2) ¿Baʼax kʼáatchiʼiloʼob kun núukbil teʼ xookaʼ?
2 Kex tumen talam úuchik u kʼuchloʼobeʼ, ¿baʼaxten bin Aarón yéetel uláakʼ sukuʼunoʼob u yáantoʼob le múuchʼuliloʼ? Tumen tsʼoʼok u kʼubikoʼob u kuxtaloʼob tiʼ Dios yéetel u kʼáatoʼob kuxtal jeʼex u kʼáat Diosoʼ. Jeʼex letiʼobeʼ, toʼon tsʼoʼok kʼubik k-kuxtal tiʼ Dioseʼ tsʼoʼok chʼaʼatuklik maʼ k-kuxtal chéen jeʼex uts t-tʼaaneʼ, baʼaxeʼ utiaʼal «[k-]beetik tuláakal le baʼaloʼob» «tu yoʼolal le maʼalob péektsiloʼ» (2 Corintoiloʼob 5:15; 1 Corintoiloʼob 9:23). K-ojel ken xuʼulsaʼak tiʼ le yóokʼol kʼaab tsʼoʼok u jach kʼastalaʼ, mix le taakʼin mix le nojoch baʼaloʼob ku tsʼáaik le yóokʼol kaab kun yantal u beelaloʼ. Le oʼolaleʼ, tak tuʼux kun chaʼik k-toj óolaleʼ, yaan k-ilik kuxtal jeʼex u kʼáat Diosoʼ (Eclesiastés 12:1). Baʼaleʼ ¿bix jeʼel k-beetkeʼ? ¿Baʼax ken u tsʼáatoʼon u muukʼil utiaʼal k-meyajtik Dios? ¿Yéetel bix jeʼel k-meyajtikeʼ?
Yaan baʼaxoʼob kʼaʼabéet k-beetik
3. Aʼal jujumpʼéel baʼaxoʼob unaj k-yáax beetik utiaʼal k-tsʼoʼokbesik baʼax u kʼáat Dios.
3 U meyajtaʼal Dioseʼ upʼéel baʼal jach nojoch k-aʼalmaj k-beetik tuláakal u kʼiiniloʼob k-kuxtal. U suukileʼ, ichil le baʼaxoʼob kʼaʼabéet u yáax beetaʼaloʼ tiaʼan le u táakpajal máak teʼ Kaambalil Utiaʼal Kaʼansajoʼ, u xokaʼal le Biblia sáamsamaloʼ, u táakpajal máak teʼ kʼaʼaytajoʼ yéetel u yokjaʼ. Jeʼex u bin k-maas tsʼáaik k-óol meyajt Dioseʼ, mantatsʼ k-kʼaʼajsik le baʼax tu yaʼalaj le apóstol Pabloaʼ: «Tsʼáa tuláakal a wóol tiʼ le baʼaloʼobaʼ, utiaʼal ka páatak u yilaʼal tumen tuláakaleʼ bix a bin táanil» (1 Timoteo 4:15). Le baʼaxoʼob k-beetik utiaʼal k-maas meyajtik Dioseʼ maʼ utiaʼal k-nojbaʼalkúuntikbaiʼ, baʼaxeʼ utiaʼal k-eʼesik jach tu jaajil k-óol tsʼoʼok chʼaʼatuklik k-beetik baʼax u kʼáat Dios. Le baʼaxoʼob ken k-beetoʼ yaan u yeʼesik k-chaʼik u nuʼuktaʼal k-kuxtal tumen Dios. Yéetel tuláakal máak u yojel minaʼan uláakʼ máax jeʼel u nuʼuktik maas maʼalob k-kuxtaleʼ (Salmo 32:8).
4. ¿Bix jeʼel u lukʼultoʼon le saajkilil ku yantaltoʼon yaan oraoʼ?
