Maʼ k-chaʼik k-lúubul tiʼ u léechoʼob le «j-chuk chʼíichʼoʼ»
Maʼ k-chaʼik k-lúubul tiʼ u léechoʼob le «j-chuk chʼíichʼoʼ»
«Tumen [Jéeoba] ken u tokech tiʼ u léech le j-chuk chʼíichʼoʼ.» (SALMO 91:3, NM.)
1. ¿Máax le «j-chuk chʼíichʼoʼ», yéetel baʼaxten kʼaʼabéet u kanáantkuba máak tiʼ?
TULÁAKAL máaxoʼob meyajtik Jéeobaeʼ yantiʼob utúul nojoch enemigo sen yaan u naʼat yéetel jach u yojel u tus máak. Tu libroi Salmo 91:3 (NM) tiʼ le enemigoaʼ ku yaʼalaʼaltiʼ «j-chuk chʼíichʼ». ¿Máax túun le j-chuk chʼíichʼaʼ? Le revista La Atalaya, 1 tiʼ junio tiʼ 1883, tu yaʼalajeʼ le jach nojoch enemigoaʼ Satanás. Jeʼex utúul máak jach u yojel chuk chʼíichʼeʼ, u Kʼaasilbaʼaleʼ ku yilik u táabsik le máaxoʼob meyajtik Jéeobaoʼ.
2. ¿Baʼaxten ku ketaʼal Satanás yéetel utúul j-chuk chʼíichʼ?
2 Úuchileʼ le chʼíichʼoʼoboʼ ku chukaʼaloʼob tumen jatsʼuts u kʼaayoʼob, jatsʼuts u kʼuʼumeloʼob, utiaʼal ka jaantaʼakoʼob wa utiaʼal ka kʼuʼubkoʼob bey siibal tiʼ Dioseʼ. Baʼaleʼ tak úuchileʼ, le chʼíichʼoʼoboʼ maʼ chéen chʼaʼabil u chuʼukloʼobiʼ tumen jach ku kanáantikubaʼob yéetel kʼoʼoxtakoʼob, le oʼolal utúul j-chuk chʼíichʼeʼ ku yilik u jach kʼaj óolkoʼob utiaʼal u yilik baʼax léechil kun meyajtiʼ. Le Bibliaoʼ ken u ket Satanás yéetel utúul j-chuk chʼíichʼeʼ, ku yáantkoʼon k-kʼaj óolt baʼax léechiloʼob ku meyajtiʼ. U Kʼaasilbaʼaleʼ jach ku yilik xan u kʼaj óoltik cada utúul tiʼ toʼon. Yáaxeʼ, jach ku yilik bixoʼon yéetel baʼax suuk beetik. Tsʼoʼoleʼ, utiaʼal u chukkoʼoneʼ ku tsʼáaik táabsajiloʼob maʼ t-jáan ilik (2 Timoteo 2:26). Wa ka lúubkoʼon tiʼ le léechoʼob ku tsʼáaikoʼ jeʼel k-náachtal tiʼ Jéeobaeʼ, tsʼoʼoleʼ jeʼel xan u biskoʼon tiʼ kíimileʼ. Le oʼolaleʼ, wa k-kʼáat k-kanáantba tiʼ le «j-chuk chʼíichʼ[aʼ]», jach maʼalob ka k-kʼaj óolt baʼax léechiloʼob ku meyajtiʼ.
3, 4. ¿Bix u beetik loob Satanás jeʼel bix utúul chakmoʼoleʼ, yéetel bix u beetik loob jeʼel bix utúul kaaneʼ?
3 Le salmistaoʼ ku ketik xan Satanás yéetel utúul chakmoʼol bey xan yéetel utúul kaan, lelaʼ ku yáantkoʼon k-naʼat maas maʼalob bix u táabsik máak (Salmo 91:13). Jeʼex utúul chakmoʼoleʼ, Satanaseʼ maʼ tu taʼakkuba le ken u beet u chʼaʼapachtaʼal u kaajal Dios tumen le gobiernoʼoboʼ (Salmo 94:20). Maʼ xaaneʼ ken yanak chʼaʼapachtajileʼ yaan tiʼ le máaxoʼob meyajtik Jéeobaoʼ ku xuʼulul u beetkoʼob, baʼaleʼ maʼatech u jach úuchul beyoʼ, tumen le chʼaʼapachtajiloʼ maases ku beetik u muʼukʼantal u fe le máaxoʼob meyajtik Jéeobaoʼ. Baʼaleʼ, ¿baʼaxten ku keʼetel Satanás yéetel utúul kaan?