4 U jach chiʼichnaktal máak chéen yoʼolal u kaxtik u yutsileʼ, jeʼel u beetik u jáawal u tsʼáaik u yóol u meyajt Dioseʼ (Eclesiastés 11:4). Le oʼolaleʼ, utiaʼal ka kiʼimakchajak k-óol le táan k-meyajtik Dios yéetel le táan k-áantik k-éet wíinikileʼ, táanil unaj u lukʼultoʼon le saajkilil yaan ora ku yantaltoʼonoʼ. Jeʼex utúul sukuʼun ku kʼaabaʼtik Erikeʼ, u kʼáat kaʼach bin áantaj tiʼ upʼéel múuchʼulil tuʼux yaanal tʼaan ku beetaʼaliʼ. Baʼaleʼ mantatsʼ ku tuklik kaʼach: «¿Jeʼel wa in kanik in bisimba yéetel le sukuʼunoʼoboʼ? ¿Yaan wa u lúubuloʼob utsil ten? ¿Yaan wa in lúubul utsil tiʼob?». Letiʼeʼ ku seguer u yaʼalik: «Tu tsʼookeʼ tin tsʼáaj cuenta maʼ unaj in sen tuukul tin woʼolaliʼ, baʼaxeʼ kʼaʼabéet in maas tuukul tu yoʼolal le sukuʼunoʼoboʼ. Tin chʼaʼatuklaj in wáantik le sukuʼunoʼob tiʼ tuláakal le ku páajtaleʼ. Orarnajen tiʼ Dios utiaʼal ka u yáanten yéetel binen áantaj teʼ múuchʼuliloʼ. Jach maʼalob le baʼax tin chʼaʼatuklaj in beetkoʼ. Bejlaʼeʼ jach kiʼimak in wóol ikil in wáantaj teʼ múuchʼuliloʼ» (Romailoʼob 4:20). Jach beyoʼ, wa k-maas tsʼáaik óol meyajt Dios yéetel k-ilik áantik k-éet wíinikileʼ, yaan u maas yantaltoʼon kiʼimak óolal.
5. ¿Baʼaxten kʼaʼabéet k-tuklik tubeel baʼax ken k-beet wa k-kʼáat kuxtal jeʼex u kʼáat Dioseʼ? Tsol bix u beetik upʼéel familia.
5 Utiaʼal k-kuxtal jeʼex u kʼáat Dioseʼ kʼaʼabéet xan k-jach tuklik maʼalob baʼax ken k-beete. Kʼaʼabéet k-ilik maʼ u sen yaʼabtal k-pʼaaxoʼob, tumen wa ku yaʼabtaleʼ yaan u pʼáatal maʼ ken k-tsʼáa k-óol meyajt Dios. Le Bibliaoʼ ku yaʼaliktoʼon: «Ichil j-pʼaaxoʼobeʼ, máax ku tsʼáaik pʼaaxeʼ letiʼ [rey]» (Proverbios 22:7). Kʼubik k-óol tiʼ Jéeoba yéetel k-tsʼáaik táanil ichil k-kuxtal baʼax u kʼáateʼ, yaan u yáantkoʼon utiaʼal k-tuklik maʼalob baʼax ken k-beete. Koʼox ilik baʼax úuch yéetel utúul sukuʼun ku kʼaabaʼtik Guoming. Letiʼ, u maama yéetel u kaʼatúul kiikoʼobeʼ kajaʼanoʼob tuʼux jach koʼoj u manaʼal wa u rentartaʼal upʼéel naj, tsʼoʼoleʼ maʼ chéen chʼaʼabil xan u kaxtaʼal meyajiʼ. Kex tumen yaan kʼiin maʼ tiʼ tuláakloʼob yaan meyajeʼ, ku paklan áantikubaʼob yéetel le baʼax kʼaʼabéet u manaʼaloʼ yéetel ku kanáantikoʼob maʼ u sen xuupoʼob. Guomingeʼ ku yaʼalik: «Kex tumen yaan kʼiin minaʼantoʼon meyajeʼ, maʼ jáawak k-beetik precursoriliʼ mix xan jáawak kanáantik k-maamaiʼ. Letiʼeʼ maʼatech u kʼáatiktoʼon yaʼab baʼaloʼob tumen maʼ u kʼáat ka jáawak k-beetik precursoriliʼ, le oʼolal jach k-tsʼáaik u nib óolalil tiʼ» (2 Corintoiloʼob 12:14; Hebreob 13:5).
6. ¿Baʼax eʼesiktoʼon jeʼel u páajtal k-beetik kʼexoʼob utiaʼal ka kuxlakoʼon jeʼex u kʼáat Dioseʼ?
6 Wa chéen chʼiikloʼon tiʼ negocios wa tiʼ uláakʼ baʼaloʼobeʼ, maʼ xaaneʼ yaan u kʼaʼabéettal k-beetik nojoch kʼexoʼob ichil k-kuxtal utiaʼal k-tsʼáaik táanil le baʼax u kʼáat Diosoʼ. Maʼ xaaneʼ maʼ séeb ken k-beet le kʼeexoʼoboʼ, baʼaleʼ leloʼ maʼ u kʼáat u yaʼal wa upuliʼ maʼ ken k-béeytaliʼ. Jeʼex Koichieʼ yaan kaʼach upʼéel nojoch talamil tiʼ: jach yaʼab u náaysik u yóol yéetel báaxaloʼob tiʼ video. Kex tumen tu táankelmil tu xokaj le Bibliaoʼ, máan yaʼab jaʼaboʼob chéen táan u báaxtik báaxaloʼob tiʼ video. Baʼaleʼ upʼéel kʼiineʼ tu tuklaj: «¿Baʼax tsʼoʼok in beetik yéetel in kuxtal? Kex tumen tsʼoʼokten 30 jaʼaboʼobeʼ maʼ in beet mix baʼal ka u taasten utsiliʼ». Koichieʼ tu jeel káajsaj u xokik le Bibliaoʼ yéetel tu yóotaj ka áantaʼak tumen le sukuʼunoʼoboʼ. Kex tumen maʼ séeb úuchik u kʼexik u kuxtaleʼ, maʼ jáaw u tsʼáaik u yóoliʼ. U sen orar yéetel u yáantaʼal tumen le sukuʼunoʼoboʼ, le áant utiaʼal u páajtal u pʼatik le u sen báaxloʼ (Lucas 11:9). Bejlaʼeʼ, Koichieʼ jach kiʼimak u yóol tumen siervo ministerial.
Unaj k-tsʼáaik u pʼis baʼaxoʼob k-beetik
7. ¿Baʼaxten kʼaʼabéet k-tsʼáaik u pʼis baʼaxoʼob k-beetik ichil k-kuxtal utiaʼal k-beetik baʼax u kʼáat Dios?
7 Jéeobaeʼ ku náajaltik ka k-jach tsʼáa óol meyajte. Utiaʼal k-tsʼoʼokbesik baʼax u kʼáateʼ, kʼaʼabéet k-ilik beetik tuláakal le ku páajtaleʼ yéetel maʼ unaj k-maʼakʼóoltaliʼ (Hebreob 6:11, 12). Kex beyoʼ, Jéeobaeʼ maʼ u kʼáat ka kaʼankoʼon yéetel ka lúubuk k-óoliʼ. Ken k-kʼáat u yáantaj Jéeoba utiaʼal tsʼoʼokbesik baʼax u kʼáateʼ, eʼesik k-tsʼáaik u pʼis baʼaxoʼob k-beetik ichil k-kuxtal yéetel k-nojbeʼenkúuntik Jéeoba (1 Pedro 4:11). Kex tumen Jéeoba ku yaʼalik u tsʼáaiktoʼon u muukʼil utiaʼal k-beetik baʼax u kʼáateʼ, maʼ unaj u píit máan k-beetik baʼaloʼob maʼ tu kʼáatiktoʼon ka k-beetiʼ (2 Corintoiloʼob 4:7). Utiaʼal k-jach tsʼáaik óol meyajt Dioseʼ, kʼaʼabéet k-kanáantik maʼ k-xupik muukʼ tiʼ uláakʼ baʼaloʼob.
8. ¿Baʼax úuch tiʼ utúul kiik u kʼáat kaʼach u tsʼáa u yóol u meyajt Jéeoba bey xan tiʼ u meyaj, yéetel baʼax kʼexoʼob anchaj u beetik?