4 Tiʼ u Kʼaasilbaʼaleʼ ku meyaj le nojoch naʼat yantiʼ utiaʼal u beetik loob jeʼex u beetik utúul kaan u taʼakmubaeʼ. Ikil u beetik beyoʼ tsʼoʼok u kʼaskúuntik u tuukul yaʼab tiʼ le máaxoʼob meyajtik Jéeobaoʼ yéetel tsʼoʼok u beetik u xuʼulul u beetkoʼob baʼax u kʼáat Dios. Baʼaleʼ le máaxoʼob tsʼoʼok u náachtaloʼob tiʼ Jéeobaeʼ tsʼoʼok u bin kʼaasil tiʼob. Utiaʼal túun k-kanáantikbaeʼ, Jéeobaeʼ ku yáantkoʼon k-kʼaj óolt u kʼaakʼas tuukuloʼob Satanás (2 Corintoiloʼob 2:11). Le oʼolaleʼ, koʼox ilik kampʼéel tiʼ le léechoʼob ku meyaj tiʼ le «j-chuk chʼíichʼaʼ».
U chʼaʼabal saajkil tiʼ wíinik
5. ¿Baʼaxten le u chʼaʼabal «sajakil tiʼ wíinikoʼobeʼ» upʼéel léech séeb jeʼel u lúuʼsik máakeʼ?
5 Satanaseʼ u yojel tuláakal máak u kʼáat u lúubul utsil tiʼ u maasil. Le máaxoʼob meyajtik Diosoʼ, u kʼáatoʼob xan ka kʼaʼamkoʼon tumen u maasil. U Kʼaasilbaʼaleʼ u yojel lelaʼ, le oʼolal ku kaxtik bix u satik k-óol utiaʼal ka lúubkoʼon tiʼ u léechoʼob. Upʼéel bix u beetikeʼ letiʼe ka k-chʼaʼa «sajakil tiʼ wíinikoʼob[oʼ]» (Proverbios 29:25). Utúul máax ku xuʼulul u beetik baʼax u kʼáat Dios tumen ku chʼaʼik saajkil tiʼ wíinikeʼ, tsʼoʼok u lúubul tiʼ u léech le «j-chuk chʼíichʼoʼ» (Ezequiel 33:8; Santiago 4:17).
6. ¿Baʼax jeʼel u beetik u lúubul utúul xiʼipal tiʼ u léech le «j-chuk chʼíichʼoʼ»?
6 Koʼox tʼaan tiʼ utúul xiʼipal ku tsʼuʼutsʼik chamal tumen sen aʼalaʼabtiʼ tumen u yéet xookoʼob ka u beete. Maʼ xaaneʼ le ka jóokʼ tu yotoch utiaʼal u bin xookeʼ minaʼan kaʼach u tuukulil tiʼ u tsʼuʼutsʼik chamal. Baʼaleʼ, le baʼax ku beetikoʼ jeʼel u beetik u kʼojaʼantaleʼ yéetel upʼéel baʼax u pʼekmaj Dios (2 Corintoiloʼob 7:1). ¿Baʼaxten lúub tiʼ le léechaʼ? Maʼ xaaneʼ tumen táan u biskuba kaʼach yéetel máaxoʼob maʼ unajiʼ yéetel tumen u kʼáat kaʼach lúubul utsil tiʼob. Le oʼolaleʼ, paalaleʼex, maʼ a chaʼik a tuʼusleʼex tumen le «j-chuk chʼíichʼoʼ». Wa maʼ a kʼáateʼex lúubul tiʼ u léechoʼobeʼ, ilawil a kanáantikabaʼex tak tiʼ le baʼaloʼob bey maʼ tu beetikoʼob kʼaaseʼ. Maʼ u tuʼubulteʼexeʼ le Bibliaoʼ ku yaʼalik maʼ unaj k-amigotik le máaxoʼob maʼ u yaabiltmoʼob Diosoʼ (1 Corintoiloʼob 15:33).
7. ¿Bix u yilik Satanás u satik u yóol le taatatsiloʼob utiaʼal ka xuʼuluk u beetikoʼob baʼax u kʼáat Diosoʼ?
7 Le taatatsiloʼob ku meyajkoʼob Diosoʼ jach ku yilik u tsʼáaikoʼob baʼax kʼaʼabéet tiʼ u familiaʼob (1 Timoteo 5:8). Baʼaleʼ, Satanaseʼ u kʼáat u sat u yóoloʼob yéetel yaan kʼiineʼ ku béeychajal le baʼax u kʼáatoʼ. Yaan jujuntúul sukuʼunoʼobeʼ ku pʼáatal maʼ tu binoʼob muchʼtáambal tumen ku yaʼalaʼaltiʼob tumen u patronoʼob ka pʼáatkoʼob meyaj. Yaan xaneʼ sajak u kʼáat tiʼ u patrón u kʼiinil utiaʼal ka xiʼik u múul adorart Dios yéetel u sukuʼunoʼob tu óoxpʼéel kʼiinil upʼéel asamblea tiʼ distrito. Utiaʼal maʼ k-lúubul tiʼ le léechaʼ jach kʼaʼabéet k-kʼubik óol tiʼ Jéeoba (Proverbios 3:5, 6). Uláakʼ baʼax jeʼel u yáantkoʼoneʼ, letiʼe k-kʼaʼajsik tiaʼanoʼon ichil u kaajal Jéeobaoʼ yéetel le k-kʼaʼajsik u yaʼalmaj yaan u kanáantkoʼon. Taatatsileʼex, ¿ka creertikeʼex wa yaan a wáantaʼaleʼex tumen Jéeoba wa ka beetikeʼex baʼax u kʼáat? ¿Yaan wa a beetkeʼex baʼax u kʼáat Satanás chéen tumen sajakeʼex tiʼ wíinik? Jach maʼalob ka orarnakeʼex yéetel ka tuukulnakeʼex yoʼolal le kʼáatchiʼobaʼ.
U kaxtaʼal ayikʼalil
8. ¿Bix u meyaj tiʼ Satanás u táabsajil u kaxtaʼal ayikʼalil?
8 Le u kaxtaʼal ayikʼaliloʼ uláakʼ táabsajil ku meyaj tiʼ Satanás. Bejlaʼeʼ jach ku túulchʼintaʼal máak utiaʼal ka u yoksuba tiʼ negocioʼob tuʼux ku yaʼalaʼal jach séeb jeʼel u ayikʼaltal máakeʼ. Yaan kʼiineʼ, jujuntúul tiʼ le máaxoʼob meyajtik Dios teʼ múuchʼuliloʼ tsʼoʼok u lúubloʼob tiʼ le táabsajilaʼ, le oʼolal maʼ xaaneʼ jeʼel xan u yaʼalikoʼob toʼoneʼ: «Sen meyajnen beoraaʼ. Le ken chan yanaktech taakʼineʼ, maʼ ken a sen chiʼichnakkúuntaba. Beyoʼ, maʼ xaaneʼ wa a kʼáateʼ, jeʼel tak u páajtal a beetkaba precursorileʼ». Maʼ xaaneʼ lelaʼ letiʼe tuukul yaan tiʼ le máaxoʼob ku yilik u aprovecharkuba tiʼ u sukuʼunoʼob utiaʼal ka ayikʼalchajkoʼoboʼ. Baʼaleʼ le baʼax ku yaʼalikoʼoboʼ, ¿maʼ wa tu yeʼesik táan u tuukuloʼob jeʼex le «j-maʼ naʼat wíinik» tu yaʼalaj Jesús tiʼ upʼéel kettʼaanoʼ? (Lucas 12:16-21.)