8 Jeʼex tu luʼumil Asiaeʼ, utúul precursora ku kʼaabaʼtik Ji Hye, kaʼapʼéel jaʼaboʼob anchajtiʼ upʼéel meyaj ku sen beetik u kaʼanal. Letiʼeʼ ku yaʼalik: «Jach in kʼáat kaʼach in tsʼáa in wóol in meyajt Jéeoba bey xan tiʼ in meyaj, baʼaleʼ chéen cinco oras kin wenel sáamsamal kaʼach. Kʼuch u kʼiinil in wuʼuyik jach kaʼanaʼanen. Jach minaʼan kaʼach in wóol utiaʼal in bin muchʼtáambal yéetel in jóokʼol kʼaʼaytaj». Utiaʼal u meyajtik Jéeoba yéetel tuláakal u puksiʼikʼal, tuláakal u yóol, tuláakal u tuukul, yéetel tuláakal a muukʼeʼ, Ji Hye joʼopʼ u kaxtik uláakʼ meyaj jeʼel u chaʼik u maas meyajtik Dioseʼ (Marcos 12:30). Tu yaʼalaj xan: «In familiaeʼ u kʼáat kaʼach ka maas meyajnaken utiaʼal ka yanakten upʼéel maas maʼalob kuxtal, baʼaleʼ teneʼ tin yéeyaj in maas meyajtik Dios. Le taakʼin kin náajaltik bejlaʼoʼ láayliʼ ku tsʼáaikten utiaʼal in máansik in kuxtal yéetel utiaʼal in manik le nookʼoʼob uts tin wichoʼ. ¡Bejlaʼeʼ jach túun maʼalob in wuʼuykimba ikil in wenel tubeel! Maas yaʼab in jóokʼol kʼaʼaytaj yéetel maas náatsʼ yanilen tiʼ Dios. Kin wuʼuykimba beyaʼ tumen kin maas tsʼáaik in wóol in meyajt Dios maʼ chéen chʼiiklen tiʼ le baʼaloʼob yaan way yóokʼol kaabeʼ» (Eclesiastés 4:6; Mateo 6:24, 28-30).
9. ¿Bix k-áantik uláakʼ máakoʼob yéetel le kʼaʼaytaj k-beetikoʼ?
9 Maʼ tuláakaloʼon jeʼel u páajtal k-beetikba precursorileʼ. Wa maʼ tu páajtal a maas meyajtik Dios tumen kʼojaʼanech wa tumen tsʼoʼok u yantal a jaʼabileʼ, maʼ u lúubul a wóol. Jéeobaeʼ jach nojoch baʼal u yilik u chúukpajal a wóol a meyajt yéetel u jaajil a wóol (Lucas 21:2, 3). Tsʼoʼoleʼ, maʼ unaj u tuʼubultoʼon bukaʼaj áantaj k-tsʼáaik ken jóoʼkoʼon kʼaʼaytaj kex maʼ k-beetik le bukaʼaj ku beetaʼal tumen u maasiloʼoboʼ. Koʼox tukultikeʼ, sáam jóoʼkoʼon kʼaʼaytaj yéetel mix máak u yóot u yuʼuboʼon. Baʼaleʼ, maʼ xaaneʼ ken máanak oraʼob wa tak kʼiinoʼobeʼ, le máakoʼoboʼ jeʼel u seguer u tsikbaloʼob yoʼolal bix úuchik k-bin xíimbaltoʼobeʼ. Kex tumen yaʼab máakoʼob maʼ ken u yóot u yuʼuboʼoneʼ, baʼaleʼ yaan u yantal máax ken u yóote (Mateo 13:19-23). Uláakʼoʼobeʼ, maʼ xaaneʼ yaan u yóotikoʼob ken u aktáantoʼob wa baʼax talmil ichil u kuxtaloʼob wa yoʼolal le baʼaxoʼob ku yúuchul bejlaʼoʼ. Jeʼel bixak ka úuchkeʼ, cada ken k-jach tsʼáa k-óol teʼ kʼaʼaytajoʼ k-eʼesik táan k-kuxtal jeʼex u kʼáat Dioseʼ. Tsʼoʼoleʼ táan xan k-múul meyaj yéetel Dios (1 Corintoiloʼob 3:9).
10. Toʼon k-meyajtik Dioseʼ, ¿baʼax jeʼel u páajtal k-beetikeʼ?
10 Tsʼoʼoleʼ, tuláakloʼon jeʼel u páajtal k-áantik k-familia bey xan k-sukuʼunoʼob teʼ múuchʼuliloʼ (Galaciailoʼob 6:10). Le baʼax ken k-beetoʼ, jeʼel u yáantkoʼob utiaʼal tuláakal u kuxtaloʼobeʼ (Eclesiastés 11:1, 6). Ken u tsʼáa u yóol le ancianoʼob yéetel le siervo ministerialoʼob utiaʼal u tsʼoʼokbeskoʼob le meyaj tsʼaʼan u beetoʼoboʼ, ku yáantkoʼob le múuchʼuliloʼ yéetel ku muʼukʼaʼankúunskoʼob. Le sukuʼunoʼob túunoʼ ku maas tsʼáaik xan u yóoloʼob teʼ kʼaʼaytajoʼ. Le Bibliaoʼ ku yaʼalikeʼ wa k-meyaj «yaʼab mantatsʼ tiʼ u meeyjul Yuumtsil[eʼ]», le meyaj k-beetkoʼ «maʼ chéen kuneliʼ» (1 Corintoiloʼob 15:58).