9. Le u tsʼíiboltaʼal yaʼab baʼaloʼobeʼ, ¿baʼaxten jeʼel u táabsik jujuntúul sukuʼunoʼobeʼ?
9 Le kʼasaʼan yóokʼol kaab yaan yáanal u páajtalil Satanasoʼ ku túulchʼintik máak u tsʼíibolt yaʼab baʼaloʼob. Maʼ xaaneʼ utúul sukuʼuneʼ jujumpʼíitil jeʼel u tsʼíiboltik ka yanak yaʼab baʼaloʼob tiʼeʼ ka tak xuʼuluk u tsʼáaik táanil u meyajtik Dios (Marcos 4:19). Le Bibliaoʼ ku yaʼaliktoʼon ka kiʼimakchajak k-óol chéen yéetel ka yanaktoʼon baʼax k-jaante yéetel baʼax k-búukinte (1 Timoteo 6:8). Baʼaleʼ, yaʼab máakoʼobeʼ tumen maʼ tu beetkoʼob baʼax ku yaʼalik le tsolnuʼukaʼ, tsʼoʼok u lúubloʼob tiʼ u táabsajil le «j-chuk chʼíichʼoʼ». Maʼ xaaneʼ yaneʼ tumen nojbaʼal u yuʼubkubaeʼ ku tuklik unaj u bisik upʼéel kuxtal maas maʼalob. ¿Kux túun toʼon? ¿Tsʼoʼok wa xan u xuʼulul k-tsʼáaik táanil k-meyajtik Jéeoba tumen k-tsʼíiboltik ka yanaktoʼon yaʼab baʼaloʼob? (Ageo 1:2-8.) Yaj loʼobal, baʼaleʼ jujuntúul sukuʼunoʼobeʼ ken pʼáatak minaʼan taakʼin tiʼobeʼ ku tsʼáaikoʼob táanil u maas meyajoʼob utiaʼal ka yanaktiʼob upʼéel kuxtal jeʼex suukiltiʼobeʼ. ¡Le «j-chuk chʼíichʼoʼ» jach utstutʼaan ka beetaʼak beyaʼ!
Náaysaj óoloʼob ku beetikoʼob kʼaas
10. Toʼon táan k-meyajtik Dioseʼ, ¿tiʼ baʼax jach maʼalob ka tuukulnakoʼon?
10 Uláakʼ baʼax ku meyaj tiʼ le «j-chuk chʼíichʼoʼ» letiʼe u satik u yóol máak utiaʼal ka u yil maʼalob le baʼax kʼaasoʼ. Jeʼex le tuukul yaan kaʼach tiʼ u kajnáaliloʼob Sodoma yéetel Gomorraeʼ, bejlaʼeʼ láayliʼ letiʼe tuukul yaan tiʼ óoliʼ tuláakal le máaxoʼob beetik le baʼaxoʼob utiaʼal u náaysik u yóol máakoʼ. Tiʼ noticieroʼob yéetel tak tiʼ revistaʼobeʼ, ku yeʼesaʼal maʼ kʼaas u beetaʼal loobiʼ yéetel ku beetik xan u kʼaakʼas tsʼíiboltaʼal le núupchitaloʼ. Yaʼab tiʼ le náaysaj óoloʼob yanoʼob bejlaʼoʼ ku pixik u tuukul le máakoʼoboʼ utiaʼal maʼ u «chʼaʼanuʼuktikoʼob baʼax le utsoʼ bey xan baʼax le kʼaasoʼ» (Hebreob 5:14). Baʼaleʼ, maʼ u tuʼubultoʼon le baʼax tu yaʼalaj le profeta Isaíasaʼ: «¡Yaj yanileʼex máaxeʼex ka waʼalikeʼex uts tiʼ baʼax kʼaas; tiʼ baʼax kʼaaseʼ uts[!]» (Isaías 5:20). Le «j-chuk chʼíichʼoʼ», ¿tsʼoʼok wa xan u kʼaskúuntik k-tuukul yéetel le náaysaj óoloʼob maʼ maʼalobtakoʼ? Toʼon táan k-meyajtik Dioseʼ jach maʼalob ka tuukulnakoʼon yoʼolal lelaʼ (2 Corintoiloʼob 13:5).