Unaj k-jach tsʼáaik k-óol beet baʼax u kʼáat Dios
11. ¿Baʼax uláakʼ jeʼel k-beetik utiaʼal k-maas meyajtik Dioseʼ?
11 Toʼoneʼ jach nojoch baʼal k-ilik le kuxtaloʼ yéetel k-kʼáat ka meyajnaktoʼon utiaʼal beetik baʼax u kʼáat Jéeoba (1 Corintoiloʼob 10:31). Wa k-jach tsʼáaik k-óol kʼaʼayt u maʼalob péektsilil le Reino yéetel k-kaʼansik uláakʼ máakoʼob u beetoʼob baʼax tu yaʼalaj Cristoeʼ, yaan u yantaltoʼon u páajtalil k-maas meyajtik Dios (Mateo 24:14; 28:19, 20). Maʼ chéen teʼ múuchʼulil jeʼel u páajtal k-áantajoʼ, yaan xan u páajtal k-bin áantaj tuʼux kʼaʼabéet: maʼ xaaneʼ tuláakʼ múuchʼulil, tiʼ upʼéel múuchʼulil tuʼux yaanal tʼaan ku beetaʼaliʼ wa tak tiʼ uláakʼ luʼumil. Le ancianoʼob yéetel le siervo ministerialoʼob maʼ tsʼokaʼan u beeloʼoboʼ jeʼel u páajtal u binoʼob teʼ Escuela de Entrenamiento Ministerial utiaʼal ka xiʼikoʼob teʼ múuchʼuliloʼob tuʼux kʼaʼabéet áantaj, tu luʼumiloʼob wa tak táanxel luʼumiloʼob. Le máaxoʼob tsʼokaʼan u beeloʼob yéetel precursoroʼoboʼ jeʼel u páajtal u binoʼob teʼ Escuela de Galaad utiaʼal ka u beet u misioneroiloʼobeʼ. Yéetel mantatsʼ ku kʼaʼabéettal máaxoʼob utiaʼal u binoʼob áantaj tu najil Betel, utiaʼal u líiʼsaʼal yéetel u yutskíintaʼal Najiloʼob Reino yéetel u Najiloʼob Betel.
12, 13. 1) ¿Baʼax jeʼel u yáantkech a yéey bix jeʼel a maas meyajtik Dioseʼ? 2) Tsikbalt bix úuchik u meyaj tiʼ kaʼatúul sukuʼunoʼob le baʼax u yáax kammaj u beetoʼob ichil u kaajal Diosoʼ.
12 ¿Máakalmáak ken a yéey a beetiʼ? Teech a kʼubmaj a kuxtal tiʼ Jéeobaeʼ, kaxt u nuʼuktaj letiʼ yéetel u yáantaj u kaajal. U kiliʼich muukʼ Dioseʼ yaan u yáantkech a chʼaʼatukult maʼalob baʼax ken a beete (Nehemías 9:20). U beetik máak tubeel upʼéel meyajeʼ ku yáantaj utiaʼal ka tsʼaʼabak uláakʼ meyaj tiʼ, yéetel le baʼax ku kanikoʼ jeʼel u yáantik xan ken tsʼaʼabak u beet uláakʼ meyajeʼ.
13 Koʼox ilik baʼax tu beetaj Dennis yéetel Jenny, letiʼobeʼ tsʼokaʼan u beeloʼob yéetel ku yáantajoʼob utiaʼal u líiʼsaʼal u Najiloʼob Reino. Le ka máan le chak ikʼal ku kʼaabaʼtik Katrina tu noojolil u luʼumil Estados Unidoseʼ, le sukuʼunoʼobaʼ tu yaʼalajoʼob u kʼáatoʼob bin áantaj teʼ tuʼux úuch looboʼ. Denniseʼ ku yaʼalik: «Le baʼaxoʼob t-kanaj le ka binoʼon áantaj utiaʼal u líiʼsaʼal u Najiloʼob Reinooʼ meyajnajtoʼon utiaʼal k-áantik k-sukuʼunoʼob loobiltaʼaboʼoboʼ, yéetel leloʼ tu jach taasajtoʼon kiʼimak óolal. Le kiʼimak óolal yanchaj tiʼ k-sukuʼunoʼobeʼ tu jach líiʼsaj k-óol. Le uláakʼ máakoʼob maʼ j-jaajkunajoʼob tiʼ Jéeoba binoʼob áantajeʼ, maʼ yaʼab najoʼob páajchaj u jeel líiʼskoʼobiʼ. Baʼaleʼ toʼon u j-jaajkunajoʼon Jéeobaeʼ tsʼoʼok jeel k-líiʼsik maas tiʼ cinco mil trescientos najoʼob yéetel yaʼab u Najiloʼob Reino. Le máaxoʼob ku yilkoʼob lelaʼ ku maas taaktal u yuʼubkoʼob baʼax k-kʼaʼaytik».