11. ¿Baʼax tu yaʼalaj le revista La Atalaya yoʼolal le novelasoʼ?
11 Óoliʼ veinticinco jaʼaboʼob bejlaʼeʼ, le revista La Atalayaoʼ, tu yaʼalaj maʼ maʼalob ka chaʼantaʼak le novelas ku máansaʼal teʼ televisionoʼ. Le ka tʼaanaj tiʼ bix jeʼel u kʼaskúuntik u tuukul máak le novelasoʼ, le revistaoʼ tu yaʼalaj: «Teʼ novelasoʼ ku yeʼesaʼal maʼ kʼaas ka beetaʼak jeʼel baʼaxak utiaʼal u kaxtaʼal le yaabilajoʼ. Jeʼex tiʼ upʼéel novelaeʼ, utúul chʼúupal embarazada maʼ tsʼokaʼan u beeleʼ ku yaʼalik tiʼ u amiga: “Baʼaleʼ teneʼ in yaabilmaj Victor. Baʼal in kʼáajtiʼ jeʼel baʼaxak bíin úuchkeʼ. [...] ¡Kex ka yanak in aktáantik jeʼel baʼalak talamileʼ, in wojéeltik yaan yantalten utúul u hijoeʼ ku beetik u kiʼimaktal in wóol!”. Le chaambel paax ku yuʼubal le táan u tsikbaloʼoboʼ ku yáantaj utiaʼal ka tuklaʼak maʼ kʼaas le baʼax ku beetik le chʼúupaloʼ. Le koʼolel chaʼantik le novelaaʼ uts xan u lúubul Victor tiʼ yéetel ku chʼaʼik óotsilil tiʼe chʼúupaloʼ. “Ku naʼatik bix u yuʼubkuba”. Utúul koʼolel suuk kaʼach u chaʼantik novelaseʼ, tu yaʼalaj: “Máakeʼ maʼ tu jáan tsʼáaik cuenta wa kʼaas baʼax ku beetaʼaliʼ. K-ojel maʼ maʼalob u núup chital máak yéetel máax maʼ u núupiʼ. [...] Baʼaleʼ tin tsʼáaj cuentaeʼ ichil in tuukuleʼ maʼalob in wilik le baʼax ku beetaʼal teʼ novelaoʼ”».
12. ¿Baʼax eʼesik láayliʼ kʼaʼabéet u kanáantikuba máak tiʼ le novelasoʼ?
12 Desde teʼ jaʼab ka tʼaanaj le revista La Atalaya tiʼ le novelas tak bejlaʼoʼ, jach tsʼoʼok u maas yaʼabtal máaxoʼob chaʼantik. Yaan tuʼuxoʼobeʼ bulkʼiin yéetel bul áakʼab táan u máansaʼaloʼobiʼ. Xiiboʼob, koʼoleloʼob tak táankelem paalaloʼobeʼ jach utstutʼaan u chaʼantkoʼob. Baʼaleʼ, toʼon táan k-meyajtik Jéeobaeʼ maʼ unaj k-tusikbaiʼ. Maʼ maʼalob ka k-tukult wa maʼ kʼaas u chaʼantaʼal le novelas chéen tumen k-tuklik maas kʼaas le baʼax ku yilaʼal u yúuchul way yóokʼol kaabeʼ. Baʼaleʼ, utúul sukuʼuneʼ, ¿jeʼel wa u páajtal u yaʼalik maʼ kʼaas ka u chaʼant baʼax ku beetik le máakoʼob mix utéen jeʼel u invitarkoʼob tu yotocheʼ?
13, 14. ¿Baʼax tu yaʼalaj jujuntúul tiʼ le máaxoʼob tu xokoʼob le baʼax tu yaʼalaj le revista yoʼolal le novelasoʼ?
13 Yaʼab sukuʼunoʼobeʼ tu jóoʼsoʼob yaʼab utsil tumen tu beetajoʼob le baʼax aʼalaʼab teʼ revista tumen «le palitsil chúukpajaʼan u yóol yéetel yaan u naʼat[oʼ]» (Mateo 24:45-47). Yaan tiʼ le máaxoʼob tu xokoʼobeʼ, tu tsʼíibtoʼob cartaʼob utiaʼal u yaʼalikoʼob bix úuchik u yáantaʼaloʼob tumen le revistaoʼ. Utúul koʼoleleʼ tu yaʼalaj: «Ich trece jaʼaboʼob jach kin chaʼantik kaʼach le novelasoʼ. Kin tuklik kaʼacheʼ utiaʼal maʼ in náachtal tiʼ Dioseʼ chéen yaan yéetel ka xiʼiken muchʼtáambal yéetel ka jóoʼken kʼaʼaytaj chéen wa baʼax kʼiin. Baʼaleʼ maʼ bey úuchikiʼ. Joʼopʼ in tuukul jeʼex u tuukul le máaxoʼob kin chaʼantik teʼ novelasoʼ: wa a wíicham ku jatsʼkech yéetel wa maʼ u yaabilmecheʼ, maʼ kʼaas ka a tus yéetel yaanaliʼ, tumen letiʼeʼ maʼ u yaabilmechiʼ. Tumen tin tuklaj maʼ kʼaaseʼ, tin tusaj in wíicham yéetel beyoʼ tin kʼebankúunsiba tu contra Jéeoba yéetel tu contra in wíicham». Le koʼolelaʼ jóoʼsaʼab tiʼ u kaajal Jéeoba, baʼaleʼ ka máan kʼiineʼ tu tsʼáaj cuenta maʼ maʼalob baʼax tu beetiʼ, arrepentirnaji yéetel kʼamaʼab tu kaʼatéen ichil u kaajal Dios. Le xookoʼob tʼaanajoʼob tiʼ u kʼaʼabéetil u kanáantikuba máak tiʼ le novelasoʼ, letiʼ tsʼáaj u muukʼil tiʼ utiaʼal u jáawal u chaʼantik baʼaxoʼob u pʼekmaj Jéeobaoʼ (Amós 5:14, 15).
14 Uláakʼ carta túuxtaʼabeʼ, ku yaʼalik: «Okʼolnajen le ka tin xokaj le revistaoʼ, tumen tin tsʼáaj cuenta maʼ yéetel chúukaʼan óolal táan in meyajtik Jéeobaiʼ. Tin waʼalaj tiʼ Dios yaan in xulik in chaʼantik le novelasoʼ». Utúul kiik jach suuk kaʼach u chaʼantik le novelasoʼ, ka tsʼoʼok u tsʼáaik u nib óolalil yoʼolal le baʼax tu xokoʼ, tu yaʼalaj: «Maʼ in wojel kaʼach [...] wa jeʼel u beetik in náachtal tiʼ Jéeobaeʼ. ¿Bix ken in bisimba yéetel le [máaxoʼob ku chíikpajloʼob teʼ novelasoʼ] yéetel ka in bisimba xan yéetel Jéeoba?». Wa walajkil veinticinco jaʼaboʼob ku kʼaskúuntik u tuukul máak le novelasoʼ, ¿kux túun bejlaʼeʼ? (2 Timoteo 3:13.) Maʼ unaj k-tuklik wa maʼ ken u beettoʼon loob le táabsajil ku tsʼáaik Satanás, jeʼex le novelasoʼ, le báaxloʼob tiʼ videos tuʼux ku beetaʼal looboʼ yéetel u videoiloʼob paax tuʼux ku beetaʼal baʼaxoʼob kʼaastak wa subtsiltakoʼob.
U yantal talamil ich máaxoʼob meyajtik Dios
15. U Kʼaasilbaʼaleʼ, ¿bix jeʼel u léechtik jujuntúul sukuʼunoʼobeʼ?
15 Satanaseʼ utiaʼal u luʼsik le jeetsʼelil yaan ichil u kaajal Diosoʼ ku aprovecharkuba tiʼ le talamiloʼob ku yantal ichil le sukuʼunoʼoboʼ. Jeʼel máaxak jeʼel u lúubul tiʼ le táabsajilaʼ, kex jeʼel baʼaxak meyajil tsʼaʼan u beet teʼ múuchʼuliloʼ. U Kʼaasilbaʼaleʼ ku léechtik jujuntúul sukuʼunoʼob utiaʼal ka yanak kʼuuxilil ichiloʼob yéetel beyoʼ maʼ u múul meyajkoʼob Jéeoba yéetel kiʼimak óolal (Salmo 133:1-3).