14. ¿Baʼax unaj a beetik wa a kʼáat a beet a precursori?
14 Jach maʼalob ka a chʼaʼatukult a beetik a precursori utiaʼal a maas meyajtik Dios. Yaan a kʼamik yaʼab utsiloʼob wa ka chʼaʼatuklik a beetik. Wa yaan baʼax maʼ tu chaʼik a beetik a precursorileʼ, maʼ xaaneʼ yaan baʼax jeʼel u páajtal a beetik utiaʼal ka páajchajkeʼ. Beet a oración tiʼ Dios jeʼex úuchik u beetik Nehemías le ka taakchaj u bin u beet upʼéel nojoch meyaj, letiʼeʼ tu yaʼalaj: «Yuumtsil kin kʼáat óoltik tiʼ teech, [...] ka a beet u bin ten utsil» (Nehemías 1:11). Tsʼoʼoleʼ, jach kʼub a wóol tiʼ le máax uʼuyik le oracionoʼoboʼ yéetel ilawil a beetik jeʼex tsʼoʼok a kʼáatkoʼ (Salmo 65:2). Kʼaʼajaktecheʼ, wa a kʼáat ka u yáantech Jéeoba utiaʼal a maas meyajtikeʼ, táanileʼ kʼaʼabéet a jach tsʼáaik a wóoliʼ. Ken a chʼaʼatukult a beetik a precursorileʼ, maʼ chaʼik u jáawal a beetik chéen yoʼolal wa baʼax. Jeʼex kun bin u máan le kʼiinoʼoboʼ, bey kun bin a maas kanik yaʼab baʼaloʼob yéetel bey xan kun bin u maas kiʼimaktal a wóol.
Upʼéel kuxtal jach yaan u beelal
15. 1) ¿Bix u yáantkoʼon k-ojéeltik le baʼaxoʼob uchaʼan tiʼ le sukuʼunoʼob úuch joʼopʼok u chúukpajal u yóol u meyajtoʼob Jéeobaoʼ? 2) Tʼaanen tiʼ upʼéel xook tu jach líiʼsaj a wóol ku tʼaan tiʼ u kuxtal jujuntúul sukuʼunoʼob.
15 ¿Baʼax utsil ken a kʼam wa ka kuxtal jeʼex u kʼáat Dioseʼ? Tsikbalnen yéetel sukuʼunoʼob úuch joʼopʼok u meyajtkoʼob Jéeoba, maases yéetel le sukuʼunoʼob úuch joʼopʼok u beetik u precursoriloʼoboʼ. ¿Máasaʼ jatsʼuts yéetel jach yaan u beelal le kuxtal tsʼoʼok u biskoʼoboʼ? (Proverbios 10:22.) Yaan u tsikbaltiktechoʼob bix tsʼoʼok u yáantaʼaloʼob tumen Jéeoba utiaʼal ka yanaktiʼob le baʼax kʼaʼabéetoʼ yéetel tak uláakʼ u maasil baʼaloʼob, tak le ka tu aktáantoʼob nojoch talamiloʼoboʼ (Filiposiloʼob 4:11-13). Ichil u jaʼabil 1955 tak tu jaʼabil 1962, le revista La Atalayaoʼ tu jóoʼsaj upʼéel xook ku kʼaabaʼtik “Siguiendo tras mi propósito en la vida”, le xookaʼ tu taasaj u tsikbalil u kuxtal yaʼab sukuʼunoʼob chúukpaj u yóol u meyajtoʼob Jéeoba. Desde teʼ kʼiinoʼob tak bejlaʼoʼ tsʼoʼok u jóoʼsaʼal yaʼab uláakʼ xookoʼob ku tʼaanoʼob tiʼ sukuʼunoʼob chúukpaj u yóol u meyajtoʼob Jéeoba. Tiʼ tuláakloʼobeʼ k-ilik láayliʼ le chúukaʼan óolal yéetel le kiʼimak óolal anchaj tiʼ le disipuloʼob ku yaʼalik u libroi Beetaʼanoʼob wa Hechos. Le ken a xok yoʼolal u kuxtal le sukuʼunoʼoboʼ maʼ xaaneʼ jeʼel a waʼalikeʼ: «¡Lelaʼ, letiʼe baʼax in kʼáat in beet xan yéetel in kuxtaloʼ!».