16. Kex maʼ tu jáan tsʼaʼabal cuentaeʼ, ¿bix jeʼel u luʼsik Satanás le jeetsʼelil yaan ichil u kaajal Diosoʼ?
16 Teʼ Yáax Nojoch baʼateltáambaloʼ, Satanaseʼ taak kaʼach u xuʼulsik tiʼ u kaajal Jéeoba le oʼolal tu beetaj u chʼaʼapachtaʼal. Baʼaleʼ maʼ jóokʼ yéetel baʼax u kʼáatiʼ (Apocalipsis 11:7-13). Desde teʼ kʼiinoʼob jeʼeloʼ, Satanaseʼ táan u yilik u luʼsik le jeetsʼelil yaan ichil u kaajal Jéeobaoʼ, yéetel ku beetik upʼéel bix maʼ tu jáan tsʼaʼabal cuenta. Le oʼolaleʼ wa yoʼolal upʼéel talamil ku xuʼulul k-bisikba yéetel utúul sukuʼuneʼ, táan k-beetik baʼax u kʼáat le «j-chuk chʼíichʼoʼ». Kex maʼ t-jáan tsʼáaik cuentaeʼ, jeʼel k-beetik u lukʼul u kiliʼich muukʼ Jéeoba ich k-kuxtaleʼ yéetel teʼ múuchʼuliloʼ. Leloʼ jach jeʼel u beetik u kiʼimaktal u yóol Satanaseʼ, tumen u yojel wa ku luʼsik le jeetsʼelil yéetel le yaabilaj yaan ichil le múuchʼuliloʼ jeʼel u beetik u talamtal u kʼaʼaytaʼal le maʼalob péektsiloʼ (Efesoiloʼob 4:27, 30-32).
17. ¿Baʼax unaj a beetik wa ku yantaltech upʼéel talamil yéetel utúul sukuʼun?
17 ¿Baʼax jeʼel u páajtal k-beetik wa ku yantaltoʼon upʼéel talamil yéetel utúul sukuʼuneʼ? U jaajileʼ jeʼel u yantal jejeláas talamiloʼobeʼ. Baʼaleʼ, kex yaan kʼiin yaan baʼax oʼolal k-kʼuuxil yéetel k-sukuʼuneʼ, leloʼ maʼ u kʼáat u yaʼal wa maʼ tu páajtal k-utskíintik le talmiloʼ (Mateo 5:23, 24; 18:15-17). Le tsolnuʼukoʼob yaan teʼ Bibliaoʼ jach maʼalobtakoʼob tumen tiʼ Dios u taal. Le oʼolaleʼ unaj k-beetik baʼax ku yaʼalik le Bibliaoʼ tumen mantatsʼ ku taasik utsil.
18. Le u perdonarkoʼon Jéeobaoʼ, ¿bix u yáantkoʼon k-utskíint le talamiloʼob ku yantaltoʼon yéetel le sukuʼunoʼoboʼ?
18 Jéeobaeʼ utúul Dios jach tu jaajil ku «saʼatsaj siʼipil» (Salmo 86:5; 130:4). Upʼéel bix jeʼel k-eʼesik u paalaloʼon Jéeobaeʼ letiʼe ka k-beet jeʼex letiʼoʼ (Efesoiloʼob 5:1). Tuláakloʼoneʼ kʼeban wíinkoʼon le oʼolal jach kʼaʼabéet ka perdonartaʼakoʼon tumen Jéeoba. Le beetikeʼ, unaj k-kanáantikba wa k-ilik ku chan talamtaltoʼon k-perdonartik wa máax. Maʼ xaaneʼ jeʼel u yúuchultoʼon le baʼax úuch tiʼ le palitsil tu yaʼalaj Jesús maʼ tu perdonartaj u pʼaax u yéet palitsileʼ. Le reyoʼ le ka tu yojéeltaj baʼax tu beetaj le kʼasaʼan palitsiloʼ, tu yaʼalaj ka kʼaʼalak cárcel tumen letiʼeʼ tsʼokaʼaniliʼ u perdonartik u pʼaax kex maas yaʼab kaʼachiʼ. Jesuseʼ tu tsʼoʼoksaj le kettʼaan táan u yaʼalik: «Bey xan kun u beet ta wéeteleʼex in Taata yaan teʼ j-kaʼanoʼ wa maʼ ta saʼatsikeʼex yéetel tuláakal a puksiʼikʼaleʼex u siʼipiloʼob a sukuʼuneʼex» (Mateo 18:21-35). Maʼalob ka tuukulnakoʼon tiʼ le kettʼaanaʼ yéetel ka k-kʼaʼajs jaytéen tsʼoʼok k-perdonartaʼal tumen Jéeoba. Leloʼ, jeʼel u péekskoʼon k-utskíint jeʼel baʼalak talamil ka yanaktoʼon yéetel k-sukuʼunoʼobeʼ (Salmo 19:14).
Kanáantaʼanoʼon «tu yáanal u boʼoyil» Jéeoba
19, 20. ¿Bix unaj k-ilik le kanan ku tsʼáaik Jéeoba teʼ talam kʼiinoʼobaʼ?
19 Bejlaʼeʼ kuxaʼanoʼon tiʼ talam kʼiinoʼob. Wa maʼ k-kanáantaʼal tumen Jéeobaeʼ bejlaʼa úuch xuʼulsaʼaktoʼon tumen Satanaseʼ. Le oʼolaleʼ, utiaʼal maʼ k-lúubul tiʼ u léechoʼob le «j-chuk chʼíichʼoʼ» unaj k-antal «yáanal u kanan le máax yaan tuláakal páajtalil tiʼoʼ», unaj k-pʼáatal «tu yáanal u boʼoyil» Jéeoba (Salmo 91:1).
20 Le oʼolal túuneʼ, mantatsʼ unaj k-ilik u leyoʼob yéetel u tsolnuʼukoʼob Jéeoba bey upʼéel áantaj utiaʼal u kanáantkoʼoneʼ maʼ bey baʼaxoʼob maʼ tu chaʼik k-beetik mix baʼaleʼ. Tiʼ toʼoneʼ yaan utúul enemigo jach yaan u naʼat. Chéen yéetel u yáantaj Jéeoba jeʼel u páajtal k-púutsʼul tiʼ u léechoʼobeʼ (Salmo 124:7, 8). Le beetik túuneʼ, unaj k-kʼáatik tiʼ Jéeoba ka u yáantoʼon utiaʼal maʼ k-lúubul tiʼ u léechoʼob le «j-chuk chʼíichʼoʼ» (Mateo 6:13).
¿Kʼajaʼan wa tech?
• ¿Baʼaxten upʼéel nojoch léech le u chʼaʼabal «sajakil tiʼ wíinikoʼobeʼ»?
• ¿Bix u meyaj tiʼ Satanás u táabsajil u kaxtaʼal ayikʼalil?
• ¿Bix tsʼoʼok u meyaj tiʼ Satanás le náaysaj óoloʼob maʼ maʼalobtak utiaʼal u táabsik jujuntúul sukuʼunoʼoboʼ?
• ¿Baʼax táabsajil ku meyaj tiʼ Satanás utiaʼal u luʼsik le jeetsʼelil yaan teʼ múuchʼuliloʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 28]
Yaan máaxoʼob tsʼoʼok u lúubloʼob tiʼ u léechil u chʼaʼabal «sajakil tiʼ wíinikoʼob»
[U tsolajil le oochel teʼ táan juʼun 29]
¿Utstatʼaan wa a náaysik a wóol yéetel le baʼaxoʼob u pʼekmaj Jéeobaoʼ?
[U tsolajil le oochel teʼ táan juʼun 31]
¿Baʼax jeʼel u páajtal k-beetik wa yantoʼon upʼéel talamil yéetel utúul sukuʼuneʼ?