16. Le máax meyajtik Diosoʼ, ¿baʼax jeʼel u páajtal u beetik utiaʼal ka yanak kiʼimak óolal tiʼ yéetel ka yanak u beelal u kuxtaleʼ?
16 Aarón, le máax tiʼ tʼaanajoʼon tu káajbaloʼ ku seguer u yaʼalik: «Teʼ tu luʼumil Áfricaoʼ tin kʼaj óoltaj yaʼab táankelmoʼob ku máan u kaxtoʼob u beelal u kuxtaloʼob, baʼaleʼ maʼ tuláakloʼob tu kaxtoʼobiʼ. Toʼon k-tsʼáaik k-óol kʼaʼayt u maʼalob péektsilil le Reino jeʼex u kʼáat Jéeobaeʼ, yantoʼon upʼéel jach jatsʼuts kuxtal yéetel jach yaan u beelal. Le oʼolal jeʼel u páajtal k-aʼalikeʼ maas yaan kiʼimak óolal u tsʼaʼabal wa baʼax tiʼ u kʼaʼamal wa baʼax» (Beetaʼanoʼob [Hechos] 20:35).
17. ¿Baʼaxten kʼaʼabéet k-kuxtal jeʼex u kʼáat Dioseʼ?
17 Kux túun teech, ¿yaan wa u beelal a kuxtal? Wa maʼ a chʼaʼatukult a maas meyajtik Dioseʼ, yaan u taaktal a tsʼáaik táanil ichil a kuxtal a beetik uláakʼ baʼaloʼob. Maʼ a mixbaʼalkúuntik a kuxtal ikil a kaxtik le baʼaxoʼob ku yaʼalik u tsʼáaiktech u kʼasaʼan yóokʼol kaab Satanasoʼ. Le ken káajak le «táaj yaʼab mukʼyaj[oʼ]», mix le taakʼin mix le nojoch baʼaloʼob ku tsʼáaik le yóokʼol kaab kun yantal u beelaloʼ. Baʼax maas kʼaʼananeʼ letiʼe ka k-bisba maʼalob yéetel Jéeobaoʼ. ¡Yaan u jach kiʼimaktal k-óol úuchik meyajtik Jéeoba yéetel úuchik áantik k-éet wíinikil yéetel úuchik k-kuxtal jeʼex u kʼáat Diosoʼ! (Mateo 24:21; Apocalipsis 7:14, 15.)
[Tsolajiloʼob]
^ xóot’ol 1 Kʼexaʼan jujumpʼéel kʼaabaʼob.
^ xóot’ol 1 Beetaʼan tumen u j-jaajkunajoʼob Jéeoba.
¿A wojel wa a tsole?
• ¿Bix u yilik Jéeoba le meyaj k-tsʼáaiktiʼoʼ?
• K-tuklik maʼalob baʼax ken k-beeteʼ, ¿bix yáantkoʼon k-kuxtal jeʼex u kʼáat Dios yéetel k-áantik k-éet wíinikileʼ?
• ¿Baʼax uláakʼ jeʼel u páajtal k-beetik utiaʼal k-maas meyajtik Dioseʼ?
• ¿Baʼax unaj k-beetik utiaʼal ka yanak u beelal k-kuxtal?
[U kʼáatchiʼiloʼob le xookoʼ]
[U tsolajil le oochel teʼ táan juʼun 24]
Jejeláas bix jeʼel u páajtal k-meyajtik Jéeobaeʼ
[U tsolajil le oochel teʼ táan juʼun 25]
Utiaʼal k-jach tsʼáaik óol meyajt Dioseʼ kʼaʼabéet k-jach tuklik maʼalob baʼax ken k-beete